Shongshong
| Resource ID | G1 |
|---|---|
| Place Type | Monastery |
| Coordinates | 29°40'37"N 89°8'13"E |
| Links | Shangpa Foundation The treasury of Lives BDRC G4783 |
Name Variants
zhong zhong rdo rje gdan
zhong shong
zhang zhong
zhang zhang
gzhong zhong
gzhong gzhong
Associated Persons
Monastry Founded by
Primary seat
History
- Established: 1021/1121?
Notes
Original seat of the Shangpa Kagyü and rme'u clan. Founded by Khyungpo Neljor. Recently rebuilt.In rnam gling gi lo rgyus rig gnas mdor bstan (W3CN7069 p.217): གཞོང་གཞོང་དགོན།
དགོན་དེ་ཡང་རྣམ་གླིང་གྲོང་རྡལ་ཆབ་འོག་གྲོང་ཚོར་གནས་པ་དང་རྣམ་གླིང་ནས་ཤར་ལྷོ་མཚམས་སུ་སྤྱི་ལེ༦ཙམ་བསྐྱོད་ན་དགོན་འདི་མཇལ་རྒྱུ་ཡོད།
མཚན་རྒྱས་པར། གཞོང་གཞོང་རྡོ་རྗེ་གདན་ཡང་ཞུ། གཞོང་གཞོང་དགོན་ནི་བོད་ཀྱི་བཙན་པོ་རྒྱལ་ཐོག་སོ་གཉིས་པ་སྲོང་བཙན་སྒམ་པོའི་སྐུ་དུས་སུ་བོད་ཡུལ་རུ་ཆེན་ལྔར་ཕྱེ་སྟེ། བོད་ཀྱི་ལོ་རྒྱུས་རགས་རིམ་གཡུ་ཡི་ཕྲེང་བ་ཞེས་པ་ལས། དབུ་རུ་དང་། གཡོ་རུ། གཡས་རུ། རུ་ལག །སུམ་པའི་རུ་བཅས་ལས། གཡས་རུ་སྟེ་དབུས་ཚང་ཤངས་ཀྱི་གཞོང་པ་ཚལ་ལ་བྱས་པ་གཡས་རུ་ཞེས་པའི་ནང་གི་ཞོང་པ་ཚལ་ནི་ད་ལྟའི་གཞོང་གཞོང་རྡོ་རྗེ་གདན་གྱི་གནས་དེར་ཡིན་ཞིང་སྐབས་དེ་དུས་གཞོང་གཞོང་ཟེར་བ་མ་ཡིན་པར་གཞོང་པ་ཚལ་ཞེས་བརྗོད་པར་འདུག་གཞོང་པ་ཚལ་ཞེས་བརྗོད་དགོས་དོན་ནི། ས་ཆ་དེའི་མཐའ་མཐོ་ལ་དཀྱིལ་དམའ་བ་ལྟོ་སྣོད་ཀྱི་གཞོང་པ་དང་འདྲ་བ་རྒྱུ་མཚན་དུ་བྱས་ནས་མིང་བཏགས། རིམ་བཞིན་གཞོང་གཞོང་ངམ་ཞང་ཞོང་༼ཞང་ཞང་༽ཞེས་མིང་བསྒྱུར། དགོན་པ་ཕྱག་བཏབ་རྗེས་ལུང་པའི་མིང་ལ་གཞོང་གཞོང་དང་གཞོང་གཞོང་དགོན་ཞེས་ས་མིང་དགོན་པ་ལ་བཏགས་པ་ཡིན།
དགོན་པ་དེ་ནི་རབ་བྱུང་གཉིས་པའི་ལྕགས་གླང་ལོ་སྟེ། སྤྱི་ལོ་༡༡༢༡ལོར་མཁས་གྲུབ་ཁྱུང་པོ་རྣལ་འབྱོར་གྱིས་ཕྱག་བཏབ། གངས་ཅན་བོད་ཀྱི་གནས་བཤད་ལམ་ཡིག་གསར་མའི་ནང་དུ་འཁོད་པ་ལྟར་ན། མཁས་གྲུབ་ཁྱུང་པོ་རྣལ་འབྱོར་ནི་སྒྲུབ་རྒྱུད་ཤིང་རྟ་བརྒྱད་པའི་ནང་ཚན་ཤངས་པ་བཀའ་རྒྱུད་སྲོལ་གཏོད་གནང་མཁན་དང་། ཁོང་ནི་སྙེ་མོ་ར་མངས་ཞེས་པར་སྤྱི་ལོ་༩༠༩ལོར་ཡབ་ཁྱུང་རྒྱལ་སྟག་སྐྱེས་དང༌། ཡུམ་འགོས་བཟའ་བཀྲ་ཤིས་གཉིས་ཀྱི་སྲས་སུ་འཁྲུངས།
ཆོས་འབྱུང་མཁས་པའི་དགའ་སྟོན་ནང་དགོན་དེའི་རྒྱབ་རི་དེར་གླང་རི་འོད་ལྡན་གསེར་མདོག་ཅན་ཞེས་འཁོད། འོན་ཀྱང་རྣམ་ཀུན་ཡུལ་དེ་གའི་མི་དང་ཉེ་འཁོར་གྱི་མི་རྣམས་ཀྱི་དེར་གླང་རི་ཞེས་བརྗོད་པ་ལས། གླང་རི་འོད་ལྡན་གསེར་མདོག་ཅན་ཞེས་འབོད་སྲོལ་མི་འདུག །གླང་རི་ཞེས་བརྗོད་པའི་རྒྱུ་མཚན་རི་འདིའི་སྟེང་རྫ་ཞིག་ཡོད་པ་དེའི་དབྱིབས་གླང་པོ་ཆེ་དང་འདྲ་བ་དང་། འོད་ལྡན་ནི་གླང་པོ་དེའི་སྟེང་དུ་ནོར་བུ་མེ་འབར་བཀལ་བ་དང་འདྲ་པོ་ཡོད་པས་གླང་པོ་རི་འོད་ལྡན་ཟེར་བར་འདུག །གླང་པོ་དེ་རྒྱལ་པོའི་ཆས་སྤྲས་པ་ཞིག་གིས་ལྕགས་ཐག་གི་འཁྲིད་པའི་ཚུལ་གྱི་གཟུགས་བརྙན་མཐོང་ཐུབ། ཡང་སྒོས་སུ་རྟ་བདུན་ནུབ་ཕྱོགས་ཆུ་ལྷའི་འཕང་བར་བྱོན་སྐབས་ཤངས་ཆུའི་ཕ་རོལ་ནས་བལྟས་ཚེ་རི་དེའི་སྟེང་གི་གླང་པོ་ཆེ་དང་ནོར་བུ་མེ་འབར་ལ་སོགས་དེ་བས་གསལ་བར་མཐོང་ཐུབ་ཞེས་དམངས་ཁྲོད་དུ་ཤོད་སྲོལ་འདུག །རྒྱབ་རི་དེའི་ཐོད་ཙམ་ལ་འཕྲེད་ལམ་འདྲ་བ་ཞིག་ཡོད་པས་དེར་རྒྱང་བལྟ་བྱས་པའི་ཚེ་ཁ་བཏགས་གཡོགས་པ་ཞིག་དང་གཉིས་སུ་མ་མཆིས་པས་དེ་ནི་མཁའ་འགྲོའི་དར་ཡིན་ཞེས་གྲགས། དེར་གནས་པའི་སྐྱེ་བོ་རྣམས་ཀྱིས་སྔ་མོ་ནས་བཟུང་དམངས་གཞས་འདི་འདྲ་བཏང་སྲོལ་འདུག
།གཞོང་གཞོང་ཁྱུང་པོའི་གནས་ལ། མཁའ་འགྲོའི་དར་ཞིག་བཏང་ཡོད། རྒྱབ་རི་༼ནས་༽སྐྱེས་མ་གནང་མཁན། མཁས་གྲུབ་ཁྱུང་པོ་རྣལ་འབྱོར། མདུན་རི་༼ནས་༽བསུ་མ་གནང་མཁན། སྲིན་མོའི་མ་དང་མཁའ་འགྲོ། ཆོས་བསྐལ་ཡོད་པའི་མི་རྣམས། དར་གྱི་སྣེ་ནས་བཟུང་ཞིག །ཆོས་བསྐལ་མེད་པའི་མི་རྣམས། དར་ལ་གཟིགས་མོ་གཟིགས་དང༌།
ཞེས་དེ་ལྟ་བུའི་གནས་ཁྱད་པར་ཅན་དེར་དགོན་ཆགས་པ་ནས་རིམ་བཞིན་རྒྱ་སྐྱེད་བཏང༌། མཁས་གྲུབ་ཁོང་གི་སྐུ་དུས་སུ་ད་ལྟ་དགོན་པ་ནས་ཤར་དུ་སྤྱི་ལེ་གསུམ་ཙམ་ཕྱིན་ན་ས་མིང་དུ་གདོང་དཀར་སྒང་ཞེས་པ་དེར་མ་སླེབས་ཙམ་གྱི་སར་དགོན་པའི་རྒྱལ་སྒོ་ཤར་མ་དང་མཁས་གྲུབ་དེ་ཉིད་ཀྱི་ཕོ་བྲང་ཤར་མ་ཡོད་ཅེས་ཤོད་སྲོལ་འདུག་ལ་དེར་གྱང་རོ་ཡང་འདུག །དེ་དུས་དགོན་པའི་ཚོགས་དུང་ཡང་ཤར་ནུབ་གཉིས་སུ་ཕྱེ་སྟེ་ཆིབས་རྟ་ཆིབས་ནས་གཏོང་དགོས་ཡོད་པའི་སྐོར་གསུངས་འདུག །ཁོང་གི་འགྲམ་དུ་རི་ཆུ་ཀླུང་གསུམ་བརྒལ་ནས་གནས་འདིར་སློབ་སྦྱོང་དང་གདམས་པ་ཞུ་བར་ཡོང་མཁན་ཤིན་ཏུ་མང་། གྲྭ་པ་མང་དུས་ཁྲི་ཚོ་བརྒྱད་ཙམ་འདུས་པའི་སྐོར་ཡོད་ལ་དབུས་གཙང་ཁམས་ཀྱི་སློབ་མ་ཕན་ཚུན་མ་འཆམ་པའི་སྐོར། དཔལ་ལྡན་ཤངས་པའི་གསེར་ཆོས་རྣམ་ལྔའི་རྒྱ་གཞུང་ཀ་ཡི་ནང་དུ་གསང་བ་སྤྱི་རྒྱུད་བཤད་པའི་འཚོ་བ་འདྲེན་པ་ལ་དབུས་གཙང་ཁམས་གསུམ་གྱི་སློབ་མ་རྣམས་ཕན་ཚུན་མ་འཆམ་པར་ཞེས་འཁོད། སྐབས་དེར་སློབ་མའི་ཚོགས་པ་དེ་ཙམ་གྱི་མང་པོ་ཡོད་དུས་དེའི་སྐབས་ཀྱི་མཆོད་ཡོན་སྦྱིན་བདག་ཡང་གང་འདྲ་ཡོད་སྙམ་པའི་བློ་སྐྱེས་སྲིད་མོད་སྐབས་དེའི་མཆོད་ཡོན་སྦྱིན་བདག་ནི་དེ་སྔོན་ཁོང་གི་སྲུ་མོ་བཟའ་མི་གཉིས་ལ་བུ་ཕྲུག་མེད་ཅིང་དེར་བཅོས་ཐབས་གནང་བས་བཟའ་མི་གཉིས་ཀྱི་འདོད་པ་བཞིན་བུ་གསུམ་བྱུང་བ་མ་ཟད་དེ་རྣམས་ནི་མཁས་གྲུབ་ཁྱུང་པོ་ཁོང་བླ་མ་ཤངས་པར་གྲགས་པའི་དུས་ཀྱི་མཆོད་ཡོན་སྦྱིན་བདག་ཏུ་གྱུར་བའི་སྐོར་ཤངས་པ་བཀའ་བརྒྱུད་ཀྱི་བླ་རབས་རྣམ་ཐར་ནང་ལྷ་མོ་དཀར་མོར་གྲགས་པ་ཞིག་བྱོན་ནས། བུ་གསུམ་བྱུང་བ་གྱུར་རོ། བུ་ཆེ་བ་ཤངས་པ་དགོན། བུ་འབྲིང་བ་ཤངས་པ་དར། བུ་ཆུང་བ་ཤངས་ཆུང་དུ་ཐོགས་ཤིག་ཁྱོད་བླ་མ་ཤངས་པར་གྲགས་པའི་དུས་སུ་བུ་སྤུན་གསུམ་པོ་དགོན་འདིའི་རྩ་བའི་ཡོན་བདག་ཏུ་གྱུར་ཏེ་ལོ་རེ་བཞིན་དུ་ནས་ཁལ་སྟོང་ཚོ་གསུམ་གསུམ་དང་། གསེར་གཡུ་རྟ་ཁྲབ་ལ་སོགས་པའི་ཞབས་ཏོག་བྱེད་པར་འགྱུར་རོ་གསུངས་ནས། ལྡོང་ཁང་གི་སོགས་སུ་བུ་སྤུན་གསུམ་གྱི་མིང་བྲིས་པས་བུ་གསུམ་བྱུང་ནས་བདག་གི་རྩ་བའི་ཡོན་བདག་ཏུ་འགྱུར་རོ་ཞེས་འཁོད། དེ་ན་རེ་ཞིག་བཏང་སྙོམས་སུ་འཇོག་རྒྱུ་ལས་མཐའ་གཅིག་ཏུ་དེ་དུས་ཀྱི་མཆོད་ཡོན་སྦྱིན་བདག་གོང་བསྟན་གསུམ་པོ་ཁོ་ན་ཡིན་ཞེས་ཁ་ཚོན་གཅོད་དཀའ།
དེ་ཡང་སྐབས་དེ་དུས་དགོན་པ་སྤྱི་ཡོངས་རྒྱ་ཆེན་པོ་ཡོད་ཀྱང་། ཁོང་གི་བཞུགས་གནས་གཙང་ཁང་ཞེས་པ་དེ་དེ་ཙམ་གྱི་ཆེན་པོ་མེད་པར་བརྟེན། ཉེ་གནས་ཀྱིས་གཙང་ཁང་ཆུང་སྐྱོན་བླ་མ་ལ་ཞུས་པས། བླ་མས་སྐྱོན་མེད། ངས་ཕར་འབུད་ཙམ་བྱས་ན་དེ་གས་འགྲིག་གསུངས་ཁོང་གིས་ཕར་འབུད་པ་ཡིན་ཞེས་ངག་རྒྱུན་དུ་ཡོད་བཞིན་རྩིག་ངོས་དེ་གཞན་དང་མི་འདྲ་བར་ཕར་དོན་ནས་བསྡད་པ་དེང་སང་གི་བར་དུ་ཡང་མ་ནུབ་པར་ཀུན་གྱི་མིག་ལམ་དུ་གནས། དེ་ནས་ཁྱུང་པོ་ཁོང་སྐུ་ཚེའི་འདུ་བྱས་མ་བཏང་གོང་སློབ་མའི་འཁོར་ཚོགས་ཁྲི་ཚོ་བརྒྱད་དེབ་ཐེར་དགའ་ཞིག་ཏུ་ཁྲི་ཚོ་བཅོ་བརྒྱད་ཞེས་བླ་མ་ཡི་དམ་གྱི་ལུང་བསྟན་རྣམས་སྒྲུབ་རྗེས་བླ་མའི་ཞལ་ནས། དཔལ་ལྡན་ཤངས་པའི་གསེར་ཆོས་རྣམ་ལྔའི་རྒྱ་གཞུང་ལས། ང་རྒྱ་གར་གྱི་བླ་མ་རྣམས་ཀྱི་དབང་བཞི་རྫོགས་པར་བསྐུར་བའི་རྗེས་སུ། ཡེ་ཤེས་སེམས་དཔལ་དངོས་སུ་བལྟིམས་པ་ཡིན་པས། ཡེ་ཤེས་སེམས་དཔལ་མ་གཤེགས་པར་སྤུར་སྦྱངས་སུ་མི་བཏུབ་སྟེ། ད་ལྟ་ང་ལས་ལྷག་པའང་ནམ་ཡང་མེད་དེ། ང་དང་མཉམ་པ་ཡང་མེད་པས། ངའི་སྤུར་མ་སྦྱངས་བར་རིན་ཆེན་གསེར་དངུ་ལ་དང་། ཟངས་ལྕགས་ཀྱི་གའུ་གྱིས་ལ། དེར་ང་ཡི་སྤུར་བཞུགས་ལ་མཆོད་པ་ཕུལ། དེ་ལྟར་བྱས་ན་གཞོང་གཞོང་གི་གནས་འདི་ནི་རྡོ་རྗེ་གདན་གཉིས་པར་གྲགས་པ་ལྟ་བུ་ལ་ངའི་ཆོས་རྒྱུད་འདི་ཡང་ཆུ་བོའི་རྒྱུན་བཞིན་དུ་འོང་བར་འདུག་སྟེ། ཁྱེད་རྣམས་ཀྱི་གྲོས་ཉེས་ཅིག་བྱེད་དམ་གསུངས། ཞེས་འཁོད། དོན་དངོས་སུ་ཡང་ཁོང་གི་གསུངས་པ་བཞིན་སློབ་མ་ཕན་ཚུན་དབར་ཁོང་གི་སྐུ་གདུང་ཐད་རྩོད་པ་ཤོར་བ་དང་། ལྷག་པར་ཁམས་ནས་ཡོང་བའི་སློབ་མ་རྣམས་ཀྱིས་སྐུ་གདུང་ཁམས་སུ་གདན་འདྲེན་ཞུ་རྩིས་བྱས། མཐར་གདན་འདྲེན་ཞུ་མི་ཐུབ་པར་གཞོང་གཞོང་དགོན་དུ་སྤུར་སྦྱངས་ཞུ་རྒྱུ་ལས་ཐབས་མ་བྱུང་བར་གྲགས། སྐབས་དེར་སློབ་མ་རྣམས་ཀྱི་བླ་མའི་བཀའ་གསུངས་ཅི་སྒྲུབ་ཞུས་ན་གཞོང་གཞོང་དགོན་རྡོ་རྗེ་གདན་གཉིས་པ་ལྟ་བུར་ཡོང་བ་ཞེས་གསུངས། འགའ་ཞིག་གིས་གཞོངགཞོང་དགོན་གྱི་མཚན་ཆ་ཚང་ལ་གཞོང་གཞོང་རྡོ་རྗེ་གདན་ཞེས་བརྗོད་ལ་བོད་ཀྱི་གནས་ཡིག་བདམས་སྒྲིག་ནང་དུ་ཡང་ཤངས་པ་གཞུང་དུ་གྲུབ་ཆེན་ཁྱུང་པོ་རྣམ་འབྱོར་གྱི་གདན་ས་ཤངས་གཞོང་གཞོང་རྡོ་རྗེ་གདན་ཞེས་འཁོད། འོན་ཀྱང་མང་ཆེ་བས་གཞོང་གཞོང་དགོན་ཟེར། སློབ་མ་རྣམས་ཀྱི་བླ་མའི་བཀའ་བཞིན་སྒྲུབ་མེད་པའི་རྟེན་འབྲེལ་གནད་དང་པོ་དེ་ནས་འཆུགས་པ་ཡིན་ནམ་སྙམ། གང་ལགས་ཞེས་ན་སངས་རྒྱས་ཆོས་ལུགས་པའི་ཆོས་པ་ཞིག་གི་ངོས་ནས་བཤད་ན། བླ་མའི་བཀའ་ནི་རང་གི་སྲོག་ལས་ཀྱང་རྩ་ཆེ་བ་རྩིས་དགོས་པར་རྒྱ་བོད་ཀྱི་བླ་མ་ཕལ་ཆེ་བའི་དགོངས་པ་དང་དབྱངས་གཅིག་ཡིན་པ་སྨོས་མི་དགོས། འཇིག་རྟེན་གྱི་ཁ་དཔེར། ཚེས་གཅིག་ཉེས་ན། གནམ་གང་ཉེས་ཞེས་པ་ལྟར། བླ་མའི་བཀའ་བཅག་པའི་དབང་གིས་གྲུབ་མཐའ་དེ་ཡང་མིང་གི་ལྷག་མ་ཙམ་ལས་མ་འདས་པའི་ཁར་དགོན་པ་ཡང་ཡུལ་དུས་སོ་སོའི་རྐྱེན་གྱིས་མཐར་འཐོར་བཤིགས་སུ་ཕྱིན་པར་བསམ།
དེ་ཡང་དགོན་པ་མཐར་ཉམས་ཆག་ཆེན་པོ་བྱུང་ནས་སྐབས་ཤིག་རིང་གནས་འཛིན་ཡང་མེད་པའི་གནས་སུ་ལྷུང་བར་གྲགས། དེ་ལྟ་བུར་ཉམས་ཆག་ཤོར་བའི་ཐད་དུས་ད་ལྟ་ཡང་ཤོད་རྒྱུན་འདྲ་མིན་སྣ་ཚོགས་ཡོད་པ་ལས་ལོ་རྒྱུས་ཀྱི་དུས་ཚིགས་སོགས་གསལ་པོ་བཀོད་པ་ཞིག་མིག་ལམ་དུ་མ་གྱུར་སྟབས་ཇི་བཞིན་ཤོད་པའི་ནུས་པ་དང་བྲལ་ཡང་། རྒན་རབས་ཀྱི་ངག་རྒྱུན་ནས་ཐོས་པ་དང་དེབ་ཐེར་ཐོག་འཁོད་པའི་གནད་དོན་འགའ་ཞིག་ལ་ཞིབ་བསྡུར་བྱེད་སྐབས་དེ་ལྟར་ཉམས་ཆག་ཏུ་ཤོར་བའི་ཐད་རང་ཉིད་ཀྱི་བསམ་གཞིགས་ཐན་ཐུན་ཞིག་གླེང་ཡོད། དེ་ཡང་རྒན་རབས་ཀྱི་ངག་རྒྱུན་ལྟར་ན། དེ་ནི་བྱེ་འུག་བཤད་གྲྭ་ཆེན་མོ། དེབ་ཐེར་མང་ཆེ་བར་བཤད་གྲྭ་ཆེན་མོ་ཞེས་འཁོད་པ་ལས་ས་ཆ་གང་གི་བཤད་གྲྭ་ཡིན་མིན་གསལ་པོ་མེད། ཡིན་ན་ཡང་བྱི་འུག་ཞེས་པའི་ལུང་པ་ཞིག་རྣམ་གླིང་རྫོང་ཁོངས་པད་མ་སྟང་གྲོང་ཚོར་ཡོད་ཅིང་། དེ་ཡིན་ཚེ་ཤངས་ཆུའི་བྱང་ངོས་ནས་སྤྱི་ལེ་ལྔ་ཙམ་ས་ན་གནས་ཡོད་པས། དེ་ནི་གཞོང་གཞོང་དགོན་དང་ཁ་སྤྲོད་ཡིན། མཁས་གྲུབ་དེ་ཉིད་རྫུ་འཕྲུལ་འགྲན་རེས་བྱས་ནས་ཁོང་གིས་བཤད་གྲྭའི་གྲྭ་པ་མང་པོ་བསད་པས་དེང་བྱི་འུག་ཞེས་པའི་ས་ཆ་དེར་རྡོ་ཁོམ་མང་པོ་ཡོད་སྲོལ་འདུག །དེ་རྣམས་གྲྭ་པའི་ཕུང་པོ་ཡིན་ཞེས་བཤད་སྲོལ་འདུག །མཐར་གཞུང་ནས་གཞུང་བཞེས་བཏང་བར་གྲགས། མཁས་གྲུབ་ཁོང་གིས་མི་བསད་ཟེར་བ་ནི་ཁུངས་མེད་ཀྱི་གཏམ་འཆལ་ཞིག་དང་ཉེས་མེད་རྫུན་བཟོ་ཞིག་རང་རེད་བསམ་གྱི་འདུག །གང་ལགས་ཞེ་ན། མ་གཞི་བཤད་གྲྭ་དེ་དང་འཐབ་པ་ནི་དོན་དངོས་ཡིན་ཡང་། དཔལ་ལྡན་ཤངས་པའི་གསེར་ཆོས་རྣམ་ལྔའི་རྒྱ་གཞུང་ནང་དེ་ནས་ཚོགས་པ་ཁྲི་ཚོ་བཅོ་བརྒྱད་འཚོགས་པའི་དུས་སུ། བཤད་གྲྭ་ཆེན་མོ་བ་རྣམས་ཕྲག་དོག་སྐྱེས་ཏེ་ཡང་ན་གཞོང་གཞོང་པའི་ཞབས་ལ་འདུད། ཡང་ན་གྲྭ་པ་ཉུང་དུས་སུ་བླ་མ་བཀྲོངས་ལ་གྲྭ་ས་མེད་པར་བྱའོ་ཞེས་བྱས་པས། གྲྭ་པ་གཞོན་པ་ཚོས་ཆོས་ཞུས་ནས་སློབ་མ་བྱེད་པ་རང་འཐད་ཟེར་བ་ལ། རྒན་གསུམ་པོ་གྲོས་འཆམ་སྟེ་ཞེས་པ་ནས་སྟོན་ཁ་གྲྭ་པ་ཉུང་དུས་དམག་སྟོང་ཚོ་ལྔ་གཞོང་གཞོང་དུ་འོང་། ཞེས་པ་ནས། དེ་ནས་བླ་མ་ལ་ཉེ་གནས་རིན་ཆེན་རྡོ་རྗེ་ཁོང་ཚོས་དམག་བྱེད་པར་འདུག །ཡང་ན་ཕར་ལ་དམག་བརྒྱབ་པས་བཤད་གྲྭ་ཆེན་མོ་མེད་པར་བྱ། ཡང་ན་བྲོས་པ་འཐད་ཟེར་བ་ལ། ངས་ཆོས་བྱས་པས་གནོད་འཚེའི་དམག་མི་བྱེད། གནས་དགོན་འདི་རྣམས་ང་རང་གིས་གསར་དུ་བཏབ་པས་བྲོས་དོན་མེད་ཞེས་པ་ནས། ཏིང་ངེ་འཛིན་གྱི་སྤྲུལ་པའི་དམག་གིས་དམག་སྟོང་ཚོ་ལྔ་པོ་དེ་རི་ཀླུང་མེད་པར་དེད་ནས་རྨ་དང་ཤི་བ་མེད་པར་གཡུལ་ངོ་རྒྱལ་བར་བྱས་པས་ཁོང་རྣམས་སློབ་མར་ཚུད་ནས་རྩ་བའི་བླ་མར་བཟུང་སྟེ་ཅི་ཡོད་ཐམས་ཅད་བླ་མར་འབུལ་ལོ། །ཞེས་འཁོད། དེ་ལྟར་བཤད་གྲྭ་ཆེན་མོ་དང་འཐབ་སྐབས་དགོན་པ་ཅུང་ཟད་ཀྱང་ཉམས་མེད་པར་འདུག །ཡང་འགའ་ཞིག་གིས་སོག་པོ་ཇུན་གར་བའི་སྐབས་ལ་ཉམས་ཆག་ཆེན་པོ་བྱུང་ཞེས་བརྗོད་པ་སྟེ། གངས་ཅན་བོད་ཀྱི་གནས་བཤད་ལམ་ཡིག་གསར་མ་ཞེས་པའི་ནང་དུ། དགེ་འདུན་བརྒྱད་ཁྲི་འདུས་ཞེས་གསུངས་སྲོལ་ཡོད་ཀྱང་ཇུན་གར་སྡེ་གཟར་སྐབས་གཏོར་སྐྱོན་ཆེན་པོ་བྱུང་ཞེས་འཁོད། དེ་རྗེས་རིག་གནས་གསར་བརྗེའི་སྐབས་ཉམས་ཆག་བྱུངཟེར། དེ་ཡང་སོག་པོ་ཇུན་གར་བ་ནི་དགའ་ལྡན་ཕོ་བྲང་གི་དུས་སྐབས་ཏེ་སྤྱི་ལོ་༡༧༡༧ལོར་བོད་དུ་སླེབས་ནས་ལོ་གསུམ་ཙམ་རིང་བོད་དུ་བསྡད་ཅིང་། རྙིང་མ་དང་བཀའ་བརྒྱུད་པའི་དགོན་སྡེ་སོགས་ལ་གཏོར་སྐྱོན་ཤུགས་ཆེན་བྱུང་ཡོད། སྐབས་དེའི་གཞོང་གཞོང་དགོན་པ་ནི་དེའི་སྔོན་ནས་ཉམས་འགོ་ཚུགས་པའི་ཁར་གྲུབ་མཐའ་དེ་ཉིད་ཀྱང་དུས་རབས་བཅུ་བཞི་ཙམ་ནས་ཉམས་འགོ་ཚུགས་པའི་སྐོར་བོད་ཀྱི་རིག་གནས་རྣམ་བཤད་ནང་ཡུལ་དུས་སོ་སོའི་ཕྱི་ནང་གི་རྒྱུ་རྐྱེན་དབང་གི་ཤངས་པ་བཀའ་རྒྱུད་ནི་དུས་རབས་བཅུ་བཞི་ཙམ་ནས་རིམ་བཞིན་ཉམས་རྒུད་དུ་སོང་ཞེས་འཁོད་པ་དང་། ཀྲུང་གོའི་བོད་ལྗོངས་༢༠༠༩ལོའི་དུས་དེབ་དང་པོའི་ནང་ཕྱག་བཏབ་ནས་ལོ་ངོ་བརྒྱ་ལྷག་རིང་གྲུབ་མཐའ་དེ་ཉིད་དར་རྒྱས་ཧ་ཅང་ཆེན་པོ་བྱུང་ཡོད། དེ་དར་རྒྱས་ཆེ་ཤོས་ཀྱི་སྐབས་སུ་གྲྭ་གྲངས་ཁྲི་ཚོ་ལས་བརྒལ་བར་བཤད། འོན་ཀྱང་དུས་རབས་གཉིས་ཀྱི་རྗེས་ནས་ཤངས་པ་བཀའ་རྒྱུད་ཀྱི་གྲུབ་མཐའ་དེ་ཉིད་རིམ་བཞིན་ཉམས་རྒུད་དུ་སོང་བ་ལོ་རྒྱུས་ལས་གསལ་ཐུབ་ལ་མ་དགོན་ཡང་འཐོར་བཤིགས་སུ་སོང་ཡོད། ཞེས་འཁོད། དེར་གཞིགས་ན་ཇུན་གར་སྡེ་གཟར་སྔོན་ནས་སྣུམ་ཟད་མར་མེའི་ཚུལ་གྱི་ཉམས་པ་སྨྲོས་མི་དགོས། འོན་ཀྱང་སྐབས་དེར་ཆ་ཤས་ཅུང་ལྷག་ཡོད་པར་བཏང་ཡང་། ལུང་པ་ཆུ་ཡིས་ཁེངས་པ་ན། རྡོ་ལེབ་སྐམ་པོར་སྡོད་མི་སྲིད་ཞེས་པའི་དཔེ་ལྟར་དེ་དུས་གཏོར་སྐྱོན་ཅུང་བྱུང་བར་སེམས། དེ་ནས་རིག་གསར་སྐབས་གཏོར་སྐྱོན་བྱུང་བ་ཡིན་ཞེས་པ་དེ་ཁུངས་ལུང་མེད་པ་རང་མིན་ཏེ། རིག་གསར་གོང་དུ་དགོན་པ་དེ་ཉིད་སྔོན་མ་ནང་བཞིན་མེད་ཀྱང་། གཞི་ཁྱོན་དེ་ཙམ་མེད་པའི་དགོན་ཆུང་ཞིག་ཡོད་པ་རྒན་རབས་རྣམས་ཀྱི་མིག་མཐོང་ལག་ཟིན་བྱུང་འདུག །རིག་གནས་གསར་བརྗེའི་སྐབས་དགོན་པའི་གཙང་ཁང་སོགས་དང་གྲྭ་ཤག་ཁག་རྣམས་གྱང་རོར་གྱུར་ཞེས་དང་། ཐ་ན་ཕྱིས་དེའི་སྔོན་གྱི་དགོན་པའི་གྲྭ་ཤག་སོགས་ཀྱི་གྱང་རོ་ཡང་སྤྱིར་བཏང་མ་མཐོང་བའི་རྒྱུ་རྐྱེན་ནི་ཁུལ་དེའི་གྲོང་ཚོའི་མི་རྣམས་དང་ཉེ་འཁོར་གྱི་གྲོང་སྡེ་རྣམས་ཀྱིས་སྡོད་ཁང་གསར་རྒྱག་བྱེད་སྐབས་ས་རྡོ་རྣམས་དབོར་འདྲེན་བྱས་ཞེས་རྒན་རབས་རྣམས་ཀྱི་གསུངས། དེ་ནས་ཉམས་ཆག་ཆེན་པོ་བྱུང་བའི་རྒྱུ་རྐྱེན་གཙོ་བོ་གསུམ་ཡོད་པར་སེམས་ཏེ།
དང་པོ། མཁས་གྲུབ་དེ་ཉིད་ལ་སྔ་ཕྱི་བསྡོམས་པའི་སློབ་མ་ཧ་ཅང་མང་པོ་ཡོད་ཀྱང་སློབ་མ་ཁ་ཅིག་ནི་གྲྭ་པ་མ་ཡིན་པར་ཆོས་ཞུས་རྗེས་རང་རང་གི་གནས་སུ་ལོག་ཕྱིན་པ་དང་། གྲྭ་པ་ཡིན་ཀྱང་ཚང་མ་དགོན་པ་དེར་གཏན་སྡོད་བྱེད་མཁན་མ་ཡིན་པར་གདམས་པ་ཞུས་རྗེས་རང་དགོན་དུ་ལོག་འགྲོ་གི་ཡོད་པ་དང་། དགོན་པ་དེ་གའི་གྲྭ་པ་ཡིན་ཀྱང་མཐའ་གཅིག་ཏུ་བླ་མའི་གདན་ས་བསྐྱངས་མཁན་མེད་པས་ཤངས་པ་བཀའ་བརྒྱུད་ཀྱི་མ་དགོན་དུ་གྲགས་པའི་དགོན་པ་དེ་ཉིད་ཉམས་ཆག་ཏུ་ཕྱིན་པ་མིན་ནམ་སྙམ། གང་ལགས་ཞེས་ན། ཁོང་གི་སློབ་མ་གཙོ་བོ་རྨོག་ལྕོག་པ་རིན་ཆེན་བརྩོན་འགྲུས་མཆོག་ཀྱང་མཁས་གྲུབ་དེ་ཉིད་སྐུ་འདས་རྗེས་ལོ་གཉིས་ཙམ་ལས་གཞོང་གཞོང་དགོན་དུ་མ་བཞུགས་པར་བླ་མ་དེ་ཉིད་ཀྱི་ཆོས་རྒྱུད་འཛིན་སྐྱོང་སྤེལ་གསུམ་བྱེད་པ་ལས་བླ་མའི་གདན་ས་བསྐྱངས་ནས་མ་བཞུགས་པར་ཁོང་རང་གིས་གསར་དུ་རྨོག་ལྕོག་སྒྲུབ་ཁང་༼རྣམ་གླིང་རྫོང་ར་ཐང་ཡུལ་ཤོག་ཁོངས་༽དང་ལྐུག་ལུང་རཐང་ཡུལ་ཤོག་ཁོངས་ཕྱག་བཏབ་ནས་དེར་བཞུགས་པ་སྟེ། བོད་ཀྱི་གནས་ཡིག་བདམས་སྒྲིག་ནང་གྲུབ་ཆེན་རྨོག་ལྕོག་པའི་གདན་ས་རྨོག་ལྕོག་ཞེས་འཁོད། དེ་རྗེས་ཁོང་གཞོང་གཞོང་དགོན་དུ་ཕེབས་པའི་སྐོར་དང་། དེ་མིན་གྱི་ཁམས་སོགས་ཀྱི་སློབ་མ་རྣམས་ཀྱང་རང་རང་གི་གནས་གཞི་བཟུང་བ་ལས་གཞོང་གཞོང་དུ་ཕེབས་ནས་བླ་མའི་གདན་ས་སྐྱོང་བའི་སྐོར་སྤྱིར་བཏང་གསལ་བར་མ་གྲགས། གང་ལྟར་ཁྱུང་པོ་རྣལ་འབྱོར་གྱི་སྔ་ཕྱི་བསྡོམས་པའི་སློབ་མ་ཁྲི་ཕྲག་གསོ་སྐྱོང་གནང་བ་དོན་དངོས་ཡིན་པ་ང་ཚོས་ཤངས་པ་བཀའ་རྒྱུད་ཀྱི་བླ་རབས་རྣམ་ཐར་དང་། མྱང་ཆོས་འབྱུང་སོགས་ལས་ཤེས་ཐུབ་ཡིན་ནའང་ཁོང་གི་སློབ་མ་སོ་སོར་ཆོས་གནང་བ་ཙམ་ལས་གདན་ས་བསྐྱངས་མཁན་གྱི་སྒྲིག་འཛུགས་གཏན་འཁེལ་ཞིག་གསོ་སྐྱོང་བྱས་མེད་པར་བསམས། དེས་ན་གཞི་ཁྱོན་ཤིན་ཏུ་ཆེ་བའི་དགོན་པ་འདི་དེ་ནས་བཟུང་སྣུམ་ཟད་མར་མེའི་ཚུལ་ལས་རྨོག་ལྕོག་པ་རིན་ཆེན་བརྩོན་གྲུས་ཀྱི་སྐབས་ནས་བྱ་སྤུ་རླུང་ཁྱེར་བཞིན་མ་ཡིན་པར་རིམ་བཞིན་ཉམས་པ་མ་ཡིན་ནམ་སྙམ་པ་ལས། དེ་མིན་ཆོས་ལུགས་གྲུབ་མཐའ་སོགས་ཀྱི་རྐྱེན་པས་དམག་འཐབ་བྱུང་བའི་སྐོར་སྤྱིར་བཏང་མ་གྲགས་པས་དེས་ན་དེ་ནི་ཉམས་ཆག་ཏུ་ཤོར་བའི་གཙོ་བོའི་རྒྱུ་རྐྱེན་ནམ་ནང་རྐྱེན་དེ་ཡིན།
གཉིས་པ། དེ་ལྟར་ཟེ་རྩྭས་བཟུང་བའི་ཁང་ཧྲུལ་ལྟ་བུའི་དགོན་ཆེན་དེ་ཡང་མུ་གེའི་སྟེང་ལ་ཟླ་ལྷག་ཞེས་པའི་དཔེ་ལྟར་ཉམས་རྒུད་དུ་ཕྱིན་པའི་སྐབས་དེར་སོག་པོ་ཇུན་གར་བའི་གཏོར་སྐྱོན་ཅུང་ཟད་བྱུང་བ་ནི་ཕྱི་རྐྱེན་ཡིན་པར་བསམ།
གསུམ་པ། ས་ཡོམ་ཁྲོད་དུ་གནས་པ་ལྟ་བུའི་དགོན་པ་དེར་རིག་གསར་སྐབས་ཅུང་ཟད་གནས་པ་རྣམས་ཀྱང་རྩ་གཏོར་དུ་ཕྱིན་ནས་གནས་སྐབས་ཤིག་རིང་གནས་གཞི་གནས་འཛིན་ཡང་མེད་པའི་ཐབས་ཀྱི་གནས་སུ་གྱར་བ་ཡང་ཕྱི་རྐྱེན་ཡིན་ནམ་སྙམ་པ་བཅས་ཕྱི་རྐྱེན་གཉིས་དང་ནང་རྐྱེན་གཅིག་གི་སྒོ་ནས་དགོན་དེ་ཉམས་ཆག་ཏུ་ཕྱིན་པར་བསམས་པ་ལས་བློ་དམན་བདག་གི་མཐའ་གཅིག་ཏུ་ཁ་ཚོན་གཅོད་དཀའ་ལ་ཆོས་འབྱུང་དེབ་ཐེར་སོགས་སུ་བཀོད་པ་དང་མཁས་དབང་རིམ་བྱོན་རྣམས་ཀྱིས་གསུངས་པ་ཡང་ཁ་གསལ་མེད་པས་དེར་ཞིབ་འཇུག་ཏུ་སྤྲོ་བ་རྣམས་ཀྱིས་ད་དུང་དཔྱད་པར་འཚལ།
།དེ་རྗེས་ཏང་གི་སྲིད་ཇུས་བཟང་པོ་བོད་ལྗོངས་ཡོངས་ལ་ཁྱབ་པའི་སྐབས་དང་བསྟུན་ནས་དགོན་པ་དེ་ཉིད་ཀྱི་རྒྱུད་འཛིན་བླ་མ་ཁྱུང་པོ་ཚུལ་ཁྲིམས་མགོན་པོས་རང་མི་རིགས་ཀྱི་ཤུལ་བཞག་ཡིན་པའི་དགོན་དེ་ཕལ་ཆེར་སྤྱི་ལོ་༡༩༨༢ཙམ་ནས་ཉམས་གསོ་བྱེད་འགོ་བརྩམས། སྐབས་ཤིག་རིང་བླ་མ་དེ་ཉིད་དགོན་པ་ཉམས་གསོ་བྱེད་ཆེད་དུ་སྦྲ་གུར་བསྐྱོན་ནས་བཞུགས་དགོས་བྱུང་བ་དང་། དེ་རྗེས་རྒྱལ་ཁབ་ཀྱི་སྲིད་ཇུས་དོན་འཁྱོལ་དང་ཉེ་འཁོར་གྱི་གྲོང་ཚོའི་དད་ལྡན་མི་སྣའི་རྒྱབ་སྐྱོར་འོག །སྔོན་མང་ཚོགས་ཁྲོད་དུ་གྱར་བའི་རིག་དངོས་བསྡུ་རུབ་དང་དགེ་འདུན་གྱི་སྡེ་བཙུགས་ནས་རིམ་བཞིན་ད་ལྟའི་དགོན་པའི་གཞི་ཁྱོན་དེ་གྲུབ། དེ་ཡང་སྔར་ཡོད་དགོན་པའི་གྱང་རོའི་སྟེང་བསྐྱར་བཟོ་དང་གསར་རྒྱག་བྱས་མཐར་ཐོག་བརྩེགས་གསུམ་ལས་གྲུབ་པའི་གཙུག་ལག་ཁང་དང་གྲྭ་ཤག་སོགས་རིམ་བཞིན་ཉམས་གསོ་ཞུས། དེ་རྗེས་ཆོས་རྒྱུད་འཛིན་མཁན་གྲྭ་པ་བཅུ་ཕྲག་ལས་བརྒལ་བ་གསོ་སྐྱོང་མཛད། སྤྱི་ལོ་༡༩༨༢ཙམ་ནས་སྤྱི་ལོ་༢༠༠༦ལོའི་བར་དད་ལྡན་སེར་སྐྱ་མི་སྣའི་ཆོས་ཕྱོགས་ཀྱི་འདོད་བློ་སྐོང་གང་ཐུབ་གནང་སྟེ་མཐར་སྤྱི་ལོ་༢༠༠༦ལོར་སྐུ་གཤེགས། དེ་དུས་དགོན་དེར་དགེ་འདུན་ཞལ་གྲངས་བདུན་ཙམ་ཡོད་པ་དེ་དག་གིས་ཆོས་དད་མི་སྣ་བལྟ་བསྐོར་དུ་ཕེབས་མཁན་ལ་སྣེ་ལེན་གང་ལེགས་ཞུ་བ་དང་མངཚོགས་ཀྱི་ཆོས་ཕྱོགས་བྱེད་སྒོ་སྤེལ་བཞིན་འདུག །གཞན་ཡང་དགོན་པ་དེར་གནས་གཟིགས་སམ་བལྟ་བསྐོར་དུ་ཕེབས་ཚེ་དེར་ཐོག་བརྩེགས་གསུམ་ལས་གྲུབ་པའི་གཙུག་ལག་ཁང་གི་ཐོག་བརྩེགས་དང་པོ་གཙོ་བོ་འདུ་ཁང་དང་དེའི་ནང་གི་གཙང་ཁང་དུ་རྟེན་རྒྱུ་གསེར་ཟངས་ལས་གྲུབ་པའི་རྒྱལ་བ་རྡོ་རྗེ་འཆང་དང་། རྒྱལ་བ་བྱམས་པ། མཁས་གྲུབ་ཁྱུང་པོ་རྣལ་འབྱོར་སྣང་བརྙན། ད་དུང་ཁྱུང་པོ་རྣལ་འབྱོར་གྱི་ཞབས་རྗེས་སོགས་ཡོད་པ་དང༌། ཤོད་སྲོལ་ལ་ཞབས་རྗེས་དེ་བུད་མེད་ཕྲུ་གུ་མ་བཙས་ན་ཞབས་རྗེས་ཡོད་པའི་རྡོ་དེ་སྒལ་པར་འཁྱེར་ནས་དགོན་པར་བསྐོར་བ་ཐེངས་གསུམ་བརྒྱབ་ན་བུ་འདོད་པ་ལ་བུ་ཐོབ་པ་དང་། དུས་རྒྱུན་དུ་དེར་གསོལ་བ་སྨོན་ལམ་རྩེ་གཅིག་ཏུ་བཏབ་ན་ཚེ་ཡི་གེགས་བར་སེལ་བ་དང་ནོར་འདོད་པ་རྣམས་ལ་ནོར་སོགས་ཅི་སྨོན་པ་སྒྲུབ་ཐུབ་པའི་གསུང་རྒྱུན་འདུག །དེ་ནས་བཀའ་རྒྱུད་ལྷ་ཁང་དང་། སྐུ་རྒྱུ་གསེར་ཟངས་སྟོང་སྐུ་སོགས་དང་། ཐོག་བརྩེགས་གསུམ་པར་དགོན་དེའི་བླ་མའི་གཟིམ་ཆུང་དང་། དགེ་འདུན་རྣམས་ཀྱི་སྒྲུབ་ཁང་སོགས་གནས་གཟིགས་གནང་ས་མང་པོ་ཡོད། དགོན་པའི་བསྐོར་དུ་ཕེབས་པ་ན་ཡ་མཚན་པའི་ཨི་ཁུང་ཞིག་ཡོད་པ་སྟེ། དེའི་མིང་ལ་སྡིག་པ་འཛུལ་ཁུང་འབོད། ཆོས་ཕྱོགས་ནས་དེར་སྐྱེ་འགྲོ་སུ་ཡིན་རུང་སྡིག་པ་ཆེན་པོ་བསགས་པ་ཡིན་ཚེ་ཧ་ཅང་གི་བགྲོད་དཀའ་བ་ཡིན་ཟེར། དེ་ནས་འབུམ་ཆུང་ཞེས་པའི་མཆོད་རྟེན་ཞིག་ཡོད་པ་དེར་ནད་པ་སྤྱི་དང་ལྷག་པར་ཕོ་བའི་ནད་ཀྱི་ཟིན་པའི་མི་ཡིན་ཚེ་དེར་རང་གི་ལོ་གྲངས་དང་མཉམ་པའི་རྐྱང་ཕྱག་འཚལ་ན་ལུས་ཀྱི་ན་ཚ་སེམས་ཀྱི་སྡུག་བསྔལ་ཐམས་ཅད་སངས་དྲག་ཏུ་ཕྱིན་པའི་སྐོར་གྲགས་པ་དེར་ནམ་རྒྱུན་ནས་ཕྱག་འཚལ་མཁན་དང་བསྐོར་བ་བྱེད་མཁན་མང་པོས་མཐོང་ཆོས་སུ་ཡོད། མཆོད་རྟེན་དེའི་གཟུངས་ལ་མཁས་གྲུབ་ཁྱུང་པོ་རྣལ་འབྱོར་གྱི་སྐུ་རུས་དང་། ཚེམས། འཕེལ་གདུང་། རིང་བསྲེལ་སོགས་དམ་པ་གོང་མའི་བྱིན་རླབས་མང་པོ་དང་། གཞན་ཡང་རིན་ཆེན་གྱི་རིགས་སོགས་ཧ་ཅང་མང་པོ་བཞུགས་པར་གྲགས། དགོན་པའི་ཉེ་འཁོར་དུ་ཆུ་མིག་ཁ་ཤས་ཡོད་པ་དང་ལྷག་པར་སྒྲུབ་ཆུ་དམིགས་བསལ་ཅན་ཞིག་ཡོད་པ་དེ་ནི་དགུན་གྲང་ངར་ཆེ་བའི་སྐབས་འཁྱགས་རོམ་གྱི་གཡའ་ཙམ་མེད་པར་ཆུ་ཤེལ་ལྟར་དྭངས་བ་དང་། དབྱར་དུས་སུ་སྒྲུབ་ཆུ་དེ་ནི་མི་རྣམས་ཀྱི་འདྲེན་བྱེད་ཡུལ་དུ་འཆར་མི་ཐུབ། ཧ་ལམ་བོད་ཟླ་དགུ་པ་ནས་དང་པོའི་བར་མཐོང་ཆོས་སུ་གྱུར་བ་ལས་དེ་འཕྲོས་ཀྱི་ཟླ་བ་རྣམས་ལ་སྐམ་པ་དང་གཉིས་སུ་མེད། ཤོད་རྒྱུན་ལ་སྒྲུབ་ཆུ་དེ་རྣམས་ཀུན་དང་མི་འདྲ་བར་སྔོན་ལ་ཐོན་ཚེ་ལོ་ཆུ་ལེགས་པའི་རྟགས་མཚན་དང་རྣམ་ཀུན་ལས་འགོར་བར་ཐོན་ན་ལོ་དེར་ཐན་སྐྱོན་སོགས་བྱུང་བའི་ལྟས་ངན་པའི་མཚན་མ་ཡིན་ཞེས་གསུངས་སྲོལ་འདུག དེ་ནས་ནུབ་ཏུ་སྤྱི་ལེ་གཅིག་ཙམ་ཕྱིན་པའི་སར་རྡོ་སྟེང་དུ་མཁས་གྲུབ་ཁོང་གི་ཤངས་ཁྲག་ལས་བྲིས་པར་གྲགས་པའི་མ་ཎི་ཡིག་དྲུག་བཀོད་པ་ཁྱད་འཕགས་ཅན་ཞིག་དང་། དགོན་པའི་ཕྱིའི་ལྕགས་རིའི་རྩིག་པ་མང་ཆེ་བ་ནི་རྡོ་བསྐོས་ཡི་གེ་ཡིན་པ་དང་། དེ་རྣམས་མཁས་གྲུབ་ཁོང་གི་རྣམ་ཐར་ཡིན་པར་གྲགས་ལ་དེ་དག་ལས་མང་ཆེ་བ་ད་ལྟ་ཡང་དངོས་སུ་མཐོང་ཆོས་སུ་སྣང་། དགོན་པའི་ཆོས་ལུགས་བྱེད་སྒོ་གཙོ་ཆེ་བ་ནི་བོད་ཟླ་དང་པོའི་ཚེས་བཅོ་ལྔར་དར་ཆེན་སྐུ་བཞེངས། བོད་ཟླ་གཉིས་པའི་ནང་བཀའ་འགྱུར་ལྗགས་ཀློག །ཟླ་བ་ལྔ་པའི་གནམ་གང་གི་ཉིན་མོ་ཁྱུང་པོ་ཚུལ་ཁྲིམས་མགོན་པོའི་དུས་མཆོད། བོད་ཟླ་དྲུག་པའི་ཚེས་བཞིར་མཁས་གྲུབ་རིམ་བྱོན་གྱིས་བཀའ་དབང་གནང་སྲོལ་ཡོད་པ་དང་། བོད་ཟླ་བཅུ་གཅིག་པའི་ཚེས་བཅུ་བཞིར་མཁས་གྲུབ་ཁྱུང་པོ་རྣལ་འབྱོར་གྱི་དུས་མཆོད། ཟླ་བ་གཉིས་པའི་ཚེས་ཉི་ཤུ་བརྒྱད་ནས་དང་པོའི་ཚེས་གཅིག་བར་མགོན་པོའི་གཏོར་བསྒྲུབ། དེའི་སྐབས་མགོན་པོའི་བསྐང་གསོ་སོགས་ཉིན་མོར་ལན་གསུམ་དང་མཚན་མོར་ལན་གསུམ་གཏོང་གི་ཡོད།
དེ་ནས་སླར་ཡང་སྤྱི་ལོ་༢༠༠༨ལོར་ཁམས་ལྷ་རྩེ་སྐྱབས་མགོན་རིན་པོ་ཆེ་མཆོག་ནས་མ་དངུལ་སྒོར་དུང་ཕྱུར་ལ་ཉེ་བ་བཏང་གནང་སྟེ། ཕྱི་གཙུག་ལག་ཁང་ཕོ་བྲང་ཕིབས་རྟོག་དང་བཅས་པ་ནང་སྐུ་གསུང་ཐུགས་རྟེན་དང་བཅས་པ་ཕུན་སུམ་ཚོགས་པ། གྲུབ་མཐའ་རིས་མེད་ཀྱིས་བླ་རྒྱུད་སོགས་བླ་མ་ཡིད་དམ་སངས་རྒྱས་བྱམས་སེམས་ཆོས་སྐྱོང་སྲུང་མའི་རྟེན་བཅས་ཆེ་ཆུང་བསྡོམས་སྟོང་ཕྲག་བདུན་བརྒྱད་ཙམ་དང་ས་རྟེན་བརྒྱ་བའི་བཀའ་འགྱུར་ཆེ་ཆུང་གཉིས་དང་བསྟན་འགྱུར་གཅིག་བཅས་དང་ཐུགས་གི་རྟེན་གསེར་ཟངས་ལས་གྲུབ་པའི་དཔལ་ལྡན་འབྲས་སྤུངས་མཆོད་རྟེན་དང་གཞོང་གཞོང་འཁྱུང་སྤྲུལ་ཚུལ་མགོན་པོ་མཆོག་གིས་མདུངབརྟེན་བྱང་ཆུབ་བརྟེན་གསེར་ཟངས་ལས་གྲུབ་པ་སོགས་མདོར་ན་སྐུ་གསུང་ཐུགས་ཀྱི་རྟེན་མ་ཚང་བ་མེད་པ་རྣམས་སྐུ་གཉེར་རྣམས་ཀྱི་ཕྱག་མཆོད་ཀྱི་བཀོད་པ་དང་བཅས་དད་ལྡན་གནས་མཇལ་བ་རྣམས་ཀྱི་དང་བ་འདྲེན་པའི་བསོད་ནམས་ཀྱི་ཞིང་མཆོག་བླ་ན་མེད་པ་བཞུགས་བཞིན་ཡོད། ད་ཆ་དགོན་པ་དེའི་ཆོ་ག་ཕྱག་ལེན་ཤངས་པ་བཀའ་རྒྱུད་ཀྱི་གཙོ་བོ་བྱས་པའི་བཀའ་རྙིང་ཟུང་སྦྲེལ་བྱེད་སྲོལ་འདུག།
In dpal ldan shangs pa bka' brgyud kyi chos 'byung gser chos zhing gi sa bon (W1KG26279 p.509): ཤངས་པ་བཀའ་བརྒྱུད་ཀྱི་མ་དགོན་དང་བོད་རང་སྐྱོང་ལྗོངས་ཁུལ་གྱི་ད་ཡོད་ཤངས་པའི་དགོན་སྡེ་གཅིག་པུ་ཞོང་ཞོང་དགོན་དུ་ཤངས་པ་བཀའ་བརྒྱུད་ཀྱི་ཆོས་སྤྱོད་ཕྱག་ལེན་རྣམས་རང་རང་གི་ལུགས་ལྟར་ཐབས་བརྒྱ་ཇུས་སྟོང་གིས་ཉམས་སུ་བསྟར་བཞིན་པ་ལགས་ཀྱང་། དེང་ཕྱི་ནང་གི་བར་དུ་གཅོད་པའི་ཚོགས་དང་རྒྱ་རྐྱེན་དུ་མའི་གཞན་དབང་དུ་སོང་སྟབས། ནི་གུའི་གསེར་ཆོས་ལྔ་ལ་སོགས་པའི་ཤངས་པའི་གདམས་ངག་གི་སྙིང་པོ་རྣམས་གྲྭ་སློབ་ཐུན་མོང་ཐོག་སྒྲུབ་པ་ཉམས་ལེན་གྱི་རྣམ་ཐར་སྐྱོང་བའི་སྐལ་པ་མ་མཆིས། འོན་ཏེ་དེ་ཁོ་ན་ཙམ་རྒྱུ་མཚན་བྱས་ནས་ཤངས་པ་བཀའ་བརྒྱུད་མིང་གི་ལྷག་མ་ཙམ་དུ་གྱུར་ཞེས་བརྗོད་ན་ཤིན་ཏུ་མི་འཐད་དེ། བསྟན་པ་ལ་འཕེལ་འགྲིབ་ཡོང་བ་རྒྱལ་བའི་བཀའ་ཡིན་པས་སངས་རྒྱས་ཀྱི་བསྟན་པ་སྤྱི་ཉམས་རྒུད་དུ་འགྲོ་བ་དང་། སྐྱེ་འགྲོ་ཕལ་ཆེར་ཚོགས་གཉིས་ཀྱི་རྒྱགས་ཕྱེས་དབུལ་ཞིང་། མ་རྟོགས། ལོག་རྟོགས། ཐེ་ཚོམ་དང་བཅས་པའི་བློ་ངན་གསུམ་གྱིས་དབང་དུ་བསྒྱུར་བའི་དུས་མཐའ་འདིར་སྒྲུབ་བརྒྱུད་ཀྱི་བསྟན་པ་ཉམས་དམས་སུ་འགྲོ་བ་ནི་དེ་བས་སྨོས་ཅི་དགོས།
སྤྱི་ལོ2006ལོར་ཁྱུང་པོ་གསུམ་པ་ཚུལ་ཁྲིམས་མགོན་པོ་སྐུ་མ་གཤེགས་གོང་། སྤྱན་སྔར་འདུས་པའི་སྣོད་ལྡན་གྱི་བུ་སློབ་རྣམས་ལ་སྐྱབས་རྗེ་ཀ་ལུ་རིན་པོ་ཆེ་སྐུ་གོང་མ་ནས་བརྒྱུད་པའི་ཤངས་པའི་ཆོས་ཀྱི་དབང་ལུང་ཁྲིད་གསུམ་གང་ལྕོགས་ཅི་ནུས་ཀྱིས་བསྩལ་འདུག་པ་ལ། གཙོ་བོར་ཟབ་ཆོས་རྣམས་ཀྱི་སྔོན་འགྲོ་བསགས་སྦྱངས་ཆད་ལུས་མེད་པ་དང་། དེ་རྗེས་ཟབ་ལམ་ལྷ་བཞི་དྲིལ་སྒྲུབ་ཀྱི་དབང་། དེའི་གཞུང་ལས་འཕྲོས་ཏེ་རླུང་བུམ་ཅན་སྒོམ་ལུགས་ཅུང་ཙམ། ཡང་རྒྱུད་སྡེ་ལྔ་དང་། རྡོ་རྗེའི་ཚིག་རྐང་། མགུར་མཚོའི་ལུང་། འཕོ་བ་ཡེ་ཤེས་སྐར་ཁུང་མ། ཕྱག་ཆེན་གའུ་མ་སོགས་ཀྱི་དབང་ལུང་འགའ་རེ་ཡང་བསྩལ། འོན་ཀྱང་འཇིག་རྟེན་གྱི་ཁ་དཔེར་ཆོས་ཟབ་སར་བདུད་སྡང་”ཞེས་སུ་གྲགས་པ་ལྟར་སྐབས་དེའི་དུས་སུ་གཅིག་ནས་དགོན་པ་གཞུང་གི་འབྱོར་མཁོས་ཞན་པ་དང་། སྙིགས་དུས་ཀྱི་བློ་དམན་རྣམས་རྡོ་རྗེ་སློབ་དཔོན་དང་རབ་ཏུ་བྱུང་བའི་མཛད་པ་འགའ་ཞིག་བློར་མི་ཤོང་བར་རྟེན་ངན་སྨྲས་བྱེད་པའི་ངན་སོང་གི་ས་བོན་ཁོ་ན་སྒྲུབ་རྒྱུར་མོས་སྟབས་དགེ་འདུན་གྱི་འཚོ་བ་སྦྱོར་བ་དང་། གདམས་ངག་གི་བརྒྱུད་རྐང་འཛིན་པའི་ཁུར་ཆེན་ཕྲག་པར་བཞེས་པའི་སློབ་དཔོན་རྣམས་ལ་ཕྱི་ནང་གསང་བའི་བར་ཆད་མཐའ་དག་གིས་ཆེས་ཟབ་པའི་གདམས་པ་འགའ་ཞིག་གཞན་ལ་སྦྱིན་འདོད་ཀྱི་རེ་བ་སྐོམ་པ་ཆུ་འདོད་ལྟར་བཅངས་ན་ཡང་། གདམས་ངག་གི་ཆུ་ཐིགས་ཆགས་པའི་སྐལ་པ་བཞི་ལྡན་གྱི་གདུལ་བྱ་མ་རྙེད་པས། ཀུན་སློང་བཟང་པོས་ཡོངས་སུ་བསྐུལ་བའི་གདམས་ངག་གི་གྲུ་ཆར་དེ་དག་མི་མཇེད་འཇིག་རྟེན་ཁམས་ཀྱི་ལོ་ཏོག་འབྲས་བཟང་སྨིན་པའི་རྒྱུར་སོང་མེད་པ་ནི་རང་གཞན་ཀུན་གྱི་བསོད་ནམས་ཀྱི་འབྲས་བུ་ཟད་པའི་རྒྱུ་ཁོ་ནར་མཐོང་། ཡང་ཤངས་པའི་ཟབ་གསང་ཆོས་ཀྱི་མངའ་བདག་ཀརྨ་ངེས་དོན་ཆོས་ཀྱི་བློ་གྲོས་མཆོག་གིས་རྒྱལ་དབང་ཀརྨ་པ་སྐུ་ཕྲེང་བཅུ་བདུན་པའི་ཁྲི་འདོན་སྐབས་ཞོང་ཞོང་དགོན་དུ་ཞབས་ཟུང་བཅགས་ནས་སྒྲུབ་ཁང་གདབ་རྒྱུའི་བཀའ་དང་མཐུན་རྐྱེན་ཅི་རིགས་བསྩལ་ཡང་། མཆོག་འགྱུར་གྱི་ཐུགས་བཞེད་དེ་གདུལ་བྱའི་སྨོན་ལམ་གྱིས་མཚམས་སྦྱར་ཐུབ་མེད། སྐབས་དེར་ཁོང་ཉིད་སྟག་སྣ་དགོན་དུ་བཞུགས་ཞག་གཅིག་གནང་བ་ལས་ཤངས་ཆོས་ཀྱི་གདམས་པ་བསྩལ་ཁོམས་བྱུང་མེད། དེ་རྗེས་སླར་སྤྱི་ལོ1985ལོར་ཀརྨ་ངེས་དོན་ཆོས་ཀྱི་བློ་གྲོས་མཆོག་གིས་གཞིས་རྩེ་བསམ་གྲུབ་རྩེ་གསོལ་མགྲོན་ཁང་དུ་ཞོང་ཞོང་དགོན་གྱི་སྐྱབས་རྗེ་ཚུལ་ཁྲིམས་མགོན་པོ་འཁོར་དང་བཅས་པའི་གྲྭ་སློབ་བཅུ་ཙམ་ལ་རྟ་མགྲིན་གསང་སྒྲུབ་ཀྱི་རྗེས་གནང་དང་། སྨན་བླའི་རྗེས་གནང་། རྒྱུད་སྡེ་ལྔ་དང་མགོན་པོའི་རྗེས་གནང་། ལྷ་བཞི་དྲིལ་སྒྲུབ་ཀྱི་རྗེས་གནང་། ནི་གུ་མ་དང་སུ་ཁ་སིདྡྷིའི་ཚེ་སྒྲུབ་སོགས་ཀྱི་གདམས་པ་ཕྲན་བུ་འགའ་བསྩལ་བས། ཞབས་ལ་བརྡབས་ཆག་བྱུང་སྟེ་རྟེན་འབྲེལ་གྱི་མཚན་མ་ཅུང་ཟད་ལོག་པའི་གནས་ཚུལ་ཐོན་འདུག་པ་སོགས། རྒྱལ་སྲས་ཞི་བ་ལྷས་ཤི་བའི་སྦྲུལ་དང་ཕྲད་གྱུར་ན། །ཁཱ་ཡང་མཁའ་ལྡིང་ལྟ་བུར་སྤྱོད་ཅེས་གསུངས་པ་བཞིན་ཤངས་པའི་ཆོས་བརྒྱུད་ཀྱི་མེ་ཏོག་སྐམ་ལ་ཉེ་སྐབས་བར་ཆད་ཀྱི་ཐོག་སེར་དྲག་པོ་རྒྱུན་མི་ཆད་པར་བབས་པ་ནི་ཤངས་པ་བཀའ་བརྒྱུད་ཀྱི་ལོ་རྒྱུས་ཐོག་ཡིད་སྐྱོ་བའི་སྣང་ཚུལ་ཉག་གཅིག་གོ
།དེ་མིན་ཤངས་པ་བཀའ་བརྒྱུད་ཀྱི་བླ་རབས་སུམ་ཅུ་སོ་དྲུག་པར་གྲགས་པ་ལྷ་རྩེ་སྐྱབས་མགོན་རིན་པོ་ཆེའམ་ཤངས་སྟོན་སྐྱབས་མགོན་སངས་རྒྱས་དཔལ་གྱིས་མཁས་གྲུབ་ཁྱུང་པོའི་གདན་ས་ཞོང་ཞོང་དུ་སྔ་ཕྱིར་ཐེངས་གཉིས་ཕེབས་པ་སྟེ། ཐེངས་དང་པོ་ནི་སྤྱི་ལོ་2000ལོར་གྲུབ་ཆེན་ཨ་མོ་གྷ་མཁས་གྲུབ་ཁྱུང་པོར་གདམས་པ་སྒོ་སྐྱེལ་དུ་ཕེབས་པའི་མཛད་པ་དང་མཐུན་པའི་རྟེན་འབྲེལ་ལ་དགོངས་ཏེ་ཁྱུང་པོ་ཚུལ་ཁྲིམས་མགོན་པོ་དང་གང་དེའི་བུ་སློབ་འཁོར་དང་བཅས་པ་རྣམས་དང་། ཞོང་ཞོང་གྲོང་ཚོའི་སྐྱ་མི་སོགས་ཁྱོན་མི་གྲངས་བརྒྱ་ཙམ་ཟིན་པའི་གདུལ་བྱ་རྣམས་ལ་སྔར་ཚོགས་པའི་མཐར་ཐུག་ཁྲི་ཚོ་བརྒྱད་ཡོད་ཤུལ་གྱི་ཀ་གཉིས་མར་ནི་གུ་མ་དང་སུ་ཁ་སིདྡྷིའི་ཚེ་སྒྲུབ་གནང་། ཐེངས་གཉིས་པ་ནི་སྤྱི་ལོ་2006ལོར་སྐྱབས་རྗེ་ཚུལ་ཁྲིམས་མགོན་པོ་སྐུ་གཤེགས་རྗེས་གདུང་རྟེན་ཕུལ་བར་ཕེབས་པ་ཙམ་ལས་གདམས་པ་གནང་མེད། དགོན་འདིའི་གཞི་གསུམ་གྱི་ཕྱག་ལེན་མི་ཉམས་པ་དང་། ལོ་རེའི་ཤངས་ལུགས་ཀྱི་དམིགས་བསལ་སྒྲུབ་མཆོད། དུས་མཆོད་སོགས་སྔར་ཞོང་ཞོང་དགོན་གྱི་སྐབས་སུ་བཤད་ཟིན། གང་ལྟར་ན་ཡང་ཀརྨ་ངེས་དོན་ཆོས་ཀྱི་བློ་གྲོས་དང༌། ཁྱུང་པོ་གསུམ་པ་ཚུལ་ཁྲིམས་མགོན་པོ། ཤངས་སྟོན་སྐྱབས་མགོན་སངས་རྒྱས་དཔལ་གསུམ་གྱི་སྐུ་དྲིན་ལ་བརྟེན་ནས་ཤངས་པ་བཀའ་བརྒྱུད་པའི་གདམས་ངག་ཐན་ཐུན་ཉམས་སུ་ལེན་བཞིན་པའི་སྐལ་ལྡན་གྱི་གྲྭ་སློབ་འགའ་ཞིག་བཞུགས་མུས་སོ།།
This work is licensed under a Creative Commons Attribution-Non Commercial-ShareAlike 3.0 Unported License
