Chos drug gi gsung sgros

Resource ID	SCv8p233
Title	chos drug gi gsung sgros
Alt. title	sgyu lus gnad la dbabs pa sgyu lus gyi gtam rgyud lung 'dren sgyu lus dbang po 'bring gi lung 'dren zhal shes
Topics	Illusory body
Sub-Topics	Instructions
Author	Gyeltsen Bum
Link	BDRC W23922 BDRC W4CZ58783 (p. 383+392-394)

༄༅། །ཆོས་དྲུག་གི་གསུང་སྒྲོས་བཞུགས་སོ།།
སྒྱུ་ལུས་གནད་ལ་དབབས་པ་ཞེས་ཀྱང་བྱ། ༼སྒྱུ་ལུས་གྱི་གཏམ་རྒྱུད་ལུང་འདྲེན༽

བླ་མ་དམ་པའི་ཞབས་ལ་གུས་པས་ཕྱག་འཚལ་ལོ།
།གཞན་དོན་གོམས་པ་ཐུགས་རྗེའི་བདག་ཉིད་ཅན། །རྒྱལ་བའི་བསྟན་པ་སྟོན་པ་ལྟར་མཛད་པ། །དཔལ་ལྡན་བླ་མ་བརྒྱུད་པར་བཅས་པ་དང་། །བདག་ཅག་འདྲེན་པ་དེ་ལ་ཕྱག་འཚལ་ལོ།
།དེ་ལ་ཆོས་གཤའ་མ་གཅིག་བྱེད་ན། འཆི་བ་མི་རྟག་པ་རྒྱུད་ལ་སྐྱེས་པ་དང་། །ཚེ་འདི་བློས་ཐོངས་པ་ཅིག་དགོས་ཏེ། ལ་སྟོད་ཐོ་ལིང་གི་གཙུག་ལག་ཁང་དུ། ལོ་ཙ་བ་རིན་ཆེན་བཟང་པོས། ཇོ་བོ་རྗེས་གདན་དྲངས་པས། གཙུག་ལག་ཁང་སུམ་ཐོག་ཡོད་པའི་འོག་ཁང་ན། བྱ་སྤྱོད་ཀྱི་ལྷ་ཚོགས་བཞུགས་པ་ལ་ཇོ་བོ་རྗེས་སྒྲུབ་ཐབས་དང་མཐུན་པའི་བསྟོད་པ་མཛད་ཀྱིན་ཕྱག་འཚལ་ལོ།
བར་ཁང་ན་རྣལ་འབྱོར་གྱི་ལྷ་ཚོགས། སྟེང་ཁང་ན་བླ་མེད་ཀྱི་ལྷ་ཚོགས་ལ་རང་རང་གི་སྒྲུབ་ཐབས་དང་མཐུན་པའི་བསྟོང་པ་མཛད་ཀྱིན་ཕྱག་འཚལ་བས། མཁས་པ་ཆེན་པོར་འདུག་སྙམ་པ་ལོ་ཙ་བ་ལ་བྱུང་། ཇོ་བོ་རྗེས་ལོ་ཙ་བ་ལ། ལྷ་འདི་རྣམས་ཇི་ལྟར་སྒོམ་དྲིས་པས། འོག་ཁང་ནས་རིམ་པ་བཞིན་བསྒོམ་བྱས་པས། སྙིང་པོ་བསྡུ་བ་དགོས་པ་ཡིན་གསུང་། བཤང་པ་བྱས་ན་བསོད་ནམས་ཆེའམ་ཞུས་པས། ཚེ་འདི་བློས་ཐོང་གསུང་། ཉན་པ་དང་བསྒོམས་པ་བསོད་ནམས་ཆེའམ་ཞུས་པས་ཀྱང་། ཚེ་བློས་ཐོང་གསུང་། མདོར་ན་ཚེ་བློས་མ་ཐོང་ན། །བཤད་ན་བཤད་ཚད། མཉན་ན་མཉན་ཚད། བསྒོམས་ན་བསྒོམ་ཚད་འཁྲུལ་གསུང་ངོ་།
༈ ཁ་རག་སྒོམ་ཆུང་གིས། །འགྲན་སེམས་ཀྱི་སློབ་གཉེར་བྱས་པ་དང་། །ལོ་འདོད་ཀྱི་སྟོན་པ་བྱས་པ་དང་། །མཁས་འདོད་ང་རྒྱལ་སྨྲ་བ་གསུམ། །ཆོས་སུ་འགྲོའམ་སོམ་གཅིག་ཨ། །གསུང་ངོ་།།
༈ དམ་པ་དམར་པོ་ལ། ཡོན་བངག་ཡུན་རིང་པོ་བྱས་པ་གཅིག་གིས། །ད་ང་རྒས་འདུག་པས་ཆོས་ཚིག་ཉུང་ལ། དོན་དུ་འདྲིལ་བ། ཉམས་སུ་བླང་བདེ་བ་ཅིག་ཞུ་བྱས་པས། ཚོགས་བརྒྱ་རྩ་དང་། བརྒྱ་འབུལ་གྱིས་གཅིག་གསུང་། དེ་ལྟར་བྱས་ཀྱང་ཡུན་རིང་པོར་མ་བྱུང་། ད་ཞུ་དགོས་བྱས་པས། གཞན་གྱིས་ཐོས་སུ་མི་བཏུབ་པ་གཅིག་ཡོད་པས། ཚོགས་ཀྱི་ཆས་གཅིག་ཁྱེར་ལ། མི་མེད་པ་གཅིག་ཏུ་འདོང་ངོ་གསུང་ནས། གྲོག་ཕུག་གཅིག་ཏུ་ཕྱིན་པ་དང་། མི་འདུག་གམ་ལྟོས་ཤིག་གསུངས། མི་གདའ་བྱས་པས། ད་ངའི་ལག་པ་ལ་འཇུས་ལ་ཁ་ལ་ལྟོས་ཤིག་གསུངས། དེ་ལྟར་བྱས་པས། འོ་ན་ང་ཡང་འཆི། ཁྱོད་ཀྱང་འཆི། ཇུག་བྱེད། དེ་ལྟ་བུའི་ཆོས་ཟབ་མོ་ཤིག་ཁྱོད་ལ་བྱིན་པ་ཡིན་ནོ་གསུངས། ཡོན་བདག་གི་བསམ་པ་ལ། ཆོས་དེ་ལ་ཚོགས་བརྒྱ་རྩ་དང་། བརྒྱ་འབུལ་གཅིག་གོས་མོད། ཟོག་རྒན་གཅིག་དང་ཕྲད་འདུག་སྙམ་པ་ཅིག་བྱུང་། དེ་ནུབ་གཉིད་ཙམ་མ་བྱུང་། ཐོ་རངས་གཉིད་རི་བ་ཅིག་བྱུང་ཙ་ན། འཆི་བ་མི་རྟག་པ་ལྷང་པ་ཅིག་རྒྱུད་ལ་སྐྱེས་ནས་བྱུང་གསུང་ངོ་།།
༈ ཁ་རག་སྒོམ་ཆུང་པས། སྐུ་གཞོན་ནུ་ལ་མཚམས་དམ་པོ་བཅད་ནས་བསྒྲུབ་པ་མཛད་པས། མི་རྣམས་ན་རེ། ཐོས་པ་ཅིག་ཀྱང་མ་བྱས་པར་བསྒྲུབ་པ་ཁོ་ན་བྱེད་པ་བར་ཆད་ཀྱིས་འཁྱེར། སྔེར་ནང་བཅུག་ནས་ཁྱི་ལ་འདྲེན་པ་དང་འདྲ་བ་ཟེར་བ་བྱུང་། པུ་ཏོ་བས་ཁོང་གི་དགོན་པ་གཟིགས་སུ་བྱོན་པས། ཁོང་ལ་རི་དྭགས་ཚོ་བྲོས་སོང་། བཞུགས་པའི་ཕྱིའི་ཕྱོགས་བཞི་ན་མཐོ་རེ་ལ། ཡི་གེ་རེ་འདུག་པ་ལྟས་པས། ཤར་ན། ཉམས་ཆུང་བདག་ལ་རྐྱེན་ངན་གནོད་པ་མང་། བརྟན་པ་ཐོབ་ནས་རྐྱེན་ངན་གྲོགས་སུ་འཆར། །ནགས་ཀྱི་མེ་དང་མེ་སྟག་ཇི་བཞིན་དུ། །གཅིག་པུར་གནས་པ་ཁོ་བོའི་དབྱར་དམ་ལགས། །ལྷོ་ན། འཆི་བདག་བདུད་ནི་མི་སྡོད་ཚུར་ཚུར་འོང་། དེ་ལ་ཐར་པའི་ཐབས་ནི་ཅི་ཡང་མེད། །ད་ལྟ་གཉིད་དང་ལེ་ལོའི་དབང་སོང་སྟེ། །ཅི་འདྲའི་དུས་གཅིག་བདག་ལ་ནམ་འོང་ཨ། །ནུབ་ན། ཚེ་འདིའི་ལྟོ་རྒྱབ་ཇི་ལྟར་བྱས་ཀྱང་ཕྱིད། །ཤི་ནས་བྱང་ཆུབ་སྙིང་པོ་བཙལ་ཐབས་མེད། དགྲ་ཟིན་སྡེ་རིས་ཀུན་ལ་མ་ཆགས་པར། །བསོད་ནམས་ཆེན་པོ་མྱུར་དུ་བསག་པ་གཅེས། །བྱང་ན། ཚེ་ལ་ལོང་མེད་ཐ་སྙད་ཐུག་པ་མེད། །དེ་བས་དམ་པའི་དགོངས་པ་ལོང་མཛོད་ལ། །འདུ་འཛིན་སྤངས་པའི་དགོན་པར་ཞི་གནས་བསྟེན། བསེ་རུ་ལྟ་བུ་གཅིག་པུར་གནས་པར་བྱ། །ཅེས་པ་མཐོང་བས་ཤིན་ཏུ་ངེས་ཤེས་སྐྱེ་བར་བྱུང་། ནང་དུ་ཕྱིན་ཙ་ན་རི་དྭགས་ཀྱི་འོ་མ་བཞོས་ནས། རང་རང་གི་ཕྲུ་གུ་ལ་སྡུད་པའི་ཆས་སུ་འདུག་ནས། ང་ལ་རི་དགས་ཚོ་བྲོས་སོང་། ཁྱེད་ལ་མི་འབྲོས་པར་འདུག་བྱས་པས། ངས་སྐྱེ་བ་ལྔ་བརྒྱར་ཤ་མ་ཟོས་པ་ཡིན་གསུང་། ཁོང་རང་ཟན་ཆངས་པ་རེ་དང་། ལོ་མ་ཆངས་པ་རེ་ལ་གསོལ་རྒྱུ་མཛད་པ་ལ། ད་ནང་ལྟོ་སྐྱིད་བྱེད་གསུང་ནས། ཟན་ཆངས་པ་གཉིས་དང་། ལོ་མ་ཆངས་པ་རེ་དྲངས། དེ་ནས་ཆོས་ཀྱི་གསུང་གླེང་མང་པོ་མཛད།
ཁ་རག་པས། དལ་འབྱོར་རྙེད་དཀའ་བ་དང་། འཆི་བ་མི་རྟག་པ་བསྒོམས་པས། ཚེ་འདི་ལ་བློ་ལྡོག་པར་གོ །ལས་རྒྱུ་འབྲས་དང་འཁོར་བའི་ཉེས་དམིགས་བསྒོམས་པས། མི་དགེ་བ་ལས་བློ་ལྡོག་པར་གོ །བྱམས་པ་དང་སྙིང་རྗེ་བྱང་ཆུབ་ཀྱི་སེམས་བསྒོམས་པས། རང་གཅིག་པུ་ཞི་བདེ་ལས་བློ་ལྡོག་པར་གོ །ཆོས་ཐམས་ཅད་རང་བཞིན་མེད་པར་བློ་ལྡོག་པར་གོ །གཟུང་འཛིན་ལས་བློ་ལྡོག་པར་གོ །ཅེས་དྲིས་པས།
དེ་ལྟར་ཡིན་གསུང་ངོ་། །དེ་ལ་བློ་ལྡོག་བཞི། བསྒོམ་རྒྱུ་བདུན་དུ། ལག་ལེན་གསུམ་གསུམ་འདུ་བ་ཡིན་ནོ། །གསུངས་པ། ཁོང་གི་བཞུགས་པའི་བྲག་ཁུང་ན། ལངས་ན་བྲག་ཟུར་ཅིག་ལ་དབུ་ཐུག་ནས་ཁྲག་འོང་། སྒོ་རྩར་ཕྱིན་ཙ་ན་སེ་ཕུང་ཅིག་ཡོད་པ་ཞབས་ལ་ཟུག་ནས་ཁྲག་འོང་པ་གཅིག་ཡོད་པ་ལ་འདི་གཉིས་གཅོད་དགོས་པར་འདུག་སྙམ་པ་དང་། ཡང་ད་ལྟ་ཀ་འཆི་ཉེན་ཡོད་སྙམ་ནས། དེ་ཡང་གཅོད་མ་ཁོམ་པར། ཐུགས་དམ་རྩེ་གཅིག་ཏུ་མཛད་དོ་གསུང་ངོ་།
།ཞང་རིན་པོ་ཆེའི་གསུང་ནས། འཁོར་བ་ལས་མ་གྲོལ་བ་དེ། གནས་ལུགས་ཀྱི་དོན་མ་རྟོགས་པས་ལན་ནོ། །དེ་སྒྲིབ་པ་མ་ཟད་པས། དེ་ཚོགས་མ་བསགས་པས། དེ་དད་པ་མ་སྐྱེས་པས། དེ་འཆི་བ་མ་དྲན་པས་ལན་ནོ། །དེ་ལ་འཆི་བ་མི་རྟག་པ་གཤའ་མ་གཅིག་སྐྱེས་ན། ངེས་འབྱུང་གི་དད་པ་སྐོགས་ལངས་སུ་སྐྱེ། དེ་ཚོགས་གསོག །དེས་སྒྲིབ་པ་མཛད། དེས་གནས་ལུགས་ཀྱི་དོན་རྟོགས་ནས། འཁོར་བ་ལས་གྲོལ་བར་གྱུར་གསུང་ངོ་།
།གུ་རུ་པད་མས། འཆི་བ་མི་རྟག་པ་གཤའ་མ་གཅིག་དྲན་ན། །ཅིས་ཀྱང་དགོས་མེད་ཀྱིས་བློ་སྐྱེ། །ཐར་ལམ་ལ་བརྩོན་པས་འཇུག །ཡང་དག་གི་བླ་མ་ཚོལ། མི་དགེ་བ་ལ་ངང་གིས་འཇོལ། ཡོ་བྱད་ལ་འཛིན་ཆགས་མེད། འདུ་འཛི་ལ་བདུད་དུ་ལྟ། དེ་ཙན་ཡོནཏན་ཐམས་ཅད་རྒྱུད་ལ་སྤུངས་པ་བཞིན་དུ་ཡོང་སྟེ། བོད་ཀྱི་ཆོས་པ་ལ་འཆི་བ་མི་རྟག་པ་དྲན་པ་མི་འདུག་གསུང་ངོ་།
དམ་པ་རིན་པོ་ཆེས། འཆི་བ་བསམས་ན་ཅིས་ཀྱང་དགོས་པ་མེད། རྟག་ཏུ་དྲན་པར་གྱིས་ཤིག་དིང་རི་བ། གསུང་ངོ་།
མདོ་ལས། འདུ་ཤེས་ཐམས་ཅད་ཀྱི་ནང་ནས་མཆོག་ཏུ་འགྱུར་པ་ནི། འཆི་བ་མི་རྟག་པའི་འདུ་ཤེས་རབ་ཏུ་བསྒོམ་པར་བྱའོ། །ཅེས་སོ།
།འཆི་བ་མི་རྟག་པ་བསྒོམ་པ་འདི། འཆད་པ་པོ་རྣམས་ཀྱིས་བཤད་རིང་། ཉན་པ་པོ་རྣམས་ཀྱིས་ཉན་རིན། བསྒོམ་པ་པོ་རྣམས་ཀྱིས་བསྒོམ་རིན་མ་ཆོག་པར་ཆོས་ཟབ་མོ་གཅིག་སྐོག་དུ་ལས་འདུག །ཆོས་རྗེ་སྟོན་པ་གསུང་ངོ་།
།འཆི་བ་མི་རྟག་པ་བསྒོམས་པས། དང་པོ་དགེ་བ་ལ་བསྐུལ་བར་བྱེད། བར་དུ་བརྩོན་ན་འགྲུས་ཀྱི་ལྕག་བྱེད། ཐ་མ་བདེན་མེད་དུ་རྟོགས་པར་བྱེད་དེ། རྟག་ན་བདེན། བདེན་ན་རྟག །མི་རྟག་པས་མ་བདེན། མི་བདེན་པས་མི་རྟག་གོ་གསུང་ངོ་། །སྣང་གྲགས་ཀྱི་ཆོས་ཐམས་ཅད་རང་གི་སེམས་ཤར་བ་ཡིན་ཏེ།
བརྟག་གཉིས་ལས། སེམས་ནི་ཆེན་པོ་གཅིག་ཉིད་ལ། །ལྷའི་གཟུགས་ཀྱིས་རྣམ་པར་མཚོན། །ཅེས་པས།
ཕུག་པོ་ལྔ། འབྱུང་བ་ལྔ། ཉོན་མོངས་པ་ལྔ། དབང་པོ་དྲུག །སྐྱེ་མཆེད་དྲུག །ཁ་དོག་དྲུག །རིགས་དྲུག་ལགས་པ་རང་གི་སེམས་ཤར་བ་ཡིན་ཏེ། གཟུགས་ཕུང་རྡོ་རྗེ་མ་ཡིན་ཏེ། །ཅེས་གསུངས་སོ།
།ལང་ཀར་གཤེགས་པ་ལས། བག་ཆགས་ཀྱིས་ནི་དཀྲུགས་པའི་སེམས། །དོན་དུ་སྣང་པར་རབ་ཏུ་བྱུང་། །དོན་ཡོད་མ་ཡིན་སེམས་ཉིད་ནི། །ཕྱི་རོལ་དོན་མཐོང་ལོག་པ་ཡིན། །ཅེས་སོ།
མགུར་ལས། རིན་ཆེན་སེམས་ལས་ཕྱིར་གྱུར་པའི། །སངས་རྒྱས་མེད་ཅིང་གང་ཟག་མེད། །རྣམ་པར་ཤེས་པའི་གནས་དོན་རྣམས། ཕྱི་རོལ་གྱུར་པ་ཅུང་ཟད་མེད། །ཅེས་སོ།
ཆུ་འགྲམ་གཅིག་ཏུ་འགྲོ་བ་རིགས་དྲུག་གྲལ་ལ་བསྒྲིག་ན། དམྱལ་བ་ལ་ཁྲོ་ཆུ་ཁོལ་མ། །ཡི་དྭགས་ལ་སྣ་ཁྲག །ལྷ་མ་ཡིན་ལ་གོ་མཚོན། དུད་འགྲོ་དང་མི་ལ་ཆུ། ལྷ་ལ་བདུད་རྩིར་སྣང་སྟེ།
མདོ་ལས། དམྱལ་བ་ཡི་དྭགས་དུད་འགྲོ་དང་། །ལྷ་རྣམས་ཇི་ལྟར་རིགས་དྲུག་ལ། །དངོས་གཅིག་ཡིད་ནི་ཐ་དད་ཕྱིར། །དོན་མ་གྲུབ་པར་འདོད་པ་ཡིན། །ཅེས་སོ།
འཇམ་དཔལ་རྣམ་པར་རོལ་པའི་མདོ་ལས། ལྷའི་བུ་པད་མ་རྣམ་པར་རོལ་པས། འཇམ་དཔལ་ལ་སྨྲས་པ། འཇམ་དཔལ་གྱི་ཕྱི་རོལ་གྱི་ཡུལ་འདི་རྣམས་བྱེད་པ་པོས་བྱས་པའམ། ཇི་ལྟར་བལྟ་བར་བྱ། འཇམ་དཔལ་གྱིས་སྨྲས་པ། ལྷའི་བུ་ཕྱི་རོལ་གྱི་ཡུལ་འདི་རྣམས་ནི་བྱེད་པ་པོས་བྱས་པ་མ་ཡིན་ཏེ། སེམས་རྟོག་པའི་བག་ཆགས་རྒྱས་པའི་དབང་གིས་སྣང་བ་ཡིན་ནོ། །ལྷའི་བུས་སྨྲས་པ། བག་ཆགས་ཇི་ལྟར་བལྟས་ཀྱང་རི་བོ་དང་། རྒྱ་མཚོ་དང་། ཉི་ཟླ་ལ་སོགས་པ་སྲ་ཞིང་འཐས་པ་འདི་ལྟར་སྣང་དུ་ག་ན་རུང་། འཇམ་དཔལ་གྱིས་སྨྲས་པ། རྣམ་པར་རྟོག་པ་ལྟས་པའི་དབང་གིས་དེ་ལྟར་སྣང་དུ་རུང་ངོ་། གྲོང་ཁྱེར་ཆེན་པོ་ཝ་ར་ན་སེར། བྲམ་ཟེ་མོ་ཅིག་གི་ལུས་རྟག་ཏུ་བསྒོམས་པས་གྲོང་ཁྱེར་གྱི་མི་ཐམས་ཅད་ཀྱིས་སྟག་དངོས་སུ་མཐོང་ནས་མི་ཐམས་ཅད་བྲོས་ཟེར། གྲོང་ཁྱེར་སྟོངས་པ་བྱུང་། དགེ་སློང་ཁ་ཅིག་གིས་ཐམས་ཅད་རུས་པར་བསྒོམས་པས། རུས་པར་མཐོང་བ་བྱུང་ངོ་། དེ་རྣམས་ཡུན་ཐུང་དུས་ཀྱང་། དེ་ལྟར་སྣང་ན་ཐོག་མ་མེད་པའི་དུས་ནས་བག་ཆགས་སྟས་པ་ཅི་སྟེ་མི་སྣང་། ལྷའི་བུས་སྨྲས་པ། བག་ཆགས་སྟས་པའི་དབང་གིས་དེ་ལྟར་སྣང་བ་ཅིའི་ཕྱིར་ཡིན། འཇམ་དཔལ་གྱིས་སྨྲས་པ། སྣང་བ་ཐམས་ཅད་མ་དེས་པ་ཡིན་ཏེ། ལ་ལའི་སྣག་བ་ནི། ལ་ལའི་མུན་པ་ཡིན་པ་ལ་སོགས་པ་གསུངས་སོ།
།མདོ་ས་བཅུ་པ་ལས། ཀྱེ་རྒྱལ་བའི་སྲས་དག །ཁམས་གསུམ་པོ་འདི་དག་ནི་སེམས་ཙམ་མོ། །ཅེས་སོ།
སྤྱོད་འཇུག་ལས། ལྕགས་སྲེགས་ས་གཞི་སུ་ཡིས་བྱས། །མེ་སོགས་དེ་དག་གང་ལས་བྱུང་། །དེ་འདྲ་དེ་དག་ཐམས་ཅད་ཀྱང་། སྡིག་སེམས་འབྱུང་བར་ཐུབ་པས་གསུངས། །ཅེས་སོ།
བྱམས་པས། སྣང་བ་རང་སེམས་ཡིན་པའི་ཕིར། །ཐལ་ཚན་གྱི་ཆུ་བོ་རབ་མེད་ཀྱང་། །རྫི་ཐལ་གྱིས་འབབ་དང་བདུད་རྩིར་འགྱུར། །ཅེས་སོ།
ཕལ་པོ་ཆེ་ལས། སེམས་ནི་རི་མོ་མཁན་དང་འདྲ། །སེམས་ཀྱིས་ཕུང་པོ་བྱས་པ་སྟེ། །འཇིག་རྟེན་ཁམས་ནི་ཇི་སྙེད་པ། །དེ་སྙེད་ཐམས་ཅད་སེམས་ཀྱིས་བྲིས། །ཅེས་གསུགས་སོ།
མདོར་ན་ཕྱི་ནང་སྣོད་བཅུད། ས་ཆུ་མེ་རླུང་ནམ་མཁའ། ས་རྡོ་རི་བྲག །རྩི་ཤིང་ནགས་ཚལ། རི་རྭ་བ། ཁང་ཁྱིམ། རྩིག་པ་རེ་ལྡེ་ལ་སོགས་པ་དང་། སྐྱེས་པ་བུད་མེད། གསག་གཞག །རྟ་གླང་། དགྲ་སྡང་བ། གཉེན་བྱམས་པ་ལ་སོགས་པ་སྣང་ཞིང་སྲིད་པས་བསྡུས་པའི་ཆོས་ཐམས་ཅད་རང་གི་བློས་བཀོད། བློས་བྱས་པ་མ་གཏོགས་པ་པྱི་རོལ་ན་དོན་ལོགས་སུ་གྲུབ་པ་མེད་པར་ཐག་བཅད་དོ། །
༈ ཅིར་སྣང་རང་གི་སེམས་ཤར་བ་ཡིན་ཅིང་དེ་ཉིད་སྒྱུ་མ་རྨི་ལམ་ཡིན་ཏེ། སྔོན་རྒྱ་གར་ཡུལ་དབུས་ཀྱི་རྒྱལ་པོ་གཅིག་ལ། རྟ་སྲེད་ཞུགས་ནས་ཡོད་པ་ལ། སྒྱུ་མ་མཁན་བཟང་པོ་ལ་བརྩུན་མོས། རྒྱལ་པོ་ལ་སྒྱུ་མ་ཅིག་སྟོན་ཅིག་བྱས་པས། རྟ་བང་འགྲོས་སུ་འཛོམས་པ། ཡུ་ཡུ་རུ་དུ་སྡུག་པ་ཅིག་བསྟན་ས། རྟ་འདི་ཉོའམ་བྱས་པས་ཉོ་ཟེར། རིན་ལ་རྒྱལ་སྲིད་ཀྱི་ཕྱེད་འདོད་བྱས་པས། ཆགས་ཐོགས་མེད་པར་འཇལ་ནུས་པར་བྱུང་། །ཡང་རྩ་ནས་མི་ཅིག་བྱུང་ནས། ཁོ་གཅིག་པོ་བདག་པོ་མིན། ཚོང་གཤའ་མར་བྱེད་ན། དེའི་སྟེང་དུ་བཙུན་མོ་ཕྱེད་འཇལ་ནུས་སམ་བྱས་པས་ཀྱང་ནུས་པར་བྱུང་། ཡང་རྩ་ནས་མི་ཅིག་བྱུང་ནས། ཁོང་གཉིས་ཀྱང་བདག་པོ་མིན། ཚོང་གཤའ་མར་བྱེད་ན། དེའི་སྟེང་དུ་སྲས་ཚོའི་ཕྱེད་འཇལ་ནུས་སམ་བྱས་པས། དེ་ཅུང་མ་ནུས་ནས། ཞོན་ལ་ལྷ་ཡིས་བྱས་ནས་ཞོན་པས། སྐལ་པར་ཕྱིན་ཡང་མི་བགྲོད་པའི་སར་ཁྱེར་ནས། ཐང་ཆེན་པོ་གཅིག་གི་འགྲམ་ན་མཚོ་ཅིག་འདུག་པའི་ཐང་དེ་ལ་རྒྱལ་པོ་བསྒྱུར་ནས། མཚོ་ལ་རྟ་དེ་འཆོངས་སོ།
།དེ་ནས་ཡ་ཚད་ན་ཡར་ཕྱིན་ཙན། གྲོག་ཕུག་གཅིག་འདུག་པ་ན། རྒན་རྒོན་བཟའ་མི་གཉིས། བུ་མོ་གཅིག་དང་གསུམ་འདུག་པས། རྒད་པོ་དེ་ན་རེ། རྒྱལ་པོ་ཆེན་པོ་ཁྱེད་བསོད་ནམས་ཆེན་པོ་དང་ལྡན་པ་ཡིན་ཡང་། རྒྱལ་པོ་དུ་ནི་སྐལ་པར་ཕྱིན་ཡང་བགྲོང་པར་མི་ནུས། བུ་མོ་འདི་དང་གཟའ་མི་གྱིས་ཤིག་ཟེར་ནས་ཁྱིམ་ཐབས་བྱས། དེར་ལོ་བདུན་བརྒྱ་བསྡད། བུ་སྤུན་བདུན་བྱུང་། ཆུང་གཤོས་དེ་གུ་བ་ཅིག་བྱུང་། དེ་ནས་རྒད་པོ་ངེ་ན་རེ། རྒྱལ་པོ་ཆེན་པོ་ཁྱོད་བསོད་ནམས་ཆེན་པོ་དང་ལྡན་པ་ཡིན་པས། བུ་གུ་བ་འདི་ལ་བྱམས་པར་གྱིས་ཤིག་ཟེར་ནས་མཚོ་དེ་ལ་མཆོངས་སོ། །དེ་བཞིན་དུ་ཟེར་ཞིང་རིམ་པ་བཞིན་དུ་ཐམས་ཅད་མཆོངས་སོ། །རྟིང་ལ་བུ་གུ་བ་དེ་ལ་ཡང་སྨྲ་རྒྱུ་ཅིག་བྱུང་ནས། རྒྱལ་པོ་ཆེན་པོ་ཁྱོད་བསོད་ནམས་ཆེན་པོ་དང་ལྡན་པ་ཡིན་པས་སྐྱིད་པར་གྱིས་ཤིག་ཟེར་ནས་མཚོ་ལ་མཆོངས་སོ། །དེར་སྡུག་བསྔལ་དཔག་ཏུ་མེད་པ་ཡོད་པ་ལ། བཙུན་མོས། སྒྱུ་མ་མཁན་ལ་རྒྱལ་པོ་ལ་ཐུགས་རླུང་འཇུག་པར་འདུག་པས། སྒྱུ་མ་ཤིག་གཅིག་བྱས་ནས་བཤིག་པས། གྲིབ་སོ་མཐོ་གང་ཙམ་ལས་མ་སོང་བ་འདུག་གོ །དེ་ནི་སྐད་ཅིག་མ་ལ་སྐལ་པར་ཤར་བ་ཡིན་ནོ། །དེ་ལ་རྨི་ལམ་ཡིན་ཏེ། སྔོན་རྒྱ་གར་ལྷོ་ཕྱོགས་ཀྱི་རྒྱལ་པོ་ཞིག་ལ་བུ་མོ་ཅིག་ཡོད་པའི་བསམ་པ་ལ། རིགས་དང་ལོངས་སྤྱོད་སོགས་གང་གི་ཆ་ནས་ཀྱང་ངའི་མཛའ་ཟླ་འདིར་ཆད་འཛུད་ཡོད་ལྟང་པ་མི་འདུག་གསུངས།
།དེ་ཀུན་སྒྱུ་མའི་རྣམས་པར་རབ་ཤེས་ན། །དེ་ཚེ་སངས་རྒྱས་ལག་པའི་ཐིལ་དུ་གཏོད་པར་འགྱུར། །ཅེས་སོ།
།ཡེ་ཤེས་རྒྱ་མཚོ་ལས། རང་ལུས་སྒྱུ་མའི་རྣམ་པར་རབ་ཤེས་པས། །འགྲོ་ཀུན་སྐྱེས་པ་བུད་མེད་སྣ་ཚོགས་པ། །ཐམས་ཅད་གཟུགས་ནི་སྒྱུ་མའི་རྣམ་པ་ལས། །མཁས་པ་སུ་དག་དེ་ལས་གཞན་དུ་བརྗོད། །ཅེས་སོ།
།མངོན་རྟོགས་རྒྱན་ལས། རྨི་ལམ་ན་ཡང་ཆོས་རྣམས་ཀུན། །རྨི་ལམ་ལྟ་བུར་ལྟ་ལགས་སོ། །རྩེ་མོར་སྦྱིན་པ་སྦྱོར་བའི་རྟགས། །རྣམ་པ་བཅུ་གཉིས་དག་ཏུ་བཞེད། །ཅེས་སོ།
ནི་གུ་མས། རྒྱན་སྣ་རྟོག་པའི་རི་མོ་རྣམས། །སྒྱུ་མ་རྨི་ལམ་ཐག་བཅད་ནས། །འདུན་པ་དྲག་པོས་ཉམས་སུ་བླངས། །འཁྲུལ་སྣང་བྱུང་ན་ཡང་ཡང་སྦྱང་། །ཅེས་དང་། ཅི་སྣང་སྒོམ་དུ་མ་ཤེས་ན། །གཉེན་པོ་རྟེན་གྱིས་ག་ན་ལང་། །ཡུལ་ངན་སྤངས་པས་ག་ན་ཡོངས། སྒྱུ་མར་རྟོགས་པས་ཐམས་ཅད་རང་སར་གྲོལ། །ཅེས་སོ།
།གཉིས་མེད་རྣམ་རྒྱལ་ལས། སྒྱུ་མ་འདི་ནི་ཡོད་མེད་ལས་འདས་ཤིང་། །དབུ་ཙམ་དུའང་མི་གནས་ཀུན་རྫོབ་སྟེ། །ཆོས་རྣམས་སྒྱུ་མའི་སྣང་བ་ལས། །འགག་པ་མེད་པའི་རོལ་པ་རང་འབྱུང་བའོ། །ཅེས་སོ།
བརྒྱ་བྱིན་གྱི་ལེའུ་ལས། ལྷའི་བུ་དག་གིས། རབ་འབྱོར་ལ་འདི་སྐད་ཅེས་སྨྲས་སོ། །འཕགས་པ་རབ་འབྱོར། ཅི་སེམས་ཅན་དེ་དག་ཐམས་ཅད་སྒྱུ་མ་ལྟ་བུ་ཡིན་ནམ། རབ་འབྱོར་གྱིས་སྨྲས་པ། ལྷའི་བུ་དག །སེམས་ཅན་ནི་སྒྱུ་མ་ལྟ་བུ། སེམས་ཅན་ནི་རྨི་ལམ་ལྟ་བུ་སྟེ། ལྷའི་བུ་དག །དེ་ལྟར་སྒྱུ་མ་དང་། སེམས་ཅན་དེ་དག་ནི་གཉིས་སུ་མེད་དེ་གཉིས་སུ་བྱར་མེད་དེ་ལྟར་རྨི་ལམ་དང་། སེམས་ཅན་དེ་དག་ནི་གཉིས་སུ་མེད་དེ་གཉིས་སུ་བྱར་མེད་དོ། །ལྷའི་བུ་དག་ཆོས་ཐམས་ཅད་ཀྱང་སྒྱུ་མ་ལྟ་བུ་རྨི་ལམ་ལྟ་བུའོ། དེ་ནས་ལྷའི་བུ་དེ་དག་གིས། འཕགས་པ་རབ་འབྱོར་གྱིས་སྨྲས་པ། ལྷའི་བུ་དག་མྱ་ངན་ལས་འདས་པ་ཡང་སྒྱུ་མ་ལྟ་བུ་རྨི་ལམ་ལྟ་བུ་ཞེས་སྨྲ་ན། ཆོས་གཞན་ལྟ་ཅི་སྨོས། ལྷའི་བུ་དེ་དག་གིས་སྨྲས་པ། འཕགས་པ་རབ་འབྱོར་མྱ་ངན་ལས་འདས་པ་ཡང་སྒྱུ་མ་ལྟ་བུ། རྨི་ལམ་ལྟ་བུ་ཞེས་ཟེར་རམ། རབ་འབྱོར་བྱིས་སྨྲས་པ། ལྷའི་བུ་དག །ཁོ་བོ་ནི་གལ་ཏེ། མྱ་ངན་ལས་འདས་པ་ལས་ཁྱད་པར་དུ་འཕགས་པའི་ཆོས་གཞན་ཞིག་ཡོད་ཀྱང་། དེ་ཡང་སྒྱུ་མ་ལྟ་བུ། རྨི་ལམ་ལྟ་བུ་ཞེས་སྨྲའོ། །དེ་ནི་འདི་ལྟར་སྒྱུ་མ་ལྟ་བུ་དང་། རྨི་ལམ་ལྟ་བུ་དང་། མྱ་ངན་ལས་འདས་པ་འདི་དག་ནི་གཉིས་སུ་མེད་དོ། །གཉིས་སུ་བྱར་མེད་དོ། །ཅེས་གསུངས་སོ།
དེ་ལྟར་ཅི་སྣང་སྒྱུ་མ་རྨི་ལམ་དུ་ཁྱེར་བས། གཙོ་བོ་འདུན་འགྲོས་དང་བཅས་ཏེ་སངས་རྒྱ། དཔའ་བོ་སྟག་གདོང་དང་བཅས་ཏེ། བུད་མེད་བལ་སྐུད་དང་བཅས་ཏེ། ལྷ་བཟོ་བ་སྤིར་དང་བཅས་ཏེ་སངས་རྒྱའོ་གསུང་ངོ་།
བླ་མ་དྭགས་པོ་ལྷ་རྗེས། སློབ་རྣམས་ཀྱིས་ཐབས་ལམ་འབྱོངས་པ་སུ་བདོག་ཞུས་པས། ཆོས་དབྱུང་གསུང་། སྒྱུ་མ་རྨི་ལམ་འོད་གསལ་འཕོ་བ་བར་དོ་འབྱོངས་པ་སུ་ཡོད་ཞུས་པས་ཀྱང་ཆོས་གཡུང་གསུང་། རྣལ་འབྱོར་ཆོས་གཡུང་དེ། ཁྱི་ལྤགས་གཉིས་སྦྱར་ནས། སྦུད་པའི་གཟུགས་བྱས་པ་གཅིག་ལ། །འགྲོ་ན་བྲང་ཕགས། ལྟོ་བ་སྐོལ་ན་སྦུད་པ་ལ་སོགས་པ་གང་མཁོ་བ་བྱེད་པའི་ལྡོམ་བུ་ཅིག་ཡོད་པ་ལ། སློབ་མ་གཞན་རྣམས་ཀྱི་བསམ་པ་ལ། ལྡོམ་བུ་བ་འདི་ལ་དེ་ཙམ་པའི་བསྟོད་ར་ཅིག་དགོས་མོད་སྙམ་ནས། འཁོར་བ་ཚེས་མ་ཐེག་པར། ད་འདི་རྨ་དབབ་དགོས་པར་འདུག །དེ་ལ་བླ་མ་ལ་བཞེས་པ་འདྲེན་རེས་བྱས་པས། ཁོ་ལ་དྲང་རྒྱུ་མེད་ཙ་ན་རྨ་ཕེབས་ཡོང་ཟེར་ནས་གྲོས་བྱས། ཐམས་ཅད་ཀྱིས་དྲངས་ནས། །སང་ཆོས་གཡུང་ལ་འདྲེན་རེས་ཡོད་དོ་བྱས་པས། ཁོང་གིས། སྒོ་ཡོན་བསྐོར་ནས། ཕྲུ་བ་ཅིག་ཏུ་ཟན་དང་། །ཕྱེ་དང་། ཐུགས་པ་དང་སྟེར་བ་བྱུང་ཚད་བླུག་ནས། བླ་མ་ལ་དྲངས་པས་གསོལ། དེས་རྨ་ཡ་ཆ་གཅིག་མ་ཕེབས། ད་ཚོགས་འཁོར་ཤོམ་རེས་བྱེད་དོ་བྱས་ནས། གཞན་ཐམས་ཅད་ཀྱིས་ཚོགས་འཁོར་བཤམས། བཞེས་དགོངས་ཆོས་གཡུང་ལ་ཤོམ་རེ་ཡོད་དོ་བྱས་པས། ངའི་བཞེས་པ་དེའང་མགོ་ཐོན་ཅིག་མ་བྱུང་། ང་ལ་ཅི་ཡང་མེད་པའི་ཚོགས་འཁོར་རང་ཅི་ཡོང་ངམ་བྱས་པས། ཁྱོད་བླ་མའི་ཐུགས་ཟིན་གྱིས་མི་ཡོང་ན། གཞན་སུས་ཡོད་ཟེར། །དེ་ནུབ་རྨི་ལམ་བཟུང་ནས། ལྷའི་ཡུལ་དུ་ཕྱི་ནས་གཞེས་ནུབ་བླ་མ་དྭགས་པོ་ལྷ་རྗེ་ལ་མཆོད་པ་ཕུལ་ཅིག་མི་འབུལ་ན་འདུལ་བ་ཡིན་ནོ།
།ལྷ་མ་ཡིན་དང་། དྲི་ཟ་དང་། ཀླུའི་ཡུལ་དུ་ཕྱིན་པས། གཞེས་ནུབ་བླ་མ་ལ་མཆོད་པ་ཕུལ་ཅིག །མི་འབུལ་ན་འདུལ་བ་ཡིན་ནོ་ཅེས་སྡིགས་པས། ཐམས་ཅད་ཀྱི་ཁས་བླངས་སོ།
།དེ་ནས་བླ་མ་ལ་ཁྲི་འཐོན་པོ་བཤམས་ནས། ཚོགས་འཁོར་མཛད་པའི་དུས་སུ་མེ་ཏོག་གི་ཆར། འཇའ་འོད། རོལ་མོའི་སྒྲ། གླུ་དབྱངས་སྙན་པ། དྲི་ཞིམ་པོ་དཔག་ཏུ་མེད་པ་བྱུང་བས། བླ་མ་ལ་འཁོར་རྣམས་ཀྱིས། འདི་རྣམས་ཅི་ལགས་ཞུས་པས། ཆོས་གཡུང་གི་ཅལ་ཅོལ་ཡིན་མོད་གསུང་། དེ་ནས་ཆོས་གཡུང་རྩོད་མེད་དུ་གྱུར། དེ་ནས་བླ་མས་འོ་ཅག་ལ་མ་བྱིན་པའི་གདམས་ངག་ཟབ་མོ་ཅིག་ཁོ་ལ་བྱིན་ཡོད་པར་འདུག་སྙམ་ནས། འཁམས་པའི་གྲྭ་པ་ཕྱུག་པ་རྣམས་ཀྱིས། ཁོང་ལ་ནོར་ཆེན་པོ་ཕུལ་ནས་ཞུས་པས། ནོར་རྣམས་བླངས་ནས་ཕོངས་པ་རྣམས་ལ་བྱིན། །ཁོང་གིས་གསུངས་ནས། ངས་འཆི་བ་མི་རྟག་པ་དང་། བླ་མའི་མོས་གུས་དང་། ཅིར་སྣང་སྒྱུ་མ་རྨི་ལམ་དུ་ཁྱེར་བ་དང་། གསུམ་པ་དེ་བསྒོམས་པས། ཆོས་དྲུག་ཀ་རྫོགས་ནས་བྱུང་པ་ཡིན་ནོ་གསུང་ངོ་། དེས་ན། ཡེ་ཤེས་མཁའ་འགྲོ་ནི་གུ་མའི་སྒྱུ་ལུས་འབྲིང་པོ་དང་། ན་རོ་ཆོས་དྲུག་གི་སྒྱུ་ལུས་གཉིས་འདྲ་བ་ཡིན་ནོ་གསུང་ངོ་།།
༈ སྒྱུ་ལས་དབང་པོ་འབྲིང་གི་སྐབས་སུ། འཆི་བ་རྨི་རྟག་པ་དྲན་པ་དང་། སྣང་བ་སེམས་སུ་སྒྲུབ་པ་དང་། སེམས་སྒྱུ་མ་རྨི་ལམ་དུ་བསྒོམས་པ་ལ། ཡིད་ཆེས་ཞིང་ཐག་ཆོད་ངེས་ཤེས་སྐྱེད་པར་བྱེད་པའི་ཐབས། མདོ་རྒྱུད་ཀྱི་ལུང་དང་། གཏམ་རྒྱུད་རྣམས། བླ་མ་འགྲོ་མགོན་ཆེན་པོའི་གསུང་ལ་ཇི་ལྟར་བྱོན་པ་བཞིན་དུ། བཙུན་པ་རྒྱལ་མཚན་འབུམ་གྱིས་ལྷག་ཆད་མེད་པར་ཡི་གེར་བཀོད་པའོ།། མཁས་བཙུན་པས་མཛད་པས་དགེ་ལེགས་འཕེལ།། །།