Difference between revisions of "Gtor ma'i de nyid bdud rtsi'i dga' ston"

Revision as of 11:17, 22 November 2021

Resource ID
Title	gtor ma'i de nyid bdud rtsi'i dga' ston
Topics	Various
Author	Könchok Yenlak
Link	BDRC W3PD988

༄༅། །གཏོར་མའི་དེ་ཉིད་བདུད་རྩིའི་དགའ་སྟོན་ཞེས་བྱ་བ་བཞུགས།།

།སྟོན་པ་བདེ་བར་གཤེགས་ལ་གུས་བཏུད་དེ། །བསྟན་པ་དམ་པའི་ཆོས་ཀྱི་ཉམས་ལེན་ལས། །དགེ་འདུན་རྣམས་ཀྱི་ཐུན་མཚམས་ཆོས་སྤྱོད་ཀྱི། །རིམ་པ་གཏོར་མའི་གོ་དོན་ཕྱོགས་ཙམ་བརྗོད།
།བ་ལིཾ་ཞེས་བྱ་སྟོབས་དང་ནུས་པ་ལ། །འཇུག་སྟེ་རང་གཞན་རྒྱུད་ལ་འཆི་མེད་ཀྱི། །སྟོབས་ཆེན་ཐོབ་ནས་བདུད་བཞི་འཇོམས་ནུས་པའི། །དམ་རྫས་པཉྩ་ཨ་མྲྀ་ཏ་ཉིད་ཡིན།
།བྷོ་ཊའི་བརྡ་ལས་གྲངས་པའི་སྦྲ་བཤད་ན། །ཆགས་མེད་ཡོངས་སུ་གཏོང་བས་གཏོར་ཞེས་བྱ། །སྡང་མེད་བུ་ལྟར་བརྩེ་བས་མར་བརྗོད་དེ། །ཉེ་རིང་མེད་པའི་བཏང་སྙོམས་གཉིས་ཀའི་གྲོགས།
།ལྟ་བ་གནས་ལུགས་སེམས་ཀྱི་གཏོར་མ་ནི། །ཆོས་སྐུ་སྐྱེ་བ་མེད་པའི་རང་ཞལ་ལ། །སྣ་ཚོགས་སྣང་བ་མ་ལུས་ཅིག་ཅར་བབ། །རོ་གཅིག་ཆོས་ཀྱི་སྐུ་ཡི་འཚོ་གཞེས་བརྟན།
།སྒོམ་པ་རྣལ་འབྱོར་ལུས་ཀྱི་གཏོར་མ་འདི། །ཡེ་ཤེས་གཏུམ་མོ་སྒྲོན་མེ་ལྔ་སྦར་ཞིང་། །ཐུགས་རྗེའི་ལྕགས་ཀྱུ་བདུད་རྩི་ལྔ་བཞུས་པས། །ཕུང་ཁམས་རྒྱལ་བ་རིགས་ལྔའི་འཚོ་གཞེས་བརྟན།
།སྤྱོད་པ་བསྐྱེད་རིམ་ཕྱི་ཡི་གཏོར་མ་ནི། །གོང་དུ་ལྷག་པའི་ལྷ་ལ་མཆོད་པ་དང་། །འོག་ཏུ་འབྱུང་པོའི་ཚོགས་ལ་སྦྱིན་པ་དང་། །མཉམ་པར་རྡོ་རྗེའི་སྤུན་ཚོགས་རོལ་བའི་རྫས།
།རྣལ་འབྱོར་གཏོར་མར་བརྩོན་པར་མི་བྱེད་ན། །དེ་ཡི་བར་ཆད་སེལ་བར་མི་ནུས་ཞེས། །ཕྲིན་ལས་དོན་ཡོད་གྲུབ་པའི་དམ་ཚིག་ཏུ། །རྡོ་རྗེ་འཆང་གིས་བཅས་པར་མཛད་པ་ཉིད། །དམ་ཚིག་པ་དང་ཡེ་ཤེས་སེམས་དཔའི་ལྷ། །གཅིག་པུའི་ཉམས་ཀྱིས་དུ་མའི་གར་མཛད་པ། །ཡབ་ཡུམ་སྲས་དང་བློན་པོ་འཁོར་གྱི་ཚོགས། །ཕོ་ཉ་བྲན་གཡོག་སྔོན་དུ་རོལ་བ་དང་། །ཕྱི་ནས་འབྲང་བ་ལ་སོགས་བསམ་མི་ཁྱབ། །དེ་དག་དགྱིས་ཤིང་ཚིམ་པར་བྱེད་པའོ།
།དེ་ལྟའི་གཏོར་མའི་ཚུལ་ལ་མཐའ་ཡས་པས། །བསྡུ་ན་རང་གཞན་རྒྱུད་བསྡུས་ལུས་ལོངས་སྤྱོད། །བདག་པོས་བཟུང་དང་མ་བཟུང་གང་ཡང་རུང་། །དངོས་འབྱོར་ཡིད་སྤྲུལ་ཆེ་འབྲིང་ཆུང་ངུ་ཡིས། །དམིགས་པའི་རྟེན་གྱི་ཡོ་བྱད་གང་རུང་ཞིག །ལྷ་རུ་བསྐྱེད་དང་གཞལ་མེད་ཁང་དུ་བསྐྱེད། །ཤ་ལྔ་བདུད་རྩི་ལྔ་རུ་བསྐྱེད་པ་དང་། །ཟག་བཅས་ཟག་མེད་བདུད་རྩིའི་རྒྱ་མཚོ་དང་། །ལས་བཞི་སྒྲུབ་པའི་ཕོ་ཉར་བསྐྱེད་པ་དང་། །ལུས་སྲོག་ནོར་གྱི་གླུད་དུ་གཏོང་བ་དང་། །དགྲ་དང་འདྲེ་ཡི་ལིངྒར་བསྐྱེད་པ་དང་། །ཤ་ཁྲག་དམར་གྱི་གཏོར་མར་བསྐྱེད་པ་སོགས།
།གཞན་ཡང་གཏོར་མགྲོན་རང་རང་མགུ་བྱེད་པའི། །གཟུགས་སྒྲ་དྲི་རོ་རེག་བྱ་ཡིད་ལོངས་སྤྱོད། །སོ་སོའི་བསམ་པ་ཇི་བཞིན་སྤྲུལ་པར་བཤད། །ཀུན་ཀྱང་འཕྲལ་སྣང་སྒྱུ་མའི་རྟེན་འབྲེལ་ཡིན། །རྟེན་འབྲེལ་རང་བཞིན་གང་དུའང་མ་གྲུབ་པས། །སྙིང་པོ་མེད་པས་སྙིང་པོ་ལེན་ཚུལ་གྱིས། །ཐབས་ཤེས་ལྡན་ན་བྱང་ཆུབ་ལམ་དུ་འགྲོ།
།དེ་ལ་བྱ་བའི་རྒྱུད་ཀྱི་གཟུངས་སྔགས་ནས། །ཁ་འབར་མ་སོགས་གནོད་སྦྱིན་ཚིམ་བྱའི་ཕྱིར། །གཏོར་མའི་ཆོ་ག་ཞལ་ནས་གསུངས་པ་དང་། །བྱིན་གྱིས་རླབས་དང་རྗེས་སུ་གནང་པ་ཡི། །སྔགས་དང་ཕྱག་རྒྱ་ཏིང་འཛིན་རིམ་པ་བཞིན། །ཚུལ་ལྡན་སྒྲུབ་ན་ཕན་ཡོན་བསམ་ལས་འདས།
།དེ་ལ་བརྟེན་ནས་རུང་མཐུན་སྦྱར་བ་ཡི། །བླ་མ་བརྒྱུད་པའི་མན་ངག་ལས་འོངས་པ། །གཏོར་མ་གཏོང་ཚུལ་དུ་མ་བྱུང་གྱུར་ཏེ། །ཐམས་ཅད་སྐྱེས་བུའི་ཉེར་མཁོ་ཉིད་དུ་ངེས།
།འདིར་ནི་ཀུན་མཁྱེན་རང་བྱུང་རྡོ་རྗེ་ཡིས། །སྣ་ཚོགས་བེའུ་བུམ་ཞེས་བྱར་གསུངས་པ་དང་། །དོན་ལྡན་ཞབས་ཀྱིས་ཆོས་སྤྱོད་རབ་གསལ་དུ། །གསུངས་པ་གང་རུང་གཙོ་བོར་བྱ་དགོས་ལ།
།ཐོག་མར་ཁུངས་དང་གླེང་གཞི་ལོ་རྒྱུས་ནི། །ཡི་དྭགས་ཁ་ནས་མེ་འབར་སྐྱབས་མཛད་དང་། །ཁ་འབར་མ་ནས་དབུགས་དབྱུང་ནས་གསུངས་ཏེ། །དེ་ཡང་ཚེ་དང་ལྡན་པ་ཀུན་དགའ་བོ། །དབེན་པར་སྤྱོད་ཚེ་ཡི་དྭགས་མི་སྡུག་པ། །ཁ་ནས་མེ་འབར་ཞིག་གིས་འདི་སྐད་ཅེས། །ཁྱོད་ནི་ཉིན་ཞག་བདུན་ན་དུས་བྱས་ཏེ། །ཡི་དྭགས་གནས་སུ་སྐྱེ་བར་འགྱུར་ཞེས་གསུངས། །དེ་ལ་སྐྱོབ་ཕྱིར་སྟོན་པས་འདི་སྐད་ཅེས། །ང་སྔོན་བྲམ་ཟེ་ཞིག་ཏུ་གྱུར་པ་ན། །བྱང་ཆུབ་སེམས་དཔའ་སྤྱན་རས་གཟིགས་དབང་དང་། །དེ་བཞིན་གཤེགས་པ་དབང་ཕྱུག་ཡོན་ཏན་ལ། །གཟི་བརྗིད་ཚད་མེད་དབང་དུ་གྱུར་པ་ཡི། །འོད་ཟེར་རྣམ་པར་རྒྱལ་བའི་ཤུགས་ཞེས་པ། །གཟུངས་སྔགས་ཟབ་མོ་འདི་ནི་ཐོས་གྱུར་ནས། །ཡི་དྭགས་རྣམས་ལ་གཏོར་མ་བྱིན་བྱས་པས། །ཐམས་ཅད་མཐོ་རིས་ལྷ་རུ་སྐྱེས་གྱུར་ཏོ། །དགའ་བོ་ཁྱོད་ཀྱིས་ཟས་གཙང་ཆུ་སྦྱར་བ། །སྔགས་ཀྱིས་བསྔོས་ནས་གཙང་བར་བླུགས་བྱས་ན། །ཚེ་དང་བསོད་ནམས་རྣམ་པར་འཕེལ་འགྱུར་ཞིང།
།ཁ་འབར་མས་གཙོས་ཡི་དྭགས་གངྒཱའི་ཀླུང་། །བྱེ་བ་ཁྲག་ཁྲིག་འབུམ་ཕྲག་དུ་མ་ཡིས། །བྱེ་མ་སྙེད་ཀྱི་གྲངས་དང་མཉམ་པ་ལ། །མ་ག་དྷ་ཡི་བྲེ་ཆེན་བདུན་བདུན་གྱི། །བཟའ་བཏུང་བྱིན་པར་འགྱུར་ཞིང་དེ་ཐོབ་ནས། །ཚིམ་ཞིང་རངས་ཏེ་ལྷ་ཡུལ་སྐྱེ་བར་འགྱུར།
།དེ་བཞིན་དགེ་སློང་དགེ་བསྙེན་ཕ་མ་འམ། །གཞན་ཡང་རུང་སྟེ་གཟུངས་སྔགས་འདི་བཟླས་ནས། །ཡི་དྭགས་རྣམས་ལ་ཁ་ཟས་བྱིན་གྱུར་ན། །བསོད་ནམས་ཚད་མེད་ཡོངས་སུ་རྫོགས་འགྱུར་ཏེ། །ཚེ་རིང་མདངས་དང་སྟོབས་རྣམས་རབ་ཏུ་འཕེལ། །མི་མ་ཡིན་དང་གནོད་སྦྱིན་སྲིན་པོ་དང་། །ཡི་དྭགས་མ་རུངས་ཀུན་གྱིས་འཚེ་མི་ནུས། །དེ་ལ་གཟི་བརྗིད་ཚད་མེད་ལྡན་པར་འགྱུར།
།གང་དག་ལྷ་ཡི་དྲང་སྲོང་བྲམ་ཟེ་ལ། །སྔགས་འདིས་ཁ་ཟས་གཙང་མ་བྱིན་རླབས་ནས། །འབབ་ཆུ་གཙང་མའི་ནང་དུ་དོར་བྱས་ན། །གངྒཱའི་ཀླུང་གི་བྱེ་མ་ཁྲག་ཁྲིག་འབུམ། །དཔག་མེད་བྱེ་མ་རྙེད་ཀྱི་རྡུལ་ཕྲན་གྲངས། །དྲང་སྲོང་བྲམ་ཟེའི་ཚོགས་ལ་ཅི་འདོད་ཀྱི། །མཆོད་པར་འགྱུར་ཞིང་ཀུན་གྱིས་དུས་གཅིག་ཏུ། །འདོད་དོན་འགྲུབ་པའི་སྨོན་ལམ་འདེབས་པར་འགྱུར།
།གལ་ཏེ་དཀོན་མཆོག་གསུམ་ལ་མཆོད་འདོད་ཀྱང་། །སྤོས་དང་མེ་ཏོག་ཞལ་ཟས་ལ་སོགས་པར། །ཉི་ཤུ་རྩ་གཅིག་སྔགས་ནས་ཕུལ་བྱས་ན། །དེ་དག་ལྷ་རྫས་དམ་པའི་ངོ་མཚར་དང་། །ལྡན་ཞིང་སྤྱན་སྔར་རྒྱུན་ཆད་མེད་པར་འགྱུར།
།དེ་ལྟ་བས་ན་ཁྱོད་ཀྱིས་འདི་ཟུངས་ལ། །རིགས་ཀྱི་བུ་དང་བུ་མོ་གཞན་ལའང་སྟོན། །སྦྱིན་པའི་ཕ་རོལ་ཕྱིན་པ་རྫོགས་འགྱུར་ཞེས། །བཅོམ་ལྡན་འདས་ཀྱིས་དེ་སྐད་བཀའ་བསྩལ་ཏོ།
།དེ་ལྟར་སྤྱན་རས་གཟིགས་དང་སྟོན་པ་མཆོག །ཉེ་གནས་གསང་བའི་བདག་པོ་ཀུན་དགའ་བོ། །དགེ་སློང་ཀུན་དགའ་མོ་དང་གྲགས་འཛིན་མ། །ཉེ་གནས་མ་དང་འཕགས་པ་དགྲ་བཅོམ་དང་། །རྣལ་འབྱོར་དབང་པོ་ཨཱ་ནནྡ་བཛྲ། །རྡོ་རྗེ་གདན་པ་གསེར་གླིང་ཇོ་བོ་རྗེ། །དགེ་བཤེས་སྟོན་པ་སྐུ་མཆེད་གསུམ་ལ་སོགས། །བཀའ་གདམས་བརྒྱུད་པའི་སྲོལ་ལས་བྱུང་བར་གྱུར། །ལོ་པཎ་རྣམས་ཀྱིས་སྔར་ནས་བསྒྱུར་ཟིན་ཀྱང་། །ཕྱག་ལེན་དར་བ་ཇོ་བོའི་བཀའ་དྲིན་ཏེ། །བྱང་ཆུབ་སེམས་ཀྱི་ཕྱག་རྗེས་གཅིག་ཡིན་ནོ།
།དེ་ལས་བྱུང་བ་ཆོ་གའི་རིམ་པ་ལ། །བདག་སྒྲུབ་རྫས་སྒྲུབ་གཏོར་མགྲོན་སྒྲུབ་པ་སྟེ། །སྒྲུབ་པ་གསུམ་དང་འབུལ་བའི་རིམ་པ་ཡི། །ལས་སྦྱར་གཅིག་སྟེ་དོན་ཚན་རྣམ་པ་བཞི།
།དོན་ཚན་དང་པོ་རྟེན་གྱི་གང་ཟག་ནི། །སོ་སོར་ཐར་པའི་སྡོམ་གནས་གང་ཡང་རུང་། །ཚུལ་ཁྲིམས་འཆལ་པས་རིགས་སྔགས་མི་འགྲུབ་ཅིང་། །ཚུལ་ལྡན་སྨོན་ལམ་འགྲུབ་པར་གསུངས་པས་ན།
།སུམ་ལྡན་རྡོ་རྗེ་འཛིན་པ་མཆོག་ཏུ་རིགས། །སྡོམ་ལྡན་མིན་ཀྱང་དད་པ་དོན་གཉེར་དང་། །བརྩོན་པའི་སྤྲོ་བ་ཡོད་ན་སུས་ཀྱང་རུང་། །ཆག་ན་རེ་བ་འབྲས་མེད་ཉེས་པ་ཡོད། །དེ་ཕྱིར་ཆག་མེད་གཏོང་བ་ཤིན་ཏུ་གཅེས། །བསམ་པ་བྱང་ཆུབ་སེམས་ཀྱི་སྙིང་རྗེ་དང་། །རྡོ་རྗེ་ཐེག་པའི་བསྐྱེད་རིམ་གསལ་དགོས་ལ། །སྤྱོད་ལམ་ཁྲུས་དང་གཙང་སྦྲར་བཅས་པ་དང་། །ཤ་ཆང་སྒོག་བཙོང་ལ་སོགས་སྤོང་བར་གསུངས།
།བྱ་རྒྱུད་ཙམ་པོར་བདག་བསྐྱེད་མེད་མོད་ཀྱང་། །ཁྱད་པར་ཅན་ལ་བདག་བསྐྱེད་གསུངས་པས་ན། །ཐུབ་པའི་དབང་པོའམ་སྤྱན་རས་གཟིགས་སུ་བསྒོམ།
།དོན་ཚན་གཉིས་པར་གང་དུ་གཏོང་བའི་སྣོད། །རྭ་དང་ཐོད་པ་བསེ་སོགས་མི་གཙང་རིགས། །ཆུང་དང་ཁ་ཆག་ཞབས་རྡོལ་དྲི་མ་ཅན། །ལྕགས་ཀྱི་སྣོད་དང་ལ་ཆ་ཏི་ཚ་ཅན། །འཁར་བའི་རིགས་ཀྱི་སྣོད་རྣམས་རབ་སྤངས་ནས། །གསེར་དངུལ་ཟངས་དམར་དུང་དང་ཉ་ལྕིབས་དང་། །རྫ་ཤིང་དཀར་ཡོལ་ལ་སོགས་འབྱོར་དང་བསྟུན། །རྣམ་པ་རྒྱ་ཆེ་ཁ་དབྱེས་ཆེ་ཆུང་ཚད། །ཇི་ལྟར་ཆེ་ཞིང་བསོད་ནམས་ཆེ་བར་གསུངས།
།ནང་གི་བཅུད་ནི་ཤ་ཆང་ལ་ཕུག་དང་། །དུག་གི་རིགས་དང་སྡིག་དང་འདྲེས་པའི་ཟས། །སྤངས་ནས་ཟས་མཆོག་དཀར་གསུམ་མངར་གསུམ་དང་། །ཐ་མ་ཟན་དང་ཆུ་ལ་བྱ་བ་སྟེ།
།ཇོ་བོས་བོད་ལ་ཕྱུག་པོ་མི་ཡོང་བ། །གཏོར་ཟན་སླ་དང་མཐེབ་སྐྱུས་ལན་ཞེས་གསུངས།
།དྲི་མ་ཅན་ལ་གཏོར་མགྲོན་མི་འཁོར་བས། །དེ་གསུམ་སྤངས་ཤིང་གྲུབ་ཐོབ་ལྕེ་སྒོམ་པས། །འབྲུ་དང་ཆུ་གཙང་ཁོ་ན་སྦྱར་བ་ནི། །ལག་ཏུ་ལེན་པར་བདེ་བ་ཡིན་ཡང་གསུངས།
།སློབ་དཔོན་ཨ་བྷྱས་སྔགས་ཚར་བདུན་བརྗོད་ཅིང་། །ལག་གཡས་བརྐྱང་བའི་སོར་མོ་ལྔ་པོ་ལས། །བདུད་རྩི་བབས་པས་ཆུ་དང་བཅས་པའི་ཟན། །ཉག་མ་རེ་ཡིས་མ་ག་དྷ་ཡི་བྲེའི། །ཁལ་ལྔ་ཙམ་དེའི་བཟའ་བར་གྱུར་པ་དེས། །ཚིམ་བར་བསམ་ཞིང་སེ་གོལ་ལན་གསུམ་བརྡབ།
།ཅེས་གསུངས་དེས་ན་སྐབས་དང་རིགས་པས་དཔྱད།
།ཟན་གྱི་གར་སླ་རང་གི་ཟ་རུང་ཙམ། །ཆེ་ཆུང་ཚད་ནི་ཆེ་བ་རི་རབ་ཙམ། །རྒྱ་མཚོ་ཙམ་མམ་ཆུང་བ་ནས་འབྲུ་ཙམ། །ཟན་ཁམ་གཅིག་དང་ཆུ་ཕུལ་གང་ཡང་རུང་། །རང་གི་འབྱོར་པ་དག་དང་བསྟུན་ཏེ་བྱ།
།གྲུབ་ཐོབ་ཆེན་པོ་ཀརྨ་པཀྵི་ཡིས། །ཕྲིན་ལས་ཐམས་ཅད་གཏོར་མར་རག་ལས་པས། །ཉང་ཉུང་ཆང་ཆུང་ཙམ་གྱིས་མི་རུང་སྟེ། །རི་ལྟར་སྤུངས་ཤིང་མཚོ་ལྟར་བསྐྱིལ་དགོས་གསུངས།
།གཏོར་མའི་གྲུབ་ཐོབ་བླ་མ་ལྕེ་སྒོམ་པས། །ནས་འབྲུ་ཟན་ཁམ་ཙམ་ལའང་བརྟེན་ནས་ནི། །བརྒྱ་རྩ་ཆག་མེད་ཐུགས་དམ་མཛད་པ་དང་། །སྒྲུབ་རྒྱགས་ཞོ་གཅིག་ཙམ་ལས་མེད་དུས་ཀྱང། །གཏོར་མ་འབུམ་ཚོའི་བསྙེན་པ་མཛད་པ་ན། །འཕྲལ་དུ་ལོངས་སྤྱོད་དཔག་ཏུ་མེད་པ་འཕེལ། །གཞི་བདག་དམ་ལ་ཐོགས་པ་བྱུང་ཞེས་གསུངས།
།དམིགས་པ་གཙོ་ཟེར་དངོས་པོ་ཁྱད་བསད་ནས། །སྣོད་མེད་སྐམ་གཏོར་ལ་སོགས་མི་རུང་སྟེ།
།ཆུ་ནི་སྐོམ་བ་སེལ་བའི་བདུད་རྩིའི་རྒྱུན། །ཟན་ནི་བཀྲེས་པ་སེལ་བ་སྲོག་གི་ཟུངས། །སྣོད་ནི་དེ་དག་བརྟེན་པའི་སྣོད་ཡིན་པས། །རྒྱུ་ཚོགས་གྲངས་ཚང་རྟེན་འབྲེལ་འགྲིགས་པ་དགོས།
།ཡི་དྭགས་རྣམས་ཀྱིས་ཇི་ཙམ་ཐོབ་པ་ནི། །མ་ག་དྷ་ཡི་བྲེ་ཚད་བདུན་བདུན་ཏེ། །དེ་ཡི་བྲེ་རེར་གསེར་བྲེའི་ཁལ་བཞི་དང་། །བྲེ་བཞིར་གྲོ་པར་འདུག་ཅེས་གྲགས་པར་སྣང་། །དེ་ནི་སྔགས་མཐུ་ཁོ་ནས་འཕེལ་བའི་ནུས། །ཏིང་འཛིང་མཐུས་ནི་བསམ་མི་ཁྱབ་ཏུ་འཕེལ།
།དོན་ཚམ་གསུམ་པར་དཀོན་མཆོག་སྲི་ཞུའི་མགྲོན། །མགོན་པོ་ཡོན་ཏན་རིགས་དྲུག་སྙིང་རྗེའི་མགྲོན། །ཤ་འཁོན་ལན་ཆགས་མགྲོན་བཞིར་གྲགས་པ་ལས།
།དང་པོ་གཉིས་ནི་སྤྱན་འདྲེན་བྱས་ན་འབྱོན།
།མ་བྱས་མི་འབྱོན་དྲངས་ཀྱང་མི་འབྱོན་པ། །རིགས་དྲུག་ནང་ནས་གནོད་སྦྱིན་གཞོང་ཐོགས་དང་། །ལག་རིང་རི་རྩེ་རྐན་དང་རྟག་མྱོས་རྣམས། །རྒྱ་མཚོ་ལུད་དང་རི་རབ་འགྱེལ་དོགས་དང་། །རི་རབ་རྩེ་ནས་གླིང་གཞི་བསྲུང་བ་དང་། །ཤིན་ཏུ་མྱོས་པར་གྱུར་པ་དེ་རྣམས་བཞིའོ།
།སྤྱན་འདྲེན་བྱེད་དུ་མི་རུང་མགྲོན་བཞི་ནི། །ས་བདག་སྟོབས་ཆེན་ཤྲཱི་པ་ཏྲ་གཉིས། །ཧང་པཎ་ཀླུ་དང་ཡི་དྭགས་གཏེར་སྲུང་བཞི། །གཞན་དུ་ཕྱིན་ན་ས་གཞི་གཡོ་བ་དང་། །ནད་རྐྱལ་ཁ་ལུད་མཐོང་བའི་དུག་ཡོད་དང་། །གཏེར་བུམ་བོར་ན་མུ་གེ་འབྱུང་ཕྱིར་རོ།
།སྤྱན་འདྲེན་མ་བྱས་ན་ཡང་འབྱོན་པ་ནི། །ཡི་དྭགས་རྣམས་ནི་ཤ་ལ་སྦྲང་མ་བཞིན། །བཤམས་མ་ཐག་ཏུ་འདུ་ཞིང་འཚོགས་པར་བྱེད།
།དབྱེ་སྒོ་འདིར་ནི་མཆོད་ཡུལ་སྦྱིན་ཡུལ་གཉིས། །དེ་ལས་ཕྱེ་ན་བསམ་གྱིས་མི་ཁྱབ་ཀྱང་། །བརྒྱུད་པའི་ཕྱག་ལེན་བཅུ་གཉིས་དབྱེར་མཛད་དེ།
།དང་པོ་བླ་མ་ཡི་དམ་ལྷ་ཚོགས་དང་།
།གཉིས་པ་ཡེ་ཤེས་པ་ཡི་ཆོས་སྐྱོང་དང་།
།གསུམ་པ་འཇིག་རྟེན་པ་ཡི་ཆོས་སྐྱོང་དང་།
།བཞི་པ་བྲམ་ཟེ་དྲང་སྲོང་གྲུབ་པ་དང་།
།ལྔ་པ་ལྷན་སྐྱེས་ལྷ་རྣམས་མཆོད་ཡུལ་ཡིན།
།ལྷན་སྐྱེས་བདུད་དང་དྲུག་པ་རིས་དྲུག་དང་།
།བདུན་པ་ཀླུ་དང་བརྒྱད་པ་ཡི་དྭགས་དང་།
།དགུ་པ་ལན་ཆགས་བཅུ་པ་གཞི་བདག་སྤྱི།
།བཅུ་གཅིག་བྱེ་བྲག་ཡུལ་གྱི་གཞི་བདག་དང་།
།བཅུ་གཉིས་ཁས་ཉེན་དབང་ཆུང་མ་ཐོབ་ཅིང་།
།གློ་བུར་ལྷགས་པ་རྣམས་ཏེ་སྦྱིན་ཡུལ་ཡིན།
།དང་པོའི་ཁོངས་སུ་ཇོ་བོ་དཀོན་མཆོག་གསུམ། །རྒྱལ་བ་རྒྱལ་སྲས་ཉན་རང་འཕགས་པ་སོགས། །སྐྱབས་གནས་ཀུན་བསྡུ་དེ་དག་མཆོད་པའི་དགེས། །ཐུགས་རྗེའི་ལྕགས་ཀྱུས་རྗེས་སུ་འཛིན་པར་འགྱུར།
།གཉིས་པ་ཡེ་ཤེས་ཆོས་སྐྱོང་མཆོད་པས་ནི། །སྔོན་གྱི་ཐུགས་དམ་བཞིན་ཏུ་ཕྲིན་ལས་མཛད།
།གསུམ་པ་འཇིག་རྟེན་པ་ཡི་ཆོས་སྐྱོང་ནི། །སྟོན་པའི་སྤྱན་སྔར་སྡོམ་པ་སེམས་བསྐྱེད་ནོད། །སངས་རྒྱས་བསྟན་པ་བསྲུང་བར་ཁས་བླངས་ཤིང་། །འཇིག་རྟེན་སྐྱོང་ཕྱིར་འཇིག་རྟེན་ཚུལ་བཟུང་བའི། །ལྷ་ཆེན་བརྒྱད་དང་ཀླུ་བརྒྱད་གཟའ་ཆེན་བརྒྱད། །གནོད་སྦྱིན་བརྒྱད་དང་ཕྱོགས་སྐྱོང་རྒྱལ་ཆེན་བཞི། །རྒྱུ་སྐར་ཉེར་བརྒྱད་ཚངས་པ་བརྒྱ་བྱིན་སོགས། །གཙང་རིས་དཔལ་མགོན་རྣམས་ལ་མཆོད་བྱས་པས། །མི་མཇེད་འཇིག་རྟེན་ཀུན་ཏུ་བདེ་ལེགས་འབྱུང་།
།བཞི་པ་ལྷ་ཀླུ་མི་ཡི་བྲམ་ཟེ་དང་། །དྲང་སྲོང་ཁྲིམས་ལྡན་དཀའ་ཐུབ་རིགས་སྔགས་འཆང་། །ཕན་དང་གནོད་པའི་དམོད་འདོར་བདེན་ཚིག་གྲུབ། །སྤྱན་དང་མངོན་ཤེས་རིག་གནས་བཅོ་བརྒྱད་རིག །སྨོན་ལམ་འདེབས་པ་དཔག་ཏུ་མེད་པ་དང་། །ནད་པར་ཕན་འདོགས་སྨན་གྱི་བྲམ་ཟེ་དྲུག །བདུད་རྩི་སྨན་གྱི་དྲང་སྲོང་བཅོ་ལྔ་སོགས། །མཆོད་པས་ནད་ཡམས་སེལ་ཞིང་སྨོན་ལམ་འགྲུབ།
།ལྔ་པ་ལྷན་ཅིག་སྐྱེས་པའི་ལྷ་བདུད་ནི། །འཚོ་བའི་ལྷ་དང་སྲུང་སྐྱོབ་འགྲོགས་པའི་ལྷ། །འགོ་བའི་ལྷ་ལྔ་དེ་དག་རིམ་པ་བཞིན། །ཡུལ་ལྷ་སྲོག་ལྷ་དགྲ་ལྷ་མོ་ལྷ་དང་། །ཕོ་ལྷ་ཞེས་བྱ་ལུས་ཀྱི་གཟི་བརྗིད་དང་། །སེམས་ཀྱི་དཔའ་སྟོབས་མཐའ་དག་སྦྱིན་བྱེད་པའོ། །བསོད་ནམས་ཅན་ལ་ལྷན་སྐྱེས་ལྷ་མང་ཡང་། །བསོད་ཆུང་རྣམས་ལ་འདྲེ་བདུད་མང་དུ་འཁོར། །གཉིས་ཀར་མཆོད་སྦྱིན་བྱས་པས་གྲོགས་སུ་འགྱུར།
།དྲུག་པ་རིགས་དྲུག་ཇི་སྙེད་ལ་སྦྱིན་པའི། །ལྷག་བསམ་མཐུ་ཡིས་དེ་སྙེད་བསོད་ནམས་འཐོབ། །ཀུན་ཀྱང་རང་གི་གདུལ་བྱའི་ཞིང་དུ་འགྱུར། །ཁྱད་པར་གཏོར་མ་མི་ལ་བསྡོ་བ་ནི། །དགེ་བཤེས་འཆད་ཀ་བ་ཡི་ཁྱད་ཆོས་གསུངས། །དགྲ་ལ་བསྔོས་ན་དེ་ཡི་གནོད་པ་ཞི། །བན་བོན་བསྔོས་ན་བྱད་ཁ་ཕུར་ཁ་བཟློག །ཡུལ་མིར་བསྔོས་ན་ཀུན་གྱིས་བྱམས་པར་འགྱུར།
།བདུན་པ་ཀླུ་གཉན་ས་བདག་ལ་སོགས་ནི། །བཀའ་གཉན་ཀོ་ལོང་དམ་པའི་དབང་གིས་ན། །གཏོར་མ་སྒོས་སུ་བསྔོ་བར་བྱས་པ་ནི། །ཐོ་ཅོ་མི་གཙང་གྲིབ་སོགས་ཕོག་ཐུག་རྣམས། །བཟོད་ཅིང་གནོད་སེམས་ཞི་བའི་དགོས་པ་ཡོད།
།བརྒྱད་པ་ཡི་དྭགས་རྣམས་ནི་ཁྱད་པར་དུ། །སྟོན་པས་འདི་ཉིད་ཁོ་ནའི་དོན་དུ་བཅས། །ཡི་དྭགས་རིགས་ལ་བྱེ་བ་སུམ་ཅུ་གཉིས། །སྔོན་ལས་སེར་སྣ་འཇུར་གེགས་བྱས་པ་དང་། །དགེ་འདུན་འདུ་བའི་སྒོ་ལ་སྤྱད་པ་དང་། །དཀོན་མཆོག་དཀོར་ལ་འབགས་པའི་ཉེས་པ་ཡིས། །ད་ལྟ་བཀྲེས་སྐོམ་ཚ་གྲང་ངལ་དུབ་དང་། །གཞན་གྱིས་རྡེག་འཚོག་རྐུ་འཕྲོག་ཏུ་མས་གཟིར།
།དཔེར་ན་ཇོ་བོ་རྗེ་ཡིས་གཟིགས་པ་ན། །ལྦ་བར་རང་ལུས་བཏགས་པས་འགུལ་མི་ནུས། །དེ་ལ་བྲད་ནས་རྣག་ཁྲག་ཟ་བ་དང་།
།སློབ་དཔོན་ཛེ་ཏཱ་རི་ཡིས་གཟིགས་པ་ལ། །བཅུ་གཉིས་ལོ་ལ་ཟས་སྐོམ་བསྒུགས་ན་ཡང་། །ལུད་པའི་བཅུ་ཆ་མ་གཏོགས་མ་ཐོབ་སོགས། །མི་སྡུག་ཉམ་ཐག་དུ་མ་ཡོད་པར་གསུངས།
།དེ་དག་རྣམས་ལ་ནན་ཏན་གྱིས་བསྔོས་ན། །བཀྲེས་སྐོམ་བསལ་བའི་ཕན་ཡོན་དཔག་མེད་འབྱུང་། །ཕྱུག་ཅིང་འགྲངས་ལ་ཁ་ཟས་མི་དགོས་ལྟར། །མགྲོན་གྱི་ནང་ནས་ཡི་དྭགས་གཙོ་བོ་ཡིན།
།དགུ་པ་ལན་ཆགས་གདོན་ཆེན་བཅོ་བརྒྱད་དང་། །བགེགས་རིགས་སྟོང་ཕྲག་བརྒྱད་ཅུ་གློ་བུར་གྱི། །ཡེ་འགྲོགས་སུམ་བརྒྱ་དྲུག་ཅུ་ལ་སོགས་པ། །གནོད་བྱེད་གདུག་རྩུབ་ནག་ཕྱོགས་འབྱུང་པོའི་རིགས། །བོད་ཀྱི་ལྷ་འདྲེ་མུ་བཙན་རྒྱལ་པོ་དང་། །ཐེའུ་རང་མ་མོ་བདུད་སྲིན་གཟའ་དང་ཀླུ། །གནོད་སྦྱིན་སྨན་མོ་གཤིན་རྗེར་གྲགས་པ་སོགས། །ཁྱད་པར་གཅིག་སྲོག་གཅིག་གིས་བཅད་པ་དང་། །གཅིག་ནོར་གཅིག་གིས་ཕྲོགས་པ་ལ་སོགས་པའི། །བུ་ལོན་ཤ་འཁོན་ཞུགས་པ་ཐམས་ཅད་ལ། །བསྔོས་པས་ཕན་ཚུན་གནོད་སེམས་ཞི་བར་འགྱུར།
།བཅུ་པ་འཛམ་བུ་གླིང་གི་གཞི་ཡི་བདག །ཡུལ་བདག་གནས་བདག་ཅེས་གྲགས་མེ་དཔུང་བསྣམས་པ་མེ་ཡི་ལྟ། །གསལ་བའི་འོད་ཟེར་ཆུ་བདག་སྦྲུལ་ཞགས་བསྣམས་པ་ཝ་རུ་ཎ། །སྦུད་པ་བསྣམས་པ་རླུང་ལྷ་བཱཡ་བེ་བྱེ་རླུང་གི་བདག །འཁོར་ལོ་བསྣམས་པ་ལག་པ་ཆེན་པོ་གཏེར་བདག་རིན་པོ་ཆེའི་བུམ་བསྣམས་པ་ནོར་རྒྱུན་མ། །རིལ་གནས་པ་རི་རབ་བསྣམས་པ་བརྟན་པའི་བློ་གྲོས་དང་། །ནགས་ཀྱི་ལྷ་མོ་རྨ་བྱ་བསྣམས་པ་རྨ་བྱའི་མདངས་ལྡན་མ། །ཤིང་ཏོག་བསྣམས་པ་ཤིང་གི་ལྷ་མོ་ཀུན་ནས་འོད་ཟེར་དང་། །སྦྲང་རྩི་བསྣམས་པ་རྩི་ཐོགས་ལྷ་མོ་གྲུབ་པའི་བློ་གྲོས་སོགས། །ཁྱད་པར་བོད་ཁམས་བརྟན་སྐྱོང་འཁོར་བཅས་ལ། །བསྔོས་པས་ཡུལ་ཀུན་བཀྲ་ཤིས་བྱིན་ཆགས་ཤིང་། །ལོ་ཕྱུག་རྟག་ཏུ་ལེགས་པའི་དགོས་པ་ཡོད།
།བཅུ་གཅིག་རང་ཉིད་གང་དུ་གནས་པ་དེར། །རྟག་ཏུ་གཉུག་མར་གནས་པའི་གཞི་བདག་རིགས། །ཚོང་དུས་ཆོས་རེ་སྐྱེ་བོའི་འདུ་འཚོགས་ས། །དགེ་འདུན་རྣམས་ཀྱི་ཀུན་དགའ་ར་བའི་ལྷ། །རིན་ཆེན་འབར་བ་བསྣམས་པ་ཐུགས་རྗེ་ཀུན་ཏུ་སྣང་བའི་བློ་གྲོས་དང་། །ཁྱིམ་གྱི་ཁྱིམ་ལྷ་རིན་པོ་ཆེ་བསྣམས་པ་ཀུན་ཏུ་སྣང་བ་སོགས། །གཞན་ཡང་འདི་ན་འདི་གནས་ཞེས་གྲགས་པ། །དེ་ལ་བསྔོས་པས་ཕྱག་དོག་གདུག་རྩུབ་ཞི། །གནས་པོ་གཞིན་དུ་སྟོངས་གྲོགས་རོགས་དན་བྱེད།
།གཅུ་གཉིས་གློ་བུར་ལྷགས་པའི་ཡི་དྭགས་རིགས། །དཔེར་ན་སྟོན་མོ་ཆེན་པོ་བྱས་གྱུར་ཀྱང་། །བསོད་ཆུང་ཁ་ཅིག་རྗེས་ནས་ལུས་པ་ལྟར། །སྐལ་ཆད་རྣམས་ལ་ལྷག་མ་ཆ་བརྒྱད་བྱིན། །རེ་བ་བཞིན་དུ་སྟོང་ལོག་མེད་པར་འགྱུར།
།དོན་ཚན་བཞི་པ་འབུལ་བའི་རིམ་པ་ལ། །དུས་གནས་དམ་ཚིག་ཆོ་ག་བྱ་བ་དངོས། །ཚིམ་ཚུལ་ཕན་ཡོན་ལས་སྦྱོར་རྣམ་གྲངས་སོ།
།དང་པོ་ཉི་ཤར་བཀྲ་ཤིས་ཕུན་སུམ་ཚོགས། །ཟས་ཀྱི་དྲི་ལ་འགའ་ཞིག་སྐྲག་པའི་ཕྱིར། །ཁ་ཟས་མ་ཟས་གོང་དུ་གཏོང་པའང་གསུངས། །བྲམ་ཟེའི་རིགས་འགའ་ཕྱི་དྲོ་མི་ཟ་བས། །སྔ་དྲོ་ལེགས་ཞེས་ལྕེ་སྒོམ་པ་ཡིས་གསུངས། །ཕྱི་དྲོ་ཉི་མའི་གྲིབ་ཆུང་ཉིལ་བ་ན། །ཡི་དྭགས་བཟའ་བཏུང་འཚོལ་བས་དེར་ཡང་རུང་། །འབྱུང་པོ་ཕལ་ཆེར་མཚན་མོ་རྒྱུ་བས་ན། །མཚན་མོ་བཏང་བས་ཕྲིན་ལས་མྱུར་འགྲུབ་བྱེད།
།མདོར་ན་མི་ལྟོགས་རྣམས་ལ་ཁ་ཟས་བཞིན། །ནམ་དུའང་རུང་ཞེས་ཇོ་བོ་རྗེ་ཡིས་གསུངས།
།གཏོང་བའི་དུས་གནས་སྔར་ལས་མ་ཡོལ་བྱ། །གལ་ཏེ་ཡོལ་ན་ཅུང་ཟད་སྔ་བ་ལེགས། །ཐོག་མ་གང་དུ་བཏང་བའི་ས་ཡུལ་དེར། །སྐོར་གཅིག་ངེས་པར་འཚོགས་པར་འདུག་ཅེས་གསུངས།
།གཉིས་པ་དམ་ཚིག་གཏོར་སྟེགས་མ་བྱས་ན། །མི་ཆེན་ལྕོག་རྩེ་མེད་བཞིན་བརྙས་པ་དང་། །རྒྱུ་འགྲུལ་གཞན་གྱིས་ཞར་ལ་འཁྱེར་བའང་སྲིད། །དབུལ་པོ་བླུག་སྣོད་མེད་པར་སྦྱིན་པ་བཞིན། །སྣོད་མེད་བརྙས་དང་ཆེད་གཉེར་མེད་པར་འགྱུར། །གཙང་སར་བཏང་ཞིང་དོར་པ་མ་བྱས་ན། །འབགས་བཙོག་དྲི་མས་ཟས་དེ་དུག་ཏུ་འགྱུར། །ཆུ་མེད་སྐམ་གྱི་ས་བོན་ལྟར་འགྱུར་བས། །སྟོན་པས་ཆུ་དང་བཅས་ཏེ་གཏོང་བར་གསུངས། །མུན་པའམ་གཞན་ཡང་མི་མཐོང་སར་བཤམས་ན། །འོལ་ཚོད་མུན་ནང་མདའ་འཕངས་ཉིད་འགྱུར་བས། །སྣང་བ་དང་བཅས་རང་གིས་མཐོང་སར་བཤམས། །གཏོར་སྣོད་ཡོ་ན་ཡི་དྭགས་བློ་མི་བདེ། །རྒྱུ་དེས་རང་བློ་ཀྱོག་པའི་སྐྱོན་འབྱུང་ཞིང་། །གཏོར་སྣོད་འབྲེལ་ན་རྩོད་པ་འབྱུང་བའི་ཕྱིར། །ཕན་ཚུན་མ་རེག་ཙམ་དུ་དྲང་པོར་བཤམས། །འཇུངས་པ་རྣམས་ཀྱི་ཡི་ག་མི་གང་ཞིང་། །འབོ་ཞིང་ལུད་པའང་དེ་ཡིས་འཐོབ་འགྱུར་བས། །རབ་ཏུ་ཁེངས་ཤིང་ལུད་པ་ཙམ་དུ་གཏོང་། །སྦྱིན་གྲབས་བྱས་ཤིང་མ་བྱིན་ལྟ་བུ་ཡིས། །གཤིས་ངན་འཚིག་ནས་སྟོང་ལོག་བྱེད་སྲིད་པས། །གཏོར་མ་རན་པར་བསྒུལ་བསྐྱོད་མི་བྱ་ཞིང་། །གལ་ཏེ་བསྒུལ་ན་དེ་མ་ཐག་ཏུ་གཏོང་། །ལུས་ངག་ཙམ་ལ་འབྲས་བུ་མི་འབྱུང་བས། །མ་ཡེངས་སེམས་ཀྱི་དམིགས་འདུན་དྲག་ཏུ་བྱ། །སྟོན་མོ་བཤམས་ནས་གསོལ་བརྡ་མ་སྤྲད་བཞིན། །ནམ་ཟའི་དུས་དང་གང་འཐོབ་མི་ཤེས་པས། །གཏོང་དུས་ངེས་པར་མཚམས་སྦྱོར་བརྡ་སྤྲོད་བྱེད། །སྔ་མའི་ལྷག་མས་འབགས་བཙོག་འབྱུང་བའི་ཕྱིར། །གཏོར་སྣོད་བཤལ་ཞིང་བཀྲུས་ཏེ་གཙང་བར་བྱ། །ཟན་དང་བཀྲུ་བཤལ་བསྲེས་ན་མི་རུང་ལྟར། །བཤལ་ཆུ་ལོགས་སུ་བྱས་ནས་གཙང་སར་དབོ། །དེ་ཡང་བཟའ་བཏུང་བླུག་ཏུ་རེ་བ་དང་། །ཡིད་དུ་མི་འོང་རྟེན་འབྲེལ་འཆུག་པའི་ཕྱིར། །སྣོད་སྤྱད་སྟོང་པ་ཙ་རུ་མི་བཞག་གོ།
།གསུམ་པ་ཆོ་གར་སྦྱོར་དངོས་རྗེས་གསུམ་ལས།
།ཐོག་མར་སྐྱབས་འགྲོ་སེམས་བསྐྱེད་རྒྱས་པའམ། །བསྡུ་ན་སངས་རྒྱས་ཆོས་ཚོགས་ཁོ་ན་སྟེ།
།འདི་ལྟའི་ཚིགས་བཅད་རེ་རེའི་བཀའ་དྲིན་ཡང་། །བོད་ཁམས་ཀུན་གྱིས་ཁུར་ཡང་མི་ཐེག་ཅེས། །དགེ་བཤེས་སྤྱན་སྔ་པ་ཡི་གསུང་ལས་གྲགས།
།ལྕེ་སྒོམ་པས་ཀྱང་འདི་ཉིད་གལ་ཆེ་བས། །ང་ཡིས་སྣོད་རེར་སེམས་བསྐྱེད་རེ་བྱས་གསུངས།
།དོན་དམ་སེམས་བསྐྱེད་སྟོང་པ་ཉིད་སྒོམ་ཞིང་། །དེ་ལས་སྙིང་རྗེས་གཟུགས་སྐུར་ལྡང་ཚུལ་གྱིས། །བདག་བསྐྱེད་སྒོམ་ཞིང་གཏོར་མགྲོན་མདུན་བསྐྱེད་རྣམས། །སོ་སོར་སྤྱན་འདྲེན་ཞུ་ཞིང་མདུན་དུ་དགུག
།དངོས་གཞི་སྔགས་དང་དམིགས་པ་ཕྱག་རྒྱ་ཡིན།
།སྔགས་ཀྱི་ནུས་པ་བསམ་གྱིས་མི་ཁྱབ་སྟེ། །དཔེར་ན་བསྟོད་སྨད་སྙན་དང་མི་སྙན་ལས། །སེམས་ལ་བདེ་སྡུག་བསྐྱེད་པའི་ནུས་ཡོད་བཞིན། །ཁྱད་པར་སྟོན་པས་བྱིན་གྱིས་བརླབས་པས་ན། །ཕན་ཡོན་འབྱུང་བར་ངེས་ཤེས་བསྐྱེད་དེ་འབད། །དམིགས་པ་ཆོས་ཅན་སྣང་ཆ་ཀུན་རྫོབ་དང་། །དེ་ཡི་ཆོས་ཉིད་སྟོང་པ་དོན་དམ་བདེན། །དོན་དམ་དམིགས་པ་མེད་པའི་དམིགས་པ་སྟེ། །སྔོན་ཚེ་རྗེ་བཙུན་ཆེན་པོ་སྒམ་པོ་བས།
།ཏིང་འཛིན་ངང་ནས་ཆུ་སྦྱིན་མཛད་པ་བཞིན། །ཀུན་རྫོབ་ཆོས་ནི་སེམས་ཀྱིས་བཏགས་པ་ཙམ། །རྒྱུ་མཚན་དེ་ཕྱིར་ཅིར་ཡང་བསྒྱུར་རུང་བས། །དམིགས་པ་རྣོན་པོ་རྣལ་འབྱོར་མཚོན་ཆར་གྲགས།
།འོན་ཀྱང་ཆགས་ཤིང་ཞེན་པའི་དངོས་འཛིན་གྱི། །བྱ་བྱེད་ཇི་ལྟར་བཟང་ཡང་འཁོར་བའི་རྒྱུ།
།སྒྱུ་མ་མཁན་པོ་རང་གིས་སྤྲུལ་པ་ཡི། །རྟ་གླང་སོགས་ལ་ཆགས་འཛིན་མེད་ལྟར་སྤྱོད། །དེས་ནི་ཟག་པ་མེད་པའི་ཚོགས་རྫོགས་ནས། །དམིགས་གཏད་མཚན་མ་ཀུན་ལས་གྲོལ་བར་འགྱུར། །ཟབ་མོའི་དེ་ཉིད་དེ་ལྟར་རབ་ཤེས་པའི། །རྣལ་འབྱོར་བ་དེས་གཏོར་མའི་དེ་ཉིད་རིག
།ཕྱག་རྒྱ་ཟུང་འཇུག་རྣལ་འབྱོར་རྩེ་གཅིག་དོན། །སེམས་ཀྱི་བསམ་པ་མཚོན་པའི་ལུས་ཀྱི་བརྡ། །མཆོག་སྦྱིན་སེ་གོལ་ལ་སོགས་ཕྱག་ལེན་བཞིན།
།སྔགས་ཚན་དང་པོས་མཆོད་གཏོར་གདོན་བགེགས་བསལ། །གཉིས་པས་རང་བཞིན་རྣམ་དག་དྲན་བྱེད་ཅིང་། །གསུམ་པ་འབྲུ་གསུམ་གཏོར་མའི་དེ་ཉིད་ཅེས།
།རིན་ཆེན་སྣོད་མཆོག་ཡིད་དུ་འོང་བའི་ནང་། །སངས་རྒྱས་ཀུན་གྱི་སྐུ་གསུང་ཐུགས་རང་བཞིན། །ཟག་མེད་ཡེ་ཤེས་བདུད་རྩིར་བྱིན་བརླབ་སྟེ།
།ཡིག་གསུམ་དང་པོས་བསྐྱེད་པའི་ས་བོན་དང་།
།གཉིས་པས་ཟག་མེད་བདུད་རྩིར་བྱིན་གྱིས་བརླབ།
།ཡང་ན་འབྲུ་གསུམ་དང་པོས་ཉེས་སྐྱོན་སྦྱོང་།
།གཉིས་པས་སྣོད་བཅུད་ཕུན་སུམ་ཚོགས་པར་བསྒྱུར།
།གསུམ་པས་ཟད་མེད་རྒྱ་ཆེར་སྤེལ་བ་ཡི།
།བྱིན་རླབས་དགུ་ཕྲུགས་ཞེས་བྱ་བཞེད་པའང་ཡོད།
།བཞི་པ་ཁ་འབར་མ་ཡི་གཟུངས་སྔགས་དངོས། །དེ་ནི་བདུད་རྩི་འཐོབ་པར་བྱེད་པའི་སྔགས།
།དེ་ཡང་བླ་མ་ཡི་དམ་ཆོས་སྐྱོང་དང་། །ཟག་པ་མེད་པའི་མཆོད་སྤྲིན་རྒྱ་མཚོ་དང་། །གཞན་དག་རྣམས་ལ་ངོ་བོ་བདུད་རྩི་ཉིད། །རྣམ་པ་སོ་སོའི་ཡིད་བཞིན་རོ་བརྒྱ་པའི། །བཟའ་དང་བཏུང་བའི་ལོངས་སྤྱོད་དུ་མ་དང་། །ལྷ་ཡི་ཞལ་ཟས་ཡིད་འོང་རྒྱན་ལྡན་པ། །ཁ་དོག་དྲི་རོ་རིག་བྱ་དམ་པའི་དངོས། །འབྲུ་འབྲས་ལོ་ཏོག་མེ་ཏོག་བདུག་སྤོས་དྲི། །སྣང་གསལ་ཞལ་ཟས་རོལ་མོ་རྩི་བཅུད་དང་། །རིན་ཆེན་གོས་སོགས་མཁོ་དགུའི་ཡོ་བྱད་རྣམས། །ལག་ལེན་མཁས་པས་གྲལ་དུ་བཀྱེ་ལེགས་བཞིན། །གང་ལ་གང་འཚམས་རིམ་པ་མ་འཆོལ་བར། །རྒྱལ་ཕམ་སྙོམས་ཤིང་ཀུན་གྱིས་འཐོབ་པར་བྱེད། །དེ་བཞིན་གཤེགས་པ་བཞི་ཡི་མཚན་བརྗོད་པའི། །རྒྱུ་མཚན་གཏོར་མ་བྱིན་གྱིས་རློབ་པ་དང་། །ཐོས་པའི་མོད་ལ་ཕན་ཡོན་འབྱུང་བ་ཡིན། །དེས་ན་གཟུངས་ཀྱི་ཐོག་མཐའ་གང་དུའང་རུང་། །དེ་ཡང་དགེ་བཤེས་སྟོན་པའི་རྗེས་འབྲངས་ནས།
།རིན་ཆེན་མང་ནི་ཤཱཀྱ་ཐུབ་པ་ཉིད། །གཙོ་མའི་གསེར་མདོག་ངུར་སྨྲིག་ཆོས་གོས་གསོལ། །པད་ཟླའི་གདན་ལ་རྡོ་རྗེ་སྐྱིལ་མོ་ཀྲུང་། །ཕྱག་གཡས་མཆོག་སྦྱིན་གཡོན་པ་མཉམ་བཞག་མཛད། །མཚན་དེ་ཐོས་པས་དབུལ་ཕོངས་ལས་གྲོལ་ནས། །བསོད་ནམས་ལོངས་སྤྱོད་ཕུན་སུམ་ཚོགས་པར་འགྱུར།
།གཟུགས་མཛེས་དམ་པ་འཕགས་པ་སྤྱན་རས་གཟིགས། །གངས་རི་ལྟར་དཀར་དར་དང་ནོར་བུས་བརྒྱན། །པད་ཟླར་གཡས་བརྐྱངས་རོལ་པའི་སྐྱིལ་ཀྲུང་བཞུགས། །ཕྱག་གཡས་མཆོག་སྦྱིན་གཡོན་གྱིས་པད་དཀར་འཛིན། །མཚན་དེ་ཐོས་པས་མི་སྡུག་གཟུགས་སྤངས་ནས། །གཟུགས་བཟང་མཛེས་སྡུག་སྟོབས་ལྡན་ལུས་སུ་འགྱུར།
།སྐུ་མཆོག་འབྱམས་ཀླས་འཇམ་དཔལ་གཞོན་ནུ་སྟེ། །གུར་གུམ་མདངས་ཆགས་རྒྱན་རྣམས་ཀུན་གྱིས་མཛེས། །པད་ཟླར་སྐྱིལ་ཀྲུང་ཕྱག་གཡས་རལ་གྲི་དང་། །གཡོན་ན་གླེགས་བམ་དང་བཅས་ཨུཏྤལ་བསྣམས། །མཚན་དེ་ཐོས་པས་ལྟོ་བའི་ནད་ཀུན་བྱང་། །ཟས་ཀྱི་རོ་བྲོ་ཆོག་ཤེས་ལྡན་པར་འགྱུར།
།འཇིགས་བྲལ་གསང་བའི་བདག་པོ་ཕྱག་རྡོར་ནི། །ཨིནྡྲ་ནཱི་ལའི་འོད་འབར་རྒྱན་གྱིས་སྤྲས། །པད་ཟླར་སྐྱིལ་ཀྲུང་ཕྱག་གཡས་རྡོ་རྗེ་གསོར། །ཕྱག་གཡོན་སྐྱབས་སྦྱིན་མཚན་དེ་ཐོས་པ་ཡིས། །ཕན་ཚུན་རྡེག་འཚོག་གཅིག་གིས་གཅིག་ཟ་སོགས། །འཇིགས་དང་ཐོ་འཚེ་ཀུན་ལས་སྐྱོབ་པར་འགྱུར།
།དེ་ནས་རྗེས་ནི་པང་ན་རིན་ཆེན་མང་རིན་འབྱུང་། གཟུགས་མཛེས་གང་གིས་མཐོང་ཡང་ཡིད་དུ་འོང་བ་ཞིག སྐུ་འབྱམས་ཀླས་གང་ཆེན་མཚོ། འཇིགས་བྲལ་དོན་ཡོད་གྲུབ་པར་བྱས་ཀྱང་རུང་སོ་སོར་འདོད་གསོལ་དང་། །བདེན་བདར་ཆོས་བཤད་བསྔོ་བས་རྒྱས་བཏབ་སྟེ།
།མྱུར་མགྱོགས་རྟ་མཆོག་འདྲ་བའི་སྦྱིན་འབྲས་ཀྱང་། །སྨོན་ལམ་སྲབ་མདའ་འདྲ་བས་ལ་བསྒྱུར་རོ། །ཀུན་ཀྱང་ཕར་ཕྱིན་དྲུག་ལྡན་ཉམས་བླངས་ཏེ།
།ཇོ་བོའི་ཞལ་ནས་བྱང་ཆུབ་སེམས་མཆོག་དང་། །ཕ་རོལ་ཕྱིན་དྲུག་སྲང་ལ་བཅལ་གྱུར་ཀྱང་། །མཉམ་པ་ཉིད་ལ་སངས་རྒྱས་འབྱུང་ཞེས་གསུངས།
།དེ་བས་རང་འདོད་སྤངས་ནས་མཆོད་སྦྱིན་བྱ། །གཞན་ལ་འཚེ་མེད་གཙང་སྦྲའི་ཚུལ་ཁྲིམས་སྲུང།
།སྐབས་དེར་གཞན་ལ་མི་རྒོལ་ངལ་དུབ་བཟོད། །དགེ་སྦྱོར་ལས་སུ་མ་སོང་རབ་སྤྲོ་བས། །རྐྱེན་གྱིས་བཟློག་ཏུ་མེད་པའི་བརྩོན་འགྲུས་རྩོམ། །མ་ཡེངས་སྨྲ་བཅད་རྩེ་གཅིག་བསམ་གཏན་འཇོག །དགེ་བའི་བཤེས་གཉེན་རྣལ་འབྱོར་པ་ཆེན་པོས།
།ཐུགས་དམ་དུས་སུ་དྲུང་དུ་མི་མི་གཏོང་། །བསམ་པ་གཞན་པ་སྐྱེ་བའི་སྐྱོན་ཡོད་ཅིང་། །ཡེངས་པ་ཐམས་ཅད་སྙོམས་ལས་ཡིན་ཞེས་གསུངས།
།བདེན་གཉིས་ཚུལ་ལས་མི་འགལ་ཤེས་རབ་ནི། །ཀུན་རྫོབ་ཐབས་ཀྱི་བྱ་བ་རུས་ཐོན་ཞིང་། །ཆུད་ཟོས་མེད་པའི་ཀད་དེ་ཀྲིག་གེ་དགོས། །མན་མུན་སབ་སུབ་ཙམ་གྱིས་མི་ཡོང་སྟེ། །རྒྱུ་འབྲས་མི་བསླུའི་འབྲེལ་པ་འགྲུབ་པའི་ཕྱིར། །རྒྱུ་ཚོགས་ངན་ལས་འབྲས་བཟང་འབྱུང་བ་མེད། །དོན་དམ་སྐྱེ་མེད་རྟོགས་པའི་ཤེས་རབ་ཀྱིས། །ཅིར་ཡང་མ་གྲུབ་གསལ་སྟོང་ཟུང་འཇུག་སྟེ། །འཁོར་གསུམ་ཡོངས་སུ་དག་པའི་ངང་ནས་སྤྱོད།
།དེ་ལྟའི་ཕར་ཕྱིན་དྲུག་གི་དགེ་ཚོགས་རྣམས། །བྱམས་དང་སྙིང་རྗེ་བྱང་ཆུབ་སེམས་གསུམ་གྱི། །བསམ་པ་ཡེ་ཤེས་སྟོབས་ཀྱིས་ལྷག་པར་བྱེད།
།སྟོང་ཉིད་རྒྱུ་འབྲས་ཚུལ་དུ་འཆར་བ་དང་།
།རྒྱུ་འབྲས་སྟོང་ཉིད་ངང་དུ་གྲོལ་བ་ཡི།
།ཤེས་རབ་སྟོབས་ཀྱིས་དགེ་རྩ་རྒྱས་པར་བྱེད།
།དབང་པོ་སངས་རྒྱས་རྣམས་ཀྱི་བྱིན་རླབས་དང་། །བསྔོ་རྒྱུ་མི་ཟད་འགག་པ་མེད་པ་ཡི། །བསྔོ་བའི་སྟོབས་ཀྱིས་དཔག་ཏུ་མེད་པར་བྱེད།
།གཏོར་མགྲོན་རང་གི་རིག་པའི་འཆར་སྒོར་ཤེས། །རིག་བྱ་རིག་བྱེད་གཟུང་འཛིན་སྦུབས་ལས་གྲོལ།
།མཆོད་ཡུལ་མཐར་ཐུག་སངས་རྒྱས་ཆོས་ཀྱི་སྐུ།
།མཆོད་པའི་མཐར་ཐུག་དེ་ཁོ་ན་ཡིས་མཆོད།
།མགྲོན་པོ་རང་ཁྱིམ་བདེ་མོར་སླེབས་པ་བཞིན། །བྱར་མེད་སྤྲོས་བྲལ་དབྱིངས་སུ་འཇོག་པ་འདི། །བཀའ་བརྒྱུད་འདི་པའི་ཆོས་སྤྱོད་རབ་གསལ་ཡིན། །སྒྲུབ་པའི་སྙིང་པོ་འདི་ལ་སྒྲིལ་ནུས་ན། །འཇིག་རྟེན་འཁོར་བའི་ཆོས་དང་མ་འདྲེས་པར། །ཉན་རང་དམན་པའི་རང་འདོད་ལས་གྲོལ་བའི། །སྤྱོད་པ་བསླབ་གསུམ་མཛེས་པའི་སྒྲུབ་རྟགས་ཤིག །རང་གཞན་ཀུན་གྱི་སྣང་ངོར་སྟོན་ནུས་ཤིང་། །དེ་ལས་གཞན་པའི་སྒྲུབ་རྟགས་མེད་ཀྱང་བཟོད། །དེ་ལྟའི་ལྟ་སྤྱོད་རྣམ་པར་དག་པ་ལ། །རྗེས་འཇུག་ཉན་ཐོས་ཐ་དག་འབད་པར་རིགས།
།གཞི་པ་ཚིམ་ཚུལ་རྣམ་པ་བཞི་ཡིན་ཏེ།
།དང་པོ་བཤམས་མ་ཐག་ནས་ཚིམ་པ་ནི། །མདངས་དང་དྲི་ཙམ་ཁོ་ནས་འཚོ་བའོ། །འདི་སྐབས་སློབ་དཔོན་སྒོམ་པའི་ཞལ་སྔ་ནས།
།ཆོས་སྤྱོད་གཏོར་མ་གནད་དུ་འཁྱོལ་བ་ལ། །སྒོམ་ཆེན་ཕོ་གྲུང་མོ་གྲུང་ཞིག་དགོས་ཏེ། །ཕལ་ཆེར་འདྲེ་ཡིས་ཁྱེར་ཞེས་གསུངས་པ་ལྟར།
།བཤམས་མ་ཐག་ནས་ཐོ་འཚམ་ཟ་བ་ཡོད། །དེ་ཕྱིར་ཐོག་མའི་བསང་ཆུས་བསྲུང་བ་གཅེས།
།བསྔོ་ནས་ཚིམ་པ་མ་བསྔོས་གོང་རོལ་དུ། །མི་ཐོབ་དངོས་གཞིའི་ཆོ་ག་གྲུབ་འཕྲལ་ཐོབ།
།བཏང་བས་ཚིམ་པ་སྒོ་ཕྱིའི་སློང་མོ་བཞིན། །ཚོགས་པ་རྣམས་ཀྱིས་འཐོབ་པར་བྱ་བའི་ཕྱིར། །གཙང་སར་དོར་ནས་ཡུད་ཙམ་བསྲུང་བར་བྱ།
།རྗེས་ཀྱི་ཚིམ་པ་ལྷག་བཤལ་ཟ་རྣམས་སོ། །དེ་རྗེས་བྱ་ཁྱི་སྤྲང་པོ་ལ་སོགས་པའི། །གཟུགས་ཅན་དབུལ་པོ་རྣམས་ཀྱང་ཚིམ་གྱུར་པས། །དངོས་པོ་གཅིག་གིས་ཚོགས་གསོག་ལན་གཉིས་ནུས།
།ལྔ་པ་ཕན་ཡོན་དཔག་མེད་མདོར་བསྡུས་ན།
།དགའ་བོ་དུས་མིན་འཆི་བསླུར་གསུངས་པ་ཡི། །རིགས་པ་དེས་ནི་ཚེ་སྒྲུབ་མཆོག་ཏུ་འགྱུར།
།བླ་མ་ལྕེ་སྒོམ་པ་ཡི་གསུང་ལས་ཀྱང་། །ང་ཡི་མི་ཚེ་རིང་དུ་ཐུབ་པ་འདི། །གཏོར་མ་བཏང་བའི་བྱིན་རླབས་ཡིན་ཞེས་འབྱུང་།
།ཡི་དྭགས་མདངས་ཉམས་མ་ལུས་གསོས་པ་དང་། །ལྷན་ཅིག་སྐྱེས་པའི་ལྷ་རྣམས་མཉེས་བྱས་པས། །མདངས་བཟང་ལང་ཚོ་གཞོན་ཤ་ཆགས་པར་འགྱུར། །གཏོར་མགྲོན་རྣམས་ཀྱིས་རྟག་ཏུ་བསྲུང་བའི་ཕྱིར།
།སུས་ཀྱང་གླགས་ལྟའི་བར་གཅོད་བྱ་མི་ནུས། །བཀྲེས་སྐོམ་བསལ་ཞིང་བདུད་རྩི་སྦྱིན་པའི་མཐུས། །ནད་དང་མུ་གེ་སེལ་བའི་སྨན་དུ་འགྱུར། །ལྕེ་སྒོམ་པ་ཡི་གསོལ་རྒྱགས་ཆད་པ་ན། །ཕད་བུ་སྤྲུགས་པའི་ཕྱེ་མས་གཏོར་མ་མཛད། །ཉི་མ་ཕྱེད་ནས་མཆོད་སྟོན་འདུ་བའི་ཚེ། །ཞིང་གི་སོ་ནམ་སྒྲུབ་ལས་ཁེ་ཆེ་ཞིང་། །མྱུར་བའི་བསོད་ནམས་ངོ་མཚར་མི་འདུག་གམ། །ཞེས་སོགས་གོང་མ་དུ་མའི་མྱོང་བ་ཡིས། །མཐོང་ཆོས་འབྲས་བུ་བྱུང་བར་གསུངས་པ་ལྟར། །ལོངས་སྤྱོད་ནོར་སྒྲུབ་འདི་ལས་ཟབ་པ་མེད།
།ཀུན་ཁྱབ་སྙིང་རྗེ་ཆེན་པོས་སྦྱིན་བྱས་ཤིང་། །ཆོས་དབྱིངས་འཁོར་གསུམ་དག་པས་བསྔོས་པ་དེས། །ཚངས་དང་འཁོར་ལོས་སྒྱུར་བའི་དཔལ་ཐོབ་སྟེ། །མི་ཟད་ནམ་མཁའི་མཛོད་དང་ལྡན་གྱུར་ཅིང་།
།ཡི་དམ་ཆོས་སྐྱོང་ཞི་ཁྲོའི་ལས་ཀུན་གྱི། །སྔོན་དུ་འགྲོ་ཞིང་དངོས་གཞི་སྒྲུབ་པ་དང་། །རྗེས་ནས་མ་ཚང་རྣམས་ཀྱང་ཁ་སྐོང་བས། །ཕྲིན་ལས་རྣམ་བཞི་སྒྲུབ་པའི་ཕོ་ཉ་ཡིན།
།སེམས་བསྐྱེད་བཟང་པོས་ཉོན་མོངས་བདུད་འཇོམས་ཤིང་།
།སྡུག་བསྔལ་བསལ་བས་ཕུང་པོའི་བདུད་ལས་གྲོལ།
།བགེགས་རིགས་ཟློག་པས་ལྷ་ཡི་བདུད་དཔུང་འཇོམས།
།འཆི་བ་བསླུ་བས་འཆི་བདག་བདུད་ལས་རྒྱལ།
།སྦྱིན་བདག་གཙོ་བོ་ཆེན་པོར་གྱུར་པ་དང་། །མི་མ་ཡིན་པས་གཟི་འོད་སྒྲུབ་པའི་ཕྱིར། །ཀུན་ལས་འཕགས་པའི་གཟི་བརྗིད་འཐོབ་པར་འགྱུར། །པདྨའི་མཚོ་ལ་ངང་པ་འདུ་བ་ལྟར། །དཔག་ཚད་མང་པོའི་མི་མ་ཡིན་རྣམས་འདུ།
།ལེན་པོ་གཏོང་པོའི་འགྲོ་བ་གཉིས་ཀ་ཡང་། །ཕྱི་མ་ཡི་དྭགས་འཇིག་རྟེན་རབ་སྤངས་ནས། །མཐོ་རིས་མཛེས་པའི་ལུས་རྟེན་འཐོབ་པར་འགྱུར།
།དཀོན་མཆོག་རྣམས་ཀྱིས་བུ་ལྟར་དགོངས་པ་དང་།
།རིགས་དྲུག་ཀུན་གྱིས་རྟག་ཏུ་བཀུར་བ་དང་།
།མི་མ་ཡིན་རྣམས་ཅི་བཅོལ་ཉན་པ་སོགས།
།ཐུན་མོང་དངོས་གྲུབ་འཕྲལ་དུ་ཐོབ་གྱུར་ནས། །མཐར་ཐུག་མཆོག་གི་དངོས་གྲུབ་མྱུར་འཐོབ་པའོ།
།དྲུག་པ་ལས་སྦྱོར་རྣམ་གྲངས་བསྟན་པ་ལ། །ཚོགས་གསོག་ལན་འཇལ་འཆི་བསླུ་ནད་པའི་གླུད། །ཟློག་པ་མཐུ་ཡི་ཚུལ་དུ་གཏོང་བ་དྲུག
།དང་པོ་སྐྱབས་སེམས་ཕར་ཕྱིན་དྲུག་ལྡན་དང་། །འཁོར་གསུམ་ཡོངས་དག་བསྔོ་བས་རྒྱས་བཏབ་ནས། །ཐ་མ་ཆོས་ཀྱི་སྦྱིན་པས་བསྡུ་བའོ།
།གཉིས་པ་གདོན་བགེགས་གནོད་བྱེད་ངོས་བཟུང་ལ། །དེ་དག་མགུ་བའི་ལོངས་སྤྱོད་དུ་བསྔོས་ཏེ། །བླ་མ་དཀོན་མཆོག་གཉིས་ཀའི་དཔང་པོར་གསོལ། །ཆོས་སྐྱོང་ལ་སོགས་གཞན་ལ་ངོ་ཆེན་སྦྲན། །རིགས་དྲུག་ལ་སོགས་འབོད་འོས་མགྲོན་དུ་བྱས། །གནོད་བྱེད་གདོན་བགེགས་ལན་ཆགས་འདེད་མཁན་ཏེ། །གཞི་བདག་རྣམས་ལ་ནད་པ་སྲུངས་ཤིག་བྱ། །སྡེ་བརྒྱད་ཕ་རོལ་དཔུང་གྲོགས་མ་བྱེད་ཅེས། །བཤད་སྦྱང་དྲག་པོའི་སྒོ་ནས་རྩེ་གཅིག་པས། །ཉི་མ་འཆར་ཀ་དག་དང་བསྟུན་ཏེ་གཏོང་།
།གསུམ་པ་དགེ་སློང་བཞི་སྡེ་མཆོད་པ་སོགས། །གཞན་ཡང་རིམ་གྲོ་དུ་མ་དང་བསྒྲིགས་ནས། །དགེ་སློང་གཅིག་གིས་གཏོར་མ་གཏོང་བའི་ཚེ། །ནད་པའི་མིང་ནས་ཕྱུང་སྟེ་འདོད་དོན་གསོལ།
།བཞི་པ་ངར་གླུད་རེ་རེ་བྱས་ནས་ནི། །ཆེ་གེའི་ཚེ་སྲོག་ཤ་ཁྲག་རིན་གླུད་དུ། །ཁྱེར་ཞེས་ཉི་མ་ནུབ་དང་བསྟུན་ཏེ་གཏང་།
།ལྔ་པ་མཐུ་བཟློག་དྲུག་པ་མཐུ་སྒྲུབ་ནི། །དུ་མ་འབྱུང་བ་གཞན་དུ་ཤེས་པར་བྱ།
།ནད་པའི་དོན་སོགས་རིམ་གྲོ་ཕལ་ཆེར་ལ། །དགེ་སློང་གཙང་མ་ཚུལ་ཁྲིམས་ལྡན་པ་ཡིས། །སླར་ཡང་བཤགས་བསྡམ་ལ་སོགས་བྱས་ནས་ནི། །སྣམ་སྦྱར་གསོལ་ཏེ་ཐམས་ཅད་རྩེ་གཅིག་གིས། །དགེ་འདུན་འདུན་པ་མཐུན་པས་བཏང་བྱས་ཤིང་། །ཆུ་བོར་དོར་ན་ཕན་ཡོན་ཆེ་བར་གསུངས།
།གཞན་ཡང་བསོད་ནམས་གསོག་ན་དཀོན་མཆོག་མཆོད།
།ཡི་དྭགས་རྣམས་ལ་སྦྱིན་པ་གཙོ་བོར་འདོན།
།བསྟན་པ་བསྲུང་ན་ཡེ་ཤེས་ཆོས་སྐྱོང་དང་།
།རྒྱལ་ཁམས་བསྲུང་ན་འཇིག་རྟེན་ཆོས་སྐྱོང་དང་།
།ནད་པའི་རིམ་གྲོར་བྲམ་ཟེ་དྲང་སྲོང་དང་།
།དོན་རྣམས་བསྒྲུབ་ན་ལྷན་ཅིག་སྐྱེས་པའི་ལྷ།
།དགོན་གནས་འཛིན་ན་ས་བདག་གཞི་བདག་དང་།
།ཡུལ་ཕྱོགས་བདེ་འདོད་སོ་སོའི་ཡུལ་བདག་དང་།
།གནོད་བྱེད་རྦོད་གཏོང་བ༌བཟློག་ན་སྡེ་བརྒྱད་དང་།
།ལན་ཆགས་ཤ་འཁོན་སྦྱང་ན་གནོད་བགེགས་དང་།
།རིགས་དྲུག་སྤྱི་ལ་ཕམ་ཕབ་ཚུལ་ལ་སོགས།
།ཕྲིན་ལས་གཞོལ་ཚུལ་སྐབས་བབ་རིགས་པས་དཔྱད། །དེ་རྣམས་གཞུང་བཞིན་གཏོང་བའི་གཤང་སྦྱར་རོ།
།བྱང་སེམས་རང་ཉིད་ཐུབ་པའི་དབང་པོར་སྒོམ། །དེ་ཡི་སྙིང་པོ་བཟླ་བའི་བདག་བསྐྱེད་དང་།
།འབྲུ་གསུམ་དང་པོས་མི་གཙང་བ་རྣམས་སྦྱངས། །གཉིས་པ་རིན་ཆེན་སྣོད་དུ་བཅུད་ཀྱི་རྫས། །ལྷ་ཡི་ཞལ་ཟས་རི་རབ་ལྟར་མཐོ་ཞིང་། །བདུད་རྩི་རྒྱ་མཚོ་ལྟ་བུར་འཁྱིལ་བར་བསམ། །གསུམ་པས་དེ་དག་སྟོང་གསུམ་གང་བར་སྤེལ།
།དེ་བཞིན་ཤེགས་པ་བཞི་ལ་ཕྱག་འཚལ་ནས། །གཟུངས་སྔགས་ལན་གསུམ་སེ་གོལ་བདུན་གྱིས་འབུལ། །མགྲོན་གྱིས་ཐོབ་ནས་སོ་སོར་གྱེས་པར་བསམ། །བདེན་སྟོབས་བསྔོ་བ་ཆོས་བཤད་མདོར་བསྡུས་ལུགས།
།བརྒྱ་རྩའི་རྗེས་དོར་ཏོག་གཅིག་ཆུ་སྦྱིན་བྱ། །མདོ་འདོན་སྨོན་ལམ་བཏབ་ནས་སྤྱོད་ལམ་འཇུག
།འཇུར་གེགས་ཏོག་གཅིག་འདི་ཡི་ལོ་རྒྱུས་ནི། །ཉན་ཐོས་མཆོག་གཉིས་ཉིན་གུང་ལྗོངས་རྒྱུ་ཚེ། །ཡི་དྭགས་སྔོ་སྐམ་མིག་དམར་སྐྲ་འཛིངས་ཤིང་། །སྐེ་དང་ཡན་ལག་ཕྲ་ལ་སེན་མོ་ཡིས། །ཁུ་ཚུར་ཐལ་བྱུང་ཕུག་པའི་མི་སྡུག་གཟུགས། །ཁ་ནས་དགོས་ན་མེད་ན་མ་སྦྱིན་ཅིག །སྦྱིན་ནའང་ཆེས་སོ་དེ་ལས་ཕྲིས་ཞེས་པའི། །སྒྲ་ལྔ་སྒྲོག་དང་ཕྲད་ནས་གསོལ་བ་ན།
།སྟོན་པས་དེ་ནི་ཆུ་ཙམ་མ་གཏོགས་པས། །གཞན་ལ་འཇུར་གེགས་བྱས་པའི་རྣམ་སྨིན་ཉིད།
།དེས་ན་ཆུ་ལ་གཞན་གྱི་དྲི་མེད་པ། །སྦྱིན་ཞིང་ཛྭ་ལ་མི་དཾ་ལ་སོགས་པའི། །སྔགས་བརྗོད་སེ་གོལ་གཅིག་གིས་གཏོང་བར་གསུངས།
།དེ་ཕྱིར་ལག་པ་རབ་ཏུ་བཀྲུས་བྱས་ནས། །སེན་མོའི་བར་གྱི་རྩམ་དྲིའང་མེད་པར་བྱ།
།དགེ་བཤེས་སྤྱན་སྔ་པས་ནི་ཆུ་རྐྱང་ལས། །ཟན་ཡང་དུམ་ཙམ་འཇུག་པ་ཕལ་ཆེར་ལ། །གཟིགས་ཞེས་མྱོང་བས་གསུངས་པའི་མན་ངག་ལུགས། །སེ་གོལ་གཉིས་སོགས་མང་ན་སྐྲག་པ་སྐྱེ། །དེས་ན་སེ་གོལ་ཏོག་ཅིག་ཁོ་ན་བྱ།
།ཕན་ཡོན་ཚེ་རིང་ནད་ཉུང་བྱད་གཏད་བཟློག །བར་གཅོད་ཀུན་གྱིས་མི་ཚུགས་ཁྱད་པར་དུ།
།ལོངས་སྤྱོད་ནོར་གྱི་དངོས་གྲུབ་འབྱུང་བ་དང་།
།ཡི་ག་འཆུས་དང་སྙིང་མི་དགའ་བ་སེལ།
།མདངས་དང་ལྡན་ཞིང་གཞན་ལ་སྤེལ་བྱས་ན།
།ཡི་དྭགས་རྒྱུད་ལས་གྲོལ་ནས་འཚང་རྒྱའོ།
།འཇིག་རྟེན་ཡི་དྭགས་ཀུན་ལ་བྱིན་པས་ནི། །འཇུར་གེགས་གཅིག་ལ་བྱིན་པ་བསོད་ནམས་ཆེ། །ཅི་ཕྱིར་ཞེན་འདིས་ནི་ཆུ་མ་གཏོགས། །གཞན་གྱི་སྦྱིན་པ་ཀུན་གྱི་གོ་བཀག་ཅིང་།
།རང་བློས་བཅད་ནས་ཆུ་ཡང་མ་བྱིན་པས། །གཙང་པོའང་གྲེ་བའི་སྦུབས་སུ་སྐམ་ནུས་པའི།
།མི་བཟད་སྡུག་བསྔལ་འབར་བ་དེ་ལ་ནི། །ཁ་ཟས་གཞན་རྣམས་བྱིན་ཀྱང་མི་འཐོབ་པས། །སེམས་རྒྱུད་རབ་ཏུ་ཞི་བའི་སྔགས་བརྗོད་པས། །ཆུ་སྦྱིན་ཁོ་ན་ཕན་ཡོན་ཆེ་བར་གསུངས།
།སུ་རུ་པ་ནི་ངེས་པ་བདུན་ལྡན་ཏེ།
།ཟས་སྐོམ་ཅུང་ཟད་ཙམ་ཡང་མ་སྤྱད་གོང་། །གཏོང་བའི་དུས་དང་ལན་ཅིག་ཆག་ན་ཡང་། །བརྒྱལ་ཞིང་བོགས་པའི་སྡུག་བསྔལ་ཆེར་ཡོད་པས། །ཆག་མེད་གཏོང་བ་དུས་ཀྱི་ངེས་པ་ཡིན།
།མི་སྒྲ་ཁྱི་སྒྲ་སོགས་ལ་སྐྲག་པ་དང་། །མི་གཙང་དྲི་སོགས་ཚོར་བ་རག་པའི་ཕྱིར། །དབེན་ཞིང་གཙང་བ་གནས་ཀྱི་ངེས་པ་ཡིན།
།ལྕགས་སྣོད་མཚོན་ཆའི་རིགས་སུ་མཐོང་འགྱུར་བས། །རྫའམ་རིན་ཆེན་སྣོད་ཀྱི་ངེས་པ་ཡིན།
།ཡི་དྭགས་རྣམས་ཀྱི་གཏོར་མའི་སྣོད་ལ་ནི། །ལྕགས་ཀྱི་གཟེར་བུ་ཙམ་ཡང་མེད་པར་དགོས། །སྐྱུག་བྲོའི་གནས་སུ་མཐོང་ནས་མི་ལེན་པས། །གཙང་བར་གནས་པ་གང་ཟག་ངེས་པ་ཡིན།
།གཙང་མའི་ཆུ་ཟན་རྫས་ཀྱི་ངེས་པ་ཡིན།
།རང་ཉིད་ཐུབ་པའམ་གཟུགས་མཛེས་གང་རུང་བསྒོམ། །སྣོད་ནི་རིན་ཆེན་ཟན་ནི་ལྷ་ཡི་ཟས། །ཆུ་ནི་བདུད་རྩིའི་རྒྱ་མཚོར་མོས་པ་དང་། །ཡི་དྭགས་ཀུན་ལ་བྱམས་པས་ཁྱབ་བྱས་ནས། །ཁ་ཟས་རྒྱལ་ཕམ་མེད་ཅིང་གནོད་མེད་པར། །སྦྱིན་པ་ལྷག་བསམ་དག་པའི་ངེས་པ་ཡིན།
།གཟུངས་སྔགས་ལན་བདུན་ལག་གཡོན་སེ་གོལ་གསུམ། །དེ་ཡིས་བསྔོས་ནས་སྔགས་ཚན་ཕྱི་མ་ནི། །མི་དན་ཁ་ཅིག་སྟོན་མོས་མགུ་བྱས་ཀྱང་། །སླར་ཡང་གླགས་ལྟ་འཚེ་བར་བྱེད་པ་ཡོད། །དེ་ལྟའི་ཡི་དྭགས་གནོད་འཚེ་བསྲུང་ཆེད་ཡིན། །གཙང་སར་དོར་ཞིང་ཆོས་སྦྱིན་བསྔོ་བ་བྱ།
།ཆོ་ག་ངེས་པ་དེ་ལྟའི་ཕན་ཡོན་ནི། །ཡི་དྭགས་ཀུན་ལ་འབྲས་ཆེན་བྲེ་ཆེན་རེ། །སོ་སོར་བྱིན་པའི་བསོད་ནམས་འཐོབ་འགྱུར་ཞིང་། །སྐྱེ་བར་ཉམས་ཆུང་མི་འགྱུར་དབུལ་མི་འགྱུར། །སྟོབས་ཆེ་གཟུགས་བཟང་མཐོང་ན་དགའ་བ་དང་། །ཕྱུག་ཅིང་ལོངས་སྤྱོད་ཕུན་ཚོགས་ཚེ་རིང་ཞིང་། །ནད་མེད་བྱང་ཆུབ་མྱུར་དུ་འཐོབ་པ་དང་། །ཤི་འཕོས་བདེ་བ་ཅན་དུ་སྐྱེ་བར་གསུངས།
།ཟས་ཀྱི་སྔོན་དུ་ཆངས་བུ་སྦྱིན་པ་ནི། །སྲོག་དང་ནོར་གྱི་བླུད་དུ་འགྱུར་བ་སྟེ།
།སྔོན་ཚེ་འཕྲོག་མ་ལྔ་བརྒྱའི་བུར་བཅས་པས། །ཉིན་ཞག་རེ་ལ་མི་ཡི་འགྲོ་བ་ནི། །ལྔ་བརྒྱ་ཕྲག་གསུམ་ཟོས་པར་གྱུར་པའི་ཚེ། །སྟོན་པས་དེ་ཡི་བུ་གཅིག་གསོལ་ལྷུང་དུ། །སྦས་པ་རྫུ་འཕྲུལ་དུ་མས་བཙལ་གྱུར་ཀྱང་། །མ་རྙེད་ཤིན་ཏུ་དུབ་ཅིང་སྡུག་བསྔལ་བས། །སྟོན་པ་ཉིད་ལ་སྐྱབས་སུ་གསོལ་བར་བྱས། །དེ་ལ་ཕྱག་སོར་ལྔ་ཡི་རྗེས་ལྡན་གྱི། །ཆངས་བུ་བསྩལ་ནས་ཐམས་ཅད་ཚིམ་པར་མཛད། །ཀུན་གྱིས་སྲོག་གཅོད་སྤོང་བར་ཁས་བླངས་ཤིང་།
།འཁོར་རྣམས་བཞི་ཡིས་ཆངས་བུ་སྦྱིན་པ་དང་། །དེ་དག་ཀུན་ཀྱང་འཕྲོག་མས་སྲུང་བར་གདམས། །དེ་ལྟར་ཆངས་བུའི་སྔགས་སམ་ཁ་འབར་སྔགས།
།གང་ཡང་རུང་བས་བྱིན་གྱིས་བརླབས་ནས་སྦྱིན། །རང་ཉིད་ཟས་ཀྱི་བྱ་བར་འཇུག་པའི་ཚེ། །ལུས་ལ་སྲིན་བུ་བརྒྱད་ཁྲི་སྙེད་ཡོད་པ། །ད་ལྟ་འདི་དག་ཟང་ཟིང་གིས་བསྡུས་ནས། །མྱུར་བར་ཆོས་ཀྱི་བདུད་རྩིས་བསྡུ་བར་བྱ། །སྙམ་དུ་ལྷག་པའི་བསམ་པ་བསྐྱེད་པ་དང་། །སྒོ་གསུམ་དམ་པའི་ཆོས་ལ་བཀོལ་བའི་ཕྱིར། །ཟས་སྐོམ་གླ་རྔན་ཚུལ་དུ་སྦྱིན་པར་བསམ།
།གཞན་ཡང་བསྐྱེད་རྫོགས་གང་རུང་དང་ལྡན་པས། །ཟས་ཀྱི་རྣལ་འབྱོར་ནང་གི་སྦྱིན་སྲེག་སོགས། །ཆོ་གའི་ཚུལ་མང་མདོར་བསྡུས་ཙམ་དུ་ན།
།བདག་ཉིད་འཇིག་རྟེན་དབང་པོའི་སྐུར་བསྒོམ་ཞིང་།
།ཟས་རྣམས་ཡི་གེ་གསུམ་གྱིས་བདུད་རྩིར་བསྒྱུར།
།དེ་ཡིས་མཆོད་པར་མོས་ལ་རོལ་པར་བྱ།
།ཉུང་ན་དགེ་ལ་སྦྱོར་བར་མི་ནུས་ཤིང་།
།མངས་ན་གཉིད་སོགས་ཉེས་པ་འཕེལ་འགྱུར་བས།
།རན་པར་བྱ་ཞིང་ལྷག་མའི་ཆངས་བུ་རྣམས། །འབྱུང་པོར་བསྔོས་ནས་སྨོན་ལམ་གདབ་པར་བྱ།
།གཞན་ཡང་སྤྱི་གཏོར་དཀར་གསུམ་མངར་གསུམ་ནི། །མགྲོན་རིགས་མཆོག་དམན་ཀུན་ལ་སྦྱིན་དུ་རུང་།
།ནང་གི་གཏོར་མ་འདོད་པའི་ཡོན་ཏན་ལྔ། །རིགས་དྲུག་འགྲོ་བ་རྣམས་ལ་སྦྱིན་པར་བྱ།
།གསང་བ་ཤ་ལྔ་བདུད་རྩི་ལྔ་སྦྱར་ནི། །ཡི་དམ་མཁའ་འགྲོ་ཆོས་སྐྱོང་རྣམས་ལ་འབུལ།
།དེ་ཁོ་ན་ཉིད་རང་ལུས་མཆོད་སྦྱིན་ནི། །གནོད་བྱེད་ལན་ཆགས་སྡིག་སྒྲིབ་སྦྱོང་བར་བྱེད།
།མདོར་ན་སྣང་སྲིད་གཏོར་མ་མ་གྱུར་མེད། །ཕྱི་སྣོད་འཇིག་རྟེན་གཏོར་གཞོང་ཆེན་པོ་རུ། །ནང་བཅུད་སེམས་ཅན་ཐམས་ཅད་གཏོར་མར་བསྔོ། །བདག་འཛིན་སྤུ་རྩེ་ཙམ་ཡང་མ་འཁྲིས་པར། །ཐམས་ཅད་བཏང་བ་གཏོར་མ་ཆེན་པོའོ།
།དེ་ལྟར་གཏོར་མའི་དེ་ཉིད་འདི་བརྗོད་པས།
།བདག་གཞན་འགྲོ་བ་སེམས་ཅན་མ་ལུས་པ།
།ཤེས་བྱ་ཀུན་གྱི་དེ་ཉིད་རིག་གྱུར་ནས།
།རྡོ་རྗེ་འཛིན་དབང་འཐོབ་པའི་བཀའ་དྲིན་སྩོལ།
།ཞེས་པ་འདི་ནི་དགེ་སློང་སྤོང་བ་པ་ཀརྨ་སྲུང་གིས་སྐུལ་པ་ལྟར། ཞྭ་དམར་ཅོད་པཎ་འཛིན་པའི་མཚན་གྱི་བྱིན་རླབས་དང་ལྡན་པ་དཀོན་མཆོག་འབངས་ཀྱིས་བྲིས་པའོ།

༈ ཡོངས་གྲགས་སྣོད་ཚམ་བཅུ་གཅིག་བཤམས་མོད་ཀྱང་། །འདིར་ནི་གཏོར་སྣོད་བཅུ་གཉིས་རིམ་པར་བཤམས། །གཙང་མའི་ཟན་ལ་ཆ་མཉམ་གསུམ་དུ་བགོས། །དང་པོའི་ཆ་ནས་ཕུང་ཀྱི་ཞལ་ས་འབུལ། །ལྷག་ངེས་གཏོར་སྡེར་དང་པོར་བླ་མ་དང་། །ཡི་དམ་སྲས་བཅས་རྣམས་ལ་མཆོད་པ་འབུལ། །ལྷག་མའི་ཆ་གཉིས་དུམ་བུ་བཞིར་བགོ་ཞིང་། །བཞི་གསུམ་བཅུ་གཉིས་དེ་རྣམས་རེ་རེ་ལ། །རིལ་བུ་བཅུ་བཅུ་བྱས་ན་སྣོད་གཉིས་པ་། །རིལ་བུ་ཉི་ཤུ་བླུག་པས་ཆོས་སྐྱོང་མཆོད། །དེ་ལྷག་སྣོད་བཅུད་རིལ་བུ་བཅུ་བཅུ་བླུག །དཀོན་མཆོག་མཆོད་དུས་གཟུངས་སྔགས་ཉེར་གཅིག་བཟླ། །ཆོས་སྐྱོང་རྣམས་ལ་གཟུངས་སྔགས་བཅུ་བཞི་བཟླ། །ལྷག་མ་རྣམས་ལ་མཚན་བཞི་སྒྲོག་པ་དང་། །གཟུངས་སྔགས་བདུན་བདུན་བཟླ་ཞིང་རེ་རེའི་མཐར། །ལག་གཡས་མཆོག་སྦྱིན་བརྐྱངས་ནས་སེ་གོལ་བརྡབ། །རིམ་པས་བཤགས་ཤིང་ཆུ་གཙང་ཡིད་དགས་བཤལ། །གཤེགས་གསོལ་སྤྲོ་ན་ཀུན་གྱི་མཐར་བྱའོ།
།གཏོར་མ་ཆ་བཅུའི་ལྷན་ཐབས་ལ་སྐྱབས་འགྲོ་སེམས་སྐྱེད་ནི་རྒྱས་པའམ་བསྡུ་ན། སངས་རྒྱས་ཆོས་ཚོགས་སོགས། དེའི་རྗེས་སུ་དོན་བཞི་སྟེ། བདག་སྒྲུབ་པ། རྫས་སྒྲུབ་པ། མགྲོན་སྒྲུབ་པ། མགྲོན་ལ་འབུལ་བའི་རིམ་པའོ།
།བདག་སྒྲུབ་པ་ནི་ཐུགས་རྗེ་ཆེན་པོ་བསྒོམ་པའོ།
།རྫས་སྒྲུག་པ་ནི། དཀར་གསུམ་མངར་གསུམ་ལ་སོགས་ཤ་ཆང་སྒོག་གསུམ་མ་འདྲེས་པ་དང་། གཏོར་མའི་རྒྱུ་རྩམ་པ་ལ་སོགས་པའི་རིན་པོ་ཆེའི་སྣོད་དམ་གང་ཡང་རུང་བའི་སྣོད་དུ་བཅའ་ཞིང་། སྟེགས་ཀྱི་ཁར་བཞག་ནས་གཞུང་བཞིན་བསྒོམ་པའོ།
།མགྲོན་སྒྲུབ་པ་ནི། བསྡུས་པར་ན། བླ་མ་བརྒྱུད་པར་བཅས་རྣམས་དང་། །ཞེས་སོགས་མཆོད་སྦྱིན་གྱི་ཡུལ་བརྗོད་པའི་སྐབས་སུ་སོ་སོར་མདུན་གྱི་ནམ་མཁའ་དང་ས་གཞིར་བྱོན་པར་བསམ་པ་ཉིད་དོ། །རྒྱས་པར་ན། གཏོར་མ་ཡེ་ཤེས་བདུད་རྩིར་གྱུར། །ཞེས་པའི་རྗེས་སུ། ཧཱུྃ། བཞེངས་ཤིག་བཞེངས་ཤིག་སྟོབས་བཅུ་མངའ་བའི་ལྷ། །ཞེས་ཤློ་ཀ་གཅིག་གི་མཐར་བཛྲ་ས་མ་ཛཿ ཞེས་པས་སྤྱན་དྲངས། བཅོམ་ལྡན་འདིར་ནི་བྱོན་པ་ལེགས། །ཞེས་ཤློ་ཀ་གཉིས་ཀྱི་མཐར། ཨོཾ་སརྦ་ཏ་ཐཱ་ག་ཏ་པདྨ་ཀ་མ་ལ་ཡེ་སྟྭཾ་ཞེས་བཞུགས་སུ་གསོལ། དེ་ནས་ཡན་ལག་བདུན་པ་རྒྱས་བསྡུས་གང་རུང་ཞིག་བྱ།
བཞི་པ་མགྲོན་ལ་འབུལ་བའི་རིམ་པ་ནི། བླ་མར་བརྒྱུད་པ་བཅས་རྣམས་དང་། །ཞེས་སོགས་སོ། །ཆ་གཉིས་པ་ཆོས་སྐྱོང་སྲུང་མ་མན་ཆད་ལ་སྤྱན་འདྲེན་བཞུགས་གསོལ་སོགས་སྦྱོར་མི་དགོས་ཤིང་། སོ་སོའི་མཚན་ནས་བརྗོད་པའི་ཚེ་སྐད་ཅིག་གིས་མདུན་དུ་བྱོན་པར་བསམ་པ་ཉིད་དོ། །དེ་ནས་མཐར་གཤེགས་གསོལ་སྤྲོ་ན། དམ་པ་ཉིད་ནི་འཐོབ་པར་ཤོག །ཅེས་པའི་རྗེས་སུ། ཨོཾ། ཁྱེད་ཀྱིས་སེམས་ཅན་དོན་ཀུན་མཛད། །ནས་བཛྲ་མུཿས་ཡེ་ཤེས་པ་དང་། མཆོད་སྦྱིན་གནས་འདིར་གང་ལྷགས་པ་ནས། སརྦ་བྷཱུ་ཏ་གཙྪས། འཇིག་རྟེན་པ་རྣམས་གཤེགས་སུ་གསོལ།
ཞེས་པ་ཞྭ་དམར་པ་ལྔ་པས་སོ།། །།སྦར་འདི་དཔལ་སྤུངས་སྒྲུབ་ཁང་དུ་བླ་མིང་བཀྲ་ཤིས་ཚེ་རིང་ནས་བསྐྲུན་པའོ།། །།དགེའོ། །མངྒལཾ། །

@@ Line 6: / Line 6: @@
 |BDRC link=[https://www.tbrc.org/#library_work_ViewByOutline-O3PD988C2O6605%7CW3PD988 BDRC W3PD988]
 }}
-<span class="main_text">༄༅། །གཏོར་མའི་དེ་ཉིད་བདུད་རྩིའི་དགའ་སྟོན་ཞེས་བྱ་བ་བཞུགས།།<br /><br />།སྟོན་པ་བདེ་བར་གཤེགས་ལ་གུས་བཏུད་དེ། །བསྟན་པ་དམ་པའི་ཆོས་ཀྱི་ཉམས་ལེན་ལས། །དགེ་འདུན་རྣམས་ཀྱི་ཐུན་མཚམས་ཆོས་སྤྱོད་ཀྱི། །རིམ་པ་གཏོར་མའི་གོ་དོན་ཕྱོགས་ཙམ་བརྗོད། <br />།བ་ལིཾ་ཞེས་བྱ་སྟོབས་དང་ནུས་པ་ལ། །འཇུག་སྟེ་རང་གཞན་རྒྱུད་ལ་འཆི་མེད་ཀྱི། །སྟོབས་ཆེན་ཐོབ་ནས་བདུད་བཞི་འཇོམས་ནུས་པའི། །དམ་རྫས་པཉྩ་ཨ་མྲྀ་ཏ་ཉིད་ཡིན། <br />།བྷོ་ཊའི་བརྡ་ལས་གྲངས་པའི་སྦྲ་བཤད་ན། །ཆགས་མེད་ཡོངས་སུ་གཏོང་བས་གཏོར་ཞེས་བྱ། །སྡང་མེད་བུ་ལྟར་བརྩེ་བས་མར་བརྗོད་དེ། །ཉེ་རིང་མེད་པའི་བཏང་སྙོམས་གཉིས་ཀའི་གྲོགས། <br />།ལྟ་བ་གནས་ལུགས་སེམས་ཀྱི་གཏོར་མ་ནི། །ཆོས་སྐུ་སྐྱེ་བ་མེད་པའི་རང་ཞལ་ལ། །སྣ་ཚོགས་སྣང་བ་མ་ལུས་ཅིག་ཅར་བབ། །རོ་གཅིག་ཆོས་ཀྱི་སྐུ་ཡི་འཚོ་གཞེས་བརྟན། <br />།སྒོམ་པ་རྣལ་འབྱོར་ལུས་ཀྱི་གཏོར་མ་འདི། །ཡེ་ཤེས་གཏུམ་མོ་སྒྲོན་མེ་ལྔ་སྦར་ཞིང་། །ཐུགས་རྗེའི་ལྕགས་ཀྱུ་བདུད་རྩི་ལྔ་བཞུས་པས། །ཕུང་ཁམས་རྒྱལ་བ་རིགས་ལྔའི་འཚོ་གཞེས་བརྟན། <br />།སྤྱོད་པ་བསྐྱེད་རིམ་ཕྱི་ཡི་གཏོར་མ་ནི། །གོང་དུ་ལྷག་པའི་ལྷ་ལ་མཆོད་པ་དང་། །འོག་ཏུ་འབྱུང་པོའི་ཚོགས་ལ་སྦྱིན་པ་དང་། །མཉམ་པར་རྡོ་རྗེའི་སྤུན་ཚོགས་རོལ་བའི་རྫས། <br />།རྣལ་འབྱོར་གཏོར་མར་བརྩོན་པར་མི་བྱེད་ན། །དེ་ཡི་བར་ཆད་སེལ་བར་མི་ནུས་ཞེས། །ཕྲིན་ལས་དོན་ཡོད་གྲུབ་པའི་དམ་ཚིག་ཏུ། །རྡོ་རྗེ་འཆང་གིས་བཅས་པར་མཛད་པ་ཉིད། །དམ་ཚིག་པ་དང་ཡེ་ཤེས་སེམས་དཔའི་ལྷ། །གཅིག་པུའི་ཉམས་ཀྱིས་དུ་མའི་གར་མཛད་པ། །ཡབ་ཡུམ་སྲས་དང་བློན་པོ་འཁོར་གྱི་ཚོགས། །ཕོ་ཉ་བྲན་གཡོག་སྔོན་དུ་རོལ་བ་དང་། །ཕྱི་ནས་འབྲང་བ་ལ་སོགས་བསམ་མི་ཁྱབ། །དེ་དག་དགྱིས་ཤིང་ཚིམ་པར་བྱེད་པའོ། <br />།དེ་ལྟའི་གཏོར་མའི་ཚུལ་ལ་མཐའ་ཡས་པས། །བསྡུ་ན་རང་གཞན་རྒྱུད་བསྡུས་ལུས་ལོངས་སྤྱོད། །བདག་པོས་བཟུང་དང་མ་བཟུང་གང་ཡང་རུང་། །དངོས་འབྱོར་ཡིད་སྤྲུལ་ཆེ་འབྲིང་ཆུང་ངུ་ཡིས། །དམིགས་པའི་རྟེན་གྱི་ཡོ་བྱད་གང་རུང་ཞིག །ལྷ་རུ་བསྐྱེད་དང་གཞལ་མེད་ཁང་དུ་བསྐྱེད། །ཤ་ལྔ་བདུད་རྩི་ལྔ་རུ་བསྐྱེད་པ་དང་། །ཟག་བཅས་ཟག་མེད་བདུད་རྩིའི་རྒྱ་མཚོ་དང་། །ལས་བཞི་སྒྲུབ་པའི་ཕོ་ཉར་བསྐྱེད་པ་དང་། །ལུས་སྲོག་ནོར་གྱི་གླུད་དུ་གཏོང་བ་དང་། །དགྲ་དང་འདྲེ་ཡི་ལིངྒར་བསྐྱེད་པ་དང་། །ཤ་ཁྲག་དམར་གྱི་གཏོར་མར་བསྐྱེད་པ་སོགས། <br />།གཞན་ཡང་གཏོར་མགྲོན་རང་རང་མགུ་བྱེད་པའི། །གཟུགས་སྒྲ་དྲི་རོ་རེག་བྱ་ཡིད་ལོངས་སྤྱོད། །སོ་སོའི་བསམ་པ་ཇི་བཞིན་སྤྲུལ་པར་བཤད། །ཀུན་ཀྱང་འཕྲལ་སྣང་སྒྱུ་མའི་རྟེན་འབྲེལ་ཡིན། །རྟེན་འབྲེལ་རང་བཞིན་གང་དུའང་མ་གྲུབ་པས། །སྙིང་པོ་མེད་པས་སྙིང་པོ་ལེན་ཚུལ་གྱིས། །ཐབས་ཤེས་ལྡན་ན་བྱང་ཆུབ་ལམ་དུ་འགྲོ། <br />།དེ་ལ་བྱ་བའི་རྒྱུད་ཀྱི་གཟུངས་སྔགས་ནས། །ཁ་འབར་མ་སོགས་གནོད་སྦྱིན་ཚིམ་བྱའི་ཕྱིར། །གཏོར་མའི་ཆོ་ག་ཞལ་ནས་གསུངས་པ་དང་། །བྱིན་གྱིས་རླབས་དང་རྗེས་སུ་གནང་པ་ཡི། །སྔགས་དང་ཕྱག་རྒྱ་ཏིང་འཛིན་རིམ་པ་བཞིན། །ཚུལ་ལྡན་སྒྲུབ་ན་ཕན་ཡོན་བསམ་ལས་འདས། <br />།དེ་ལ་བརྟེན་ནས་རུང་མཐུན་སྦྱར་བ་ཡི། །བླ་མ་བརྒྱུད་པའི་མན་ངག་ལས་འོངས་པ། །གཏོར་མ་གཏོང་ཚུལ་དུ་མ་བྱུང་གྱུར་ཏེ། །ཐམས་ཅད་སྐྱེས་བུའི་ཉེར་མཁོ་ཉིད་དུ་ངེས། <br />།འདིར་ནི་ཀུན་མཁྱེན་རང་བྱུང་རྡོ་རྗེ་ཡིས། །སྣ་ཚོགས་བེའུ་བུམ་ཞེས་བྱར་གསུངས་པ་དང་། །དོན་ལྡན་ཞབས་ཀྱིས་ཆོས་སྤྱོད་རབ་གསལ་དུ། །གསུངས་པ་གང་རུང་གཙོ་བོར་བྱ་དགོས་ལ། <br />།ཐོག་མར་ཁུངས་དང་གླེང་གཞི་ལོ་རྒྱུས་ནི། །ཡི་དྭགས་ཁ་ནས་མེ་འབར་སྐྱབས་མཛད་དང་། །ཁ་འབར་མ་ནས་དབུགས་དབྱུང་ནས་གསུངས་ཏེ། །དེ་ཡང་ཚེ་དང་ལྡན་པ་ཀུན་དགའ་བོ། །དབེན་པར་སྤྱོད་ཚེ་ཡི་དྭགས་མི་སྡུག་པ། །ཁ་ནས་མེ་འབར་ཞིག་གིས་འདི་སྐད་ཅེས། །ཁྱོད་ནི་ཉིན་ཞག་བདུན་ན་དུས་བྱས་ཏེ། །ཡི་དྭགས་གནས་སུ་སྐྱེ་བར་འགྱུར་ཞེས་གསུངས། །དེ་ལ་སྐྱོབ་ཕྱིར་སྟོན་པས་འདི་སྐད་ཅེས། །ང་སྔོན་བྲམ་ཟེ་ཞིག་ཏུ་གྱུར་པ་ན། །བྱང་ཆུབ་སེམས་དཔའ་སྤྱན་རས་གཟིགས་དབང་དང་། །དེ་བཞིན་གཤེགས་པ་དབང་ཕྱུག་ཡོན་ཏན་ལ། །གཟི་བརྗིད་ཚད་མེད་དབང་དུ་གྱུར་པ་ཡི། །འོད་ཟེར་རྣམ་པར་རྒྱལ་བའི་ཤུགས་ཞེས་པ། །གཟུངས་སྔགས་ཟབ་མོ་འདི་ནི་ཐོས་གྱུར་ནས། །ཡི་དྭགས་རྣམས་ལ་གཏོར་མ་བྱིན་བྱས་པས། །ཐམས་ཅད་མཐོ་རིས་ལྷ་རུ་སྐྱེས་གྱུར་ཏོ། །དགའ་བོ་ཁྱོད་ཀྱིས་ཟས་གཙང་ཆུ་སྦྱར་བ། །སྔགས་ཀྱིས་བསྔོས་ནས་གཙང་བར་བླུགས་བྱས་ན། །ཚེ་དང་བསོད་ནམས་རྣམ་པར་འཕེལ་འགྱུར་ཞིང། <br />།ཁ་འབར་མས་གཙོས་ཡི་དྭགས་གངྒཱའི་ཀླུང་། །བྱེ་བ་ཁྲག་ཁྲིག་འབུམ་ཕྲག་དུ་མ་ཡིས། །བྱེ་མ་སྙེད་ཀྱི་གྲངས་དང་མཉམ་པ་ལ། །མ་ག་དྷ་ཡི་བྲེ་ཆེན་བདུན་བདུན་གྱི། །བཟའ་བཏུང་བྱིན་པར་འགྱུར་ཞིང་དེ་ཐོབ་ནས། །ཚིམ་ཞིང་རངས་ཏེ་ལྷ་ཡུལ་སྐྱེ་བར་འགྱུར། <br />།དེ་བཞིན་དགེ་སློང་དགེ་བསྙེན་ཕ་མ་འམ། །གཞན་ཡང་རུང་སྟེ་གཟུངས་སྔགས་འདི་བཟླས་ནས། །ཡི་དྭགས་རྣམས་ལ་ཁ་ཟས་བྱིན་གྱུར་ན། །བསོད་ནམས་ཚད་མེད་ཡོངས་སུ་རྫོགས་འགྱུར་ཏེ། །ཚེ་རིང་མདངས་དང་སྟོབས་རྣམས་རབ་ཏུ་འཕེལ། །མི་མ་ཡིན་དང་གནོད་སྦྱིན་སྲིན་པོ་དང་། །ཡི་དྭགས་མ་རུངས་ཀུན་གྱིས་འཚེ་མི་ནུས། །དེ་ལ་གཟི་བརྗིད་ཚད་མེད་ལྡན་པར་འགྱུར། <br />།གང་དག་ལྷ་ཡི་དྲང་སྲོང་བྲམ་ཟེ་ལ། །སྔགས་འདིས་ཁ་ཟས་གཙང་མ་བྱིན་རླབས་ནས། །འབབ་ཆུ་གཙང་མའི་ནང་དུ་དོར་བྱས་ན། །གངྒཱའི་ཀླུང་གི་བྱེ་མ་ཁྲག་ཁྲིག་འབུམ། །དཔག་མེད་བྱེ་མ་རྙེད་ཀྱི་རྡུལ་ཕྲན་གྲངས། །དྲང་སྲོང་བྲམ་ཟེའི་ཚོགས་ལ་ཅི་འདོད་ཀྱི། །མཆོད་པར་འགྱུར་ཞིང་ཀུན་གྱིས་དུས་གཅིག་ཏུ། །འདོད་དོན་འགྲུབ་པའི་སྨོན་ལམ་འདེབས་པར་འགྱུར། <br />།གལ་ཏེ་དཀོན་མཆོག་གསུམ་ལ་མཆོད་འདོད་ཀྱང་། །སྤོས་དང་མེ་ཏོག་ཞལ་ཟས་ལ་སོགས་པར། །ཉི་ཤུ་རྩ་གཅིག་སྔགས་ནས་ཕུལ་བྱས་ན། །དེ་དག་ལྷ་རྫས་དམ་པའི་ངོ་མཚར་དང་། །ལྡན་ཞིང་སྤྱན་སྔར་རྒྱུན་ཆད་མེད་པར་འགྱུར། <br />།དེ་ལྟ་བས་ན་ཁྱོད་ཀྱིས་འདི་ཟུངས་ལ། །རིགས་ཀྱི་བུ་དང་བུ་མོ་གཞན་ལའང་སྟོན། །སྦྱིན་པའི་ཕ་རོལ་ཕྱིན་པ་རྫོགས་འགྱུར་ཞེས། །བཅོམ་ལྡན་འདས་ཀྱིས་དེ་སྐད་བཀའ་བསྩལ་ཏོ། <br />།དེ་ལྟར་སྤྱན་རས་གཟིགས་དང་སྟོན་པ་མཆོག །ཉེ་གནས་གསང་བའི་བདག་པོ་ཀུན་དགའ་བོ། །དགེ་སློང་ཀུན་དགའ་མོ་དང་གྲགས་འཛིན་མ། །ཉེ་གནས་མ་དང་འཕགས་པ་དགྲ་བཅོམ་དང་། །རྣལ་འབྱོར་དབང་པོ་ཨཱ་ནནྡ་བཛྲ། །རྡོ་རྗེ་གདན་པ་གསེར་གླིང་ཇོ་བོ་རྗེ། །དགེ་བཤེས་སྟོན་པ་སྐུ་མཆེད་གསུམ་ལ་སོགས། །བཀའ་གདམས་བརྒྱུད་པའི་སྲོལ་ལས་བྱུང་བར་གྱུར། །ལོ་པཎ་རྣམས་ཀྱིས་སྔར་ནས་བསྒྱུར་ཟིན་ཀྱང་། །ཕྱག་ལེན་དར་བ་ཇོ་བོའི་བཀའ་དྲིན་ཏེ། །བྱང་ཆུབ་སེམས་ཀྱི་ཕྱག་རྗེས་གཅིག་ཡིན་ནོ། <br />།དེ་ལས་བྱུང་བ་ཆོ་གའི་རིམ་པ་ལ། །བདག་སྒྲུབ་རྫས་སྒྲུབ་གཏོར་མགྲོན་སྒྲུབ་པ་སྟེ། །སྒྲུབ་པ་གསུམ་དང་འབུལ་བའི་རིམ་པ་ཡི། །ལས་སྦྱར་གཅིག་སྟེ་དོན་ཚན་རྣམ་པ་བཞི། <br />།དོན་ཚན་དང་པོ་རྟེན་གྱི་གང་ཟག་ནི། །སོ་སོར་ཐར་པའི་སྡོམ་གནས་གང་ཡང་རུང་། །ཚུལ་ཁྲིམས་འཆལ་པས་རིགས་སྔགས་མི་འགྲུབ་ཅིང་། །ཚུལ་ལྡན་སྨོན་ལམ་འགྲུབ་པར་གསུངས་པས་ན། <br />།སུམ་ལྡན་རྡོ་རྗེ་འཛིན་པ་མཆོག་ཏུ་རིགས། །སྡོམ་ལྡན་མིན་ཀྱང་དད་པ་དོན་གཉེར་དང་། །བརྩོན་པའི་སྤྲོ་བ་ཡོད་ན་སུས་ཀྱང་རུང་། །ཆག་ན་རེ་བ་འབྲས་མེད་ཉེས་པ་ཡོད། །དེ་ཕྱིར་ཆག་མེད་གཏོང་བ་ཤིན་ཏུ་གཅེས། །བསམ་པ་བྱང་ཆུབ་སེམས་ཀྱི་སྙིང་རྗེ་དང་། །རྡོ་རྗེ་ཐེག་པའི་བསྐྱེད་རིམ་གསལ་དགོས་ལ། །སྤྱོད་ལམ་ཁྲུས་དང་གཙང་སྦྲར་བཅས་པ་དང་། །ཤ་ཆང་སྒོག་བཙོང་ལ་སོགས་སྤོང་བར་གསུངས། <br />།བྱ་རྒྱུད་ཙམ་པོར་བདག་བསྐྱེད་མེད་མོད་ཀྱང་། །ཁྱད་པར་ཅན་ལ་བདག་བསྐྱེད་གསུངས་པས་ན། །ཐུབ་པའི་དབང་པོའམ་སྤྱན་རས་གཟིགས་སུ་བསྒོམ། <br />།དོན་ཚན་གཉིས་པར་གང་དུ་གཏོང་བའི་སྣོད། །རྭ་དང་ཐོད་པ་བསེ་སོགས་མི་གཙང་རིགས། །ཆུང་དང་ཁ་ཆག་ཞབས་རྡོལ་དྲི་མ་ཅན། །ལྕགས་ཀྱི་སྣོད་དང་ལ་ཆ་ཏི་ཚ་ཅན། །འཁར་བའི་རིགས་ཀྱི་སྣོད་རྣམས་རབ་སྤངས་ནས། །གསེར་དངུལ་ཟངས་དམར་དུང་དང་ཉ་ལྕིབས་དང་། །རྫ་ཤིང་དཀར་ཡོལ་ལ་སོགས་འབྱོར་དང་བསྟུན། །རྣམ་པ་རྒྱ་ཆེ་ཁ་དབྱེས་ཆེ་ཆུང་ཚད། །ཇི་ལྟར་ཆེ་ཞིང་བསོད་ནམས་ཆེ་བར་གསུངས། <br />།ནང་གི་བཅུད་ནི་ཤ་ཆང་ལ་ཕུག་དང་། །དུག་གི་རིགས་དང་སྡིག་དང་འདྲེས་པའི་ཟས། །སྤངས་ནས་ཟས་མཆོག་དཀར་གསུམ་མངར་གསུམ་དང་། །ཐ་མ་ཟན་དང་ཆུ་ལ་བྱ་བ་སྟེ། <br />།ཇོ་བོས་བོད་ལ་ཕྱུག་པོ་མི་ཡོང་བ། །གཏོར་ཟན་སླ་དང་མཐེབ་སྐྱུས་ལན་ཞེས་གསུངས། <br />།དྲི་མ་ཅན་ལ་གཏོར་མགྲོན་མི་འཁོར་བས། །དེ་གསུམ་སྤངས་ཤིང་གྲུབ་ཐོབ་ལྕེ་སྒོམ་པས། །འབྲུ་དང་ཆུ་གཙང་ཁོ་ན་སྦྱར་བ་ནི། །ལག་ཏུ་ལེན་པར་བདེ་བ་ཡིན་ཡང་གསུངས། <br />།སློབ་དཔོན་ཨ་བྷྱས་སྔགས་ཚར་བདུན་བརྗོད་ཅིང་། །ལག་གཡས་བརྐྱང་བའི་སོར་མོ་ལྔ་པོ་ལས། །བདུད་རྩི་བབས་པས་ཆུ་དང་བཅས་པའི་ཟན། །ཉག་མ་རེ་ཡིས་མ་ག་དྷ་ཡི་བྲེའི། །ཁལ་ལྔ་ཙམ་དེའི་བཟའ་བར་གྱུར་པ་དེས། །ཚིམ་བར་བསམ་ཞིང་སེ་གོལ་ལན་གསུམ་བརྡབ། <br />།ཅེས་གསུངས་དེས་ན་སྐབས་དང་རིགས་པས་དཔྱད། <br />།ཟན་གྱི་གར་སླ་རང་གི་ཟ་རུང་ཙམ། །ཆེ་ཆུང་ཚད་ནི་ཆེ་བ་རི་རབ་ཙམ། །རྒྱ་མཚོ་ཙམ་མམ་ཆུང་བ་ནས་འབྲུ་ཙམ། །ཟན་ཁམ་གཅིག་དང་ཆུ་ཕུལ་གང་ཡང་རུང་། །རང་གི་འབྱོར་པ་དག་དང་བསྟུན་ཏེ་བྱ། <br />།གྲུབ་ཐོབ་ཆེན་པོ་ཀརྨ་པཀྵི་ཡིས། །ཕྲིན་ལས་ཐམས་ཅད་གཏོར་མར་རག་ལས་པས། །ཉང་ཉུང་ཆང་ཆུང་ཙམ་གྱིས་མི་རུང་སྟེ། །རི་ལྟར་སྤུངས་ཤིང་མཚོ་ལྟར་བསྐྱིལ་དགོས་གསུངས། <br />།གཏོར་མའི་གྲུབ་ཐོབ་བླ་མ་ལྕེ་སྒོམ་པས། །ནས་འབྲུ་ཟན་ཁམ་ཙམ་ལའང་བརྟེན་ནས་ནི། །བརྒྱ་རྩ་ཆག་མེད་ཐུགས་དམ་མཛད་པ་དང་། །སྒྲུབ་རྒྱགས་ཞོ་གཅིག་ཙམ་ལས་མེད་དུས་ཀྱང། །གཏོར་མ་འབུམ་ཚོའི་བསྙེན་པ་མཛད་པ་ན། །འཕྲལ་དུ་ལོངས་སྤྱོད་དཔག་ཏུ་མེད་པ་འཕེལ། །གཞི་བདག་དམ་ལ་ཐོགས་པ་བྱུང་ཞེས་གསུངས། <br />།དམིགས་པ་གཙོ་ཟེར་དངོས་པོ་ཁྱད་བསད་ནས། །སྣོད་མེད་སྐམ་གཏོར་ལ་སོགས་མི་རུང་སྟེ། <br />།ཆུ་ནི་སྐོམ་བ་སེལ་བའི་བདུད་རྩིའི་རྒྱུན། །ཟན་ནི་བཀྲེས་པ་སེལ་བ་སྲོག་གི་ཟུངས། །སྣོད་ནི་དེ་དག་བརྟེན་པའི་སྣོད་ཡིན་པས། །རྒྱུ་ཚོགས་གྲངས་ཚང་རྟེན་འབྲེལ་འགྲིགས་པ་དགོས། <br />།ཡི་དྭགས་རྣམས་ཀྱིས་ཇི་ཙམ་ཐོབ་པ་ནི། །མ་ག་དྷ་ཡི་བྲེ་ཚད་བདུན་བདུན་ཏེ། །དེ་ཡི་བྲེ་རེར་གསེར་བྲེའི་ཁལ་བཞི་དང་། །བྲེ་བཞིར་གྲོ་པར་འདུག་ཅེས་གྲགས་པར་སྣང་། །དེ་ནི་སྔགས་མཐུ་ཁོ་ནས་འཕེལ་བའི་ནུས། །ཏིང་འཛིང་མཐུས་ནི་བསམ་མི་ཁྱབ་ཏུ་འཕེལ།<br />།དོན་ཚམ་གསུམ་པར་དཀོན་མཆོག་སྲི་ཞུའི་མགྲོན། །མགོན་པོ་ཡོན་ཏན་རིགས་དྲུག་སྙིང་རྗེའི་མགྲོན། །ཤ་འཁོན་ལན་ཆགས་མགྲོན་བཞིར་གྲགས་པ་ལས། <br />།དང་པོ་གཉིས་ནི་སྤྱན་འདྲེན་བྱས་ན་འབྱོན། <br />།མ་བྱས་མི་འབྱོན་དྲངས་ཀྱང་མི་འབྱོན་པ། །རིགས་དྲུག་ནང་ནས་གནོད་སྦྱིན་གཞོང་ཐོགས་དང་། །ལག་རིང་རི་རྩེ་རྐན་དང་རྟག་མྱོས་རྣམས། །རྒྱ་མཚོ་ལུད་དང་རི་རབ་འགྱེལ་དོགས་དང་། །རི་རབ་རྩེ་ནས་གླིང་གཞི་བསྲུང་བ་དང་། །ཤིན་ཏུ་མྱོས་པར་གྱུར་པ་དེ་རྣམས་བཞིའོ། <br />།སྤྱན་འདྲེན་བྱེད་དུ་མི་རུང་མགྲོན་བཞི་ནི། །ས་བདག་སྟོབས་ཆེན་ཤྲཱི་པ་ཏྲ་གཉིས། །ཧང་པཎ་ཀླུ་དང་ཡི་དྭགས་གཏེར་སྲུང་བཞི། །གཞན་དུ་ཕྱིན་ན་ས་གཞི་གཡོ་བ་དང་། །ནད་རྐྱལ་ཁ་ལུད་མཐོང་བའི་དུག་ཡོད་དང་། །གཏེར་བུམ་བོར་ན་མུ་གེ་འབྱུང་ཕྱིར་རོ། <br />།སྤྱན་འདྲེན་མ་བྱས་ན་ཡང་འབྱོན་པ་ནི། །ཡི་དྭགས་རྣམས་ནི་ཤ་ལ་སྦྲང་མ་བཞིན། །བཤམས་མ་ཐག་ཏུ་འདུ་ཞིང་འཚོགས་པར་བྱེད། <br />།དབྱེ་སྒོ་འདིར་ནི་མཆོད་ཡུལ་སྦྱིན་ཡུལ་གཉིས། །དེ་ལས་ཕྱེ་ན་བསམ་གྱིས་མི་ཁྱབ་ཀྱང་། །བརྒྱུད་པའི་ཕྱག་ལེན་བཅུ་གཉིས་དབྱེར་མཛད་དེ། <br />།དང་པོ་བླ་མ་ཡི་དམ་ལྷ་ཚོགས་དང་། <br />།གཉིས་པ་ཡེ་ཤེས་པ་ཡི་ཆོས་སྐྱོང་དང་། <br />།གསུམ་པ་འཇིག་རྟེན་པ་ཡི་ཆོས་སྐྱོང་དང་།<br />།བཞི་པ་བྲམ་ཟེ་དྲང་སྲོང་གྲུབ་པ་དང་། <br />།ལྔ་པ་ལྷན་སྐྱེས་ལྷ་རྣམས་མཆོད་ཡུལ་ཡིན། <br />།ལྷན་སྐྱེས་བདུད་དང་དྲུག་པ་རིས་དྲུག་དང་། <br />།བདུན་པ་ཀླུ་དང་བརྒྱད་པ་ཡི་དྭགས་དང་། <br />།དགུ་པ་ལན་ཆགས་བཅུ་པ་གཞི་བདག་སྤྱི། <br />།བཅུ་གཅིག་བྱེ་བྲག་ཡུལ་གྱི་གཞི་བདག་དང་། <br />།བཅུ་གཉིས་ཁས་ཉེན་དབང་ཆུང་མ་ཐོབ་ཅིང་། <br />།གློ་བུར་ལྷགས་པ་རྣམས་ཏེ་སྦྱིན་ཡུལ་ཡིན། <br />།དང་པོའི་ཁོངས་སུ་ཇོ་བོ་དཀོན་མཆོག་གསུམ། །རྒྱལ་བ་རྒྱལ་སྲས་ཉན་རང་འཕགས་པ་སོགས། །སྐྱབས་གནས་ཀུན་བསྡུ་དེ་དག་མཆོད་པའི་དགེས། །ཐུགས་རྗེའི་ལྕགས་ཀྱུས་རྗེས་སུ་འཛིན་པར་འགྱུར།<br />།གཉིས་པ་ཡེ་ཤེས་ཆོས་སྐྱོང་མཆོད་པས་ནི། །སྔོན་གྱི་ཐུགས་དམ་བཞིན་ཏུ་ཕྲིན་ལས་མཛད། <br />།གསུམ་པ་འཇིག་རྟེན་པ་ཡི་ཆོས་སྐྱོང་ནི། །སྟོན་པའི་སྤྱན་སྔར་སྡོམ་པ་སེམས་བསྐྱེད་ནོད། །སངས་རྒྱས་བསྟན་པ་བསྲུང་བར་ཁས་བླངས་ཤིང་། །འཇིག་རྟེན་སྐྱོང་ཕྱིར་འཇིག་རྟེན་ཚུལ་བཟུང་བའི། །ལྷ་ཆེན་བརྒྱད་དང་ཀླུ་བརྒྱད་གཟའ་ཆེན་བརྒྱད། །གནོད་སྦྱིན་བརྒྱད་དང་ཕྱོགས་སྐྱོང་རྒྱལ་ཆེན་བཞི། །རྒྱུ་སྐར་ཉེར་བརྒྱད་ཚངས་པ་བརྒྱ་བྱིན་སོགས། །གཙང་རིས་དཔལ་མགོན་རྣམས་ལ་མཆོད་བྱས་པས། །མི་མཇེད་འཇིག་རྟེན་ཀུན་ཏུ་བདེ་ལེགས་འབྱུང་། <br />།བཞི་པ་ལྷ་ཀླུ་མི་ཡི་བྲམ་ཟེ་དང་། །དྲང་སྲོང་ཁྲིམས་ལྡན་དཀའ་ཐུབ་རིགས་སྔགས་འཆང་། །ཕན་དང་གནོད་པའི་དམོད་འདོར་བདེན་ཚིག་གྲུབ། །སྤྱན་དང་མངོན་ཤེས་རིག་གནས་བཅོ་བརྒྱད་རིག །སྨོན་ལམ་འདེབས་པ་དཔག་ཏུ་མེད་པ་དང་། །ནད་པར་ཕན་འདོགས་སྨན་གྱི་བྲམ་ཟེ་དྲུག །བདུད་རྩི་སྨན་གྱི་དྲང་སྲོང་བཅོ་ལྔ་སོགས། །མཆོད་པས་ནད་ཡམས་སེལ་ཞིང་སྨོན་ལམ་འགྲུབ། <br />།ལྔ་པ་ལྷན་ཅིག་སྐྱེས་པའི་ལྷ་བདུད་ནི། །འཚོ་བའི་ལྷ་དང་སྲུང་སྐྱོབ་འགྲོགས་པའི་ལྷ། །འགོ་བའི་ལྷ་ལྔ་དེ་དག་རིམ་པ་བཞིན། །ཡུལ་ལྷ་སྲོག་ལྷ་དགྲ་ལྷ་མོ་ལྷ་དང་། །ཕོ་ལྷ་ཞེས་བྱ་ལུས་ཀྱི་གཟི་བརྗིད་དང་། །སེམས་ཀྱི་དཔའ་སྟོབས་མཐའ་དག་སྦྱིན་བྱེད་པའོ། །བསོད་ནམས་ཅན་ལ་ལྷན་སྐྱེས་ལྷ་མང་ཡང་། །བསོད་ཆུང་རྣམས་ལ་འདྲེ་བདུད་མང་དུ་འཁོར། །གཉིས་ཀར་མཆོད་སྦྱིན་བྱས་པས་གྲོགས་སུ་འགྱུར།<br />།དྲུག་པ་རིགས་དྲུག་ཇི་སྙེད་ལ་སྦྱིན་པའི། །ལྷག་བསམ་མཐུ་ཡིས་དེ་སྙེད་བསོད་ནམས་འཐོབ། །ཀུན་ཀྱང་རང་གི་གདུལ་བྱའི་ཞིང་དུ་འགྱུར། །ཁྱད་པར་གཏོར་མ་མི་ལ་བསྡོ་བ་ནི། །དགེ་བཤེས་འཆད་ཀ་བ་ཡི་ཁྱད་ཆོས་གསུངས། །དགྲ་ལ་བསྔོས་ན་དེ་ཡི་གནོད་པ་ཞི། །བན་བོན་བསྔོས་ན་བྱད་ཁ་ཕུར་ཁ་བཟློག །ཡུལ་མིར་བསྔོས་ན་ཀུན་གྱིས་བྱམས་པར་འགྱུར། <br />།བདུན་པ་ཀླུ་གཉན་ས་བདག་ལ་སོགས་ནི། །བཀའ་གཉན་ཀོ་ལོང་དམ་པའི་དབང་གིས་ན། །གཏོར་མ་སྒོས་སུ་བསྔོ་བར་བྱས་པ་ནི། །ཐོ་ཅོ་མི་གཙང་གྲིབ་སོགས་ཕོག་ཐུག་རྣམས། །བཟོད་ཅིང་གནོད་སེམས་ཞི་བའི་དགོས་པ་ཡོད།<br />།བརྒྱད་པ་ཡི་དྭགས་རྣམས་ནི་ཁྱད་པར་དུ། །སྟོན་པས་འདི་ཉིད་ཁོ་ནའི་དོན་དུ་བཅས། །ཡི་དྭགས་རིགས་ལ་བྱེ་བ་སུམ་ཅུ་གཉིས། །སྔོན་ལས་སེར་སྣ་འཇུར་གེགས་བྱས་པ་དང་། །དགེ་འདུན་འདུ་བའི་སྒོ་ལ་སྤྱད་པ་དང་། །དཀོན་མཆོག་དཀོར་ལ་འབགས་པའི་ཉེས་པ་ཡིས། །ད་ལྟ་བཀྲེས་སྐོམ་ཚ་གྲང་ངལ་དུབ་དང་། །གཞན་གྱིས་རྡེག་འཚོག་རྐུ་འཕྲོག་ཏུ་མས་གཟིར། <br />།དཔེར་ན་ཇོ་བོ་རྗེ་ཡིས་གཟིགས་པ་ན། །ལྦ་བར་རང་ལུས་བཏགས་པས་འགུལ་མི་ནུས། །དེ་ལ་བྲད་ནས་རྣག་ཁྲག་ཟ་བ་དང་། <br />།སློབ་དཔོན་ཛེ་ཏཱ་རི་ཡིས་གཟིགས་པ་ལ། །བཅུ་གཉིས་ལོ་ལ་ཟས་སྐོམ་བསྒུགས་ན་ཡང་། །ལུད་པའི་བཅུ་ཆ་མ་གཏོགས་མ་ཐོབ་སོགས། །མི་སྡུག་ཉམ་ཐག་དུ་མ་ཡོད་པར་གསུངས། <br />།དེ་དག་རྣམས་ལ་ནན་ཏན་གྱིས་བསྔོས་ན། །བཀྲེས་སྐོམ་བསལ་བའི་ཕན་ཡོན་དཔག་མེད་འབྱུང་། །ཕྱུག་ཅིང་འགྲངས་ལ་ཁ་ཟས་མི་དགོས་ལྟར། །མགྲོན་གྱི་ནང་ནས་ཡི་དྭགས་གཙོ་བོ་ཡིན། <br />།དགུ་པ་ལན་ཆགས་གདོན་ཆེན་བཅོ་བརྒྱད་དང་། །བགེགས་རིགས་སྟོང་ཕྲག་བརྒྱད་ཅུ་གློ་བུར་གྱི། །ཡེ་འགྲོགས་སུམ་བརྒྱ་དྲུག་ཅུ་ལ་སོགས་པ། །གནོད་བྱེད་གདུག་རྩུབ་ནག་ཕྱོགས་འབྱུང་པོའི་རིགས། །བོད་ཀྱི་ལྷ་འདྲེ་མུ་བཙན་རྒྱལ་པོ་དང་། །ཐེའུ་རང་མ་མོ་བདུད་སྲིན་གཟའ་དང་ཀླུ། །གནོད་སྦྱིན་སྨན་མོ་གཤིན་རྗེར་གྲགས་པ་སོགས། །ཁྱད་པར་གཅིག་སྲོག་གཅིག་གིས་བཅད་པ་དང་། །གཅིག་ནོར་གཅིག་གིས་ཕྲོགས་པ་ལ་སོགས་པའི། །བུ་ལོན་ཤ་འཁོན་ཞུགས་པ་ཐམས་ཅད་ལ། །བསྔོས་པས་ཕན་ཚུན་གནོད་སེམས་ཞི་བར་འགྱུར།<br />།བཅུ་པ་འཛམ་བུ་གླིང་གི་གཞི་ཡི་བདག །ཡུལ་བདག་གནས་བདག་ཅེས་གྲགས་མེ་དཔུང་བསྣམས་པ་མེ་ཡི་ལྟ། །གསལ་བའི་འོད་ཟེར་ཆུ་བདག་སྦྲུལ་ཞགས་བསྣམས་པ་ཝ་རུ་ཎ། །སྦུད་པ་བསྣམས་པ་རླུང་ལྷ་བཱཡ་བེ་བྱེ་རླུང་གི་བདག །འཁོར་ལོ་བསྣམས་པ་ལག་པ་ཆེན་པོ་གཏེར་བདག་རིན་པོ་ཆེའི་བུམ་བསྣམས་པ་ནོར་རྒྱུན་མ། །རིལ་གནས་པ་རི་རབ་བསྣམས་པ་བརྟན་པའི་བློ་གྲོས་དང་། །ནགས་ཀྱི་ལྷ་མོ་རྨ་བྱ་བསྣམས་པ་རྨ་བྱའི་མདངས་ལྡན་མ། །ཤིང་ཏོག་བསྣམས་པ་ཤིང་གི་ལྷ་མོ་ཀུན་ནས་འོད་ཟེར་དང་། །སྦྲང་རྩི་བསྣམས་པ་རྩི་ཐོགས་ལྷ་མོ་གྲུབ་པའི་བློ་གྲོས་སོགས། །ཁྱད་པར་བོད་ཁམས་བརྟན་སྐྱོང་འཁོར་བཅས་ལ། །བསྔོས་པས་ཡུལ་ཀུན་བཀྲ་ཤིས་བྱིན་ཆགས་ཤིང་། །ལོ་ཕྱུག་རྟག་ཏུ་ལེགས་པའི་དགོས་པ་ཡོད།<br />།བཅུ་གཅིག་རང་ཉིད་གང་དུ་གནས་པ་དེར། །རྟག་ཏུ་གཉུག་མར་གནས་པའི་གཞི་བདག་རིགས། །ཚོང་དུས་ཆོས་རེ་སྐྱེ་བོའི་འདུ་འཚོགས་ས། །དགེ་འདུན་རྣམས་ཀྱི་ཀུན་དགའ་ར་བའི་ལྷ། །རིན་ཆེན་འབར་བ་བསྣམས་པ་ཐུགས་རྗེ་ཀུན་ཏུ་སྣང་བའི་བློ་གྲོས་དང་། །ཁྱིམ་གྱི་ཁྱིམ་ལྷ་རིན་པོ་ཆེ་བསྣམས་པ་ཀུན་ཏུ་སྣང་བ་སོགས། །གཞན་ཡང་འདི་ན་འདི་གནས་ཞེས་གྲགས་པ། །དེ་ལ་བསྔོས་པས་ཕྱག་དོག་གདུག་རྩུབ་ཞི། །གནས་པོ་གཞིན་དུ་སྟོངས་གྲོགས་རོགས་དན་བྱེད།<br />།གཅུ་གཉིས་གློ་བུར་ལྷགས་པའི་ཡི་དྭགས་རིགས། །དཔེར་ན་སྟོན་མོ་ཆེན་པོ་བྱས་གྱུར་ཀྱང་། །བསོད་ཆུང་ཁ་ཅིག་རྗེས་ནས་ལུས་པ་ལྟར། །སྐལ་ཆད་རྣམས་ལ་ལྷག་མ་ཆ་བརྒྱད་བྱིན། །རེ་བ་བཞིན་དུ་སྟོང་ལོག་མེད་པར་འགྱུར། <br />།དོན་ཚན་བཞི་པ་འབུལ་བའི་རིམ་པ་ལ། །དུས་གནས་དམ་ཚིག་ཆོ་ག་བྱ་བ་དངོས། །ཚིམ་ཚུལ་ཕན་ཡོན་ལས་སྦྱོར་རྣམ་གྲངས་སོ།<br />།དང་པོ་ཉི་ཤར་བཀྲ་ཤིས་ཕུན་སུམ་ཚོགས། །ཟས་ཀྱི་དྲི་ལ་འགའ་ཞིག་སྐྲག་པའི་ཕྱིར། །ཁ་ཟས་མ་ཟས་གོང་དུ་གཏོང་པའང་གསུངས། །བྲམ་ཟེའི་རིགས་འགའ་ཕྱི་དྲོ་མི་ཟ་བས། །སྔ་དྲོ་ལེགས་ཞེས་ལྕེ་སྒོམ་པ་ཡིས་གསུངས། །ཕྱི་དྲོ་ཉི་མའི་གྲིབ་ཆུང་ཉིལ་བ་ན། །ཡི་དྭགས་བཟའ་བཏུང་འཚོལ་བས་དེར་ཡང་རུང་། །འབྱུང་པོ་ཕལ་ཆེར་མཚན་མོ་རྒྱུ་བས་ན། །མཚན་མོ་བཏང་བས་ཕྲིན་ལས་མྱུར་འགྲུབ་བྱེད། <br />།མདོར་ན་མི་ལྟོགས་རྣམས་ལ་ཁ་ཟས་བཞིན། །ནམ་དུའང་རུང་ཞེས་ཇོ་བོ་རྗེ་ཡིས་གསུངས། <br />།གཏོང་བའི་དུས་གནས་སྔར་ལས་མ་ཡོལ་བྱ། །གལ་ཏེ་ཡོལ་ན་ཅུང་ཟད་སྔ་བ་ལེགས། །ཐོག་མ་གང་དུ་བཏང་བའི་ས་ཡུལ་དེར། །སྐོར་གཅིག་ངེས་པར་འཚོགས་པར་འདུག་ཅེས་གསུངས།<br />།གཉིས་པ་དམ་ཚིག་གཏོར་སྟེགས་མ་བྱས་ན། །མི་ཆེན་ལྕོག་རྩེ་མེད་བཞིན་བརྙས་པ་དང་། །རྒྱུ་འགྲུལ་གཞན་གྱིས་ཞར་ལ་འཁྱེར་བའང་སྲིད། །དབུལ་པོ་བླུག་སྣོད་མེད་པར་སྦྱིན་པ་བཞིན། །སྣོད་མེད་བརྙས་དང་ཆེད་གཉེར་མེད་པར་འགྱུར། །གཙང་སར་བཏང་ཞིང་དོར་པ་མ་བྱས་ན། །འབགས་བཙོག་དྲི་མས་ཟས་དེ་དུག་ཏུ་འགྱུར། །ཆུ་མེད་སྐམ་གྱི་ས་བོན་ལྟར་འགྱུར་བས། །སྟོན་པས་ཆུ་དང་བཅས་ཏེ་གཏོང་བར་གསུངས། །མུན་པའམ་གཞན་ཡང་མི་མཐོང་སར་བཤམས་ན། །འོལ་ཚོད་མུན་ནང་མདའ་འཕངས་ཉིད་འགྱུར་བས། །སྣང་བ་དང་བཅས་རང་གིས་མཐོང་སར་བཤམས། །གཏོར་སྣོད་ཡོ་ན་ཡི་དྭགས་བློ་མི་བདེ། །རྒྱུ་དེས་རང་བློ་ཀྱོག་པའི་སྐྱོན་འབྱུང་ཞིང་། །གཏོར་སྣོད་འབྲེལ་ན་རྩོད་པ་འབྱུང་བའི་ཕྱིར། །ཕན་ཚུན་མ་རེག་ཙམ་དུ་དྲང་པོར་བཤམས། །འཇུངས་པ་རྣམས་ཀྱི་ཡི་ག་མི་གང་ཞིང་། །འབོ་ཞིང་ལུད་པའང་དེ་ཡིས་འཐོབ་འགྱུར་བས། །རབ་ཏུ་ཁེངས་ཤིང་ལུད་པ་ཙམ་དུ་གཏོང་། །སྦྱིན་གྲབས་བྱས་ཤིང་མ་བྱིན་ལྟ་བུ་ཡིས། །གཤིས་ངན་འཚིག་ནས་སྟོང་ལོག་བྱེད་སྲིད་པས། །གཏོར་མ་རན་པར་བསྒུལ་བསྐྱོད་མི་བྱ་ཞིང་། །གལ་ཏེ་བསྒུལ་ན་དེ་མ་ཐག་ཏུ་གཏོང་། །ལུས་ངག་ཙམ་ལ་འབྲས་བུ་མི་འབྱུང་བས། །མ་ཡེངས་སེམས་ཀྱི་དམིགས་འདུན་དྲག་ཏུ་བྱ། །སྟོན་མོ་བཤམས་ནས་གསོལ་བརྡ་མ་སྤྲད་བཞིན། །ནམ་ཟའི་དུས་དང་གང་འཐོབ་མི་ཤེས་པས། །གཏོང་དུས་ངེས་པར་མཚམས་སྦྱོར་བརྡ་སྤྲོད་བྱེད། །སྔ་མའི་ལྷག་མས་འབགས་བཙོག་འབྱུང་བའི་ཕྱིར། །གཏོར་སྣོད་བཤལ་ཞིང་བཀྲུས་ཏེ་གཙང་བར་བྱ། །ཟན་དང་བཀྲུ་བཤལ་བསྲེས་ན་མི་རུང་ལྟར། །བཤལ་ཆུ་ལོགས་སུ་བྱས་ནས་གཙང་སར་དབོ། །དེ་ཡང་བཟའ་བཏུང་བླུག་ཏུ་རེ་བ་དང་། །ཡིད་དུ་མི་འོང་རྟེན་འབྲེལ་འཆུག་པའི་ཕྱིར། །སྣོད་སྤྱད་སྟོང་པ་ཙ་རུ་མི་བཞག་གོ།<br />།གསུམ་པ་ཆོ་གར་སྦྱོར་དངོས་རྗེས་གསུམ་ལས། <br />།ཐོག་མར་སྐྱབས་འགྲོ་སེམས་བསྐྱེད་རྒྱས་པའམ། །བསྡུ་ན་སངས་རྒྱས་ཆོས་ཚོགས་ཁོ་ན་སྟེ། <br />།འདི་ལྟའི་ཚིགས་བཅད་རེ་རེའི་བཀའ་དྲིན་ཡང་། །བོད་ཁམས་ཀུན་གྱིས་ཁུར་ཡང་མི་ཐེག་ཅེས། །དགེ་བཤེས་སྤྱན་སྔ་པ་ཡི་གསུང་ལས་གྲགས། <br />།ལྕེ་སྒོམ་པས་ཀྱང་འདི་ཉིད་གལ་ཆེ་བས། །ང་ཡིས་སྣོད་རེར་སེམས་བསྐྱེད་རེ་བྱས་གསུངས། <br />།དོན་དམ་སེམས་བསྐྱེད་སྟོང་པ་ཉིད་སྒོམ་ཞིང་། །དེ་ལས་སྙིང་རྗེས་གཟུགས་སྐུར་ལྡང་ཚུལ་གྱིས། །བདག་བསྐྱེད་སྒོམ་ཞིང་གཏོར་མགྲོན་མདུན་བསྐྱེད་རྣམས། །སོ་སོར་སྤྱན་འདྲེན་ཞུ་ཞིང་མདུན་དུ་དགུག<br />།དངོས་གཞི་སྔགས་དང་དམིགས་པ་ཕྱག་རྒྱ་ཡིན། <br />།སྔགས་ཀྱི་ནུས་པ་བསམ་གྱིས་མི་ཁྱབ་སྟེ། །དཔེར་ན་བསྟོད་སྨད་སྙན་དང་མི་སྙན་ལས། །སེམས་ལ་བདེ་སྡུག་བསྐྱེད་པའི་ནུས་ཡོད་བཞིན། །ཁྱད་པར་སྟོན་པས་བྱིན་གྱིས་བརླབས་པས་ན། །ཕན་ཡོན་འབྱུང་བར་ངེས་ཤེས་བསྐྱེད་དེ་འབད། །དམིགས་པ་ཆོས་ཅན་སྣང་ཆ་ཀུན་རྫོབ་དང་། །དེ་ཡི་ཆོས་ཉིད་སྟོང་པ་དོན་དམ་བདེན། །དོན་དམ་དམིགས་པ་མེད་པའི་དམིགས་པ་སྟེ། །སྔོན་ཚེ་རྗེ་བཙུན་ཆེན་པོ་སྒམ་པོ་བས། <br />།ཏིང་འཛིན་ངང་ནས་ཆུ་སྦྱིན་མཛད་པ་བཞིན། །ཀུན་རྫོབ་ཆོས་ནི་སེམས་ཀྱིས་བཏགས་པ་ཙམ། །རྒྱུ་མཚན་དེ་ཕྱིར་ཅིར་ཡང་བསྒྱུར་རུང་བས། །དམིགས་པ་རྣོན་པོ་རྣལ་འབྱོར་མཚོན་ཆར་གྲགས། <br />།འོན་ཀྱང་ཆགས་ཤིང་ཞེན་པའི་དངོས་འཛིན་གྱི། །བྱ་བྱེད་ཇི་ལྟར་བཟང་ཡང་འཁོར་བའི་རྒྱུ། <br />།སྒྱུ་མ་མཁན་པོ་རང་གིས་སྤྲུལ་པ་ཡི། །རྟ་གླང་སོགས་ལ་ཆགས་འཛིན་མེད་ལྟར་སྤྱོད། །དེས་ནི་ཟག་པ་མེད་པའི་ཚོགས་རྫོགས་ནས། །དམིགས་གཏད་མཚན་མ་ཀུན་ལས་གྲོལ་བར་འགྱུར། །ཟབ་མོའི་དེ་ཉིད་དེ་ལྟར་རབ་ཤེས་པའི། །རྣལ་འབྱོར་བ་དེས་གཏོར་མའི་དེ་ཉིད་རིག <br />།ཕྱག་རྒྱ་ཟུང་འཇུག་རྣལ་འབྱོར་རྩེ་གཅིག་དོན། །སེམས་ཀྱི་བསམ་པ་མཚོན་པའི་ལུས་ཀྱི་བརྡ། །མཆོག་སྦྱིན་སེ་གོལ་ལ་སོགས་ཕྱག་ལེན་བཞིན།<br />།སྔགས་ཚན་དང་པོས་མཆོད་གཏོར་གདོན་བགེགས་བསལ། །གཉིས་པས་རང་བཞིན་རྣམ་དག་དྲན་བྱེད་ཅིང་། །གསུམ་པ་འབྲུ་གསུམ་གཏོར་མའི་དེ་ཉིད་ཅེས། <br />།རིན་ཆེན་སྣོད་མཆོག་ཡིད་དུ་འོང་བའི་ནང་། །སངས་རྒྱས་ཀུན་གྱི་སྐུ་གསུང་ཐུགས་རང་བཞིན། །ཟག་མེད་ཡེ་ཤེས་བདུད་རྩིར་བྱིན་བརླབ་སྟེ། <br />།ཡིག་གསུམ་དང་པོས་བསྐྱེད་པའི་ས་བོན་དང་། <br />།གཉིས་པས་ཟག་མེད་བདུད་རྩིར་བྱིན་གྱིས་བརླབ། <br />།ཡང་ན་འབྲུ་གསུམ་དང་པོས་ཉེས་སྐྱོན་སྦྱོང་། <br />།གཉིས་པས་སྣོད་བཅུད་ཕུན་སུམ་ཚོགས་པར་བསྒྱུར། <br />།གསུམ་པས་ཟད་མེད་རྒྱ་ཆེར་སྤེལ་བ་ཡི། <br />།བྱིན་རླབས་དགུ་ཕྲུགས་ཞེས་བྱ་བཞེད་པའང་ཡོད།<br />།བཞི་པ་ཁ་འབར་མ་ཡི་གཟུངས་སྔགས་དངོས། །དེ་ནི་བདུད་རྩི་འཐོབ་པར་བྱེད་པའི་སྔགས། <br />།དེ་ཡང་བླ་མ་ཡི་དམ་ཆོས་སྐྱོང་དང་། །ཟག་པ་མེད་པའི་མཆོད་སྤྲིན་རྒྱ་མཚོ་དང་། །གཞན་དག་རྣམས་ལ་ངོ་བོ་བདུད་རྩི་ཉིད། །རྣམ་པ་སོ་སོའི་ཡིད་བཞིན་རོ་བརྒྱ་པའི། །བཟའ་དང་བཏུང་བའི་ལོངས་སྤྱོད་དུ་མ་དང་། །ལྷ་ཡི་ཞལ་ཟས་ཡིད་འོང་རྒྱན་ལྡན་པ། །ཁ་དོག་དྲི་རོ་རིག་བྱ་དམ་པའི་དངོས། །འབྲུ་འབྲས་ལོ་ཏོག་མེ་ཏོག་བདུག་སྤོས་དྲི། །སྣང་གསལ་ཞལ་ཟས་རོལ་མོ་རྩི་བཅུད་དང་། །རིན་ཆེན་གོས་སོགས་མཁོ་དགུའི་ཡོ་བྱད་རྣམས། །ལག་ལེན་མཁས་པས་གྲལ་དུ་བཀྱེ་ལེགས་བཞིན། །གང་ལ་གང་འཚམས་རིམ་པ་མ་འཆོལ་བར། །རྒྱལ་ཕམ་སྙོམས་ཤིང་ཀུན་གྱིས་འཐོབ་པར་བྱེད། །དེ་བཞིན་གཤེགས་པ་བཞི་ཡི་མཚན་བརྗོད་པའི། །རྒྱུ་མཚན་གཏོར་མ་བྱིན་གྱིས་རློབ་པ་དང་། །ཐོས་པའི་མོད་ལ་ཕན་ཡོན་འབྱུང་བ་ཡིན། །དེས་ན་གཟུངས་ཀྱི་ཐོག་མཐའ་གང་དུའང་རུང་། །དེ་ཡང་དགེ་བཤེས་སྟོན་པའི་རྗེས་འབྲངས་ནས། <br />།རིན་ཆེན་མང་ནི་ཤཱཀྱ་ཐུབ་པ་ཉིད། །གཙོ་མའི་གསེར་མདོག་ངུར་སྨྲིག་ཆོས་གོས་གསོལ། །པད་ཟླའི་གདན་ལ་རྡོ་རྗེ་སྐྱིལ་མོ་ཀྲུང་། །ཕྱག་གཡས་མཆོག་སྦྱིན་གཡོན་པ་མཉམ་བཞག་མཛད། །མཚན་དེ་ཐོས་པས་དབུལ་ཕོངས་ལས་གྲོལ་ནས། །བསོད་ནམས་ལོངས་སྤྱོད་ཕུན་སུམ་ཚོགས་པར་འགྱུར། <br />།གཟུགས་མཛེས་དམ་པ་འཕགས་པ་སྤྱན་རས་གཟིགས། །གངས་རི་ལྟར་དཀར་དར་དང་ནོར་བུས་བརྒྱན། །པད་ཟླར་གཡས་བརྐྱངས་རོལ་པའི་སྐྱིལ་ཀྲུང་བཞུགས། །ཕྱག་གཡས་མཆོག་སྦྱིན་གཡོན་གྱིས་པད་དཀར་འཛིན། །མཚན་དེ་ཐོས་པས་མི་སྡུག་གཟུགས་སྤངས་ནས། །གཟུགས་བཟང་མཛེས་སྡུག་སྟོབས་ལྡན་ལུས་སུ་འགྱུར། <br />།སྐུ་མཆོག་འབྱམས་ཀླས་འཇམ་དཔལ་གཞོན་ནུ་སྟེ། །གུར་གུམ་མདངས་ཆགས་རྒྱན་རྣམས་ཀུན་གྱིས་མཛེས། །པད་ཟླར་སྐྱིལ་ཀྲུང་ཕྱག་གཡས་རལ་གྲི་དང་། །གཡོན་ན་གླེགས་བམ་དང་བཅས་ཨུཏྤལ་བསྣམས། །མཚན་དེ་ཐོས་པས་ལྟོ་བའི་ནད་ཀུན་བྱང་། །ཟས་ཀྱི་རོ་བྲོ་ཆོག་ཤེས་ལྡན་པར་འགྱུར། <br />།འཇིགས་བྲལ་གསང་བའི་བདག་པོ་ཕྱག་རྡོར་ནི། །ཨིནྡྲ་ནཱི་ལའི་འོད་འབར་རྒྱན་གྱིས་སྤྲས། །པད་ཟླར་སྐྱིལ་ཀྲུང་ཕྱག་གཡས་རྡོ་རྗེ་གསོར། །ཕྱག་གཡོན་སྐྱབས་སྦྱིན་མཚན་དེ་ཐོས་པ་ཡིས། །ཕན་ཚུན་རྡེག་འཚོག་གཅིག་གིས་གཅིག་ཟ་སོགས། །འཇིགས་དང་ཐོ་འཚེ་ཀུན་ལས་སྐྱོབ་པར་འགྱུར། <br />།དེ་ནས་རྗེས་ནི་པང་ན་རིན་ཆེན་མང་རིན་འབྱུང་། གཟུགས་མཛེས་གང་གིས་མཐོང་ཡང་ཡིད་དུ་འོང་བ་ཞིག སྐུ་འབྱམས་ཀླས་གང་ཆེན་མཚོ། འཇིགས་བྲལ་དོན་ཡོད་གྲུབ་པར་བྱས་ཀྱང་རུང་སོ་སོར་འདོད་གསོལ་དང་། །བདེན་བདར་ཆོས་བཤད་བསྔོ་བས་རྒྱས་བཏབ་སྟེ། <br />།མྱུར་མགྱོགས་རྟ་མཆོག་འདྲ་བའི་སྦྱིན་འབྲས་ཀྱང་། །སྨོན་ལམ་སྲབ་མདའ་འདྲ་བས་ལ་བསྒྱུར་རོ། །ཀུན་ཀྱང་ཕར་ཕྱིན་དྲུག་ལྡན་ཉམས་བླངས་ཏེ། <br />།ཇོ་བོའི་ཞལ་ནས་བྱང་ཆུབ་སེམས་མཆོག་དང་། །ཕ་རོལ་ཕྱིན་དྲུག་སྲང་ལ་བཅལ་གྱུར་ཀྱང་། །མཉམ་པ་ཉིད་ལ་སངས་རྒྱས་འབྱུང་ཞེས་གསུངས། <br />།དེ་བས་རང་འདོད་སྤངས་ནས་མཆོད་སྦྱིན་བྱ། །གཞན་ལ་འཚེ་མེད་གཙང་སྦྲའི་ཚུལ་ཁྲིམས་སྲུང། <br />།སྐབས་དེར་གཞན་ལ་མི་རྒོལ་ངལ་དུབ་བཟོད། །དགེ་སྦྱོར་ལས་སུ་མ་སོང་རབ་སྤྲོ་བས། །རྐྱེན་གྱིས་བཟློག་ཏུ་མེད་པའི་བརྩོན་འགྲུས་རྩོམ། །མ་ཡེངས་སྨྲ་བཅད་རྩེ་གཅིག་བསམ་གཏན་འཇོག །དགེ་བའི་བཤེས་གཉེན་རྣལ་འབྱོར་པ་ཆེན་པོས། <br />།ཐུགས་དམ་དུས་སུ་དྲུང་དུ་མི་མི་གཏོང་། །བསམ་པ་གཞན་པ་སྐྱེ་བའི་སྐྱོན་ཡོད་ཅིང་། །ཡེངས་པ་ཐམས་ཅད་སྙོམས་ལས་ཡིན་ཞེས་གསུངས། <br />།བདེན་གཉིས་ཚུལ་ལས་མི་འགལ་ཤེས་རབ་ནི། །ཀུན་རྫོབ་ཐབས་ཀྱི་བྱ་བ་རུས་ཐོན་ཞིང་། །ཆུད་ཟོས་མེད་པའི་ཀད་དེ་ཀྲིག་གེ་དགོས། །མན་མུན་སབ་སུབ་ཙམ་གྱིས་མི་ཡོང་སྟེ། །རྒྱུ་འབྲས་མི་བསླུའི་འབྲེལ་པ་འགྲུབ་པའི་ཕྱིར། །རྒྱུ་ཚོགས་ངན་ལས་འབྲས་བཟང་འབྱུང་བ་མེད། །དོན་དམ་སྐྱེ་མེད་རྟོགས་པའི་ཤེས་རབ་ཀྱིས། །ཅིར་ཡང་མ་གྲུབ་གསལ་སྟོང་ཟུང་འཇུག་སྟེ། །འཁོར་གསུམ་ཡོངས་སུ་དག་པའི་ངང་ནས་སྤྱོད། <br />།དེ་ལྟའི་ཕར་ཕྱིན་དྲུག་གི་དགེ་ཚོགས་རྣམས། །བྱམས་དང་སྙིང་རྗེ་བྱང་ཆུབ་སེམས་གསུམ་གྱི། །བསམ་པ་ཡེ་ཤེས་སྟོབས་ཀྱིས་ལྷག་པར་བྱེད། <br />།སྟོང་ཉིད་རྒྱུ་འབྲས་ཚུལ་དུ་འཆར་བ་དང་། <br />།རྒྱུ་འབྲས་སྟོང་ཉིད་ངང་དུ་གྲོལ་བ་ཡི། <br />།ཤེས་རབ་སྟོབས་ཀྱིས་དགེ་རྩ་རྒྱས་པར་བྱེད། <br />།དབང་པོ་སངས་རྒྱས་རྣམས་ཀྱི་བྱིན་རླབས་དང་། །བསྔོ་རྒྱུ་མི་ཟད་འགག་པ་མེད་པ་ཡི། །བསྔོ་བའི་སྟོབས་ཀྱིས་དཔག་ཏུ་མེད་པར་བྱེད། <br />།གཏོར་མགྲོན་རང་གི་རིག་པའི་འཆར་སྒོར་ཤེས། །རིག་བྱ་རིག་བྱེད་གཟུང་འཛིན་སྦུབས་ལས་གྲོལ། <br />།མཆོད་ཡུལ་མཐར་ཐུག་སངས་རྒྱས་ཆོས་ཀྱི་སྐུ། <br />།མཆོད་པའི་མཐར་ཐུག་དེ་ཁོ་ན་ཡིས་མཆོད། <br />།མགྲོན་པོ་རང་ཁྱིམ་བདེ་མོར་སླེབས་པ་བཞིན། །བྱར་མེད་སྤྲོས་བྲལ་དབྱིངས་སུ་འཇོག་པ་འདི། །བཀའ་བརྒྱུད་འདི་པའི་ཆོས་སྤྱོད་རབ་གསལ་ཡིན། །སྒྲུབ་པའི་སྙིང་པོ་འདི་ལ་སྒྲིལ་ནུས་ན། །འཇིག་རྟེན་འཁོར་བའི་ཆོས་དང་མ་འདྲེས་པར། །ཉན་རང་དམན་པའི་རང་འདོད་ལས་གྲོལ་བའི། །སྤྱོད་པ་བསླབ་གསུམ་མཛེས་པའི་སྒྲུབ་རྟགས་ཤིག །རང་གཞན་ཀུན་གྱི་སྣང་ངོར་སྟོན་ནུས་ཤིང་། །དེ་ལས་གཞན་པའི་སྒྲུབ་རྟགས་མེད་ཀྱང་བཟོད། །དེ་ལྟའི་ལྟ་སྤྱོད་རྣམ་པར་དག་པ་ལ། །རྗེས་འཇུག་ཉན་ཐོས་ཐ་དག་འབད་པར་རིགས། <br />།གཞི་པ་ཚིམ་ཚུལ་རྣམ་པ་བཞི་ཡིན་ཏེ། <br />།དང་པོ་བཤམས་མ་ཐག་ནས་ཚིམ་པ་ནི། །མདངས་དང་དྲི་ཙམ་ཁོ་ནས་འཚོ་བའོ། །འདི་སྐབས་སློབ་དཔོན་སྒོམ་པའི་ཞལ་སྔ་ནས། <br />།ཆོས་སྤྱོད་གཏོར་མ་གནད་དུ་འཁྱོལ་བ་ལ། །སྒོམ་ཆེན་ཕོ་གྲུང་མོ་གྲུང་ཞིག་དགོས་ཏེ། །ཕལ་ཆེར་འདྲེ་ཡིས་ཁྱེར་ཞེས་གསུངས་པ་ལྟར། <br />།བཤམས་མ་ཐག་ནས་ཐོ་འཚམ་ཟ་བ་ཡོད། །དེ་ཕྱིར་ཐོག་མའི་བསང་ཆུས་བསྲུང་བ་གཅེས།<br />།བསྔོ་ནས་ཚིམ་པ་མ་བསྔོས་གོང་རོལ་དུ། །མི་ཐོབ་དངོས་གཞིའི་ཆོ་ག་གྲུབ་འཕྲལ་ཐོབ།<br />།བཏང་བས་ཚིམ་པ་སྒོ་ཕྱིའི་སློང་མོ་བཞིན། །ཚོགས་པ་རྣམས་ཀྱིས་འཐོབ་པར་བྱ་བའི་ཕྱིར། །གཙང་སར་དོར་ནས་ཡུད་ཙམ་བསྲུང་བར་བྱ།<br />།རྗེས་ཀྱི་ཚིམ་པ་ལྷག་བཤལ་ཟ་རྣམས་སོ། །དེ་རྗེས་བྱ་ཁྱི་སྤྲང་པོ་ལ་སོགས་པའི། །གཟུགས་ཅན་དབུལ་པོ་རྣམས་ཀྱང་ཚིམ་གྱུར་པས། །དངོས་པོ་གཅིག་གིས་ཚོགས་གསོག་ལན་གཉིས་ནུས།<br />།ལྔ་པ་ཕན་ཡོན་དཔག་མེད་མདོར་བསྡུས་ན། <br />།དགའ་བོ་དུས་མིན་འཆི་བསླུར་གསུངས་པ་ཡི། །རིགས་པ་དེས་ནི་ཚེ་སྒྲུབ་མཆོག་ཏུ་འགྱུར། <br />།བླ་མ་ལྕེ་སྒོམ་པ་ཡི་གསུང་ལས་ཀྱང་། །ང་ཡི་མི་ཚེ་རིང་དུ་ཐུབ་པ་འདི། །གཏོར་མ་བཏང་བའི་བྱིན་རླབས་ཡིན་ཞེས་འབྱུང་། <br />།ཡི་དྭགས་མདངས་ཉམས་མ་ལུས་གསོས་པ་དང་། །ལྷན་ཅིག་སྐྱེས་པའི་ལྷ་རྣམས་མཉེས་བྱས་པས། །མདངས་བཟང་ལང་ཚོ་གཞོན་ཤ་ཆགས་པར་འགྱུར། །གཏོར་མགྲོན་རྣམས་ཀྱིས་རྟག་ཏུ་བསྲུང་བའི་ཕྱིར། <br />།སུས་ཀྱང་གླགས་ལྟའི་བར་གཅོད་བྱ་མི་ནུས། །བཀྲེས་སྐོམ་བསལ་ཞིང་བདུད་རྩི་སྦྱིན་པའི་མཐུས། །ནད་དང་མུ་གེ་སེལ་བའི་སྨན་དུ་འགྱུར། །ལྕེ་སྒོམ་པ་ཡི་གསོལ་རྒྱགས་ཆད་པ་ན། །ཕད་བུ་སྤྲུགས་པའི་ཕྱེ་མས་གཏོར་མ་མཛད། །ཉི་མ་ཕྱེད་ནས་མཆོད་སྟོན་འདུ་བའི་ཚེ། །ཞིང་གི་སོ་ནམ་སྒྲུབ་ལས་ཁེ་ཆེ་ཞིང་། །མྱུར་བའི་བསོད་ནམས་ངོ་མཚར་མི་འདུག་གམ། །ཞེས་སོགས་གོང་མ་དུ་མའི་མྱོང་བ་ཡིས། །མཐོང་ཆོས་འབྲས་བུ་བྱུང་བར་གསུངས་པ་ལྟར། །ལོངས་སྤྱོད་ནོར་སྒྲུབ་འདི་ལས་ཟབ་པ་མེད། <br />།ཀུན་ཁྱབ་སྙིང་རྗེ་ཆེན་པོས་སྦྱིན་བྱས་ཤིང་། །ཆོས་དབྱིངས་འཁོར་གསུམ་དག་པས་བསྔོས་པ་དེས། །ཚངས་དང་འཁོར་ལོས་སྒྱུར་བའི་དཔལ་ཐོབ་སྟེ། །མི་ཟད་ནམ་མཁའི་མཛོད་དང་ལྡན་གྱུར་ཅིང་། <br />།ཡི་དམ་ཆོས་སྐྱོང་ཞི་ཁྲོའི་ལས་ཀུན་གྱི། །སྔོན་དུ་འགྲོ་ཞིང་དངོས་གཞི་སྒྲུབ་པ་དང་། །རྗེས་ནས་མ་ཚང་རྣམས་ཀྱང་ཁ་སྐོང་བས། །ཕྲིན་ལས་རྣམ་བཞི་སྒྲུབ་པའི་ཕོ་ཉ་ཡིན། <br />།སེམས་བསྐྱེད་བཟང་པོས་ཉོན་མོངས་བདུད་འཇོམས་ཤིང་། <br />།སྡུག་བསྔལ་བསལ་བས་ཕུང་པོའི་བདུད་ལས་གྲོལ། <br />།བགེགས་རིགས་ཟློག་པས་ལྷ་ཡི་བདུད་དཔུང་འཇོམས། <br />།འཆི་བ་བསླུ་བས་འཆི་བདག་བདུད་ལས་རྒྱལ། <br />།སྦྱིན་བདག་གཙོ་བོ་ཆེན་པོར་གྱུར་པ་དང་། །མི་མ་ཡིན་པས་གཟི་འོད་སྒྲུབ་པའི་ཕྱིར། །ཀུན་ལས་འཕགས་པའི་གཟི་བརྗིད་འཐོབ་པར་འགྱུར། །པདྨའི་མཚོ་ལ་ངང་པ་འདུ་བ་ལྟར། །དཔག་ཚད་མང་པོའི་མི་མ་ཡིན་རྣམས་འདུ། <br />།ལེན་པོ་གཏོང་པོའི་འགྲོ་བ་གཉིས་ཀ་ཡང་། །ཕྱི་མ་ཡི་དྭགས་འཇིག་རྟེན་རབ་སྤངས་ནས། །མཐོ་རིས་མཛེས་པའི་ལུས་རྟེན་འཐོབ་པར་འགྱུར། <br />།དཀོན་མཆོག་རྣམས་ཀྱིས་བུ་ལྟར་དགོངས་པ་དང་། <br />།རིགས་དྲུག་ཀུན་གྱིས་རྟག་ཏུ་བཀུར་བ་དང་། <br />།མི་མ་ཡིན་རྣམས་ཅི་བཅོལ་ཉན་པ་སོགས། <br />།ཐུན་མོང་དངོས་གྲུབ་འཕྲལ་དུ་ཐོབ་གྱུར་ནས། །མཐར་ཐུག་མཆོག་གི་དངོས་གྲུབ་མྱུར་འཐོབ་པའོ།<br />།དྲུག་པ་ལས་སྦྱོར་རྣམ་གྲངས་བསྟན་པ་ལ། །ཚོགས་གསོག་ལན་འཇལ་འཆི་བསླུ་ནད་པའི་གླུད། །ཟློག་པ་མཐུ་ཡི་ཚུལ་དུ་གཏོང་བ་དྲུག<br />།དང་པོ་སྐྱབས་སེམས་ཕར་ཕྱིན་དྲུག་ལྡན་དང་། །འཁོར་གསུམ་ཡོངས་དག་བསྔོ་བས་རྒྱས་བཏབ་ནས། །ཐ་མ་ཆོས་ཀྱི་སྦྱིན་པས་བསྡུ་བའོ།<br />།གཉིས་པ་གདོན་བགེགས་གནོད་བྱེད་ངོས་བཟུང་ལ། །དེ་དག་མགུ་བའི་ལོངས་སྤྱོད་དུ་བསྔོས་ཏེ། །བླ་མ་དཀོན་མཆོག་གཉིས་ཀའི་དཔང་པོར་གསོལ། །ཆོས་སྐྱོང་ལ་སོགས་གཞན་ལ་ངོ་ཆེན་སྦྲན། །རིགས་དྲུག་ལ་སོགས་འབོད་འོས་མགྲོན་དུ་བྱས། །གནོད་བྱེད་གདོན་བགེགས་ལན་ཆགས་འདེད་མཁན་ཏེ། །གཞི་བདག་རྣམས་ལ་ནད་པ་སྲུངས་ཤིག་བྱ། །སྡེ་བརྒྱད་ཕ་རོལ་དཔུང་གྲོགས་མ་བྱེད་ཅེས། །བཤད་སྦྱང་དྲག་པོའི་སྒོ་ནས་རྩེ་གཅིག་པས། །ཉི་མ་འཆར་ཀ་དག་དང་བསྟུན་ཏེ་གཏོང་།<br />།གསུམ་པ་དགེ་སློང་བཞི་སྡེ་མཆོད་པ་སོགས། །གཞན་ཡང་རིམ་གྲོ་དུ་མ་དང་བསྒྲིགས་ནས། །དགེ་སློང་གཅིག་གིས་གཏོར་མ་གཏོང་བའི་ཚེ། །ནད་པའི་མིང་ནས་ཕྱུང་སྟེ་འདོད་དོན་གསོལ། <br />།བཞི་པ་ངར་གླུད་རེ་རེ་བྱས་ནས་ནི། །ཆེ་གེའི་ཚེ་སྲོག་ཤ་ཁྲག་རིན་གླུད་དུ། །ཁྱེར་ཞེས་ཉི་མ་ནུབ་དང་བསྟུན་ཏེ་གཏང་།<br />།ལྔ་པ་མཐུ་བཟློག་དྲུག་པ་མཐུ་སྒྲུབ་ནི། །དུ་མ་འབྱུང་བ་གཞན་དུ་ཤེས་པར་བྱ། <br />།ནད་པའི་དོན་སོགས་རིམ་གྲོ་ཕལ་ཆེར་ལ། །དགེ་སློང་གཙང་མ་ཚུལ་ཁྲིམས་ལྡན་པ་ཡིས། །སླར་ཡང་བཤགས་བསྡམ་ལ་སོགས་བྱས་ནས་ནི། །སྣམ་སྦྱར་གསོལ་ཏེ་ཐམས་ཅད་རྩེ་གཅིག་གིས། །དགེ་འདུན་འདུན་པ་མཐུན་པས་བཏང་བྱས་ཤིང་། །ཆུ་བོར་དོར་ན་ཕན་ཡོན་ཆེ་བར་གསུངས། <br />།གཞན་ཡང་བསོད་ནམས་གསོག་ན་དཀོན་མཆོག་མཆོད། <br />།ཡི་དྭགས་རྣམས་ལ་སྦྱིན་པ་གཙོ་བོར་འདོན། <br />།བསྟན་པ་བསྲུང་ན་ཡེ་ཤེས་ཆོས་སྐྱོང་དང་། <br />།རྒྱལ་ཁམས་བསྲུང་ན་འཇིག་རྟེན་ཆོས་སྐྱོང་དང་། <br />།ནད་པའི་རིམ་གྲོར་བྲམ་ཟེ་དྲང་སྲོང་དང་། <br />།དོན་རྣམས་བསྒྲུབ་ན་ལྷན་ཅིག་སྐྱེས་པའི་ལྷ། <br />།དགོན་གནས་འཛིན་ན་ས་བདག་གཞི་བདག་དང་། <br />།ཡུལ་ཕྱོགས་བདེ་འདོད་སོ་སོའི་ཡུལ་བདག་དང་། <br />།གནོད་བྱེད་རྦོད་གཏོང་བ༌བཟློག་ན་སྡེ་བརྒྱད་དང་། <br />།ལན་ཆགས་ཤ་འཁོན་སྦྱང་ན་གནོད་བགེགས་དང་། <br />།རིགས་དྲུག་སྤྱི་ལ་ཕམ་ཕབ་ཚུལ་ལ་སོགས། <br />།ཕྲིན་ལས་གཞོལ་ཚུལ་སྐབས་བབ་རིགས་པས་དཔྱད། །དེ་རྣམས་གཞུང་བཞིན་གཏོང་བའི་གཤང་སྦྱར་རོ། <br />།བྱང་སེམས་རང་ཉིད་ཐུབ་པའི་དབང་པོར་སྒོམ། །དེ་ཡི་སྙིང་པོ་བཟླ་བའི་བདག་བསྐྱེད་དང་། <br />།འབྲུ་གསུམ་དང་པོས་མི་གཙང་བ་རྣམས་སྦྱངས། །གཉིས་པ་རིན་ཆེན་སྣོད་དུ་བཅུད་ཀྱི་རྫས། །ལྷ་ཡི་ཞལ་ཟས་རི་རབ་ལྟར་མཐོ་ཞིང་། །བདུད་རྩི་རྒྱ་མཚོ་ལྟ་བུར་འཁྱིལ་བར་བསམ། །གསུམ་པས་དེ་དག་སྟོང་གསུམ་གང་བར་སྤེལ། <br />།དེ་བཞིན་ཤེགས་པ་བཞི་ལ་ཕྱག་འཚལ་ནས། །གཟུངས་སྔགས་ལན་གསུམ་སེ་གོལ་བདུན་གྱིས་འབུལ། །མགྲོན་གྱིས་ཐོབ་ནས་སོ་སོར་གྱེས་པར་བསམ། །བདེན་སྟོབས་བསྔོ་བ་ཆོས་བཤད་མདོར་བསྡུས་ལུགས། <br />།བརྒྱ་རྩའི་རྗེས་དོར་ཏོག་གཅིག་ཆུ་སྦྱིན་བྱ། །མདོ་འདོན་སྨོན་ལམ་བཏབ་ནས་སྤྱོད་ལམ་འཇུག <br />།འཇུར་གེགས་ཏོག་གཅིག་འདི་ཡི་ལོ་རྒྱུས་ནི། །ཉན་ཐོས་མཆོག་གཉིས་ཉིན་གུང་ལྗོངས་རྒྱུ་ཚེ། །ཡི་དྭགས་སྔོ་སྐམ་མིག་དམར་སྐྲ་འཛིངས་ཤིང་། །སྐེ་དང་ཡན་ལག་ཕྲ་ལ་སེན་མོ་ཡིས། །ཁུ་ཚུར་ཐལ་བྱུང་ཕུག་པའི་མི་སྡུག་གཟུགས། །ཁ་ནས་དགོས་ན་མེད་ན་མ་སྦྱིན་ཅིག །སྦྱིན་ནའང་ཆེས་སོ་དེ་ལས་ཕྲིས་ཞེས་པའི། །སྒྲ་ལྔ་སྒྲོག་དང་ཕྲད་ནས་གསོལ་བ་ན། <br />།སྟོན་པས་དེ་ནི་ཆུ་ཙམ་མ་གཏོགས་པས། །གཞན་ལ་འཇུར་གེགས་བྱས་པའི་རྣམ་སྨིན་ཉིད། <br />།དེས་ན་ཆུ་ལ་གཞན་གྱི་དྲི་མེད་པ། །སྦྱིན་ཞིང་ཛྭ་ལ་མི་དཾ་ལ་སོགས་པའི། །སྔགས་བརྗོད་སེ་གོལ་གཅིག་གིས་གཏོང་བར་གསུངས། <br />།དེ་ཕྱིར་ལག་པ་རབ་ཏུ་བཀྲུས་བྱས་ནས། །སེན་མོའི་བར་གྱི་རྩམ་དྲིའང་མེད་པར་བྱ། <br />།དགེ་བཤེས་སྤྱན་སྔ་པས་ནི་ཆུ་རྐྱང་ལས། །ཟན་ཡང་དུམ་ཙམ་འཇུག་པ་ཕལ་ཆེར་ལ། །གཟིགས་ཞེས་མྱོང་བས་གསུངས་པའི་མན་ངག་ལུགས། །སེ་གོལ་གཉིས་སོགས་མང་ན་སྐྲག་པ་སྐྱེ། །དེས་ན་སེ་གོལ་ཏོག་ཅིག་ཁོ་ན་བྱ། <br />།ཕན་ཡོན་ཚེ་རིང་ནད་ཉུང་བྱད་གཏད་བཟློག །བར་གཅོད་ཀུན་གྱིས་མི་ཚུགས་ཁྱད་པར་དུ། <br />།ལོངས་སྤྱོད་ནོར་གྱི་དངོས་གྲུབ་འབྱུང་བ་དང་། <br />།ཡི་ག་འཆུས་དང་སྙིང་མི་དགའ་བ་སེལ། <br />།མདངས་དང་ལྡན་ཞིང་གཞན་ལ་སྤེལ་བྱས་ན། <br />།ཡི་དྭགས་རྒྱུད་ལས་གྲོལ་ནས་འཚང་རྒྱའོ། <br />།འཇིག་རྟེན་ཡི་དྭགས་ཀུན་ལ་བྱིན་པས་ནི། །འཇུར་གེགས་གཅིག་ལ་བྱིན་པ་བསོད་ནམས་ཆེ། །ཅི་ཕྱིར་ཞེན་འདིས་ནི་ཆུ་མ་གཏོགས། །གཞན་གྱི་སྦྱིན་པ་ཀུན་གྱི་གོ་བཀག་ཅིང་། <br />།རང་བློས་བཅད་ནས་ཆུ་ཡང་མ་བྱིན་པས། །གཙང་པོའང་གྲེ་བའི་སྦུབས་སུ་སྐམ་ནུས་པའི། <br />།མི་བཟད་སྡུག་བསྔལ་འབར་བ་དེ་ལ་ནི། །ཁ་ཟས་གཞན་རྣམས་བྱིན་ཀྱང་མི་འཐོབ་པས། །སེམས་རྒྱུད་རབ་ཏུ་ཞི་བའི་སྔགས་བརྗོད་པས། །ཆུ་སྦྱིན་ཁོ་ན་ཕན་ཡོན་ཆེ་བར་གསུངས། <br />།སུ་རུ་པ་ནི་ངེས་པ་བདུན་ལྡན་ཏེ། <br />།ཟས་སྐོམ་ཅུང་ཟད་ཙམ་ཡང་མ་སྤྱད་གོང་། །གཏོང་བའི་དུས་དང་ལན་ཅིག་ཆག་ན་ཡང་། །བརྒྱལ་ཞིང་བོགས་པའི་སྡུག་བསྔལ་ཆེར་ཡོད་པས། །ཆག་མེད་གཏོང་བ་དུས་ཀྱི་ངེས་པ་ཡིན། <br />།མི་སྒྲ་ཁྱི་སྒྲ་སོགས་ལ་སྐྲག་པ་དང་། །མི་གཙང་དྲི་སོགས་ཚོར་བ་རག་པའི་ཕྱིར། །དབེན་ཞིང་གཙང་བ་གནས་ཀྱི་ངེས་པ་ཡིན། <br />།ལྕགས་སྣོད་མཚོན་ཆའི་རིགས་སུ་མཐོང་འགྱུར་བས། །རྫའམ་རིན་ཆེན་སྣོད་ཀྱི་ངེས་པ་ཡིན། <br />།ཡི་དྭགས་རྣམས་ཀྱི་གཏོར་མའི་སྣོད་ལ་ནི། །ལྕགས་ཀྱི་གཟེར་བུ་ཙམ་ཡང་མེད་པར་དགོས། །སྐྱུག་བྲོའི་གནས་སུ་མཐོང་ནས་མི་ལེན་པས། །གཙང་བར་གནས་པ་གང་ཟག་ངེས་པ་ཡིན། <br />།གཙང་མའི་ཆུ་ཟན་རྫས་ཀྱི་ངེས་པ་ཡིན། <br />།རང་ཉིད་ཐུབ་པའམ་གཟུགས་མཛེས་གང་རུང་བསྒོམ། །སྣོད་ནི་རིན་ཆེན་ཟན་ནི་ལྷ་ཡི་ཟས། །ཆུ་ནི་བདུད་རྩིའི་རྒྱ་མཚོར་མོས་པ་དང་། །ཡི་དྭགས་ཀུན་ལ་བྱམས་པས་ཁྱབ་བྱས་ནས། །ཁ་ཟས་རྒྱལ་ཕམ་མེད་ཅིང་གནོད་མེད་པར། །སྦྱིན་པ་ལྷག་བསམ་དག་པའི་ངེས་པ་ཡིན། <br />།གཟུངས་སྔགས་ལན་བདུན་ལག་གཡོན་སེ་གོལ་གསུམ། །དེ་ཡིས་བསྔོས་ནས་སྔགས་ཚན་ཕྱི་མ་ནི། །མི་དན་ཁ་ཅིག་སྟོན་མོས་མགུ་བྱས་ཀྱང་། །སླར་ཡང་གླགས་ལྟ་འཚེ་བར་བྱེད་པ་ཡོད། །དེ་ལྟའི་ཡི་དྭགས་གནོད་འཚེ་བསྲུང་ཆེད་ཡིན། །གཙང་སར་དོར་ཞིང་ཆོས་སྦྱིན་བསྔོ་བ་བྱ། <br />།ཆོ་ག་ངེས་པ་དེ་ལྟའི་ཕན་ཡོན་ནི། །ཡི་དྭགས་ཀུན་ལ་འབྲས་ཆེན་བྲེ་ཆེན་རེ། །སོ་སོར་བྱིན་པའི་བསོད་ནམས་འཐོབ་འགྱུར་ཞིང་། །སྐྱེ་བར་ཉམས་ཆུང་མི་འགྱུར་དབུལ་མི་འགྱུར། །སྟོབས་ཆེ་གཟུགས་བཟང་མཐོང་ན་དགའ་བ་དང་། །ཕྱུག་ཅིང་ལོངས་སྤྱོད་ཕུན་ཚོགས་ཚེ་རིང་ཞིང་། །ནད་མེད་བྱང་ཆུབ་མྱུར་དུ་འཐོབ་པ་དང་། །ཤི་འཕོས་བདེ་བ་ཅན་དུ་སྐྱེ་བར་གསུངས། <br />།ཟས་ཀྱི་སྔོན་དུ་ཆངས་བུ་སྦྱིན་པ་ནི། །སྲོག་དང་ནོར་གྱི་བླུད་དུ་འགྱུར་བ་སྟེ། <br />།སྔོན་ཚེ་འཕྲོག་མ་ལྔ་བརྒྱའི་བུར་བཅས་པས། །ཉིན་ཞག་རེ་ལ་མི་ཡི་འགྲོ་བ་ནི། །ལྔ་བརྒྱ་ཕྲག་གསུམ་ཟོས་པར་གྱུར་པའི་ཚེ། །སྟོན་པས་དེ་ཡི་བུ་གཅིག་གསོལ་ལྷུང་དུ། །སྦས་པ་རྫུ་འཕྲུལ་དུ་མས་བཙལ་གྱུར་ཀྱང་། །མ་རྙེད་ཤིན་ཏུ་དུབ་ཅིང་སྡུག་བསྔལ་བས། །སྟོན་པ་ཉིད་ལ་སྐྱབས་སུ་གསོལ་བར་བྱས། །དེ་ལ་ཕྱག་སོར་ལྔ་ཡི་རྗེས་ལྡན་གྱི། །ཆངས་བུ་བསྩལ་ནས་ཐམས་ཅད་ཚིམ་པར་མཛད། །ཀུན་གྱིས་སྲོག་གཅོད་སྤོང་བར་ཁས་བླངས་ཤིང་། <br />།འཁོར་རྣམས་བཞི་ཡིས་ཆངས་བུ་སྦྱིན་པ་དང་། །དེ་དག་ཀུན་ཀྱང་འཕྲོག་མས་སྲུང་བར་གདམས། །དེ་ལྟར་ཆངས་བུའི་སྔགས་སམ་ཁ་འབར་སྔགས། <br />།གང་ཡང་རུང་བས་བྱིན་གྱིས་བརླབས་ནས་སྦྱིན། །རང་ཉིད་ཟས་ཀྱི་བྱ་བར་འཇུག་པའི་ཚེ། །ལུས་ལ་སྲིན་བུ་བརྒྱད་ཁྲི་སྙེད་ཡོད་པ། །ད་ལྟ་འདི་དག་ཟང་ཟིང་གིས་བསྡུས་ནས། །མྱུར་བར་ཆོས་ཀྱི་བདུད་རྩིས་བསྡུ་བར་བྱ། །སྙམ་དུ་ལྷག་པའི་བསམ་པ་བསྐྱེད་པ་དང་། །སྒོ་གསུམ་དམ་པའི་ཆོས་ལ་བཀོལ་བའི་ཕྱིར། །ཟས་སྐོམ་གླ་རྔན་ཚུལ་དུ་སྦྱིན་པར་བསམ། <br />།གཞན་ཡང་བསྐྱེད་རྫོགས་གང་རུང་དང་ལྡན་པས། །ཟས་ཀྱི་རྣལ་འབྱོར་ནང་གི་སྦྱིན་སྲེག་སོགས། །ཆོ་གའི་ཚུལ་མང་མདོར་བསྡུས་ཙམ་དུ་ན། <br />།བདག་ཉིད་འཇིག་རྟེན་དབང་པོའི་སྐུར་བསྒོམ་ཞིང་། <br />།ཟས་རྣམས་ཡི་གེ་གསུམ་གྱིས་བདུད་རྩིར་བསྒྱུར། <br />།དེ་ཡིས་མཆོད་པར་མོས་ལ་རོལ་པར་བྱ། <br />།ཉུང་ན་དགེ་ལ་སྦྱོར་བར་མི་ནུས་ཤིང་། <br />།མངས་ན་གཉིད་སོགས་ཉེས་པ་འཕེལ་འགྱུར་བས། <br />།རན་པར་བྱ་ཞིང་ལྷག་མའི་ཆངས་བུ་རྣམས། །འབྱུང་པོར་བསྔོས་ནས་སྨོན་ལམ་གདབ་པར་བྱ། <br />།གཞན་ཡང་སྤྱི་གཏོར་དཀར་གསུམ་མངར་གསུམ་ནི། །མགྲོན་རིགས་མཆོག་དམན་ཀུན་ལ་སྦྱིན་དུ་རུང་། <br />།ནང་གི་གཏོར་མ་འདོད་པའི་ཡོན་ཏན་ལྔ། །རིགས་དྲུག་འགྲོ་བ་རྣམས་ལ་སྦྱིན་པར་བྱ། <br />།གསང་བ་ཤ་ལྔ་བདུད་རྩི་ལྔ་སྦྱར་ནི། །ཡི་དམ་མཁའ་འགྲོ་ཆོས་སྐྱོང་རྣམས་ལ་འབུལ། <br />།དེ་ཁོ་ན་ཉིད་རང་ལུས་མཆོད་སྦྱིན་ནི། །གནོད་བྱེད་ལན་ཆགས་སྡིག་སྒྲིབ་སྦྱོང་བར་བྱེད། <br />།མདོར་ན་སྣང་སྲིད་གཏོར་མ་མ་གྱུར་མེད། །ཕྱི་སྣོད་འཇིག་རྟེན་གཏོར་གཞོང་ཆེན་པོ་རུ། །ནང་བཅུད་སེམས་ཅན་ཐམས་ཅད་གཏོར་མར་བསྔོ། །བདག་འཛིན་སྤུ་རྩེ་ཙམ་ཡང་མ་འཁྲིས་པར། །ཐམས་ཅད་བཏང་བ་གཏོར་མ་ཆེན་པོའོ། <br />།དེ་ལྟར་གཏོར་མའི་དེ་ཉིད་འདི་བརྗོད་པས། <br />།བདག་གཞན་འགྲོ་བ་སེམས་ཅན་མ་ལུས་པ། <br />།ཤེས་བྱ་ཀུན་གྱི་དེ་ཉིད་རིག་གྱུར་ནས། <br />།རྡོ་རྗེ་འཛིན་དབང་འཐོབ་པའི་བཀའ་དྲིན་སྩོལ། <br />།ཞེས་པ་འདི་ནི་དགེ་སློང་སྤོང་བ་པ་ཀརྨ་སྲུང་གིས་སྐུལ་པ་ལྟར། ཞྭ་དམར་ཅོད་པཎ་འཛིན་པའི་མཚན་གྱི་བྱིན་རླབས་དང་ལྡན་པ་དཀོན་མཆོག་འབངས་ཀྱིས་བྲིས་པའོ། <br /><br />༈ ཡོངས་གྲགས་སྣོད་ཚམ་བཅུ་གཅིག་བཤམས་མོད་ཀྱང་། །འདིར་ནི་གཏོར་སྣོད་བཅུ་གཉིས་རིམ་པར་བཤམས། །གཙང་མའི་ཟན་ལ་ཆ་མཉམ་གསུམ་དུ་བགོས། །དང་པོའི་ཆ་ནས་ཕུང་ཀྱི་ཞལ་ས་འབུལ། །ལྷག་ངེས་གཏོར་སྡེར་དང་པོར་བླ་མ་དང་། །ཡི་དམ་སྲས་བཅས་རྣམས་ལ་མཆོད་པ་འབུལ། །ལྷག་མའི་ཆ་གཉིས་དུམ་བུ་བཞིར་བགོ་ཞིང་། །བཞི་གསུམ་བཅུ་གཉིས་དེ་རྣམས་རེ་རེ་ལ། །རིལ་བུ་བཅུ་བཅུ་བྱས་ན་སྣོད་གཉིས་པ་། །རིལ་བུ་ཉི་ཤུ་བླུག་པས་ཆོས་སྐྱོང་མཆོད། །དེ་ལྷག་སྣོད་བཅུད་རིལ་བུ་བཅུ་བཅུ་བླུག །དཀོན་མཆོག་མཆོད་དུས་གཟུངས་སྔགས་ཉེར་གཅིག་བཟླ། །ཆོས་སྐྱོང་རྣམས་ལ་གཟུངས་སྔགས་བཅུ་བཞི་བཟླ། །ལྷག་མ་རྣམས་ལ་མཚན་བཞི་སྒྲོག་པ་དང་། །གཟུངས་སྔགས་བདུན་བདུན་བཟླ་ཞིང་རེ་རེའི་མཐར། །ལག་གཡས་མཆོག་སྦྱིན་བརྐྱངས་ནས་སེ་གོལ་བརྡབ། །རིམ་པས་བཤགས་ཤིང་ཆུ་གཙང་ཡིད་དགས་བཤལ། །གཤེགས་གསོལ་སྤྲོ་ན་ཀུན་གྱི་མཐར་བྱའོ། <br />།གཏོར་མ་ཆ་བཅུའི་ལྷན་ཐབས་ལ་སྐྱབས་འགྲོ་སེམས་སྐྱེད་ནི་རྒྱས་པའམ་བསྡུ་ན། སངས་རྒྱས་ཆོས་ཚོགས་སོགས། དེའི་རྗེས་སུ་དོན་བཞི་སྟེ། བདག་སྒྲུབ་པ། རྫས་སྒྲུབ་པ། མགྲོན་སྒྲུབ་པ། མགྲོན་ལ་འབུལ་བའི་རིམ་པའོ། <br />།བདག་སྒྲུབ་པ་ནི་ཐུགས་རྗེ་ཆེན་པོ་བསྒོམ་པའོ། <br />།རྫས་སྒྲུག་པ་ནི། དཀར་གསུམ་མངར་གསུམ་ལ་སོགས་ཤ་ཆང་སྒོག་གསུམ་མ་འདྲེས་པ་དང་། གཏོར་མའི་རྒྱུ་རྩམ་པ་ལ་སོགས་པའི་རིན་པོ་ཆེའི་སྣོད་དམ་གང་ཡང་རུང་བའི་སྣོད་དུ་བཅའ་ཞིང་། སྟེགས་ཀྱི་ཁར་བཞག་ནས་གཞུང་བཞིན་བསྒོམ་པའོ། <br />།མགྲོན་སྒྲུབ་པ་ནི། བསྡུས་པར་ན། བླ་མ་བརྒྱུད་པར་བཅས་རྣམས་དང་། །ཞེས་སོགས་མཆོད་སྦྱིན་གྱི་ཡུལ་བརྗོད་པའི་སྐབས་སུ་སོ་སོར་མདུན་གྱི་ནམ་མཁའ་དང་ས་གཞིར་བྱོན་པར་བསམ་པ་ཉིད་དོ། །རྒྱས་པར་ན། གཏོར་མ་ཡེ་ཤེས་བདུད་རྩིར་གྱུར། །ཞེས་པའི་རྗེས་སུ། ཧཱུྃ། བཞེངས་ཤིག་བཞེངས་ཤིག་སྟོབས་བཅུ་མངའ་བའི་ལྷ། །ཞེས་ཤློ་ཀ་གཅིག་གི་མཐར་བཛྲ་ས་མ་ཛཿ ཞེས་པས་སྤྱན་དྲངས། བཅོམ་ལྡན་འདིར་ནི་བྱོན་པ་ལེགས། །ཞེས་ཤློ་ཀ་གཉིས་ཀྱི་མཐར། ཨོཾ་སརྦ་ཏ་ཐཱ་ག་ཏ་པདྨ་ཀ་མ་ལ་ཡེ་སྟྭཾ་ཞེས་བཞུགས་སུ་གསོལ། དེ་ནས་ཡན་ལག་བདུན་པ་རྒྱས་བསྡུས་གང་རུང་ཞིག་བྱ། <br />བཞི་པ་མགྲོན་ལ་འབུལ་བའི་རིམ་པ་ནི། བླ་མར་བརྒྱུད་པ་བཅས་རྣམས་དང་། །ཞེས་སོགས་སོ། །ཆ་གཉིས་པ་ཆོས་སྐྱོང་སྲུང་མ་མན་ཆད་ལ་སྤྱན་འདྲེན་བཞུགས་གསོལ་སོགས་སྦྱོར་མི་དགོས་ཤིང་། སོ་སོའི་མཚན་ནས་བརྗོད་པའི་ཚེ་སྐད་ཅིག་གིས་མདུན་དུ་བྱོན་པར་བསམ་པ་ཉིད་དོ། །དེ་ནས་མཐར་གཤེགས་གསོལ་སྤྲོ་ན། དམ་པ་ཉིད་ནི་འཐོབ་པར་ཤོག །ཅེས་པའི་རྗེས་སུ། ཨོཾ། ཁྱེད་ཀྱིས་སེམས་ཅན་དོན་ཀུན་མཛད། །ནས་བཛྲ་མུཿས་ཡེ་ཤེས་པ་དང་། མཆོད་སྦྱིན་གནས་འདིར་གང་ལྷགས་པ་ནས། སརྦ་བྷཱུ་ཏ་གཙྪས། འཇིག་རྟེན་པ་རྣམས་གཤེགས་སུ་གསོལ། <br />ཞེས་པ་ཞྭ་དམར་པ་ལྔ་པས་སོ།། །།སྦར་འདི་དཔལ་སྤུངས་སྒྲུབ་ཁང་དུ་བླ་མིང་བཀྲ་ཤིས་ཚེ་རིང་ནས་བསྐྲུན་པའོ།། །།དགེའོ། །མངྒལཾ། །</span>
+<span class="main_text">༄༅། །གཏོར་མའི་དེ་ཉིད་བདུད་རྩིའི་དགའ་སྟོན་ཞེས་བྱ་བ་བཞུགས།།<br /><br />།སྟོན་པ་བདེ་བར་གཤེགས་ལ་གུས་བཏུད་དེ། །བསྟན་པ་དམ་པའི་ཆོས་ཀྱི་ཉམས་ལེན་ལས། །དགེ་འདུན་རྣམས་ཀྱི་ཐུན་མཚམས་ཆོས་སྤྱོད་ཀྱི། །རིམ་པ་གཏོར་མའི་གོ་དོན་ཕྱོགས་ཙམ་བརྗོད། <br />།བ་ལིཾ་ཞེས་བྱ་སྟོབས་དང་ནུས་པ་ལ། །འཇུག་སྟེ་རང་གཞན་རྒྱུད་ལ་འཆི་མེད་ཀྱི། །སྟོབས་ཆེན་ཐོབ་ནས་བདུད་བཞི་འཇོམས་ནུས་པའི། །དམ་རྫས་པཉྩ་ཨ་མྲྀ་ཏ་ཉིད་ཡིན། <br />།བྷོ་ཊའི་བརྡ་ལས་གྲངས་པའི་སྦྲ་བཤད་ན། །ཆགས་མེད་ཡོངས་སུ་གཏོང་བས་གཏོར་ཞེས་བྱ། །སྡང་མེད་བུ་ལྟར་བརྩེ་བས་མར་བརྗོད་དེ། །ཉེ་རིང་མེད་པའི་བཏང་སྙོམས་གཉིས་ཀའི་གྲོགས། <br />།ལྟ་བ་གནས་ལུགས་སེམས་ཀྱི་གཏོར་མ་ནི། །ཆོས་སྐུ་སྐྱེ་བ་མེད་པའི་རང་ཞལ་ལ། །སྣ་ཚོགས་སྣང་བ་མ་ལུས་ཅིག་ཅར་བབ། །རོ་གཅིག་ཆོས་ཀྱི་སྐུ་ཡི་འཚོ་གཞེས་བརྟན། <br />།སྒོམ་པ་རྣལ་འབྱོར་ལུས་ཀྱི་གཏོར་མ་འདི། །ཡེ་ཤེས་གཏུམ་མོ་སྒྲོན་མེ་ལྔ་སྦར་ཞིང་། །ཐུགས་རྗེའི་ལྕགས་ཀྱུ་བདུད་རྩི་ལྔ་བཞུས་པས། །ཕུང་ཁམས་རྒྱལ་བ་རིགས་ལྔའི་འཚོ་གཞེས་བརྟན། <br />།སྤྱོད་པ་བསྐྱེད་རིམ་ཕྱི་ཡི་གཏོར་མ་ནི། །གོང་དུ་ལྷག་པའི་ལྷ་ལ་མཆོད་པ་དང་། །འོག་ཏུ་འབྱུང་པོའི་ཚོགས་ལ་སྦྱིན་པ་དང་། །མཉམ་པར་རྡོ་རྗེའི་སྤུན་ཚོགས་རོལ་བའི་རྫས། <br />།རྣལ་འབྱོར་གཏོར་མར་བརྩོན་པར་མི་བྱེད་ན། །དེ་ཡི་བར་ཆད་སེལ་བར་མི་ནུས་ཞེས། །ཕྲིན་ལས་དོན་ཡོད་གྲུབ་པའི་དམ་ཚིག་ཏུ། །རྡོ་རྗེ་འཆང་གིས་བཅས་པར་མཛད་པ་ཉིད། །དམ་ཚིག་པ་དང་ཡེ་ཤེས་སེམས་དཔའི་ལྷ། །གཅིག་པུའི་ཉམས་ཀྱིས་དུ་མའི་གར་མཛད་པ། །ཡབ་ཡུམ་སྲས་དང་བློན་པོ་འཁོར་གྱི་ཚོགས། །ཕོ་ཉ་བྲན་གཡོག་སྔོན་དུ་རོལ་བ་དང་། །ཕྱི་ནས་འབྲང་བ་ལ་སོགས་བསམ་མི་ཁྱབ། །དེ་དག་དགྱིས་ཤིང་ཚིམ་པར་བྱེད་པའོ། <br />།དེ་ལྟའི་གཏོར་མའི་ཚུལ་ལ་མཐའ་ཡས་པས། །བསྡུ་ན་རང་གཞན་རྒྱུད་བསྡུས་ལུས་ལོངས་སྤྱོད། །བདག་པོས་བཟུང་དང་མ་བཟུང་གང་ཡང་རུང་། །དངོས་འབྱོར་ཡིད་སྤྲུལ་ཆེ་འབྲིང་ཆུང་ངུ་ཡིས། །དམིགས་པའི་རྟེན་གྱི་ཡོ་བྱད་གང་རུང་ཞིག །ལྷ་རུ་བསྐྱེད་དང་གཞལ་མེད་ཁང་དུ་བསྐྱེད། །ཤ་ལྔ་བདུད་རྩི་ལྔ་རུ་བསྐྱེད་པ་དང་། །ཟག་བཅས་ཟག་མེད་བདུད་རྩིའི་རྒྱ་མཚོ་དང་། །ལས་བཞི་སྒྲུབ་པའི་ཕོ་ཉར་བསྐྱེད་པ་དང་། །ལུས་སྲོག་ནོར་གྱི་གླུད་དུ་གཏོང་བ་དང་། །དགྲ་དང་འདྲེ་ཡི་ལིངྒར་བསྐྱེད་པ་དང་། །ཤ་ཁྲག་དམར་གྱི་གཏོར་མར་བསྐྱེད་པ་སོགས། <br />།གཞན་ཡང་གཏོར་མགྲོན་རང་རང་མགུ་བྱེད་པའི། །གཟུགས་སྒྲ་དྲི་རོ་རེག་བྱ་ཡིད་ལོངས་སྤྱོད། །སོ་སོའི་བསམ་པ་ཇི་བཞིན་སྤྲུལ་པར་བཤད། །ཀུན་ཀྱང་འཕྲལ་སྣང་སྒྱུ་མའི་རྟེན་འབྲེལ་ཡིན། །རྟེན་འབྲེལ་རང་བཞིན་གང་དུའང་མ་གྲུབ་པས། །སྙིང་པོ་མེད་པས་སྙིང་པོ་ལེན་ཚུལ་གྱིས། །ཐབས་ཤེས་ལྡན་ན་བྱང་ཆུབ་ལམ་དུ་འགྲོ། <br />།དེ་ལ་བྱ་བའི་རྒྱུད་ཀྱི་གཟུངས་སྔགས་ནས། །ཁ་འབར་མ་སོགས་གནོད་སྦྱིན་ཚིམ་བྱའི་ཕྱིར། །གཏོར་མའི་ཆོ་ག་ཞལ་ནས་གསུངས་པ་དང་། །བྱིན་གྱིས་རླབས་དང་རྗེས་སུ་གནང་པ་ཡི། །སྔགས་དང་ཕྱག་རྒྱ་ཏིང་འཛིན་རིམ་པ་བཞིན། །ཚུལ་ལྡན་སྒྲུབ་ན་ཕན་ཡོན་བསམ་ལས་འདས། <br />།དེ་ལ་བརྟེན་ནས་རུང་མཐུན་སྦྱར་བ་ཡི། །བླ་མ་བརྒྱུད་པའི་མན་ངག་ལས་འོངས་པ། །གཏོར་མ་གཏོང་ཚུལ་དུ་མ་བྱུང་གྱུར་ཏེ། །ཐམས་ཅད་སྐྱེས་བུའི་ཉེར་མཁོ་ཉིད་དུ་ངེས། <br />།འདིར་ནི་ཀུན་མཁྱེན་རང་བྱུང་རྡོ་རྗེ་ཡིས། །སྣ་ཚོགས་བེའུ་བུམ་ཞེས་བྱར་གསུངས་པ་དང་། །དོན་ལྡན་ཞབས་ཀྱིས་ཆོས་སྤྱོད་རབ་གསལ་དུ། །གསུངས་པ་གང་རུང་གཙོ་བོར་བྱ་དགོས་ལ། <br />།ཐོག་མར་ཁུངས་དང་གླེང་གཞི་ལོ་རྒྱུས་ནི། །ཡི་དྭགས་ཁ་ནས་མེ་འབར་སྐྱབས་མཛད་དང་། །ཁ་འབར་མ་ནས་དབུགས་དབྱུང་ནས་གསུངས་ཏེ། །དེ་ཡང་ཚེ་དང་ལྡན་པ་ཀུན་དགའ་བོ། །དབེན་པར་སྤྱོད་ཚེ་ཡི་དྭགས་མི་སྡུག་པ། །ཁ་ནས་མེ་འབར་ཞིག་གིས་འདི་སྐད་ཅེས། །ཁྱོད་ནི་ཉིན་ཞག་བདུན་ན་དུས་བྱས་ཏེ། །ཡི་དྭགས་གནས་སུ་སྐྱེ་བར་འགྱུར་ཞེས་གསུངས། །དེ་ལ་སྐྱོབ་ཕྱིར་སྟོན་པས་འདི་སྐད་ཅེས། །ང་སྔོན་བྲམ་ཟེ་ཞིག་ཏུ་གྱུར་པ་ན། །བྱང་ཆུབ་སེམས་དཔའ་སྤྱན་རས་གཟིགས་དབང་དང་། །དེ་བཞིན་གཤེགས་པ་དབང་ཕྱུག་ཡོན་ཏན་ལ། །གཟི་བརྗིད་ཚད་མེད་དབང་དུ་གྱུར་པ་ཡི། །འོད་ཟེར་རྣམ་པར་རྒྱལ་བའི་ཤུགས་ཞེས་པ། །གཟུངས་སྔགས་ཟབ་མོ་འདི་ནི་ཐོས་གྱུར་ནས། །ཡི་དྭགས་རྣམས་ལ་གཏོར་མ་བྱིན་བྱས་པས། །ཐམས་ཅད་མཐོ་རིས་ལྷ་རུ་སྐྱེས་གྱུར་ཏོ། །དགའ་བོ་ཁྱོད་ཀྱིས་ཟས་གཙང་ཆུ་སྦྱར་བ། །སྔགས་ཀྱིས་བསྔོས་ནས་གཙང་བར་བླུགས་བྱས་ན། །ཚེ་དང་བསོད་ནམས་རྣམ་པར་འཕེལ་འགྱུར་ཞིང། <br />།ཁ་འབར་མས་གཙོས་ཡི་དྭགས་གངྒཱའི་ཀླུང་། །བྱེ་བ་ཁྲག་ཁྲིག་འབུམ་ཕྲག་དུ་མ་ཡིས། །བྱེ་མ་སྙེད་ཀྱི་གྲངས་དང་མཉམ་པ་ལ། །མ་ག་དྷ་ཡི་བྲེ་ཆེན་བདུན་བདུན་གྱི། །བཟའ་བཏུང་བྱིན་པར་འགྱུར་ཞིང་དེ་ཐོབ་ནས། །ཚིམ་ཞིང་རངས་ཏེ་ལྷ་ཡུལ་སྐྱེ་བར་འགྱུར། <br />།དེ་བཞིན་དགེ་སློང་དགེ་བསྙེན་ཕ་མ་འམ། །གཞན་ཡང་རུང་སྟེ་གཟུངས་སྔགས་འདི་བཟླས་ནས། །ཡི་དྭགས་རྣམས་ལ་ཁ་ཟས་བྱིན་གྱུར་ན། །བསོད་ནམས་ཚད་མེད་ཡོངས་སུ་རྫོགས་འགྱུར་ཏེ། །ཚེ་རིང་མདངས་དང་སྟོབས་རྣམས་རབ་ཏུ་འཕེལ། །མི་མ་ཡིན་དང་གནོད་སྦྱིན་སྲིན་པོ་དང་། །ཡི་དྭགས་མ་རུངས་ཀུན་གྱིས་འཚེ་མི་ནུས། །དེ་ལ་གཟི་བརྗིད་ཚད་མེད་ལྡན་པར་འགྱུར། <br />།གང་དག་ལྷ་ཡི་དྲང་སྲོང་བྲམ་ཟེ་ལ། །སྔགས་འདིས་ཁ་ཟས་གཙང་མ་བྱིན་རླབས་ནས། །འབབ་ཆུ་གཙང་མའི་ནང་དུ་དོར་བྱས་ན། །གངྒཱའི་ཀླུང་གི་བྱེ་མ་ཁྲག་ཁྲིག་འབུམ། །དཔག་མེད་བྱེ་མ་རྙེད་ཀྱི་རྡུལ་ཕྲན་གྲངས། །དྲང་སྲོང་བྲམ་ཟེའི་ཚོགས་ལ་ཅི་འདོད་ཀྱི། །མཆོད་པར་འགྱུར་ཞིང་ཀུན་གྱིས་དུས་གཅིག་ཏུ། །འདོད་དོན་འགྲུབ་པའི་སྨོན་ལམ་འདེབས་པར་འགྱུར། <br />།གལ་ཏེ་དཀོན་མཆོག་གསུམ་ལ་མཆོད་འདོད་ཀྱང་། །སྤོས་དང་མེ་ཏོག་ཞལ་ཟས་ལ་སོགས་པར། །ཉི་ཤུ་རྩ་གཅིག་སྔགས་ནས་ཕུལ་བྱས་ན། །དེ་དག་ལྷ་རྫས་དམ་པའི་ངོ་མཚར་དང་། །ལྡན་ཞིང་སྤྱན་སྔར་རྒྱུན་ཆད་མེད་པར་འགྱུར། <br />།དེ་ལྟ་བས་ན་ཁྱོད་ཀྱིས་འདི་ཟུངས་ལ། །རིགས་ཀྱི་བུ་དང་བུ་མོ་གཞན་ལའང་སྟོན། །སྦྱིན་པའི་ཕ་རོལ་ཕྱིན་པ་རྫོགས་འགྱུར་ཞེས། །བཅོམ་ལྡན་འདས་ཀྱིས་དེ་སྐད་བཀའ་བསྩལ་ཏོ། <br />།དེ་ལྟར་སྤྱན་རས་གཟིགས་དང་སྟོན་པ་མཆོག །ཉེ་གནས་གསང་བའི་བདག་པོ་ཀུན་དགའ་བོ། །དགེ་སློང་ཀུན་དགའ་མོ་དང་གྲགས་འཛིན་མ། །ཉེ་གནས་མ་དང་འཕགས་པ་དགྲ་བཅོམ་དང་། །རྣལ་འབྱོར་དབང་པོ་ཨཱ་ནནྡ་བཛྲ། །རྡོ་རྗེ་གདན་པ་གསེར་གླིང་ཇོ་བོ་རྗེ། །དགེ་བཤེས་སྟོན་པ་སྐུ་མཆེད་གསུམ་ལ་སོགས། །བཀའ་གདམས་བརྒྱུད་པའི་སྲོལ་ལས་བྱུང་བར་གྱུར། །ལོ་པཎ་རྣམས་ཀྱིས་སྔར་ནས་བསྒྱུར་ཟིན་ཀྱང་། །ཕྱག་ལེན་དར་བ་ཇོ་བོའི་བཀའ་དྲིན་ཏེ། །བྱང་ཆུབ་སེམས་ཀྱི་ཕྱག་རྗེས་གཅིག་ཡིན་ནོ། <br />།དེ་ལས་བྱུང་བ་ཆོ་གའི་རིམ་པ་ལ། །བདག་སྒྲུབ་རྫས་སྒྲུབ་གཏོར་མགྲོན་སྒྲུབ་པ་སྟེ། །སྒྲུབ་པ་གསུམ་དང་འབུལ་བའི་རིམ་པ་ཡི། །ལས་སྦྱར་གཅིག་སྟེ་དོན་ཚན་རྣམ་པ་བཞི། <br />།དོན་ཚན་དང་པོ་རྟེན་གྱི་གང་ཟག་ནི། །སོ་སོར་ཐར་པའི་སྡོམ་གནས་གང་ཡང་རུང་། །ཚུལ་ཁྲིམས་འཆལ་པས་རིགས་སྔགས་མི་འགྲུབ་ཅིང་། །ཚུལ་ལྡན་སྨོན་ལམ་འགྲུབ་པར་གསུངས་པས་ན། <br />།སུམ་ལྡན་རྡོ་རྗེ་འཛིན་པ་མཆོག་ཏུ་རིགས། །སྡོམ་ལྡན་མིན་ཀྱང་དད་པ་དོན་གཉེར་དང་། །བརྩོན་པའི་སྤྲོ་བ་ཡོད་ན་སུས་ཀྱང་རུང་། །ཆག་ན་རེ་བ་འབྲས་མེད་ཉེས་པ་ཡོད། །དེ་ཕྱིར་ཆག་མེད་གཏོང་བ་ཤིན་ཏུ་གཅེས། །བསམ་པ་བྱང་ཆུབ་སེམས་ཀྱི་སྙིང་རྗེ་དང་། །རྡོ་རྗེ་ཐེག་པའི་བསྐྱེད་རིམ་གསལ་དགོས་ལ། །སྤྱོད་ལམ་ཁྲུས་དང་གཙང་སྦྲར་བཅས་པ་དང་། །ཤ་ཆང་སྒོག་བཙོང་ལ་སོགས་སྤོང་བར་གསུངས། <br />།བྱ་རྒྱུད་ཙམ་པོར་བདག་བསྐྱེད་མེད་མོད་ཀྱང་། །ཁྱད་པར་ཅན་ལ་བདག་བསྐྱེད་གསུངས་པས་ན། །ཐུབ་པའི་དབང་པོའམ་སྤྱན་རས་གཟིགས་སུ་བསྒོམ། <br />།དོན་ཚན་གཉིས་པར་གང་དུ་གཏོང་བའི་སྣོད། །རྭ་དང་ཐོད་པ་བསེ་སོགས་མི་གཙང་རིགས། །ཆུང་དང་ཁ་ཆག་ཞབས་རྡོལ་དྲི་མ་ཅན། །ལྕགས་ཀྱི་སྣོད་དང་ལ་ཆ་ཏི་ཚ་ཅན། །འཁར་བའི་རིགས་ཀྱི་སྣོད་རྣམས་རབ་སྤངས་ནས། །གསེར་དངུལ་ཟངས་དམར་དུང་དང་ཉ་ལྕིབས་དང་། །རྫ་ཤིང་དཀར་ཡོལ་ལ་སོགས་འབྱོར་དང་བསྟུན། །རྣམ་པ་རྒྱ་ཆེ་ཁ་དབྱེས་ཆེ་ཆུང་ཚད། །ཇི་ལྟར་ཆེ་ཞིང་བསོད་ནམས་ཆེ་བར་གསུངས། <br />།ནང་གི་བཅུད་ནི་ཤ་ཆང་ལ་ཕུག་དང་། །དུག་གི་རིགས་དང་སྡིག་དང་འདྲེས་པའི་ཟས། །སྤངས་ནས་ཟས་མཆོག་དཀར་གསུམ་མངར་གསུམ་དང་། །ཐ་མ་ཟན་དང་ཆུ་ལ་བྱ་བ་སྟེ། <br />།ཇོ་བོས་བོད་ལ་ཕྱུག་པོ་མི་ཡོང་བ། །གཏོར་ཟན་སླ་དང་མཐེབ་སྐྱུས་ལན་ཞེས་གསུངས། <br />།དྲི་མ་ཅན་ལ་གཏོར་མགྲོན་མི་འཁོར་བས། །དེ་གསུམ་སྤངས་ཤིང་གྲུབ་ཐོབ་ལྕེ་སྒོམ་པས། །འབྲུ་དང་ཆུ་གཙང་ཁོ་ན་སྦྱར་བ་ནི། །ལག་ཏུ་ལེན་པར་བདེ་བ་ཡིན་ཡང་གསུངས། <br />།སློབ་དཔོན་ཨ་བྷྱས་སྔགས་ཚར་བདུན་བརྗོད་ཅིང་། །ལག་གཡས་བརྐྱང་བའི་སོར་མོ་ལྔ་པོ་ལས། །བདུད་རྩི་བབས་པས་ཆུ་དང་བཅས་པའི་ཟན། །ཉག་མ་རེ་ཡིས་མ་ག་དྷ་ཡི་བྲེའི། །ཁལ་ལྔ་ཙམ་དེའི་བཟའ་བར་གྱུར་པ་དེས། །ཚིམ་བར་བསམ་ཞིང་སེ་གོལ་ལན་གསུམ་བརྡབ། <br />།ཅེས་གསུངས་དེས་ན་སྐབས་དང་རིགས་པས་དཔྱད། <br />།ཟན་གྱི་གར་སླ་རང་གི་ཟ་རུང་ཙམ། །ཆེ་ཆུང་ཚད་ནི་ཆེ་བ་རི་རབ་ཙམ། །རྒྱ་མཚོ་ཙམ་མམ་ཆུང་བ་ནས་འབྲུ་ཙམ། །ཟན་ཁམ་གཅིག་དང་ཆུ་ཕུལ་གང་ཡང་རུང་། །རང་གི་འབྱོར་པ་དག་དང་བསྟུན་ཏེ་བྱ། <br />།གྲུབ་ཐོབ་ཆེན་པོ་ཀརྨ་པཀྵི་ཡིས། །ཕྲིན་ལས་ཐམས་ཅད་གཏོར་མར་རག་ལས་པས། །ཉང་ཉུང་ཆང་ཆུང་ཙམ་གྱིས་མི་རུང་སྟེ། །རི་ལྟར་སྤུངས་ཤིང་མཚོ་ལྟར་བསྐྱིལ་དགོས་གསུངས། <br />།གཏོར་མའི་གྲུབ་ཐོབ་བླ་མ་ལྕེ་སྒོམ་པས། །ནས་འབྲུ་ཟན་ཁམ་ཙམ་ལའང་བརྟེན་ནས་ནི། །བརྒྱ་རྩ་ཆག་མེད་ཐུགས་དམ་མཛད་པ་དང་། །སྒྲུབ་རྒྱགས་ཞོ་གཅིག་ཙམ་ལས་མེད་དུས་ཀྱང། །གཏོར་མ་འབུམ་ཚོའི་བསྙེན་པ་མཛད་པ་ན། །འཕྲལ་དུ་ལོངས་སྤྱོད་དཔག་ཏུ་མེད་པ་འཕེལ། །གཞི་བདག་དམ་ལ་ཐོགས་པ་བྱུང་ཞེས་གསུངས། <br />།དམིགས་པ་གཙོ་ཟེར་དངོས་པོ་ཁྱད་བསད་ནས། །སྣོད་མེད་སྐམ་གཏོར་ལ་སོགས་མི་རུང་སྟེ། <br />།ཆུ་ནི་སྐོམ་བ་སེལ་བའི་བདུད་རྩིའི་རྒྱུན། །ཟན་ནི་བཀྲེས་པ་སེལ་བ་སྲོག་གི་ཟུངས། །སྣོད་ནི་དེ་དག་བརྟེན་པའི་སྣོད་ཡིན་པས། །རྒྱུ་ཚོགས་གྲངས་ཚང་རྟེན་འབྲེལ་འགྲིགས་པ་དགོས། <br />།ཡི་དྭགས་རྣམས་ཀྱིས་ཇི་ཙམ་ཐོབ་པ་ནི། །མ་ག་དྷ་ཡི་བྲེ་ཚད་བདུན་བདུན་ཏེ། །དེ་ཡི་བྲེ་རེར་གསེར་བྲེའི་ཁལ་བཞི་དང་། །བྲེ་བཞིར་གྲོ་པར་འདུག་ཅེས་གྲགས་པར་སྣང་། །དེ་ནི་སྔགས་མཐུ་ཁོ་ནས་འཕེལ་བའི་ནུས། །ཏིང་འཛིང་མཐུས་ནི་བསམ་མི་ཁྱབ་ཏུ་འཕེལ།<br />།དོན་ཚམ་གསུམ་པར་དཀོན་མཆོག་སྲི་ཞུའི་མགྲོན། །མགོན་པོ་ཡོན་ཏན་རིགས་དྲུག་སྙིང་རྗེའི་མགྲོན། །ཤ་འཁོན་ལན་ཆགས་མགྲོན་བཞིར་གྲགས་པ་ལས། <br />།དང་པོ་གཉིས་ནི་སྤྱན་འདྲེན་བྱས་ན་འབྱོན། <br />།མ་བྱས་མི་འབྱོན་དྲངས་ཀྱང་མི་འབྱོན་པ། །རིགས་དྲུག་ནང་ནས་གནོད་སྦྱིན་གཞོང་ཐོགས་དང་། །ལག་རིང་རི་རྩེ་རྐན་དང་རྟག་མྱོས་རྣམས། །རྒྱ་མཚོ་ལུད་དང་རི་རབ་འགྱེལ་དོགས་དང་། །རི་རབ་རྩེ་ནས་གླིང་གཞི་བསྲུང་བ་དང་། །ཤིན་ཏུ་མྱོས་པར་གྱུར་པ་དེ་རྣམས་བཞིའོ། <br />།སྤྱན་འདྲེན་བྱེད་དུ་མི་རུང་མགྲོན་བཞི་ནི། །ས་བདག་སྟོབས་ཆེན་ཤྲཱི་པ་ཏྲ་གཉིས། །ཧང་པཎ་ཀླུ་དང་ཡི་དྭགས་གཏེར་སྲུང་བཞི། །གཞན་དུ་ཕྱིན་ན་ས་གཞི་གཡོ་བ་དང་། །ནད་རྐྱལ་ཁ་ལུད་མཐོང་བའི་དུག་ཡོད་དང་། །གཏེར་བུམ་བོར་ན་མུ་གེ་འབྱུང་ཕྱིར་རོ། <br />།སྤྱན་འདྲེན་མ་བྱས་ན་ཡང་འབྱོན་པ་ནི། །ཡི་དྭགས་རྣམས་ནི་ཤ་ལ་སྦྲང་མ་བཞིན། །བཤམས་མ་ཐག་ཏུ་འདུ་ཞིང་འཚོགས་པར་བྱེད། <br />།དབྱེ་སྒོ་འདིར་ནི་མཆོད་ཡུལ་སྦྱིན་ཡུལ་གཉིས། །དེ་ལས་ཕྱེ་ན་བསམ་གྱིས་མི་ཁྱབ་ཀྱང་། །བརྒྱུད་པའི་ཕྱག་ལེན་བཅུ་གཉིས་དབྱེར་མཛད་དེ། <br />།དང་པོ་བླ་མ་ཡི་དམ་ལྷ་ཚོགས་དང་། <br />།གཉིས་པ་ཡེ་ཤེས་པ་ཡི་ཆོས་སྐྱོང་དང་། <br />།གསུམ་པ་འཇིག་རྟེན་པ་ཡི་ཆོས་སྐྱོང་དང་།<br />།བཞི་པ་བྲམ་ཟེ་དྲང་སྲོང་གྲུབ་པ་དང་། <br />།ལྔ་པ་ལྷན་སྐྱེས་ལྷ་རྣམས་མཆོད་ཡུལ་ཡིན། <br />།ལྷན་སྐྱེས་བདུད་དང་དྲུག་པ་རིས་དྲུག་དང་། <br />།བདུན་པ་ཀླུ་དང་བརྒྱད་པ་ཡི་དྭགས་དང་། <br />།དགུ་པ་ལན་ཆགས་བཅུ་པ་གཞི་བདག་སྤྱི། <br />།བཅུ་གཅིག་བྱེ་བྲག་ཡུལ་གྱི་གཞི་བདག་དང་། <br />།བཅུ་གཉིས་ཁས་ཉེན་དབང་ཆུང་མ་ཐོབ་ཅིང་། <br />།གློ་བུར་ལྷགས་པ་རྣམས་ཏེ་སྦྱིན་ཡུལ་ཡིན། <br />།དང་པོའི་ཁོངས་སུ་ཇོ་བོ་དཀོན་མཆོག་གསུམ། །རྒྱལ་བ་རྒྱལ་སྲས་ཉན་རང་འཕགས་པ་སོགས། །སྐྱབས་གནས་ཀུན་བསྡུ་དེ་དག་མཆོད་པའི་དགེས། །ཐུགས་རྗེའི་ལྕགས་ཀྱུས་རྗེས་སུ་འཛིན་པར་འགྱུར།<br />།གཉིས་པ་ཡེ་ཤེས་ཆོས་སྐྱོང་མཆོད་པས་ནི། །སྔོན་གྱི་ཐུགས་དམ་བཞིན་ཏུ་ཕྲིན་ལས་མཛད། <br />།གསུམ་པ་འཇིག་རྟེན་པ་ཡི་ཆོས་སྐྱོང་ནི། །སྟོན་པའི་སྤྱན་སྔར་སྡོམ་པ་སེམས་བསྐྱེད་ནོད། །སངས་རྒྱས་བསྟན་པ་བསྲུང་བར་ཁས་བླངས་ཤིང་། །འཇིག་རྟེན་སྐྱོང་ཕྱིར་འཇིག་རྟེན་ཚུལ་བཟུང་བའི། །ལྷ་ཆེན་བརྒྱད་དང་ཀླུ་བརྒྱད་གཟའ་ཆེན་བརྒྱད། །གནོད་སྦྱིན་བརྒྱད་དང་ཕྱོགས་སྐྱོང་རྒྱལ་ཆེན་བཞི། །རྒྱུ་སྐར་ཉེར་བརྒྱད་ཚངས་པ་བརྒྱ་བྱིན་སོགས། །གཙང་རིས་དཔལ་མགོན་རྣམས་ལ་མཆོད་བྱས་པས། །མི་མཇེད་འཇིག་རྟེན་ཀུན་ཏུ་བདེ་ལེགས་འབྱུང་། <br />།བཞི་པ་ལྷ་ཀླུ་མི་ཡི་བྲམ་ཟེ་དང་། །དྲང་སྲོང་ཁྲིམས་ལྡན་དཀའ་ཐུབ་རིགས་སྔགས་འཆང་། །ཕན་དང་གནོད་པའི་དམོད་འདོར་བདེན་ཚིག་གྲུབ། །སྤྱན་དང་མངོན་ཤེས་རིག་གནས་བཅོ་བརྒྱད་རིག །སྨོན་ལམ་འདེབས་པ་དཔག་ཏུ་མེད་པ་དང་། །ནད་པར་ཕན་འདོགས་སྨན་གྱི་བྲམ་ཟེ་དྲུག །བདུད་རྩི་སྨན་གྱི་དྲང་སྲོང་བཅོ་ལྔ་སོགས། །མཆོད་པས་ནད་ཡམས་སེལ་ཞིང་སྨོན་ལམ་འགྲུབ། <br />།ལྔ་པ་ལྷན་ཅིག་སྐྱེས་པའི་ལྷ་བདུད་ནི། །འཚོ་བའི་ལྷ་དང་སྲུང་སྐྱོབ་འགྲོགས་པའི་ལྷ། །འགོ་བའི་ལྷ་ལྔ་དེ་དག་རིམ་པ་བཞིན། །ཡུལ་ལྷ་སྲོག་ལྷ་དགྲ་ལྷ་མོ་ལྷ་དང་། །ཕོ་ལྷ་ཞེས་བྱ་ལུས་ཀྱི་གཟི་བརྗིད་དང་། །སེམས་ཀྱི་དཔའ་སྟོབས་མཐའ་དག་སྦྱིན་བྱེད་པའོ། །བསོད་ནམས་ཅན་ལ་ལྷན་སྐྱེས་ལྷ་མང་ཡང་། །བསོད་ཆུང་རྣམས་ལ་འདྲེ་བདུད་མང་དུ་འཁོར། །གཉིས་ཀར་མཆོད་སྦྱིན་བྱས་པས་གྲོགས་སུ་འགྱུར།<br />།དྲུག་པ་རིགས་དྲུག་ཇི་སྙེད་ལ་སྦྱིན་པའི། །ལྷག་བསམ་མཐུ་ཡིས་དེ་སྙེད་བསོད་ནམས་འཐོབ། །ཀུན་ཀྱང་རང་གི་གདུལ་བྱའི་ཞིང་དུ་འགྱུར། །ཁྱད་པར་གཏོར་མ་མི་ལ་བསྡོ་བ་ནི། །དགེ་བཤེས་འཆད་ཀ་བ་ཡི་ཁྱད་ཆོས་གསུངས། །དགྲ་ལ་བསྔོས་ན་དེ་ཡི་གནོད་པ་ཞི། །བན་བོན་བསྔོས་ན་བྱད་ཁ་ཕུར་ཁ་བཟློག །ཡུལ་མིར་བསྔོས་ན་ཀུན་གྱིས་བྱམས་པར་འགྱུར། <br />།བདུན་པ་ཀླུ་གཉན་ས་བདག་ལ་སོགས་ནི། །བཀའ་གཉན་ཀོ་ལོང་དམ་པའི་དབང་གིས་ན། །གཏོར་མ་སྒོས་སུ་བསྔོ་བར་བྱས་པ་ནི། །ཐོ་ཅོ་མི་གཙང་གྲིབ་སོགས་ཕོག་ཐུག་རྣམས། །བཟོད་ཅིང་གནོད་སེམས་ཞི་བའི་དགོས་པ་ཡོད།<br />།བརྒྱད་པ་ཡི་དྭགས་རྣམས་ནི་ཁྱད་པར་དུ། །སྟོན་པས་འདི་ཉིད་ཁོ་ནའི་དོན་དུ་བཅས། །ཡི་དྭགས་རིགས་ལ་བྱེ་བ་སུམ་ཅུ་གཉིས། །སྔོན་ལས་སེར་སྣ་འཇུར་གེགས་བྱས་པ་དང་། །དགེ་འདུན་འདུ་བའི་སྒོ་ལ་སྤྱད་པ་དང་། །དཀོན་མཆོག་དཀོར་ལ་འབགས་པའི་ཉེས་པ་ཡིས། །ད་ལྟ་བཀྲེས་སྐོམ་ཚ་གྲང་ངལ་དུབ་དང་། །གཞན་གྱིས་རྡེག་འཚོག་རྐུ་འཕྲོག་ཏུ་མས་གཟིར། <br />།དཔེར་ན་ཇོ་བོ་རྗེ་ཡིས་གཟིགས་པ་ན། །ལྦ་བར་རང་ལུས་བཏགས་པས་འགུལ་མི་ནུས། །དེ་ལ་བྲད་ནས་རྣག་ཁྲག་ཟ་བ་དང་། <br />།སློབ་དཔོན་ཛེ་ཏཱ་རི་ཡིས་གཟིགས་པ་ལ། །བཅུ་གཉིས་ལོ་ལ་ཟས་སྐོམ་བསྒུགས་ན་ཡང་། །ལུད་པའི་བཅུ་ཆ་མ་གཏོགས་མ་ཐོབ་སོགས། །མི་སྡུག་ཉམ་ཐག་དུ་མ་ཡོད་པར་གསུངས། <br />།དེ་དག་རྣམས་ལ་ནན་ཏན་གྱིས་བསྔོས་ན། །བཀྲེས་སྐོམ་བསལ་བའི་ཕན་ཡོན་དཔག་མེད་འབྱུང་། །ཕྱུག་ཅིང་འགྲངས་ལ་ཁ་ཟས་མི་དགོས་ལྟར། །མགྲོན་གྱི་ནང་ནས་ཡི་དྭགས་གཙོ་བོ་ཡིན། <br />།དགུ་པ་ལན་ཆགས་གདོན་ཆེན་བཅོ་བརྒྱད་དང་། །བགེགས་རིགས་སྟོང་ཕྲག་བརྒྱད་ཅུ་གློ་བུར་གྱི། །ཡེ་འགྲོགས་སུམ་བརྒྱ་དྲུག་ཅུ་ལ་སོགས་པ། །གནོད་བྱེད་གདུག་རྩུབ་ནག་ཕྱོགས་འབྱུང་པོའི་རིགས། །བོད་ཀྱི་ལྷ་འདྲེ་མུ་བཙན་རྒྱལ་པོ་དང་། །ཐེའུ་རང་མ་མོ་བདུད་སྲིན་གཟའ་དང་ཀླུ། །གནོད་སྦྱིན་སྨན་མོ་གཤིན་རྗེར་གྲགས་པ་སོགས། །ཁྱད་པར་གཅིག་སྲོག་གཅིག་གིས་བཅད་པ་དང་། །གཅིག་ནོར་གཅིག་གིས་ཕྲོགས་པ་ལ་སོགས་པའི། །བུ་ལོན་ཤ་འཁོན་ཞུགས་པ་ཐམས་ཅད་ལ། །བསྔོས་པས་ཕན་ཚུན་གནོད་སེམས་ཞི་བར་འགྱུར།<br />།བཅུ་པ་འཛམ་བུ་གླིང་གི་གཞི་ཡི་བདག །ཡུལ་བདག་གནས་བདག་ཅེས་གྲགས་<span class="tibetan_small">མེ་དཔུང་བསྣམས་པ་</span>མེ་ཡི་ལྟ། །གསལ་བའི་འོད་ཟེར་ཆུ་བདག་<span class="tibetan_small">སྦྲུལ་ཞགས་བསྣམས་པ་</span>ཝ་རུ་ཎ། །<span class="tibetan_small">སྦུད་པ་བསྣམས་པ་</span>རླུང་ལྷ་བཱཡ་བེ་བྱེ་རླུང་གི་བདག །<span class="tibetan_small">འཁོར་ལོ་བསྣམས་པ་ལག་པ་</span>ཆེན་པོ་གཏེར་བདག་<span class="tibetan_small">རིན་པོ་ཆེའི་བུམ་བསྣམས་པ་</span>ནོར་རྒྱུན་མ། །རིལ་གནས་པ་<span class="tibetan_small">རི་རབ་བསྣམས་པ་</span>བརྟན་པའི་བློ་གྲོས་དང་། །ནགས་ཀྱི་ལྷ་མོ་<span class="tibetan_small">རྨ་བྱ་བསྣམས་པ་</span>རྨ་བྱའི་མདངས་ལྡན་མ། །<span class="tibetan_small">ཤིང་ཏོག་བསྣམས་པ་</span>ཤིང་གི་ལྷ་མོ་ཀུན་ནས་འོད་ཟེར་དང་། །<span class="tibetan_small">སྦྲང་རྩི་བསྣམས་པ་</span>རྩི་ཐོགས་ལྷ་མོ་གྲུབ་པའི་བློ་གྲོས་སོགས། །ཁྱད་པར་བོད་ཁམས་བརྟན་སྐྱོང་འཁོར་བཅས་ལ། །བསྔོས་པས་ཡུལ་ཀུན་བཀྲ་ཤིས་བྱིན་ཆགས་ཤིང་། །ལོ་ཕྱུག་རྟག་ཏུ་ལེགས་པའི་དགོས་པ་ཡོད།<br />།བཅུ་གཅིག་རང་ཉིད་གང་དུ་གནས་པ་དེར། །རྟག་ཏུ་གཉུག་མར་གནས་པའི་གཞི་བདག་རིགས། །ཚོང་དུས་ཆོས་རེ་སྐྱེ་བོའི་འདུ་འཚོགས་ས། །དགེ་འདུན་རྣམས་ཀྱི་ཀུན་དགའ་ར་བའི་ལྷ། །<span class="tibetan_small">རིན་ཆེན་འབར་བ་བསྣམས་པ་</span>ཐུགས་རྗེ་ཀུན་ཏུ་སྣང་བའི་བློ་གྲོས་དང་། །ཁྱིམ་གྱི་ཁྱིམ་ལྷ་<span class="tibetan_small">རིན་པོ་ཆེ་བསྣམས་པ་</span>ཀུན་ཏུ་སྣང་བ་སོགས། །གཞན་ཡང་འདི་ན་འདི་གནས་ཞེས་གྲགས་པ། །དེ་ལ་བསྔོས་པས་ཕྱག་དོག་གདུག་རྩུབ་ཞི། །གནས་པོ་གཞིན་དུ་སྟོངས་གྲོགས་རོགས་དན་བྱེད།<br />།གཅུ་གཉིས་གློ་བུར་ལྷགས་པའི་ཡི་དྭགས་རིགས། །དཔེར་ན་སྟོན་མོ་ཆེན་པོ་བྱས་གྱུར་ཀྱང་། །བསོད་ཆུང་ཁ་ཅིག་རྗེས་ནས་ལུས་པ་ལྟར། །སྐལ་ཆད་རྣམས་ལ་ལྷག་མ་ཆ་བརྒྱད་བྱིན། །རེ་བ་བཞིན་དུ་སྟོང་ལོག་མེད་པར་འགྱུར། <br />།དོན་ཚན་བཞི་པ་འབུལ་བའི་རིམ་པ་ལ། །དུས་གནས་དམ་ཚིག་ཆོ་ག་བྱ་བ་དངོས། །ཚིམ་ཚུལ་ཕན་ཡོན་ལས་སྦྱོར་རྣམ་གྲངས་སོ།<br />།དང་པོ་ཉི་ཤར་བཀྲ་ཤིས་ཕུན་སུམ་ཚོགས། །ཟས་ཀྱི་དྲི་ལ་འགའ་ཞིག་སྐྲག་པའི་ཕྱིར། །ཁ་ཟས་མ་ཟས་གོང་དུ་གཏོང་པའང་གསུངས། །བྲམ་ཟེའི་རིགས་འགའ་ཕྱི་དྲོ་མི་ཟ་བས། །སྔ་དྲོ་ལེགས་ཞེས་ལྕེ་སྒོམ་པ་ཡིས་གསུངས། །ཕྱི་དྲོ་ཉི་མའི་གྲིབ་ཆུང་ཉིལ་བ་ན། །ཡི་དྭགས་བཟའ་བཏུང་འཚོལ་བས་དེར་ཡང་རུང་། །འབྱུང་པོ་ཕལ་ཆེར་མཚན་མོ་རྒྱུ་བས་ན། །མཚན་མོ་བཏང་བས་ཕྲིན་ལས་མྱུར་འགྲུབ་བྱེད། <br />།མདོར་ན་མི་ལྟོགས་རྣམས་ལ་ཁ་ཟས་བཞིན། །ནམ་དུའང་རུང་ཞེས་ཇོ་བོ་རྗེ་ཡིས་གསུངས། <br />།གཏོང་བའི་དུས་གནས་སྔར་ལས་མ་ཡོལ་བྱ། །གལ་ཏེ་ཡོལ་ན་ཅུང་ཟད་སྔ་བ་ལེགས། །ཐོག་མ་གང་དུ་བཏང་བའི་ས་ཡུལ་དེར། །སྐོར་གཅིག་ངེས་པར་འཚོགས་པར་འདུག་ཅེས་གསུངས།<br />།གཉིས་པ་དམ་ཚིག་གཏོར་སྟེགས་མ་བྱས་ན། །མི་ཆེན་ལྕོག་རྩེ་མེད་བཞིན་བརྙས་པ་དང་། །རྒྱུ་འགྲུལ་གཞན་གྱིས་ཞར་ལ་འཁྱེར་བའང་སྲིད། །དབུལ་པོ་བླུག་སྣོད་མེད་པར་སྦྱིན་པ་བཞིན། །སྣོད་མེད་བརྙས་དང་ཆེད་གཉེར་མེད་པར་འགྱུར། །གཙང་སར་བཏང་ཞིང་དོར་པ་མ་བྱས་ན། །འབགས་བཙོག་དྲི་མས་ཟས་དེ་དུག་ཏུ་འགྱུར། །ཆུ་མེད་སྐམ་གྱི་ས་བོན་ལྟར་འགྱུར་བས། །སྟོན་པས་ཆུ་དང་བཅས་ཏེ་གཏོང་བར་གསུངས། །མུན་པའམ་གཞན་ཡང་མི་མཐོང་སར་བཤམས་ན། །འོལ་ཚོད་མུན་ནང་མདའ་འཕངས་ཉིད་འགྱུར་བས། །སྣང་བ་དང་བཅས་རང་གིས་མཐོང་སར་བཤམས། །གཏོར་སྣོད་ཡོ་ན་ཡི་དྭགས་བློ་མི་བདེ། །རྒྱུ་དེས་རང་བློ་ཀྱོག་པའི་སྐྱོན་འབྱུང་ཞིང་། །གཏོར་སྣོད་འབྲེལ་ན་རྩོད་པ་འབྱུང་བའི་ཕྱིར། །ཕན་ཚུན་མ་རེག་ཙམ་དུ་དྲང་པོར་བཤམས། །འཇུངས་པ་རྣམས་ཀྱི་ཡི་ག་མི་གང་ཞིང་། །འབོ་ཞིང་ལུད་པའང་དེ་ཡིས་འཐོབ་འགྱུར་བས། །རབ་ཏུ་ཁེངས་ཤིང་ལུད་པ་ཙམ་དུ་གཏོང་། །སྦྱིན་གྲབས་བྱས་ཤིང་མ་བྱིན་ལྟ་བུ་ཡིས། །གཤིས་ངན་འཚིག་ནས་སྟོང་ལོག་བྱེད་སྲིད་པས། །གཏོར་མ་རན་པར་བསྒུལ་བསྐྱོད་མི་བྱ་ཞིང་། །གལ་ཏེ་བསྒུལ་ན་དེ་མ་ཐག་ཏུ་གཏོང་། །ལུས་ངག་ཙམ་ལ་འབྲས་བུ་མི་འབྱུང་བས། །མ་ཡེངས་སེམས་ཀྱི་དམིགས་འདུན་དྲག་ཏུ་བྱ། །སྟོན་མོ་བཤམས་ནས་གསོལ་བརྡ་མ་སྤྲད་བཞིན། །ནམ་ཟའི་དུས་དང་གང་འཐོབ་མི་ཤེས་པས། །གཏོང་དུས་ངེས་པར་མཚམས་སྦྱོར་བརྡ་སྤྲོད་བྱེད། །སྔ་མའི་ལྷག་མས་འབགས་བཙོག་འབྱུང་བའི་ཕྱིར། །གཏོར་སྣོད་བཤལ་ཞིང་བཀྲུས་ཏེ་གཙང་བར་བྱ། །ཟན་དང་བཀྲུ་བཤལ་བསྲེས་ན་མི་རུང་ལྟར། །བཤལ་ཆུ་ལོགས་སུ་བྱས་ནས་གཙང་སར་དབོ། །དེ་ཡང་བཟའ་བཏུང་བླུག་ཏུ་རེ་བ་དང་། །ཡིད་དུ་མི་འོང་རྟེན་འབྲེལ་འཆུག་པའི་ཕྱིར། །སྣོད་སྤྱད་སྟོང་པ་ཙ་རུ་མི་བཞག་གོ།<br />།གསུམ་པ་ཆོ་གར་སྦྱོར་དངོས་རྗེས་གསུམ་ལས། <br />།ཐོག་མར་སྐྱབས་འགྲོ་སེམས་བསྐྱེད་རྒྱས་པའམ། །བསྡུ་ན་སངས་རྒྱས་ཆོས་ཚོགས་ཁོ་ན་སྟེ། <br />།འདི་ལྟའི་ཚིགས་བཅད་རེ་རེའི་བཀའ་དྲིན་ཡང་། །བོད་ཁམས་ཀུན་གྱིས་ཁུར་ཡང་མི་ཐེག་ཅེས། །དགེ་བཤེས་སྤྱན་སྔ་པ་ཡི་གསུང་ལས་གྲགས། <br />།ལྕེ་སྒོམ་པས་ཀྱང་འདི་ཉིད་གལ་ཆེ་བས། །ང་ཡིས་སྣོད་རེར་སེམས་བསྐྱེད་རེ་བྱས་གསུངས། <br />།དོན་དམ་སེམས་བསྐྱེད་སྟོང་པ་ཉིད་སྒོམ་ཞིང་། །དེ་ལས་སྙིང་རྗེས་གཟུགས་སྐུར་ལྡང་ཚུལ་གྱིས། །བདག་བསྐྱེད་སྒོམ་ཞིང་གཏོར་མགྲོན་མདུན་བསྐྱེད་རྣམས། །སོ་སོར་སྤྱན་འདྲེན་ཞུ་ཞིང་མདུན་དུ་དགུག<br />།དངོས་གཞི་སྔགས་དང་དམིགས་པ་ཕྱག་རྒྱ་ཡིན། <br />།སྔགས་ཀྱི་ནུས་པ་བསམ་གྱིས་མི་ཁྱབ་སྟེ། །དཔེར་ན་བསྟོད་སྨད་སྙན་དང་མི་སྙན་ལས། །སེམས་ལ་བདེ་སྡུག་བསྐྱེད་པའི་ནུས་ཡོད་བཞིན། །ཁྱད་པར་སྟོན་པས་བྱིན་གྱིས་བརླབས་པས་ན། །ཕན་ཡོན་འབྱུང་བར་ངེས་ཤེས་བསྐྱེད་དེ་འབད། །དམིགས་པ་ཆོས་ཅན་སྣང་ཆ་ཀུན་རྫོབ་དང་། །དེ་ཡི་ཆོས་ཉིད་སྟོང་པ་དོན་དམ་བདེན། །དོན་དམ་དམིགས་པ་མེད་པའི་དམིགས་པ་སྟེ། །སྔོན་ཚེ་རྗེ་བཙུན་ཆེན་པོ་སྒམ་པོ་བས། <br />།ཏིང་འཛིན་ངང་ནས་ཆུ་སྦྱིན་མཛད་པ་བཞིན། །ཀུན་རྫོབ་ཆོས་ནི་སེམས་ཀྱིས་བཏགས་པ་ཙམ། །རྒྱུ་མཚན་དེ་ཕྱིར་ཅིར་ཡང་བསྒྱུར་རུང་བས། །དམིགས་པ་རྣོན་པོ་རྣལ་འབྱོར་མཚོན་ཆར་གྲགས། <br />།འོན་ཀྱང་ཆགས་ཤིང་ཞེན་པའི་དངོས་འཛིན་གྱི། །བྱ་བྱེད་ཇི་ལྟར་བཟང་ཡང་འཁོར་བའི་རྒྱུ། <br />།སྒྱུ་མ་མཁན་པོ་རང་གིས་སྤྲུལ་པ་ཡི། །རྟ་གླང་སོགས་ལ་ཆགས་འཛིན་མེད་ལྟར་སྤྱོད། །དེས་ནི་ཟག་པ་མེད་པའི་ཚོགས་རྫོགས་ནས། །དམིགས་གཏད་མཚན་མ་ཀུན་ལས་གྲོལ་བར་འགྱུར། །ཟབ་མོའི་དེ་ཉིད་དེ་ལྟར་རབ་ཤེས་པའི། །རྣལ་འབྱོར་བ་དེས་གཏོར་མའི་དེ་ཉིད་རིག <br />།ཕྱག་རྒྱ་ཟུང་འཇུག་རྣལ་འབྱོར་རྩེ་གཅིག་དོན། །སེམས་ཀྱི་བསམ་པ་མཚོན་པའི་ལུས་ཀྱི་བརྡ། །མཆོག་སྦྱིན་སེ་གོལ་ལ་སོགས་ཕྱག་ལེན་བཞིན།<br />།སྔགས་ཚན་དང་པོས་མཆོད་གཏོར་གདོན་བགེགས་བསལ། །གཉིས་པས་རང་བཞིན་རྣམ་དག་དྲན་བྱེད་ཅིང་། །གསུམ་པ་འབྲུ་གསུམ་གཏོར་མའི་དེ་ཉིད་ཅེས། <br />།རིན་ཆེན་སྣོད་མཆོག་ཡིད་དུ་འོང་བའི་ནང་། །སངས་རྒྱས་ཀུན་གྱི་སྐུ་གསུང་ཐུགས་རང་བཞིན། །ཟག་མེད་ཡེ་ཤེས་བདུད་རྩིར་བྱིན་བརླབ་སྟེ། <br />།ཡིག་གསུམ་དང་པོས་བསྐྱེད་པའི་ས་བོན་དང་། <br />།གཉིས་པས་ཟག་མེད་བདུད་རྩིར་བྱིན་གྱིས་བརླབ། <br />།ཡང་ན་འབྲུ་གསུམ་དང་པོས་ཉེས་སྐྱོན་སྦྱོང་། <br />།གཉིས་པས་སྣོད་བཅུད་ཕུན་སུམ་ཚོགས་པར་བསྒྱུར། <br />།གསུམ་པས་ཟད་མེད་རྒྱ་ཆེར་སྤེལ་བ་ཡི། <br />།བྱིན་རླབས་དགུ་ཕྲུགས་ཞེས་བྱ་བཞེད་པའང་ཡོད།<br />།བཞི་པ་ཁ་འབར་མ་ཡི་གཟུངས་སྔགས་དངོས། །དེ་ནི་བདུད་རྩི་འཐོབ་པར་བྱེད་པའི་སྔགས། <br />།དེ་ཡང་བླ་མ་ཡི་དམ་ཆོས་སྐྱོང་དང་། །ཟག་པ་མེད་པའི་མཆོད་སྤྲིན་རྒྱ་མཚོ་དང་། །གཞན་དག་རྣམས་ལ་ངོ་བོ་བདུད་རྩི་ཉིད། །རྣམ་པ་སོ་སོའི་ཡིད་བཞིན་རོ་བརྒྱ་པའི། །བཟའ་དང་བཏུང་བའི་ལོངས་སྤྱོད་དུ་མ་དང་། །ལྷ་ཡི་ཞལ་ཟས་ཡིད་འོང་རྒྱན་ལྡན་པ། །ཁ་དོག་དྲི་རོ་རིག་བྱ་དམ་པའི་དངོས། །འབྲུ་འབྲས་ལོ་ཏོག་མེ་ཏོག་བདུག་སྤོས་དྲི། །སྣང་གསལ་ཞལ་ཟས་རོལ་མོ་རྩི་བཅུད་དང་། །རིན་ཆེན་གོས་སོགས་མཁོ་དགུའི་ཡོ་བྱད་རྣམས། །ལག་ལེན་མཁས་པས་གྲལ་དུ་བཀྱེ་ལེགས་བཞིན། །གང་ལ་གང་འཚམས་རིམ་པ་མ་འཆོལ་བར། །རྒྱལ་ཕམ་སྙོམས་ཤིང་ཀུན་གྱིས་འཐོབ་པར་བྱེད། །དེ་བཞིན་གཤེགས་པ་བཞི་ཡི་མཚན་བརྗོད་པའི། །རྒྱུ་མཚན་གཏོར་མ་བྱིན་གྱིས་རློབ་པ་དང་། །ཐོས་པའི་མོད་ལ་ཕན་ཡོན་འབྱུང་བ་ཡིན། །དེས་ན་གཟུངས་ཀྱི་ཐོག་མཐའ་གང་དུའང་རུང་། །དེ་ཡང་དགེ་བཤེས་སྟོན་པའི་རྗེས་འབྲངས་ནས། <br />།རིན་ཆེན་མང་ནི་ཤཱཀྱ་ཐུབ་པ་ཉིད། །གཙོ་མའི་གསེར་མདོག་ངུར་སྨྲིག་ཆོས་གོས་གསོལ། །པད་ཟླའི་གདན་ལ་རྡོ་རྗེ་སྐྱིལ་མོ་ཀྲུང་། །ཕྱག་གཡས་མཆོག་སྦྱིན་གཡོན་པ་མཉམ་བཞག་མཛད། །མཚན་དེ་ཐོས་པས་དབུལ་ཕོངས་ལས་གྲོལ་ནས། །བསོད་ནམས་ལོངས་སྤྱོད་ཕུན་སུམ་ཚོགས་པར་འགྱུར། <br />།གཟུགས་མཛེས་དམ་པ་འཕགས་པ་སྤྱན་རས་གཟིགས། །གངས་རི་ལྟར་དཀར་དར་དང་ནོར་བུས་བརྒྱན། །པད་ཟླར་གཡས་བརྐྱངས་རོལ་པའི་སྐྱིལ་ཀྲུང་བཞུགས། །ཕྱག་གཡས་མཆོག་སྦྱིན་གཡོན་གྱིས་པད་དཀར་འཛིན། །མཚན་དེ་ཐོས་པས་མི་སྡུག་གཟུགས་སྤངས་ནས། །གཟུགས་བཟང་མཛེས་སྡུག་སྟོབས་ལྡན་ལུས་སུ་འགྱུར། <br />།སྐུ་མཆོག་འབྱམས་ཀླས་འཇམ་དཔལ་གཞོན་ནུ་སྟེ། །གུར་གུམ་མདངས་ཆགས་རྒྱན་རྣམས་ཀུན་གྱིས་མཛེས། །པད་ཟླར་སྐྱིལ་ཀྲུང་ཕྱག་གཡས་རལ་གྲི་དང་། །གཡོན་ན་གླེགས་བམ་དང་བཅས་ཨུཏྤལ་བསྣམས། །མཚན་དེ་ཐོས་པས་ལྟོ་བའི་ནད་ཀུན་བྱང་། །ཟས་ཀྱི་རོ་བྲོ་ཆོག་ཤེས་ལྡན་པར་འགྱུར། <br />།འཇིགས་བྲལ་གསང་བའི་བདག་པོ་ཕྱག་རྡོར་ནི། །ཨིནྡྲ་ནཱི་ལའི་འོད་འབར་རྒྱན་གྱིས་སྤྲས། །པད་ཟླར་སྐྱིལ་ཀྲུང་ཕྱག་གཡས་རྡོ་རྗེ་གསོར། །ཕྱག་གཡོན་སྐྱབས་སྦྱིན་མཚན་དེ་ཐོས་པ་ཡིས། །ཕན་ཚུན་རྡེག་འཚོག་གཅིག་གིས་གཅིག་ཟ་སོགས། །འཇིགས་དང་ཐོ་འཚེ་ཀུན་ལས་སྐྱོབ་པར་འགྱུར། <br />།དེ་ནས་རྗེས་ནི་<span class="tibetan_small">པང་ན་རིན་ཆེན་མང་རིན་འབྱུང་། གཟུགས་མཛེས་གང་གིས་མཐོང་ཡང་ཡིད་དུ་འོང་བ་ཞིག སྐུ་འབྱམས་ཀླས་གང་ཆེན་མཚོ། འཇིགས་བྲལ་དོན་ཡོད་གྲུབ་པར་བྱས་ཀྱང་རུང་</span>སོ་སོར་འདོད་གསོལ་དང་། །བདེན་བདར་ཆོས་བཤད་བསྔོ་བས་རྒྱས་བཏབ་སྟེ། <br />།མྱུར་མགྱོགས་རྟ་མཆོག་འདྲ་བའི་སྦྱིན་འབྲས་ཀྱང་། །སྨོན་ལམ་སྲབ་མདའ་འདྲ་བས་ལ་བསྒྱུར་རོ། །ཀུན་ཀྱང་ཕར་ཕྱིན་དྲུག་ལྡན་ཉམས་བླངས་ཏེ། <br />།ཇོ་བོའི་ཞལ་ནས་བྱང་ཆུབ་སེམས་མཆོག་དང་། །ཕ་རོལ་ཕྱིན་དྲུག་སྲང་ལ་བཅལ་གྱུར་ཀྱང་། །མཉམ་པ་ཉིད་ལ་སངས་རྒྱས་འབྱུང་ཞེས་གསུངས། <br />།དེ་བས་རང་འདོད་སྤངས་ནས་མཆོད་སྦྱིན་བྱ། །གཞན་ལ་འཚེ་མེད་གཙང་སྦྲའི་ཚུལ་ཁྲིམས་སྲུང། <br />།སྐབས་དེར་གཞན་ལ་མི་རྒོལ་ངལ་དུབ་བཟོད། །དགེ་སྦྱོར་ལས་སུ་མ་སོང་རབ་སྤྲོ་བས། །རྐྱེན་གྱིས་བཟློག་ཏུ་མེད་པའི་བརྩོན་འགྲུས་རྩོམ། །མ་ཡེངས་སྨྲ་བཅད་རྩེ་གཅིག་བསམ་གཏན་འཇོག །དགེ་བའི་བཤེས་གཉེན་རྣལ་འབྱོར་པ་ཆེན་པོས། <br />།ཐུགས་དམ་དུས་སུ་དྲུང་དུ་མི་མི་གཏོང་། །བསམ་པ་གཞན་པ་སྐྱེ་བའི་སྐྱོན་ཡོད་ཅིང་། །ཡེངས་པ་ཐམས་ཅད་སྙོམས་ལས་ཡིན་ཞེས་གསུངས། <br />།བདེན་གཉིས་ཚུལ་ལས་མི་འགལ་ཤེས་རབ་ནི། །ཀུན་རྫོབ་ཐབས་ཀྱི་བྱ་བ་རུས་ཐོན་ཞིང་། །ཆུད་ཟོས་མེད་པའི་ཀད་དེ་ཀྲིག་གེ་དགོས། །མན་མུན་སབ་སུབ་ཙམ་གྱིས་མི་ཡོང་སྟེ། །རྒྱུ་འབྲས་མི་བསླུའི་འབྲེལ་པ་འགྲུབ་པའི་ཕྱིར། །རྒྱུ་ཚོགས་ངན་ལས་འབྲས་བཟང་འབྱུང་བ་མེད། །དོན་དམ་སྐྱེ་མེད་རྟོགས་པའི་ཤེས་རབ་ཀྱིས། །ཅིར་ཡང་མ་གྲུབ་གསལ་སྟོང་ཟུང་འཇུག་སྟེ། །འཁོར་གསུམ་ཡོངས་སུ་དག་པའི་ངང་ནས་སྤྱོད། <br />།དེ་ལྟའི་ཕར་ཕྱིན་དྲུག་གི་དགེ་ཚོགས་རྣམས། །བྱམས་དང་སྙིང་རྗེ་བྱང་ཆུབ་སེམས་གསུམ་གྱི། །བསམ་པ་ཡེ་ཤེས་སྟོབས་ཀྱིས་ལྷག་པར་བྱེད། <br />།སྟོང་ཉིད་རྒྱུ་འབྲས་ཚུལ་དུ་འཆར་བ་དང་། <br />།རྒྱུ་འབྲས་སྟོང་ཉིད་ངང་དུ་གྲོལ་བ་ཡི། <br />།ཤེས་རབ་སྟོབས་ཀྱིས་དགེ་རྩ་རྒྱས་པར་བྱེད། <br />།དབང་པོ་སངས་རྒྱས་རྣམས་ཀྱི་བྱིན་རླབས་དང་། །བསྔོ་རྒྱུ་མི་ཟད་འགག་པ་མེད་པ་ཡི། །བསྔོ་བའི་སྟོབས་ཀྱིས་དཔག་ཏུ་མེད་པར་བྱེད། <br />།གཏོར་མགྲོན་རང་གི་རིག་པའི་འཆར་སྒོར་ཤེས། །རིག་བྱ་རིག་བྱེད་གཟུང་འཛིན་སྦུབས་ལས་གྲོལ། <br />།མཆོད་ཡུལ་མཐར་ཐུག་སངས་རྒྱས་ཆོས་ཀྱི་སྐུ། <br />།མཆོད་པའི་མཐར་ཐུག་དེ་ཁོ་ན་ཡིས་མཆོད། <br />།མགྲོན་པོ་རང་ཁྱིམ་བདེ་མོར་སླེབས་པ་བཞིན། །བྱར་མེད་སྤྲོས་བྲལ་དབྱིངས་སུ་འཇོག་པ་འདི། །བཀའ་བརྒྱུད་འདི་པའི་ཆོས་སྤྱོད་རབ་གསལ་ཡིན། །སྒྲུབ་པའི་སྙིང་པོ་འདི་ལ་སྒྲིལ་ནུས་ན། །འཇིག་རྟེན་འཁོར་བའི་ཆོས་དང་མ་འདྲེས་པར། །ཉན་རང་དམན་པའི་རང་འདོད་ལས་གྲོལ་བའི། །སྤྱོད་པ་བསླབ་གསུམ་མཛེས་པའི་སྒྲུབ་རྟགས་ཤིག །རང་གཞན་ཀུན་གྱི་སྣང་ངོར་སྟོན་ནུས་ཤིང་། །དེ་ལས་གཞན་པའི་སྒྲུབ་རྟགས་མེད་ཀྱང་བཟོད། །དེ་ལྟའི་ལྟ་སྤྱོད་རྣམ་པར་དག་པ་ལ། །རྗེས་འཇུག་ཉན་ཐོས་ཐ་དག་འབད་པར་རིགས། <br />།གཞི་པ་ཚིམ་ཚུལ་རྣམ་པ་བཞི་ཡིན་ཏེ། <br />།དང་པོ་བཤམས་མ་ཐག་ནས་ཚིམ་པ་ནི། །མདངས་དང་དྲི་ཙམ་ཁོ་ནས་འཚོ་བའོ། །འདི་སྐབས་སློབ་དཔོན་སྒོམ་པའི་ཞལ་སྔ་ནས། <br />།ཆོས་སྤྱོད་གཏོར་མ་གནད་དུ་འཁྱོལ་བ་ལ། །སྒོམ་ཆེན་ཕོ་གྲུང་མོ་གྲུང་ཞིག་དགོས་ཏེ། །ཕལ་ཆེར་འདྲེ་ཡིས་ཁྱེར་ཞེས་གསུངས་པ་ལྟར། <br />།བཤམས་མ་ཐག་ནས་ཐོ་འཚམ་ཟ་བ་ཡོད། །དེ་ཕྱིར་ཐོག་མའི་བསང་ཆུས་བསྲུང་བ་གཅེས།<br />།བསྔོ་ནས་ཚིམ་པ་མ་བསྔོས་གོང་རོལ་དུ། །མི་ཐོབ་དངོས་གཞིའི་ཆོ་ག་གྲུབ་འཕྲལ་ཐོབ།<br />།བཏང་བས་ཚིམ་པ་སྒོ་ཕྱིའི་སློང་མོ་བཞིན། །ཚོགས་པ་རྣམས་ཀྱིས་འཐོབ་པར་བྱ་བའི་ཕྱིར། །གཙང་སར་དོར་ནས་ཡུད་ཙམ་བསྲུང་བར་བྱ།<br />།རྗེས་ཀྱི་ཚིམ་པ་ལྷག་བཤལ་ཟ་རྣམས་སོ། །དེ་རྗེས་བྱ་ཁྱི་སྤྲང་པོ་ལ་སོགས་པའི། །གཟུགས་ཅན་དབུལ་པོ་རྣམས་ཀྱང་ཚིམ་གྱུར་པས། །དངོས་པོ་གཅིག་གིས་ཚོགས་གསོག་ལན་གཉིས་ནུས།<br />།ལྔ་པ་ཕན་ཡོན་དཔག་མེད་མདོར་བསྡུས་ན། <br />།དགའ་བོ་དུས་མིན་འཆི་བསླུར་གསུངས་པ་ཡི། །རིགས་པ་དེས་ནི་ཚེ་སྒྲུབ་མཆོག་ཏུ་འགྱུར། <br />།བླ་མ་ལྕེ་སྒོམ་པ་ཡི་གསུང་ལས་ཀྱང་། །ང་ཡི་མི་ཚེ་རིང་དུ་ཐུབ་པ་འདི། །གཏོར་མ་བཏང་བའི་བྱིན་རླབས་ཡིན་ཞེས་འབྱུང་། <br />།ཡི་དྭགས་མདངས་ཉམས་མ་ལུས་གསོས་པ་དང་། །ལྷན་ཅིག་སྐྱེས་པའི་ལྷ་རྣམས་མཉེས་བྱས་པས། །མདངས་བཟང་ལང་ཚོ་གཞོན་ཤ་ཆགས་པར་འགྱུར། །གཏོར་མགྲོན་རྣམས་ཀྱིས་རྟག་ཏུ་བསྲུང་བའི་ཕྱིར། <br />།སུས་ཀྱང་གླགས་ལྟའི་བར་གཅོད་བྱ་མི་ནུས། །བཀྲེས་སྐོམ་བསལ་ཞིང་བདུད་རྩི་སྦྱིན་པའི་མཐུས། །ནད་དང་མུ་གེ་སེལ་བའི་སྨན་དུ་འགྱུར། །ལྕེ་སྒོམ་པ་ཡི་གསོལ་རྒྱགས་ཆད་པ་ན། །ཕད་བུ་སྤྲུགས་པའི་ཕྱེ་མས་གཏོར་མ་མཛད། །ཉི་མ་ཕྱེད་ནས་མཆོད་སྟོན་འདུ་བའི་ཚེ། །ཞིང་གི་སོ་ནམ་སྒྲུབ་ལས་ཁེ་ཆེ་ཞིང་། །མྱུར་བའི་བསོད་ནམས་ངོ་མཚར་མི་འདུག་གམ། །ཞེས་སོགས་གོང་མ་དུ་མའི་མྱོང་བ་ཡིས། །མཐོང་ཆོས་འབྲས་བུ་བྱུང་བར་གསུངས་པ་ལྟར། །ལོངས་སྤྱོད་ནོར་སྒྲུབ་འདི་ལས་ཟབ་པ་མེད། <br />།ཀུན་ཁྱབ་སྙིང་རྗེ་ཆེན་པོས་སྦྱིན་བྱས་ཤིང་། །ཆོས་དབྱིངས་འཁོར་གསུམ་དག་པས་བསྔོས་པ་དེས། །ཚངས་དང་འཁོར་ལོས་སྒྱུར་བའི་དཔལ་ཐོབ་སྟེ། །མི་ཟད་ནམ་མཁའི་མཛོད་དང་ལྡན་གྱུར་ཅིང་། <br />།ཡི་དམ་ཆོས་སྐྱོང་ཞི་ཁྲོའི་ལས་ཀུན་གྱི། །སྔོན་དུ་འགྲོ་ཞིང་དངོས་གཞི་སྒྲུབ་པ་དང་། །རྗེས་ནས་མ་ཚང་རྣམས་ཀྱང་ཁ་སྐོང་བས། །ཕྲིན་ལས་རྣམ་བཞི་སྒྲུབ་པའི་ཕོ་ཉ་ཡིན། <br />།སེམས་བསྐྱེད་བཟང་པོས་ཉོན་མོངས་བདུད་འཇོམས་ཤིང་། <br />།སྡུག་བསྔལ་བསལ་བས་ཕུང་པོའི་བདུད་ལས་གྲོལ། <br />།བགེགས་རིགས་ཟློག་པས་ལྷ་ཡི་བདུད་དཔུང་འཇོམས། <br />།འཆི་བ་བསླུ་བས་འཆི་བདག་བདུད་ལས་རྒྱལ། <br />།སྦྱིན་བདག་གཙོ་བོ་ཆེན་པོར་གྱུར་པ་དང་། །མི་མ་ཡིན་པས་གཟི་འོད་སྒྲུབ་པའི་ཕྱིར། །ཀུན་ལས་འཕགས་པའི་གཟི་བརྗིད་འཐོབ་པར་འགྱུར། །པདྨའི་མཚོ་ལ་ངང་པ་འདུ་བ་ལྟར། །དཔག་ཚད་མང་པོའི་མི་མ་ཡིན་རྣམས་འདུ། <br />།ལེན་པོ་གཏོང་པོའི་འགྲོ་བ་གཉིས་ཀ་ཡང་། །ཕྱི་མ་ཡི་དྭགས་འཇིག་རྟེན་རབ་སྤངས་ནས། །མཐོ་རིས་མཛེས་པའི་ལུས་རྟེན་འཐོབ་པར་འགྱུར། <br />།དཀོན་མཆོག་རྣམས་ཀྱིས་བུ་ལྟར་དགོངས་པ་དང་། <br />།རིགས་དྲུག་ཀུན་གྱིས་རྟག་ཏུ་བཀུར་བ་དང་། <br />།མི་མ་ཡིན་རྣམས་ཅི་བཅོལ་ཉན་པ་སོགས། <br />།ཐུན་མོང་དངོས་གྲུབ་འཕྲལ་དུ་ཐོབ་གྱུར་ནས། །མཐར་ཐུག་མཆོག་གི་དངོས་གྲུབ་མྱུར་འཐོབ་པའོ།<br />།དྲུག་པ་ལས་སྦྱོར་རྣམ་གྲངས་བསྟན་པ་ལ། །ཚོགས་གསོག་ལན་འཇལ་འཆི་བསླུ་ནད་པའི་གླུད། །ཟློག་པ་མཐུ་ཡི་ཚུལ་དུ་གཏོང་བ་དྲུག<br />།དང་པོ་སྐྱབས་སེམས་ཕར་ཕྱིན་དྲུག་ལྡན་དང་། །འཁོར་གསུམ་ཡོངས་དག་བསྔོ་བས་རྒྱས་བཏབ་ནས། །ཐ་མ་ཆོས་ཀྱི་སྦྱིན་པས་བསྡུ་བའོ།<br />།གཉིས་པ་གདོན་བགེགས་གནོད་བྱེད་ངོས་བཟུང་ལ། །དེ་དག་མགུ་བའི་ལོངས་སྤྱོད་དུ་བསྔོས་ཏེ། །བླ་མ་དཀོན་མཆོག་གཉིས་ཀའི་དཔང་པོར་གསོལ། །ཆོས་སྐྱོང་ལ་སོགས་གཞན་ལ་ངོ་ཆེན་སྦྲན། །རིགས་དྲུག་ལ་སོགས་འབོད་འོས་མགྲོན་དུ་བྱས། །གནོད་བྱེད་གདོན་བགེགས་ལན་ཆགས་འདེད་མཁན་ཏེ། །གཞི་བདག་རྣམས་ལ་ནད་པ་སྲུངས་ཤིག་བྱ། །སྡེ་བརྒྱད་ཕ་རོལ་དཔུང་གྲོགས་མ་བྱེད་ཅེས། །བཤད་སྦྱང་དྲག་པོའི་སྒོ་ནས་རྩེ་གཅིག་པས། །ཉི་མ་འཆར་ཀ་དག་དང་བསྟུན་ཏེ་གཏོང་།<br />།གསུམ་པ་དགེ་སློང་བཞི་སྡེ་མཆོད་པ་སོགས། །གཞན་ཡང་རིམ་གྲོ་དུ་མ་དང་བསྒྲིགས་ནས། །དགེ་སློང་གཅིག་གིས་གཏོར་མ་གཏོང་བའི་ཚེ། །ནད་པའི་མིང་ནས་ཕྱུང་སྟེ་འདོད་དོན་གསོལ། <br />།བཞི་པ་ངར་གླུད་རེ་རེ་བྱས་ནས་ནི། །ཆེ་གེའི་ཚེ་སྲོག་ཤ་ཁྲག་རིན་གླུད་དུ། །ཁྱེར་ཞེས་ཉི་མ་ནུབ་དང་བསྟུན་ཏེ་གཏང་།<br />།ལྔ་པ་མཐུ་བཟློག་དྲུག་པ་མཐུ་སྒྲུབ་ནི། །དུ་མ་འབྱུང་བ་གཞན་དུ་ཤེས་པར་བྱ། <br />།ནད་པའི་དོན་སོགས་རིམ་གྲོ་ཕལ་ཆེར་ལ། །དགེ་སློང་གཙང་མ་ཚུལ་ཁྲིམས་ལྡན་པ་ཡིས། །སླར་ཡང་བཤགས་བསྡམ་ལ་སོགས་བྱས་ནས་ནི། །སྣམ་སྦྱར་གསོལ་ཏེ་ཐམས་ཅད་རྩེ་གཅིག་གིས། །དགེ་འདུན་འདུན་པ་མཐུན་པས་བཏང་བྱས་ཤིང་། །ཆུ་བོར་དོར་ན་ཕན་ཡོན་ཆེ་བར་གསུངས། <br />།གཞན་ཡང་བསོད་ནམས་གསོག་ན་དཀོན་མཆོག་མཆོད། <br />།ཡི་དྭགས་རྣམས་ལ་སྦྱིན་པ་གཙོ་བོར་འདོན། <br />།བསྟན་པ་བསྲུང་ན་ཡེ་ཤེས་ཆོས་སྐྱོང་དང་། <br />།རྒྱལ་ཁམས་བསྲུང་ན་འཇིག་རྟེན་ཆོས་སྐྱོང་དང་། <br />།ནད་པའི་རིམ་གྲོར་བྲམ་ཟེ་དྲང་སྲོང་དང་། <br />།དོན་རྣམས་བསྒྲུབ་ན་ལྷན་ཅིག་སྐྱེས་པའི་ལྷ། <br />།དགོན་གནས་འཛིན་ན་ས་བདག་གཞི་བདག་དང་། <br />།ཡུལ་ཕྱོགས་བདེ་འདོད་སོ་སོའི་ཡུལ་བདག་དང་། <br />།གནོད་བྱེད་རྦོད་གཏོང་བ༌བཟློག་ན་སྡེ་བརྒྱད་དང་། <br />།ལན་ཆགས་ཤ་འཁོན་སྦྱང་ན་གནོད་བགེགས་དང་། <br />།རིགས་དྲུག་སྤྱི་ལ་ཕམ་ཕབ་ཚུལ་ལ་སོགས། <br />།ཕྲིན་ལས་གཞོལ་ཚུལ་སྐབས་བབ་རིགས་པས་དཔྱད། །དེ་རྣམས་གཞུང་བཞིན་གཏོང་བའི་གཤང་སྦྱར་རོ། <br />།བྱང་སེམས་རང་ཉིད་ཐུབ་པའི་དབང་པོར་སྒོམ། །དེ་ཡི་སྙིང་པོ་བཟླ་བའི་བདག་བསྐྱེད་དང་། <br />།འབྲུ་གསུམ་དང་པོས་མི་གཙང་བ་རྣམས་སྦྱངས། །གཉིས་པ་རིན་ཆེན་སྣོད་དུ་བཅུད་ཀྱི་རྫས། །ལྷ་ཡི་ཞལ་ཟས་རི་རབ་ལྟར་མཐོ་ཞིང་། །བདུད་རྩི་རྒྱ་མཚོ་ལྟ་བུར་འཁྱིལ་བར་བསམ། །གསུམ་པས་དེ་དག་སྟོང་གསུམ་གང་བར་སྤེལ། <br />།དེ་བཞིན་ཤེགས་པ་བཞི་ལ་ཕྱག་འཚལ་ནས། །གཟུངས་སྔགས་ལན་གསུམ་སེ་གོལ་བདུན་གྱིས་འབུལ། །མགྲོན་གྱིས་ཐོབ་ནས་སོ་སོར་གྱེས་པར་བསམ། །བདེན་སྟོབས་བསྔོ་བ་ཆོས་བཤད་མདོར་བསྡུས་ལུགས། <br />།བརྒྱ་རྩའི་རྗེས་དོར་ཏོག་གཅིག་ཆུ་སྦྱིན་བྱ། །མདོ་འདོན་སྨོན་ལམ་བཏབ་ནས་སྤྱོད་ལམ་འཇུག <br />།འཇུར་གེགས་ཏོག་གཅིག་འདི་ཡི་ལོ་རྒྱུས་ནི། །ཉན་ཐོས་མཆོག་གཉིས་ཉིན་གུང་ལྗོངས་རྒྱུ་ཚེ། །ཡི་དྭགས་སྔོ་སྐམ་མིག་དམར་སྐྲ་འཛིངས་ཤིང་། །སྐེ་དང་ཡན་ལག་ཕྲ་ལ་སེན་མོ་ཡིས། །ཁུ་ཚུར་ཐལ་བྱུང་ཕུག་པའི་མི་སྡུག་གཟུགས། །ཁ་ནས་དགོས་ན་མེད་ན་མ་སྦྱིན་ཅིག །སྦྱིན་ནའང་ཆེས་སོ་དེ་ལས་ཕྲིས་ཞེས་པའི། །སྒྲ་ལྔ་སྒྲོག་དང་ཕྲད་ནས་གསོལ་བ་ན། <br />།སྟོན་པས་དེ་ནི་ཆུ་ཙམ་མ་གཏོགས་པས། །གཞན་ལ་འཇུར་གེགས་བྱས་པའི་རྣམ་སྨིན་ཉིད། <br />།དེས་ན་ཆུ་ལ་གཞན་གྱི་དྲི་མེད་པ། །སྦྱིན་ཞིང་ཛྭ་ལ་མི་དཾ་ལ་སོགས་པའི། །སྔགས་བརྗོད་སེ་གོལ་གཅིག་གིས་གཏོང་བར་གསུངས། <br />།དེ་ཕྱིར་ལག་པ་རབ་ཏུ་བཀྲུས་བྱས་ནས། །སེན་མོའི་བར་གྱི་རྩམ་དྲིའང་མེད་པར་བྱ། <br />།དགེ་བཤེས་སྤྱན་སྔ་པས་ནི་ཆུ་རྐྱང་ལས། །ཟན་ཡང་དུམ་ཙམ་འཇུག་པ་ཕལ་ཆེར་ལ། །གཟིགས་ཞེས་མྱོང་བས་གསུངས་པའི་མན་ངག་ལུགས། །སེ་གོལ་གཉིས་སོགས་མང་ན་སྐྲག་པ་སྐྱེ། །དེས་ན་སེ་གོལ་ཏོག་ཅིག་ཁོ་ན་བྱ། <br />།ཕན་ཡོན་ཚེ་རིང་ནད་ཉུང་བྱད་གཏད་བཟློག །བར་གཅོད་ཀུན་གྱིས་མི་ཚུགས་ཁྱད་པར་དུ། <br />།ལོངས་སྤྱོད་ནོར་གྱི་དངོས་གྲུབ་འབྱུང་བ་དང་། <br />།ཡི་ག་འཆུས་དང་སྙིང་མི་དགའ་བ་སེལ། <br />།མདངས་དང་ལྡན་ཞིང་གཞན་ལ་སྤེལ་བྱས་ན། <br />།ཡི་དྭགས་རྒྱུད་ལས་གྲོལ་ནས་འཚང་རྒྱའོ། <br />།འཇིག་རྟེན་ཡི་དྭགས་ཀུན་ལ་བྱིན་པས་ནི། །འཇུར་གེགས་གཅིག་ལ་བྱིན་པ་བསོད་ནམས་ཆེ། །ཅི་ཕྱིར་ཞེན་འདིས་ནི་ཆུ་མ་གཏོགས། །གཞན་གྱི་སྦྱིན་པ་ཀུན་གྱི་གོ་བཀག་ཅིང་། <br />།རང་བློས་བཅད་ནས་ཆུ་ཡང་མ་བྱིན་པས། །གཙང་པོའང་གྲེ་བའི་སྦུབས་སུ་སྐམ་ནུས་པའི། <br />།མི་བཟད་སྡུག་བསྔལ་འབར་བ་དེ་ལ་ནི། །ཁ་ཟས་གཞན་རྣམས་བྱིན་ཀྱང་མི་འཐོབ་པས། །སེམས་རྒྱུད་རབ་ཏུ་ཞི་བའི་སྔགས་བརྗོད་པས། །ཆུ་སྦྱིན་ཁོ་ན་ཕན་ཡོན་ཆེ་བར་གསུངས། <br />།སུ་རུ་པ་ནི་ངེས་པ་བདུན་ལྡན་ཏེ། <br />།ཟས་སྐོམ་ཅུང་ཟད་ཙམ་ཡང་མ་སྤྱད་གོང་། །གཏོང་བའི་དུས་དང་ལན་ཅིག་ཆག་ན་ཡང་། །བརྒྱལ་ཞིང་བོགས་པའི་སྡུག་བསྔལ་ཆེར་ཡོད་པས། །ཆག་མེད་གཏོང་བ་དུས་ཀྱི་ངེས་པ་ཡིན། <br />།མི་སྒྲ་ཁྱི་སྒྲ་སོགས་ལ་སྐྲག་པ་དང་། །མི་གཙང་དྲི་སོགས་ཚོར་བ་རག་པའི་ཕྱིར། །དབེན་ཞིང་གཙང་བ་གནས་ཀྱི་ངེས་པ་ཡིན། <br />།ལྕགས་སྣོད་མཚོན་ཆའི་རིགས་སུ་མཐོང་འགྱུར་བས། །རྫའམ་རིན་ཆེན་སྣོད་ཀྱི་ངེས་པ་ཡིན། <br />།ཡི་དྭགས་རྣམས་ཀྱི་གཏོར་མའི་སྣོད་ལ་ནི། །ལྕགས་ཀྱི་གཟེར་བུ་ཙམ་ཡང་མེད་པར་དགོས། །སྐྱུག་བྲོའི་གནས་སུ་མཐོང་ནས་མི་ལེན་པས། །གཙང་བར་གནས་པ་གང་ཟག་ངེས་པ་ཡིན། <br />།གཙང་མའི་ཆུ་ཟན་རྫས་ཀྱི་ངེས་པ་ཡིན། <br />།རང་ཉིད་ཐུབ་པའམ་གཟུགས་མཛེས་གང་རུང་བསྒོམ། །སྣོད་ནི་རིན་ཆེན་ཟན་ནི་ལྷ་ཡི་ཟས། །ཆུ་ནི་བདུད་རྩིའི་རྒྱ་མཚོར་མོས་པ་དང་། །ཡི་དྭགས་ཀུན་ལ་བྱམས་པས་ཁྱབ་བྱས་ནས། །ཁ་ཟས་རྒྱལ་ཕམ་མེད་ཅིང་གནོད་མེད་པར། །སྦྱིན་པ་ལྷག་བསམ་དག་པའི་ངེས་པ་ཡིན། <br />།གཟུངས་སྔགས་ལན་བདུན་ལག་གཡོན་སེ་གོལ་གསུམ། །དེ་ཡིས་བསྔོས་ནས་སྔགས་ཚན་ཕྱི་མ་ནི། །མི་དན་ཁ་ཅིག་སྟོན་མོས་མགུ་བྱས་ཀྱང་། །སླར་ཡང་གླགས་ལྟ་འཚེ་བར་བྱེད་པ་ཡོད། །དེ་ལྟའི་ཡི་དྭགས་གནོད་འཚེ་བསྲུང་ཆེད་ཡིན། །གཙང་སར་དོར་ཞིང་ཆོས་སྦྱིན་བསྔོ་བ་བྱ། <br />།ཆོ་ག་ངེས་པ་དེ་ལྟའི་ཕན་ཡོན་ནི། །ཡི་དྭགས་ཀུན་ལ་འབྲས་ཆེན་བྲེ་ཆེན་རེ། །སོ་སོར་བྱིན་པའི་བསོད་ནམས་འཐོབ་འགྱུར་ཞིང་། །སྐྱེ་བར་ཉམས་ཆུང་མི་འགྱུར་དབུལ་མི་འགྱུར། །སྟོབས་ཆེ་གཟུགས་བཟང་མཐོང་ན་དགའ་བ་དང་། །ཕྱུག་ཅིང་ལོངས་སྤྱོད་ཕུན་ཚོགས་ཚེ་རིང་ཞིང་། །ནད་མེད་བྱང་ཆུབ་མྱུར་དུ་འཐོབ་པ་དང་། །ཤི་འཕོས་བདེ་བ་ཅན་དུ་སྐྱེ་བར་གསུངས། <br />།ཟས་ཀྱི་སྔོན་དུ་ཆངས་བུ་སྦྱིན་པ་ནི། །སྲོག་དང་ནོར་གྱི་བླུད་དུ་འགྱུར་བ་སྟེ། <br />།སྔོན་ཚེ་འཕྲོག་མ་ལྔ་བརྒྱའི་བུར་བཅས་པས། །ཉིན་ཞག་རེ་ལ་མི་ཡི་འགྲོ་བ་ནི། །ལྔ་བརྒྱ་ཕྲག་གསུམ་ཟོས་པར་གྱུར་པའི་ཚེ། །སྟོན་པས་དེ་ཡི་བུ་གཅིག་གསོལ་ལྷུང་དུ། །སྦས་པ་རྫུ་འཕྲུལ་དུ་མས་བཙལ་གྱུར་ཀྱང་། །མ་རྙེད་ཤིན་ཏུ་དུབ་ཅིང་སྡུག་བསྔལ་བས། །སྟོན་པ་ཉིད་ལ་སྐྱབས་སུ་གསོལ་བར་བྱས། །དེ་ལ་ཕྱག་སོར་ལྔ་ཡི་རྗེས་ལྡན་གྱི། །ཆངས་བུ་བསྩལ་ནས་ཐམས་ཅད་ཚིམ་པར་མཛད། །ཀུན་གྱིས་སྲོག་གཅོད་སྤོང་བར་ཁས་བླངས་ཤིང་། <br />།འཁོར་རྣམས་བཞི་ཡིས་ཆངས་བུ་སྦྱིན་པ་དང་། །དེ་དག་ཀུན་ཀྱང་འཕྲོག་མས་སྲུང་བར་གདམས། །དེ་ལྟར་ཆངས་བུའི་སྔགས་སམ་ཁ་འབར་སྔགས། <br />།གང་ཡང་རུང་བས་བྱིན་གྱིས་བརླབས་ནས་སྦྱིན། །རང་ཉིད་ཟས་ཀྱི་བྱ་བར་འཇུག་པའི་ཚེ། །ལུས་ལ་སྲིན་བུ་བརྒྱད་ཁྲི་སྙེད་ཡོད་པ། །ད་ལྟ་འདི་དག་ཟང་ཟིང་གིས་བསྡུས་ནས། །མྱུར་བར་ཆོས་ཀྱི་བདུད་རྩིས་བསྡུ་བར་བྱ། །སྙམ་དུ་ལྷག་པའི་བསམ་པ་བསྐྱེད་པ་དང་། །སྒོ་གསུམ་དམ་པའི་ཆོས་ལ་བཀོལ་བའི་ཕྱིར། །ཟས་སྐོམ་གླ་རྔན་ཚུལ་དུ་སྦྱིན་པར་བསམ། <br />།གཞན་ཡང་བསྐྱེད་རྫོགས་གང་རུང་དང་ལྡན་པས། །ཟས་ཀྱི་རྣལ་འབྱོར་ནང་གི་སྦྱིན་སྲེག་སོགས། །ཆོ་གའི་ཚུལ་མང་མདོར་བསྡུས་ཙམ་དུ་ན། <br />།བདག་ཉིད་འཇིག་རྟེན་དབང་པོའི་སྐུར་བསྒོམ་ཞིང་། <br />།ཟས་རྣམས་ཡི་གེ་གསུམ་གྱིས་བདུད་རྩིར་བསྒྱུར། <br />།དེ་ཡིས་མཆོད་པར་མོས་ལ་རོལ་པར་བྱ། <br />།ཉུང་ན་དགེ་ལ་སྦྱོར་བར་མི་ནུས་ཤིང་། <br />།མངས་ན་གཉིད་སོགས་ཉེས་པ་འཕེལ་འགྱུར་བས། <br />།རན་པར་བྱ་ཞིང་ལྷག་མའི་ཆངས་བུ་རྣམས། །འབྱུང་པོར་བསྔོས་ནས་སྨོན་ལམ་གདབ་པར་བྱ། <br />།གཞན་ཡང་སྤྱི་གཏོར་དཀར་གསུམ་མངར་གསུམ་ནི། །མགྲོན་རིགས་མཆོག་དམན་ཀུན་ལ་སྦྱིན་དུ་རུང་། <br />།ནང་གི་གཏོར་མ་འདོད་པའི་ཡོན་ཏན་ལྔ། །རིགས་དྲུག་འགྲོ་བ་རྣམས་ལ་སྦྱིན་པར་བྱ། <br />།གསང་བ་ཤ་ལྔ་བདུད་རྩི་ལྔ་སྦྱར་ནི། །ཡི་དམ་མཁའ་འགྲོ་ཆོས་སྐྱོང་རྣམས་ལ་འབུལ། <br />།དེ་ཁོ་ན་ཉིད་རང་ལུས་མཆོད་སྦྱིན་ནི། །གནོད་བྱེད་ལན་ཆགས་སྡིག་སྒྲིབ་སྦྱོང་བར་བྱེད། <br />།མདོར་ན་སྣང་སྲིད་གཏོར་མ་མ་གྱུར་མེད། །ཕྱི་སྣོད་འཇིག་རྟེན་གཏོར་གཞོང་ཆེན་པོ་རུ། །ནང་བཅུད་སེམས་ཅན་ཐམས་ཅད་གཏོར་མར་བསྔོ། །བདག་འཛིན་སྤུ་རྩེ་ཙམ་ཡང་མ་འཁྲིས་པར། །ཐམས་ཅད་བཏང་བ་གཏོར་མ་ཆེན་པོའོ། <br />།དེ་ལྟར་གཏོར་མའི་དེ་ཉིད་འདི་བརྗོད་པས། <br />།བདག་གཞན་འགྲོ་བ་སེམས་ཅན་མ་ལུས་པ། <br />།ཤེས་བྱ་ཀུན་གྱི་དེ་ཉིད་རིག་གྱུར་ནས། <br />།རྡོ་རྗེ་འཛིན་དབང་འཐོབ་པའི་བཀའ་དྲིན་སྩོལ། <br /><span class="tibetan_small">།ཞེས་པ་འདི་ནི་དགེ་སློང་སྤོང་བ་པ་ཀརྨ་སྲུང་གིས་སྐུལ་པ་ལྟར། ཞྭ་དམར་ཅོད་པཎ་འཛིན་པའི་མཚན་གྱི་བྱིན་རླབས་དང་ལྡན་པ་དཀོན་མཆོག་འབངས་ཀྱིས་བྲིས་པའོ།</span> <br /><br />༈ ཡོངས་གྲགས་སྣོད་ཚམ་བཅུ་གཅིག་བཤམས་མོད་ཀྱང་། །འདིར་ནི་གཏོར་སྣོད་བཅུ་གཉིས་རིམ་པར་བཤམས། །གཙང་མའི་ཟན་ལ་ཆ་མཉམ་གསུམ་དུ་བགོས། །དང་པོའི་ཆ་ནས་ཕུང་ཀྱི་ཞལ་ས་འབུལ། །ལྷག་ངེས་གཏོར་སྡེར་དང་པོར་བླ་མ་དང་། །ཡི་དམ་སྲས་བཅས་རྣམས་ལ་མཆོད་པ་འབུལ། །ལྷག་མའི་ཆ་གཉིས་དུམ་བུ་བཞིར་བགོ་ཞིང་། །བཞི་གསུམ་བཅུ་གཉིས་དེ་རྣམས་རེ་རེ་ལ། །རིལ་བུ་བཅུ་བཅུ་བྱས་ན་སྣོད་གཉིས་པ་། །རིལ་བུ་ཉི་ཤུ་བླུག་པས་ཆོས་སྐྱོང་མཆོད། །དེ་ལྷག་སྣོད་བཅུད་རིལ་བུ་བཅུ་བཅུ་བླུག །དཀོན་མཆོག་མཆོད་དུས་གཟུངས་སྔགས་ཉེར་གཅིག་བཟླ། །ཆོས་སྐྱོང་རྣམས་ལ་གཟུངས་སྔགས་བཅུ་བཞི་བཟླ། །ལྷག་མ་རྣམས་ལ་མཚན་བཞི་སྒྲོག་པ་དང་། །གཟུངས་སྔགས་བདུན་བདུན་བཟླ་ཞིང་རེ་རེའི་མཐར། །ལག་གཡས་མཆོག་སྦྱིན་བརྐྱངས་ནས་སེ་གོལ་བརྡབ། །རིམ་པས་བཤགས་ཤིང་ཆུ་གཙང་ཡིད་དགས་བཤལ། །གཤེགས་གསོལ་སྤྲོ་ན་ཀུན་གྱི་མཐར་བྱའོ། <br />།གཏོར་མ་ཆ་བཅུའི་ལྷན་ཐབས་ལ་སྐྱབས་འགྲོ་སེམས་སྐྱེད་ནི་རྒྱས་པའམ་བསྡུ་ན། སངས་རྒྱས་ཆོས་ཚོགས་སོགས། དེའི་རྗེས་སུ་དོན་བཞི་སྟེ། བདག་སྒྲུབ་པ། རྫས་སྒྲུབ་པ། མགྲོན་སྒྲུབ་པ། མགྲོན་ལ་འབུལ་བའི་རིམ་པའོ། <br />།བདག་སྒྲུབ་པ་ནི་ཐུགས་རྗེ་ཆེན་པོ་བསྒོམ་པའོ། <br />།རྫས་སྒྲུག་པ་ནི། དཀར་གསུམ་མངར་གསུམ་ལ་སོགས་ཤ་ཆང་སྒོག་གསུམ་མ་འདྲེས་པ་དང་། གཏོར་མའི་རྒྱུ་རྩམ་པ་ལ་སོགས་པའི་རིན་པོ་ཆེའི་སྣོད་དམ་གང་ཡང་རུང་བའི་སྣོད་དུ་བཅའ་ཞིང་། སྟེགས་ཀྱི་ཁར་བཞག་ནས་གཞུང་བཞིན་བསྒོམ་པའོ། <br />།མགྲོན་སྒྲུབ་པ་ནི། བསྡུས་པར་ན། བླ་མ་བརྒྱུད་པར་བཅས་རྣམས་དང་། །ཞེས་སོགས་མཆོད་སྦྱིན་གྱི་ཡུལ་བརྗོད་པའི་སྐབས་སུ་སོ་སོར་མདུན་གྱི་ནམ་མཁའ་དང་ས་གཞིར་བྱོན་པར་བསམ་པ་ཉིད་དོ། །རྒྱས་པར་ན། གཏོར་མ་ཡེ་ཤེས་བདུད་རྩིར་གྱུར། །ཞེས་པའི་རྗེས་སུ། ཧཱུྃ། བཞེངས་ཤིག་བཞེངས་ཤིག་སྟོབས་བཅུ་མངའ་བའི་ལྷ། །ཞེས་ཤློ་ཀ་གཅིག་གི་མཐར་བཛྲ་ས་མ་ཛཿ ཞེས་པས་སྤྱན་དྲངས། བཅོམ་ལྡན་འདིར་ནི་བྱོན་པ་ལེགས། །ཞེས་ཤློ་ཀ་གཉིས་ཀྱི་མཐར། ཨོཾ་སརྦ་ཏ་ཐཱ་ག་ཏ་པདྨ་ཀ་མ་ལ་ཡེ་སྟྭཾ་ཞེས་བཞུགས་སུ་གསོལ། དེ་ནས་ཡན་ལག་བདུན་པ་རྒྱས་བསྡུས་གང་རུང་ཞིག་བྱ། <br />བཞི་པ་མགྲོན་ལ་འབུལ་བའི་རིམ་པ་ནི། བླ་མར་བརྒྱུད་པ་བཅས་རྣམས་དང་། །ཞེས་སོགས་སོ། །ཆ་གཉིས་པ་ཆོས་སྐྱོང་སྲུང་མ་མན་ཆད་ལ་སྤྱན་འདྲེན་བཞུགས་གསོལ་སོགས་སྦྱོར་མི་དགོས་ཤིང་། སོ་སོའི་མཚན་ནས་བརྗོད་པའི་ཚེ་སྐད་ཅིག་གིས་མདུན་དུ་བྱོན་པར་བསམ་པ་ཉིད་དོ། །དེ་ནས་མཐར་གཤེགས་གསོལ་སྤྲོ་ན། དམ་པ་ཉིད་ནི་འཐོབ་པར་ཤོག །ཅེས་པའི་རྗེས་སུ། ཨོཾ། ཁྱེད་ཀྱིས་སེམས་ཅན་དོན་ཀུན་མཛད། །ནས་བཛྲ་མུཿས་ཡེ་ཤེས་པ་དང་། མཆོད་སྦྱིན་གནས་འདིར་གང་ལྷགས་པ་ནས། སརྦ་བྷཱུ་ཏ་གཙྪས། འཇིག་རྟེན་པ་རྣམས་གཤེགས་སུ་གསོལ། <br /><span class="tibetan_small">ཞེས་པ་ཞྭ་དམར་པ་ལྔ་པས་སོ།། །།སྦར་འདི་དཔལ་སྤུངས་སྒྲུབ་ཁང་དུ་བླ་མིང་བཀྲ་ཤིས་ཚེ་རིང་ནས་བསྐྲུན་པའོ།། །།དགེའོ། །མངྒལཾ། །</span></span>

Difference between revisions of "Gtor ma'i de nyid bdud rtsi'i dga' ston"

Revision as of 11:17, 22 November 2021

About

Contact

Support us

License