Sgyu lus gdan thog gcig ma

Resource ID	SCv10p771
Title	sgyu lus gdan thog gcig ma
Topics	Illusory body
Author	Gyeltsen Bum

༄༅། །སྒྱུ་ལུས་གདན་ཐོག་གཅིག་མ་བཞུགས་སོ།། སརྦ་མངྒ་ལཾ།།

བླ་མ་དམ་པ་རྣམས་ལ་ཕྱག་འཚལ་ལོ།
།མཁྱེན་བརྩེའི་བདག་ཉིད་རྡོ་རྗེ་འཆང་། །དམིགས་མེད་ཐུགས་རྗེས་འགྲོ་དོན་མཛད། །མཁས་གྲུབ་བླ་མའི་ཞབས་བཏུད་དེ། །སྒྱུ་ལུས་གདན་ཐོག་གཅིག་མ་བྲི།
།སྒྱུ་ལུས་གདན་ཐོག་གཅིག་མ་ལ། །གསོལ་འདེབས་བཞི་ལ་འདུན་པ་བརྒྱད། །དེ་ལ་སྒྱུ་ལུས་རྨི་ལམ་གཉིས་ཀ་སྒྱུ་ལུས་འབྲིང་གི་སྟེང་དུ་དྲིལ་ནས་ཉམས་སུ་ལེན་པར་འདོད་པས། སེམས་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་པར་བྱ། །དེའི་ཆེད་དུ་ཐེག་པ་ཆེན་པོའི་ཆོས་ཉམས་སུ་བླང་སྙམ་དུ་སེམས་བསྐྱེད། དེ་ནས་སྔར་སྐྱེས་པ་ཐམས་ཅད་ཀྱང་ཤི། ད་བཟོད་སྐྱེ་བ་ཐམས་ཅད་འཆི། །ད་ལྟ་ས་ཐོག་ན་གནས་པ་ཐམས་ཅད་ཀྱང་མ་ཤི་ཚ་ཐར་དུ་སྔོད་པ་གཅིག་ཀྱང་མེད། འཆི་བ་ཡིན། ཅི་ཀྱང་མི་བྱེད་སྙམ་པའི་འཆི་བ་མི་རྟག་པ་སྒོམ། ཤི་ནས་མེད་པར་འགྲོ་ན་སླ་སྟེ། འགྲོ་དྲུག་ཏུ་སྐྱེ། གང་དུ་སྐྱེས་ཀྱང་སྐྱིད་མེད་ཨང་སྙམ་དུ་འཁོར་བ་ལ་སྐྱོ་ཤས་དྲག་པོ་བསྐྱེད་དོ།
།རྡོ་རྗེའི་ཚིག་རྐང་ལས། མི་རྟག་སྐྱོ་ཤས་ཉེས་དམིགས་སྔོན་འགྲོ་བས། །ཅེས་དང་།
ནི་གུ་མས། འཁོར་བར་སྐྱིད་མེད་དགའ་གདུང་དང་། །སྣང་བ་བསླུ་བྲིད་མཁན་འདི་ལ། །སྐྱོ་ཤས་དྲག་པོས་རྒྱབ་ཕུལ་ནས། །མདུན་པ་དྲག་པོའི་བཅུད་ལ་བོར། །ཚེ་འདི་བློ་ཡི་མ་ཐོངས་ན། །ཅི་བྱས་དོན་མེད་སྡུག་བསྔལ་རྒྱུ། །འཁོར་གཡོག་མང་ཡང་གྲོག་ཚང་འདྲ། །ལོངས་སྤྱོད་མི་རྟག་སྤྲིན་དང་འདྲ། །ནགས་ཁྲོད་འདུག་ཀྱང་རི་དྭགས་ཡིན། །ཐ་སྙད་མཁས་ཀྱང་ནེ་ཙོ་འདྲ། །དེ་ཕྱིར་བསམ་དང་ལྡན་པ་ཡིས། །འཇིག་རྟེན་འདི་ལ་ཆགས་མི་བྱ། །ཅེས་སོ།
།དེ་ནས་བདེ་བའི་སྟན་ལ་ལུས་གནད་བཅས་ལ། རང་སྐད་ཅིག་གིས་བདེ་མཆོག་ཞལ་གཅིག་ཕྱག་གཉིས་པ། ཡུམ་དང་གཉིས་སུ་མེད་པར་བསྐྱེད་པའི་སྤྱི་བོར་པདྨ་དང་ཉི་མའི་སྟེང་དུ་རྩ་བའི་བླ་མ་ངོ་བོ་སངས་རྒྱས། རྣམ་པ་བླ་མ། མཚན་དང་དཔེ་བྱད་ཀྱིས་བརྒྱན་པ། ཞལ་འཛུམ་པའི་མདངས་དང་ལྡན་པ། འོད་དང་འོད་ཟེར་གྱི་རང་བཞིན་ཅན། སྐུ་ལྟ་བས་ཆོག་མི་ཤེས་པ། ཉི་མ་འབུམ་གྱིས་གཟི་བརྗིད་ཅན། མཚན་ཐོས་པས་ཕྱིར་མི་ལྡོག་པའི་ས་ཐོབ་པ། གསོལ་བ་བཏབ་ན་བྱིན་རླབས་འབྱུང་བ་ལྟ་ཅི་སྨོས་པ་གཅིག་བསྒོམ། དེའི་ཐུགས་ཀ་ནས་འོད་ཟེར་འཕྲོས་པས། བརྒྱུད་པའི་བླ་མ་རྣམས་དང་། སངས་རྒྱས་དང་བྱང་ཆུབ་སེམས་དཔའ་དང་། ཡི་དམ་ལྷ་ཚོགས་དང་མཁའ་འགྲོ་ཆོས་སྐྱོང་དང་། རང་ལ་ཆོས་འབྲེལ་ཡོད་ཚད་ཐམས་ཅད་བསྟིམ་ནས། བླ་མ་དེ་དུས་གསུམ་སངས་རྒྱས་ཐམས་ཅད་ཀྱི་ངོ་བོར་བསྒོམས་ནས། མདུན་དུ་རང་ལ་གནོད་བྱེད་ཀྱིས་གཙོ་བྱས་པའི། ནམ་མཁའ་དང་མཉམས་པའི་སེམས་ཅན་ཐམས་ཅད་ལུས་གུས་པས་ཐལ་མོ་སྦྱར། ངག་གུས་པས་གསོལ་བ་འདེབས། ཡིད་གུས་པས་མོས་གུས་བྱེད་ཅིང་། ཀུ་དི་རི་རི་གསོལ་བ་འདེབས་པར་བསམ་ལ། བླ་མ་སངས་རྒྱས་རིན་པོ་ཆེ། བདག་འཛིན་བློ་ཡིས་ཐོངས་པར། དགོས་མེད་རྒྱུད་ལ་སྐྱེ་བར། སྒྱུ་ལུས་རྨི་ལམ་འབྱོངས་པར། འོད་གསལ་ཕྱག་རྒྱ་ཆེན་པོ་རྟོགས་པར་མཛད་དུ་གསོལ། །ཞེས་སྙིང་གའི་དཀྱིལ་རྐང་གི་ཁོངས། རུས་པའི་གཏིང་ནས་གསོལ་བ་དྲག་པོ་གདབ་བོ།
།མཁའ་འགྲོ་ཀུན་སྤྱོད་ཀྱི་རྒྱུད་ལས། གང་གི་དྲིན་གྱིས་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང་། །བླ་མ་རིན་ཅེན་ལྟ་བུའི་སྐུ། །རྡོ་རྗེ་ཅན་ཞབས་པད་ལ་འདུད། །ཅེས་དང་།
ནི་གུ་མས། ལམ་ལྔ་ས་བཅུའི་རིམ་པ་རྣམས། །མོས་གུས་སྟོབས་ཀྱིས་བགྲོད་པར་བྱ། །བླ་མའི་སྣང་བ་མི་འབྲལ་བ། །རྒྱུད་སྡེའི་དགོངས་པ་གནད་ཀྱི་མཆོག །ཅེས་སོ།
།དེ་ལྟར་གསོལ་བ་བཏབ་པས། སྣང་བ་བདེན་མེད་དུ་ཆམ་སོང་བ་དང་། རང་བདེ་མཆོག་ཏུ་སྒོམ་པའི་སྐུ་མདོག་ཕྱག་མཚན་རྒྱན་ཆ་ལུགས་རྣམ་པ་བཞུགས་ཚུལ་དང་ལྡན་པ། སྣང་བ་གཟུགས་སུ་གྲུབ་པ། རེག་པ་རྫས་སུ་མ་གྲུབ་པ། མེ་ལོང་ནང་གི་གཟུགས་བརྙན་ལྟ་བུ་འདི་རང་གི་བློས་བཀོད། བློ་ལ་ཤར་བ་མ་གཏོགས་པ། ཕྱི་རོལ་ན་དོན་ལོགས་སུ་གྲུབ་པ་གཅིག་ཀྱང་མེད། སྣང་ནི་སྣང་། བདེན་ནི་མི་བདེན། འདི་ཀ་རྨི་ལམ་ཡིན། སྒྱུ་མ་ཡིན་སྙ་མ་དུ་བསམ་མོ། དེ་ནས་ཕྱི་ས་ཆུ་མེ་རླུང་། ས་རྡོ་རི་བྲག །རྩི་ཤིང་ནགས་ཚལ། རི་རབ། ཁང་ཁྱིམ་རྩིགས་པ། རེ་ལྟེ་དང་། ནང་བཅུད་ཀྱིས་སེམས་ཅན་སྐྱེས་པ། བུད་མེད། དགྲ་གཉེན། རྟ་གླང་པ་སོགས་པ། མདོར་ན་སྣང་ཞིང་སྲིད་པས་བསྡུས་པའི་ཆོས་ཐམས་ཅད། རང་གི་བློས་བཀོད་བློ་ལ་ཤར་བ་མ་གཏོགས་པ། ཕྱི་རོལ་ན་དོན་ལོགས་སུ་གྲུབ་པ་གཅིག་ཀྱང་མེད། སྣང་ནི་སྣང་། བདེན་ནི་མི་བདེན། འདི་རྣམས་རྨི་ལམ་ཡིན། སྒྱུ་མ་ཡིན་སྙམ་དུ་རྩེ་གཅིག་ཏུ་སྒོམ་མོ།
།ཁྱེའུ་རབ་སྣང་གི་མདོ་ལས། ཆོས་རྣམས་སྒྱུ་མ་རྨི་ལམ་ཞེས། །གང་གིས་ཚིག་བརྗོད་དྲན་གྱུར་པས། །སྲིད་པའི་འཆིང་བ་ལས་གྲོལ་ནས། །ཚེ་འདི་ཉིད་ལ་སངས་རྒྱས་ངེས། །ཅེས་སོ།
རྗེས་ཤེས་ནི། སྤྱོད་ལམ་ཐམས་ཅད་དུ་འཆི་བ་ཡིན་སྙམ་པ་དང་། བླ་མའི་སྣང་བ་དང་མི་འབྲལ་བར། མོས་གུས་གདུངས་གདུངས་པ་དང་། ཁྱད་པར་དུ་ང་གཉིད་དུ་སོང་འདུག །འདི་རྨི་གྱིས་འགྲོ་འཆག་ཉལ་འདུག །རྨི་ལམ་གྱིས་ཟས་གོས། རྨི་ལམ་གྱི་གཏམ་སྙན་མི་སྙན། རྨི་ལམ་གྱི་ཆགས་སྡང་ལ་སོགས་པ་ཡིན་པར་འདུག་སྙམ་དུ་བསམ་ལ། ངག་ཏུ་ཡང་བརྗོད། སེམས་ཀྱིས་ཀྱང་སྒྱུ་མ་རྨི་ལམ་གྱིས་རྩིས་ཟིན་པར་བྱས་པས་ཅི་བྱས་ཐམས་ཅད་དགེ་སྦྱོར་དུ་འགྲོ་བ་ཡིན་ནོ།
།སྡུད་པ་ལས། འགྲོ་འཆག་ཉལ་དང་འདུག་པར་ཤེས་བཞིན་རབ་ཏུ་ལྡན། །གཉའ་ཤིང་གང་ཙམ་བལྟ་ཞིང་འགྲོ་ལ་སེམས་འཁྲུལ་མེད། །ཅེས་དང་།
ནི་གུ་མས། ཅིར་སྣང་སྒོམ་དུ་མ་ཤེས་ན། །གཉེན་པོ་རྟེན་གྱིན་ག་ན་ལང་། །ཡུལ་ངན་སྤངས་ཀྱིས་ག་ན་སྤོངས། །སྒྱུ་མར་ཤེས་པས་རང་སར་གྲོལ། །ཅེས་དང་། སྤྱོད་ལམ་སྣང་གྲགས་ཐམས་ཅད་ཀུན། །གཉིད་སོང་འདུན་པས་ཉམས་སུ་བླང་། །དངོས་སྣང་དང་ནི་རྨི་ལམ་གཉིས། །ཁྱད་པར་གཅིག་ཀྱང་ཡོད་མིན་ཏེ། །མ་གཏོགས་པ་ལ་གཉིས་སུ་སྣང་། །དེ་ཕྱིར་དེ་ལས་གཞན་དུ་མིན། །ཅེས་སོ།
།སྦྱང་བ་ནི། གཡང་དམ་མཁར་རྩེ་ལྟ་བུར་ཕྱིན་པར་བསམ་ནས། ཡ་ང་རྟིང་པ་གཡང་ཟར་བཅུག་སྟེ། ང་གཉིས་ལ་སོང་འདུག་འདི་རྨི་ལམ་གྱི་གཡང་དང་འཇིགས་པར་འདུག །དེ་ལ་བདེན་པར་གྲུབ་པ་མེད། །གང་སྦྱང་སྦྱང་ཡིན་སྙམ་དུ་བསམས་ལ། ས་ལ་མར་ཆད་ཀྱིས་ལྷུང་དུ་གཞུག །ཡར་བྱུང་བ་དང་ལྷ་སྐུ་འཕྲེང་བ་རྒྱུས་པ་ལྟ་བུར་བསམ་མོ། །ཡང་སྣང་བ་འདི་རྨི་ལམ་གྱི་སྣང་བར་འདུག །ཡིད་ཀྱི་ལུས་སུ་འདུག །རྨི་ལམ་དང་ཡིད་ལུས་ལ་གང་སྦྱང་སྦྱང་ཡིན་སྙམ་དུ་བསམ་ལ། འབྱུང་བཞི་དང་སེམས་ཅན་ཕྲ་རགས་ལ་སོགས་པ་ཅི་སྣང་ཐམས་ཅད་ལ་ཡར་ཐལ་མར་ཐལ། ཕར་ཐལ་ཚུར་ཐལ་དུ་སྦྱང་ངོ་།
སྤེལ་བ་དང་སྤྲུལ་པ་ལ་ཐུག་འཕྲད་ནི། ཡིད་ལུས་དང་རྨི་ལམ་གྱི་སྣང་བ་ལ་ཇི་ལྟར་སྤེལ་སྤེལ་དང་། གང་སྤྲུལ་ཡིན་སྙམ་དུ་བསམ་ལ། འབྱུང་བཞི་ཕྲ་རགས་ལ་སོགས་པ་གང་རུང་དུ་བསྒོམ་པ་ནི་སྤྲུལ་པ། དེ་རེ་རེ་ལའང་། གཅིག་ལས་བཅུ། བཅུ་ལས་བརྒྱ་སྟོང་ཁྲི་འབུམ་ལ་སོགས་པ་སྤེལ་ལོ།
།འཇིག་རྟེན་པའི་གང་འདུལ་ནི། བྱི་བ་འདུལ་བ་ལ་བྱི་ལ་དང་། བྱིའུ་ལ་ཁྲ། ཁྱིལ་སྦྱང་ཀི། སྦྱང་ཀི་ལ་སྟག །སྟག་ལ་སེང་གེ །མི་ལ་སྲིན་པོ་ལ་སོགས་པ་སྤྲུལ་ཞིང་། སྤེལ་ནས་འདེད་པ་དང་ཟ་བ་ལ་སོགས་པས་འདུལ་ལོ།
།འདས་པའི་གང་འདུལ་ནི། ཀླུ་ལ་ཁྱུང་། རྒྱལ་པོ་ལ་རྟ་མགྲིན། ཀླུ་བདུད་དང་ཀླུ་སྲིན་ལ་འཇམ་དཔལ་ཡེ་ཤེས་སེམས་དཔའ། སྲིན་པོ་དང་གནོད་སྦྱིན་ལ་ཕྱག་ན་རྡོ་རྗེ་ལ་སོགས་པར་སྤྲུལ་ཞིང་སྤེལ་ནས་ཕྱག་མཚན་གྱིས་གཏུབ་པ་ལ་སོགས་པས་བཏུལ་བས་སྲོག་སྔགས་འབུལ་བ་ལ་སོགས་པ་འབྱུང་ངོ་།
།སྒྱུར་བ་ནི། འདུན་པ་ལ་སོགས་པས་ལྷ་སྐུ་སྔོན་པོ་ལས་དཀར་པོ་དང་། དེ་ལས་སེར་པོ་ལ་སོགས་པ་དང་། ཞལ་ཕྱག་མང་ཉུང་དང་། ཞི་ཁྲོ་ལ་སོགས་པར་སྒྱུར་རོ། །ལྷ་སྐུ་དེ་རྣམས་མེ་ལོང་ནང་གི་གཟུགས་བརྙན་ལྟ་བུ་སྣང་ལ་རང་བཞིན་མེད་པ་གཟུང་འཛིན་གྱིས་བློ་ལ་སོགས་པ་ཞེན་པའི་དྲི་མ་ཐམས་ཅད་དང་བྲལ་བ་མ་འདྲེས་ལ་ཡོངས་སུ་རྫོགས་པ། གསལ་སྟོང་འཛིན་མེད། སྒྱུ་མ་རང་ཤར་དུ་རྟོགས་པར་བྱའོ།
ནི་གུ་མས། དེ་ཕྱིར་སྣང་བ་སྣ་ཚོགས་ལ། །སྒོ་ལྔའི་རྣམ་ཤེས་བསལ་དྭངས་ལ། །ཡིད་ཀྱིས་འཛིན་པ་མ་ཞུགས་པ། །དེ་ནི་གསལ་སྟོང་དབྱེར་མེད་དེ། །ཞེན་མེད་སྒྱུ་མ་རང་སྣང་ངོ་། །ཅེས་སོ།
།དེ་ལྟར་ཉིན་བར་ཉམས་སུ་བླངས་ནས་ནུབ་མོ་གཉིད་འགྲོ་ཁར། གཉིད་དུ་མ་སོང་བའི་སྣང་བ་འགགས། རྨི་ལམ་རགས་པ་མ་ཤར་བའི་གཉིད་དང་། རྨི་ལམ་གྱི་བར་དེར་མ་ཡེངས་པ་བྱས་ནས། རྨི་ལམ་ཡིན་སྙམ་པའི་འདུན་པ་ཡང་ཡང་བཏང་བས། དེར་ལྷ་སྐུའམ་མིའམ་ཆུ་ལ་སོགས་པའི་རྟོག་པ་རིབ་རིབ་པ་གཅིག་འབྱུང་སྟེ། གང་བྱུང་བ་དེ་རྨི་ལམ་གྱི་རྒྱུ་ཡིན་པས། དེ་རྨི་ལམ་དུ་ངོས་ཟིན་པར་བྱས་པས། ཁབ་མིག་སྐུད་པ་འཛུལ་བ་ལྟར་རྨི་ལམ་མུ་འབྱོངས་པར་འགྱུར་རོ། །དེའི་དུས་སུ་མིག་མི་འབྱེད་པར་འོག་རླུང་བསྐུམས་ལ། གང་ཟིན་པ་དེ་མང་པོ་དཔག་ཏུ་མེད་པ་སྤྲུལ་ནས། འདུན་པ་དྲག་པོ་བྱས་པས། རྨི་ལམ་ཟིན་མ་ཐོག་སད་འབྱམས་ལ་མི་འགྲོ་ཞིང་། སྦྱོང་སྤེལ་ཡུན་རིང་དུ་བྱར་འབྱུང་ངོ་།
།ནི་གུ་མས། དེ་ཡང་མིག་ནི་མི་འབྱེད་པར། །དྲན་སྣང་རྟོག་པའི་རི་མོ་རྣམས། །སྒྱུ་མ་རྨི་ལམ་ཐམས་ཅད་ནས། །འདུན་པ་དྲག་པོས་ཉམས་སུ་བླངས། །འཁྲུལ་སྣང་བྱུང་ན་ཡང་ཡང་སྦྱང་། །ཅེས་སོ།
།རྨི་ལམ་བདེན་མེད་སྒྱུ་མར་ཤེས། སྒྱུ་མ་སྒྱུ་འཛིན་དང་བྲལ་བས་འོད་གསལ་ཕྱག་རྒྱ་ཆེན་པོ་ཇི་ལྟ་བ་བཞིན་མངོན་དུ་འགྱུར་རོ། །རྨི་ལམ་དུ་ལྷའི་སྐུ་རང་ཤར་ཡུད་ཙམ་བྱུང་ན། བརདོ་ལོངས་སྐུའི་ས་བོན་ཐེབས་པ་ཡིན་ཏེ།
།ནི་གུ་མས། རྨི་ལམ་ཟིན་ནས་ལྷ་ཡི་སྐུ། །རང་ཤར་ཡུད་ཙམ་བྱུང་གྱུར་ན། །བར་དོ་ཟིན་པར་ཐེ་ཚོམ་མེད། །སྒྱུ་མར་གྱུར་པ་དེ་དང་མཚུངས། །ཅེས་སོ།
།དེ་ནས་གཉིད་སད་པ་དང་སྔར་གྱི་རྨི་ལམ་དང་། སད་པའི་འཁྲུལ་སྣང་གཉིས་བྱད་མེད་པར་བསྲེས་ཏེ།
།ནི་གུ་མས། དེ་ཡང་དྲན་འདུན་མོས་གུས་དང་། །བསྲེ་བའི་གནད་ཀྱིས་མཚམས་སྦྱར་ནས། །གཉིད་ལོག་སད་པར་གྱུར་པ་སྟེ། །སྔར་གྱི་རྨི་ལམ་ཟིན་པ་དང་། །སད་པའི་འཁྲུལ་སྣང་ཁྱད་མེད་བསྒོམ། །ཅེས་དང་། ཉིན་མཚན་དབྱེར་མེད་བསྲེ་བ་དང་། །ཅི་སྣང་འཁོར་ལོ་གསུམ་ལྡན་དུ། །མ་ཡེངས་ཉམས་སུ་བླངས་བྱས་ན། །མཆོད་པ་འབུལ་ཞིང་གསོལ་བ་འདེབས། །དེ་ཡི་རྨི་ལམ་སྤྲུལ་སྒྱུར་ལ།
།བརྟན་པ་ཐོབ་པས་སངས་རྒྱས་ནས། །འཇག་མིག་སྲིན་བུ་ཡན་ཆད་ལ། །སྒྱུ་མའི་རྩལ་ནི་སྦྱངས་པ་ལས། །དམིགས་མེད་སྒྱུ་ལུས་མངོས་འགྱུར་ནས། །སྒྱུ་མ་ལྷ་སྐུ་འོད་གསལ་རྣམས། །དབྱེར་མེད་གྱུར་པས་གསལ་སྣང་མཆེད། །ཡུལ་སྣང་ཇི་བཞིན་བགྲོད་གྱུར་པས། །ཅེས་དང་།
བླ་མ་རྨོག་ལྕོག་པས། དེ་ལྟར་ཡང་དང་ཡང་བསྒོམ་པས། །དམ་དུམ་སྐྱམ་སྐྱེམ་ཟིན་པར་འགྱུར། །གཉིད་སད་དུས་ན་བསྲེ་བ་གཅེས། །ཤར་དང་སྣང་དང་དོན་བྱེད་ནུས། །ཤེས་ནས་གྲོལ་བར་བྱེད་པ་ཡིན། །ཅེས་སོ།
ྡེ་ལ་སྒྱུ་མ་རང་ཤར་དེ་ཉིད་ཕྱག་རྒྱ་ཆེན་པོ་ཡིན་པས། ཏོལ་སྐྱེས་ཀྱི་ཤེས་པ་ངོས་བཟུང་ནས་དགག་སྒྲུབ་དང་གསལ་བཞག་མེད་པ། གསལ་སྟོང་འཛིན་མེད་དུ་ཐག་བཅད་ནས་གོམས་འདྲིས་བྱས་ནས།
།ནི་གུ་མས། སྣང་གྲགས་ཆོས་རྣམས་ཐམས་ཅད་ཀུན། །རང་བཞིན་མ་གྲུབ་མཐའ་བྲལ་བའི། །སྣང་སྟོང་དབྱེར་མེད་སྒྱུ་མར་ཤར། །དེ་ཡང་དྭངས་པའི་རྒྱ་མཚོ་ལ། །ཆུ་བུར་བྱུང་ཞིང་ཐིམ་གྱུར་པ། །དེ་བཞིན་རྣམ་རྟོག་ཆུ་བུར་ཡང་། །ཆོས་ཉིད་རྒྱ་མཚོ་མ་གཏོགས་པ། །གཞན་དུ་གྱུར་པ་མི་སྲིད་ཀྱིས། །དགག་སྒྲུབ་མི་བྱ་གློད་ལ་ཞོག །དེ་ཚེ་རྟོག་ཚོགས་ན་བུན་རྣམས། །གཞི་མེད་གྱུར་པས་གཡོ་མི་ནུས། །ངེས་ཤེས་བསྐྱེད་ཅིང་ཐག་བཅད་ནས། །གསལ་གཞག་མེད་པས་གོམས་པར་བྱ། །ཅེས་སོ། །དེ་ལྟར་སྒྱུ་མ་རྨི་ལམ་འོད་གསལ་རྟོགས་པས་བར་དོ་འབྱངས་སོ།
།དུས་དེར་རྒྱལ་བ་ལོངས་སྤྱོད་རྫོགས་པའི་སྐུ་རང་ཤར་དུ་བྱུང་ནས། འཁོར་བའི་རྒྱ་མཚོ་མ་སྟོངས་ཀྱི་བར་དུ་སེམས་ཅན་ཐམས་ཅད་སྨིན་ཅིང་གྲོལ་བར་བྱེད་པར་འགྱུར་རོ།
།དམ་ཚིག་བཀོད་པ་ལས། ཉིན་པར་སྣང་སྟོང་སྒྱུ་མ་དང་། །མཚན་མོ་རྨི་ལམ་ལྷ་ཡི་སྐུ། །རང་ཤར་དེ་ལས་མ་གཡོས་ཚེ། །དེ་ནི་རྒྱལ་བ་ལོངས་སྤྱོད་རྫོགས། །སྐད་ཅིག་བར་དེ་མྱ་ངན་འདས། །རྒྱུན་ལ་གནས་ན་སྨོས་ཅི་དགོས། །སྒྱུ་མ་འོད་གསལ་དེ་བཞིན་ནོ། །འདི་ནི་གཞན་དུ་བརྗོད་མི་བྱ། །ཅེས་དང་།
།ནི་གུ་མས། རྨི་ལམ་ཟིན་ནས་འོད་གསལ་རྟོགས། །དེ་ནི་བར་དོ་འབྱོངས་པ་ཡིན། །ཅེས་གསུངས་སོ།
།མདོར་ན་དལ་འབྱོར་རྙེད་དཀའ་བསམ། འཆི་བ་མི་རྟག་པ་སྒོམ། །འཁོར་བར་སྐྱོ་ཤས་བསྐྱེད། དགོས་མེད་རྒྱུད་ལ་སྦྱོར། །རྗེད་ངས་ལོག་ལྟ་སྤོངས། །འབྲལ་མེད་མོས་གུས་ཀྱིས། །སྒྱུ་མ་རྨི་ལམ་བསམ། །རང་ཤར་ཕྱག་ཆེན་སྒོམ། །ལོ་ཟླ་མཐར་ཕྱིན་ཕྱིན། །དགེ་དེས་ཅི་སྣང་དུས་ཀུན་ཏུ། །བདེན་མེད་སྒྱུ་མའི་སྣང་བ་ཤར། །གསལ་སྟོང་འཛིན་མེད་མངོན་གྱུར་ཏེ། །འབྲས་བུ་སྐུ་བཞི་མཏཧར་ཕྱིན་ཤོག
།སྒྱུ་ལུས་གདན་ཐོག་གཅིག་མ་སྔགས་འཆང་དྷྭ་ཛ་ལཀྵས་ཡི་གེར་བཀོད་པའོ།། །།