Ni gu'i brgyud pa'i gsol 'debs 2

Resource ID	SCv10p709
Title	nai gu'i brgyud pa'i gsol 'debs
Alt. title	ne gu'i brgyud 'debs
Topics	Lineage prayer
Link	BDRC W23922 BDRC W2DB16431

ན་མོ་གུ་རུ།
།ཟུང་འཇུག་གི་རྒྱལ་སྲིད་སྐྱོང་བའི་ས། །གནས་འོག་མིན་ཆོས་ཀྱི་ཕོ་བྲང་དུ། །སངས་རྒྱས་རྡོ་རྗེ་འཆང་ཆེན་ལ་གསོལ་བ་འདེབས། །ཡུམ་ལྟེ་བའི་ཨ་ཤད་མེ་འོད་ཀྱིས། །ཡབ་སྤྱི་བོའི་ཧྃ་ཡིག་ལེགས་བཞུས་ཏེ། །བདེ་སྟོང་ཡེ་ཤེས་སུ་འཆར་བར་བྱིན་གྱིས་རློབས། །གསང་ཆེན་གར་གྱི་རོལ་པའི་ས། །གནས་སེང་ལྡེང་འཁྲིགས་པའི་ནགས་ཚལ་དུ། །ཡེ་ཤེས་མཁའ་འགྲོ་ནི་གུ་ལ་གསོལ་བ་འདེབས།
།ལམ་བདེན་མེད་ཀྱི་དྲན་འདུན་དྲག་པོའི་མཐུས། །ཆོས་སྣང་གྲགས་ཀྱི་རོལ་པ་ཇི་སྙེད་པ། །སྒྱུ་མའི་རང་སྣང་དུ་འཆར་བར༴ །གཞན་ཕན་གྱི་འཁོར་ལོ་བསྐོར་བའི་ས། །དཔལ་རི་བོ་ཆེ་ཡི་རྩེ་མོ་རུ། །གྲུབ་ཐོབ་ཐང་སྟོང་རྒྱལ་པོ་ལ༴
།སྔགས་དབང་བཞིའི་དགོས་འདོད་ཀུན་ཚང་བའི། །གནད་ཐིག་ལེ་དཀར་དམར་གྱི་འབྲོས་འདེད་ཀྱིས། །རྨི་ལམ་ཟིན་ཅིང་འབྱོང་བར་བྱིན༴ །རྣམ་གཡེངས་དང་འདུ་འཛི་དབེན་པའི་ས། །གནས་རང་བྱུང་བྲག་གི་ཕུག་པ་རུ། །རས་ཆུང་བསོད་ནམས་རྒྱལ་མཚན་༼རས་ཆུང་བསོད་ནམས་རྒྱ་མཚོ་༽ལ་གསོལ༴
།ལམ་འབྲལ་མེད་ཀྱི་མོས་གུས་ཆེན་པོའི་མཐུས། །གཞི་སྐྱེ་མེད་ཀྱི་འོད་གསལ་མངོན་གྱུར་ནས། །གཏི་མུག་མུན་པ་སངས་བར་བྱིན༴ །དཔའ་བོ་མཁའ་འགྲོ་འདུ་བའི་ས། །གངས་དཀར་གྱི་རྒྱལ་པོ་ཏི་སེ་རུ། །རྣལ་འབྱོར་བསོད་ནམས་རྒྱ་མཚོ་༼རྣལ་འབྱོར་བསོད་ནམས་རྒྱལ་མཚན་༽ལ༴
།རྟེན་དྭངས་གསལ་ཨ་དཀར་དྲི་མ་མེད། །སྒོ་ཚངས་པའི་ལམ་ནས་རྒྱང་ཐོན་ཏེ། །མཁའ་སྤྱོད་གོ་འཕང་ཐོབ་པར༴ །ཟབ་རྒྱས་ཆོས་སྒྲ་སྒྲོགས་པའི་ས། །གནས་ཆོས་ལུང་བྱང་རྩེའི་ཕོ་བྲང་དུ། །འཇམ་མགོན་གྲུབ་པའི་དཔའ་བོ་ལ༴
།སེམས་སྐྱོ་ཤས་ངེས་འབྱུང་གི་ལེགས་བསྐུལ་ནས། །གནས་འཁོར་བའི་མངལ་སྒོ་ཀུན་བཀག་སྟེ། །བར་དོ་ལོངས་སྤྱོད་རྗོགས་སྐུ་རུ་བྱིན༴ །ལྷན་སྐྱེས་ཀྱི་ཡེ་ཤེས་བསྐྱངས་བའི་ས། །གནས་གྲུབ་རི་བསམ་གཏན་ཁད་བུ་རུ། །སྐལ་བཟང་འགྱུར་མེད་བདེ་ཆེན་ལ་གསོལ་བ་འདེབས།
།ཆོས་གསུང་རབ་ཀྱི་རྒྱ་མཚོ་ཆེན་པོ་ལས། །དོན་ཟབ་ལམ་གྱི་ནོར་བུ་ལེགས་བླངས་ནས། །མཆོག་གི་དངོས་གྲུབ་ཐོབ་པར་བྱིན༴ W2DB16431 stops here །བཤད་སྒྲུབ་ཀྱི་བསྟན་པ་བསྐྱངས་བའི་ས། །གནས་མང་མཁར་དགོན་གསར་གྱི་དགོན་པ་རུ། །དྲིན་ཆེན་ངག་དབང་ཆོས་གྲགས་ལ༴
།བཀའ་མདོ་རྒྱུད་ཀྱི་ལྷ་ལམ་ཡངས་པ་ལས། །ཆོས་ལེགས་བཤད་ཀྱི་སྦྲང་ཆར་རྒྱུན་མི་ཆད། །ཕན་བདེའི་མེ་ཏོག་སྐྱེ་བར་བྱིན༴ །མཆོག་གསུམ་གྱི་ཐུགས་རྗེའི་སྐྱབ་ཆུབ་པའི། །གནས་གར་བཞུགས་ཆོས་ཀྱི་ཕོ་བྲང་དུ། །ངག་དབང་བསོད་ནམས་རྒྱལ་མཚན་ལ༴
།གཞི་ཚུལ་གནས་ཐོས་བསམ་བསྒོམ་པའི་མཐུས། །ལམ་ཡངས་ཟབ་ཀྱི་གདམས་པ་ལ་བརྟེན་ནས། །དོན་གཉིས་ལྷུན་གྱིས་གྲུབ་པར་བྱིན༴ །སྙན་བརྒྱུད་ཀྱི་བསྟན་པ་སྤེལ་བའི་ས། །གནས་གསང་སྔགས་བདེ་ལྔན་གྱི་བྲག་ཕུག་ཏུ། །ངག་དབང་བསྟན་པ་རབ་རྒྱས་ལ༴
།གཞི་སྔོན་གྱི་སྦྱོངས་ཤུག་མཐུ་བལྟས་པས། །ལམ་རང་བབས་གསུམ་གྱི་ཕ་རོལ་སོན། །འབྲས་བུ་སྐུ་གསུམ་རྟོགས་པར་བྱིན༴ །ཐེག་ཆེན་གྱི་ངེས་གསང་སྒྲོགས་པའི་ས། །གནས་སྤྲོ་མོ་ལུང་གི་དབེན་གནས་སུ། །རྗེ་བཙུན་བསོད་ནམས་ཆོས་འཕེལ་ལ་གསོལ་བ་འདེབས།
།སྦྱོང་བྱ་སྦྱོང་བྱེད་འབྲེལ་པ་ལས། །འཁྲུལ་མཚན་གྱི་སྤྲོས་པ་དབྱིངས་སུ་དག །ངོ་བོ་ཉིད་སྐུ་འགྲུབ་པར་བྱིན་གྱིས་རློབས།།
སརྦ་མངྒ་ལཾ་བྷ་བ་ཏུ།།