Ni gu ma'i phyag rgya chen po

Resource ID	SCv8p788
Title	ni gu ma'i phyag rgya chen po
Topics	Mahamudra Gauma
Sub-Topics	Root text
Author	Niguma, Lendarma Lodrö
Associated Person	Khyungpo Neljor
Link	BDRC W23922 BDRC W3CN18508 BDRC W22103 (p.119)

༄༅། །ནི་གུ་མའི་ཕྱག་རྒྱ་ཆེན་པོ།།

བླ་མ་ཌཱ་ཀི་རྣམས་ལ་ཕྱག་འཚལ་ལོ།
ཡེ་ཤེས་ཀྱི་ཌཱ་ཀི་མ་ནཻ་གུ་མའི་ཕྱག་རྒྱ་ཆེན་པོ་ལ་གསུམ་ལས། སྔོན་འགྲོ་རང་བབས་རྣམ་གསུམ། དངོས་གཞི་སྐྱོན་བཞི་རང་གྲོལ། འབྲས་བུ་སྐུ་བཞི་རང་ཤར་རོ།
དང་པོ་ནི། དབེན་པའི་གནས་སུ་ལུས་གནད་ལེགས་པར་བཅའ། སེམས་བསྐྱེད། ལུས་ཡི་དམ་དུ་བསྒོམ། སྤྱི་བོའི་བླ་མ་ལ་གསོལ་བ་དྲག་པོ་བཏབ་པའི་རྗེས་ལ།
ལུས་ཉ་བཞི་རྩ་བཞི་གློད་ལ། རྩོལ་མེད་ཀྱི་ངང་ལ་བཞག་པ་ནི། ལུས་རང་བབས་སོ།
མཆུ་འབྱེད་བཙུམ་གྱི་རྩོལ་བ་མེད་ཅིང་། ངག་སྨྲ་བརྗོད་དང་བྲལ་བ་ནི། ངག་རང་བབས་སོ།
མིག་གི་ལྟ་སྟངས་ཀྱིས་བསྒོམ་འདོད་ཀྱི་རྟོག་པ་དང་བྲལ་ཏེ། སྔོན་འགྲོ་བསྒོམ་པ་ཡིན་སྙམ་པའི་རྟོག་པ་ཡང་མི་བྱ་བར། ཧད་དེ་ཕྱད་དེ་ཀླས་པ་ནི། སེམས་རང་བབས་སོ།
དེ་ལྟ་བུའི་ངང་ལ་ལྷ་འདོད་ཆགས་སྐྱེས་པ་བཞིན་དུ་ཧད་དེ་ལུས་པ་དེ། སྔོན་འགྲོ་དང་པོའི་ཚད་ཡིན་ཏེ། ཐ་མལ་གྱི་ཤེས་པ་ཞེས་ཀྱང་བྱ། དང་པོའི་སེམས་ཞེས་ཀྱང་བྱ་སྟེ། ཆད་པ་ངལ་བསོ་བ་ལ་སོགས་པའི་དུས་སུ། སེམས་ཅན་ཀུན་ལ་འཆར་ཏེ། ངོས་མ་ཟིན་པས་འཁོར་བར་འཁྱམས་པ་ཡིན་གསུང་ངོ་།
ད་ནི་དུས་ཐམས་ཅད་དུ་ངོས་ཟིན་པར་བྱ་སྟེ། ཟན་ཟ་བ་ལ་སོགས་པའམ། ཕྲེང་བ་ལྟ་བུ་ལག་ཏུ་ཅི་བྱུང་ཡང་། གླང་པོ་ཆེའི་ལྟ་སྟངས་ཀྱིས་ཧད་དེ་ལུས་པ་དེ་ལ་བཞག
།དེ་བཞིན་དུ་གཡས་གཡོན་ནམ། ནམ་མཁའ་ལ་སོགས་པ་ཐག་ཉེ་རིང་གང་ལ་བལྟས་ཀྱང་། དང་པོ་མིག་སྦྲིད་ཆིལ་བ་ལྟ་བུ་གསལ་སྟོང་འཛིན་མེད་ལ་ཕྱམ་སོང་བ་དང་། ངའི་སྔོན་འགྲོ་རང་ཤར་ནས་འདུག་སྙམ་དུ། ངོས་བཟུང་ལ་ཧད་དེ་བཞག་གོ
དེར་མ་ཟད་ཧད་དེ་ཕྱད་དེ་བདེ་ཉིད་ཀྱི་ངང་ནས། ཆམ་ཆམ་འགྲོ་བ་དང་། འཆག་པ་ཆེ་ཆུང་དུ་རྩ་ཆུ་འཆག་པའི་ཚེ། མ་སྲིང་བརྒྱས་བསྐོར་ཡང་ཡང་བ་དང་། བག་ཚ་བ་དང་བྲལ་བར་བྱ་སྟེ། ཉལ་བ་དང་། ལངས་པ་དང་། འདུག་པ། སྤྱོད་ལམ་རྣམ་བཞི་གང་གི་དུས་སུ་ཡང་། གསལ་སྟོང་འཛིན་མེད་ཀྱི་ངང་ལ་མ་ཡེངས་པར་གནས་པར་བྱ་སྟེ།
སྡུད་པ་ལས། འགྲོ་འཆག་ཉལ་དང་འདུག་པར་ཤེས་བཞིན་རབ་ཏུ་ལྡན། །གཉའ་ཤིང་གང་ཙམ་བལྟ་ཞིང་འགྲོ་ལ་སེམས་འཁྲུལ་མེད། ཅེས་སོ།
མདོར་ན་གཏམ་སྨྲ་བ། མདོ་འདོན་པ། སྔགས་བཟླས་པ། ཆོས་ཉན་བཤད་ལ་སོགས་པ། ཐམས་ཅད་ཀྱི་དུས་སུ་ཡང་གསལ་སྟོང་འཛིན་མེད་ཀྱི་ངང་ལ་ཧད་དེ་བ་དེ་ལས་མ་གཡོས་པར་བྱའོ།
དེ་ལྟ་བུའི་སྔོན་འགྲོ་རྣམས་ཐེམ་པའི་དུས་སུ། གཏོར་ཚོགས་བཟང་པོ་དང་། གསེར་གྱི་མཎྜལ་ཕུལ་ལ། རྐུན་པོའི་ངོ་སྤྲོད་དེ་ལུགས་སྦྱོར་དང་ལྡན་པས་ཡིད་ཆེས་པར་བྱ་སྟེ། ནཻ་གུ་མ་སྔོན་འགྲོ་ལ་གཙོ་བོར་བྱེད། མཻ་ཏྲི་པ་དངོས་གཞི་ལ་གཙོ་བོར་བྱེད། སུ་ཀ་མ་སི་དྡྷི་རྗེས་ལ་གཙོ་བོར་བྱེད་དོ།
གཉིས་པ་དངོས་གཞི་སྐྱོན་བཞི་དང་བྲལ་བར་བྱ་སྟེ།
སེམས་སྟོང་པ་ཆོ་སྐུ་དང་འདུ་འབྲལ་མེད་ཀྱང་། ཉེ་དྲགས་པས་མ་མཐོང་བའི་སྐྱོན་གྱིས་འཁོར་བར་འཁྱམས། ཕྱག་རྒྱ་ཆེན་པོ་རང་ལ་ཤར་ཀྱང་། ཕྱོགས་གང་ནས་ཀྱང་དཔེས་མཚོན་པར་མི་ནུས་ཤིང་། ཟབ་དྲགས་པས་ངོས་མ་ཟིན། རང་བབས་སུ་ནམ་བཞག་ཀྱང་འཆར་ཏེ། སླ་དྲགས་པས་ཡིད་མ་ཆེས་པར། ཐེ་ཚོམ་བྱེད་ཅིང་ཡེངས་མེད་དུ་བསྒོམ་པ་དང་བྲལ་བའོ།
གསལ་སྟོང་བདེ་བའི་སྐུ་གསུམ་རང་ལ་ཤར་ཡང་། བཟང་དྲགས་པས་བློར་མ་ཤོང་། ངེས་ཤེས་མ་སྐྱེས་པས་རྟོགས་པ་ཐག་ཆོད་དང་བྲལ་བའི་སྐྱོན་གྱིས་འཁོར་བར་འཁྱམས་སོ།
གསུམ་པ་རང་ཤར་དུ་བཞག་པའི་དུས་སུ། ཁ་དོག་དང་དབྱིབས་ལ་སོགས་པ་གང་དུ་ཡང་མ་གྲུབ་པས། ཆོས་སྐུ་རང་ཤར་མཐར་ཐུག་གོ །ཡེ་ཤེས་ནི་ཆོས་དབྱིངས་ཡེ་ཤེས་སོ། སྟོང་པ་སྣ་ཚོགས་སུ་ཤར་བས་སྤྲུལ་སྐུ་རང་ཤར་རོ། ཡེ་ཤེས་ནི་མེ་ལོང་ལྟ་བུའོ། བར་གྱི་བདེ་བ་ལོངས་སྐུ་རང་ཤར་མཐར་ཐུག་གོ །ཡེ་ཤེས་ནི་སོ་སོར་རྟོག་པའོ། དེ་གསུམ་རང་བཞིན་གྱིས་དབྱེར་མི་ཕྱེད་པ་ནི། བདེ་བ་ཆེན་པོའི་འབྲས་བུ་སྐུ་བཞི་རང་ཤར་མཐར་ཐུག་གོ །ཡེ་ཤེས་ནི་མཉམ་པ་ཉིད་དོ། སྐུ་བཞི་ཕྲིན་ལས་ལྷུན་གྲུབ་ཏུ་འབྱང་བས་བྱ་བ་གྲུབ་པའི་ཡེ་ཤེས་སོ། དེ་ཉིད་ལ་རྟོག་མེད་ཀྱི་ཆ་དེ་ཇི་ལྟ་བའི་ཡེ་ཤེས་སོ། མི་རྟོག་པ་སྣ་ཚོགས་སུ་གསལ་བ་དེ། ཇི་སྙེད་པ་མཁྱེན་པའི་ཡེ་ཤེས་སོ། དབྱེར་མི་ཕྱེད་པས་དབྱིངས་དང་ཡེ་ཤེས་གཉིས་སུ་མེད་པ་ཞེས་བྱའོ།
བོགས་འདོན་ནི་དེ་རྣམས་ལ་ཐག་ཆོད་ངེས་ཤེས་བསྐྱེད་ཅིང་། གསལ་སྟོང་འཛིན་མེད་ཀྱི་ངང་ལ་ཧད་དེ་བཞག་གོ
།གསོལ་བ་དྲག་པོ་བཏབ་ཀྱི་ན་ཡང་། སེམས་གསལ་སྟོང་འཛིན་མེད་ཀྱི་ངང་ལ་ཧད་དེ་བཞག་གོ
།མི་གསེབ་ཏུ་འགྲོ་བ་དང་། འགྲོ་འདུག་དུས་སུ་ཡང་། མོས་གུས་གདུང་གདུང་པ་བྱས་ལ་ཧད་དེ་བཞག །སྙིང་རྗེ་ལ་ཡང་དེ་ཉིད་ཀྱི་ངང་ནས། འཁོར་འདས་ཐམས་ཅད་སྟོང་ཞིང་བདག་མེད་པ་ཡིན་པ་ལ། ང་དང་བདག་ཏུ་བཟུང་ནས་འཁོར་བར་འཁྱམས་པ་སྙིང་རེ་རྗེ་སྙམ་དུ་བསྒོམ་ཞིང་ཧད་དེ་བཞག་གོ
།ལྷ་སྐུ་ཤེས་པ་རླུང་དང་བསྲེ། །རྟོག་པ་ཐམས་ཅད་འགག་པར་འགྱུར།
།ཐ་མལ་ཤེས་པ་རླུང་དང་བསྲེ། །རྟོགས་པ་ཡར་ངོ་བཞིན་དུ་འཕེལ།
།ཟུང་འཇུག་ཤེས་པ་རླུང་དང་བསྲེ། །ལོ་ཟླས་སངས་རྒྱས་མངོན་དུ་བྱེད།
དགེའོ།།

༈ ན་མོ་གུ་རུ།
རྗེས་ཀྱི་ཆོས་ལ། གང་ཤར་ངོས་བཟུང་བྱ། ཐག་ཆོད་ངེས་ཤེས་བསྐྱེད། ཡེངས་མེད་ཆུ་བོ་བརྟེན། ཚད་མེད་བཞི་ལ་འབད། ཡར་ངོ་བཞིན་དུ་འགྱུར། ལོ་ཟླས་མཐར་ཕྱིན་ནོ། དམ་ཚིག་ལ་ཡིད་གཉིས་སྤང་བར་བྱའོ།
།ལྷ་སྐུ་གསལ་སྟོང་རླུང་དང་བསྲེ། །ཐ་མལ་རྟོག་པ་འགག་པར་འགྱུར།
།ཐ་མལ་ཤེས་པ་རླུང་དང་བསྲེ། །ཉམས་མྱོང་ཡར་ངོ་བཞིན་དུ་འཕེལ།
།འོད་གསལ་ལྷ་སྐུ་རླུང་དང་བསྲེ། མཐར་ཐུག་འབྲས་བུ་མངོན་དུ་འགྱུར།
སྔོན་འགྲོ་དངོས་གཞི་རྗེས་རྣམས་ལ། སྔོན་འགྲོའི་ཚད་དང་དེ་ཉིད་བརྟན་ཚད་དང་། དངོས་གཞིའི་ཚད་དང་དེ་ཉིད་བརྟན་ཚད་དང་། རྗེས་ཀྱི་ཚད་དང་། དེའི་བརྟེན་ཚད་དམ་པའི་ཞལ་ལས་དྲིས། ཉིན་མཚན་བར་དོའི་འོད་གསལ་མ་བུར་བཅས། སྐུ་གསུམ་དབྱེར་མེད་རང་ཤར་ཆེན་པོར་ལྟོས། མདོ་རྒྱུད་ཀུན་ཏུ་བསྟན་ཀྱང་རང་བཞིན་གབ། དེ་ཕྱིར་བླ་མའི་དྲིན་ལས་རྟོགས་པར་བགྱིས། ཡིད་ལ་མི་བྱེད་རེ་དོགས་ཀུན་བྲལ་བའི། ཐ་མལ་ཤེས་པ་ཁྱོད་ལ་ཕྱག་འཚལ་ལོ། མི་རབས་བདུན་དུ་རྒྱལ་རྒྱུད་སིར་གྱི་ཁ། རྡོ་རྗེ་རྒྱ་ཡིས་བཏབ་བོ་ས་མ་ཡཱ། མ་ཧཱ་མུ་དྲ་རྫོགས་སོ།
ཡེ་ཤེས་ཀྱི་མཁའ་འགྲོ་མ་དེ་ཉིད་ལ་གུས་པས་གསེར་སྲང་ལྔ་བརྒྱ་ཕུལ་ནས་ཞུས་ཏེ། ལོ་ཙཱ་བ་གླན་དར་མ་བློ་གྲོས་ཀྱིས་བསྒྱར་ནས། བདག་ཁྱུང་པོ་རྣལ་འབྱོར་ཁྱུང་པོ་རྣལ་འབྱོར་པས་ཉམས་སུ་མྱོང་བར་བྱས་པའོ། ཨྀཐི