Zhi ba nor du sgrub pa'i gdams pa

Resource ID	SCv11p249
Title	zhi ba nor du sgrub pa'i gdams pa
Alt. title	mgon po yid bzhin nor bu'i las tshogs thun mong ma yin pa
Topics	White protector
Sub-Topics	Activity practices
Link	BDRC W23922 BDRC W1KG4284
Notes	Same text as mgon po yid bzhin nor bu'i las tshogs thun mong ma yin pa

༈ ཞི་བ་ནོར་དུ་སྒྲུབ་པའི་གདམས་པ་བཞུགས་སོ།།

༈ ༼བི༽ བླ་མ་དམ་པ་རྣམས་ལ་ཕྱག་འཚལ་ལོ།
།ལས་ཁ་ཚར་འདི་ལ་ཞི་བ་ནོར་དུ་སྒྲུབ་པ། དྲག་པོ་མཐུ་རུ་སྒྲུབ་པ་གཉིས་ལས། འདིར་མྱུར་མཛད་ཅེས་པ་ལ་རྟེན་ནས། ཞི་བ་ནོར་དུ་སྒྲུབ་པའོ།
།དེ་ལ་དང་པོ་དཀྱིལ་འཁོར་བྲི་བ་དང་། བུམ་པ་བཅའ་བ་དང་། རྫས་རྣམས་བསགས་པ་དང་། ལྷ་བསྐྱེད་པ་དང་། བསྙེན་པ་བསྐྱེད་པ་དང་། རྟགས་ཐོན་པའོ།
།དེ་ལ་དཀྱིལ་འཁོར་བྲི་བ་གཞུང་ལྟར་བྱ། བུམ་པ་བཅའ་བ་དཀྱིལ་འཁོར་བྲིས་པའི་མཉྫི་ལ་སོགས་པའི་ཁར་བཞག །གཟུངས་ཐག་ནང་རྫས་སོགས་དང་ལྡན་པར་བྱ། མཆོད་གཏོར་རྒྱས་པ་བཤམས། སྭ་བྷཱ་ཝའི་སྔགས་ཀྱིས་སྟོང་པར་སྦྱངས། སྟོང་པའི་ངང་ལས་བྷྲཱུཾ་ལས་བུམ་པ་ནང་གཞལ་ཡས་ཁང་དུ་བསམ། པདྨ་དང་ཉི་མའི་གདན་སྟེང་ཧྲཱིའམ་གྷ་ཏའི་ཡིག་འབྲུ་ལས་འོད་འཕྲོས། འགྲོ་བའི་དོན་བྱས། ཡིག་འབྲུ་ལ་ཐིམ། ཧྲཱིཿལས་མགོན་པོར་ཀྲོང་གིས་བསྐྱེད། དེ་ཡང་སྐུ་མདོག་དཀར་པོ་ཞལ་གཅིག་ཕྱག་དྲུག་པ། གཡས་དང་པོ་ན་ཡིད་བཞིན་གྱི་ནོར་བུ་རིན་པོ་ཆེ། གཉིས་པ་ན་ནེའུ་ལེ། གསུམ་པ་ན་བུམ་པ། གཡོན་དང་པོ་ན་ལོངས་སྤྱོད་པའི་འཁོར་ལོ། གཉིས་པ་ན་ནེའུ་ལེ། གསུམ་པ་ན་འགུགས་པའི་ཕྱག་རྒྱ། མཐེ་བོང་སྲིན་ལག་སྤྲད་པའོ། །དེ་ནས་ཡེ་ཤེས་པ་གཞུག །དབང་བསྐུར་རྫོགས།
བྱང་ཆུབ་སེམས་ཀྱིས་ཐོག་དྲངས་ལ། །ཡན་ལག་བདུན་པ་རྫོགས་པར་བྱ། །དེའི་ཐུགས་ཀའི་ཧྲཱིཿལས་ནི། །སྔགས་ལ་ཤམ་བུར་བཅས་པས་བསྐོར། །གྷའམ་ཧྲཱིཿལས་འོད་འཕྲོས་པས། །སྤྱན་དྲངས་གཉིས་སུ་མེད་པར་བསྟིམ། །གཟུངས་ཐག་བཟུང་ལ་སྙིང་པོ་བཟླས། །ལྷ་ཡི་ཐུགས་དམ་རྒྱུད་བསྐུལ་ནས། །འོད་བྱུང་བུམ་པའི་རྫས་ལ་ཕོག །རིན་པོ་ཆེ་དང་བདུད་རྩིར་གྱུར། །ཕྱོགས་བཅུའི་འཇིག་རྟེན་ཐམས་ཅད་ཀྱི། །དགོས་འདོད་མ་ལུས་འོད་ཀྱིས་བསྡུས། །ནོར་གྱི་ཆར་པ་དབབ་བྱ་སྟེ། །བུམ་པའི་ནང་དུ་ཐིམ་པར་བསམ།
།ཨོཾ་མ་ཧཱ་ཀཱ་ལ་གྷ་ན་པ་ཏ་ཡེ་སྭཱ་ཧཱ། ཞེས་པའི་སྙིང་པོ་ནི།
སྨྲ་བཅད་ཁམས་ཀྱི་ཐུབ་ཚད་བགྲང་། །གསོལ་བ་འདེབས་ལུགས་འདི་བཞིན་བྱ། །ཇོ་བོ་གཟི་ལྡན་བདག་ལ་དགོངས་སུ་གསོལ། །བདག་མིང་འདི་ཞེས་བགྱིད་པ་ཡིས། །རྫོགས་པའི་བྱང་ཆུབ་སྒྲུབ་པ་ལ། །སྦྱིན་པ་ཡོངས་སུ་རྫོགས་བྱའི་ཕྱིར། །འབྱོར་པ་ཆེན་པོའི་དངོས་གྲུབ་སྩོལ། །ཞེས་གསོལ་བ་ལན་བདུན་གདབ་བོ།
།རྟགས་ནི་འདི་ལྟར་ཤེས་པར་བྱ། །བསྒྲུབས་པར་བྱས་པའི་དུས་སུ་ནི། །ནོར་ཟས་དབུལ་བ་བྱུང་ན་བཟང་། །ཞལ་མཐོང་བ་ནི་རབ་ཡིན་ནོ། །རྨི་ལམ་རྟགས་ནི་འདི་ལྟ་སྟེ། །མེ་ཏོག་འཐུ་དང་རྩས་མ་བརྔ། །གཞན་གྱིས་ཟས་ནོར་དབུལ་བ་དང་། །ཕྱིང་པ་གོས་དཀར་གྱོན་པ་དང་། །ཆུ་ཡི་ལོངས་སྤྱོད་བྱེད་པ་དང་། །གོ་ཆ་དམག་མི་རྨིས་ན་བཟང་། །སྒྲུབ་པ་ཐོན་པའི་དུས་སུ་ནི། །བུམ་པའི་ནང་ནས་རང་ཉིད་བཟའ། །དངོས་གྲུབ་བླང་བའི་དོན་ཡང་ཡིན། །མ་གྲུབ་ལན་གསུམ་སྦྱར་བར་བྱ། །དངོས་སུ་བྱུང་བའི་རྫས་རྣམས་ལ། །རྟེན་བཞེངས་སྒྲུབ་ལ་བརྩོན་པར་བྱ། །དཀོན་མཆོག་གསུམ་ནི་མཆོད་པར་བྱ། །དབུལ་པོ་རྣམས་ཀྱི་དོན་ཡང་བྱ། །རང་ལ་ཞེན་ཆགས་མེད་པར་བྱ། །དེ་ནས་བྱང་ཆུབ་སྙིང་པོའི་བར། །ཁོ་བོའི་ཡོན་བདག་བྱེད་པར་འགྱུར།
།འདིའི་ཡིག་སྣ་ཡོད་པ་ཙམ་གྱིས་དབང་པོ་འཕེལ། འབྲུ་འཁྲུང་། ཚོང་ལེགས་འོང་། བསམ་པ་འགྲུབ་བོ། །གཏོར་མ་ཆེ་བ་རྟག་ཏུ་བཟུང་། གཏོར་ཆུང་ཞག་རེ་ལ་ཉི་ཤུ་རྩ་གཅིག་རེ་བཏང་། སྒྲུབ་པ་བྱེད་པའི་དུས་སུ་འོང་། སྒྲུབ་པའི་དུས་ནི། ཡར་ངོའི་སྐར་མ་རྒྱལ་དང་འཛོམས་པའི་ཚེས་བརྒྱད་ནས་ཟླ་བ་ཕྱི་མ་གནམ་སྟོང་བར་དུ་བྱའོ།
།གུ་ཧྱ་སམཡ། །ཨྀཐིཿ