Chos drug gi zin dris

Resource ID	CN56
Title	chos drug gi zin bris
Topics	Six doctrines of Niguma
Sub-Topics	Instructions
Associated Person	Bodong Cholé Namgyel Sangyé Tönpa Shönu Drup Tsangma Shangtön Atisha Rinchen Zangpo Kharak Gomchung Neljor Chöjung
Link	BUDA MW22103 (p.267)
Notes	Alt. version of ni gu chos drug gi zhal shes kyi lhan thabs.

༼ཆོས་དྲུག་གི་ཟིན་དྲིས་བཞུགས།༽ དེ་ནས་ཆོས་དྲུག་གི་སྐོར་ནི།
ན་མོ་གུ་རུ།
ན་རོ་པ་དང་ཕར་སློབ་ཚུར་སློབ། བྱེད་པའི་སྐབས་སུ།
ཆོས་དྲུག་འདི་ན་རོ་པའི་བཞེད་པས་མ་རྒྱུད་ཐམས་ཅད་ཀྱི་སྙིང་པོ་གཅིག་དུ་སྡུས་པ། །དེ་ལས་ཀྱང་ཀྱེའི་རྡོ་རྗེ་མན་ངག་དུ་བཞེད། །ནི་གུ་མའི་ལུགས་ཀྱིས་ཕ་རྒྱུད། མ་རྒྱུད་ཐམས་ཅད་ཀྱི་སྙིང་པོ་ཕྱོགས་གཅིག་དུ་སྡུས་པ། དེ་ལས་ཀྱང་རིན་ཆེན་རྒྱ་མཚོའི་རྒྱུད་ལ་བརྟེན་པར་བཞེད། རིན་པོ་ཆེ་བའི་གསུང་གིས་གསང་འདུས་ལེའུ་བཅོ་ལྔ་པ་ནས་རྨི་ལམ་འོད་གསལ་གྱི་ཆོས་མང་དུ་གསུངས་པས་ཟིན་པོ་གསང་འདུས་རང་ཆེ་བར་འདུག་གསུང་།
ཨའི་སྟོང་རའི་སྐབས་སུ། གོས་དྲི་མ་དང་བཅས་པ་ལ་ཚོས་མི་འཆག །རྒྱུད་སྡིག་པ་དང་བཅས་པ་ལ་དགེ་སྦྱོར་རྒྱུད་ལ་མི་སྐྱེ་ཞིང་། ཐར་པ་མི་ཐོབ། ཐར་པ་བས་མི་ལུས་ཀྱང་མི་ཐོབ་སྟེ།
ཞི་བ་ལྷའི་ཞལ་ནས། བདག་གི་སྤྱོད་པ་འདི་འདྲས་ནི། །མི་ཡི་ལུས་ཀྱང་ཐོབ་མི་འགྱུར། །ཅེས་གསུངས།
སྤྱོད་པ་འདི་འདྲ་ནི་ལུས་ངག་ཡིད་གསུམ་འཁྲུལ་སྣང་ལ་སྤྱོད་པ་ལ་ཟེར་རོ།
།སྡིག་པ་སྦྱོང་བ་ལ་ན་རོ་ཆོས་དྲུག་ན། མཎྜལ་ཡིག་བརྒྱ་ལ་སོགས་པ་ཡོད་པ་ལས་འདིར་ཨའི་སྟོང་ར་གཅིག་པུ་ལ་དྲིལ་བས་སྤྲོས་པ་ཆུང་ལ་སྡིག་སྒྲིབ་འདག་པའི་རྟགས་མྱུར་ཞིང་། ཏིང་ངེ་འཛིན་སྐྱེ་སླ་བས་ཟབ་པའི་གནད་ཡིན་གསུང་།
སྡིག་སྒྲིབ་ལ་དམིགས་པ་ལ་ཆོས་འབྱུང་ཕྱི་ནང་གཉིས་ཀ་དཀར་བ། ནད་ལ་ཕྱི་དཀར་ལ་ནང་དམར་བ། རླུང་ལ་རང་གི་འོག་དུ་མར་ནག་གི་མཚོ་ཁ་ཆུང་ལ་གཏིང་རིང་བ་རེག་བྱ་ཚ་བ་རླངས་དང་བཅས་པའི་ནང་དུ་མིག་མན་ཆད་ནུབ་པ་ལ་ཨའི་བདུད་རྩི་ཞུན་མར་གྱི་རྣམ་པ་བྱུང་ནས་རང་གི་ནད་ཐམས་ཅད་ཞི་བར་བསམ། ཚད་པ་ལ་བདུད་རྩི་དཀར་ལ་རེག་བྱ་བསིལ་བ། གྲང་བ་ལ་བདུད་རྩི་དམར་ལ་རེག་བྱ་ཚ་བ། གདོན་ལ་ངོ་བོ་བདུད་རྩི་ལ། རྣམ་པ་ཁྲོ་ཆུང་མང་པོ་བྱུང་སྟེ། གདོན་ཐམས་ཅད་སྲོག་ཆགས་ཀྱི་གཟུགས་ཆེན་པོ་ལ། ནང་སྡིག་པ་དང་བལ་བ་ལ་སོགས་པས་གང་བ་ལུང་པར་མི་ཤོང་པ་ཙམ་ཐོན་པས་ལུས་ཕྲུ་མ་བུས་པ་ལྟར་དབང་པར་བསམ། སྡིག་པ་དག་རྟགས། རི་རྩེ། གངས་རྩེ། མཁར་མཐོན་པོའི་རྩེར་འཛེགས་པ་དང་། ཉི་ཟླ་ཤར་བ་གོས་མེད་གཅེར་བུར་ཐོན་པ། བུ་མོ་གཞོན་ནུ་མས་མགོ་ལ་མེ་ཏོག་གི་ཕྲེང་བ་འདོགས་པ་ཉི་མ་ལ་སོགས་པ་སྟེ། ཕྱི་མ་ནི་མཁའ་འགྲོའི་བྱིན་རླབས་འཇུག་པའི་རྟགས་ཀྱང་ཡིན། དངོས་སུ་ཡང་ལུས་ཟོ་མདོག་བདེ་བ་དང་། ལྡང་པ་ཡང་པ་ལ་སོགས་པ་འབྱུང་ངོ་།
།དངོས་གཞི་རྒྱུད་ལ་སྐྱེས་པ་ལ་སྔོན་འགྲོ་ཚད་ལ་ཕེབས་དགོས་པས་སྔོན་འགྲོ་ལ་འཇུར་བ་གལ་ཆེའོ། །ངས་ཞག་བཞི་བཅུ་སྔོན་འགྲོ་རྐྱངས་གསུང་། གསོལ་འདེབས་ལ། བདག་དང་སེམས་ཅན་ཐམས་ཅད་ཀྱི། །ཅེས་སོ།

།གཏུམ་མོའི་སྐབས་སུ། གནས་ལུགས་ཀྱི་དོན་ཟབ་མོ་གཞི་ལ་བཞུགས་པ་ལ་སྔགས་མཚན་ཉིད་གཉིས་མཐུན་ཡང་མངོན་དུ་བྱེད་པའི་ཐབས་ཟབ་མི་ཟབ་ཀྱིས་ལམ་ཉེ་རིང་ཡོད། དེ་ལ་ཡང་སེམས་སྤྲོས་བྲལ་ནམ་མཁའ་ལྟ་བུ་ལ་འཇོག་པ་ཕར་ཕྱིན་པ་ལ་ཡང་ཡོད་པས་ཁྱད་ཆོས་མ་ཡིན། བརྟེན་ལུས་ལ་གནད་དུ་སྣུན་པས་རྟེན་པ་སེམས་ལ་རྟོགས་པ་སྐྱེ་བ་འདི་ཁྱད་ཆོས་ཡིན་པས་སྔགས་པ་རྣམས་ཀྱིས་རླུང་སྒོམ་དགོས། རླུང་ལ་ཡང་དྲོད་དང་། ཐུན་མོང་གི་དངོས་གྲུབ་ཐོབ་པ་མུ་སྟེགས་ལ་ཡང་ཡོད་པས་རླུང་གི་སྟོབས་ཀྱིས་སེམས་ཀུན་གཞིའི་རྣམ་པར་ཤེས་པ་བྱིན་གྱིས་རླབས་ཏེ་མཆོག་གི་གནས་སུ་ཞུགས་ནས་ཡེ་ཤེས་སྐྱེ་བ་གཅིག་དགོས། རླུང་ཞི་དྲག་གང་རུང་ཐུན་རེ་མ་སྒོམས་ན་དབང་གཉིས་པའི་དམ་ཚིག་དང་ཡང་འགལ། དེས་ན་འབིར་ཝ་པས། འབྲིང་དམ་ཚིག་དང་སྡོམ་པའི་ལམ། ཞེས་གསུང་པ་དང་ཡང་གནད་གཅིག་སྟེ། དབང་བཞིའི་ལམ་མ་སྒོམས་ན། དམ་ཚིག་འཆོར་མེད་དུ་མི་འབྱུང་བས་སོ།
།དེ་དང་འབྲེལ་ནས་ལམ་བཞི་གསུངས། མེའི་ལྷ་ཡིན་པས་རྗེ་བཙུན་མ་ཎ་ཁ་ཎ་ཡིན། ཞལ་གཅིག་མ་དང་། ཞལ་གཉིས་མ་རང་ཡི་དམ་གང་བྱེད་སྒོམ། དམིགས་པའང་ཀུན་བཏགས་སྒོམ་པ་ཡིན། དངོས་པོ་ལ་གནས་པ་ལ་གསལ་འདེབས་པ་ཡིན་ཏེ། རྐང་པ་བགྲད་པ་རླུང་གི་དཀྱིལ་འཁོར་ཆང་བཟུང་མར་བསྟན་པ་སུམ་མདོའི་མེ་རི་བོང་གི་རིལ་མ་ཙམ་མམ། དམིགས་པ་གང་བདེའོ། །དམིགས་པ་གསལ་མ་ཐེབས་པར་རླུང་ཤོར་ན་འགྲོན་པོ་ཚོང་མ་ཚར་བར་ཟོང་ཟད་པ་དང་འདྲ་བས་དམིགས་པ་གསལ་བཏབ་ལ་རླུང་བཟུང་། བསྒོམ་བྱ་དོན་གྱི་གནད་འཆུགས་ན་ཡོན་ཏན་མི་སྐྱེ་ཞིང་གགས་སུ་འགྱུར་བས་ལུས་ངག་ཡིད་གསུམ་གྱི་གནད་མ་འཆུགས་པར་བྱ། རླུང་དང་ཤེས་པ་ལྟེ་འོག་དུ་འཛིན་པ་གནད་ཆེ། སྟོད་དུ་ལས་ན་གགས་འབྱུང་། མཉམ་བཞག་དུ་རླུང་སྒོམ་པ་དང་། རྗེས་མི་རྟོག་པ་ལ་འཇོག་པ་གཉིས་སྤེལ་མར་བྱས་པས་མི་རྟོག་པ་ལ་རྟེན་ནས་དྲོད་དང་། བདེ་བ་ལ་བོགས་འབྱུང་། དྲོད་དང་བདེ་བ་ལ་རྟེན་ནས་རྣམ་པར་མི་རྟོག་པའི་ཡེ་ཤེས་སྐྱེའོ། །མི་རྒོད་གཏུམ་མོ་ནི། མི་རྒོད་ལྟར་གཏུམ་པའམ། སྟོབས་ཆེ་ལ་མྱུར་བས་མི་རྒོད་དང་མཚུངས་པའོ།
fin SCv8p311, suite en version plus courte
།དབང་པོ་རབ་མོས་གུས་ཀྱིས་སྐབས་སུ།
ཡེ་ཤེས་གསལ་བ་སྒྲོན་མེའི་རྒྱུད་ལས། མཚན་དང་དཔེ་བྱད་ལྡན་པའི་ལྷ། །བསྐལ་པ་སྟོང་དུ་སྒོམས་པ་བས། །བླ་མ་དྲན་པ་བསོད་ནམས་ཆེ། །ལྷ་སྐུ་མ་སྒོམ་བླ་མ་སྒོམས། །ལྷ་སྐུ་བྱེ་བ་སྟོང་སྒོམས་པས། །བླ་མ་དྲན་པ་བསོད་ནམས་ཆེ། །ཅེས་པ་དང༌།
དེའི་རྒྱུད་ཕྱི་མ་ལས། གང་གིས་བསྐལ་པ་བརྒྱད་ཁྲི་བཞི་སྟོང་དུ་སྦྱིན་པ་ལ་སོགས་པའི་ཕར་ཕྱིན་དྲུག་སྤྱད་པ་བས་ལྷའི་སྐུ་སྐད་ཅིག་མ་གཅིག་སྒོམས་པ་བསོད་ནམས་ཁྱད་པར་འཕགས་སོ། །ལྷའི་སྐུ་བསྐལ་པ་བརྒྱད་ཁྲི་བཞི་སྟོང་དུ་སྒོམས་པ་བས་བླ་མ་སྐད་ཅིག་མ་གཅིག་དྲན་པ་བསོད་ནམས་ཁྱད་པར་དུ་འཕགས་སོ། །ཅེས་གསུངས་སོ།
།བླ་མའི་གསུང་གིས། བླ་མའི་བྱིན་རླབས་ལ་རྟེན་ནས་སྣང་བ་བདེན་མེད་དུ་ཕྱལ་མ་སོང་ན་དམིགས་པ་ལ་སོགས་པའི་གནད་ཀྱིས་དགེ་སྦྱོར་དམ་དུམ་སྐྱེས་ཀྱང་འཕྲང་མེད་ཅིག་ལས་མི་ཡོང་། བླ་མ་ལ་ཆོས་སྐུའི་འདུ་ཤེས་སྐྱེས་ན། བདེ་དྲོད་རང་འབར། སྒྱུ་མ་རང་ཤར། རྨི་ལམ་རང་ཟིན། འོད་གསལ་རང་ཤར། བར་དོ་རང་འབྱོངས་སུ་འབྱུང་གསུང་ངོ་།
v8p358 extrait de scv8p311
།དབང་པོ་རབ་འབྲིང་གཉིས་ཆོས་ཐུན་གསུམ་གསུམ་སྟེ་དྲུག་ཙམ་མཛད་ནས་བཤད་པས་རྒྱབ་སྐྱོར་ཏེ་ངེས་ཤེས་སྐྱེད་པས་འཇུར་དུ་འཇུག །སྤྱིར་ཡང་དགས་པོ་པའི་ལུགས་ཀྱིས་བློ་ཆུན་གྱིས་དོགས་ནས་དམིགས་པའི་ངོ་གདོང་རེ་སྟོན་པ་ལས་ལུང་འདྲེན་དང་བཤད་པ་མང་པོ་མི་འཛད། འདི་པའི་ལུགས་ཀྱིས་མདོ་རྒྱུད་ཀྱི་ལུང་གིས་རྒྱབ་སྐྱོར་ཞིང་། ངེས་ཤེས་སྐྱེད་ནས་ཁྲིད་ཀྱི་ངོ་གདོང་འཇུར་དུ་བཅུག་པས་མདོ་རྒྱུད་ནས་བཤད་པ་དེ་སྒོམ་དོན་དུ་གོ་ཞིང་། སྒོམ་ཆེན་པའི་སྒོམ་དེ་མདོ་རྒྱུད་ནས་བཤད་པར་གོ་བའི་དགོས་པ་ཡོད། མདོ་རྒྱུད་དང་མི་འཐུན་ན་སྒོམ་ལ་སྐབས་སུ་འབབ། བྷི་མ་ལས་ཀྱང་རྒྱུད་པའི་སྐྱོན་བཞི་གསྲུངས་ཏེ།
རྒྱབ་རྟེན་ལུང་དང་བྲལ་བ། ཡིད་ཆེས་ཁུངས་དང་བྲལ་བ། བཅོས་པ་སེལ་དང་བཅས་པ། ཉམས་པ་བདུད་ཀྱིས་བཟུང་བ། བར་ཆད་རྐྱེན་དུ་གྱུར་པའོ།
v8p? extrait de scv8p311
།འབྲིང་གིས་སྐབས་སུ། སྒྱུ་མ་ལྟ་བུ་ཞེས་བྱ་བའི་ཏིང་ངེ་འཛིན་ཡོད་དེ། །ཏིང་ངེ་འཛིན་ཏེ་རྣམ་པར་དཔྱོད་པའི་བྱང་ཆུབ་སེམས་པ་མྱུར་དུ་མངོན་པར་རྫོགས་པར་འཚང་རྒྱ་བར་འགྱུར་རོ། །ཅེས་པ་དང་།
ཡེ་ཤེས་མངོན་པར་འབྱུང་བའི་རྒྱུད་ལས། སྒྱུ་མ་ལྟ་བུའི་ཆོས་རྣམས་ལ། །སྒྱུ་མ་ལྟ་བུར་སྒོམས་བྱས་ནས། །སྒྱུ་མ་ལྟ་བུར་མངོན་སངས་རྒྱ། །རྨི་ལམ་ལྟ་བུའི་ཆོས་རྣམས་ལ། །ཅེས་སྔར་བཞིན་གསུངས་སོ།
།ཁྱེའུ་རབ་སྣང་ཁྱིམ་བདག་འབྱོར་པ་དང་ལྡན་པ་གཅིག་གི་བུ་ཡིན་ཏེ། དད་པ་དང་ལྡན་པས་ཕ་མ་ལ་ཆོས་ལ་འགྲོ་བར་ཞུས་པས། ཁྱེད་ཆོས་བྱས་པས་ནོར་ཐམས་ཅད་རྒྱལ་པོས་སུམ་དུ་ཡོང་ཟེར་ནས་མ་གནང་བ་ལ། དེར་སངས་རྒྱས་ཀྱི་དྲུང་དུ་ཕྱིན་ཏེ། བདག་རབ་དུ་བྱུང་དུ་ཕ་མས་མ་སྟེར་བས་འདོད་པའི་ཡོན་ཏན་དང་བཅས་ཏེ་ཁྱིམ་ན་གནས་བཞིན། སངས་རྒྱ་བའི་ཆོས་གཅིག་ཞུ་བྱས་པས། སངས་རྒྱས་ཀྱིས། ཆོས་རྣམས་སྒྱུ་མ་རྨི་ལམ་ཞེས། །གང་གིས་ཚིག་རྗོད་དྲན་གྱུར་པ། །ཞེས་པ་ལ་སོགས་པ་དང་ཡང་།
ལས་རྒྱ་མཚོའི་རྒྱུད་ལས། འགྲོ་ཀུན་སྐྱེས་པ་བུད་མེད་སྣ་ཚོགས་པ། །དེ་དག་རང་གི་སེམས་དང་ཐ་དད་མེད། །དེ་དག་སྒྱུ་མའི་སྣང་པར་རབ་ཤེས་པས། །དེ་ཚེ་སངས་རྒྱས་ལག་དུ་གཏོད་པར་འགྱུར། །ཞེས་གསུངས་སོ།

།རང་ལུས་ལྷ་སྐུར་སྒོམ་པ་ལ་སོགས་སྣང་སྲིད་ཀྱི་ཆོས་ཐམས་ཅད་རང་གི་སེམས། སེམས་བདེན་མེད་རྨི་ལམ་དུ་ཡིད་ལ་བསམ་ཞིང་། ཚིག་དུ་བར་མ་ཆོད་པར་རྗོད་པས་ཉིན་བར་གྱི་དུས་འདའ། མཚན་མོའི་དུས་སུ་རང་གི་དགོན་པ་དང་། བླ་མ་གྲོགས་མཆེད་ལ་སོགས་པ་ཡིད་ལ་གཅགས་པའི་བག་ཆགས་རྣམ་རྟོག་འགྱུ་བས་དེ་བཀག་པས་མི་ཁེགས། སྤངས་པས་མི་སྤོངས། བཞག་པས་མི་སྟོད་པས། གང་སྐྱེས་རྔོན་པའི་ཁྱིས་རི་དགའ་དེད་པ་བཞིན་དུ་ཉམས་སུ་བླང་ཅེས་རྨོག་ཅོག་པ་གསུང་ངོ་།

།སྣང་བ་མ་ངེས་པ་ཇི་ལྟ་བུ་ལགས་ཀྱི་སྐབས་སུ། དགས་པོ་རིན་པོ་ཆེ་དང་། ཟུར་ཆུང་ཤེས་རབ་གྲགས་ཀྱི་གཏམ་རྒྱུད་གསུང་། བཀའ་རྩལ་པ། ལྷའི་བུ། ས་ལ་སར་སྣང་བ་ཡོད། ས་ལ་ཆུར། ས་ལ་མེར། ས་ལ་རླུང་དུ། ས་ལ་མཁར་སྣང་བ་ཡོད་དོ། དེའི་ཕྱིར་མ་ངེས་སོ།
།དེ་ཡང་སྲོག་ཆགས་སྦལ་པ་ལ་ས་ལ་ནམ་མཁའི་འདུ་ཤེས་ཡོད་པས། ཁོས་འོག་བས་རྒྱུག་པ། སྟེངས་ནས་རྟ་རྒྱུག་པས་མི་ཟིན། རྒྱ་ཡུལ་ན་མེ་བྱི་ཡོད་པ་ཀུན་མེ་ལ་ཟབ་གོས་ཀྱི་སྣང་བ་ཤར་ནས་རྡོ་སོལ་གྱི་རི་ལ་ཆར་བབས་མེ་ཆེར་འབར་བས་མེ་བྱི་ལུས་སྟོབས་དང་ལྡན་པ་ལུག་ཙམ་ཡོང་། མེ་ཆུང་ན་མདངས་མེད་པ་བྱི་བླ་ཙམ་དུ་འགྲོ། ནམ་མཁའ་ལ་སར་འདུ་ཤེས་པ་ནི་མུ་སྟེགས་རྟག་པ་བས་ནམ་མཁའ་ལ་ལག་པ་རྒྱབ་པས་ཏོག་སྒྲ་ཡོང་བ་དང་། སློབ་དཔོན་སངས་རྒྱས་ཡེ་ཤེས་ཞབས་ཀྱིས་ལྷོ་ཕྱོགས་ཀོམ་ཀ་ནར་བྱོན་པས་མེ་ཏོག་རྩི་ཤིང་ནགས་ཚལ་ཐམས་ཅད་ནམ་མཁའ་ལས་སྐྱེ་བ་འདུག་ནས་ངེད་ཀྱི་ཡུལ་ན་ས་ལ་སྐྱེ་བྱས་པས་བློར་མ་ཆུད་གསུང་། གཞན་ཡང་བྱ་རོག་དང་། མིའི་ཉིན་མོ་ལ་སྲིན་བྱ་དང་འུག་པའི་མཚན་མོ། ཁོ་པའི་ཉིན་མོ་ལ་མི་དང་བྱ་རོག་གི་མཚན་མོར་འདུ་ཤེས་པས། དེའི་ཕྱིར་ཡང་སྣང་བ་མ་ངེས་པའོ། །ཞེས་གསུངས།

ནང་བ་རང་སེམས་ལ་གསུམ་སྟེ། གྲུབ་མཐའ་ཁས་ལེན་ནི། མྱོང་བ་གཉིས། སྐྱོ་ཤེས་པ་རང་རིག་རང་གསལ་ལ་བདེན་འཛིན་ཡོད་པ། བཀའ་ཐ་མ་དོན་དེ་རྣམ་པར་ངེས་པ་ནས་བཤད་པ་དེ་ནི་སྣང་བ་སེམས། སེམས་ངེས་བཟུང་དང་བྲལ་བའི་ཟུང་འཇུག་ཡིན་ཏེ། ཡང་དག་དོན་ལ་གནས་ནས་ནི། །སེམས་ཙམ་ལས་ནི་འདའ་བར་བྱ། །སྣང་མེད་གནས་པའི་རྣལ་འབྱོར་པ། །དེ་ཡིས་ཐེག་པ་ཆེན་པོ་མཐོང་།
།སྔགས་ཀྱི་ནི་སྣང་བ་སེམས། སེམས་ལྷའི་སྐུ་ངོས་བཟུང་ཐམས་ཅད་དང་བྲལ་བའོ། །མཚན་ཉིད་ཐེག་པའི་ལུགས་ཀྱིས་མཉམ་བཞག་སྣང་སྟོང་ནམ་མཁའ་ལྟ་བུ་དང་། རྗེས་ཤེས་བདེ་སྟོང་སྒྱུ་མ་ལྟ་བུ་ཞེས་མཉམ་རྗེས་ལ་ཉམས་ལེན་ཐ་དད་དུ་འདོད་ལ་འདིར་ཐ་དད་མི་་་་་་།

།གསོལ་བ་སྒྱུ་མ་ལྟ་བུར་ཇི་ལྟར་བལྟ་བར་བགྱི། བཀའ་སྩལ་པ། ཡུལ་དབུས་ན་རྒྱལ་པོ་དཔའ་བ། སྡུག་ཅིང་ལོ་ལེགས་པ་ཅིག་ཡོད་པ་ལ། རྟ་སྲེད་བྱུང་ནས་རྒྱལ་སྲིད་ཉམས་སུ་བྱུང་བ་ལ། བཙུན་མོས་སྒྱུ་མ་མཁན་པོས་ཏེ་རྟ་ལ་སྐྱོ་བ་སྐྱེ་བའི་ཐབས་གྱིས་ཤིག་བྱས་པས། སྒྱུ་མ་མཁན་གྱིས་སྒྱུ་མའི་རྟ་ཚོ་ལ་ཚུགས་བཟང་བ། འགྱོགས་པ་སྤུ་ཐོག་ལེགས་པ་གཅིག་སྤྲུལ་ནས་སྒོ་དྲུང་དུ་འདུག །བཙུན་མོས་རྒྱལ་པོ་གསེར་ཁྲིའི་སྟེང་ན་འདུག་པ་ལ། རྟ་མི་ཉོའམ་བྱས་པས། རྟ་ཇི་འདྲ་ཅིག་འདུག་ཟེར། སྔར་གྱི་རྣམས་ཀྱིས་ཆེས་ལྷག་པ་ཅིག་གདའོ། བྱས་པས། རིངས་པའི་ཚུལ་གྱིས་སྒྱུ་མ་མཁན་གྱི་རྩར་སོང་ནས་རིན་ཅི་ཙམ་འདོད་ཟེར། རྒྱལ་སྲིད་ཕྱེད་འདོད་བྱས་པས། ཆགས་ཐོགས་མི་འདུག །ཧྲིལ་འདོད་བྱས་པས་ཀྱང་སྔར་བཞིན། བཙུན་མོ་དམ་པ་རྣམས་ཀྱི་ཕྱེད་འདོད་བྱས་ཀྱང་། ཧྲིལ་འདོད་བྱས་ཀྱང་སྔར་བཞིན། སྲས་དམ་པ་རྣམས་ཀྱི་ཕྱེད་འདོད་བྱས་པས། ཅུང་ཟད་ཚོམ་བྱས་ནས། བང་འགྲོས་ཅི་འདྲ་ཡོད་ཟེར། རྒྱལ་པོ་རང་གཟིགས་ཅིག་བྱས་པས། རྒྱལ་པོ་རྟས་ཁྱེར་ཏེ། དེ་ཡང་རྩ་མེད་ཆུ་མེད་པའི་འབྲོག་དགོན་པ་གཅན་ཟན་གདུག་པ་ཅན་གྱིས་གང་བ་གཅིག་དུ་ཁྱེར་ནས་རྒྱལ་པོ་སྐྱུར་ཏེ་རྟ་བྲོས། དེར་རྒྱལ་པོས་མྱ་ངན་བྱེད་ཅིང་ཕྱོགས་གཅིག་ན་ཕར་ཕྱིན་པས་དུད་དྲི་ཅིག་བྱུང་། དེར་གོར་མ་ཆག་མི་དང་ཕྲད་པར་འགྱུར་སྙམ་ནས་ཕྱིན་པས། ཁང་ཆུང་གཅིག་ན་རྒན་རྒོན་གཉིས་ལ་བུ་མོ་ཤིན་ཏུ་ལེགས་པ་གཅིག་དང་། བུ་ལྐུགས་པ་གཅིག་འདུག །སྔར་གྱི་ལོ་རྒྱུས་རྗོད་པས་རྒན་མོ་ན་རེ། ད་ཁྱེད་རང་གི་ཁབ་དུ་ཕྱིན་བྱ་བ་མི་ཡོང་བས་འདིར་སྡོད། བཙུན་མོ་རྣམས་དང་ཕྲད་བྱ་བ་མི་ཡོང་བས་ངའི་བུ་མོ་འདི་དང་སྟབས་གཅིག་གྱིས་ཟེར། དེ་བཞིན་བྱས་པས་བུ་ཚ་གཉིས་བྱུང་། དེ་ནས་རེ་ཤིག་ན་རྒན་པོ་ན་རེ། རྒྱལ་པོ་ཁྱེད་བསོད་ནམས་དང་ལྡན་པ་ཡིན་པས་ངའི་བུ་འདི་ལ་བྱམས་པར་གྱིས་ཤིག་ཅེས་ཟེར་ནས་ཤི །དེ་བཞིན་དུ་གཞན་རྣམས་ཀྱང་དེ་སྐད་ཟེར་ཞིང་། ལྐུགས་པ་ལ་དུས་ཚོད་གཅིག་ནང་ཁ་བྱུང་ཞིང་། རྒྱལ་པོ་ཁྱོད་བསོད་ནམས་དང་ལྡན་པ་ཡིན་པས་སྐྱིད་པ་གྱིས་ཟེར་ཏེ་ཤི །དེར་མྱ་ངན་སྐྱེས་ནས་ཉི་གྲིབ་འཚམས་སུ་རྔུལ་ནར་ར་ར་འདུག །དེར་བཙུན་མོ་ན་རེ། ད་གསེར་མ་འཇུག་པར་འགྱུར་བས་སྒྱུ་མ་ཤིག་ཟེར། བཤིག་པས། ལོ་དྲུག་བརྒྱ་སོང་བ་ལ་གྲིབ་མ་སོར་བཞི་ལས་མ་འདས་པར་འདུག །དེར་བདག་གི་རྒྱལ་སྲིད་བཙུན་མོ་དང་བཅས་པ་ཐམས་ཅད་སྔར་གྱི་སྒྱུ་མ་དང་ཁྱད་པར་མི་འདུག་སྙམ་ནས་སངས་རྒྱས་ཀྱི་དྲུང་དུ་རབ་དུ་བྱུང་ནས་སྒྲུབས་པས་དགྲ་བཅོམ་པའི་འབྲས་བུ་ཐོབ་སྟེ། ལྷའི་བུ་དག་སྒྱུ་མ་ནི་དེ་ལྟ་བུའོ། །ཞེས་གསུངས་དང་།

།ཆགས་སྡང་རང་གྲོལ་ནི། རྣམ་འགྲེལ་ལས། ཙན་དན་སྟེ་འུ་མཚུངས་པ་ལ། །ཆགས་བྲལ་ཞེས་ནི་བརྗོད་པ་ཡིན། །ཞེས་གསུངས་སོ།
།ཡང་གསོལ་བ། འཕགས་པ། རྨི་ལམ་ནི་ཇི་ལྟ་བུར་བལྟ་བར་བགྱི། བཀའ་སྩལ་པ། རྒྱ་གར་ལྷོ་ཕྱོགས་ན་རྒྱལ་པོ་ཟླ་བ་ཞེས་བྱ་བ་ལ་བུ་མོ་གཟུགས་མཛེས་པ་ལྟ་ན་སྡུག་པ་རིན་པོ་ཆེའི་བརྒྱན་རང་ཆས་སུ་ཡོད་པ་ལ་རེ་ཤིག་ན་དེ་མྱ་ངན་གྱི་ཁང་པར་ཞུགས་པར་གྱུར་ཏེ། གཡོག་པོ་སུམ་བཅུ་རྩ་གཉིས་ཀྱི་ནང་ནས་དྲག་ཤོས་སུ་གྱུར་པ་ཅིག་གིས། ལྷ་འདི་ལྟ་བུའི་ཕུན་སུམ་ཚོགས་པའི་དུས་སུ་ཅིའི་ཕྱིར་མྱ་ངན་བྱེད་ཅེས་དྲིས་པས། འདི་ལྟར་འབྱོར་པར་གྱུར་པ་ཉིད་ཀྱིས་བདག་གི་ཁྱིམ་ཟླར་འོས་པ་མི་རྙེད་པས་སོ། །ཅེས་པ་དང་།
འོ་སྐོལ་རང་གི་དགྲ་ཟླར་གྱུར་པ་ལ་བུ་མཛེས་ཤིང་ལྟ་ན་སྡུག་པ་ཅིག་ཡོད་པར་འདུག་པས་དེ་དང་གཉེན་བྱའོ། །ཞེས་བྱས་པས།
རུང་ཟེར་ནས་རིན་པོ་ཆེའི་བརྒྱན་ཁལ་སྲང་བྱེ་བ་རི་བ་ཙམ་སྐུར། དེར་རྒྱལ་བུས་ཀྱང་དེ་ལྟ་བུ་ཅིག་སྐུར་སྐད། དེ་དགེས་ཏེ་སྡུག་བསྔལ་ལས་ཐར། མྱ་ངན་གྱི་ཁང་པ་ནས་ཐོན་ཏེ། ལྷའི་རྨི་ལམ་ན་རྒྱལ་བུ་མཛེས་པ་དེ་དང་འགྲོགས་ནས་བུ་ཡིད་དུ་འོང་བ་གཅིག་བརྩས་པས་དགའ། དེ་ནས་བུ་ཤི་བས་མྱ་ངན་དུ་གྱུར་པ་དང། གཉིད་སད་ཁར་སངས་རྒྱས་ཡེ་ཤེས་བླ་མས། ཛ་ཡ་སིད་དྷི་བསོད་སྙོམས་བླང་། གསུངས་པས། མོས་ཇི་ལྟར་བུ་མོ་གཞོན་ནུའི་རྨི་ལམ་ན། །བུ་ཕོ་སྐྱེས་ཏེ་ཤི་བ་དེ་མཐོང་ནས། །བྱུང་ནས་དགའ་ཞིང་ཤི་ནས་མི་དགའ་ལྟར། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཅེས་ཐོས་ཤིང་རྨི་ལམ་དྲན་པས་སྐྱོ་བ་སྐྱེས་ཏེ། ཁྱིམ་སྤངས་ནས་སྒྲུབས་པས་འབྲས་བུ་ཐོབ་ནས། རྨི་ལམ་ནི་དེ་ལྟ་བུའོ།
།ཡང་ལྷའི་བུས་གསོལ་པ། སྣང་བ་མི་བདེན་པ་རྫུན་པ་ཡིན་ན། ཅིའི་ཕྱིར་ས་རྡོ་རི་བྲག་ལ་སོགས་པ་སྲ་ཞིང་མཐས་༼ཟུར་ཆུང་ཤེས་རབ་གྲགས་པས་མཚན་ཉིད་པའི་དགེ་བཤེས་དང་བགྲོ་གླེང་བྱས་པས་ཀ་བ་ཆོས་ཅན་བྱས་པས་ཉིད་ལ་ཐོག་ལགས་ཏེ་ཟུར་ཆུང་ལ་མི་ཐོགས་ལགས་གསུངས་ནས་ཀ་བ་ལ་ཕྱག་གིས་ཕར་ཐལ་མཛད། འདུས་མ་བྱས་ནམ་མཁའ་ཆོས་ཅན་བྱས་པའི་ཉིད་ལ་འདུས་མ་བྱས་ལགས་ཏེ། ངན་པོ་ལ་འདུས་བྱས་སུ་མཆིས་གསུངས་ནས་ཞབས་དཀྱིལ་ཀྲུང་བྱས་ནས་བཞུགས་ལགས་སོ། །དྭགས་པོ་རིན་པོ་ཆེ་ཉིད་ཆེ་བས་སྣང་སེམས་གཅིག་ཏུ་འདྲེས་པ་ལ་ཅི་འདྲ་བ་ཞིག་མཆིས་ཞེས་པས། འདི་རང་མཆིས་གསུངས་ནས། ཀ་བ་ལ་ཕར་ཐལ་ཚུར་ཐལ་མཛད་དོ། །སྣང་བ་སེམས་སུ་ཤེས་ལ་གོ་བ་ཡུལ་འཛིན་གྱི་དྲི་མ་དང་བཅས་ཞེས་པ་རྣམས་བསྡམས། ཡུལ་མེད་རང་ངོ་ཤེས་པ་ཏེ་རྟོགས་པས་ནང་སེམས་གཅིག་ཏུ་འདྲེས་པ་ལ་བསྟན་པ་ཐོབ་པ་ཡིན།༽པར་སྣང་ཞེས་གསོལ་པ་དང་།
བཀའ་སྩལ་པ། ལྷའི་བུ་དག་དྲང་སྲོང་མེས་བྱིན་གྱིས་སྟག་དུ་སྒོམས་པས་དེས་མི་མང་པོ་ཟོས་པ་དང་། ཡང་དགེ་སློང་གཅིག་ལ་ཀླུ་སྲིན་མོ་གནོད་པ་ལ། ཀེང་རུས་སུ་སྒོམས་པས་དེའི་བག་ཆགས་བཏས་ནས། ང་ལ་མ་རེག་ཅིག་འཇིག་པར་འགྱུར་རོ། །ཞེས་བག་ཆགས་ཡུན་ཐུང་པས་ཀྱང་དེ་ལྟར་ཨ་འཐས་སུ་འགྱུར་ན། ཐོག་པ་མེད་པ་ནས་བསགས་པའི་བག་ཆགས་ངན་པ་ལ་ཡུན་རིང་དུ་གོམས་པས་ཅིའི་ཕྱིར་བདེན་པར་མི་འཛིན་ཏེ། ཨ་འཐས་སུ་ཞེན་པས་སོ། །ལྷའི་བུ་དེའི་ཕྱིར་མི་བདེན་པར་རྟོགས་པར་བྱའོ། །ཅེས་གསུངས།
།འདི་མི་བདེན་པ་རྫུན་པའི་སྐབས་སུ་སྦྱོར་བ་ཡང་སྣང་ངོ་། །དེ་ཡང་སྒྱུ་མ་ནི། སྣང་ལ་བདེན་པ་མེད་པ་གཅིག་ལ་ཟེར་ཏེ།
སྣང་ཡང་བདེན་པར་མ་གྲུབ་ཅིང་། །སྟོང་པར་འཛིན་པས་མ་སླད་པ། །ཅེས་དང་།

སྒྱུ་མ་འདི་ནི་ཡོད་མེད་ལས་འདས་ཤིང་། །དབུ་མ་ཙམ་དུའང་མི་གནས་ཀུན་རྫོབ་སྟེ། །སྣང་སྲིད་ཐམས་ཅད་སྒྱུ་མའི་རང་བཞིན་ལས། །འགག་པ་མེད་པའི་རོལ་པར་རང་ཤར་རོ། །ཅེས་གསུངས་སོ།

།དེ་ཡང་སྒྱུ་མའི་སྣང་བ་དེ་རྒྱུ་རྐྱེན་ཚོགས་ན་འབྱུང་གི །མ་ཚོགས་ན་མི་འབྱུང་སྟེ། ཟླ་བའི་དཀྱིལ་འཁོར་དངས་ཤིང་། ནམ་མཁའ་ལ་སྒྲིབ་བྱེད་མེད་ན། འཛམ་གླིང་གི་ཆུ་སྐྱོགས་ཐམས་ཅད་དུ་ཟླ་བའི་གཟུགས་འཆར་ཞིང་། ཆུ་སྐྱོགས་འགྱེལ་ན་ཟླ་བ་ཆུས་ཁྱེར་བའམ། སྣོད་ལ་ཐིམ་པ་མ་ཡིན་ཏེ། རྒྱུ་རྐྱེན་ཚོགས་པ་ཞིག་པས་མི་སྣང་བའོ།
།སངས་རྒྱས་སྟོན་པའི་ཞལ་ནས། སྐྱེས་པ་སྟག་དོང་དང་བཅས་ནས་སངས་རྒྱ། ཡོན་ཏན་མཁན་པོ་ལག་ཆ་དང་བཅས་ནས་སངས་རྒྱ། བུད་མེད་བལ་སྐུར་དང་བཅས་ནས་སངས་རྒྱ། གཙོ་བོ་མདུན་མ་དང་བཅས་ནས་སངས་རྒྱ་བའི་ཆོས་ཡིན་གསུང་ངོ་།

བླ་མ་དམ་པའི་ཞབས་ལ་གུས་པས་ཕྱག་འཚལ་ལོ།