Grib sel khyad par can gyis man ngag

Resource ID	SCv11p87
Title	grib sel khyad par can gyis man ngag
Topics	Chadrupa
Sub-Topics	Instructions

༈ གྲིབ་སེལ་ཁྱད་པར་ཅན་གྱིས་མན་ངག་བཞུགས་སོ།།
༈ ༼ཛ༽ བླ་མ་མགོན་པོ་དབྱེར་མེད་ལ། །གྲིབ་ཕོག་དམ་ཚིག་འགལ་གྱུར་ན། །བཤགས་པ་བྱ་ཞིང་དམ་ཚིག་བསྐང་། །དམ་ཚིག་བསྐང་པས་དངོས་གྲུབ་ཐོབ། །རང་གི་མདུན་དུ་གཙོ་བོ་མགོན་པོ། འཁོར་གནོད་སྦྱིན་བཞི། ལྷ་མོ། ཕྱོགས་སྐྱོང་བཅུ། གཙང་རིགས་ཀྱི་མགོན་པོ་དང་བཅས་པས་བསྐོར་བར་བསམ་ནས་ཡེ་ཤེས་པ་བསྟིམ་མོ། །དེའི་སྤྱི་བོར་པདྨ་དང་ཟླ་བའི་སྟེང་དུ་རྩ་བའི་བླ་མ་སྐུ་མདོག་དཀར་པོ་ཕྱག་གཡས་ཤེལ་གྱི་རྡོ་རྗེ་རྩེ་ལྔ་པ། གཡོན་ཐོད་པ་བསྣམས་པ་གཅིག་བསྒོམ། དེའི་སྟེང་གི་ནམ་མཁའ་ལ་རྩ་བ་དང་བརྒྱུད་པའི་བླ་མ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་སྐུ་གསུང་ཐུགས་རྡོ་རྗེའི་ངོ་བོ་དཀར་དམར་མཐིང་གསུམ་དུ་བསམ་ནས། གསོལ་བ་གདབ་པ་བྱས་པ་དང་། སངས་རྒྱས་དང་བྱང་ཆུབ་སེམས་དཔའ་དཀར་པོ་ལས་ཡི་གེ་བརྒྱ་པ་དཀར་པོ་བྱུང་ནས་བླ་མའི་དཔྲལ་བར་ཐིམ། སྐུའི་དམ་ཚིག་སྐོངས། སངས་རྒྱས་དང་བྱང་ཆུབ་སེམས་དཔའ་དམར་པོ་ལས་ཡི་གེ་བརྒྱ་པ་དམར་པོ་བྱུང་། བླ་མའི་མགྲིན་པར་ཐིམ་པས་གསུང་གི་དམ་ཚིག་སྐོངས། སངས་རྒྱས་དང་བྱང་ཆུབ་སེམས་དཔའ་སྔོན་པོ་ལས་ཡི་གེ་བརྒྱ་པ་སྔོན་པོ་བྱུང་། བླ་མའི་ཐུགས་ཀར་ཐིམ་པས་ཐུགས་ཀྱི་དམ་ཚིག་སྐོངས། སྐུ་གསུང་ཐུགས་ཀྱིས་བྱིན་རླབས་ཞུགས་པར་བསམ་མོ། །ཡང་བླ་མ་ལ་གསོལ་བ་བཏབ་པས། བླ་མས་སྨིན་ཕྲག་ནས་ཡི་གེ་བརྒྱ་པ་དཀར་པོ་བྱུང་ནས་མགོན་པོའི་དཔྲལ་བར་ཐིམ་པས། མགོན་པོ་འཁོར་བཅས་ཀྱི་སྐུའི་དམ་ཚིག་སྐོངས། ཡང་བླ་མའི་མགྲིན་པ་དང་ཐུགས་ཀ་ནས་རིམ་པ་བཞིན་ཡི་གེ་བརྒྱ་པ་དམར་པོ་དང་། སྔོན་པོ་གཉིས་བྱུང་ནས་མགོན་པོའི་མགྲིན་པ་དང་ཐུགས་ཀར་ཐིམ་པས། གསུང་དང་ཐུགས་ཀྱི་དམ་ཚིག་བསྐོངས་པས། མགོན་པོ་འཁོར་བཅས་འོད་ཀྱི་རང་བཞིན་ནུས་པ་ཕུན་སུམ་ཚོགས་པས་བདག་ལ་དགྱེས་པའི་མདངས་དང་ལྡན་པར་བསམ་མོ། །དེ་ནས་མགོན་པོ་ལ་གསོལ་བ་བཏབ་པ་དང་། མགོན་པོའི་དཔྲལ་བ་ནས་ཡི་གེ་བརྒྱ་པ་དཀར་པོ་བྱུང་ནས་རང་གི་དཔྲལ་བར་ཐིམ་པས་ལུས་ཀྱི་སྡིག་སྒྲིབ་དག བུམ་དབང་ཐོབ། སྐུའི་བྱིན་རླབས་ཁྱབ་པར་བསམ། ཡི་གེ་བརྒྱ་པ་བཟླས་སོ། དེའི་མདུན་དུ་མགོན་པོའི་མགྲིན་པ་དང་ཐུགས་ཀ་ནས་ཡི་གེ་བརྒྱ་པ་དམར་པོ་དང་སྔོན་པོ་བྱུང་། བདག་གི་མགྲིན་པ་སྙིང་གར་ཐིམ། ངག་དང་ཡིད་ཀྱི་སྡིག་སྒྲིབ་དག གསང་དབང་དང་ཤེས་རབ་ཡེ་ཤེས་ཀྱི་དབང་ཐོབ། གསུང་དང་ཐུགས་ཀྱི་བྱིན་རླབས་ཞུགས། ཡི་གེ་བརྒྱ་པ་བཟླས་སོ། །ཡང་མགོན་པོའི་གནས་གསུམ་ནས་ཡི་གེ་བརྒྱ་པ་བྱུང་། རང་གི་ལྟེ་བར་ཐིམ་པས་ལུས་ངག་ཡིད་གསུམ་གྱི་སྡིག་སྒྲིབ་དག དབང་བཞི་པ་ཐོབ་པར་བསམ་མོ། །དེ་ནས་དམ་ཚིག་གི་ཉམས་པ་བསྐོངས་ནས་ལུས་དང་གྲིབ་མ་བཞིན་དུ་འགྲོགས་པར་བྱེད་དེ། འཁོར་གཏོར་མས་སྐོངས་ཤིག རང་དང་གྲིབ་དང་། མགོན་པོ་རྣམས་རང་བཞིན་མེད་པར་ཤེས་པར་བྱའོ།
།གྲིབ་སེལ་ཁྱད་པར་ཅན་གྱི་མན་ངག་རྫོགས་སོ།
།གྲིབ་སེལ་དཀྱུས་མའོ།། །།