Ni gu chos drug gi khrid yig

Resource ID	Sup 6
Title	ni gu chos drug gi khrid yig
Topics	Six doctrines of Niguma
Sub-Topics	Manual
Author	Shönu Drup
Link	BDRC W8LS36545 p.71-98
Notes	incomplete

To input
༄༅། །ནི་གུ་ཆོས་དྲུག་གི་ཁྲིད་ཡིག་ཤངས་པ་བཀའ་རྒྱུད་ཀྱི་རྒྱུད་་་་་་་། མཁས་གྲུབ་ཆོས་རྗེ་གྲགས་པ། མཚན་གཞོན་ནུ་གྲུབ་ཞེས་གྲགས་པ་དེ་ཉིད་ཀྱིས་མཛད་པ་བཞུགས་སོ།།

བླ་མ་དམ་པའི་ཞབས་ལ་གུས་པས་ཕྱག་འཚལ་ལོ།
རྒྱུད་པ་གང་རིའི་ཕྲེང་ལྟར་རྣམས་མཛེས་ཤིང་། །བསྒྲུབ་རྒྱུད་ཆུ་བོའི་གཞུང་ལྟར་མ་ཆད་པ། །རྒྱུད་སྡེ་རྒྱ་མཚོའི་བཅུད་བསྡུས་མན་ངག་འདི། །འགྲོ་མགོན་ནང་་་་པའི་ཞལ་གྱི་བདུད་རྩི་ལས། །ལེགས་འོངས་བླ་མ་དམ་པའི་གསུངས་བཞིན་དུ། །སྒྲོ་བཀུར་རང་གཟོ་ཡངས་ཏེ་བྲིས་བར་བྱ།
ཡེ་ཤེས་ཀྱི་མངའ་འགྲོ་མ་ནི་གུ་མའི་ལུགས་ཀྱི་ཆོས་དྲུག་ལ་གཉིས། ཡིད་ཆེས་པ་བླ་མའི་ལོ་རྒྱུས་དང་། རྒྱུད་པ་དེ་དང་འབྲེལ་བའི་གདམ་པ་གཉིས་ཡོད་པའི་དང་པོ་ནི།
རྡོ་རྗེ་ཚིག་རྐང་ལས། གང་ཞིག་བརྗོད་བྲལ་ལྷུན་གྲུབ་འདུས་མ་བྱས། །ཁ་སྦྱོར་བདེ་ཆེན་ལོངས་སྐུ་གང་འདུལ་ཤར། །སྐུ་གསུམ་བདུན་ལྡན་རྡོ་རྗེ་འཆང་ཆེན་གྱིས། །ཐེག་ཆེན་སྐྱེ་མེད་རང་སྒྲ་འདི་སྐད་ཐོས། ཞེས་གསུངས་པས།
དེ་ལ་བརྗོད་བྲལ་ལྷུན་གྲུབ་འདུས་མ་བྱས་ནི། ཆོས་སྐུ་སྐུ་ནི་སྤྲོས་པ་མེད་པའི་ཡན་ལག །ཁ་སྦྱོར་ནི་རང་སྣང་འོད་ཀྱི་ཡུམ་དང་ཁ་སྦྱོར་གྱི་ཡན་ལག །ཟུང་དུ་འཇུག་པའི་ཡན་ལག །བདེ་བས་གང་པའི་ཡན་ལག །གསུམ་ནི་ལོངས་སྐུའི་ཡན་ལག །གང་འདུལ་ནི་སྤྲུལ་སྐུ་སྟེ། སྙིང་རྗེ་གང་པའི་ཡན་ལག །འགོག་པ་མེད་པའི་ཡན་ལག །རྒྱུན་མི་འཆད་པའི་ཡན་ལག་གསུམ་མོ།
།དེ་ལྟ་བུའི་རྡོ་རྗེ་འཆང་ལ། ནི་གུ་མས་དངོས་སུ་གསན་པར་ཤེས་པར་བྱ་ཞིང་། དེ་ལས་རྒྱུད་པའི་རྣམ་ཐར་ཞི་་་གཞན་ཤངས་པའི་རྣམ་ཐར་དུ་ཤེས་པར་བྱའོ།
།གཉིས་པ་གདམས་པ་ལ། མདོར་བསྟན་པ་དང་། རྒྱས་པར་བཤད་པ་གཉིས་ཀྱིས་དང་པོ་ནི།
རྡོ་རྗེ་ཚིག་རྐང་ལས། དབང་བཞི་སྨིན་བྱས་དད་དང་བརྩོན་འགྲུས་ལྡན། །མི་རྟག་སྐྱོ་ཤས་ཉེས་དམིགས་སྔོན་འགྲོ་བས། །ལམ་མཆོག་འདི་ལ་གང་གིས་འབད་གྱུར་ན། །ཟླ་དྲུག་ལོ་འམ་ཚེ་འདིར་སངས་རྒྱས་འགྱུར།
ཐབས་ལམ་བདེ་དྲོད་རང་འབར་། སྒྱུ་ལུས་ཆགས་སྡང་རང་གྲོལ། རྨི་ལམ་ཉིང་འཁྲུལ་རང་དག །འོད་གསལ་གཏི་མུག་རང་སངས། འཕོ་བ་མ་སྒོམ་སངས་རྒྱས། བར་དོ་རྒྱལ་བ་ལོངས་སྐུ། ཞེས་སོ།
།གཉིས་པ་རྒྱས་པར་བཤད་པ་དྲུག་གི
།དང་པོ་ཐབས་ལམ་བདེ་དྲོད་རང་འབར་ལ། སྔོན་འགྲོ་དང་། དངོས་བཞི་གཉིས་ལས།
དང་པོ་ལ་གསུམ་གྱི་དང་པོ་དག་བྱེད་ཨའི་སྟོང་ར་ནི།
རྡོ་རྗེ་ཚིག་རྐང་ལས། །བཅུད་འདུས་དག་བྱེད་སྟོང་རའི་གནད་གསུམ་དང་། ཅེས་དང་།
དག་བྱེད་ཨའི་སྟོང་ར། སྟོང་ར་ནད་གདོན་སེལ་བྱེད། རྟགས་གསུམ་སྟོང་རའི་ཁྱད་པར་རོ། །ཅེས་དང་།
ཐེམས་ཡིག་ལས། དག་བྱེད་ཨའི་སྟོང་ར་ལ། གསོལ་འདེབས་གཉིས་ལ་དམིགས་པ་གསུམ། ཅེས་གསུངས་པས།
དེ་ལ་བཅུད་བསྡུས་ནི། མདོའི་དོན་བསྡུས་པ་འབུམ། དེ་བསྡུས་པ་ཉི་ཁྲི། དེ་བསྡུས་པ་བརྒྱད་སྟོང་པ། དེ་བསྡུས་པ་་་་་་་་པ། དེ་བསྡུས་པ་ཡི་གེ་གཅིག་མ་སྟེ། འདི་ལྟ་སྟེ་ཨ་ཅེས་དང་།
རྒྱུད་ལས། འདི་ལྟར་སངས་རྒྱས་བཅོམ་ལྡན་འདས། །རྫོགས་པའི་སངས་རྒྱས་ཨ་ལས་བྱུང་། །ཨ་ནི་ཡིག་འབྲུ་ཀུན་གྱི་མཆོག །ཅེས་པས། མདོ་རྒྱུད་གཉིས་ཀའི་སྙིང་པོའམ། བཅུད་བསྡུས་པ་ཡིན་གསུང་ངོ་།
དག་བྱེད་ནི། རང་རྒྱུད་དྲི་མ་ཉམས་ཆག་དག །འདི་ནི་སྟོང་རའི་མཚན་ཉིད་ཡིན།