Mkha' spyod ma'i dbang

Resource ID	SCv7p471
Title	mkha' spyod ma'i dbang
Alt. title	mkha' spyod dkar mo'i dbang
Topics	Initiation
Sub-Topics	Kechari
Link	BDRC W23922 BDRC W3CN18508 (p.614) BDRC W8LS32723 BDRC W4CZ58783 (p.372 alt. version)

༼མཁའ་སྤྱོད་མའི་དབང་ནི།༽
ན་མོ་གུ་རུ།
མཁའ་སྤྱོད་མོའི་དབང་ནི།
དཀྱིལ་འཁོར་ཆོས་འབྱུང་དཀར་པོ་རྐྱང་པའི་སྟེང་དུ་གཏོར་མ་གཅིག་མཁའ་སྤྱོད་མར་བསྐྱེད་ལ།
སྐྱབས་སུ་འགྲོ་བ་དང་། །སེམས་བསྐྱེད་པ་སོགས་སྔོན་དུ་འགྲོ་བའི་ཆོས་རྣམས་བྱས་ལ། ལུས་དང་ལོངས་སྤྱོད་ཕུལ་ལ། དབང་བཞི་རྫོགས་སུ་བསྐུར་བར་གསོལ་བ་གདབ།
མཁའ་སྤྱོད་མའི་སྐུ་གསུང་ཐུགས་ལས། འོད་ཟེར་དཀར་དམར་མཐིང་གསུམ་འཕྲོས། སངས་རྒྱས་བྱང་ཆུབ་སེམས་དཔའ་ཐམས་ཅད་མཆོད་པས། སྐུ་གསུང་ཐུགས་ཀྱི་ཡོན་ཏན་ཐམས་ཅད་འོད་ཟེར་དཀར་དམར་མཐིང་གསུམ་དུ་བྱོན་ནས། གནས་གསུམ་དུ་ཐིམ་ནས། མཁའ་སྤྱོད་མའི་སྨིན་མཚམས་ནས་འོད་ཟེར་དཀར་པོ་བྱུང་། རང་གི་སྨིན་མཚམས་སུ་ཐིམ། ལུས་ཀྱི་དྲི་མ་དག །བུམ་པའི་དབང་ཐོབ།
དེ་བཞིན་དམར་བས་ངག་གི་སྡིག་པ་དག །གསང་བའི་དབང་ཐོབ།
མཐིང་ཀས་ཡིད་ཀྱིས་སྡིག་པ་དག །ཤེས་རབ་ཡེ་ཤེས་ཀྱི་དབང་ཐོབ།
དེ་ནས་སེམས་མ་བཅོས་པའི་ངང་ལ་དར་ཅིག་བཞག་པ་ནི་དབང་བཞི་པའོ།
དེ་ནས་གཏོར་མ་སློབ་མའི་སྤྱི་བོར་བཞག་པས་མཁའ་སྤྱོད་མ་ཐིམ་པར་བསམ།
དེ་ནས་ཚོགས་ལ་རོལ་ལོ། །རྗེས་ཀྱི་ཆོས་རྣམས་བྱའོ།

W4CZ58783: མཁའ་སྤྱོད་དཀར་མོའི་དབང་།
།ན་མོ་གུ་རུ།
དབང་སྐུར་བ་འདོད་པས། མཎྜལ་པད་མ་འདབ་བརྒྱད་ཀྱི་དབུས་སུ། ཆོས་འབྱུང་དཀར་པོ་རྐྱང་པ། དེའི་སྟེང་དུ་གཏོར་མ་མཁའ་སྤྱོད་མར་བསྐྱེད་ལ།
སྐྱབས་སུ་འགྲོ་བ་ནས་ལམ་ཡན་ལག་ལྔ་ལ་སོགས་པའི་བར་དུ་ཅི་རིགས་པར་བྱ། དེ་ནས་ལུས་དང་ལོངས་སྤྱོད་ཐམས་ཅད་ལྟོས་པ་མེད་པར་ཕུལ་ནས། དབང་བཞི་རྫོགས་སུ་སྐུར་དུ་གསོལ་ཞེས་གསོལ་བ་གདབ།
མཁའ་སྤྱོད་མའི་སྐུ་གསུང་ཐུགས་ལས་འོད་ཟེར་དཀར་དམར་འཐིང་གསུམ་འཕྲོས། སངས་རྒྱས་བྱང་ཆུབ་སེམས་དཔའ་ཐམས་ཅད་མཆོད། སྐུ་གསུང་ཐུགས་ཀྱི་ཡོན་ཏན་ཐམས་ཅད་འོད་ཟེར་དཀར་དམར་འཐིང་གསུམ་དུ་མཁའ་སྤྱོད་མའི་སྤྱི་བོར་ཐིམ་པས། མཁའ་སྤྱོད་མའི་སྨིན་མཚམས་ནས་འོད་ཟེར་དཀར་པོ་བྱོན་རང་གི་སྨིན་འཚམས་སུ་ཕོག ལུས་ཀྱི་བསགས་པའི་སྡིག་སྒྲིབ་དག །བུམ་པའི་དབང་ཐོབ་པར་བསམ།
དེ་བཞིན་དུ་དམར་པོ་མགྲིན་པར། ངག་གི་དག །གསང་དབང་ཐོབ།
འཐིང་ཁ་སྙིང་ཁར་ཕོག་པས་ཡིད་ཀྱི་སྡིག་སྒྲིབ་དག་ཤེས་རབ་ཡེ་ཤེས་ཀྱི་དབང་ཐོབ་པར་བསམ་མོ།
།དེ་ནས་སེམས་མ་བཅོས་པ་ཕྱག་རྒྱ་ཆེན་པོར་བཞག་གོ དེས་ལུས་ངག་ཡིད་གསུམ་ཐ་དད་དུ་འཛིན་པ་དག་ནས་དབང་བཞི་པ་ཐོབ་པའོ།
།དེ་ནས་གཏོར་མ་སློབ་མའི་སྤྱི་བོར་བཞག་པ་དང་། རྗེ་བཙུན་མ་རྒྱུད་ལ་སྟིམ་གྱིས་ཐིམ་པར་བསམ་མོ།
།དེ་ནས་ཚོགས་ལ་རོལ། འཇུག་དགེ་རྩ་བྱང་ཆུབ་དུ་བསྔོའོ། ཨིཐི།།