Sems 'chi med rdo rje'i mgur

Resource ID	SCv5p310
Title	sems 'chi med rdo rje'i mgur
Topics	Immortality
Sub-Topics	Chant
Author	Mokchokpa Rinchen Tsöndrü
Link	BDRC W4CZ58783 (p.287) BDRC W3CN18508 (v2p.141) BDRC W8LS16295 (p.523) BDRC W22103 (p.415)

སེམས་འཆི་མེད་རྡོ་རྗེའི་མགུར།
མདོ་རྒྱུད་མན་ངག་ཉམས་མྱོང་གིས། །མ་བསྒོམས་སངས་རྒྱས་འཆི་མེད་གནད།
།འདི་ལྟར་རྣམ་སྨིན་ལུས་འདི་ལ། །ཡེ་ཤེས་ལུས་ནི་རང་དགར་འབྱུང་།
།རྣམ་སྨིན་ལུས་ལ་ལྷ་ཡི་སྐུ། །གསལ་ལ་དེར་འཛིན་མེད་པར་བསྒོམ།
།དེ་ཉིད་སེམས་དང་དབྱེར་མེད་དེ། །སེམས་ལ་ངོ་བོ་མ་གྲུབ་པས།
།དེ་ལ་འཆི་རྒྱུ་ག་ལ་ཡོད། །འཆི་བ་ཞེས་བྱ་རྣམ་རྟོག་ཡིན།
།རྟོག་ཚོགས་འཁོར་འདས་ཆོས་མ་གྲུབ། །འཕོ་བྱ་འཕོ་བྱེད་རང་སར་གྲོལ།
།རྣམ་ཤེས་གང་ལ་དོན་པ་དོན། །འཆི་མེད་མཐའ་བྲལ་འབྲས་བུའི་མཆོག
།དྲན་པས་མངོན་སངས་རྒྱ་བ་ནི། །ཌཱ་ཀིའི་སྲོག་སྙིང་སྲོག་ལྟར་འཆང་།
རང་སེམས་འཆི་མེད་རང་གྲོལ་རྗེ་བཙུན་རཏྣ་བཱིརྱ་པས་མཛད་པ་རྫོགས་སོ།
།བླ་མ་ཤངས་པ་ལ་གསེར་སྲང་ལྔ་བཅུ་ཕུལ་ནས་ཞུས་ཏེ་ཉམས་སུ་མྱོང་བར་བྱས་སོ། །ཨྀཐི།