Zab don stan thog gcig ma'i skor mang po

Resource ID	SCv7p689
Title	shangs chos skor sogs zab don stan thog gcig ma'i skor mang po
Topics	Various
Author	Jetsün Taranatha
Link	BDRC W23922

༄༅། །ཤངས་ཆོས་སྐོར་སོགས་ཟབ་དོན་སྟན་ཐོག་གཅིག་མའི་སྐོར་མང་པོ་བཞུགས་སོ།།

ན་མོ་མཉྫུ་ནཱ་ཐཱ་ཡ།
།རབ་མཛེས་གསེར་གྱི་ལྷུན་པོ་ནི།
།ཐུན་མཚམས་འོད་རིས་འཆང་བ་བཞིན། །སྒེག་པའི་རྒྱན་གྱིས་ཡིད་འོང་བུ། །འཇམ་དབྱངས་སྐུ་ལ་རྟག་ཕྱག་འཚལ། །སྐྱབས་སེམས་ཚད་མེད་བཞི་བསྒོམ། ཨོཾ་ཤུ་ནྱ་ཏས་སྟོང་པར་སྦྱངས།
སྟོང་པའི་ངང་ལས་རང་སྙིང་འོད་ཀྱི་གུར་ཁང་སྒོང་སྐོགས་ཁ་གྱེན་བསྟན་ལྟ་བུའི་ནང་དུ་ཟླ་བ་ལ་ཧྲཱིཿདམར་སེར་གྱི་འོད་ཀྱི་འཕྲོ་འདུ་ལས་སྐད་ཅིག་གིས། རྡོ་རྗེའི་སྲུང་འཁོར་འབར་བའི་དབུས། །རང་ཉིད་འཇམ་དཔལ་གཞོན་ནུའི་སྐུ། །གུར་གུམ་གཞོན་ནུ་ལྟར་དམར་སེར། །རབ་མཛེས་མཚན་དཔེས་ཡོངས་བརྒྱན་ཏེ། །སྔོ་བསངས་རལ་གྱི་འོད་འབར་བ། །གཡས་པའི་ཕྱག་གི་དཔུང་ཐད་དུ། །འཕྱར་ཞིང་གཡོན་པས་ཨུཏྤལ་སྔོ། །སྡོང་བུ་པོ་ཏིར་བཅས་པ་འཛིན། །དར་དང་རིན་ཆེན་རྒྱུན་གྱིས་སྤྲས། །བུང་བ་ལྟར་གནག་དབུ་སྐྲའི་ཚོགས། །ཟུར་ཕུད་ལྔ་ལྡན་གཡོན་ཕྱོགས་འཕྱང་། །པད་ཟླར་རྡོ་རྗེ་སྐྱིལ་ཀྲུང་བཞུགས། །ཨུཏྤལ་མཐིང་ཀའི་སྤྱན་མཛེས་ཤིང་། །འོད་དཔུངས་འཁྲིགས་པའི་དབུས་ན་བཞུགས། །མི་བསྐྱོད་རྡོ་རྗེ་དབུ་བརྒྱན་པ། །ས་བཅུའི་དབང་ཕྱུག་རྒྱལ་བའི་ཡབ། །དཔྲལ་མགྲིན་སྙིང་ཁ་ཨོཾ་ཨཱཿཧཱུྃ། །ཧཱུྃ་གི་འོད་ཀྱི་སངས་རྒྱས་རྣམས། །སྤྱན་དྲངས་རང་དང་གཉིས་མེད་ཐིམ། །མཉྫུ་གྷོ་ཥ་བཛྲ་ས་མཱ་ཛཿ ཛཿཧཱུྃ་བཾ་ཧོཿ ཨརྒྷཾ་སོགས་དང་གཞོན་ནུའི་སྐུ་ལུས་སོགས་བྱ། །སྙིང་ཁ་ཟླ་བའི་དབུས་སུ་ཨོཾ་ཨ་དྷཱིཿ ཕྱོགས་བཞིར་ར་པ་ཙ་ན། ལྕེའི་ཕུགས་སུ་དྷཱིཿ འོད་ཟེར་སྤྲོས། རང་གཞན་ཐམས་ཅད་ཀྱི་སྡིག་སྒྲིབ་སྦྱངས། འཇམ་དཔལ་དུ་གྱུར། ཨོཾ་ཨ་ར་པ་ཙ་ན་དྷཱིཿབཟླས། མཐར་དྷཱིཿབརྒྱ་བརྒྱད་བཟླས། མཆོད་བསྟོད་དགེ་བ་བསྡོ། བར་ཆད་ཀྱི་རྟགས་བྱུང་ན། ཧཱུྃ་ལས་རང་མི་གཡོ་བ་སྔོན་པོ་རལ་གྲི་ཞགས་པ་འཛིན་པ་པུས་གཙུགས་ཀྱི་མེ་དཔུང་ན་བཞུགས་པར་བསྒོམ། ཨོཾ་ཙཎྜ་མ་ཧུ་རོ་ཥ་ཎ་ཧཱུྃ་ཕཊ་བཟླས་པས་བཟློག་གོ །མ་ཡེངས་པར་སྔགས་བརྒྱད་འབུམ་གྱིས་འགྲུབ་པར་གསུངས་སོ། །མདོར་བསྡུས་ཙམ་འདི་ཡང་ཀུན་དགའ་སྙིང་པོ་ཏཱ་ར་ནཱ་ཐས་སོ། །དགེ་ལེགས་འཕེལ།།

༄། །ན་མོ་ཙཀྲ་མཎྜལ་བཱི་ར་བི་རཻ།
།བླ་མ་རིན་ཆེན་དངོས་གྲུབ་གཏེར། །འགྲོ་བའི་གཙོ་བོ་ལ་བཏུད་ནས། །ནཻ་གུ་ལ་སོགས་མཁའ་འགྲོ་མའི། །གདམས་པ་མདོ་ཙམ་བྲི་བར་བྱ། །སྤྱི་ཡི་སྔོན་འགྲོ་རྙེད་དཀའི་ལུས་ཐོབ་ནས། །མཇལ་བར་དཀའ་བའི་ཆོས་དང་ད་རེས་མཇལ་བལ་སང་ཉིན་ཙམ་ཡང་མི་འཆི་བའི་གདེང་མི་ཐོབ་པ་དང་། ཤི་ནས་ལས་དགེ་སྡིག་སྣ་ཚོགས་པས། འགྲོ་བ་དྲག་ཏུ་འཁྱམས་ནས་གར་ཡང་སྡུག་བསྔལ་བཟོད་བླག་མེད་པ་དྲན་པས་རྒྱུད་བསྐུལ་རྗེས་མཐའ་དག་གི་འགྲོ་བ་དྲིན་ཅན་ཕ་མ་ཀུན་ཡང་མ་རིག་པས་འཁོར་བར་འཁྱམས་པ་དེ། །སྐྱབས་གནས་ཀུན་འདུས་བླ་མས་སྐྱབ་ཏུ་གསོལ། །སླར་བདག་སོགས་སེམས་ཅན་ཅི་མཛད་ཁྱེད་རང་ཤེས་སྙམ་པས། བདག་སོགས་སེམས་ཅན་ཐམས་ཅད་སྐྱབས་ཀུན་འདུས་བླ་མ་རིན་པོ་ཆེ་ལ་སྐྱབས་སུ་མཆིའོ། །ཞེས་ཅི་མང་བྱ། སེམས་ཅན་ཐམས་ཅད་ཕ་མར་ཤེས་པའི་སྒོ་ནས་ལུས་སེམས་བཟུང་མི་ཐུབ་པ་ལྟ་བུའི་སྙིང་རྗེའི་ཤུགས་དྲག་གིས་འདི་ཀུན་ད་ལྟ་རང་སངས་རྒྱས་ལ་འགོད་པར་བྱ། །དེའི་ཕྱིར་ལམ་ཟབ་མོ་བསྒོམ་པར་བྱའོ། །ཞེས་བརྗོད་ཅིང་བསམ། དེ་ནས་དག་བྱེད་སྟོང་རའམ། ཡིག་བརྒྱའི་བསྒོམ་བཟླས་སོགས་རྒྱུད་སྦྱང་ཐབས་རྣམས་སྤྲོ་ན། དེ་ཡང་རང་གི་སྤྱི་བོར་བླ་མ་བསྒོམ། མོས་གུས་དྲག་པོས་གསོལ་བ་བཏབ། དེ་རང་ལ་ཐིམ། རང་གི་ཐོད་པའི་ནང་དུ་ཆོས་འབྱུང་དཀར་པོའི་དབུས་སུ། ཨ་དཀར་གསལ། དེ་ལས་བདུད་རྩི་བབས་སྡིག་སྒྲིབ་སངས་དག །སེམས་མ་བཅོས་པའི་ངང་ཧྲིག་གེ་སྐྱོང་། རྒྱུན་གྱི་ཉམས་ལེན་སྟན་ཐོག་གཅིག་པ་འདི་རྣམས་ལ་མཚམས་དམ་པའི་ངང་ནས་བྱ། བླ་མས་རང་གནས་ལུགས་ཟབ་མོ་ལ་བཀྲི་བར་མཛད་པའི་བཀྲིན་དྲན་པས་བླ་མ་ཡི་དམ་རོ་གཅིག་པ་ལ་མཆོད་བསྟོད་ཡན་ལག་བདུན་པ་རྟག་ཏུ་བྱ་ཞིང་ཚོགས་གསོག །འདི་ལ་མྱོང་བ་ཅི་རིགས་བྱུང་ནས་འགྲོ་དྲུག་སྒྱུ་མར་འཆར་བྱེད་ཀྱི་སྒྱུ་ལུས་རྨི་ལམ་བཟུང་སྦྱང་སྤེལ་སྤྲུལ་བསྒྱུར་བ་རྣམས་དང་སྦྲེལ་ནས་ཉམས་སུ་ལེན་པ་འདི་ནི་སྙིང་པོའོ། །བླ་མ་ལམ་ཁྱེར་ལ། སྣང་བ་ལ་བརྟེན་ནས་བླ་མ་ལམ་དུ་ཁྱེར་བ་དང་། དེ་བཞིན་དུ་བླ་མ་ལ་མོས་གུས། དེ་ལ་བཀའ་དྲིན་དེ་ལ་ཚོགས་གསོག །དེ་ལ་རང་ཤར་ལམ་དུ་ཁྱེར་བ། ཡི་དམ་ལམ་ཁྱེར་ལ། སྣང་བ་ཡི་དམ་དག་སྣང་ཚོགས་གསོག་རང་ཤར། ཟུང་འཇུག་གི་ལྷ་སྐུ་དང་། སྒྱུ་མ་ལམ་ཁྱེར་ལ། སྣང་བ། རང་སེམས། སྒྱུ་མ། རྨི་ལམ། འོད་གསལ་རང་ཤར་རྣམས་ལམ་དུ་ཁྱེར་བ་ནི་དེ་ལྟར་ཤེས་པར་བྱའོ། །དེ་ལྟར་ན་སྣང་བ་བླ་མ་ཡི་དམ་དུ་ཤེས། དེ་རང་སེམས་སུ་ཤེས། དེ་སྒྱུ་མ་ལྟ་བུ་གསལ་སྟོང་བདེ་བར་རང་ཤར་རོ། །ཅེས་པ་ནི་ཀུན་དགའ་སྙིང་པོ་ཏཱ་ར་ནཱ་ཐས་སྦྱར་བའོ། །མངྒ་ལམ། །

༄། །ཨོཾ་ནམ་བམྲྀཏ་བཛྲེབྷྱཿ
འཆི་མེད་རང་གྲོལ་གྱི་སྙིང་པོ་ནི། །སྔོན་འགྲོ་དང་རྗེས་ཆོས་དུག་ལྟར་བྱ། རང་སེམས་འཆི་མེད་རང་གྲོལ་རྟོགས་པར་གསོལ་བ་བཏབ། རང་བདེ་མཆོག་ལྷན་སྐྱེས་ཡབ་ཡུམ་གྱི་སྤྱི་བོར་ཧཱུྃ་སྔོན་པོ་དང་བྃ་དམར་པོ། དེ་གཉིས་ལས་འོད་ཟེར་གསལ་དྭངས་འཚེར་བ་དཔེ་ཟླ་མེད་པར་བྱུང་། །འོད་ཀྱིས་གང་ཕོག་པ་ཆེས་དྭངས་གསལ་དུ་གྱུར་ཅིང་། ཤ་ཁྲག་རུས་པ་སོགས་རྡུལ་ཕྲ་རགས་སྦྱངས། མདངས་མའི་འཇའ་ལུས་མངོན་དུ་འགྱུར་པར་བསྒོམ་ཅིང་དེའི་རིམ་པས་གཉིས་ཀའི་སྤྱི་བོ་ནས་རྐང་མཐིལ་གྱི་བར་སྦྱངས། སྐུ་མདོག་ཞལ་ཕྱག་རྒྱན་ན་བཟའ་འཇའཚོན་ལྟར་གསལ་བ་ལ་སེམས་བཟུང་། འདི་སེམས་སྣང་ཁོ་ནའོ། ཞེས་ཐག་བཅད་མཐར་རང་སམས་ངོས་བཟུང་དང་བྲལ་བའི་རང་རིག་ཙམ་གྱི་མདངས་གང་དུ་ཡང་མ་འགག་པའི་རྩལ་ལྷ་སྐུར་སྣང་ཙམ། སྣང་དུས་ཉིད་ནས་སྟོང་པ་རང་སེམས་སྐྱེ་འགག་གནས་གསུམ་དང་བྲལ་བའི་རྩ་ལ་རང་ཤར་དེ་ཉིད་ལ་ཆེ་རེ་འཇོག །ངོ་བོ་བརྗོད་བྲལ་བློ་འདས། རང་བཞིན་དབྱེར་མེད་ལྷན་སྐྱེས། རྣམ་པ་འགག་མེད་རང་ཤར། མཚན་ཉིད་མ་འདྲེས་ཡོངས་རྫོགས། སྐྱེ་རྒ་ན་འཆིའི་ཡེ་ནས་སྟོང་པ་དེ་བཞིན་དུ་འཁོར་འདས་བཅིངས་གྲོལ་སོགས་གཉིས་སྣང་ཐམས་ཅད་ཡེ་ནས་འཁོར་གསུམ་གྱིས་སྟོང་པ། འཆི་མེད་རང་གྲོལ་གྱི་མན་ངག་ཆེན་པོའི། །འདི་ཡང་དོན་གཉེར་སློབ་མ་འགའི་དོན་དུ་ཀུན་དགའ་སྙིང་པོ་ཏཱ་ར་ནཱ་ཐས་དབེན་གནས་བསམ་གཏན་ལྡིང་སུ་བྲིས། །མང་ག་ལཾ། །

༄། །སུ་པྲ་ཏིཥྛ། ཨོཾ་ཨཾ་ཨིཾ། ན་མོ་གུ་རུ་སམྦ་རཱ་དཱི་བྷྱཿ
བདེ་མཆོག་དབུ་མ་ཡིག་བདུན་གྱི་མན་ངག་ཉམས་སུ་ལེན་པ་ལ། རབ་དགའི་གནས་སུ་སྐྱབས་སེམས་དང་། །སཱ་བྷཱ་ཝས་སྦྱངས་བ་རྣམས་བྱ། སྟོང་པའི་ངང་ནས། རང་སེམས་ཧཱུྃ་ལས་སྐད་ཅིག་གིས། སྲུང་འཁོར་གཞལ་ཡས་ཁང་དང་བཅས་པའི་དབུས་སུ་རང་ཉིད་བླ་མ་དཔལ་ཧེ་རུ་ཀ་རྡོ་རྗེ་སྙིང་རྗེའི་སྟོབས། ཨིནྡྲ་ནཱི་ལའི་མདངས་འོད་འཁྲུགས་པའི་སྐུ་ཞལ་གཅིག་ཕྱག་གཉིས་ཀྱིས་རྡོ་རྗེ་དྲིལ་བུ་བསྣམས་པས་ཡུམ་ལ་འཁྱུད་པ། སྤྱན་གསུམ་དང་རལ་པའི་ཅོད་པན་སྣ་ཚོགས་རྡོ་རྗེ་ནོར་བུ་ཟླ་ཕྱེད་ཕྱག་རྒྱ་དྲུག་མི་མགོའི་ཅོད་པན་དང་དོ་ཤལ་གྱིས་བརྒྱན་པ། གཡས་བརྐྱང་གི་སྣ་ཚོགས་པད་ཉིར་དྲག་པོ་དང་དབུ་མ་བརྫིས་པ། སྟག་ལྤགས་གསར་པའི་སྨད་གཡོགས་གྲོལ་བས་གཉུག་མའི་དགའ་མ་དང་གཉིས་མེད་དུ་རོལ་བ་དེ་ལ་འཁྱུད་པའི་རིག་མ་རྡོ་རྗེ་ཕག་མོ་རབ་དམར་ལི་ཁྲིའི་མདངས་གསལ་བ་བསྐལ་པའི་མེ་ལྟར་འབར་བ། གྲི་ཐོད་ཐོགས་པས་དབལ་ཧེ་རུ་ཀའི་མགུལ་ནས་འཁྱུད་ཅིང་། གཅེར་བུ་སྐྲ་གྲོལ་བ། ཕྱག་རྒྱ་ལྔ་པ། གཡོན་བརྐྱང་གིས་ཡབ་ལ་སྦྱོར་བ། ཐོད་སྐམ་གྱི་དོ་ཤལ་ཅན། གཉིས་ཀའང་གར་གྱི་ཉམས་དགུ་དང་ལྡན་པས་མཛེས་ཤིང་ལང་ཚོ་བདོ་བ། རབ་འཇིགས་མེ་དཔུང་གི་ཀློང་ན་བཞུགས་པ། མི་བསྐྱོད་པའི་དབུ་རྒྱན་ཅན། དམ་ཡེ་དབྱེར་མེད་གྱུར། ལུས་ནང་རྩ་དབུ་མ་ཡར་རྩེ་ཕུ་བ་སྤྱི་གཙུག་དང་། མར་སྣ་ཡངས་པ་འོག་སྒོར་སོན་པ། དེའི་ནང་སྤྱི་བོར་པདྨ་འདབ་དྲུག་ལ་ཡིག་བདུན་གཡས་བསྐོར། ཡབ་ཡུམ་སྙོམས་འཇུག་གི་བདེ་བ་བསྒོམ་པས། དྷཱུ་ཏིའི་ནང་ཐམས་ཅད་སྔགས་འབྲུའི་གང་བའི་འོད་ཀྱི་ལུས་གང་། སྡིག་སྒྲིབ་ཀུན་སྦྱངས། རང་གཞན་ཐམས་ཅད་བདེ་མཆོག་དུ་གྱུར་པ་ཐམས་ཅད་ཀྱིས་སྔགས་བཟླས། ཨོཾ་ཧྲཱིཿཧ་ཧ་ཧཱུྃ་ཧཱུྃ་ཕཊ། །ཅི་ནུས་བཟླ། ཨརྒྷཾ་སོགས་དང་ནང་མཆོད་གཏོར་མ་ལྟར་བྱིན་གྱིས་རླབས་ལ་མཆོད། །དཔལ་ལྡན་རྡོ་རྗེ་མཁའ་འགྲོ་མ་སོགས་ཀྱིས་བསྟོད་ལ། དེ་ལ་རླུང་འག མི་དམིགས་ཅུང་ཟད་བཞག །དགེ་བ་བསྔོ།།

༄། །རྒྱུད་སྡེ་ལྔ་གཙོ་བསྡུས་ཡང་སྙིང་ལྷན་སྐྱེས་ཀྱི་རྣལ་འབྱོར་ནི་བདེ་མཆོག་ལྷན་སྐྱེས་སྔར་བཞིན་བསྒོམ་ལ། སྤྱི་བོར་ཧཱུྃ་ལས། གསང་བ་འདུས་པ་བདེ་བཞིའ་གཤེགས་པ་རྡོ་རྗེ་མི་བསྐྱོད་པ་འཁོར་ལོ་བསྒྱུར་བའི་ཆ་ལུགས་ཡིད་ཙམ་དུ་ཁྲོ་བ་རྡོ་རྗེ་སྐྱིལ་ཀྲུང་ཅུན། ཡུམ་རང་འདྲའི་རིག་རྡོ་རྗེ་མ། མགྲིན་པར་རོའི་གདན་ལ་ཧྲཱིཿལས་མ་ཧཱ་མ་ཡ་ཐོད་པ་དང་ཁ་ཊྭཱཾ་ཅན་ཡུམ་བུདྡྷ་ཌཱ་ཀི་ནི་དམར་མོ་རང་དང་འདྲ་བ། སྙིང་གར་བདུད་བཞིའི་གདན་ལ་ཧཱུྃ་ལས་དགྱེས་མཛད། ཡུམ་བདག་མེད་མ་གྲི་ཐོད་ཅན་དང་སྦྱོར་བ། ལྟེ་བར་འཇིགས་བྱེད་དུས་མཚན་མའི་གདན་ལ་ཧཱུྃ་ལས་བདེ་མཆོག་ཡབ་ཡུམ་ཕག་མོ་དམར་མོ་གྲི་ཐོད་ཅན། དེ་གསུམ་ཀའང་ཧེ་རུ་ཀའི་ཆ་བྱད་རྫོགས་པ། གཡས་བརྐྱང་གི་སྟབས་སོ། འདུས་པ་བདེ་དགྱེས་རྣམས་རྡོ་རྗེ་དྲིལ་བུ་འཛིན་པས་རིག་མ་ལ་འཁྱུད་པ། གསང་བར་མ་ཧེ་དང་གཤིན་རྗེའི་གདན་ལ། ཧཱུྃ་ལས་རྡོ་རྗེ་འཇིགས་བྱེད་མ་ཧེའི་གདོང་ཅན་གཅེར་བུ་མཚན་མ་འགྲེང་བ་དུར་ཁྲོད་ཀྱི་ཆས་དང་ལྡན་པ། ཡུམ་ཕག་མོ་དམར་མོ་གཉིས་ཀའང་གྲི་ཐོད་འཛིན་པ་ཐམས་ཅད་ཀྱང་པད་ཉི་ལ་བཞུགས་པའོ། །གནས་གསུམ་དུ། ཨོཾ་ཨཱཿཧཱུྃ། ཕྱོགས་བཅུའི་རྒྱལ་བ་སྲས་དང་བཅས་པ་ཐམས་ཅད་ལྷ་ལྔའི་རྣམ་པར་བཛྲ་ས་མཱ་ཛཿ ཛཿཧཱུྃ་བྃ་ཧོཿ ནམ་མཁར་བཞུགས་པའི་དབང་གི་ལྷ་རྣམས་ཀྱིས་ཇི་ལྟར་བལྟམས་པ་སོགས་དང་། ཨོཾ་བཛྲ་བྷ་བ་ཨ་བྷི་ཥིཉྩ་ཧཱུྃ། །དབང་བསྐུར་བས་ལྷ་ཐམས་ཅད་ལ་མི་བསྐྱོད་པས་དབུ་བརྒྱན། དབང་ལྷ་ཡབ་ཡུམ་སྙོམས་འཇུག་གི་བྱང་སེམས་དཀར་དམར་ལྕེ་ཐོག་ཏུ་བཞག །ཨོཾ་ཨཱཿཧཱུྃ། ཡེ་ཤེས་ཕྱག་རྒྱ་དང་སྙོམས་པར་ཞུགས་པའི་བདེ་ཆེན་ལྷན་སྐྱེས་ཉམས་སུ་མྱོང་། དེ་ནས་སེམས་མ་བཅོས་པའི་རང་ངོ་ལ་ཆེར་རེ་གཏད། ཨོཾ་ཨཱཿབཛྲ་དྷྲིཀྲ་ཧཱུྃ་ཧཱུྃ་ཕཊ་སྭཱ་ཧཱ། ཨོཾ་ཨཱཿཧྲཱི་ཧཱུྃ་ཧཱུྃ་ཕཊ་སྭཱ་ཧཱ། །ཨོཾ་དེ་བ་པི་ཙུ་བཛྲ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། །ཨོཾ་ཧྲཱི་ཧ་ཧ་ཧཱུྃ་ཧཱུྃ་ཕཊ། །དེ་ནས་རྫོགས་རིམ་སྒོམ། འཇུག་གོང་དང་འདྲ། གཏོར་མ་ཨ་མྲྀ་ཏས་བསང་། སྭ་བྷ་ཝཱས་སྦྱངས། ཡཾ་ལས་རླུང་། རཾ་ལས་མེ། ཀཾ་ལས་མི་མགོའི་སྒྱེད་བུ་གསུམ། ཨ་ལས་ཐོད་པའི་ནང་དུ་ཧཱུྃ་བྷྲཱུཾ་ཏྲཾ་ཨཾ་ཁཾ་ལས་ཤ་ལྔ། བཾ་མཱཾ་ལཱཾ་པཱཾ་ཏཱཾ་ལས་བདུད་རྩི་ལྔ་འོད་དུ་ཞུ་བ་ལས་དམ་ཚིག་གི་བདུད་རྩི་ལ། འཇིག་རྟེན་དང་འཇིག་རྟེན་ལས་འདས་པའི་བདུད་རྩི་ཐམས་ཅད་བཀུག་སྟེ་ཐིམ་པས་དམ་རྫས་འབར་བ་ཡེ་ཤེས་ཀྱི་བདུད་རྩིའི་རྒྱ་མཚོར་གྱུར། །ཨོཾ་ཨཱཿཧཱུྃ་ཧ་ཧོ་ཧྲཱིཿ རང་གི་སྙིང་ཁའི་འོད་ཀྱིས་རྒྱུད་སྡེ་ལྔའི་ལྷ་ཚོགས་བཛྲ་ས་མཱ་ཛཿ ལྗགས་ལས་ཧཱུྃ་བྱུང་རྡོ་རྗེ་ཡི། །འོད་ཀྱིས་གསོལ་ཞིང་མཉེས་པར་གྱུར། །སྙིང་པོའི་མཐར་ཨོཾ་ཨཱཿཧཱུྃ་ངམ་ཨ་ཀཱ་རོ་སོགས་བཏགས་པ་ལན་གསུམ་སོགས་ཀྱིས། གཏོར་མ་དང་། ཨརྒྷཾ་སོགས་ཀྱིས་ཕྱི་མཆོད་དང་། ཨོཾ་ཨཱཿཧཱུྃ་གྱིས་ནང་མཆོད་ཕུལ། སངས་རྒྱས་ཀུན་གྱི་སྐུ་གསུང་ཐུགས། །ཡོན་ཏན་ཕྲིན་ལས་རབ་རྫོགས་པ། །དཀྱིལ་འཁོར་ལྔ་པོ་ཐམས་ཅད་ལ། །ཀུན་ནས་དང་བས་ཕྱག་འཚལ་ལོ། །ཞེས་བསྟོད་མཆོད་སྦྱིན་གཏོར་མ་སོགས་ཀྱིས་ཕྲིན་ལས་གསོལ། རང་གི་མདུན་དུ་པད་ཉི་ཚོགས་ཀྱི་བདག་པོའི་གདན་སྟེང་ཧཱུྃ་མཐིང་གའི་འོད་ཀྱི་འཕྲོ་འདུ་ལས་ཡེ་ཤེས་མགོན་པོ་མྱུར་མཛད་སྤྱན་རས་གཟིགས་དབང་རྡོ་རྗེ་ནག་པོ་ཆེན་པོ་ཕྱག་དྲུག་གིས་གྲི་ཐོད། མགོ་ཕྲེང་། ཅང་ཏེའུ། ཏྲི་ཤུ་ལ། ཞགས་པ་རྣམས་འཛིན་ཅིང་། སྟག་ལྤགས་རྒྱན་དྲུག་སྦྲུལ་དང་མི་མགོའི་དོ་ཤལ། ཕྱག་ཞབས་གཡེར་ཁའི་ཕྲེང་བ་ཅན། དཔལ་བར་སིནྡྷུ་རའི་ཐིག་ལེ་རྗེ་བཙུན་མ་དང་སྒྲོལ་མ། དེར་ཧྲཱིཿསྤྱན་རུས་གཟིགས་ཀྱི་ངོ་བོ། སྤྱི་བོར་མི་བསྐྱོད་པས་རྒྱས་བཏབ་པ། རབ་ཏུ་ཁྲོས་པའི་མཚན་ཉིད་རྫོགས་པ་ཀྲིག་ཀྲིག་ཞབས་ཀྱི་སྟབས་ཅན་མེ་དཔུང་གི་ཀློང་ན་བཞུགས་པའི་སྟེང་ན་རྩ་བའི་བླ་མ། གཡས་ན་དཔའ་བོའི་ངར་དང་བཅསཤིང་། གཡོན་ན་དཔའ་མོ་འཛུམ་དང་བཅས་པ། འཁོར་དུ་དཔལ་ལྡན་ལྷ་མོ་རེ་མ་ཏཱི། གནོད་སྦྱིན་བཞི། གཙང་རིས་ཀྱི་མགོན་པོ་བདུན་ཅུ་རྩ་ལྔ། དམ་ཅན་རྒྱ་མཚོའི་ཚོགས་དང་བཅས་པ། རང་གི་སྙིང་ཁ་ནས་འོད་ཟེར་འཕྲོས་པས་དུར་ཁྲོད་ཆེན་པོ་བསིལ་བའི་ཚལ། ཤིང་ཙནྡན་རྐང་གཅིག་པའི་དྲུང་ནས་མྱུར་མཛོད་མགོན་པོ་བཀའ་སྡོད་ཞིང་སྐྱོང་ཕོ་ཉ་ཐམས་ཅད་བཛྲ་མ་ཧཱ་ཀཱ་ལ་ས་པ་རི་ཝཱ་ར་ཀྵིཾ་ཀྵིཾ་ཉེར་གཅིག་གིས་སྤྱན་དྲངས། ཛཿཧཱུྃ་བྃ་ཧོཿ བླ་མ་མགོན་པོ་དབྱེར་མེད་ཀྱི་གསོལ་འདེབས་དང་། གྲིབ་སེལ། ཡིག་བརྒྱ་དང་བཤགས་པ་གནད་དབབ། དབང་བསྡུད། ནུས་མཐུ་སྐྱེད་པ་དང་། འཁུ་ལྡོག་ཞི་བའི་དམིགས་པ་དང་བཅས་པའི་བཟླས་པ་འགྲུབ་ན་ཅི་རིགས་བྱ། གཏོར་འབུལ་ཙམ་ལ་མེད་ཀྱང་རུང་། དེ་ནས་གཏོར་མ་བྱིན་རླབས་བྱས་ལ། ཨོཾ་བཛྲ་མ་ཧཱ་ཀ་ལ་ཀྵིཾ་ཀྵེ་ཏྲ་བིགྷྣན་བི་ནཱ་ཡ་ཀ་ཧཱུྃ་ཕཊ། ཨི་དཾ་བཱ་ལིང་ཏ་ཁ་ཁ་ཁཱ་ཧི་ཁཱ་ཧི་སྭཱ་ཧཱ། །ཤཱ་ས་ན་ལན་བདུན་སོགས་ཀྱིས་དབུལ། སྤྲོ་ན་འཁོར་ལ་སོ་སོའི་སྔགས་ཀྱིས་ཕུལ། ཨརྒྷཾ་སོགས་དང་། ཨོཾ་ཨཱཿཧཱུྃ་གི་ནང་མཆོད་དང་། མྱུར་མཛད་སོགས་བསྟོད་པའམ་བསྡུ་ན། ལང་ཀ་པུ་རི་གསུམ་བསྲེགས་ཤིང་། སངས་རྒྱས་བསྟན་སྐྱོང་བདུད་དཔུང་འཇོམས། །ཞལ་གཅིག་ཕྱག་དྲུག་ནག་པོ་ཆེ། །འཇིགས་པའི་གཟུགས་ཅན་ཁྱོད་ལ་བསྟོད། །ཀྵེ་ཏྲ་པཱ་ལ་ཛི་ན་མི་ཏྲ་དང་། །ཊཀྐི་རཱ་ཛ་ཏྲཀྴད་རཻ་མ་ཏཱི། །དཔལ་མགོན་བདུན་ཅུ་རྩ་ལྔ་དང་། །དམ་ཅན་རྒྱ་མཚོའི་དམག །ཚོགས་རྣམས། །ཤ་ཁྲག་གཏོར་མ་འདི་བཞེས་ལ། །རྣལ་འབྱོར་བདག་ཅག་དཔོན་སློབ་ཀྱི། །མི་མཐུན་རྐྱེན་དང་བར་ཆད་སེལ། །མཐུན་རྐྱེན་འཕྲིན་ལས་ཡིད་བཞིན་སྒྲུབ། །དགྲ་བགེགས་ཐམས་ཅད་བསྒྲོལ་བ་དང་། །དངོས་གྲུབ་ཐམས་ཅད་སྩལ་དུ་གསོལ། །ཡིག་བརྒྱ་བརྗོད་ལ་གཤེགས་སུ་གསོལ། །བཀྲ་ཤིས་བཀའ་རྒྱ་མ་སོགས་བྱ། །མཁའ་འགྲོ་སྤྱི་གཏོར་དང་གཞི་བདག་གཏོར་མ་སྤྱི་དང་མཐུན་པར་བྱའོ། །ཅེས་པ་འདི་ཡང་དོན་གཉེར་སློབ་མ་འགས་བསྐུལ་ནས་ཀུན་དགའ་སྙིང་པོ་ཏཱ་ར་ནཱ་ཐས་སྦྱར་བ་སྟེ། །སྒྲུབ་གནས་བསམ་གཏན་ལྡིངས་སུའོ། །དག་ལེགས་གོང་འཕེལ་བཀྲ་ཤིས། །

༄། །ན་མོ་གུ་རུ་ཝེ།
།བདེ་མཆོག་མཁའ་སྤྱོད་སྐོར་ལ། །དམར་མོ་རཱ་ཧུ་ལ་དང་། དཀར་མོ་ཨ་ཏི་ཤ་ཆེན་པོ་ལ། ཁྱུང་པོས་གསན་པ་ལས་འདིར་རཱ་ཧུ་ལ། ཇོ་བའི་བླ་མ་ནག་པོ་རཱ་ཧུ་ལ་ཌོམྦྷི་ཧེ་རུ་ཀའི་ཡང་སློབ་དེ་ཁོ་ན་ཡིན་སྣང་འདི་གྲུབ་ཆེན་རྒྱལ་ཀ་ཟླ་བའི་དངོས་སློབ་ཡིན། དེ་ཌོམྦྷི་ཧེ་རུ་ཀའི་དངོས་སློབ་ཡིན་མིན་བོད་ལ་སྣ་ཚོགས་གླེང་ཡང་། ཡན་ལག་དྲུག་པ་ཌོམྦྷི་ཞལ་སྔ་ནས་ཀྱི་རིམ་པ་ཞེས་པས་དངོས་སློབ་བསྙོན་མེད་དུ་སྣང་བ་ལས། གཞན་དུ་སྨྲ་བ་རིམ་ཞེས་པའི་ཚིག་རིམ་གྱིས་གཞན་ལ་བརྒྱུད་པར་འབྲུ་གནོན་པར་ཡིད་བརྟན་མེད་པར་ནི། སློབ་དཔོན་གཞན་ལའང་དེའི་ཞལ་སྔའི་རིམ་པས་ཞེས་པ་དངོས་སློབ་ཁོ་ནས་བྱས་པ་ལ་སྣང་སྟེ་རྗེ་བཙུན་མའི་སྒྲུབ་ཐབས་མཻ་ཏྲི་པས་མཛད་པར་རི་ཁྲོད་ཞལ་སྔའི་རིམ་ཞེས་འབྱུང་བ་ལྟ་བུ་ཡིན་ལ། བདག་གི་རྗེ་བཙུན་དམ་པ་སངས་རྒྱས་སྦས་པའི་ཞལ་སྔ་ནས་ཀྱང་། སློབ་མ་བླ་མ་ལས་རྟོགས་པ་དམའ་བ་རྣམས་ཀྱིས་རྩ་བའི་བླ་མ་ཁོ་ན་སྨོས་པར་བྱེད་པ་རྒྱ་གར་བའི་ལུགས་ཡིན་ཅེས་བཀའ་སྩལ་སྣང་བ་ཐོས་ལ། གཞན་ཡང་དེ་ལྟར་འབྲུ་མནན་མཛད་པའི་བདག་ཉིད་ཆེན་པོ་དེས། བསྟན་བཅོས་དེ་ཉིད་དུ་སྙིང་རྗེའི་སྟོབས་ཀྱི་སྒྲུབས་པ་བརྩམས། ཞེས་པའི་འབྲུ་མནན་ཐུགས་རྗེའི་སྟོབས་ཧེ་རུ་ཀ་སྤྱི་ཡི་མཚན་ཡིན་པ་ལ་བྱེད་རྒྱུ་དྲུག་སྒྲ་བྱེད་ཚིག་ཏུ་བྱས། བླ་མའི་ཐུགས་རྗེའི་སྟོབས་ཀྱིས་སྒྲུབ་ཐབས་བྱས་པའི་དོན་དུ་བཤད་པ་སོགས་ལས། འདམ་བུ་དང་རྒྱ་མཚོའི་དཔེས་རིག་པར་གྱུར་ཏེ།
སྐབས་དོན་ཉམས་ལེན་ནི། སྐྱབས་སེམས་ཚད་མེད་བཞི་བསྒོམ། སྭ་བྷཱ་ཝས། སྟོང་པའི་ངང་ལས་ཆོས་འབྱུང་གི་ནང་དུ་རང་སེམས་ཧཱུྃ་མཐིང་ཀ་ལས་བདེ་མཆོག་ལྷན་སྐྱེས་འོད་ལྔ་འབར་བ། རང་གི་མདུན་དུ་ཧྲཱིཿདཀར་པོ་འོད་དུ་ཞུ་བ་ལས། རྡོ་རྗེ་རྣལ་འབྱོར་མ་སྟོན་ཀའི་ཟླ་འོད་ལྟར་དཀར་བ་ལ་ཡིད་ཙམ་དམར་བའི་མདངས་ཀྱིས་མཛེས་པ། སྤྱན་གསུམ་ནམ་མཁའ་ལ་ཧྲིག་ཧྲིག་འཕྲུལ་བས་གཟིགས་པ། འཛུམ་ཁྲོ་ཆགས་པའི་ཉམས་རྒྱས་པས་མཆེ་བའི་མྱུ་གུ་གསལ་བར་བཞད་པ། ཕྱག་གཡས་གྲི་གུག་རྡོག་སྟངས་དང་། གཡོན་ཐོད་པ་ཁྲག་གང་ཕྱིར་བསྟན་དུ་འཛིན་པ། ཞབས་རྒྱབ་ངོས་ནས་ཕྲག་པར་བཀལ་བས་ཆུ་སྐྱེས་ཟེའུ་ལྷག་གེར་བཞད་པ། གཅེར་བུ་སྐྲ་སིལ་བུར་གྲོལ་བས་སྐུ་སྟོད་ཁེབས་པ། གཞོན་ནུ་ལང་ཚོ་མ་སྐེད་སྐབས་ཕྲ་ཞིང་བརླ་དང་སྐྱེ་༼འདི་ཇོ་བོའི་གཞུང་ཆང་ནས་བྱུང་།༽གནས་དང་ནུ་འབུར་མཐོ་ལ་རྒྱས་པ། མཛེས་སྡུག་ཡིད་འོང་རྒྱན་༼ཡི་གེ་རྣམས་མགོ་ཕྲེང་གཉིས་ཙམ་དང་། རྒྱན་ཐམས་ཅད་ཀྱི་བརྒྱན་པ་ཞེས་པའང་སྣང་།༽སྤངས་པ། རབ་ཏུ་གཏུམ་པའི་དཔའ་མོ་མེ་རི་དཀར་པོའི་དབུས་ན་བཞུགས་པ། དེའི་གནས་གསུམ་ལས་འོད་ཟེར་དཀར་དམར་སྔོ་གསུམ་གཅིག་ལ་གཅིག་འཁྲིལ་བྷ་ག་ནས་འཐོབ། རང་གི་སྤྱི་བོར་བརྒྱུད་ལུས་གང་སྡིག་སྒྲིབ་བག་ཆགས་བཅས་སྦྱངས། འོད་གསང་གནས་ནས་སྤྱི་བའི་བར་ཡར་འཁྱིལ་དགའ་བཞིའི་བདེ་བ་རྒྱས་པར་བསམ། ཨོཾ་གསུམ་མ་བཟླ། མཇུག་ཏུ་སྐད་ཅིག་གི་ཐམས་ཅད་མི་དམིགས་པའི་འོད་གསལ་ཕྱག་རྒྱ་ཆེན་པོའི་ངང་སྐྱོང་། དགེ་བ་བསྔོ། འདི་ལ་རྫོགས་རིམ་དང་འབྲེལ་བ་རྗེས་གཞིག་་་་་བ་མོ་རྗེ་བཙུན་མ་སྤྱི་བོར་སྒོམ་པའི་གསང་གནས་ནས་བྱང་ཆུབ་སེམས་འོད་དམར་པོ་བྱུང་། ཚངས་བུག་ནས་ཞུགས་ལུས་ཁེངས། འོད་དུ་དམར་ལྟེམ་པ་བདེ་སིང་བ་དེ་ཡང་མཐའ་ནས་འོད་དུ་ཡལ་བ་སྙིང་ཁའི་བར་དུ་བསྡུས་ནས་མི་དམིགས་པར་ལྷོད་དེ་འཇོག །ཡང་དཔའ་བོའམ་རྗེ་བཙུན་མའི་སྐུར་ལྡང་ཡང་ན་ནོར་བུའི་དབུས་སུ་མཁའ་སྤྱོད་མ། དེ་འོད་དུ་ཞུ་རྡོ་རྗེའི་ལམ་བརྒྱུད་ལུས་གང་བ་མན་ཆད་སྔར་བཞིན་བསྒོམ་པ་ཡིན་ནོ། །དམར་མོ་ལ་རང་གི་མདུན་དུ་ཆོས་འབྱུང་གཉིས་བརྩེགས་ཕྱི་དཀར་ནང་དམར་བདེ་སྟོང་དུ་འཆན་ཞིང་། རྒྱུ་བའི་དབུས་སུ་པད་ཉི་མི་རོལ་བྃ་ལས་རྗེ་བཙུན་མ་ལི་ཁྲིའི་མདངས་ཅན། དམར་ཞིང་བཀྲ་བའི་སྤྱན་གསུམ་གཡོ་བ། ཕྱག་གཡས་རྡོ་རྗེ་ཐུར་དུ་བསྣུན་ཅིང་། གཡོན་ཐོད་ཁྲག་སྟེང་དུ་བཟུང་བ་ལ་ཞལ་རས་ཕྱོགས་པས་བདེ་བའི་རྒྱུན་གསོལ་བ། གྲུ་མོར་ཐབས་ཀྱི་རང་བཞིན་ཁ་ཊྭཱཾ་ག་དཀར་པོ། ཞབས་གཡས་བརྐྱང་མི་རོའི་སྙིང་ག་དང་། གཡོན་ཕྲག་པར་བཀལ་བ་གཅེར་བུ་དབུ་སྐྲ་ཞེས་པ་ནས་ཡིད་འོང་བར་སྔར་བཞིན་ཕྱག་རྒྱ་ལྔ་དང་མགོ་ཕྲེང་ཅན། རབ་གཏུམ་མཆེ་གརྩིགས་ཁྲོ་གཉེར་ཡིད་ཙམ་བསྡུས་པ་མེ་དཔུང་གི་ཀློང་ན་བཞུགས་པ། རང་གི་ལྟེ་བར་ཨ་ཐུང་གི་ཆོས་འབྱུང་ལ་ཕོག །བག་ཆགས་ཐམས་ཅད་སྦྱངས། རྗེ་བཙུན་མའི་གསང་བའི་ཆུ་སྐྱེས་ཀྱི་འོད་ཀྱི་རང་ལ་ཕོག་སྡིག་སྒྲིབ་སྦྱངས། ཨོཾ་གསུམ་མ་བཟླས་རྗེས་གོང་བཞིན། ཆང་མཆོད་ནི་སྲིན་ལག་གཡོན་པས་ཆོས་འབྱུང་གཉིས་རིམ་བྲི་ཚུལ་དང་ཨོཾ་གསུམ་མ་བརྗོད། དེ་སྔར་བཞིན་བསྐྱེད། ཆང་ཐམས་ཅད་ཨོཾ་གསུམ་མའི་ཡིག་འབྲུར་དམར་ཧྲཾ་མེ་བ་ལ་དོ་ཤལ་རེག་གེ་བ། ཨོཾ་གསུམ་མ་བཟླས་པས་བྷ་ག་ནས་རང་བྱུང་བདེ་ཕྲི་ལི་ལི་བབས། ཆང་སྣོད་ཁེངས་ལྷ་མོ་འོད་དུ་ཞུ་ཐིམ་པས་བདུད་རྩིར་གྱུར། བླ་མ་ཡི་དམ་ཆོས་སྐྱོང་ལ་འབུལ། རང་གི་གནས་གསུམ་དུ་གཏོར། ཚོགས་དང་གྲོགས་དང་གནས་དང་གཏོར་མ་ལ་གཏོར། རང་ཉིད་ཁྲུས་ཀྱང་བྱ། གཞན་གྱིས་མ་མཐོང་བར་གསང་བ་གལ་ཆེ། དཀར་དམར་གཉིས་ཀ་ལ་གཏོར་མ་བསང་སྦྱངས། ལག་མཐིལ་གཡོན་པར་བཞག །གཡས་པའི་མཐེབ་སྲིན་གྱི་བཟུང་ལསྤྱི་ལྟར་བྱིན་རླབས་བྱས་མཐར་འབྲུ་གསུམ་ལེན་གཉིས་ཀྱི་དམ་ཚིག་པ་དང་ཡེ་ཤེས་ཀྱི་བདུད་རྩིར་བསམ། ཕཻཾ་ཞེས་སྐད་ཅིག་གི་འཁོར་བཅས་སྤྱན་དྲངས་ལ་ཨོཾ་གསུམ་མ་འབྲུ་གསུམ་བཏགས་པས་ཕུལ། ཨརྒྷཾ་དཔལ་ལྡན་རྡོ་རྗེ་མཁའ་འགྲོས་བསྟོད། །མཆོད་སྦྱིན་གཏོར་མ་སོགས་ཕྲིན་ལས་བཅོལ། ཡིག་བརྒྱ་དང་བཤགས་པ་བྱ། རང་ལ་བསྟིམས། གལ་ཏེ་ཚེས་བཅུའི་མཆོད་པ་བྱ་འདོད་ན། །རྗེ་བཙུན་མ་ལ་མཁའ་འགྲོ་སྡེ་ལྔ་དང་། མྱུར་མཛད་མ་ཧཱ་ཀ་ལ་སོགས་དང་། སྟེང་ནས་རྩ་བརྒྱུད་ཀྱི་བླ་མས་བསྐོར་བ་རྣམས་འདིའི་ཁྱད་ཆོས་སོ། དེ་མ་གཏོགས་མན་ངག་གཞན་པའི་ལུགས་ཀྱི་ཚེས་བཅུའི་ཚོགས་མཆོད་བསྡུས་པ་ཁྱད་པར་མེད་པས་དེ་བཞིན་དུ་བྱའོ། །དཀར་མོའི་འཕོ་བ། དམ་ཚིག་གི་གསོ་ཐབས། རིལ་བུའི་ཆོ་ག་དམར་མོའི་འཕོ་བ། མཁའ་སྤྱོད་གསུམ་སྤྲུག་ཨའི་འོད་མཆོད་མཁའ་འགྲོ་དབང་ཆེན། སྙིང་རྗེ་ཆུ་རྒྱུན་ཁྱད་འཕགས་གསོལ་འདེབས་རྣམས་ཉམས་ལེན་བྱ་འདོད་ན་ཡིག་རྙིང་དུ་ཤེས་པར་བྱའོ།
།མན་ངག་ཕྱོགས་མཐུན་གཞན་འདིར་ཞལ་ཤེས་ཀྱི་རྫོགས་རིམ་ནི། རཱ་ཧུ་ལའི་གདམས་པ་མཉམ་མེད་ཨ་ཏི་ཤའི་དགོངས་པ་འདི་ཡིན་ཏེ། བསྐྱེད་རིམ་རང་རྗེ་བཙུན་མ་བསྐྱེད་ཆོག་སྔར་གྱི་མདུན་བསྐྱེད་བཞིན་བྱ། ལྟེ་བར་པད་འདབ་བརྒྱད་པ་དམར་པོ་འོད་སྣ་ལྔའཕྲོ་བའི་ལྟེ་བར་མར་མེ་སོར་བཞི་པ་བསམ་ལ། རླུང་གཏོང་ཁར་རླུང་མེད་པའི་སྦྱོར་བ་བྱེད་པ་དང་། མིག་སྣ་རྩེར་ལྟ་བ་མ་གཏོགས་ལུས་གནད་དང་རླུང་བུམ་ཅན་སྤྱི་མཐུན་དེ་མགྲིན་པར་བཞག་ནས་རྨི་ལམ་དང་། སྙིང་ཁར་འོད་གསོལ། གསང་གནས་སུ་བཞག་ནས་ཐུར་སེལ་དབང་དུ་བྱེད། དབང་དུ་གྱུར་ན་ལས་རྒྱའི་གཏུམ་མོ་སྒོམ། །བུད་མེད་གཟུགས་ནི་སྤངས་ནས་གཞན། །ཞེས་སོགས་ཀྱི་གདམས་ངག་ལེན། །སྔར་བསྟན་རྗེས་གཞིག་གི་འོད་གསལ་བསྒོམ། །དེ་ནས་ཟུང་འཇུག་འབྱུང་ཞེས་པ་མདོ་ཙམ་མོ། །འདི་ལ་ཆགས་གྲོལ་གྱི་ལམ་གཉིས་ཀ་ཆ་ཚང་ཡོད་པར་མངོན། སྙན་བརྒྱུད་དེ་ཙམ་མོ། །མདོ་ཙམ་གཞན་དུ་བྲི་བར་འདོད་ལ། ཤངས་ཆོས་སྐོར་དུ་ཡི་གེར་འཁྱོད་པ་མེད་པས། བར་སྐབས་སུ་ཆད་པ་འདྲ་ཞིང་དེ་ལས་གཞན་ལྷ་བཞིའི་དྲིལ་སྒྲུབ་སོགས་ཀྱང་འདེའི་ཕྱོགས་ཡིན་ནོ།
།དེ་ལྟར་སྔོན་འགྲོ། ཆོས་དྲུག །ཕྱག་ཆེན། ལམ་ཁྱེར། འཆི་མེད། བསྐྱེད་རིམ་མཁའ་སྤྱོད་སྐོར་ཏེ།

༈ འདི་ཙམ་བླ་མའི་མན་ངག་ཡིན། །ད་ནི་དུས་ཀྱི་མི་སྡོད་ཅིང་། །ལང་ཚོའང་སྟོན་ཀའི་སྤྲིན་བཞིན་གཡོ། །དེ་བས་སྒྲུབ་ལ་འབད་པར་བྱ། །མན་ངག་ཚད་ནི་འདི་ཡིན་ཏེ། །གླེགས་བམ་མང་ཡང་ངལ་བའི་རྒྱུ། །སློབ་མས་བསྐུལ་ཕྱིར་འདི་བྲིས་པའི། །དགེ་བས་སངས་རྒྱས་ཐོབ་པར་ཤོག
།འཇམ་དབྱངས་ཀྱི་སྒྲུབ་ཐབས་འདི་དང་། གངས་ཆོས་ཚན་བདུན་པོ་འདི་ཐུན་གཉིས་ལ་བྲིས་པ་སྟེ། བོད་ཡུལ་དབུས་གྲྭ་ཐང་པའི་དགེ་སློང་ཀུན་དགའ་རིན་ཆེན་རྒྱལ་མཚན་འོད་ཟེར་དཔལ་བཟང་པོ་སོགས་ཀྱིས་བསྐུལ་ནས་རང་ལོ་ཉེར་གཉིས་པ་ལའོ། །ཡུར་ཡཏིཥྛནྟུ། །