Rdo rje rnal 'byor thod pa rgya mtsho'i sgrub thabs

Resource ID	SCv8p666
Title	rdo rje rnal 'byor thod pa rgya mtsho'i sgrub thabs
Alt. title	nara satra thod pa rgya mtsho theg chen zil gyis mnan pa rdo rje mkha' 'gro la phyag 'tshal lo
Topics	Various
Sub-Topics	Sadhana
Link	BDRC W23922

༄༅། །རྡོ་རྗེ་རྣལ་འབྱོར་ཐོད་པ་རྒྱ་མཚོའི་སྒྲུབ་ཐབས་བཞུགས།།

རྒྱ་གར་སྐད་དུ། ན་ར་ས་ཏྲ།
བོད་སྐད་དུ། ཐོད་པ་རྒྱ་མཚོ་ཐེག་ཆེན་ཟིལ་གྱིས་མནན་པ་རྡོ་རྗེ་མཁའ་འགྲོ་ལ་ཕྱག་འཚལ་ལོ།
དང་པོ་རྟེན་ནི་རས་ལ་དུར་ཁྲོད་བརྒྱད་བྲིས་ནས་ཐོད་པ་མཚན་ལྡན་ལ་རྗེ་བཙུན་མ་ཟིས་ལ་དེ་རས་དེས་བརྟུམ་ནང་དུ་པག་མོའི་སྙིང་གཞུག་གཡས་རས་སུ།
དང་པོ་སྔོན་དུ་བདག་ཉིད་སྟན་བདེ་བ་ལ་འདུག་ནས་ ཡན་ལག་ལྔ་དང་ལྡན་པས་ ཏིང་ངེ་འཛིན་རྣམ་གསུམ་རིམ་གྱིས་བསྒོམ། དེ་བཞིན་ཉིད་ཀུན་ཏུ་སྣང་། རྒྱུའི་ཏིང་ངེ་འཛིན་ བཞག་འགྲོན་མཆན་ཁུང་གཡོན་དུ་བཅང་བར་བྱའོ།
དེ་ནས་བདག་གི་ཐལ་སྦྱར་ཡི་གེ་ཨོཾ་གཅིག་བསྒོམ་ལ། ཨོཾ་དུ་ཁ་ཡེ་ན་མ་ཞེས་ལན་གཉིས་བརྗོད། བདག་ཉིད་རྗེ་བཙུན་མ རྡོ་རྗེ་རྣལ་འབྱོར་མ་སྐུ་མདོག་དམར་མོ་ཞལ་གཅིག་ཕྱག་བཞི་མ དུས་གསུམ་གཟིགས་རྟགས་སུ་ སྤྱན་གསུམ་མ་ དེ་ལས་འོད་འཕྲོས་དོན་གཉིས་བྱས་སླར་འདུས་པ་ལས་ སྒྲ་འགྲོ་དོན་མཛད་པའི་རྟགས་སུ་ གྲོལ་བ་མཐུར་ལ་འཕྱང་བ། སྐུ་གཅེར་བུ་རུས་པའི་རྒྱན་ཐམས་ཅད་ཀྱིས་བརྒྱན་པ།༼ཕྱི་ལྟར་སེང་གེ་གཉའ་རལ་སྤྲུག་པ་ཁམས་གསུམ་དབང་དུ་བསྡུས་པའི་རྗེ་བཙུན་སེངྒེའི་གདོང་ཅན་ནང་ལྟར་ན་རྗེ་བཙུན་མ་ཞལ་གཅིག་ཕྱག་བཞི་མའོ།༽ ཕྱག་གཡས་ཀྱི་དང་པོ་རྡོ་རྗེ་གྲི་གུག་ཐུགས་ཀར་འཛིན་པ།༼རང་གི་རྟོག་པ་གཅོད་པའི་རྟགས་སུ།༽ གཡོན་དང་པོ་རལ་གྲི་འཕྱར་བ་༼ཉོན་མོངས་པ་དང་བག་ཆགས་རྩད་ནས་གཅོད་པའི་རྟགས་སུ༽ གཡས་ཐ་མ་ན་ཁ་ཊྭཱཾ་༼དུ་གསུམ་རྩད་ནས་གཅོད་པའི་རྟགས་སུ།༽རྩེ་གསུམ་རྩེ་མོ་མཐུར་ལ་བསྟན་པ། ༼དུག་ལྔ་བདུད་རྩི་ལྔ་བྱིན་གྱིས་རླབས་པའི་རྟགས་སུ།༽གཡོན་ཐ་མ་ན་བྷནྡྷ་བདུད་རྩི་ལྔ་ཡིས་གང་བ་ཞལ་དུ་གསོལ་བ། གདན་ཉི་ཟླ་པདྨ་བརྩེགས་པའི་སྟེང་དུ་༼ཆེ་བའི་ཡོན་ཏན་གཞན་ལས་ཁྱད་པར་དུ་འཕགས་པའི་རྟགས་སུ།༽མཁའ་འགྲོ་མ་ལྔའི་སྟེང་དུ་མི་རོ་༼རྟོགས་པ་མི་མང་བའི་རྟགས་སུ།༽བསྣོལ་བའི་གདན་ལ་ཞབས་ཕྱེད་ཀྲུང་དུ་བཞུགས་པ། གཅིག་བསྐྱེད་དོ། ཐུགས་ཀར་ཨོཾ་དུ་༼དེའི་སྙིང་གི་ནང་དུ་རྩ་གསུམ་གྱི་རང་བཞིན་༽ཁ་ཡེ་ན་མ་གཡས་སུ་འཁོར་བ། དེ་ལས་འོད་ཟེར་འཕྲོས་པས་ཁམས་གསུམ་༼འདོད་ཁམས་དམར་པོ་གཟུགས་ཁམས་དཀར་པོ་གཟུགས་མེད་ཁམས་ནག་པོ།༽གྱི་སེམས་ཅན་ཐམས་ཅད་ཀྱི་སྲོག་རྩ་ཞལ་དུ་བཅུ་གནས་སྙིང་༼ཞལ་དུ་༽ཁྲག་༼ཅིབ་ཅིབ་འཇིབ་པར་༽གསོལ་བར་བསམ་ལ། ཨོཾ་དུ་ཁ་ཡེ་ན་མ། ཞེས་རྒྱུན་དུ་བཟླས་སོ། ༼སྒྲིབ་པ་དག་ནས་སྐྱེ་ཤི་རྩད་ནས་བཅད་པར་བསམ་པ་ནི་ནང་ལྟར་རོ།༽ གཏོར་མ་ནི་བྷནྡྷ་མཚན་ལྡན་ཉི་མ་འབུམ་གྱི་ལྟ་བུ། ཡང་ ཨོཾ་དུ་ཁ་རི་ན་མ་་་་ར། དུ་བཅས་པ་ལ་༼པད་བསྐོར་དང་བཅས་ལ་ཁ་རང་ལ་བསྟན་ལ་རང་བཟའོ།༽ ཨོཾ་ཨཱཿཧཱུྃ།༼པད་གཏོར༽ གིས་བདུད་རྩིར་བྱིན་གྱིས་རླབས་ལ། ཨོཾ་དུ་༼སྔགས་འདིས་གཏོར་མ་འབུལ་ལོ།༽ཁ་ཡེ་ན་མ་ཁཱ་ཧི་ཞེས་པ་ལན་བཟླས་ལ་༼གཏོར་མ་༽འབུལ་ལོ། རྡོ་རྗེ་རྣལ་འབྱོར་མའི་སྒྲུབ་ཐབས་རྫོགས་སོ།
།ཨོཾ་ཧ་རི་ནི་ས་ ཨརི་ནི་ས་ཧ་ ཧཱུྃ་ནི་ཧ་ས་རི་ཞལ་གདམས་སོ། བསྟན་པ་ཀུན་གྱི་བུ་གཅིག་གོ །བླ་མ་གྲུབ་ཐོབཀྱི་གནང་བའོ། ཨྀཐི།

འདི་འགྲུབ་པའི་རྟགས་ནི། བུ་མེད། སྐྱེས་པ་ མི་ཆེན་ ནོར་སྣ་ཚོགས་ལྷ་མ་སྲིན་སྡེ་བརྒྱད། ཆོས་རྒྱ་སྣ་ཚོགས་བླ་མ་མཁའ་འགྲོ་མ་ལ་སོགས་པ་ཕ་མ་ལ་བུ་ཚ་འདུ་བ་བཞིན་དུ་འགྱུར་རོ། འདི་ཟླ་བ་༼བ་ནི་ཕྱི་ལྟར་༽ཕྱེད་ཀྱིས་འགྲུབ་པ་ཡིན་གསུངས་སོ། གླུ་མ་ཨོ་རྒྱན་པདྨ་པ། །དམ་པ་ཀུན་བཟང་ལ། གཡའ་རི་སྒོ་མོའི་དྲུང་དུ་གནང་། །དེས་ལུམ་པ་མཐོ་པོ་ཀ་ད་ཁ་བ་ལ། དེས་རི་གོང་པ་སངས་རྒྱས་གཉན་སྟོན་པ་ལ། དེས་སངས་རྒྱས་སྟོན་པ་ལ། དེས་ཨའི་སེང་གེ་ལ། དེས་གསེར་གླིང་པ། དེས་བླ་མ་བཀྲིས་མགོན་པོ་ལ། དེས་དྲུང་ཡེ་ཤེས་རྡོ་རྗེ་ལ། དེས་དྲུང་བློ་ལྡན་བཟང་པོ་ལ། དེས་བདག་ལའོ། གནད་ཐམས་ཅད་ཞལ་ལས་ཤེས་སོ། འདིའི་ཞལ་གདམས་ལ་རང་རྗེ་བཙུན་མར་བསྐྱེད་པ་མཐུན་པར་སྣང་། ཐེག་ཆེ་ན་ཟིལ་གྱིས་མནན་པ། ཁྲོམ་དབང་དུ་བསྡུ་བ་ནི། རང་གི་དཔུང་པ་གཉིས་སུ་སེངྒེ་གཉའ་རལ་སྤྲུགས་པ་རེ། མཁལ་ལོགས་གཉིས་སུ་སྟག་མོ་མི་རོ་འབྲད་པ། བརླ་ཟུར་གཉིས་སུ་སྦྲུལ་ནག་ཁ་ནས་མེ་འབར་བ་བསམ། སྲོག་རྩ་ཞལ་དུ་བཅུག་ནས་སྙིང་ཁྲག་གསོལ་བ་སོགས་འདྲའོ། ལུས་མི་གནས་འགུལ་བསྐྱོད། ངག་མི་གནས་བཟླས་པ། སེམས་མི་གནས་ཆོས་ཉིད་ལ་དམིགས་པ་གཏད། བསྙེན་པ་འདུ་རྒྱུ་ལ་བསྐྱལ། བསྒྲུབ་པ་ལས་སྦྱོར་ཧ་རི་ནི་ས་ལ་བསྐྱལ་ལོ། དེ་ལྟར་བྱས་པས་འདུ་བ་གསུམ་འབྱུང་། ཉིན་པར་མི་འདུ། ནུབ་མོ་མཁའ་འགྲོ། ནང་ནུབ་ཟས་འདུ། རི་བོའི་རྩེ་ལ་བརྟེན་པ་མཁའ་འགྲོ་དབང་དུ་འདུ་ན། རང་ཉིད་སེང་གེ་གཉའ་རལ་སྤྲུགས་པར་བསྒོམ། རིག་པ་ཀྲུག་སྣང་བ་འགྱུར་རོ། ཨྀཐིཿ

འདིའི་སྔགས་ ཨོཾ་དུ་ཁ་ཡེ་ན་མ། ཞེས་འདུག་ནའང་། འདིའི་དམིགས་རིམ་དང་བླ་མའི་ཞལ་གདམས་དང་བསྟུན་ནས། དུ་ཁ་ཡེ་ཞེས་པ་ཅིར་འགྱུརཆ་མེད་ཅིང་། དུ་ཁ་ཞེས་པ་སྡུག་བསྔལ་དུ་འགྱུར་ཞིང་ཡེ་ཤེས་པ་དཔེར་ན་ཡེ་དྷརྨཱའི་མགོའི་མང་ཚིག་དང་མཐུན་པར། རྣམས་སམ་ཀུན་ནི་ཚད་དུ་འགྱུར་བས། འདིའི་དོན་འགྱུརནི། འགྲོ་བ་ཐམས་ཅད་ཀྱི་སྡུག་བསྔལ་ཐམས་ཅད་མཆོད། ཅེས་སོ། ལེགས་ཚོགས་ཀྱི་ཨ་རི་ནི་ས་ཧ། ཞེས་པ་མཁའ་འགྲོ་རིགས་ལྔའི་སྙིང་པོར་འགྱུར་བ། གཞན་དུ་ནི། ཧ་རི་ནི་ས་ཧཱུྃ་ཞེསསྣང་བ་ཡོང་གི་འདུག་པས། འདི་ཞི་བ་ཏུ་བརྟག་པར་བྱའོ།། །།