Bla ma zhong zhong pa'i rlung bum pa can

Resource ID	SCv7p661
Title	bla ma zhong zhong pa'i rlung bum pa can
Author	Khyungpo Neljor

༄༅། །བླ་མ་ཞོང་ཞོང་པའི་རླུང་བུམ་པ་ཅན་ནི།

བླ་མ་དམ་པ་རྣམས་ལ་གུས་བཏུད་ནས། །ཐབས་ལམ་ཟབ་དོན་བྲི་བར་བྱ། །བླ་མ་ར་ཧུ་ལའི་རླུང་བུམ་པ་ཅན་འདི་ལ་གསུམ་སྟེ། སྣང་བ་བུམ་པ། དབྱིབས་བུམ་པ། དམིགས་རྟེན་བུམ་པའོ།
།དང་པོ་ནི། ནམ་མཁའ་སྟོང་པ་འདིའོ།
།གཉིས་པ་ནི། སེམས་བསྐྱེད་སྔོན་དུ་སོང་བས་ལུས་ལྷར་བསྐྱེད་ལ། རྐང་པ་རེ་མིག་བཞིན་དུ་བསྣོལ། ལག་པ་གཉིས་ཀྱིས་པུས་མོ་བསྡམ། སྒལ་ཚིགས་དྲང་པོར་བསྲང་། །མགྲིན་པ་ཅུང་ཟད་ད་དགུག་གོ །དེ་ལྟར་བྱས་པས་ལུས་ཀྱི་དབྱིབས་བུམ་པ་ལྟར་གནས་པའོ།
།གསུམ་པ་ནི། རང་གི་ལྟེ་བར་བུམ་པ་སྔོན་པོ་ཆེ་ཆུང་ཅི་རིགས་པ་ཅིག་བསམ། རྩ་ཨ་ཝ་དྷུ་ཏཱི་དང་། ལ་ལ་ནཱ་དང་། ར་ས་ནཱ་གསུམ་བུམ་པའི་ནང་དུ་ཚུད་པར་བསྒོམས་ནས། རླུང་རོ་ལན་གསུམ་ཕྱིར་བུས་ལ། སྣ་ནས་རླུང་དལ་བུས་རྔུབས་ལ་སྟེང་འོག་གི་རླུང་དྲུག་པོ་བཟུང་བ་དང་། ལ་ལ་ནཱ་དང་། ར་ས་ནཱ་གཉིས་ན་མར་རླུང་སྔོན་ན་ར་ར་བུམ་པའི་ནང་དུ་སོང་བ་དང་། །བུམ་པ་སྔོ་ལྡི་རི་རི་སོང་སྟེ། བུམ་པ་ཇེ་ཆེ་ཇེ་ཆེ་མཐར་ལུས་དང་བཅས་པ་འོད་དུ་ཡལ་སྟོང་སངས་ཀྱིས་སོང་པའི་ངང་དུ་བཞག་གོ
།དེ་འདྲ་བ་ཅི་ནུས་སུ་བསྒོམས་ལ། སྐབས་སུ་ལུས་གཡས་གཡོན་དུ་གཅུ་བ་དང་། །ཡར་དྲག་པོ་འཐེན་པ་གཉིས་ཐེབས་བྱའོ། འཕོ་བ་བྱེད་ན་ཨ་འཕང་ངོ་།
།ཞེས་པའི་དོན་བུམ་པའི་ཁར་ཨ་དཀར་པོ་ཅིག་བསམ་ནས། སྟེང་འོག་གི་རླུང་བཟུང་སྟེ། སྐེག་པ་ཉེག་ཉེག་བྱས་པ་དང་། །ཨ་དེ་རང་དབང་མེད་པར་དབུ་མའི་ནང་ནས་ཚངས་བུག་ཡར་རྒྱངས་ཀྱི་སོང་བ་དང་། །ཕྱག་རྒྱ་ཆེན་པོའི་ངང་དུ་བཞག་སྟེ་ནུས་ཚད་དུ་བསྒོམ་མོ།
།རྗེས་ལ་སྤྱི་བོར་ཨ་བསམས་ནས། དེ་ལྟེ་བའི་བུམ་པའི་ནང་དུ་དབབ་པར་བྱའོ།
།བུམ་པ་ཅན་གྱི་གདམས་པ་རྫོགས་སོ།།

ན་མོ་གུ་རུ།
དམིགས་རྟེན་བུམ་པ་ནི། ལྟེ་བར་བུམ་པ་སྔོན་པོ་འཐེབ་གང་པ་ཅིག་གི་ནང་དུ་ཧཱུྃ་སྔོན་པོ་གཅིག་བསམ། དེ་ནས་བསུས་པ་སྒལ་ཚིགས་ལ་བཅར་བྱས་ལ། རླུང་མས་ཡར་འཐེན་པ་དང་། བུམ་པའི་ཞབས་ཀྱི་བུག་པ་ལྔ་ན་ཡར་ལ་རླུང་ཁ་དོག་ལྔ་བྱུང་བས། རླུང་གི་བུམ་པའི་ནང་གི་ཧཱུྃ་སྤྱི་བོར་རྒྱངས་ཀྱིས་ཕུལ་བ་དང་། །སྟོང་སང་གིས་སོང་སྟེ་ཕྱག་རྒྱ་ཆེན་པོའི་ངང་ལ་བཞག་པར་བྱའོ།
།རླུང་བུམ་པ་ཅན་གྱི་ཞལ་གདམས་སོ།།

ན་མོ་གུ་རུ།
སེམས་བསྐྱེད་སྔོན་དུ་སོང་བས་ལུས་གནད་བུམ་པ་ཅན་ལྟར་བྱས་ལ། རང་གི་གསང་བའི་རྡོ་རྗེའི་རྩེ་མོར་ཧཱུྃ་དཀར་པོ་ཅིག་བསམ། ལུས་དབྱིབས་བུམ་པ་ལྟ་བུ་སྟོང་པ་ལ། རྩ་ཨ་ཝ་དྷུ་ཏཱི་ཀ་བ་བཞིན་དུ་ནང་ན་ཡར་ཐད་དཀར་དྲང་ཏིག་གེ་བསྒོམ། དེ་ནས་བསུས་པ་སྒལ་པ་ལ་བཅར་ཏེ། འོག་རླུང་ནར་གྱིས་དྲངས་པ་དང་། །ཧཱུྃ་གིས་རྡོ་རྗེ་ནོར་བུ་སྒྱུ་མ་ལྡོག་པ་བཞིན་དུ་བྱས་ཏེ་བྱུང་བས། སྤྱི་བོ་ཚངས་བུག་ཏུ་ནར་གྱིས་དྲང་པ་དང་། །མགོ་ཕྱིར་སྐྱེད་བྱས་པས་ཧཱུྃ་དེ་ཚངས་བུག་ནས་ཕྱིར་རྒྱངས་ཀྱིས་སོང་བ་དང་། ཕྱག་རྒྱ་ཆེན་པོ་ངང་ལ་ལྷན་གྱིས་བཞག །དེ་ནུས་ཚད་དུ་བསྒོམ་མོ། འཇོག་ཙ་ན་ཧཱུྃ་ལྟེ་བར་དབབ། རྗེས་ལ་བསྔོ་བ་བྱའོ།
།བླ་མ་ཤངས་པའི་ཁོང་སྟོང་གི་སྦྱོར་བ་ཞེས་བྱའོ།།

ན་མོ་གུ་རུ།
སྔོན་འགྲོ་ལུས་གནད་གོང་བཞིན་བྱས་ལ། བསུས་པ་སྒལ་པ་ལ་སྦྱར་བས། རྡོ་རྗེ་ནོར་བུ་མས་ཡར་ལྡོག་ནས་བྱུང་བ་དང་། དེས་སྙིང་གར་སླེབ་པས་ཐིག་ལེ་དཀར་པོར་གྱུར། དེ་ལ་སེམས་དར་ཅིག་གཏད་ལ་བསྒོམ། དེ་ནས་ཡང་ཐིག་ལེ་དང་བཅས་ཏེ་ཡར་དྲངས་ཏེ་ཚངས་བུག་ཏུ་ལྷན་གྱིས་བྱུང་བ་དང་། ཐིག་ལེ་ཚངས་བུག་ནས་ཕྱིར་དོན་ཏེ། སྤྱི་བོར་ཧཱུྃ་དཀར་པོ་ཅིག་ཏུ་གྱུར་པར་བསམས་ལ། དེ་ལ་སེམས་དར་ཅིག་གཏད་ལ་བསྒོམ་པར་བྱའོ།
།འཇོག་ཙ་ན་སྤྱི་བོའི་ཧཱུྃ་མར་ཕབ་སྟེ། ལྟེ་བར་བྱུང་བ་དང་། པད་སིང་བ་ལ་སེམས་གཏད་ལ་བཞག་གོ །དགེ་བ་བསྔོ་བར་བྱའོ། །བུམ་པ་ཅན་གྱི་ཆ་ལག་བླ་མ་ར་ཧཱུ་ལ་པའི་གདམས་སོ། །ཿ