Chos rje byams pa dpal gyi rnam thar

Resource ID	JP1
Title	chos rje byams pa dpal gyi rnam thar
Alt. title	'jag chen chos kyi rgyal po byams pa dpal gyi rnam par thar pa nyi ma'i dkyil 'khor
Topics	Biography
Associated Person	Jampa Pel
Link	BDRC W20441 BDRC W8LS37032 (p. 295)

To input
༄༅། །འཇག་ཆེན་ཆོས་ཀྱི་རྒྱལ་པོ་བྱམས་པ་དཔལ་གྱི་རྣམ་པར་ཐར་པ་ཉི་མའི་དཀྱིལ་འཁོར་བཞུགས་སོ།།

།ན་མོ་གུ་རུ་མཻ་ཏྲི་ཤྲཱི་ཡ།
ཆོས་རྗེ་རིན་པོ་ཆེ་བྱམས་པ་དཔལ་བའི་རྣམ་པར་ཐར་པ་བརྗོད་པའི་གཏམ་ཉི་མའི་དཀྱིལ་འཁོར་ཞེས་བྱ་བ།
རྗེ་བཙུན་སྤྱན་རས་གཟིགས་ལ་ཕྱག་འཚལ་ལོ།
།ཚོགས་གཉིས་ཤར་གྱི་ས་འཛིན་ལས་འོངས་ཤིང་། །བྱམས་བརྩེའི་དཔལ་༼ཡོན་༽ཡོངས་སུ་རྒྱས་པའི་རྗེ། །འཕྲིན་ལས་དཔལ་གྱི་འོད་ཟེར་འཕྲོ་བ་པོ། མཚུངས་མེད་ནམ་མཁའི་ནོར་བུའི་ཞབས་ལ་འདུད། །རྣམ་དག་ཆོས་སྐུའི་ནམ་མཁའ་ཡངས་པ་ལ། །བདེ་ཆེན་ལོངས་སྐུའི་འོད་ཟེར་རབ་འཕྲོས་ནས། །ཚད་མེད་སྤྲུལ་སྐུ་འགྲོ་བའི་དོན་མཛད་པའི། །ཆོས་རྗེ་ཉིན་མོར་བྱེད་པ་གཙུག་གིས་མཆོད། །གང་ལ་ཁྱེད་སྐུའི་ཞལ་རས་རབ་བསྟན་ནས། ཡན་ལག་དྲུག་ཅུ་གསུང་བའི་དམ་ཆོས་དང་། །ཐུགས་རྗེའི་འོད་ཀྱིས་བདག་སོགས་སྨིན་མཛད་པའི། །བླ་མ་པད་མའི་གཉེན་མཆོག་རྒྱལ་གྱུར་ཅིག །དེ་ཡི་རྣམ་ཐར་རྒྱ་མཚོ་ལས། །བདག་གི་རྣ་བར་གང་ལྷུང་བ། །རང་གཞན་དད་པ་གསོ་བའི་ཕྱིར། །ཅུང་ཟད་ཙམ་ཞིག་བརྗོད་པར་བྱ།
།འདིར་དུས་གསུམ་སངས་རྒྱས་ཐམས་ཅད་ཀྱི་ངོ་བོ། རྒྱལ་སྲས་བྱང་སེམས་ཐམས་ཅད་ཀྱི་གཙོ་བོ། ཉན་ཐོས་རང་རྒྱལ་རྣམས་ཀྱི་འདྲེན་པ། གདུལ་བྱ་ལྷ་མི་རྣམས་ཀྱི་གཙུག་རྒྱན། སྲིད་གསུམ་མཚོ་ལས་སྒྲོལ་བའི་དེད་དཔོན། ངན་སོང་གནས་ནས་འདྲེན་པའི་ལྕགས་ཀྱུ། མ་རིག་མུན་པ་སེལ་བའི་སྒྲོན་མེ། ཐར་པའི་ཁང་བཟང་བགྲོད་པའི་ཐེམ་སྐས། ཆོས་ཀྱི་རྗེ་མཚུངས་པ་མེད་པའི་མཁྱེན་རབ་དང་། བྱམས་པ་དང་སྙིང་རྗེ་ལ་སོགས་པ་ཚད་མེད་པ་མངའ་བ་ལ་བརྟེན་ནས། གདུལ་བྱ་རྣམས་ཀྱི་དཔལ་དང་། མགོན་དང་དཔུང་གཉེན་བླ་ན་མ་མཆིས་པར་གྱུར་པ། འདིའི་རྣམ་པར་ཐར་པ་བསམ་གྱིས་མི་ཁྱབ་པ་བརྗོད་པས་མི་ནུས་ནའང་། ཅུང་ཟད་བརྗོད་ན། ཆོས་རྗེ་ཡི་ཞལ་ནས། ང་སྐྱེ་བ་སྔ་མ་ལ་རྒྱ་གར་ལྷོ་ཕྱོགས་སུ་གྲོང་ཁྱེར་སུམ་ཅུ་རྩ་ལྔའི་མཐའ་འཇག་སྤྱིལ་མང་པོས་བསྐོར་བའི་དབུས་ན། ས་ཕག་ལ་རྩིག་པ་བྱས་པའི་གཞལ་ཡས་ཁང་ལྟ་བུ་གློ་འབུར་བཞི་དང་བཅས་པ་ཡོད་པའི་ཕ་བྲམ་ཟེ་ཆོས་གྲུབ། མ་ལྷ་མོ་འོད་མཛེས་མ། དེ་གཉིས་ལ་བུ་སྤུན་གསུམ་ཡོད་པའི་འབྲིང་པོ་ཆོས་ཀྱི་རིན་ཆེན་ཞེས་བྱ་བའི་ བཙུན་པར་གྱུར་ནས། ཕ་བློ་འབུར་ཤར་དང༌། ང་བྱང་ན་གནས་ཤིང་། བྱམས་པ་དང་སྙིང་རྗེའི་སྒོ་ནས་སེམས་ཅན་ལ་ཕན་པ་རྒྱ་ཆེར་བྱུང་སྟེ། ཞིབ་པར་བཤད་ཀྱང་གཞན་ཡིད་ཆེས་པར་དཀའ། ད་རུང་དུའང་སྣང་ཡུལ་དུ་ཡུད་པ་རི་མཐོང་གིན་འདུག་སྟེ། ཐོ་རེ་བ་གཅིག་མིན་པ་སྟོངས་འདུག །ཨ་ཙ་རའི་སྐད་དེ་རྣམས་ཀྱང་མི་གོ་བར་འདུག་གསུངས། མཚན་དེ་རྣམས་བོད་སྐད་དུ་ཇི་ལྟར་སྒྱུར་ལགས་ཞུས་པས། ཡིད་ལ་དེ་ལྟར་ཤར་བ་ཡིན་གསུངས།
།སྐུ་ཚེ་འདིའི་ལོ་རྒྱུས་ནི། རབ་དཀར་གངས་རིས་བསྐོར་བའི་ལྗོངས། ཆུ་བོ་ཆེན་པོ་པག་ཤུ་དལ་གྱིས་བབས་པའི་བྱང་ཕྱོགས། གཡས་རུ་ཤངས་ཀྱི་བྱེ་བྲག མཁས་ཤིང་གྲུབ་པ་བརྙེས་པའི་སྐྱེས་བུ་དམ་པ་རྣམས་ཀྱིས་ཞབས་ཀྱིས་བཅགས་པའི་གནས་མཆོག་ཡན་ལག་བརྒྱུད་དང་ལྡན་པའི་ཆུ་བོ་འདུས་པ་དང་བཅས་པ་འབབ་པའི་འགྲམ། ཁོང་ལམ་རྩྭ་ཐང་ཞེས་བྱ་བར་ཡབ་ཤུད་ཀྱི་བྱམས་པ་མགོན་དང་། ཡུམ་ལ་ཆིངས་སྲི་ཐར་འབུམ་གྱི་སྲས་བར་མར་སྐུ་འཁྲུངས་ཏེ། དེ་ཡང་ཡུམ་གྱི་ལྷུམས་སུ་ཞུགས་པའི་ཚེ། ཡུམ་ལུས་ཡང་བ་དང་། རྨི་ལམ་དུའང་ཉི་མ་ཤར་བ་དང་། འོད་གསལ་གྱི་སྣང་བ་ཉིན་མོ་ལྟ་བུ་འཆར་བ་བྱུང་། མ་གཅིག་ན་རེ། ངའི་བུ་འདི་ལ་ཆོས་པ་ཞིག་འོང་བར་འདོད་པས། འདི་ཡི་གཡོག་གྱིས་ཤིག །ཚོགས་རྫོགས་པ་ཡིན་ནོ་གསུང་ངོ་། །དགུང་ལོ་ལྔ་ལོན་པའི་ཚེ་མ་ཎི་བགྲང་བ་དང༌། རྩེད་མོ་བྱེད་པའི་དུས་སུ། ཆོས་ཁྲི་དང་སྤྱིལ་པོ་རྩིག་པ་དང་། ཆོས་འཆད་པ་དང་། བྱིས་པ་མང་པོ་ལ་རྔན་པ་བྱིན་ནས་ཀྱང་མཎི་འདྲེན་དུ་འཇུག་པ་དང་། ཉ་ལ་སོགས་པ་གསོད་པ་ལ་སྲོག་བླུ་བྱེད་པ་དང༌། བྱིས་པ་འགྲོ་མི་ཤེས་པ་རྣམས་ཁུར། སྙོམས་ཆུང་བ་རྣམས་ལ་ཟན་ལ་སོགས་པ་བྱིན་ནས་བསྐྱངས་པས། རྩྭ་ཐང་ན་བྱིས་པ་བྱང་ཆུབ་སེམས་དཔའ་ཞིག་ཡོད་པར་འདུག་ཟེར་བའི་གྲགས་པ་མི་ཤངས་ལ་སོགས་པར་བྱུང་གསུངས། བརྒྱད་པ་ལ་ཡབ་ཀྱིས་རིན་པོ་ཆེ་ལ་གདན་དྲངས་ཏེ། བུ་འདི་ལ་ཆོས་པ་ཞིག་འོང་བར་ཡོད་པས། འདིའི་སྐྱིད་སྡུག་ཁྱེད་ཤེས་ཟེར་ནས་ཡབ་འདས་སོ། །དེ་ནས་ལོ་བཅུ་པ་ལ་ཡང་དགོན་དུ་རིན་པོ་ཆེ་པ་ལ་དགེ་བསྙེན་མཛད། བཅུ་གཅིག་པ་ལ་མཁས་གྲུབ་ཤངས་སྟོན་ལ་མགོན་པོའི་རྗེས་གནང་དང༌། བླ་མ་མགོན་པོ་དབྱེར་མེད་གསན། བཅུ་གཉིས་པ་ལ་སློབ་དཔོན་སེང་བཟང་གིས་ཁྲིད་ནས་ས་སྐྱར་བྱོན་ཏེ་བླ་མ་མཉམ་མེད་པས་མཁན་པོ། སློབ་དཔོན་སྐྱེས་མཆོག་པས་སློབ་དཔོན། སློབ་དཔོན་སེང་བཟང་གིས་གྲིབ་ཆོད་བ་མཛད་ནས། རབ་ཏུ་ཕྱུང་ནས་བླ་མའི་གསུང་ནས། དི་རིང་བྱམས་སྙིང་རྗེ་ལས་དྲས་པའི་མིང་ཞིག་འདོགས་དགོས་གསུངས་ནས། ཆོས་རྗེ་ལ་བྱམས་པ་དཔལ་དང་། གཞན་གཉིས་ལ་སྐྱོབ་པ་དཔལ་དང་། ཐུགས་རྗེ་དཔལ་དུ་བཏགས་ཏེ། སྙོག་པ་མེད་པའི་ཚུལ་ཁྲིམས་ཀྱིས་མཛེས་པར་མཛད་དོ། །བླ་མ་དེ་ཉིད་ལ་རིག་མཛོད་ལ་སོགས་པ་གསན་ནོ།
།བཅུ་དྲུག་པ་ལ༌ཡང་དགོན་དུ་སློབ་དཔོན་སེང་གེ་བཟང་པོ་ལ། ཀྱཻ་རྡོར། བདེ་མཆོག སྒྲོལ་མ་རྣམས་ཀྱི་དབང་སྒྲུབ། ཤེར་སྙིང་། ཨེ་ཀ་ཛ་ཏིའི་བློ་འཁེལ། ནམ་མཁའ་སྒོ་འབྱེད་ལ་སོགས་གཅོད་ཀྱི་སྐོར། ལམ་འབྲས་གཞུང་བཤད། ལམ་སྐོར་ལ་སོགས་པ་ཞུས་སོ། །དེ་ནས་བརྟག་གཉིས་ལ་སློབ་གཉེར་གྱིས་གསུངས་ནས། སློབ་གཉེར་མཛད་དོ། །བཅུ་བདུན་པ་ལ་བཤད་གསར་མཛད་ཅིང་ཆོས་འཆད་ཀྱང་ལོ་མང༌དུ་མཛད་དོ། །དེ་ནས་རིན་པོ་ཆེ་པའི་གསུང་ནས། རྣམ་འགྲེལ་ལ་སློབ་གཉེར་གྱིས་གསུངས་ནས། ནན་ཏན་འཇུར་པོ་མཛད་པས། ཁམས་འདུས་ཤིག་ཀྱང་བྱུང་བ་ལ། རིན་པོ་ཆེ་པས་ནད་འདོན་མཛད་པས་ཕན་ཏེ། ནད་དེ་ཤངས་པའི་ཆོས་སྐོར་འདི་དང་འཕྲད་པའི་རྟེན་འབྲེལ་ཡིན་པ་འདུག་གསུང་ངོ༌། །གཟིགས་རྟོག་གི་སྐབས་སུ། ས་སྐྱའི་དུར་ཁྲོད་དང་། ཨ་ཀ་དེ་བ་ལ་སོགས་ལ་གཅོད་མཛད་ཅིང་དམ་ལ་བཏགས། དེ་ནས་ཉེར་ལྔ་པ་ལ། མཁན་པོ་སེང་གེ་དཔལ་བས་མཁན་པོ། རིན་པོ་ཆེ་པས་ལས་སློབ། སློབ་དཔོན་གྲུབ་སེང་གིས་གསང་སྟོན་མཛད་ནས། འདུལ་བ་ལུགས་ཀྱི་དཔྱིད་ཟླ་དང་པོའི་ཚེས་བཅུ་གཉིས་ཀྱི་སྔ་དྲོའི་ཆ་ལ་འཇག་ཏུ་བསྙེན་པ་རྫོགས་ཤིང༌། དགྲ་བཅོམ་པ་ལྟ་བུར་གྱུར་ནས་དིང༌སང་དགེ་ཚུལ་ལ་སོགས་པའི་མཁན་པོ་ཆེན་པོར་བཞུགས་པ་འདི་ལགས་མོད། དེ་ནས་རིན་པོ་ཆེའི་གསུང་ནས། ད་རུང་ས་སྐྱར་རྣམ་འགྲེལ་རེ་ཤོད། ངས་གསེར་ཞོ་བརྒྱད་ཙམ་སྐུར་གྱིས་གསུངས་པ་ལ། རིན་པོ་ཆེ་ལ་སྐུ་ཁམས་བཟང་པའི་དུས་འདིར་ཆོས་དྲུག་ལ་སོགས་པའི་ཁྲིད་རྣམས་དང་། གཞན་ཡང་དབང་ལ་སོགས་ཀྱང་ཞུ་འཚལ། ད་ནམ་འཆི་ཆ་མེད་པས་ཐ་སྙད་ཚིག་གི་སྤྲོས་པ་གཅོད་པའང་དེ་ཙམ་དུ་གདའ་བས། སྒྲུབ་པ་ཁོ་ན་བྱེད་པ་ཞུ་ཞེས་ནན་ཆེར་ཞུས་པས། འོ་ན་ས་སྐྱར་ཇ་སྐོལ་དུ་སོང་གསུངས་ནས། ཆས་ཁ་རྣམས་ཁྱེར་ཏེ། ཇ་སྐོལ་ནས་མར་བྱོན་ཏེ། ཀ་ཙར་བཞུགས་པའི་སྲོད་ཀྱི་རྨི་ལམ་དུ་ཁྱི་དང་གཡག་ནག་པོ་མང་པོ་བྱུང་ནས། རྨུགས་པ་དང་བརྡུང་བ་ལ་སོགས་པ་བྱེད་དུ་བྱུང་བ་ལ། འདི་རྣམས་རྨི་ལམ་ཡིན་པ་འདུག་པས། རྨི་ལམ་ལ་གང་སྦྱང་སྦྱང་ཡིན་སྙམ་ནས། སྤྱང་ཁྱི་མང་པོར་སྤྲུལ་ཏེ་ཁྱི་རྣམས་ཟོས། གཡག་རྣམས་གར་སོང་ཆ་མེད་ལ་སོང་འདུག་བླ་མའི་དྲུང་དུ་མཇལ་དགོས་སྙམ་ནས། རྡོ་རྗེ་འཇིགས་བྱེད་དུ་སྤྲུལ་ནས་ནམ་མཁའ་ལ་འོངས་པས། བླ་མ་རིན་པོ་ཆེ་འཇག་ན་མི་བཞུགས་པར་འདུག །ཡང་ཕྱིན་པས་སྐུ་ལུང་ན་མི་བརྒྱ་ཙམ་ཞིག་ལ་སྒྱུ་ལུས་ཀྱི་དབང་བཀའ་མཛོད་ཀྱིན་འདུག་པ་ལ། ངས་ཀྱང་དབང་རྣམས་ཇི་ལྟ་བ་བཞིན་ཐོབ་སྟེ། སྔ་མའི་བག་ཆགས་དང་བླ་མའི་བྱིན་རླབས་ཡིན་པ་འདུག་གསུངས། དེ་ནས་འཇག་ཏུ་ཕེབས་ཙ་ན། གཟིམས་ཁང་ན་སློབ་དཔོན་གྲུབ་སེང་འདུག །ཁོང་གི་གསུང་ནས། རིན་ཆེན་དཔལ་དང་སྡོང་ལ་མཛོ་དེད་ལ་ཤར་ཤོག་གསུང་བའི་ཞལ་ཏ་ཡོད་གསུངས་པས། སྔར་གྱི་དེ་དྲན་ནས་ཤིན་ཏུ་དགའ་བར་གྱུར་ཏེ། གསོལ་འདེབས་ཤིག་མཛད་པས། དེའི་ནུབ་མོ་མི་ནག་པོ་ཨ་ཙ་རའི་ཆ་བྱད་ཅན་གོས་པུས་གོང་མ་ཞིག་གྱོན་པ། ལྟག་ལྷས་བྱས་པ། ལག་ན་རལ་གྲི་ཐོགས་པ་གཅིག་ན་རེ། ཁྱེད་བསུར་འོངས་བ་ཡིན་ཡར་གཤེགས་ཟེར། གར་འགྲོ་བ་ཡིན་གསུངས་པས། བླ་མས་བསུར་བཏང་བ་ཡིན། ཁྱེད་ཆོས་ཞུ་བ་ཡིན་གསུང་བ་ལ་ངས་གྲོགས་ལ་འོངས་པ་ཡིན་ཟེར་ནས་མི་སྣང་བར་ཐལ་གསུངས། དེ་ནས་སྐུ་ལུང་དུ་སླེབས་པའི་ཉིན་ནས་དག་བྱེད་ཨའི་སྟོང་ར་གནང་ཞིང་། དེའི་ནུབ་མོ་ནས་བཟུང་སྟེ། ནུབ་འགའ་ཞིག་ཏུ་སྒྲིབ་བ་ཟད་པ་དང་། ནད་གདོན་ཐོན་པའི་རྟགས་རྣམས་ཇི་ལྟར་གསུངས་པ་བཞིན་བྱུང་གསུངས། ལུས་གནད་མེའི་སྟོང་རའི་སྐབས་སུ། དགུན་གྲུང་དུས་ཡིན་ཡང་། གཡབས་གྲང་མོ་ཞིག་ཏུ་རས་རྐྱང་ཐུབ་པ་ཞག་ཉེར་ལྔ་བྱུང་ཞིང་། དེ་ནས་བདེ་དྲོད་རང་འབར་དང༌། རྨི་ལམ་སྒྱུ་མ་ལྟ་བུ་བཅོས་མ་མ་ཡིན་པ་ཆགས་སྡང་ཐམས་ཅད་དང་བྲལ་བ་བྱུང༌། མཚན་མོ་རྨི་ལམ་བཟུང་ནས། བླ་མའི་དྲུང་དུ་མཇལ་བ་དང། ཆོས་གསན་པ་དང། རི་དང་བྲག་ལ་སོགས་པ་ལ་ཕར་ཐལ་ཚུར་ཐལ་བྱེད་པ་དང་། འོད་གསལ་གྱི་གསལ་སྣང་གི་སྒོ་ནས་ཐག་ཉེ་རིང་ཀུན་མཐོང་བ་བྱུང་ཞིང༌། དེ་ནས་རིན་པོ་ཆེ་འཁོར་ཆེན་མཛད་པའི་མཆོད་གཡོག་ལ་ཤོག་གསུངས་ནས་ཕྱིན་པས། དྲོད་དང་རྨི་ལམ་གྱི་སྟོབས་ཆེན་པོ་དེ་འགྲིབས་ནས་ཞག་མང་པོར་སོར་མ་ཆུད། མི་མང་པོའི་གྲིབ་ཀྱིས་ལན་འདུག །དེས་ན་སྒྲུབ་པ་བྱེད་དུས་སུ། གྲིབ་ལ་འཛེམས་པ་ཤིན་ཏུ་གལ་ཆེ་བ་གདའོ་གསུངས། རིན་པོ་ཆེ་པ་ལ་སྔ་ཕྱིར་ཆོས་གསན་པ་ལ། རྭ་འབྲོའི་ལུགས་ལ་སོགས་པ་དུས་འཁོར་གྱི་སྐོར། ཀྱཻ་རྡོར་གྱི་དབང་ལ་སོགས་པ་ལམ་འབྲས་ཀྱི་སྐོར། བདེ་མཆོག་དཀར་པོ་སོགས་བདེ་མཆོག་གི་སྐོར། གཤེད་དམར་སོགས་གཤིན་རྗེའི་སྐོར། འཁོར་ཆེན་སོགས་ཕྱག་རྡོར་གྱི་སྐོར། འཇམ་རྡོར་ལ་སོགས་རྡོར་འཕྲེང་གི་སྐོར། གཉན་ལོའི་ལུགས་སོགས་སྒྲོལ་མའི་སྐོར། གྲུབ་རྒྱལ་ལ་སོགས་ཚེ་དཔག་མེད་ཀྱི་སྐོར། བྷིར་ཝ་པ་ལ་སོགས་རྣམ་འཇོམས་ཀྱི་སྐོར། གཏུམ་པོ་ལ་སོགས་མི་གཡོ་ངའི་སྐོར། དྲག་པོའི་སུམ་སྦྲག་ལ་སོགས་རྟ་མགྲིན་གྱི་སྐོར། རིན་ཆེན་རྒྱན་འདྲ་ལ་སོགས་ཕག་མོའི་སྐོར། རྡོར་དབྱིངས་ལ་སོགས་ཡོ་གའི་སྐོར། སེང་གེ་སྒྲ་ལ་སོགས་སྤྱན་རས་གཟིགས་ཀྱི་སྐོར། རྣམ་རྒྱལ་ལ་སོགས་བྱ་སྤྱོད་ཀྱི་སྐོར། ཡི་གེ་བཞི་པ་ལ་སོགས་ཕྱག་ཆེན་གྱི་སྐོར། བསྙེན་སྒྲུབ་སོགས་དབུ་རྒྱན་པའི་སྐོར། རྒྱལ་བ་རྒྱུ་མཚོ་སོགས་ཀརྨ་པའི་ཆོས་སྐོར། ཚ་གོང་གཏོར་མ་སོགས་གཏོར་མའི་སྐོར། སྡེ་འཆའ་ལ་སོགས་དཀའ་ཐུབ་ཀྱི་སྐོར། གཞན་ཡང་དབང་དང་རྗེས་གནང་སོགས་བྱིན་རླབས་སྣ་ཚོགས་པ། སྒྲུབ་ཐབས་སྣ་ཚོགས་པ། མན་ངག་སྣ་ཚོགས་པ། འཇམ་དཔལ་རྩ་རྒྱུད་སོགས་རྒྱུད་སྡེའི་སྐོར། རྒྱལ་པོ་མདོ་ལྔ་ལ་སོགས་མདོ་སྡེའི་སྐོར། སེམས་འགྲེལ་སྐོར་གསུམ་ལ་སོགས་བསྟན་ཆོས་ཀྱི་སྐོར། ཡང་དག་སོགས་རྙིང་མའི་སྐོར། དེ་ལྟར་ཁ་ཅིག་ནི་ཐམས་ཅད་རྫོགས་པ། ཁ་ཅིག་ནི་ཐམས་ཅད་མ་རྫོགས་པ། ཁ་ཅིག་ནི་དབང་བཀའ། ཁ་ཅིག་ནི་བཤད་བཀའ། ཁ་ཅིག་མན་ངག་གི་བཀའ་རྣམས་དང་། ཁྱད་པར་དུ་ཤངས་པའི་ཆོས་སྐོར་ལ། བྱིན་རླབས་ཁོག་འབུབས་ཀྱི་བཀའ་གཉིས། བྱིན་རླབས་གཞུང་ཤིང་གི་བཀའ་བརྒྱད། ཕྱག་རྒྱ་ཆེན་པོའི་བཀའ་ལྔ། མཁའ་སྤྱོད་ཀྱི་བཀའ་ལྔ། མགོན་པོའི་བཀའ་ལྔ་ལ་སོགས་པ་དང་། ཆོས་དྲུག་ལ་སོགས་པའི་ཁྲིད། སྒྱུ་མ་ལམ་རིམ་ལ་སོགས་པའི་ལུང་རྣམས་གསན་ཅིང་། དེ་ལྟར་ཆོས་གསན་པ་ཐམས་ཅད་མདོ་རྒྱུད་སོགས་ནས་ཇི་ལྟར་བཤད་པ་བཞིན་ཐུགས་ཉམས་སུ་བཞེས་པ་ལ་བརྟེན་ནས་གདུལ་བྱ་རྣམས་ཀྱི་གཙུག་རྒྱན་དུ་རྡོ་རྗེ་འཆང་ཆེན་པོ་དང་དབྱེར་མེད་དུ་བཞུགས་པ། ད་ལྟ་གཟིགས་པས་གསལ་བ་འདི་ལགས་མོད། ཆོས་རྗེའི་ཞལ་ནས། རིན་པོ་ཆེ་པས་བདེ་མཆོག་གི་ཡི་གེ་བདུན་པའི་ཟླས་པ་དུང་ཕྱུར་ཕུག་བདུན་སོང་གསུང་བས་བདེ་མཆོག་ཏུ་མཐོང༌ཐང་བར་འདུག་སྟེ། ངས་ཐུགས་རྗེ་ཆེན་པོ་དངོས་སུ་མཐོང་ཞིང་། དེ་ནས་བཟུང་སྟེ་ཐ་མལ་གྱི་རྟོག་པ་སྐྱེ་མ་མྱོང་གསུང་ངོ་།
།ཡང་འཇག་གི་གཟིམས་སྤྱིལ་དུ་ཕྱག་ཆེན་གྱི་སྒྲུབ་པ་མཛད་པའི་དུས་སུ། སྒོམ་ཁང་དུ་ལྟ་སྟངས་མཛད་དུས། ཐོག་མར་ཐོག་མཚམས་སུ་འོད་དཀར་པོ་འཁྱིལ་བ་ཞིག་བྱུང་། དེ་ཇེ་གསལ་ལ་སོང་ནས་ཕྱི་བའི་མཆོད་རྟེན་ཡན་ཆད་དཀར་ལྷག་གིས་མཐོང་། དེ་ཇེ་གསལ་ལ་སོང་ནས་སྲེག་ཤིང་ཡན་ཆད་ཀྱི་མི་རྣམས་ལུད་སྐྱེལ་བ་དང་། བྲོ་ཟ་བ་ལ་སོགས་དང༌། སྲོག་ཆགས་གཞན་ཐམས་ཅད་ཅི་བྱེད་པ་གསལ་སིང་མཐོང་། མཉམ་གཞག་དེ་ལས་ལངས་པ་དང་། གསལ་སྣང་དེའང་འགྲིབས་སོང་གསུང་ངོ་། །དེ་ཡང་དེ་ནུབ་རྨི་ལམ་བཟུ་་་་་ནས་འཇག་ཕྱེ་བ་ན་ཕར་ཕྱིན་པས་ཐུགས་རྗེ་ཆེན་པོ་ཞལ༌གཅིག་ཕྱག་བཞི་པ་ཞིག་ཏུ་འགྱུར་སོང་། རྨི་ལམ་དུ་འདུག་པས་པོ་རྟ་ལ་བལྟ་དགོས་སྙམ༌སྟེ། དཀྱིལ་ཀྲུང་བཅས་ནས་ནམ་མཁའ་ལ་ཕྱིན་པས། པོ་ཏ་ལ་ཡིན་ཟེར་བའི་བྱེ་མའི་རི་ལ་ཤིང་རྩི་དང་བྱ་སྣ་ཚོགས་པ་ཡོད་པའི་རྩེ་ན་མཆོད་རྟེན་དཀར་པོ་ཞིག་འདུག །དེའི་ནང་ན་ཐུགས་རྗེ་ཆེན་པོ་གཙོ་འཁོར་གསུམ་པ་ཞིག་བཞུགས་པ་མཐོང་། མོས་པ་དབ་གུས་པ་ཚད་མེད་པ་སྐྱེས་ཏེ། བྱིན་རླབས་ཞུས་པས། ཇོ་བོས་ང་འི་མཀོ་ཐོག་ཏུ་ཕྱག་བཞག་སྟེ། ཁྱོད་ཀྱིས་སྐྱེ་བ་སྔ་མ་ལ་བྱམས་སྙིང་རྗེ་བསྒོམས་པས། སྐྱེ་བ་འདིར་བདག་དང་མཇལ་བ་ཡིན། འདིའི་ཕྱི་མ་ལ་རྒྱ་གར་དུ་སྐྱེས་ནས། བྱམས་སྙིང་རྗེས་སེམས་ཅན་གྱི་དོན་དཔག་ཏུ་མེད་པ་བསམ་གྱིས་མི་ཁྱབ་པ་འགྲུབ་པར་འགྱུར་གསུངས། དེ་ནས་ཆོས་ཤིག་ཞུ་དགོས་བསམ་པ་དང་། གཉིད་སད་ནས་ཆོས་ཞུ་པའི་ལོང་མ་བྱུང་གསུངས། དེ་ནས་སྐུ་མཚམས་དམ་པར་མཛད་པས། རྣལ་ལམ་ཟིན་ནས་བྲག་རི་ལ་སོགས་ལ་ཕར་ཏལ་ཚུར་ཏལ་བྱེད་པ་སོགས་སྦྱོང་སྤེལ་གང་ལ་ཡང་ To input