Rdo rje rnam par 'joms pa'i gsang sgrub

Resource ID	SCv9p30
Title	rdo rje rnam par 'joms pa'i gsang sgrub
Topics	Secret sadhana
Sub-Topics	Vajravidarana
Author	Sangyé Tönpa
Associated Person	Niguma
Link	BDRC W23922 BDRC W1KG4284 BDRC W3CN18508

༼༈ རྡོ་རྗེ་རྣམ་པར་འཇོམས་པའི་གསང་སྒྲུབ།༽

༈ གུ་རུ་དེ་བ་ཌཱ་ཀི་ནི་མ་ཧཱ་ཀཱ་ལ་ན་མོ།
ཡེ་ཤེས་ཀྱི་ཌཱ་ཀི་མ་ནི་གུ་མའི་ཁྱད་འཕགས་ཀྱི་གདམས་པ། རྡོ་རྗེ་རྣམ་པར་འཇོམས་པའི་གསང་སྒྲུབ་ཉམས་སུ་ལེན་པར་འདོད་པས། ཐོ་རངས་སྔ་བར་ལངས་ཏེ། སྐྱབས་སུ་འགྲོ་བ་དང་སེམས་བསྐྱེད་པར་བྱས་ནས། རྐང་པ་གཉིས་བསྣོལ་ཏེ་ཙོག་པུ་བྱ། ལག་པ་གཉིས་བསྣོལ་ཏེ་སྦོ་ཤ་ཉ་ལ་འཇུ། གྲུ་མོ་གཉིས་པུས་མོ་ལ་བཀབ། དེ་ནས་རྡོ་རྗེའི་ཏིད་ངེ་འཛིན་ལ་བཞུགས་སོ། །ཞེས་གསུངས་པའི་དོན་ལ་རྣམ་པར་མི་རྟོག་པའི་ཏིང་ངེ་འཛིན་ལ་མཉམ་པར་བཞག་གོ །དེས་ནི་བར་ཆད་མི་འབྱུང་ཞིང་། བྱིན་རླབས་ཆེ་བའི་དགོས་པ་ཡོད་དོ། །དེ་ནས་དབྱིབས་བུམ་པའི་ལུས་ཀྱི་འཁྲུལ་འཁོར་ལྔ་བྱའོ། །སྣང་བ་བུམ་པ་ནི་རང་གི་ལུས་བུམ་པ་དངོས་སོ། །རྐང་པ་ཞབས། སྐེ་མན་ཆད་ཁ་རྡོ་རྗེ་ནོར་བུ་མཆུར་བསམ། ལར་གཟུགས་སུ་སྣང་བ་ཐམས་ཅད་བུམ་པར་བསྒོམས་པས་ཆོག་པ་ཡིན་གསུང་།
དམིགས་རྟེན་བུམ་པ་ནི། རང་ལུས་བུམ་པར་བསྒོམ་པའམ། ཐམས་ཅད་གཟུངས་ཀྱི་ཁད་པར་བསམ་པའི་སྟེང་དུ། དཔལ་རྡོ་རྗེ་རྣམ་པར་འཇོམས་པ་སྐུ་མདོག་མཐིང་ནག །ཞབས་བརྐྱང་བསྐུམ། གཡས་རྡོ་རྗེ། གཡོན་སྡིགས་འཛུབ་དྲིལ་བུ། སྤྱན་བ་སུམ་པ། མཆེ་བ་གཙིགས་པ། ཁྲོ་བོའི་རྒྱན་སྣ་ཚོགས་ཀྱིས་བརྒྱན་ཅིང་། མེ་དཔུང་གི་ཀློང་ན་བཞུགས་པར་བསྐྱེད་དོ།
།དེ་ནས་གཟུངས་བཟླས་པ་དང་། རང་གི་སྟེང་གི་ལྷ། ནང་གི་གཟུངས་ཐམས་ཅད་སྔགས་ཀྱི་རང་སྒྲ་དང་། ཡེ་ཤེས་ཀྱི་བདུད་རྩིའི་རྒྱུན་དང་བཅས་པ་བབ་པར་བསམ་ལ་གཟུངས་བདུན་ནམ། ཉི་ཤུ་རྩ་གཅིག་གམ། བརྒྱ་རྩ་བརྒྱད་བཟླས། འཇོག་རྩ་ན་སྟེང་གི་ལྷ་བདུད་རྩིར་ཞུ་ནས་རང་གི་གཟུངས་ལ་ཐིམ། གཟུངས་བདུད་རྩིར་ཞུ་བར་བསམ་ལ། རང་གི་ཁྲུས་བྱ་བའམ། གཞན་ལ་ཡང་ཕྱིན། གཞན་གྱི་གཟུངས་ཆོག་ཏུ་བྱེད་ནའང་། མཎྜལ་བུམ་པ་བཅས་ལ། བུམ་པ་ལ་བདག་བསྐྱེད་བཞིན་བཟླས་སོ། །འཇོག་རྩ་ན་རང་དང་བུམ་པའི་ཆུ་གཉིས་བསྲེས་ལ་འཐུང་པ་དང་། ཁྲུས་བྱེད་དུ་གཞུག་གསུང་ངོ་། །ཉམས་གྲིབ་ཆེན་པོ་འཕོག་པ་ལ། འདི་མིན་པ་གཞན་གང་གིས་ཀྱང་མི་སེལ་བར་གསུངས་སོ།
།ཡེ་ཤེས་ཀྱི་ཌཱ་ཀི་མ་ནི་གུ་མའི་ཁྱད་འཕགས་ཀྱི་གདམས་པ་རྡོ་རྗེ་རྣམ་པར་འཇོམས་པའི་གསང་སྒྲུབ། ཆོས་རྗེ་སངས་རྒྱས་སྟོན་པའི་གསུང་བཞིན་བྲིས་པའོ།། །།མངྒ་ལཾ།། །།
Lineage from BDRC W1KG4284
འདིའི་བརྒྱུད་པ་ནི། རྡོ་རྗེ་འཆང་གིས་ཌཱ་ཀི་མ་ལ་གནང་། དེས་བླ་མ་ཤངས་པ། དེས་རྨོག་ལྕོག་པ། སྐྱེར་སྒང་པ། གཉན་སྟོན། སངས་རྒྱས་སྟོན་པ། མཁས་གྲུབ་ཆོས་རྗེ། རྡོས་སྟོན་སངས་རྒྱས། རོལ་པ་རྡོ་རྗེ། སྐྱེས་མཆོག་ཨ་ནན་ཆོས་རྗེ། ཤེས་རབ་བཟང་པོ། དོན་ཡོད་རྒྱལ་མཚན། དེས་བདག་ཡོན་ཏན་དཔལ་འབྱུང་ལ་གནང་བའོ།། །།ཨྀཐི།། །།