'khor gyis rlung sgrub la mi dbang snying shun la brten pa'i lha mo'i rlung sgrub kyi pha rol khrag nad kyi phung ba

Resource ID	SCv11p866
Title	'khor gyis rlung sgrub la mi dbang snying shun la brten pa'i lha mo'i rlung sgrub kyi pha rol khrag nad kyi phung ba
Topics	Chadrupa
Sub-Topics	rlung bsgrub
Author	Gelek Pelsang
Link	BDRC W23922

༈ །འཁོར་གྱི་རླུང་སྒྲུབ་ལ་མི་དབང་སྙིང་ཤུན་ལ་བརྟེན་པའི་ལྷ་མོའི་རླུང་སྒྲུབ་ཀྱི་ཕ་རོལ་ཁྲག་ནད་ཀྱི་ཕུང་བ་བཞུགས་སོ།
༈ ༼དེ༽ གཉིས་པ་འཁོར་གྱི་རླུང་སྒྲུབ་ལ།
མ་ཧཱ་ཀཱ་ལ་ན་མོ། ལས་མཁན་གཙོ་བོ་ལྷ་མོ་ཡི། །རླུང་གི་སྦྱོར་བ་འདི་ལྟར་རོ། །མི་དབང་རླུང་གི་ཤུན་པ་རུ། །གཏད་ཀྱི་སོལ་ལམ་ཐལ་བ་དང་། །དྲེལ་དང་ལུག་ཁྲག་སྦྱར་ནས་ཀྱང་། །ལིངྒ་སྔགས་བཅས་བྲིས་ནས་སུ། །ཟག་པ་བྱུགས་ལ་ནང་དུ་བཅུག །མི་དབང་རྐང་གི་ཐུན་དང་སྦྱར། །ཐོད་པ་མཚན་ངན་ནང་དུ་བཅུག །རེ་བ་ནག་པོའི་བསྟན་ལ་བཞུག །གྲི་སོལ་དུག་ཁྲག་བོང་གསེབ་གཅིན། ཁྱི་ར་ཕག་དང་ལྕེ་སྤྱང་ཤུན། །མུ་ཟི་དཀར་ནག་གུ་གུལ་ནག །རམ་དུག་སྒོག་གསུམ་ཐོད་པ་བཀང་། །ཡུག་སའི་དོར་རྟའི་གུར་ཡང་ཕུབས། །རང་ཉིད་ཡེ་ཤེས་མགོན་པོ་བསྐྱེད། །བསིལ་བའི་ཚལ་ནས་སྤྱན་དྲངས་ལ། །གཤིན་རྗེ་གཤེད་ཀྱི་གཟི་མདངས་བསྐྱེད། །འབྱུང་བཞི་ཕྱེད་གཉིས་ལྕགས་སྣོད་དུ། ཆོ་ག་གསུམ་ལས་ལྷ་མོ་བསྐྱེད། །ལྷ་མོ་སྤྱན་དྲངས་དེ་ལ་བསྟིམ། །ཐུན་བར་གྲི་ལྕགས་ཐུན་རྣམས་དཀྲུག །རང་གི་ཐུགས་ཀའི་ས་བོན་ལས། །འོད་འཕྲོས་མདུན་གྱི་ལྷ་མོ་བསྐུལ། ལྷ་མོ་ཁྲོས་ནས་དུག་རླང་གིས། །དགྲ་བོ་མྱོས་པར་བསམ་ནས་ཀྱང་། །ཐུན་གྱི་ལེགས་པར་བྲབ་ནས་སུ། །ལྷ་མོ་དཔག་མེད་སྤྲོས་ནས་ཀྱང་། ཁ་ནས་ཁོག་སར་ཞུགས་ཚེ་ན། རལ་གྲི་སྲོག་རྩ་རྦད་ཀྱིས་བཅད། །སྙིང་ཁྲག་དམར་པོ་ཞལ་དུ་གསོལ། །བྷྱོ་མ་མོ་ནག་མོ་བེ་ཏ་ལི་སིནྟ་ཀུ་ལུ་ཀུ་ལུ་མ་ཧཱ་བ་ལ་ལིངྟ་ཆོཾ་མཱ་ར་ཡ་ཧཱུྃ་ཕཊ། ལྷ་མོའི་གཏའ་གཏོར་བྱིན་གྱིས་བརླབས་ལ། །འཕྲལ་གཏོར་རྒྱུན་དུ་འབུལ་བ་གཅེས། །འབོད་རྦད་བསད་གསུམ་འདི་ན་མེད། །རང་གི་སྙིང་གར་ཆོས་འབྱུང་ནང་། །ལྷ་མོ་ཚོན་གང་འབྲལ་མེད་བསམ། འདི་ནས་མི་བརྗེད་དམ་ཚིག་བསམ། །ཞག་བདུན་བར་དུ་དྲིལ་བ་ནི། །ཁྲག་ནད་ཀྱིས་ནི་ཕ་རོལ་ཕུང་། །མཻ་ཏྲིས་ལས་སྦྱོར་མཛད་པ་ལས། །འདི་ལས་ཟབ་པ་མེད་དོ་ཞེས། །གུཔྟ་བཛྲ་གསུངས་ནས་ཀྱང་། །ལྷ་མོའི་སྙིང་ཤུན་མན་ངག་འདི། །རིན་ཆེན་བརྩོན་འགྲུས་ཁྱོད་ལ་གཏད། །ཅེས་གསུངས་སོ།
།མང་ཐོས་དགེ་ལེགས་དཔལ་བཟང་གིས། མཁས་གྲུབ་གོང་མའི་མན་ངག་ལ། །ལྷད་ཞུགས་བསལ་ནས་དག་པར་བྱས། །ལྷ་མོའི་རླུང་སྒྲུབ་ཀྱི་ཤོག་དྲིལ་ལོ།།