Ni gu chos drug gi khrid yig

Resource ID	SD1
Title	ni gu chos drug gi khrid yig
Topics	Six doctrines of Niguma
Sub-Topics	Manual
Author	Shönu Drup
Link	BDRC W8LS36545 (p.71-98 incomplete) BDRC W22103 (p.151)
Notes	incomplete

༄༅། །ནི་གུ་ཆོས་དྲུག་གི་ཁྲིད་ཡིག་ཤངས་པ་བཀའ་རྒྱུད་ཀྱི་རྒྱུད་་་་་་་། མཁས་གྲུབ་ཆོས་རྗེ་གྲགས་པ། མཚན་གཞོན་ནུ་གྲུབ་ཞེས་གྲགས་པ་དེ་ཉིད་ཀྱིས་མཛད་པ་བཞུགས་སོ།།

བླ་མ་དམ་པའི་ཞབས་ལ་གུས་པས་ཕྱག་འཚལ་ལོ།
རྒྱུད་པ་གང་རིའི་ཕྲེང་ལྟར་རྣམས་མཛེས་ཤིང་། །བསྒྲུབ་རྒྱུད་ཆུ་བོའི་གཞུང་ལྟར་མ་ཆད་པ། །རྒྱུད་སྡེ་རྒྱ་མཚོའི་བཅུད་བསྡུས་མན་ངག་འདི། །འགྲོ་མགོན་ནང་་་་པའི་ཞལ་གྱི་བདུད་རྩི་ལས། །ལེགས་འོངས་བླ་མ་དམ་པའི་གསུངས་བཞིན་དུ། །སྒྲོ་བཀུར་རང་གཟོ་ཡངས་ཏེ་བྲིས་བར་བྱ།
ཡེ་ཤེས་ཀྱི་མཁའ་འགྲོ་མ་ནི་གུ་མའི་ལུགས་ཀྱི་ཆོས་དྲུག་ལ་གཉིས། ཡིད་ཆེས་པ་བླ་མའི་ལོ་རྒྱུས་དང་། རྒྱུད་པ་དེ་དང་འབྲེལ་བའི་གདམ་པ་གཉིས་ཡོད་པའི་དང་པོ་ནི།
རྡོ་རྗེ་ཚིག་རྐང་ལས། གང་ཞིག་བརྗོད་བྲལ་ལྷུན་གྲུབ་འདུས་མ་བྱས། །ཁ་སྦྱོར་བདེ་ཆེན་ལོངས་སྐུ་གང་འདུལ་ཤར། །སྐུ་གསུམ་བདུན་ལྡན་རྡོ་རྗེ་འཆང་ཆེན་གྱིས། །ཐེག་ཆེན་སྐྱེ་མེད་རང་སྒྲ་འདི་སྐད་ཐོས། ཞེས་གསུངས་པས།
དེ་ལ་བརྗོད་བྲལ་ལྷུན་གྲུབ་འདུས་མ་བྱས་ནི། ཆོས་ཀྱི་སྐུ་ནི་སྤྲོས་པ་མེད་པའི་ཡན་ལག །ཁ་སྦྱོར་ནི་རང་སྣང་འོད་ཀྱི་ཡུམ་དང་ཁ་སྦྱོར་གྱི་ཡན་ལག །ཟུང་དུ་འཇུག་པའི་ཡན་ལག །བདེ་བས་གང་པའི་ཡན་ལག །གསུམ་ནི་ལོངས་སྐུའི་ཡན་ལག །གང་འདུལ་ནི་སྤྲུལ་སྐུ་སྟེ། སྙིང་རྗེ་གང་པའི་ཡན་ལག །འགོག་པ་མེད་པའི་ཡན་ལག །རྒྱུན་མི་འཆད་པའི་ཡན་ལག་གསུམ་མོ།
།དེ་ལྟ་བུའི་རྡོ་རྗེ་འཆང་ལ། ནི་གུ་མས་དངོས་སུ་གསན་པར་ཤེས་པར་བྱ་ཞིང་། དེ་ལས་རྒྱུད་པའི་རྣམ་ཐར་ཞིབ་པར་གཞན་ཤངས་པའི་རྣམ་ཐར་དུ་ཤེས་པར་བྱའོ།
།གཉིས་པ་གདམས་པ་ལ། མདོར་བསྟན་པ་དང་། རྒྱས་པར་བཤད་པ་གཉིས་ཀྱིས་དང་པོ་ནི།
རྡོ་རྗེ་ཚིག་རྐང་ལས། དབང་བཞི་སྨིན་བྱས་དད་དང་བརྩོན་འགྲུས་ལྡན། །མི་རྟག་སྐྱོ་ཤས་ཉེས་དམིགས་སྔོན་འགྲོ་བས། །ལམ་མཆོག་འདི་ལ་གང་གིས་འབད་གྱུར་ན། །ཟླ་དྲུག་ལོ་འམ་ཚེ་འདིར་སངས་རྒྱས་འགྱུར།
ཐབས་ལམ་བདེ་དྲོད་རང་འབར་། སྒྱུ་ལུས་ཆགས་སྡང་རང་གྲོལ། རྨི་ལམ་ཉིང་འཁྲུལ་རང་དག །འོད་གསལ་གཏི་མུག་རང་སངས། འཕོ་བ་མ་སྒོམ་སངས་རྒྱས། བར་དོ་རྒྱལ་བ་ལོངས་སྐུ། ཞེས་སོ།
།གཉིས་པ་རྒྱས་པར་བཤད་པ་དྲུག་གི
།དང་པོ་ཐབས་ལམ་བདེ་དྲོད་རང་འབར་ལ། སྔོན་འགྲོ་དང་། དངོས་བཞི་གཉིས་ལས།
༼W22103: དང་པོ་ལ་སྨིན་བྱེད་ཀྱི་དབང་ནི། ་་་ scv9p711༽
དང་པོ་ལ་གསུམ་གྱི་དང་པོ་དག་བྱེད་ཨའི་སྟོང་ར་ནི།
རྡོ་རྗེ་ཚིག་རྐང་ལས། །བཅུད་འདུས་དག་བྱེད་སྟོང་རའི་གནད་གསུམ་དང་། ཅེས་དང་།
དག་བྱེད་ཨའི་སྟོང་ར། སྟོང་ར་ནད་གདོན་སེལ་བྱེད། རྟགས་གསུམ་སྟོང་རའི་ཁྱད་པར་རོ། །ཅེས་དང་།
ཐེམས་ཡིག་ལས། དག་བྱེད་ཨའི་སྟོང་ར་ལ། གསོལ་འདེབས་གཉིས་ལ་དམིགས་པ་གསུམ། ཅེས་གསུངས་པས།
དེ་ལ་བཅུད་བསྡུས་ནི། མདོའི་དོན་བསྡུས་པ་འབུམ། དེ་བསྡུས་པ་ཉི་ཁྲི། དེ་བསྡུས་པ་བརྒྱད་སྟོང་པ། དེ་བསྡུས་པ་སྡུད་པ། དེ་བསྡུས་པ་ཤེར་སྙིང་། དེ་བསྡུས་པ་ཡི་གེ་གཅིག་མ་སྟེ། འདི་ལྟ་སྟེ་ཨ་ཅེས་དང་།
རྒྱུད་ལས། འདི་ལྟར་སངས་རྒྱས་བཅོམ་ལྡན་འདས། །རྫོགས་པའི་སངས་རྒྱས་ཨ་ལས་བྱུང་། །ཨ་ནི་ཡིག་འབྲུ་ཀུན་གྱི་མཆོག །ཅེས་པས། མདོ་རྒྱུད་གཉིས་ཀའི་སྙིང་པོའམ། བཅུད་བསྡུས་པ་ཡིན་གསུང་ངོ་།
དག་བྱེད་ནི། རང་རྒྱུད་དྲི་མ་ཉམས་ཆག་དག །འདི་ནི་སྟོང་རའི་མཚན་ཉིད་ཡིན། ཅེས་སོ།
།སྟོང་རའི་གནད་གསུམ་ནི། དག་བྱེད་ཨའི་སྟོང་ར་སོགས་གསུམ་མོ།
།དེ་ལ་དང་པོ་དག་བྱེད་ཨའི་སྟོང་ར་བསྒོམ་པ་ནི། དབེན་པའི་གནས་སུ་བསྟན་བདེ་བ་ལ་འདུག་སྟེ། དལ་འབྱོར་རྙེད་དཀའ། མི་རྟག་སྐྱོ་ཤས། སྐྱབས་འགྲོ་དང་སེམས་སྐྱེད་སྔོན་དུ་སོང་པས། རང་ཐ་མལ་དུ་གནས་པའི་སྤྱི་བོར་པད་ཟླའི་སྟེང་དུ། བླ་མ་སྐུ་མདོག་དཀར་པོ་རྡོ་རྗེ་འཆང་གི་རྣམ་པ་ལྟ་བུ་བསྒོམས་ལ། བླ་མ་རིན་པོ་ཆེ། བདག་གི་ནད་གདོན་ཐམས་ཅད་ཞི་བར་མཛད་དུ་གསོལ། སྡིག་སྒྲིལ་ཐམས་ཅད་དག་པར་མཛད་དུ་གསོལ། ཏིང་ངེ་འཛིན་ཁྱད་པར་ཅན་རྒྱུད་ལ་སྐྱེ་བར་མཛད་དུ་གསོལ་ཞེས་གསོལ་བ་བཏབ་ལ། རང་གི་མགོ་བའི་ནང་། སྨིན་ཕྲག་དུ་རྣམ་ཐར་སྒོ་གསུམ་མམ། །སྒོ་བཞི་མཚོན་པར་བྱེད་པ། ཆོས་འབྱུང་དཀར་པོ་གྲུ་གསུམ་པ། རྩ་བ་ཕྲ་བ་ལྕེ་ཆུང་གི་སྟེང་དུ་རེག་གེ་ཡོད་པ། གཡེལ་ཁ་ཆེ་བ་གྱེན་དུ་བསྟན་པ། ཟུར་གཅིག་སྨིན་ཕྲག་གཅིག་དུ་ཟུག་པ། ཟུར་གཅིག་རྣ་ལྟག་གཡས་སུ་ཟུག་པ། ཟུར་གཅིག་རྣ་ལྟག་གཡོན་དུ་ཟུག་པ། ཕྱི་གསལ་ནང་གསལ་གྱི་དཀྱིལ་བསྟོད་ཙམ་གྱི་ནང་དུ། རང་གི་སེམས་སྐྱེ་བ་མེད་པ་མཚོན་པར་བྱེད་པ་ཨ་དཀར་པོ་འོད་ཀྱི་རང་བཞིན་ཅན་གཅིག་བསམས་ནས། ངག་ཏུའང་། ཨ་ཨ་ཅེས་ཅི་རིགས་པ་བརྗོད་པས། ཨ་ལས་ཡེ་ཤེས་ཀྱི་བདུད་རྩི་ཆུ་རྒྱུན་དཀར་པོ་ན་ར་ར་བྱུང་པས། ཆོས་འབྱུང་ཁེངས། ལུས་ཀྱི་ཕྱི་ནང་བར་གསུམ་ཐམས་ཅད་ན་མར་སོང་པས། ནད་གསོན་སྡིག་སྒྲིབ་ཐམས་ཅད་བཤམས་ལམ་ཆུ་ལམ། སོར་མོའི་སྲག བ་སྤུའི་བུ་ཁ་ན་མར་ཐལ་བའི་རི་བོ་ལ། ཕུ་ཆུ་ཆེན་པོའི་རྒྱུན་བབས་པ་བཞིན། ནད་ཐམས་ཅད་རྣག་ཁྲག་གི་རྣམ་པར་འཐོན། གདོན་ཐམས་ཅད་སྲོག་ཆགས་འབུ་སྲིན་སྡོམ་དང་སྡིག་པ་ར་ཛྭ་ལ་སོགས་པའི་རྣམ་པར་འཐོན། སྡིག་སྒྲིབ་ཐམས་ཅད་སོལ་ཁུ་དང་། དུད་ཁུའི་རྣམ་པར་ནག་ནུར་རུ་རུ་འཐོན་པས། ལུས་ཕྱི་གསལ་ནང་གསལ་དུ་ཁྲུ་མ་ཕུས་བཏབ་པའམ། ཤེལ་གོང་གཡའ་དང་བྲལ་བ་བཞིན་དུ་བསམ། ངག་ཏུ། ཨ་ཨ་ཞེས་བརྗོད་པར་བྱའོ།
གཉིས་པ་སྟོང་ར་ནད་གདོན་སེལ་བྱེད་ཀྱི་ཁ་སྒྱུར་ནི། ནད་ཚད་པ་ལ་ཆོས་འབྱུང་དང་ཨ་དཀར་པོ་བདུད་རྩིས་གང་པུར་གྱི་ཆུར་བསམ། གྲངས་པ་ལ་ཆོས་འབྱུང་དང་ཨ་བདུད་རྩི་དམར་སེར་ཚ་བ་གསུམ་གྱི་ཆུ་རྒྱུན་དུ་བསམ། རླུང་ལ་བདུད་རྩི་མར་ཞུར་བསམ། སྟེང་གདོན་ལ་ཆོས་འབྱུང་ཨ། བདུད་རྩི་དམར་པོ་དང་། རྟ་མགྲིན། འོག་གདོན་ལ། ཆོས་འབྱུང་། ཨ་བདུད་རྩི་སྔོན་པོ། ཕྱག་རྡོར་དཔག་ཏུ་མེད་པས་ལུས་ཁེངས། ནས་གདོན་ཐམས་ཅད་དག་པར་བསམ་མོ། །གྲིབ་བྱུང་ན་ཆོས་འབྱུང་དང་། ཨ་བདུད་རྩི་ལྗང་ལྗང་ཁུ་རྣམ་འཇོམས་བསམ། ཤེས་རབ་ཆུང་ན་འཇམ་དཔལ། སྙིང་རྗེ་ཆུང་ན་སྤྱན་རས་གཟིགས། སོགས་སུ་ཁ་སྒྱུར་རོ། །མདོར་ན་ནད་གདོན་སྡིག་སྒྲིབ་གསུམ་སེལ་བའི་དམིགས་པ་ལ་རྩེ་གཅིག་དུ་འགྲོ་འཆག་ཉལ་འདུག་ཐམས་ཅད་དུ་དམིགས་པ་ནི་སྟོང་རའི་དམིགས་པའོ།
།གསུམ་པ་རྟགས་གསུམ་སྟོང་རའི་ཁྱེད་པར་ནི། དམིགས་པ་དེས་སྤྱིར་སྡིག་སྒྲིབ་དང་། ཁྱད་པར་དུ་སྐོར། སྐུ་བླུད། དམ་ཚིག་འགལ་འཁྲུལ་ཐམས་ཅད་འདག་གསུང་། ནད་འཐོན་པའི་རྟགས་རྣག་ཁྲག་འཛག་པ་ལ་སོགས་པའོ། །གདོན་ཐོན་པའི་རྟགས། སྲོག་ཆགས་གྲོགས་བུར་སྡོམ་སྡིག་པ་སྦལ་པ་ལྗོང་མོ་ལ་སོགས་པ་འཐོན་པ་ནི། གདོན་མཐོན་པའི་རྟགས་ཡིན་ཏེ། དངོས་སམ། ཉམས་སམ། རྨི་ལམ་ཅི་རིགས་སུ་འབྱུང་ངོ་།
།སྡིག་སྒྲིབ་དག་པའི་རྟགས་འཁྲུ་སྐྱུགས་དང་། འཕུར་བ་དང་། ལུས་ལ་རྔུལ་འཐོན་པ་དང་། ཁྲུས་བྱེད་པ་དང་། ཉི་ཟླ་ཤར་བ་དང་། གོས་དཀར་པོ་གྱོན་པ་ལ་སོགས་པ་འབྱུང་ངོ་།
།གཉིས་པ་དངོས་གཞི་ལ།
ཚིག་གསལ་ལས། ལུས་གནད་མེའི་སྟོང་ར། གཏུམ་མོ་ཟས་སུ་ཟ་བ། གོས་སུ་གྱོན་པ། སྟན་དུ་འདིང་བ། རླུང་ཞོན་པ། རྗེས་ལ་སྲིད་པའི་དབང་ཞུ་བ། གགས་རང་གྲོལ་ལོ། །ཞེས་པ་དེ་ལ་གསུམ། སྔོན་འགྲོ། དངོས་གཞི། རྗེས་གསུམ་ལས།
དང་པོ་ལུས་གནད་མེའི་སྟོང་ར་ནི། སེམས་སྐྱེད་སྔོན་དུ་སོང་པས་བརྐང་པ་སྣོལ། རྒལ་ཚོགས་བསྲང་། མགྲིན་པ་དགུག །ལག་པས་པུས་འཁྱུད་བཅུག་ལ། བླ་མ་སྤྱི་བོར་བསྒོམ་ལ།
།ཐབས་ལམ་བདེ་དྲོད་རང་འབར་ལ། །གསོལ་འདེབས་གཉིས་ལ་དམིགས་པ་ལྔ། ཅེས་གསུངས་པས།
བླ་མ་རིན་པོ་ཆེ། སེམས་ཅན་ཐམས་ཅད་ཀྱི་དོན་དུ། བདག་ལ་བདེ་དྲོད་ཀྱི་ཏིང་ངེ་འཛིན་རྒྱུད་ལ་སྐྱེ་བར་མཛད་དུ་གསོལ། བདེ་སྟོང་གི་ཏིང་ངེ་འཛིན་རྒྱུད་ལ་སྐྱེ་བར་མཛད་དུ་གསོལ། ཞེས་གསོལ་བ་གདབ། དེ་ནས་རང་གི་ལུས་རྗེ་བཙུན་མའི་རྣམ་པ་ལས་༼མེ་དམར་སྐྱས་ཁེངས་པར་བསམ་མོ།༽ནང་མེ་མ་མུར་གྱི་འོབས་ལྟ་བུ། ཁ་དོག་དམར་བ་རེག་བྱ་ཚ་བ། ཁོངས་པའི་ནང་ལྟེ་བའི་ཐད་ཁའི་ཕྱོགས་བཞིར། མེ་ངང་པའི་སྒོ་ང་ཙམ་གཞི་འབར་ལ་ཁད་པར་སྒོམ་པས། རླུང་རོ་ལན་གསུམ་བསམ་ལ། སྟེངས་རླུང་སྟེ་བར་མནན་ལ་བཟུངས། མི་ཐུབ་པ་དང་དལ་བུས་བཏང་། ཡང་བཟུངས། དེ་བཞིན་དུ་ནུས་ཚད་དུ་སྒོམ་མོ།
དགོས་གཞི་ལ་གཏུམ་མོ་ཟས་སུ་ཟ་བ། གོས་སུ་གྱོན་པ། བདན་དུ་འདིང་པ། རླུང་རྟར་ཞོན་པ་དང་བཞི་ལས།
དང་པོ་རླུང་ཟས་སུ་ཟ་བ་ལ་གཉིས་ཀྱི་དང་པོ།
གཏུམ་མོ་མེ་རྒོད་ཀྱི་དམིགས་པ་ནི། རང་རྗེ་བཙུན་མར་སྒོམ་པའི་སྤྱི་བོར་བླ་མ་སྒོམ་ལ། གསོལ་བ་གདབ། རྐང་ལག་སྣོལ་ལ། རྐང་པའི་མཐེ་འོང་གཉིས་ལག་པའི་གུང་འཛུབ་གྱི་བཟུངས། རྒལ་ཚིགས་སྲངས་འགྲིན་པ་དཀུག་ལ། གསང་གནས་སུ་རླུང་གི་དཀྱིལ་འཁོར་བཞུའི་དབྱིབས་ལྟ་བུའི་སྟེང་དུ། རཾ་དམར་པོ་འཚན་གང་པོར་བཞི་ཙམ་དམིགས་པ་གང་བདེ་གཅིག་སྒོམ་ནས་སྟེངས་རླུངས་སྣ་བུག་གཉིས་ནས་རྔུབ་ཏེ་ལྟེ་བར་མནན། དེ་ནས་འོག་རླུངས་དྲ་སྟེ་ལྟེ་བར་བཟུང་སྟེ། རླུང་གཉིས་ཁ་སྦྱར་བས། ཡཾ་ལས་རླུང་གཡོས། རཾ་ལ་ཕོག །རཾ་ལས་མེ་ཚ་བ། རྣོ་བ། ཕྲ་བ། གསལ་བ། མཚན་ཉིད་བཞི་ལྡན་འབར་ནས་ཁོག་པ་ཁེངས་པར་བསམ། ལུས་ཀྱི་ལས་སུ་དཀྲུག་མཁོར་བྱ། ངག་གི་ལས་སུ་རླུང་བཟུངས། སེམས་ཀྱི་ལས་སུ་མེ་འབར་བཞིན་པ་ལ་དམིགས་པ་གཏོད།
།གཉིས་པ་རྩ་གསུམ་འཁོར་ལོ་བཞིའི་གཏུམ་མོ་ནི།
རྡོ་རྗེ་ཚིག་རྐང་ལས། །རང་ལུས་ཐབས་ལྡན་རྩ་གསུམ་འཁོར་ལོ་བཞི། །ཨ་ཧཾ་འབར་འཛག་སྐད་ཅིག་དགའ་བཞིས་བརྒྱན། །ཤེས་རབ་ཁ་ཁ་མུ་ཁའི་སྙམས་འཇུགས་གིས། །ཟག་བཅས་ཟག་མེད་དགའ་བཞིའི་རིམ་བཞིན་ནོ། །ཅེས་དང།
།དྲོད་མྱུར་གཏུམ་མོ་ཆོས་དྲུག་རིམ་པ་བཞིན། །རི་བོང་དབབ་བཟུང་ཟློགས་དགྲམ་རླུང་དང་བསྲེ། །ཟག་མེད་ཡེ་ཤེས་ཆེན་པོས་རྒྱན་པར་བྱའོ། ཞེས་གསུང་པ་ལ་གཉིས་ཀྱི།
དང་པོ་རང་ལུས་ཐབས་ལྡན་གྱི་ཕྱག་རྒྱ་རྩ་གསུམ་འཁོར་ལོ་བཞིའི་གཏུམ་མོ་སྒོམ་པར་བྱ་ཏེ། ལུས་གནད་སྤུས་འཁྱུད་བཅུག །མེའི་སྟོང་རའི་ནང་དུ་རྩ་དབུ་མ་ཡར་རྩེ་ཚངས་བུག་ཏུ་ཟུགས་པ། མར་རྩེ་ལྟེ་འོག་སོར་བཞི་སྤུ་དཀར་ནག་གི་མཚམས་སུ་ཟུག་པ། རྩ་རོ་མ་ཡར་རྩེ་སྣ་བུག་གཡས་སུ་ཟུག་པ། མར་རྩེ་ལྟེ་འོག་ཏུ་རྩ་དབུ་མ་ལ་ཁ་ལྟ་བ། རྩ་ཀྱང་མ་ཡར་རྩེ་སྣ་རྒུག་གཡོན་དུ་ཟུག་པ། དམར་རྩེ་སྟེ་འོག་ཏུ་དབུ་མ་ལ་ཁ་བསྟས་པ། སྤྱི་བོར་བདེ་ཆེན་གྱི་འཁོར་ལོ་རྩ་འདབ་སོ་གཉིས། མགྲིན་པ་ལོངས་སྤྱོད་ཀྱི་འཁོར་ལོ་རྩ་འདབ་བཅུ་དྲུག །སྙིང་ཁ་ཆོས་ཀྱི་འཁོར་ལོ་རྩ་འདབ་བརྒྱད། ལྟེ་བ་སྤྲུལ་པའི་འཁོར་ལོ་རྩ་འདབ་དྲུག་ཅུ་རྩ་བཞི། རྣམས་དབུ་མ་ལ་ཟུག་པའི་རྩ་གསུམ་འཁོར་ལོ་བཞི་བསལ་བཏབ། དེ་ནས་སྣ་བུག་གཉིས་ནས། རླུང་རོ་སངས་པ་ལན་གསུམ་་་་་་་པ་བུ། དེས་ཁམས་འདུས་མི་འབྱུངས་པའི་དགོས་པ་ཡོད། དེ་ནས་རླུང་སྣ་བུག་གཉིས་ནས་རྔུབས་ཏེ། རོ་སྐྱང་གཉིས་ན་མར་ཏང་ལྟང་སོང་པས། ཨ་ཐུང་ལ་སྦུད་པ་བུས་པ་བཞིན་རླུངས་གཉིས་ཀྱི་བུས་པར་བསམ། རླུང་གི་རྟ་ཡིན་པས་མཆིལ་མ་མིད། མགོ་བོ་གུག་བྱ་རེ་རླུང་མནན། ལྟེ་བ་ཕྱིར་དྲག་ཏུ་ཕུལ། འོག་རླུང་གྱེན་དུ་འཐེན་ལྟེ་བར་རླུང་སྟེང་འོག་ཁ་སྦྱར་ནས། ཇི་སྲིད་རླུང་ཐུབ་ཚད་མནན་ཏེ། སོར་མོའི་མཐར་ཐུག་པ་རླུང་གི་གང་བར་བསམ། མི་ཐུབ་པ་དང་དུས་གཅིག་ལ་ཧིག་གིས་མི་བཏང་པར། སྣ་བུག་གི་སྒོར་རྡུལ་ཕྲན་བཞག་ཀྱང་གཡོ་འགུལ་མེད་པ་ཙམ་དུ་དལ་བུས་འཇམ་པོ་ཕྱིར་བཏང་། དེ་ནས་སྔར་བཞིན་རྔུབས། ལྟེ་བར་སྟེང་འོག་ཁ་སྦྱར་བུམ་པ་ཅན་སྐྱར་ཞིང་ཞག་གསུམ་ལོགས་པ་སྒོམ། དེ་ནས་ཨ་ཐུང་ལས་མེ་འཚན་ཉིད་བཞི་ལྡན་སོར་བཞི་སོར་གཉིས་ལ་སོགས་པ་རིམས་བཞིན་འབར་བས། རྩ་དབུ་མའི་ནང་ན་ཡར་ལ་སོང་ཏེ། ལྟེ་བ་སྙིང་ཁ། འགྲིན་པ། དཔྲལ་བ་རྣམས་ཀྱི། རྩ་དབུ་མའི་ནང་ན་ཡར་ལ། མེ་ལྕེ་ཕྲ་མོ་སོང་པས། དབུ་མའི་ཡར་སྣའི་ཧཾ་ཡིག་ལ་རེག་པས། ཐིག་ལེ་བྱང་ཆུབ་ཀྱི་སེམས། དཀར་པོ་བདེ་ཁྲིལ་བ་འཇག་སྟེ། སྤྱི་བོ་བདེ་ཆེན་གྱི་འཁོར་རྩ་འདབ་སུམ་བཅུ་རྩ་གཉིས་ན་མར་དཀར་ཆིལ་ཆིལ་སོང་པར་བསམ་ལ། རླུང་ཁ་སྦྱར། འཁྲུལ་འཁོར་གཡས་སུ་སྐོར་བ་དང་། གཡོན་དུ་སྐོར་བ་ཆ་སྙམ་དུ་བྱ། དགའ་བའི་ཏིང་ངེ་འཛིན་གྱི་སྐྱེས་པར་བསམ། དེ་བཞིན་བྱང་ཆུབ་སེམས་ཀྱི་མགྲིན་པ། སྙིང་ཁ། ལྟེ་བ། གསང་གནས་ཡར་བཅད་ཀྱི་རྩ་འདབས་ཐམས་ཅད་རིམས་བཞིན་གང་པས། མཆོག་དགའ། ཁྱད་དགའ། ལྡན་སྐྱེས་ཏེ་དགའ་བ་བཞིའི་ཏིང་ངེ་འཛིན་བདེ་བ་ཆེན་པོ་སྐྱེས་པར་བསམ།
བརྟག་གཉིས་ལས། ལྟེ་བར་གཏུམ་མོ་འབར་བ་ཡིས། །དེ་བཞིན་གཤེགས་པ་ལྔ་སྲེགས་ཅིང་། །སྤྱན་ལ་སོགས་པ་ཡང་སྲེགས་སྟེ། །བསྲེགས་པས་རི་བོང་ཅན་ཧཾ་འཛག ཅེས་གསུངས་པ་དང་།
།ཆུ་བོའི་རྒྱུན་ནི་རབ་འབབ་དང་། །མར་མེའི་རྩེ་མོ་རབ་བཅིང་ལྟར། །རྟག་དུ་དེ་ཉིད་རྣལ་འབྱོར་བས། །ཉིན་དང་འཚན་དུ་མཉམ་པར་བཞག །ཅེས་གསུངས་པའི་རྒྱུད་ཀྱི་མན་ངག་རང་འཚུངས་པ་ཉིད་དོ།
དེ་ནས་མས་བརྟན་དགའ་བ་བཞི་སྒོམ་པ་ནི། བདེ་བ་ཆེས་ནས་ཁམས་འཛག་པ་ལྟ་བུར་གྱུར་ན། འོག་རླུང་གྱེན་དུ་འཐེན། སྟེང་རླུང་འོག་ཏུ་གནན། གསུས་པ་སྒལ་པ་ལ་སྦྱར། ལྕེ་རྩེ་ཡར་རྐན་ལ་སྦྱར། མིག་གྱེན་དུ་ཟློག །གསང་གནས་ཀྱི་བྱང་སེམས་རླུང་གིས་གྱེན་དུ། ལྟེ་བ། སྙིང་ཁ། མགྲིན་པ། གཙུག་ཏུ་རིམ་ཀྱི་ཡུལ་ལྟེ། ཨ་ཐུང་གི་མེ་ཆེར་རིམ་པར་འབར་བས་ལུས་གང་བར་བསམས་ལ། རྩོལ་བ་གསུམ་ལྡན་བྱ། བདེ་བ་ཆུང་ན་ཐིག་ལེ་དབབ། དྲོད་ཆུང་ན་མེ་སྦར། འབར་འཛག་གཉིས་རེ་མོས་སུ་སྒོམ། གཙོ་ཆེར་མེ་སྙིང་ཁ་མན་ཆད་དུ་འབར་བ་དང་། ཐིག་ལེ་སྙིང་ཁ་ཡན་ཆད་དུ་དབ་ལ་དམིགས་པ་སྟད་ནས་སྒོམ། འཁྲུལ་འཁོར་མི་ནུས་ཙ་ན། རླུང་སྦྱོར་དང་འབར་འཛགས་ལ་དམིགས་པ་གཏད། བདེ་གསལ་མི་རྟོག་པའི་བ་ཟུང་འཇུག་དབྱེར་མེད་ཀྱི་ཏིང་ངེ་འཛིན་ལ་བཞག་གོ
།རྩ་འཁོར་ལོ་བཞིའི་གཏུམ་མོ་འདི་ནི་དུས་འཁོར། ཀྱེའི་རྡོར་ལོགས་པ་རྣལ་འབྱོར་བླ་ན་མེད་པའི་རྒྱུད་སྡེ་ཆེན་པོ་རྣམས་ནས་གསུངས་པའི་། མན་ངག་ཡོངས་སུ་རྫོགས་པའི་སོགས་རིམས་ཞེས་བྱ་བ་ཤིན་ཏུ་ཟབ། རང་ལུས་ཐབས་ལྡན་གྱི་ཕྱག་བརྒྱ་ཞེས་ཀྱང་བྱའོ།
།གཉིས་པ་གཞན་ལུས་ཐབས་ལྡན་གྱི་ཕྱག་བརྒྱ་ནི།
།ཤེས་རབ་ཁ་ཁ་མུ་ཁའི་སྙམས་འཇུག་གིས། །ཟག་བཅས་ཟག་མེད་དགའ་བཞི་རིམས་བཞིན་ནོ། ཞེས་གསུངས་པས། གཞན་ལུས་ཐབས་ལྡན་གྱི་ཕྱག་རྒྱ་རྟེན་པར་གསུངས་པ་ཡིན་ཏེ། རྩ་རླུང་འབྱོངས་ཏེ། བྱང་ཆུབ་གྱི་སེམས་ནོར་བུའི་རྩེར་འཛིན་པ་དང་། སྤྱི་བོར་འདྲེན་པའི་ནུས་པ་ཐོབ་པ་ཡིན་ན། ཕྱག་རྒྱ་མ་པད་མ་ཅན་ལ་སོགས་པ། མཚན་ཉིད་དང་ལྡན་པ་སྨིན་ཅིང་གྲོལ་བར་བྱས་ནས། དབྱེན་པའི་གནས་སུ། འདུ་བྱེས་གསུམ་ལྡན་གྱིས། ཤེན་མ་དང་། ཁ་ཁ་མུ་ཁ་སྙོམ་པར་ཞུགས་ཏེ། བྱང་སེམས་སྤྱི་བོ། མགྲིན་པ། སྙིང་ཁ། ལྟེ་བ། གསང་གནས་སུ་དགའ་བཞིའི་རིམས་པས་དལ་བུས་དབབ་ཏེ། ཟག་བཅས་ཀྱི་བདེ་བས་དགའ་བཞི་ངོས་བཟུངས། དེ་ནས་སྔར་བཞིན་ལུས་གནད། ངག་གནད། དམིགས་པའི་གནད་གསུམ་གྱི། བྱང་ཆུབ་ཀྱི་སེམས། གསང་གནས་ནས་ལྟེ་བ། སྙིང་ཁ། (W8LS36545 p.83 folio is missing) ༼W22103: མགྲིན་པ། བྲལ་བར་རིམས་ཀྱི་དྲངས་ཏེ་ཟློག །དགའ་བ། མཆོག་དགའ། ཁྱད་དགའ། ལྷན་སྐྱེས་ཏེ་མས་བརྟན་གྱི་དགའ་བ་བཞི་ངོས་བཟུང་། སེང་གེ་རྣམ་གྲོལ་ལ་སོགས་པའི་འཁྲུལ་འཁོར་སྣ་ཚོགས་ཀྱིས་བྱང་ཆུབ་ཀྱི་སེམས་ལུས་ལ་བགྲམ། རླུང་སྦྱོར་ལྟེ་བའི་བུམ་པ་ཅན་དུ་སྒོམ། བདེ་སྟོང་མི་རྟོག་སྟོང་གསལ་ཟུང་འཇུག་གི་ཏིང་ངེ་འཛིན་ལ་ཡུན་རིང་དུ་བཞག་ཅིང་། ཟག་མེད་ཡེ་ཤེས་ཆེན་པོས་བརྒྱན་པར་བྱའོ། །རབ་བྱུང་གིས་དངོས་ཀྱི་ཕྱག་རྒྱ་མ་སྟེན་ན་སོ་སོ་ཐར་པའི་སྡོམ་པ་དང་འགལ་བར་འགྱུར་ཞིང་། ་་་་་སྟེན་དབང་གསུམ་པའི་དམ་ཚིག་དང་འགལ་བ་ཡིན་པས་གཉིས་ཀ་དང་མི་འགལ་བའི་ཡེ་ཤེས་ཀྱི་ཕྱག་རྒྱ་མ་དམིགས་ནས། རི་བོང་དབབ་བཟུང་ཟློག་བགྲམ་རླུང་དང་སྲེ། །ཟག་མེད་ཡེ་ཤེས་ཆེན་པོར་སྐྱེས་པ་ླ་སོགས་པ་སྔར་བཞིན་སྒོམ་མོ།
།གཉིས་པ་གོས་སུ་གྱོན་པ་ནི། བདེ་བའི་མལ་དུ་པུས་བྲང་སྦྱར་ལ་ཉལ། ལྐོག་མ་པུས་མོ་ལ་དགབ། ལག་པ་སྣོལ་བ་འཁལ་རྩ་ལ་དགབ། མེ་དམིགས་གོང་བཞིན་བྱས་ལ་རླུང་བཟུང་ངོ་།
།གསུམ་པ་གདན་དུ་འདིངས་པ་ནི། རྐང་པ་བརྟེན་ལ་གཏད་ལ། སྒྱུ་མོ་ཁུངས་ཀྱིས་བོལ་གོང་མནན། གཡས་འོག་ཏུ་བཅུག་ལ་ཀུ་ཀུ་ར་ཇའི་འདུག་སྟངས་ཀྱིས་་་་་ཉལ་སྒོར་མོས་ཉལ། རླུང་དང་དམིགས་པ་གོང་བཞིན་ནོ།
།བཞི་པ་རྟར་ཞོན་པའི་མན་ངག་ལ། བླ་མའི་གཏུམ་མོ་སྒོམ་པ་ནི། ལུས་གནད་ནི། ཐབ་འགལ་ཕྱག་རྒྱ་བཅས་ཏེ་ལག་པ་གཉིས་སྣོལ་བ་སྦེ་ཤ་ལ་འཇུ། སྟོང་རའི་ནང་དུ་ལྟེ་འོག་ཏུ་ཉི་མའི་དཀྱིལ་འཁོར་གྱི་སྟེང་དུ་བླ་མ་ཚེ་དཔག་ཏུ་མེད་པའི་རྣམ་པ་་་་་་་བཞི་ཙམ་པ་སྐུ་མདོག་དམར་པོ་མེའི་རང་བཞིན་དུ་་་་་་་་། ཚངས་བུག་འཕང་ལོའི་བུག་པ་ཙམ་དུ་བསམས་ནས་སངས་རྒྱས་བྱང་སེམས་དཔག་ཏུ་མེད་པ་སྟེང་གི་ནམ་མཁར་བསམས་པའི་ཐུགས་ཁ་ནས་ཡེ་ཤེས་ཀྱི་བདུད་རྩི་མར་བཞུའི་རྣམ་པ་ཚངས་བུག་ནས་ཞུགས། བླ་མའི་སྟེང་དུ་བབས་པས་ལྕགས་སྲེགས་པ་ལ་མར་བཞུ་བླུགས་པ་བཞིན་སྭ་སྒྲ་དང་བཅས་ནས་མེ་འབར་ནས་ལུས་ཀྱི་ནང་ཐམས་ཅད་གང་པར་བསམས་ལ། རྩོལ་བ་གསུམ་ལྡན་བྱའོ། །གཏུམ་མོ་རྣམས་ཀྱི་ནང་ནས་མཆོག་ཏུ་གྱུར་པ་བླ་མའི་གཏུམ་མོ་ཞེས་ཀྱང་བྱ་རླུང་རྟར་ཞོན་པའི་གཏུམ་མོ་ཞེས་ཀྱང་བྱའོ།
།འགྲོ་བའི་ཚེ་ལག་པ་གཉིས་ཁུ་ཚུར་བཅངས་ནས་འཆན་འོག་གཉིས་སམ། རྐང་འཐིལ་གཉིས་ནས་རླུང་གི་ལྷ་མོ་དཀར་ལྗང་གཤེག་པ་ཅན་གཉིས་ཀྱིས་ནམ་མཁའ་ལ་ཁྱེར་བར་བསམས་ལ་༽ ཞིང་། རླུང་ཁུག་པ་ཉེར་གཅིག་བཟུངས་ནས་ཕྱིན་ན། རྟ་མཆོག་དང་མཉམ་པའི་འགྲོས་འབྱུང་གསུང་ངོ་།
།གསུམ་པ་རྗེས་ལ་གཉིས་ལས། དང་པོ་སྲིད་པའི་དབང་ཞུ་བ་ནི། སྤྱི་བོར་པད་མ་དཀར་པོ་དང་། ཟླ་བའི་སྟེང་དུ། བླ་མ་༼རྡོ་རྗེ་འཆང་གྱི་ངོ་བོ་༽སྐུ་མདོག་དཀར་པོ༼ཕྱག་གཉིས་མཉམ་བཞག་གོ༽། འོད་༼ཉི་མ་འབུམ་གྱི་འོད་ལས་་་་་༽ཀྱི་རང་བཞིན་ཅན་སྒོམ་ནས། མཆོད་པ་བཞི་རྫོགས་སུ་ཕུལ་ལ། བདག་ལ་དབང་བཞི་རྫོགས་པར་སྐུར་དུ་གསོལ། ཞེས་གསོལ་བ་གདབ་པས། བླ་མའི་སྐུ་ལུས་ལས་འོད་ཟེར་རམ། བདུད་རྩི་དཀར་པོའི་ཚོགས་དཔག་ཏུ་མེད་པ་བྱུང་ནས། སྤྱི་བོར་སླེབ་པས་བུམ་དབང་། མགྲིན་པས་གསང་དབང་། སྙིང་ཁར་གསུམ་པ། ལྟེ་བར་སླེབ་པས་བཞི་པའོ། །དེ་ནས་ལུས་ངག་ཡིད་གསུམ་གྱི་ཀུན་གཞི་ལ་ཡོད་པའི་སྒྲིབ་པ་བག་ཆགས་དང་བཅས་པ་དག་ནས། དབང་བཞི་རྫོགས་པ་དང་། སྐུ་བཞི་ཐོབ་པར་བསམ། དེས་དམ་ཚིག་ཉམས་ཆག་དང་སྡིག་སྒྲིབ་ཐམས་ཅད་དག་ནས། ཏིང་ངེ་འཛིན་འཕེལ་བར་འགྱུར་རོ། །པདྨ་དཀར་པོ་འདབ་མ་བཞི་པའི་ལྟེ་བ་ལ་བླ་མ་བསམ་ནས་ཚོགས་འཁོར་དང་། དབང་སྐུར་སྔོན་འགྲོའི་ཆོ་ག་དང་འབྲེལ་བས། གོང་གི་དམིགས་པ་དེ་ཉིད་སློབ་མ་ལ་སྐུར་ན། ཐབས་ལམ་དབང་བཀའ་ཡིན་པས། དེ་ཐབས་ལ་སྒོམ་པའི་རྗེས་ལ་མ་ཆག་པར་བླང་ངོ་།
།གཉིས་པ་གགས་རང་གྲོལ་ནི། དེ་ལྟར་ཐབས་ལམ་སྒོམ་པའི་དུས་སུ། ༼་་་་་་་་༽ ལྗི་བ་རྔུལ་བྱུང་ན། སེར་ཐལ། དྲི་ཆུ་རླངས་ཡལ་བ་བཏང་ལ་བཀྲུའོ། །དེས་སེལ་ལོ། །སྙིང་མི་དགའ་བ་དང་། ཤེས་པ་འཕྱོ་བ་དང་། རོ་སྟོད་ན་བ་ལ་སོགས་པ་བྱུང་ན། གང་ན་སར་ལྕགས་ཚགས་ཀྱི་མིག་ལྟ་བུ་བསམ་པའི་ནང་ནས་ནད་གདོན་ཐམས་ཅད་དུ་བ་འཕྱུར་བ་ལྟར་སྔོ་བུན་ནུ་ནུ་མཐོན་པར་བསམ་ལ། ལག་པ་གཉིས་དཀྲུག །རླུང་འབུད་པ་དང་། ཧས་གྲག་པོ་གདབ་པར་བྱའོ། །ཡང་ན་རིན་པོ་ཆེ་འབར་བ་ལྟ་བུའི་བུ་ག་སྒོམ། དེས་སྟོད་གགས་སེལ་ལོ།
།སྨད་དུ་ཀུན་དའི་གགས་ནི། རབ་དགག་སྒྲུབ་དང་བྲལ་བའི་བློས་བསལ། འབྲིང་དབང་སྐུར་དང་། ཚོགས་འཁོར་དང་། ཐ་མ་དམིགས་པ་དང་འཁྲུལ་འཁོར་གྱི་སེལ་གསུང་ངོ་།

།གཉིས་པ་སྒྱུ་ལུས་ཆགས་སྡང་རང་གྲོལ་ལ།
༼W22103: དང་པོ་ལ་སྨིན་བྱེད་ཀྱི་དབང་ནི། ་་་ scv9p730+9p715༽
རྡོ་རྗེ་ཚིག་རྐང་ལས། །སྒྱུ་ལུས་བདེན་མེད་དབང་པོ་རབ་འབྲིངས་གསུམ། །འབྲལ་མེད་མོས་གུས་རང་ལུས་ཅིར་སྣང་ཀུན། །སྣང་སྟོང་ཞེན་བྲལ་ལྷ་སྐུའི་ལམ་ཁྱེར་བྱའོ། །ཆགས་སྡངས་རང་གྲོལ་བཅུ་བཞིའི་ས་ཐོབ་འགྱུར།
དབང་པོ་རབ་བླ་མ་གྲོགས་སུ་བསྟེན་པ། འབྲིང་ཚིག་བཞན་གྱི་བར་མ་ཆོད་པར་འཁྲིད་པ། ཐ་མ་མལ་གཅིག་ཏུ་ཏིང་ངེ་འཛིན་སྐྱེས་པ། ཅེས་དང་།
ཚིག་གསལ་ལས། །དབང་པོ་རབ་བླ་མ་གྲོགས་སུ་བརྟེན་པ་སོགས་དང་།
ཐེམས་ཡིག་ལས། སྒྱུ་ལུས་དབང་པོ་རབ་འབྲིང་ལ། གསོལ་འདེབས་ལྔ་ལ་འདུན་པ་གསུམ།
ཅེས་པས་དོན་གསུམ་ལས། དང་པོ་དབང་པོ་རབ་བླ་མ་གྲོགས་སུ་བརྟེན་པ་ལ་གཉིས་ཀྱི།
དང་པོ་གསོལ་འདེབས་བླ་མའི་ལམ་ཁྱེར་ནི། དེ་ལ་སྤྱིའི་ཕྱིར་གྲོགས་ཞེ་ན། འདུ་འབྲལ་མེད་པའི་དོན་གྱི་ན་གྲོགས། གོང་ནས་གོང་དུ་འཁྲིད་པར་བྱེད་པས་ན་གྲོགས། ཡོན་ཏན་ཐམས་ཅད་སྐྱེད་པར་བྱེད་པའམ། ཚེ་གཅིག་གམ། ལོ་ཟླ་ཙམ་གྱིས་སངས་རྒྱས་ཀྱི་ས་ལ་འགོད་པས་ན་གྲོགས་ཡིན་གསུང་།
དེ་ལ་དང་པོ་སེམས་སྐྱེད་དང་ལྡན་པས། གནས་དབེན་པར་ཕྱིན་ལ་འཁོར་བ་ལ་སྐྱོ་ཤས་དྲག་པོ་སྐྱེད་དེ། སྔར་སྐྱེས་པ་ཐམས་ཅད་ཀྱང་ཤི །ད་སྐྱེ་བ་ཐམས་ཅད་ཀྱང་འཆི། ད་ལྟར་གནས་པའི་དགྲ་གཉེན་གྱི་རྣམས་པ་ཐམས་ཅད་ཀྱང་འཆི་བ་ལས་མ་འདས། ཤི་ནས་ཀྱང་མེད་པར་མི་འགྱུར་ཏེ། རིགས་དྲུག་ནི་གང་དུ་སྐྱེས་ཀྱང་སྐྱིད་མེད་ཨང་མཉམ་དུ་བསམ་ལ། བདེ་བའི་བསྟན་ལ་ལུས་གནད་བཅས་ལ། རང་བདེ་མཆོག་ཞལ་གཅིག་ཕྱག་གཉིས་པ་ཡུམ་དང་གཉིས་སུ་མེད་པར་སྒོམ་པའི་སྤྱི་བོར་པད་ཟླའི་གནད་ལ། རྩ་བའི་བླ་མ་ཞལ་འཛུམ་མདངས་དང་ལྡན་པ་གཅིག་བསམ། དེའི་ཐུགས་ཁ་ནས་འོད་ཟེར་འཕྲོས་པས། སངས་རྒྱས་དང་བྱང་ཆུབ་སེམས་དཔའ་ཡི་དམ་གྱི་ལྷ་ཚོགས། མཁའ་འགྲོ་ཆོས་སྐྱོང་། ཀ་ཁ་སླབས་པ་ཡན་ཆོད། ཆོས་འབྲེལ་ཡོད་ཚད་ཀྱི་བླ་མ་རྣམས་དེ་ལ་སྟིམས་ནས། བླ་མ་དེ་འོད་དང་འོད་ཟེར་གྱི་རང་བཞིན་ཅན། མཚན་ཐོས་པ་ཙམ་གྱི་ཕྱིར་མི་ལྡོག་པའི་ས་ལ་འགོད་ནུས་ན། གསོལ་བ་གདབ་ན་སྨོས་ཅི་དགོས་པ་གཅིག་བསམ། མདུན་དུ་རང་ལ་གནོད་པར་བྱེད་པའི་གདོན། ཚེ་འདི་ཡི་ཕ་མ། གཞི་འདག་རྣམས་ཀྱི་ཙོ་བྱས་པ། ནམ་མཁའ་དང་མཉམ་པའི་སེམས་ཅན་ཐམས་ཅད་ལུས་གུས་པ་ཐལ་མོ་སྦྱར། ངག་གུས་པ་གསོལ་བ་འདེབས། ཡིད་གུས་པ་མོས་གུས་རྒྱུན་ཆད་མེད་པར་བསམ་ནས། བདག་གི་ངག་ཏུ་བླ་མ་སངས་རྒྱས་རིན་པོ་ཆེ་ལ་གསོལ་བ་འདེབས་སོ། །བྱས་པ་དང་། སེམས་ཅན་ཐམས་ཅད་ཀྱང་ཁུ་དི་རི་རི་གསོལ་བ་འདེབས་པར་བསམ་ནས། བླ་མ་རིན་པོ་ཆེ། སེམས་ཅན་ཐམས་ཅད་ཀྱི་དོན་དུ། བདག་འཛིན་བློ་ཡི་ཐོང་པར་བྱིན་གྱི་རློབས། དགོས་མེད་རྒྱུད་ལ་སྐྱེ་བར། སྒྱུ་ལུས་འབྱོངས་པར། རྨི་ལམ་འབྱོངས་པར། འོད་གསལ་ཕྱག་ཆེན་པོ་ད་ལྟ་ཉིད་དུ་རྒྱུད་ལ་སྐྱེ་བར་མཛད་དུ་གསོལ། ཅེས་རྩེ་གཅིག་ཏུ་གསོལ་བ་གདབ། དེ་ཡང་ལྷ་སྐུ་མཚན་དཔེའི་བརྒྱན་པ། བསྐལ་པ་སྟོང་དུ་སྒོམ་པ་བས་བསོད་ནམས་ཆེ་བ་དང་། སངས་རྒྱས་སྟོང་གི་ཡོན་ཏན་འཛིན་པ་དང་། ས་བཅུ་
(W8LS36545 p.86 folio is missing) ༼W22103: ལམ་ལྔ་ཐམས་ཅད་ཐུན། ་་་གིས་བགྲོད་པ་ལ་སོགས་པ་ལ་སོགས་པའི་་་་་་་ས་སུ། མདོ་རྒྱུད་མན་ངག་ཐམས་ཅད་མཐུན་ཏེ།
ཡེ་ཤེས་མཁའ་འགྲོ་མ་འདི་ཉིད་ཀྱི་ཞལ་ནས། ས་བཅུ་ལམ་ལྔའི་རིམ་པ་རྣམས། །མོས་གུས་སྟོབས་ཀྱིས་བགྲོད་པར་བྱེད། །བླ་མའི་སྣང་བ་མི་འབྲལ་བ། །རྒྱུད་སྡེའི་དགོངས་པ་གནད་ཀྱི་མཆོག །ཞེས་པ་དང་།
ཧེ་བཛྲ་ལས། གཞན་གྱིས་རྗོད་མིན་ལྷན་ཅིག་སྐྱེས། །གང་དུ་ཡང་ནི་མི་རྙེད་དེ། །བླ་མའི་དུས་ཐབས་སྟེན་པ་དང་། །བདག་གི་བསོད་ནམས་ལས་ཤེས་བྱ། །ཅེས་སོ།
།ཡེ་ཤེས་གྲུབ་པ་ལས། སྐྱ་བ་འཛིན་པ་མེད་པར་ནི། །གྲུ་ཡིས་ཕ་རོལ་ཕྱིན་མི་འགྱུར། །ཡོན་ཏན་ཐམས་ཅད་རབ་རྫོགས་ཀྱང་། །བླ་མ་མེད་པར་སྲིད་མཐར་མིན། །ཞེས་སོ།
མདོ་ལས་ཀྱང་། སངས་རྒྱས་ཆོས་རྣམས་དགེ་བའི་བཤེས་ལ་རྟེན་ཏོ་ཞེས། །ཡོན་ཏན་ཀུན་གྱི་མཆོག་མངའ་རྒྱལ་བ་དེ་སྐད་གསུང་། ཅེས་པ་ལ་སོགས་པ་དུ་མ་གསུངས།
ཕལ་པོ་ཆེ་ལས ནོར་བཟངས་ཀྱིས། དགེ་སློང་རྒྱ་མཚོའི་བྱངས་ལ་གསོལ་པ། ཁྱེད་ཀྱི་བྱང་ཆུབ་སེམས་དཔའི་རྣམ་པར་ཐར་པ་འདི་ལྟ་བུ་གང་ལས་བྱུང་། བཀའ་སྩལ་པ། ངས་སྔོན་དགེ་བའི་བཤེས་གཉེན་སྟེན་པ་དང་། རིམ་གྲོ་དང་ཕུ་དུད་དུ་བྱས་པ་ལས་བྱུང་ངོ་། ཁྱོད་ཀྱིས་ཀྱང་དགེ་བ་དི་བཤེས་གཉེན་ལ། ཅེས་སོ།
ཁྱུང་པོ་རྣལ་འབྱོར་པའི་གསུང་ནས་ཀྱང་། ཚེ་གཅིག་ལུས་གཅིག་གིས་སངས་རྒྱ་བ་ལ་བླ་མའི་བྱིན་རླབས་འཇུག་དགོས། དེ་ལ་འགྲོ་འཆག་ཉལ་འདུག་ལ་སོགས་པའི་དུས་ཐམས་ཅད་དུ་བླ་མའི་སྣང་བ་དང་སྐད་ཅིག་ཙམ་ཡང་མི་འབྲལ་བའི་མོས་གུས་ཅིག་དགོས་གསུང་།
བླ་མ་རྨོག་ལྕོག་པའི་ཞལ་ནས་ཚེ་གཅིག་གིས་སངས་རྒྱ་བ་ལ་བླ་མའི་མོས་གུས་དགོས་གསུང་།
ཁོང་གི་ཐག་ཆོད་ཀྱི་གསུང་གཅིག་ལ། ཐུགས་རྗེ་ཆེན་པོ་རང་ཤེས་དཀར་ན་ཡང་དཀར། །དགེས་རྡོར་བདེ་མཆོག་རང་ཤེས་གནག་ན་ཡང་གནག །ང་ལ་རེ་ས་བླ་མ་ལས་མེད། ཇི་ལྟར་འདུག་ཀྱང་བླ་མའི་སྣང་བ་དང་འབྲལ་མ་མྱོང་བས་ཚེ་གཅིག་ལ་ལུས་གཅིག་ལ་སངས་རྒྱས་སམ་དེ། ་་་་་་འོང་ངེས་འདྲ་གསུང་སྐད།
བླ་མ་སྐྱེར་སྒང་པའི་གསུང་ནས་བླ་མའི་མོས་གུས་ལ་མ་བུ་གཅིག་པོ་ཤི་བ་ལྟ་བུ་ཅིག་དགོས་གསུང་།
གཉན་སྟོན་རི་གོང་པའི་ཞལ་ནས། བླ་མའི་མོས་གུས་ལ་ཞེ་ཐག་པ་སྙིང་ཁོང་རུས་པའི་གཏིང་ནས་འཆི་མ་རང་དབང་མེད་པར་འོང་བའི་གསོལ་བ་འདེབས་པ་གཅིག་དགོས་གསུང་།
རིན་ཆེན་སངས་རྒྱས་སྟོན་པའི་ཞལ་ནས། བླ་མའི་མོས་གུས་ལ་རྗེད་ངས་ལོག་ལྟར་མ་སོང་བ་གཅིག་དགོས་གསུང་།
ཡང་ན་བླ་མ་རྗེད། ཡང་ན་ལོག་བལྟ་བྱེད་པ་ལ་བྱིན་རླབས་མི་འཇུག་གསུང་།
མཁས་གྲུབ་རི་་་་འི་ཞལ་ནས། བླ་མའི་མོས་གུས་ལ་བླ་མ་གོ་འདྲིས་ཀྱིས་མ་ཁྱེར་བའང་། མོས་གུས་གོ་ཡུལ་དུ་མ་ལས་པ་ཅིག་དགོས་གསུང་།
གཞན་ཡང་བླ་མ་གཉན་སྟོན་གྱི་ཞལ་ནས། བླ་མ་རྗེ་བཙུན་ཆེན་པོ་རིན་པོ་ཆེ་འབྲི་ཁུང་པ། ཞང་རིན་པོ་ཆེ་དུས་གསུམ་མཁྱེན་པ། རྩང་པ་རྒྱ་རས་ལ་སོགས་པ་ཐམས་ཅད་ཀྱི་དྲུང་དུ་ཕྱིན་པས་བླ་མའི་མོས་གུས་གཅིག་བུས་ལམ་བགྲོད་པ་ལ་ཀུན་མཐུན་པར་འདུག་གསུང་ངོ་།
།གཉིས་པ་ཅིར་སྣང་བདེན་མེད་ལམ་ཁྱེར་ནི། གོང་བཞིན་དུ་གསོལ་བ་བཏབ་པས་སྣང་བ་ཐམས་ཅད་བདེན་མེད་དུ་ཚམ་སོང་བ་དང་། རང་གི་སྤྱི་བོར་བླ་མ་སྒོམ་པའི་སྐུ་མདོག་ཕྱག་མཚན། བརྒྱན། ཆ་ལུགས། རྣམ་པ། བཞུགས་ཚུལ་དང་ལྡན་པ་འདི་རང་གི་བློས་བཀོད། བློ་ལ་ཤར་བ་མ་གཏོགས་པ། ཕྱི་རོལ་ན་དོན་ལོགས་སུ་གྲུབ་པ་གཅིག་ཀྱང་མི་འདུག །འདི་སྣང་གིན་འདུག་ཀྱང་བདེན་མེད་གཅིག་ཡིན་ཨང་སྙམ་དུ་བསམ། དེ་བཞིན་དུ་སྣང་ཞིང་སྲིད་པས་སྡུས་པའི་ཆོས། དགྲ་སྡང་བ། གཉེན་བྱམས་པ། བདག་གཞན་སྣོད་བཅུད་དང་བཅས་པ་འདི་རྣམས་ཐམས་ཅད་རང་གི་བློས་བཀོད་པ་མ་གཏོགས་པ་ཕྱི་རོལ་ན་དོན་ལོགས་སུ་གྲུབ་པ་གཅིག་ཀྱང་མི་འདུག་པས་སྣང་གིན་འདུག་ཀྱང་བདེན་མེད་གཅིག་ཡིན་ཨང་སྙམ་དུ་སྒོམ། བཤིས་བདེན་མེད་ཅིག་ཡིན་པ་ལ་དེ་ལྟར་མ་ཤེས་པས་འཁོར་བར་འཁྱམས་པ་ཡིན་སྙམ་དུ་བསམ། དེ་ལྟར་རྩེ་གཅིག་ཏུ་སྒོམ་པ་དེ་ནི་མཉམ་བཞག་གོ
།རྗེས་ཤེས་ནི། འགྲོ་བ་འཆག་པ་ཉལ་བ་འདུག་པ། ཟས་ཟ་བ། གོས་གྱོན་པ་གཏམ་སྨྲ་བ་ལ་སོགས་སྤྱོད་ལམ་ཐམས་ཅད་ཀྱི་དུས་བུ་ཡང་། འདུན་པ་གསུམ་ནི། དོ་ནུབ་འཆི། ནང་བར་འཆི། ཅིས་ཀྱང་འཆི། ཅི་བྱེད་སྙམ་པ་དང་། བླ་མའི་མོས་གུས་དུངས་དུང་པ་དང་། ངེས་པར་བདེན་མེད་ཡིན་སྙམ་པའི་འདུན་པ་དྲག་པོ་དང་གསུམ་རྩེ་གཅིག་དུ་མ་ཡེངས་པར་ཉམས་སུ་བླང་། འགྲོ་འཆག་ཉལ་དང་འདུག་དང་ཤེས་གཞིན་རབ་ཏུ་ལྡན། ཅེས་པའི་དོན་ནོ།
དེ་ལྟར་སྒོམ་པས་གཡས་ནས་བསྟོད་པ་དང་། གཡོན་ནས་སྨོད་པ་ལ་དགག་སྒྲུབ་མེད། གཡས་ནས་ཙན་དན་གྱི་འདེ་གུས་བྱུགས་པ་དང་། གཡོན་ནས་ཁྱི་ལུད་ཀྱིས་བྱུགས་པ་ལ་དགག་སྒྲུབ་ཆགས་སྡང་རང་གྲོལ་ནས། སྒྱུ་ལུས་ཆགས་སྡང་རང་གྲོལ་བྱ་བ་འབྱུང་གསུང་ངོ་།
།དེས་ཉིན་བར་གྱི་དུས་འདའ། མཚན་མོ་ཡང་བདེ་བའི་སྟན་ལ་འདུག་སྟེ་སེམས་སྐྱེ་བླ་མའི་རྣལ་འབྱོར་གོང་བཞིན་དུ་བྱས་ནས།་གསོལ་བ་བཏབ་སྟེ་གཉིད་ལོག་པས། ཕྱམ་༼གཡང་་་་༽ཆེན་པོ་ལ་ཤོར་བའམ། མིའམ་ཁྱིས་དེད་པ་ལ་སོགས་པའི་རྨི་ལམ་མི་འཚམ་པ་གཅིག་རྨིས། དེ་རྨི་ལམ་དུ་ཤེས། རྨི་ལམ་དེ་བདེན་མེད་སྒྱུ་མར་ཤེས། སྒྱུ་མ་སྒྱུ་འཛིན་ཐམས་ཅད་དང་བྲལ་ནས་འོད་གསལ་ཕྱག་རྒྱ་ཆེན་པོ་ཇི་ལྟ་བ་བཞིན་མངོན་དུ་གྱུར་པ་དེ་ལ་དབང་པོ་རབ་བླ་མ་དམ་པ་གྲོགས་སུ་སྟེན་པས་ས་བཅུ་ལམ་ལྔ་བགྲོད་པ་བྱ་བ་ཡིན་གསུང་ངོ་། །དེས་མ་བགྲོད་ན། བླ་མ་ལ་ཆོས་སྐུའི་འདུ་ཤེས་མ་སྐྱེས། མོས་གུས་རྩོལ་བ་ཞན་པའི་སྟོབས་ཀྱིས་དབང་པོ་འབྲིང་དུ་སོང་བ་ཡིན་ནོ།
།དེ་ལ་གཉིས་པ་དབང་པོ་འབྲིང་ཚིག་གཞན་གྱིས་བར་མ་ཆོད་པར་ཁྲིད་པ་ནི། དེ་ལ་ཅིའི་ཕྱིར་ཚིག་གཞན་གྱིས་བར་མ་ཆོད་པར་ཁྲིད་པ་ཞེས་ཟེར་ཞེ་ན། ཐ་མལ་གྱི་ལོང་གཏམ་ལྟ་ཅི་སྨོས་ཏེ། མདོ་འདོན་པ་དང་། སྔགས་ཟློས་པ་ལ་སོགས་པ་ཐམས་ཅད་རེ་ཞིག་བཞག་ནས་ཡིད་ལའང་སྒྱུ་མ་རྨི་ལམ། ངག་ཏུ་སྒྱུ་མ་རྨི་ལམ་རྟག་ཏུ་རྗོད་གསུང་ངོ་།
།ཁྱིའུ་རབ་སྣང་གིས་ཞུས་པའི་མདོ་ལས། ཆོས་རྣམས་སྒྱུ་མ་རྨི་ལམ་ཞེས། །གང་གིས་ཚིག་རྗོད་དྲན་གྱུར་ན། །སྲིད་པའི་འཆིང་བ་ལས་གྲོལ་ནས། །ཚེ་འདི་ཉིད་དུ་སངས་རྒྱས་ངེས། །ཅེས་སོ།
།འདིའི་ལག་ལེན་ནི། ཚིག་གསལ་ལས། གཉིས་པ་དབང་པོ་འབྲིང་ལའང་གཉིས། རང་ལུས་སྣང་སྟོང་ལྷ་སྐུ། ཅིར་སྣང་སྒྱུ་མ་ལམ་ཁྱེར་རོ། །ཅེས་པས་དང་པོ་ནི། གནས་དབེན་པར་ཕྱིན་ལ་འཁོར་བའི་སྐྱེ་ཤས་བླ་མའི་རླལ་འབྱོར་གོང་བཞིན་སྒོམས་ནས། གསོལ་བ་བཏབ་པས་སྣང་བ་ཐམས་ཅད་བདེན་མེད་དུ་ཆམ་སོང་བ་དང་རང་བདེ་མཆོག་ལྷན་སྐྱེས་སུ་སྒོམས་ཏེ། དེ་ཉིད་གསལ་བའི་ངང་ལ་རང་བདེ་མཆོག་དུ་གསལ་བའི་སྐུ་མདོག་ཕྱག་མཚན་ལ་སོགས་པ་འདི་རྣམས་ང་རང་གི་བློས་བཀོད་པ་མ་གཏོགས་པ་ཕྱི་རོལ་ན་དོན་ལོགས་སུ་གྲུབ་པ་གཅིག་ཀྱང་མི་འདུག །འདི་སྣང་ནི་སྣང་། བདེན་ནི་མི་བདེན། རྨི་ལམ་ཡིན་སྒྱུ་མ་ཡིན་སྙམ་དུ་སྒོམ།
གཉིས་པ་ནི། དེ་བཞིན་དུ་ཕྱི་སྣོད་ཀྱི་འཇིག་རྟེན། ས་རྡོ། རི་བྲག །ནང་བཅུད་ཀྱི་སེམས་ཅན་སྐྱེས་པ་བུ་མེད། དགྲ་གཉེན་རྟ་བླང་པོ་ལ་སོགས་པ་སྣང་ཞིང་སྲིད་པས་སྡུས་པའི་ཆོས་ཐམས་ཅད་ང་རང་གི་བློས་བཀོད་པ་མ་གཏོགས་པ་ཕྱི་རོལ་ན་དོན་ལོགས་སུ་གྲུབ་པ་གཅིག་ཀྱང་མི་འདུག །འདི་སྣང་ནི་སྣང་། བདེན་ནི་མི་བདེན། འདི་ཀ་རྨི་ལམ་ཡིན། སྒྱུ་མ་ཡིན་སྙམ་དུ་རྩེ་གཅིག་ཏུ་ཉམས་སུ་བླང་གསུང་།
འདུན་པ་གསུམ་ནི། མདོར་ན་སྤྱོད་ལམ་རྣམ་བཞི་ཐམས་ཅད་དུ། དོ་ནུབ་འཆི། ནང་བར་འཆི། ཅིས་ཀྱང་ཅི་བྱེད་སྙམ་པ་དང་གཅིག །བླ་མའི་སྣང་བ་དང་མི་འབྲལ་བ་དང་གཉིས། ཁྱད་པར་དུ་འགྲོ་འཆག་ཉལ་འདུག་ཐམས་ཅད་དང་། ཟས་གོས། གཏམ་སྙན་མི་སྙན་ལ་སོགས་པ་ཆགས་སྡང་གི་ཡུལ་དང་ཕྲད་པའི་ཚེ་འདི་རྨི་ལམ་གྱི་ཆགས་སྡང་དུ་འདུག་སྙམ་པ་གསུམ་ཉམས་སུ་བླང་ངོ་། འདུན་པ་་་་་། ངག་ཏུ་ཡང་སྒྱུ་མ། རྨི་ལམ། སེམས་ཀྱིས་ཀྱང་སྒྱུ་མ་རྨི་ལམ་གྱི་རྩིས་ཟིན་པར་བྱས་པས་ཅི་བྱས་དགེ་སྦྱོར་དུ་འགྲོ་བ་ཡིན་གསུང་།
ཡེ་ཤེས་ཀྱི་མཁའ་འགྲོ་མའི་ཞལ་ནས། ཅིར་སྣང་སྒོམ་དུ་མ་ཤེས་ན། །གཉེན་པོ་སྟེན་གྱིས་ག་ལ་ལང་། །ཡུལ་ངན་ཡངས་པས་ག་ལ་སྤོངས། །སྒྱུ་མར་རྟོགས་པས་རང་སར་གྲོལ། །ཅེས་གསུངས།
ཡེ་ཤེས་རྒྱ་མཚོ་ལས། རང་ལུས་སྒྱུ་མའི་རྣམ་པར་རབ་ཤེས་པས། །འགྲོ་ཀུན་སྐྱེས་པ་བུད་མེད་སྣ་ཚོགས་པ། །ཐམས་ཅད་གཟུགས་ནི་སྒྱུ་མའི་རྣམ་པ་ལས། །མཁས་པ་སུ་དག་དེ་ལས་གཞན་དུ་རྗོད། །ཅེས་པས་སྣང་བ་ཐམས་ཅད་རང་གི་སེམས། སེམས་ལྷ་སྐུ། ལྷ་སྐུ་སྒྱུ་མ་ལྟ་བུ་སྟེ། དེ་ཡང་སྣང་བ་ཐམས་ཅད་རང་གི་སེམས་ལས་ལོགས་ན་མེད་པར་གོ་དགོས་ཏེ།
རྡོ་རྗེ་གུར་ལས། རིན་ཆེན་སེམས་ལས་ཕྱིར་གྱུར་པའི། །སངས་རྒྱས་མེད་ཅིང་སེམས་ཅན་མེད། །ཅེས་པ་དང་།
ལང་ཀར་གཤེགས་པ་ལས། བག་ཆགས་ཀྱིས་ནི་བཀྲུགས་པའི་སེམས། །དོན་དུ་སྣང་བ་རབ་ཏུ་འབྱུང་། །དོན་ཡོད་མ་ཡིན་སེམས་ཉིད་དེ། །ཕྱི་རོལ་དོན་མཐོང་ལོག་པ་ཡིན། ཞེས་པ་དང་།
སུམ་་་་་་་པ་ལས། དངོས་གཅིག་ཡིད་ལ་ཐ་དད་ཕྱིར། དོན་མ་གྲུབ་པར་འདོད་པ་ཡིན། །ཅེས་གསུངས།
དེ་ཡང་གག་པ་གཅིག་ཏུ་མི་ལ་ཆུ། ལྷ་ལ་བདུད་རྩི་ཡིད་དགས་ལ་རྣག་དུ་སྣང་བ་ལ་སོགས་པའི་རྒྱུ་མཚན་གྱིས་སྣང་བ་སེམས་ལས་ལོགས་ན་མེད་པར་ཤེས་པར་བྱའོ།༽
(W8LS36545 p.87 folio ?) དལ་གྱིས་འབབ་དང་བདུད་རྩིར་འགྱུར། ཅེས་སོ།
།ཡང་མདོ་གཞན་དང་བསྟུན་ན། སྣང་པ་མ་ངེས་པས་ཀྱང་རང་གི་སེམས་ཡིན་ཏེ། ཆུ་འགྲམ་གཅིག་དུ་འགྲོ་བ་རིགས་དྲུག་པོ་གྲལ་བྱས་ན། ལྷ་ལ་བདུད་རྩི། ལྷ་མ་ཡིན་ལ་གོ་མཚོན། མི་ལ་ཆུ། ཡི་དགས་ལ་སྣག་ཁྲག །དུད་འགྲོ་ལ་ཤ་ཁྲག །དམྱལ་བ་ལ་ཁྲོ་ཆུ་ཁོལ་མར་སྣང་སྟེ།
ལང་ཀར་གཤེགས་པ་ལས། དངོས་གཅིག་ཡིད་ནི་ཐ་དད་ཕྱིར། དོན་མ་གྲུབ་པར་འདོད་པ་ཡིན། ཅེས་དང་།
བག་ཆགས་ཀྱིས་ནི་དཀྲུགས་པའི་སེམས། །དོན་དུ་སྣང་པ་རབ་ཏུ་འབྱུང་། །དོན་ཡོད་མ་ཡིན་སེམས་ཉིད་དེ། །ཕྱི་རོལ་དོན་མཐོང་ལོག་པ་ཡིན། ཅེས་སོ།
།ཡང་ལྷའི་བུ་པད་མ་རྣམ་པར་རོལ་པས་ཞུས་པའི་མདོ་ལས། གསོལ་པ། འཕགས་པ། སྣང་པ་འདི་ཇི་ལྟར་ལྟ་བར་བགྱི། བཀའ་སྩལ་པ། ལྷའི་བུ་དག །སྣང་པ་འདི་མ་ངེས་པ། མི་བདེན་པ། བརྫུན་པ། རྨི་ལམ། སྒྱུ་མ་ལྟར་བལྟ་བར་བྱའོ།
།གསོལ་པ། སྣང་པ་མ་ངེས་པ་ནི་ཇི་ལྟར་་་་གས། བཀའ་སྩལ་པ། སྲིན་བྱ་དང་འུག་པའི་གཏམ་རྒྱུད་གསུངས། སྣང་པ་སྒྱུ་མ་རྨི་ལམ་དུ་ཇི་ལྟར་ལྟ་བར་བྱ་ཞུས་པས། ཡུལ་
(W8LS36545 p.88 folio ?)
དབུས་ཀྱི་རྒྱལ་པོ་དང་། ལྷོ་ཕྱོགས་ཀྱི་རྒྱལ་པོ་ཟླ་བའི་གཏམ་རྒྱུད་གསུངས།
དེ་ལྟར་ཆགས་སྡང་ལ་སོགས་པ་ཐམས་ཅད་ལ་གཉན་པོ་བརྟེན་ཅིང་བསྒོམ་པས། སྣང་བ་བདེན་མེད་སྒྱུ་མར་ཤར་ནས། གཡས་ནས་སྟོད་པ་དང་། གཡོན་ནས་སྨོད་པ་ལ་ཆགས་སྡང་རང་གྲོལ་ནས། སྒྱུ་ལུས་ཆགས་སྡང་རང་གྲོལ་འབྱུང་གསུངས་སོ།
།རྗེས་སྤྱོད་ལམ་ཐམས་ཅད་དུ་ཉམས་སུ་བླངས་པས། ནུབ་མོ་རྨི་ལམ་ཟིན། དེ་སྒྱུ་མར་ཤེས། སྒྱུ་མ་སྒྱུ་འཛིན་ཙམ་་་་དང་བྲལ་ནས། འོད་གསལ་ཕྱག་རྒྱ་ཆེན་པོ་ཇི་ལྟ་བ་བཞིན་དུ་མངོན་དུ་གྱུར་པ་དེ་ལ། དབང་པོ་འབྲིང་། ཚིག་གཞན་གྱིས་བར་མ་ཆོད་པར་འཁྲིད་པས། ལམ་ལྔ་ས་བཅུ་བགྲོད་པ་ཡིན་གསུང་ངོ་། །དེ་ལྟར་ཉམས་སུ་ལན་པ་ལ། ཚེ་བློས་མ་ཐོངས་ན། ཅི་བྱས་ཚེ་འདིའི་རྒྱན་དུ་འགྲོ་བས། ཚེ་འདི་བློས་ཐོངས་པའི་ཐབས། ཇོ་བོ་རྗེས། ལོ་ཚ་བ་རིན་ཆེན་བཟང་པོ། ཁ་རག་སྒོམ་པ། རྣལ་འབྱོར་ཆོས་འབྱུང་ལ་སོགས་པའི་ལོ་རྒྱུས་ཞིན་ཏུ་གསུངས་པ་ནི། སངས་རྒྱས་སྟོན་པའི་གསུང་ངོ་།
།དབང་པོ་རབ་འབྲིང་གཉིས་ལ་དགེ་སྦྱོར་མ་སྐྱེས་ན། བླ་མ་ལ་ཆོས་སྐུའི་འདུ་ཤེས་མ་སྐྱེས་མོས་གུས་མདུན་པ་ཆུང་པས། དབང་པོ་ཐ་མར་སོང་པ་ཡིན་པས།
གསུམ་པ་དབང་པོ་ཐ་མ་མལ་གཅིག་ཏུ་ཏིང་ངེ་འཛིན་བསྐྱེད་པ་ནི། སད་བཞིས་མ་ཁྱེར་བར་ཉམས་སུ་བླང་གསུང་ངོ་། །དེ་ཡང་སད་བཞི་ནི། འགྲོ་འདུག་མང་པོ་དགེ་སྦྱོར་གྱི་སད། འཕོས་སྐྱས་མང་པོ་དགེ་སྦྱོར་གྱི་སད། བློ་སྣ་མང་པོ་དགེ་སྦྱོར་གྱི་སད། ལོག་ལྟ་མང་པོ་དགེ་སྦྱོར་གྱི་སད་ཡིན་པས། དེ་རྣམས་སྤངས་ལ། བླ་མའི་རྣལ་འབྱོར་གོང་བཞིན་དུ་བསྒོམ་ལ།
ཐེམས་ཡིག་ལས། །སྒྱུ་ལུས་དབང་པོ་ཐ་མ་ལ། །གསོལ་འདེབས་གསུམ་ལ་འདུན་པ་གསུམ། །ཅེས་པས།
བདག་འཛིན་བློས་ཐོངས་པར། དགོས་མེད་རྒྱུད་ལ་སྐྱེ་བར། སྒྱུ་ལུས་རྨི་ལམ་འབྱོངས་པར་མཛད་དུ་གསོལ། །ཅེས་གསོལ་བ་བཏབ་ལ།
ཚིག་གསལ་ལས། འགྲོ་དྲུག་སྒྱུ་མར་འཆར་བྱེད། ནད་གདོན་སྒྱུ་མ་ལམ་ཁྱེར། འཆར་བྱེད་ཡོན་ཏན་ཚོགས་དྲུག །ཞེན་མེད་སྒྱུ་མ་རང་ཤར་རོ། །ཅེས་པས།
དོན་བཞིའི་དང་པོ་འགྲོ་དྲུག་སྒྱུ་མར་འཆར་བྱེད་ནི། རང་ཡི་དམ་དུ་བསྒོམས་པའི་ལྟེ་འོག་ཏུ་ཆོས་འབྱུང་ཕྱི་དཀར་ལ་ནང་དམར་བའི་དབུས་སུ། འགྲོ་དྲུག་གིས་སེམས་ཅན་དམྱལ་བ་ཚ་གྲངས་ལ་སོགས་པ་ཐམས་ཅད་འོད་དུ་ལྟེམ་ལྟེམ་བསམས་ལ་འོག་རླུང་དྲག་ཏུ་སྐུམ། བདག་གིས་གཙོ་བྱས་པའི་འགྲོ་དྲུག་གི་སེམས་ཅན་འདི་རྣམས། མི་བདེན་པ་ལ་བདེན་པར་བཟུང་པས། འཁོར་བ་འབའ་ཞིག་ཏུ་འཁྱམས་པ་སྙིང་རེ་རྗེ། འདི་རྣམས་ཐམས་ཅད་སྣང་ནི་སྣང་། བདེན་ནི་མི་བདེན། རྨི་ལམ་སྒྱུ་མ་ཡིན་ལང་སྙམ་དུ་དྲན་འདུན་དྲག་པོ་དང་། བླ་མའི་མོས་གུས་གཉིས་རྩེ་གཅིག་ཏུ་ཉམས་སུ་བླང་ངོ་། །དེས་སྒྱུ་མ་དང་རང་ཤར་མི་འབྱུང་མི་སྲིད་དོ།
།གཉིས་པ་ནད་གདོན་སྒྱུ་མ་ལམ་ཁྱེར་ནི། ནད་ལྟ་བུ་ལ་ནད་ཀྱི་ངོ་བོ་བླ་མར་བསྒོམ། ནད་དང་བླ་མ་དབྱེར་མེད་བདེན་མེད་སྒྱུ་མར་བསྒོམ། གདོན་ལ་གང་གནོད་པ་དེ་སྣ་བུག་གཡས་ནས་ལྕེའི་འོག་གི་ཆོས་འབྱུང་ནང་དུ་བཅུག་ལ། ཆོས་འབྱུང་ཁ་སྡུས་ལ། དཀྲུག་འཁོར་བྱ། གསོལ་བ་བདབ། གདོན་སྒྱུ་མར་སྒོམ་ལ། གནོད་བྱེད་དེས་འགྲོ་དྲུག་གི་སྡུག་བསྔལ་ཉམས་སུ་མྱོང་ཞིང་། དྲན་པས་འགྱོད་པ་སྐྱེས། གནོད་སེམས་ཞི་ནས་མདུན་དུ་དོན་པ་ལ། ཆུ་གཏོར་དང་ལན་ཆགས་ཀྱི་གཏོར་མ་མཏང་ལ། མི་དམིགས་པར་བྱའོ།
།གསུམ་པ་འཆར་བྱེད་ཡོན་ཏན་ཚོགས་དྲུག་ནི། ལྟེ་འོག་ཆོས་འབྱུང་གི་ནང་དུ། འགྲོ་དྲུག་གི་སེམས་ཅན་སྒོམ་ལ། འོག་རླུང་བསྐུམ་ལ་འདུན་པ་རྩེ་གཅིག་ཏུ་བཏང་པས་དྲོད་སྐྱེ་བ་ཐིག་ལེ་རང་ཐུབ་པ། རྨི་ལམ་འབྱོངས་པ། འགྲོ་དྲུག་གིས་ཡུལ་སྣང་སེམས་ཅན་གྱིས་སྨིན་གྲོལ། སྒྱུ་མ་རང་ཤར། རྨི་ལམ་རང་ཟིན་དང་། ཡོན་ཏན་དྲུག་འཆར་རོ།
།བཞི་པ་ཞེན་མེད་སྒྱུ་མ་རང་ཤར་ནི། མཉམ་བཞག་གོང་བཞིན་བྱས་ལ། རྗེས་སྤྱོད་ལམ་ཐམས་ཅད་སྒྱུ་མ་རྨི་ལམ་དུ་ཁྱེར་ནས། ཅིར་སྣང་ཐམས་ཅད་བདེན་མེད་སྒྱུ་མ་རང་ཤར་ནས་ཆགས་སྡང་ཐམས་ཅད་རང་གྲོལ་དུ་འཆར་རོ།
(W22103: scv9p718)
།གཉིས་པ་རྨི་ལམ་ལ།
རྡོ་རྗེ་ཚིག་རྐང་ལས། །གང་གིས་བསམས་པ་ཡོང་སྤངས་ནས། །རྨི་ལམ་འདུན་པའི་གནད་ལ་འབྲལ་མེད་བྱ། །ཉིང་འཁྲུལ་རང་དག་སྒྱུ་མ་ལམ་རིམ་གྱིས། །ཡོན་ཏན་ཉིན་མཚན་དུས་སུ་རང་ཤར་འབྱུང་།
རྨི་ལམ་བཟུང་པ། སྦྱངས་པ། སྤེལ་བ། སྤྲུལ་བ། བསྒྱུར་བ། ཡུལ་སྣང་ངོ། ཞེས་དང་།
ཚིག་གསལ་དུ། རྨི་ལམ་བཟུང་པ་ཅེས་སོགས་ཆོས་དྲུག་ལས།
དང་པོ་བཟུང་པ་ལ། གཉིས་ཀྱི་དང་པོ་རང་ཟིན་ནི། མཚན་མོ་མལ་བདེ་བར་ལུས་ཡི་དམ་དུ་བསྐྱེད་པའི་སྤྱི་བོར། བླ་མ་བསྒོམས་ལ་གསོལ་བ་གདབ་པ་ནི།
ཐེམས་ཡིག་ལས། །རྨི་ལམ་འཛིན་པར་བྱེད་པ་ལ། །གསོལ་འདེབས་གསུམ་ལ་འདུན་པ་གསུམ། ཅེས་པས།
བདག་འཛིན། དགོས་མེད། སྒྱུ་ལུས། རྨི་ལམ་ཟིན་པར་མཛད་དུ་གསོལ། ཅེས་གསོལ་བ་བཏབ་ལ། སྤྱི་བོའི་ཧཾ་ལས་ཐིག་ལེ་དཀར་པོ་ཆད། སྙིང་ཁར་བྱུང་པས་གཏི་མུག་དག །གསང་གནས་ཀྱི་ཨ་ལས། ཐིག་ལེ་དམར་པོ་ཆད། སྙིང་ཁར་བྱུང་པས་འདོད་ཆགས་༼ཐིག་ལེ་གཉིས་་་་་་་༽དག་ཞེ་སྡངས་དག་པ་ཡིན་གསུངས། ཐིག་ལེ་གཉིས་པོ་སྒོ་་་་་འཁོར་བས་བུམ་དབང་། རེག་པས་གཉིས་པ་གསང་དབང་། རེག་པས་བདེ་བ་བྱུང་བ་གསུམ་པ། གཅིག་ལ་གཅིག་ཐིམས་པས་འོད་དུ་ཡལ་བ་ལ་སོང་པ་དེ་དབང་བཞི་པ་ཡིན་ནོ། །ཉིན་མོ་འཁོར་བཞི་ལ་དམིགས་ལ་རྨི་ལམ་སྒྱུ་མའི་དྲན་འདུན་དྲག་པོ་རྩེ་གཅིག་ཏུ་བྱ་ནུབ་མོ་གཉིད་དུ་འགྲོ་ཁར་ཐིག་ལེ་གཉིས་གཅིག་ལ་གཅིག་ཐིམས་ནས་ཐར་འོད་དུ་གསལ་བ་མི་རྟོག་པ་ལ་བཞག་ལ་རྨི་ལམ་བཟུང་ངོ་། །ཟིན་པའི་རྟགས་རྨི་ལམ་དུ་འདུག་སྙམས་པ་དང་། གཉིད་ཐུམ་ཕྲས་མང་པོ་འབྱུང་ངོ་། །དེས་མཚན་མོ་རྨི་ལམ་རང་ཟིན་མི་འབྱུང་མི་སྲིད་པའི་གནད། དེས་ཀྱང་མ་ཟིན་ན།
གཉིས་པ་སྤྱི་གནད་འཆུག་པ་མེད་པའི་གནད་དགུ་ལ། དུས་ཀྱི་གནད་གསུམ་ནི། ཐོ་རངས་ནམ་ལངས། ཉི་མ་རྩེ་ཤར་རོ། །ལུས་ཀྱི་གནད་གསུམ་ནི། དཀྱིལ་དཀྲུངས་ཙོག་པུ། སེང་གེའི་ཉལ་སྟབས་གསུམ་མོ། །དམིགས་པའི་གནད་གསུམ་གྱི་དང་པོ། རྟོག་མེད་ལ་འཛིན་པ་གཉིས་ཀྱི་དང་པོ་ནི། གསོལ་བ་འདེབས་གོང་ལྟར་བཏབ་ལ། སྟེང་རླུང་ཐིག་ལེ་དཀར་བ་དང་འགྲོགས། འོག་རླུང་ཐིག་ལེ་དམར་པོ་དང་འགྲོགས་། སྙིང་ཁར་འཁོར་བ་ལ་རླུང་ཁ་སྦྱོར། སྒྱུ་མ་རྨི་ལམ་གྱི་དྲན་འདུན། དྲག་པོ་རྩེ་གཅིག་ཏུ་བྱ། གཉིད་དུ་འགྲོ་ཁར་ཐིག་ལེ་དཀར་པོ་སྣ་བུག་གཡས་ནས་འཐོན། དམར་པོ་གཡོན་ནས་འཐོན། སྨིན་ཕྲག་ཏུ་འཁོར་བ་ལ། དྲན་བདུན་བྱ། དེ་ནས་དེ་གཉིས་བདེ་མཆོག་ཡབ་ཡུམ་དུ་སྐྱེད་གྱུར། མདུན་དུ་གསལ་བ་ལོ་དམིགས་པ་དྲན་འདུན་དྲག་བྱ། དེ་ནས་ཡུམ་ཡབ་ལ། ཡབ་འོད་དུ་ཡལ་སོང་པ་མི་རྟོག་པའི་ངང་ལ་རྨི་ལམ་བཟུང་ངོ་། དེས་ཀྱང་མ་ཟིན་ན།
རྟོག་མེད་ལ་བཟུང་པ་གཉིས་པ་ནི། རང་བདེ་མཆོག་ཏུ་སྐྱེར་པའི་ཐུགས་ཁར་བླ་མ། དེའི་ཐུགས་ཁར་ཧཱུྃ་དཀར་པོ་གཅིག་བསམ་ནས། གསོལ་བ་བཏབ་པས། ཧཱུྃ་གིས་བླ་མ་གསལ། བླ་མས་ཡི་དམ་གསལ་བ་ལ་དམིགས་པ་རྟོག་མེད་འདུན་པ་རྩེ་གཅིག་ཏུ་གཏང་ངོ་། གཉིས་དུ་འགྲོ་ཁར། བདེ་མཆོག་བླ་མ་ལ་ཐིམས། བླ་མ་ཧཱུྃ་ལ་ཐིམས། ཧཱུྃ་འོད་དུ་ཡལ་བ་མི་རྟོག་པའི་ངང་ལ་རྨི་ལམ་བཟུང་ངོ་།
།གསུམ་པ་རྟོག་བཅས་ལམ་དུ་ཁྱེར་བ་ནི།
ཡེ་ཤེས་རྒྱ་མཚོ་ལས། འགྲོ་བ་ཀུན་གྱིས་མགྲིན་པར་སྐྱེས། ཡི་གེ་ཨ་བཅས་གནས་པ་ཉི། །ཅེས་གསུངས་པས། རྨི་ལམ་གྱིས་གནས་མགྲིན་པ་རྒྱུའི་ཡི་གེ་ཨཾ། རྨི་ལམ་ཟིན་པར་བྱེད་པའི་རྒྱུ་གཉིད་དང་རྨི་ལམ་གྱི་བར་གྱི་རྟོག་པ་ཡིན་པས། གོང་གི་དམིགས་པ་ལ་སེམས་གཏད་ནས། རྟོག་མེད་ཀྱི་ངང་དུ་གཉིད་ལོག་པས། གཉིད་དུ་མ་སོང་པའི་རྟོག་པ་འགགས་རྨི་ལམ་རགས་པ་མ་ཤར་བའི་བར་དེར། མེའམ་ཆུ་ལ་སོགས་པའི་རྟོག་པ་ཧྲིབ་བྱུང་པའི་དུས་སུ་དེ་རྨི་ལམ་དུ་ངོས་ཟིན་པར་བྱས་ལ། མིག་མི་འབྱེད་པར་འོག་རླུང་བསྐུམ་ལ། གང་ཟིན་དཔག་ཏུ་མེད་པར་སྤྲུལ་ལོ། །དེས་རྨི་ལམ་་་་་རྨིས་པ་ཟིན། ཟིན་ཚད་སྦྱོང་སྤེལ་འབྱུང་གསུང་ངོ་།
།རིན་ཆེན་རྨོག་ལྕོག་པའི་ཞལ་ནས། རྨི་ལམ་ཉམས་སུ་ལེན་པ་ལ་རི་དགས་རླུངས་སུ་ཕེབས་པ་འདྲ་བ་གཅིག་དགོས། བདེ་བའི་སྣ་སྡུག་བསྔལ་གྱིས་་་་་པ་ཞི་་་་པའི་སོ་ནམ་འདྲ་བ་གཅིག་དགོས་གསུངས་སོ།
།ཡང་རྨི་ལམ་ལོ་ན་ལ་འཇུག་པ་ནི། མཁྲོ་མ་སྡེ་ལྔའི་ལུང་པར་སླེབ་པ་དང་འདྲ། དབང་པོ་བརྒྱ་བྱིན་གྱིས་ཚིག་དང་འདྲ་གསུང་ངོ་།
ཐེམས་ཡིག་ལས། །རྨི་ལམ་སྦྱངས་པའི་ཆོས་བཞི་ལ། །གསོལ་འདེབས་བཞི་ལ་བདུན་པ་བཞི། ཅེས་པས།
༼གཉིས་པ་༽སྦྱངས་པ་ལ་བཞི་ལས།
དང་པོ་ལུས་ཀྱིས་སེམས་སྦྱངས་པ་ནི། འོག་ན་ཕྱམ་ཆེན་པོ་ཡོད་པའི་སྟེང་དུ་ལུས་གནད་བཅས་ལ། ༼་་་་་་་་་་་་་་་་་་༽ བླ་མའི་རྣལ་འབྱོར་དང་ལྡན་པས། རྨི་ལམ་འབྱོངས་པ་ལ་སོགས་པའི་གསོལ་བ་བཏབ་ལ། ཕྱམ་ཆེན་པོ་དེའི་མདའ་གང་ཙམ་གྱི་ནམ་མཁའ་ལ། རང་གིས་ལུས་བདེ་མཆོག་དུ་བསྒོམ་པས་ཡ་ང་ཏིང་གིས་བྱུང་་་་་་། བདེ་མཆོག་འདི་་་་་ངའི་ལུས་ངའི་ལུས་འདི་ཁོ་ན་བདེ་མཆོག་ཡིན་སྙམས་དུ་བསམས་ནས། བདེ་མཆོག་དེ་ས་ལ་་་་་་ཀྱི་ལྷུང་། འོད་དུ་་་་་་་་་་་་་་་དང་། སྒྱུ་མ་རྨི་ལམ་གྱི་དྲན་འདུན་དྲག་ཏུ་བྱའོ།
།དེ་ཁོ་ན་ལྟར་ཡང་ནས་ཡང་དུ་རྩེ་གཅིག་ཏུ་བསྒོམས། དེ་སྔོ་ཡལ་གྱིས་ལུས་སྟོང་སངས་ཀྱིས་སོང་པར་བསམ་ནས། གསལ་སྟོང་འཛིན་མེད་སྒྱུ་མ་རང་ཤར་གྱིས་ངང་ལ་བཞག་གོ
།གཉིས་པ་སེམས་ཀྱི་ལུས་སྦྱངས་པ་ནི། གསོལ་འདེབས་བླ་མའི་རྣལ་འབྱོར་སྔར་བཞིན་བྱས་ལ། རང་གི་ལུས་ཀྱི་བུ་ག་རྣམས་སུ་ཧཱུྃ་སྔོན་པོ་བྱེད་ནུབ་རེ་བསྒོམས་པའི་འོད་ཟེར་སྔོན་པོ་ལུས་ཀྱི་ནང་དུ་སོང་པས། རང་གི་ལུས་སྔོ་མེར་གིས་གང་པས། ལུས་སྟེང་སང་ཀྱི་་་་་ང་པར་བསམས་ལ། གསལ་སྟོང་འཛིན་མེད་ཀྱི་ངང་ལ་བཞག་གོ
།གསུམ་པ་བདག་མེད་མས་སྦྱང་བ་ནི། གསོལ་འདེབས་བླ་མའི་རྣལ་འབྱོར་དང་འདྲ་བ་ལ། རང་གི་འདུན་དུ་བདག་མེད་མ་སྔོན་མོ་གྲི་ཐོད་ཅན་གྱི་གསང་གནས་སུ། ༼པད་མ་དམར་་་་་་་་་་་་་་་་་་་་་་་་་་་་་༽ ཨོཾ་ཨཱ་སྭ་ཧཱ། ཁ་དོག་སྔོན་པོ་དམིགས་ལ། བཟླས་པ་བྱས་པས་སྔགས་ལས་འོད་ཟེར་སྔོན་པོ་བྱུང་ནས་རང་གི་གསང་གནས་པར་སོང་པར་བསམ་ལ་དྲན་འདུན་དྲག་པོ་བྱའོ། །བདག་མེད་མ་འོད་དུ་ཞུ་བས་རང་གི་གསང་ན་ཡར་བྱུང་པས་ལུས་སྔོ་ཡལ་ལ་སྟོང་པ་སོང་སྟེ། གསལ་སྟོང་འཛིན་མེད་ཀྱི་སྒྱུ་མ་རང་ཤར་ལ་བཞག་གོ
།བཞི་པ་བདུན་པས་སྦྱངས་བ་ནི། བླ་མའི་རྣལ་འབྱོར་བསྒོམས་ནས། གསོལ་བ་ཡུན་ལ་་་་་དྲག་པ་བཏབ་པས། སྣང་པ་བདེན་མེད་དུ་ཕྱམ་སོང་པ་དང་། ང་གཉིད་དུ་སོང་འདུག ངའི་རྣམ་སྨིན་གྱིས་ལུས་ན་ཚ་སྡུག་བསྔལ་བསྐྱེད་པ་དེ་མལ་ན་ཡོད་པ་ཡིན། འདི་ཡིད་ཀྱིས་ལུས་སུ་འདག །སྣང་པ་འདི་ཐམས་ཅད་རྨི་ལམ་གྱི་སྣང་པར་འདུག །རྨི་ལམ་གྱི་ཡིད་ཀྱི་ལུས་ལ་ཇི་ལྟར་སྦྱངས་སྦྱང་ཡིན་སྙམས་དུ་བསམ་ནས། འབྱུང་བཞི་ཕྲ་རགས་དང་སེམས་ཅན་ཕྲ་རགས་ཐམས་ཅད་ལས་ཕར་ཐལ་ཚུར་ཐལ་སྦྱང་ངོ་། ཁྱད་པར་དུ་རགས་པ་དང་། ཕྲ་བ་ལ་སྦྱངས་པ་གལ་ཆེ་གསུང་ངོ་།
ཐེམས་ཡིག་ལས། །རྨི་ལམ་སྤེལ་བའི་ཆོས་དྲུག་ལ། །གསོལ་འདེབས་བཞི་ལ་འདུན་པ་དྲུག །རྨི་ལམ་སྤྲུལ་པའི་ཆོས་དྲུག་ལ། །གསོལ་འདེབས་འདུན་པ་དེ་བཞིན་ནོ། །ཅེས་པས།
གསུམ་པ་སྤེལ་བ་ལ་གཉིས། ཐུག་ཕྲད་དུ་སྤེལ་བ་དང་། གང་འདུལ་དུ་སྤེལ་བའོ།
།དང་པོ་ཐུག་ཕྲད་དུ་སྤེལ་བ་ལ་གཉིས་སྟེ། སེམས་ཅན་ཕྲ་བ་དང་། རགས་པ་ལ་སྤེལ་བ་ནི། བདག་འཛིན། དགོས་མེད། སྒྱུ་ལུས་རྨི་ལམ་འབྱོངས་པར་བྱིན་གྱིས་རླབ་དུ་གསོལ། ཞེས་གསོལ་བ་བཏབ་པས། སྣང་པ་བདེན་མེད་དུ་སོང་པ་དང་། ང་གཉིད་དུ་སོང་འདུག །ཡིད་ལུས་དང་རྨི་ལམ་གྱི་སྣང་པ་ལ་ཇི་ལྟར་སྤེལ་སྤེལ་ཡིན་སྙམ་དུ་བསམས་ནས། སེམས་ཅན་ཕྲ་རགས་གཅིག་ལས་བཅུ་བཅུ་བརྒྱ་་སྟོང་ལ་སོགས་པ། ས་གཞི་དང་བར་སྣང་ཁེངས་པར་བསམས་ཞིང་། སྤེལ་ལོ།
།གཉིས་པ་འབྱུང་བཞི་ཕྲ་རགས་ལ་ཡང་དེ་བཞིན་ནོ།
།གཉིས་པ་གང་འདུལ་དུ་སྤེལ་བ་ལ་གཉིས་ཀྱི།
དང་པོ་འཇིག་རྟེན་པའི་གང་འདུལ་ interrupted