Sems 'chi med kyi 'grel pa zung 'jug gsal ba

Resource ID	SCv10p99
Title	sems 'chi med kyi 'grel pa zung 'jug gsal ba
Topics	Immortality
Sub-Topics	Commentary
Author	Sangyé Pelsang

༄༅། །སེམས་འཆི་མེད་ཀྱི་འགྲེལ་པ་ཟུང་འཇུག་གསལ་བ་བཞུགས་སོ།།
༄༅། །མཉམ་མེད་ཆེན་པོ་སངས་རྒྱས་དཔལ་བཟང་པོའི་ཞལ་མངའ་ནས་མཛད་པ་ལགས་སོ།།

འཆི་མེད་ཡེ་ཤེས་ཆེན་པོའི་ཁྲིད་ཡིག་ཟུང་འཇུག་གསལ་བ་ཞེས་བྱ་བ།
འཇམ་དཔལ་དབྱངས་ལ་ཕྱག་འཚལ་ལོ།
།སྐྱེ་དང་འཆི་བའི་རྒུད་པ་ལས་སྒྲོལ་ཞིང་། །ཡེ་ཤེས་སྒྱུ་མ་རྟག་པའི་སྐུ་བརྙེས་པ། །ཁྱབ་བདག་བླ་མའི་ཞབས་ལ་གུས་བཏུད་ནས། །འཆི་མེད་ཁྲིད་ཀྱི་རིམ་པ་འདིར་བཤད་བྱ། །འདིར་རིགས་དྲུག་པ་རྡོ་རྗེ་འཆང་ཆེན་གྱིས། ཡེ་ཤེས་ཀྱི་མཁའ་འགྲོ་ནཻ་གུ་མ་ལ་གསུངས་པའི་འཆི་མེད་ཡེ་ཤེས་ཆེན་པོའི་ཁྲིད་སྟོན་པར་བྱེད་པ་ལ། མཚན་གྱི་དོན་དང་། མཚན་ཅན་གཞུང་གི་དོན་གཉིས་ལས།
༡ དང་པོ་ལ་མཚན་བསྒྱུར་བ་དང་། བཤད་པ་གཉིས་ལས།
༡༡ དང་པོ་ནི་རྒྱ་གར་གྱིས་སཾ་སྐྲྀ་ཏའི་སྐད་དུ། ཤྲཱི་ཨ་མ་ར་ཛྙཱ་ན་མ་ཧཱ་ན་མ། ཞེས་པ་བོད་ཀྱི་སྐད་དུ་བསྒྱུར་ན། དཔལ་འཆི་མེད་ཡེ་ཤེས་ཆེན་པོ་ཞེས་བྱ་བའོ།
༡༢ །གཉིས་པ་ནི། དེ་ལྟ་བུའི་གནས་ལུགས་ཀྱི་འཆི་མེད་དེ་ནི། སྐྱེ་འཇིག་དང་འགྱུར་བའི་སྒྲིབ་པས་མ་གོས་པས་འཆི་མེད། ཐབས་ཤེས་གཉིས་སུ་མེད་པའི་འོད་གསལ་གྱི་སྐུ་ཡིན་པས་ཡེ་ཤེས། དེའི་གོང་ན་གཞན་མེད་པས་ཆེན་པོའོ།
།མཚན་ཐོག་མར་སྨོས་པ་ནི། དོན་རགས་པ་རྟོགས་པར་བྱེད་པ་དང་། དཔེ་བཙལ་སླ་བའང་ཡིན་ནོ།
།དཔལ་འཆི་མེད་ཡེ་ཤེས་ཆེན་པོ་ལ་ཕྱག་འཚལ་ལོ། །ཞེས་པ་ནི། ལོ་ཙཱ་བས་འགྱུར་མཐར་ཕྱིན་པའི་དོན་དུ་ཕྱག་བྱས་སོ།
༢ །གཉིས་པ་ནི། སེམས་ཅན་ཐམས་ཅད་ཀྱང་གནས་ལུགས་ལ་སྐུ་གསུམ་རང་ཆས་སུ་ཡོད་པ་དེ། འཁྲུལ་པའི་དྲི་མས་སྒྲིབས་ནས་མི་གསལ་ཞིང་མ་རིག་པས་འཁོར་བར་འཁྱམས་པ་ལ། ལམ་ཟབ་མོ་འདི་བསྒོམས་པས་འཁྲུལ་པའི་དྲི་མ་སངས་ནས། སྐུ་གསུམ་བདེ་བ་ཆེན་པོ་མངོན་དུ་འགྱུར་བ་ཡིན་ཏེ།
ཁྱུང་པོས་མཛད་པའི་གཞི་ལམ་འབྲས་གསུམ་ལས། །གཞི་སྐུ་གསུམ་རང་གནས། ལམ་སྐུ་གསུམ་ལམ་ཁྱེར། འབྲས་བུ་སྐུ་གསུམ་མངོན་དུ་གྱུར། ཞེས་གསུངས་པའི་དོན་ནོ།
།དེའི་དོན་སྟོན་པར་བྱེད་པ་ལ་གསུམ། ལམ་དེ་གང་ལས་ཐོས་པ། འཆད་ཉན་གྱི་དོན་ངེས་པར་བྱེད་ཚུལ། ཉམས་ལེན་གྱི་དོན་རྟོགས་པར་བྱེད་པའོ།
༡ །དང་པོ་ནི། རྒྱལ་བ་ལོངས་སྐུ་རྡོ་རྗེ་འཆང་ཆེན་གྱི། །འཆི་མེད་ཡེ་ཤེས་རང་སྒྲ་འདི་སྐད་ཐོས། །ཞེས་གསུངས་པ་ནི།
ཆོས་སྐུའི་ངོ་བོ། ལོངས་སྐུའི་རྣམ་པ། སྤྲུལ་སྐུའི་ཕྲིལ་ལས་ཅན་རྡོ་རྗེ་འཆང་ཆེན་དེའི་གསུང་རྣམ་པ་ཐམས་ཅད་པ་གཞོམ་དུ་མེད་པས། འཆི་མེད་ཡེ་ཤེས་ཀྱི་རང་སྒྲ་སྟེ། བཅོས་མ་མ་ཡིན་པ་འདི་སྐད་དུ། ནཻ་གུ་མ་བདག་གིས་ཐོས་ཞེས་པའོ།
༢ །གཉིས་པ་འཆད་ཉན་གྱི་དོན་ངེས་པར་བྱེད་ཚུལ་ལ་གཉིས་ལས།
༢༡ དང་པོ་ཉན་པ་པོ་སློབ་མའི་མཚན་ཉིད་ནི། །གང་ཞིག་དད་ལྡན་དབང་ཐོབ་དམ་ཚིག་ཅན། །ཞེས་གསུངས་ཏེ།
སློབ་མ་མི་ཕྱེད་པའི་དད་པ་ལྡན་པས། དཔལ་རྒྱུད་སྡེ་ཆེན་པོ་ལྔའི་རྡུལ་ཚོན་གྱི་དཀྱིལ་འཁོར་དུ་སྨིན་བྱེད་ཀྱི་དབང་དང་། དེའི་དགོས་ཀྱི་བྱིན་རླབས་ཀྱང་ཐོབ། དམ་ཚིག་རྣམས་དང་ལྡན་ལ། ཆོས་དྲུག་དང་། ལམ་ཁྱེར་གསུམ་དང་། གའུ་མའི་ལམ་རྣམས་བསྒོམ་པ་སྔོན་དུ་སོང་བ་ཅན་ནོ།
༢༢ །གཉིས་པ་སྟོན་པ་པོ་བླ་མ་མཆོག་ལ་བརྟེན་ནས་རྟོགས་ཚུལ་ནི། བླ་མ་མཆོག་བརྟེན་འདི་དོན་རྟོགས་པར་གྱིས། །ཞེས་གསུངས་ཏེ།
བླ་མ་མཆོག་ནི་དབང་ཐོབ་དམ་ཚིག་ལྡན་རྒྱུད་ཤེས་མན་ངག་དང་ལྡན་པས། སློབ་མའི་རྒྱུད་ལ་ཚིག་དང་ཉམས་མྱོང་གི་རིམ་པ་རྟོགས་སླ་བའི་བརྡའ་སྤྲོད་པར་བྱེད་ཅིང་རྟེན་དེ་རྟོགས་པར་གྱིས་ཞེས་པའོ།
༣ །གསུམ་པ་ཉམས་ལེན་གྱི་དོན་རྟོགས་པར་བྱེད་པ་ལ། སྔོན་འགྲོ་དང་། དངོས་གཞི་དང་། རྗེས་ཀྱི་ཆོས་གསུམ་ལས།
༣༡ དང་པོ་ལ་གཉིས་ལས།
༣༡༡ ཐུན་མོང་གི་སྔོན་འགྲོ་ནི། གང་ཞིག་ཚེ་འདིར་བློས་བཏང་ནས། །རྩེ་གཅིག་ཞག་བདུན་ལོ་ཟླ་ཡི། །ཇི་ལྟར་ཉོན་མོངས་ལུས་དག་ལ། །ཡེ་ཤེས་ལུས་འདི་རང་དགར་འབྱུང་། །ཞེས་གསུངས་ཏེ།
འདི་བསྒོམ་པའི་སྐྱེས་བུ་སྙིང་སྟོབས་དང་ལྡན་པ་དེས། གནས་དབན་པར་འདུག་ནས་འདི་ལྟར་བསམ་པར་བྱ་སྟེ། །བདག་གིས་མི་ལུས་ཁྱད་པར་ཅན་ཞིག་སྔོན་བསོད་ནམས་རྒྱ་ཆེར་བསགས་ཤིང་ཚུལ་ཁྲིམས་བསྲུངས་པའི་མཐུས་ཐོབ་འདུག་པ། འདི་དུས་སྙིགས་མ་ལྔས་བསྣུན་པས་ནམ་འཆི་ཆ་མེད་དུ་འདུག་པས། ཤི་ན་ཅུགས་བྱེད་སྙམ་དུ་ཡང་ཡང་བསམ། ཤི་ནས་མེད་འགྲོ་ན་ལྟ་དྲག་སྟེ། མེད་མི་འགྲོ་སྐྱེ་བ་ལེན་དགོས། སྐྱེ་བ་མཐོ་དམན་དགེ་སྡིག་ལ་རག་ལུས་འདུག་ནའང་། གོམས་པའི་དབང་གིས་དགེ་བ་ནི་མ་སྒྲུབས། སྡིག་པ་ནི་ཞོར་ལའང་བསགས་པས་སྐྱེ་བ་ངན་འགྲོ་ལས་མ་འདས་པ་འདུག །ད་ཅུག་བྱེད་སྙམ་དུ་ཡང་ཡང་བསམ། དམྱལ་བ་ན་ཚ་གྲང་། ཡི་དྭགས་ན་བཀྲེས་སྐོམ། དུད་འགྲོ་ན་བཀོལ་སྤྱད་ཀྱི་སྡུག་བསྔལ་དོས་དྲག་ལ་རྒྱུན་རིང་བ་ཡོད་དོ།
།ད་ལྟ་ནི་མེ་སྟག་སྤར་མ་རེ་ཕོག་པ་དང་། གོས་ཧྲུལ་གྱི་སྲུབས་ཀྱི་རླུང་དང་། ཉིན་རེའི་ལྟོ་འགྱངས་པ་དང་། རང་རེ་གཞན་གྱིས་མནར་བ་ལ་བསམ་ནའང་བཟོད་ཐབས་མེད། ཅི་དྲག་སྙམ་དུ་ཡང་ཡང་བསམ། དེར་མ་ཟད་བདེ་འགྲོ་ནའང་། མི་ལ་སྐྱེ་འཆི། ལྷ་མིན་ལ་འཐབ་རྩོད། ལྷ་ལ་གནད་གཅོད་འཆི་འཕོ། ཁམས་གོང་མར་ཁྱབ་པ་འདུ་བྱེད་ཀྱི་སྡུག་བསྔལ་ཡོད་ཅིང་སྐྱིད་མེད་པས། ད་འཁོར་བ་འདི་ལས་ཅི་ཐར་གཅིག་བྱེད་དགོས་ཏེ། དེ་ལ་ཐབས་ཟབ་མོ་འཆི་མེད་ཀྱི་ལམ་འདིས། རབ་ཞག་བདུན། འབྲིང་ཟླ་བ་བཞི། ཐ་མ་འང་ལོ་གཅིག་ཏུ་བསྒོམས་ན་རྣམ་སྨིན་གྱི་ལུས་འདི་ལས། ཡེ་ཤེས་ཀྱི་ལུས་རང་དགར་འབྱུང་བར་གསུངས་འདུག་ནའང་། བདག་སྡིག་སྒྲིབ་ཆེས་བས། ཚེ་ཐུང་འདིས་ཅི་ཐུབ་དུ་འབད་དགོས་སྙམ་དུ་ཡང་ཡང་བསམ་མོ།
༣༡༢ །གཉིས་པ་ཐུན་མོང་མ་ཡིན་པའི་སྔོན་འགྲོ་ནི། །ཚད་མེད་སེམས་བསྐྱེད་སྔོན་འགྲོ་བས། ཅེས་གསུངས་པས།
ད་ནི་སྐྱབས་བཟང་པོ་གཅིག་འཚོལ་དགོས། རྗེ་དཔོན་དང་ལྷ་འདྲི་ནི་ང་རང་དང་འདྲ། ཕྱི་མར་མི་ཕན་པའི་སྟེང་དུ་སྡིག་པ་ལ་སྦྱོར་བར་འདུག་པས། བསླུ་མེད་ཀྱི་སྐྱབས་དཀོན་མཆོག་གསུམ་མན་པ་རེ་ས་མེད། བློ་གཏད་ཐུབ་པ་ཁྱེད་ལས་མེད་པས། སྐྱིད་རུང་སྡུག་རུང་ཁྱེད་མཁྱེན་སྙམ་དུ་ཐུན་བཞིར་སྐྱབས་འགྲོ་བརྒྱ་རྩ་སོགས་བྱའོ།
།ང་གཅིག་པུར་མ་ཟད་སེམས་ཅན་ཐམས་ཅད་ངའི་ཕ་མ་ཡང་ཡང་བྱས་པའི་དྲིན་ཆེན་ཁོ་ནར་འདུག་ཀྱང་། སྔར་གྱི་སྡུག་བསྔལ་རྣམས་ཀྱིས་ཉམས་ཐག་འདུག་པ་སྙིང་རེ་རྗེ་སྙམ་དུ་ཡང་ཡང་བསམ། འདི་པ་ལའང་ངས་སངས་རྒྱས་གཅིག་ཐོབ་ནས་གདོད་ཕན་བདེ་རྒྱ་ཆེན་སྟེར་བས། འདི་རྣམས་ཀྱི་དོན་དུ་སངས་རྒྱས་བསྒྲུབ་སྙམ་དུ་བསམས་ལ། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། ཅེས་སོགས་ཀྱི་སེམས་བསྐྱེད་ཡང་ཡང་བྱ། དེ་ནས་རང་ཡི་དམ་དུ་གསལ་བའི་སྤྱི་བོར་པད་ཉིའི་གདན་ལ་བླ་མ་རྡོ་རྗེ་འཆང་གི་རྣམ་པ་བསྒོམས། མཆོད་པ་ཕུལ་ནས། སེམས་ཅན་ཐམས་ཅད་དང་ཐབས་གཅིག་ཏུ་མོས་གུས་ཀྱི་གདུང་ཤུགས་དྲག་པོས། བརྒྱུད་པའི་གསོལ་འདེབས་ཀྱི་འཇུག་ཏུ། བླ་མ་རིན་པོ་ཆེ། བདག་འཛིན་བློ་ཡིས་ཐོངས་པར་བྱིན་གྱིས་བརླབ་ཏུ་གསོལ། དགོས་མེད་རྒྱུད་ལ་སྐྱེ་བར༴ རང་སེམས་འཆི་མེད་རང་གྲོལ་དུ་རྟོགས་པར་བྱིན་གྱིས་བརླབ་ཏུ་གསོལ། ཅེས་གསོལ་བ་བཏབ་ལ། བླ་མ་སྤྱི་བོར་བསྟིམ་ལ་དབང་བཞི་བླང་ངོ་།
༣༢ །གཉིས་པ་དངོས་གཞི་ལ་གསུམ། གཞིའི་གནས་ལུགས་ཀྱིས་ལྷ་སྐུ་དྲན་པར་བྱ་བ། ལམ་གྱི་རིམ་པ་བསྒོམས་པས་དེའི་དྲི་མ་འཁྲུད་པ། དེ་ལས་འབྲས་བུ་ཇི་ལྟར་ཐོབ་ཚུལ་བསྟན་པའོ།
༣༢༡ །དང་པོ་ནི། ཆོ་ག་གསུམ་མམ་སྐད་ཅིག་གིས། །རང་ལུས་ཡི་དམ་ཡབ་ཡུམ་གྱི། །ཞེས་གསུངས་ཏེ།
བསྒོམ་པ་པོ་ཏིང་ངེ་འཛིན་གྱི་གསལ་སྣང་མ་ཐོབ་པ་ཡིན་ན།
ཆོ་ག་གསུམ་ནི། པད་ཉིའི་སྟེང་དུ་ཧཱུྃ་སྔོན་པོ་ལས་རྡོ་རྗེ་སྔོན་པོ་ལས་རྡོ་རྗེ་སྔོན་པོ་རྩེ་ལྔ་པ་ལྟེ་བ་ལ་ཧཱུྃ་གིས་མཚན་པ་འོད་དུ་ཞུ་བ་ལས། རང་བདེ་མཆོག་ཡབ་ཡུམ་དུ་བསྒོམ།
གསལ་སྣང་རྙེད་པས་ནི། སྐད་ཅིག་གིས་པདྨ་དང་ཉི་མའི་སྟེང་དུ་རང་འཁོར་ལོ་བདེ་མཆོག་སྐུ་མདོག་སྔོན་པོ་ཞལ་གཅིག་ཕྱག་གཉིས་སྤྱན་གསུམ་དང་ལྡན་ཞིང་ཞལ་མཆེ་བ་བཞི་གཙིགས་པ། རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། ཞབས་གཡས་བརྐྱང་པས་དུས་མཚན་མ་དམར་མོ་དང་། གཡོན་བསྐུམ་པས་འཇིགས་བྱེད་ནག་པོ་བརྫིས་པ། རལ་པའི་ཅོད་པན་ལ་སྤྱི་བོར་རྡོ་རྗེ་ནོར་བུ་དང་། ཚོགས་མའི་གཡོན་དུ་ཟླ་ཕྱེད་དང་། དཔྲལ་བར་རྡོ་རྗེའི་ཕྲེང་བ་གཉིས་ལ་བརྒྱུས་པའི་ཐོད་པ་སྐམ་པོ་ལྔའི་དབུ་རྒྱན་དང་། རྣ་བའི་རྒྱབ་ནས་དར་དཔྱངས་ཀྱིས་བརྒྱན་པ། མགོ་རློན་ཁྲག་འཛག་ལྔ་བཅུ་རྒྱུ་མ་ལ་བརྒྱུས་པའི་དོ་ཤལ་ཕྲག་པར་འཆང་བ། འཁོར་ལོ་རྣ་ཆ་མགུལ་རྒྱན་གདུབ་བུ་དྲུག་སྐ་རགས་མཆོད་ཕྱིར་ཐོགས་ཐལ་ཆེན་དང་བཅས་པའི་རུས་པའི་རྒྱན་དྲུག་གིས་བརྒྱན་པ། སྟག་གི་པགས་པའི་ཤམ་ཐབས་གྲོལ་བ། དེའི་པང་ན་ཡུམ་རྡོ་རྗེ་ཕག་མོ་སྐུ་མདོག་དམར་མོ། ཞལ་གཅིག་ཕྱག་གཉིས་མ་སྤྱན་གསུམ་དང་ལྡན་པ་ཁྲོ་ཞིང་འཛུམ་པ། དབུ་སྐྲ་ནག་པོ་འཐུར་དུ་གྲོལ་བ། ཕྱག་གཡས་གྲི་གུག་དང་བཅས་པའི་སྡིག་པ་མཛུབ་ཡབ་ཀྱི་ཕྲག་གོང་ན་བརྐྱང་བ། གཡོན་ཐོད་པ་ཁྲག་གིས་གང་བ་འཛིན་པས་ཡབ་ཀྱིས་མགུལ་ནས་འཁྱུད་པ། ཞབས་གཡས་བསྐུམ་ཞིང་གཡོན་བརྐྱང་པས་ཡབ་ལ་འཁྲིལ་བ། གཅེར་བུ་ཕྱག་རྒྱ་ལྔས་བརྒྱན་པ། དེ་ལྟ་བུ་ཡང་ནས་ཡང་དུ་གསལ་བར་བསྒོམ་མོ།
༣༢༢ །གཉིས་པ་ལམ་གྱི་རིམ་པ་བསྒོམས་པས་དྲི་མ་འཁྲུད་པ་ལ་བཞི་སྟེ། །ཁ་དོག་ལ། དབྱིབས་ལ། རྒྱན་ལ་བསླབ་པ། དེའི་དོན་ངོ་སྤྲད་པའོ།
༣༢༢༡ །དང་པོ་ལ་གཉིས་ཏེ།
༣༢༢༡༡ ཕྱི་སྣང་བ་ནི། །སྤྱི་གཙུག་ས་བོན་འོད་ཟེར་གྱིས། །ལུས་ཀྱི་ཕྱི་ནང་ཐམས་ཅད་ཀུན།
།དག་ཅིང་སྟོང་གསལ་ཉིད་སྦྱངས་པས། །སྣང་སྟོང་འཇའ་ཚོན་འོད་ཀྱི་སྐུ། །རང་བཞིན་མེད་བཞིན་སྐུ་མདོག་དང་། །ཅེས་གསུངས་ཏེ།
ཡབ་ཀྱི་སྤྱི་གཙུག་ཚངས་པའི་བུ་གའི་སྟེང་དུ་ས་བོན་ཧཱུྃ་སྔོན་པོ་མཚོན་གང་བ། སྔོ་བ་གསལ་བ། དངས་པ། འཚེར་བ། འོད་དང་འོད་ཟེར་གྱི་རང་བཞིན་ཅན། སྔོ་སིང་ངེ་བ་གཅིག་བསམ་མོ།
ཧཱུྃ་དེ་ཤིན་ཏུ་སྔོ་ཞིང་གསལ་བ་ལ་ལྟོས་ནས། ལྷ་སྐུ་དེ་ཡང་མོག་མོག་པོ་ལྟ་བུར་གྱུར། ཧཱུྃ་དེ་ལས་འོད་ཟེར་སྔོན་པོ་ཤིན་ཏུ་གསལ་བ་བྱུང་ནས། དཔེ་རི་མགོ་ནས་ཉི་མ་ཤར་བ་ལྟར་རིམ་གྱིས་བྱུང་ནས། འོད་ཀྱིས་འཕོག་པའི་དབུ་སྐྲ་རྣམས་བུང་བ་ལྟར་ནག་པ། སྐུ་མདོག་ནི་སྔོ་བ་དཔེར་ན་བཻ་ཌཱུརྱའྨ། ཨིནྡྲ་ནཱི་ལ་རྡུལ་གྱིས་གོས་པ་ལ་སྟེང་ནས་མར་ཆུ་བླུག་པས་ཆུ་སོང་བས་དག་ཅིང་བསལ་བ། མ་སོང་བ་མོག་གེ་ཡོད་པ་ལྟར་སྨིན་མཚམས་ཡན་སྔོ་སེང་ངེ་བ། འོད་ཀྱི་རང་བཞིན་དུ་བསམ་མོ། །མི་གསལ་ན་སླར་བསྐྱར་ཞིང་གསལ་བཏབ་བོ། །དེ་བཞིན་དུ་མགྲིན་པའི་བར་དུ་བྱ། །སྨིན་མ་གནག་ཅིང་སྤྱན་གསུམ་ཁྲ་ཧྲིག་པ། སྤྱན་རྩ་དང་། ཤངས་བུག་དང་། མཆུ་སྒྲོས་རྣམས་དམར་བ། ཚེམས་ཕྲེང་དང་། མཆེ་བ་བཞི་དཀར་བ། ཡང་། ཐུགས་ཀ་དང་། ལྟེ་བ་དང་། ཞབས་པུས་མོ་དང་། ཞབས་མཐིལ་གྱི་བར་དུ་སྦྱངས་པས། ཕྱག་ཞབས་ཀྱི་མཐིལ་རྣམས་དམར་ཞིང་། སེན་མོ་རྣམས་ཟངས་ཀྱི་མདོག་ལྟ་བུར་བསྒོམ།
༣༢༢༡༢ །གཉིས་པ་ནང་སྦྱང་བ་ནི། སྤྱི་བོའི་འོད་ཟེར་ཚངས་བུག་ནས་ཞུགས་ཏེ། ཤ་ཁྲག་རུས་པ་ལ་སོགས་བེམས་པོའི་ཁམས་ཐམས་ཅད་སྦྱངས་ནས། སྨིན་མཚམས་ཡན་ཆད་ཀྱི་ནང་ཡང་གསལ་སྟོང་འོད་ཀྱི་རྣམ་པར་བསྒོམས་ཏེ། མཐར་ཞབས་མཐིལ་གྱི་བར་དུ་རིམ་པས་གསལ་གདབ། ཕྱག་གཉིས་ཀྱི་འང་། གྲུ་མོ་དང་། འཁྲིག་མ་དང་། སེན་མོའི་ནང་ཚུན་ཆད་སྦྱངས་ཏེ། དེའང་སྣང་སྟོང་འཇའ་ཚོན་ལྟ་བུའི་འོད་ཀྱི་སྐུ། བེམ་པོའི་ཁམས་ཀྱི་རང་བཞིན་མེད་བཞིན་དུ་སྐུ་མདོག་རྣམས་ཤིན་ཏུ་གསལ་བ་མངོན་དུ་གྱུར་གྱི་བར་བྱའོ། །དེ་བཞིན་དུ་ཡུམ་གྱི་སྤྱི་གཙུག་ཏུ་བཾ་དམར་པོ་མཚོན་གང་བ། དེ་ལས་འོད་ཟེར་པདྨ་རཱ་གའི་མདོག་ཅན་ཤིན་ཏུ་འཚེར་བ་བྱུང་བས། ཕྱི་དང་ནང་སྦྱོང་བའི་ཚུལ་ནི་སྔར་ལྟར་བྱའོ། །དེ་ལྟར་ཡུན་ཅི་རིང་དུ་བསྒོམ་དུ་གཞུག་ཅིང་། དབང་པོ་བཏུལ་པོ་ལ་བྲིས་སྐུ་ཤིན་ཏུ་མཛེས་པ་དག་ཀྱང་བསྟན་པས་བོགས་ཤིན་ཏུ་ཆེའོ།
༣༢༢༢ །གཉིས་པ་དབྱིབས་ལ་བསླབ་པ་ནི། །ཞལ་ཕྱག་རྒྱན་དང་མེ་ཕུང་བཅས། །གསལ་ལ་རྟོག་པ་མེད་པ་ཡི། །ཟག་མེད་བདེ་སྟོང་ཆེན་པོར་ལྟོས། །ཅེས་གསུགས་ཏེ།
ཞལ་རས་ཀྱི་དབྱིབས་ཁྲོ་ཞིང་ཆགས་པ། སྤྱན་རྣམས་འབུར་ཞིང་ཟླུམ་པ། དབུ་སྐྲ་རྣམས་ཀྱང་གསལ་ཞིང་མ་འདྲེས་པ། ཕྱག་གཉིས་ཞབས་གཉིས་རྣམས་སོར་མོ་ལྔ་ལྔ་དང་བཅས་པ་རྣམས་བྱིན་གྱིས་འཕྲ་ཞིང་། སྐབས་ཕྱེད་པ། སྐུའང་གར་གྱི་རོའི་ཉམས་དང་ལྡན་པའོ།
༣༢༢༣ །གསུམ་པ་རྒྱན་ལ་བསླབ་པ་ནི། རུས་པའི་རྒྱན་རྣམས་དཀར་ཞིང་སྣུམ་པ། མགོ་རྒྱན་རྣམས་ཀྱང་སྐམ་རློན་གྱི་ཉམ། ཆགས་པ། སྟག་ཤམ་ཀྱང་བཀྲ་ཞིང་ཅུང་ཟད་གྲོལ་བ། ཡེ་ཤེས་ཀྱི་མེ་དཔུང་རབ་ཏུ་འབར་བའི་དབུས་ན། གསལ་ལ་མ་འདྲེས་པ། རྣམ་པར་རྟོག་པའི་དྲི་མ་མེད་ཅིང་། ཡབ་ནི་ཟག་པ་མེད་ཅིང་མཆོག་ཏུ་མི་འགྱུར་བ་ཐབས་ལྷན་ཅིག་སྐྱེས་པའི་བདེ་བ་ཆེན་པོའི་ངོ་བོ་དང་། ཡུམ་ནི་རང་བཞིན་གྱིས་རྣམ་པར་དག་ཅིང་ལྷུན་གྱིས་གྲུབ་པ་འདུས་མ་བྱས་པའི་ཤེས་རབ་སྟོང་པ་ཉིད་ཀྱི་ངོ་བོ་ཡིན་ལ། ཕན་ཚུན་འཁྱུད་པ་ནི། ཐབས་ཤེས་དེ་དག་ཀྱང་དབྱེར་མེད་ཅིང་ཟུང་དུ་ཆུད་པར་ཤེས་པར་བྱའོ།
༣༢༢༤ །བཞི་པ་དེ་དོན་ངོ་སྤྲད་པ་ལ་དྲུག་ལས།
༣༢༢༤༡ དང་པོ་འོད་གསལ་ལྷ་སྐུ་དེ་སེམས་སུ་ངོ་སྤྲད་པ་ནི། །རང་ལུས་སྣང་སྟོང་ལྷ་སྐུ་སེམས། །སེམས་ནི་སྣང་སྟོང་ལྷ་ཡི་སྐུ། །ཅེས་གསུགས་ཏེ།
དེ་ཡང་སྤྱིར་དུ་ཐམས་ཅད་སེམས་ཡིན་ཞིང་། ཕྱི་དོན་དུ་གྲུབ་པ་མེད་དེ།
རྡོ་རྗེ་མགུར་ལས། རིན་ཆེན་སེམས་ལས་ཕྱིར་གྱུར་པའི། །སངས་རྒྱས་མེད་ཅིང་གང་ཅན་མེད། །རྣམ་པར་ཤེས་པའི་གནས་དོན་རྣམས། །ཕྱི་རོལ་གྱུར་པ་ཅུང་ཟད་མེད། ཅེས་གསུངས་ཞིང་། སེམས་ལའང་གསུམ་སྟེ། རྒྱུད་བླ་མ་ལས། མ་དག་མ་དག་དག་པ་དང་། །ཤིན་ཏུ་རྣམ་དག་གོ་རིམས་བཞིན། །ཞེས་གསུངས་ལ། ཡེ་ཤེས་རྒྱ་མཚོའི་རྒྱུད་ལས། ལུས་དང་སེམས་འདི་དབྱེར་མེད་དང་། །རྟེན་དང་བརྟེན་པ་འབྱུང་བཟློག་གིས། །ཀུན་གྱི་གནད་དུ་ཤེས་པར་བྱ། །ཞེས་གསུངས་པས། སྔར་བསྒོམས་པའི་ལྷ་སྐུ་དེ་ཀ་དག་པའི་སེམས་ཡིན་ཏེ། བརྟག་གཉིས་ལས། སེམས་ནི་ཆེན་པོ་གཅིག་ཉིད་ལ། །ལྔ་ཡི་གཟུགས་ཀྱིས་རྣམ་པར་མཚན། །ཅེས་སོགས་ཀྱི། སངས་རྒྱས་རིགས་ལྔའང་རང་གི་སེམས་སུ་བསྟན་པ་ལྟར། རང་ལུས་བདེ་མཆོག་ཡབ་ཡུམ་གྱི་སྐུར་སྣང་བའི་སྟོང་གསལ་ལྷ་སྐུ་དེ་ཡང་རང་སེམས་དག་པ་ཡིན་ལ། སེམས་ཀྱི་ཆོས་ཉིད་དེ་ཀ་སྣང་སྟོང་ལྷའི་སྐུར་ཐག་བཅད་ལ་སྔར་བཞིན་བསྒོམ་མོ།
༣༢༢༤༢ །གཉིས་པ་དེ་ཀ་ཟུང་འཇུག་ཏུ་དཔེས་བསྟན་པ་ནི། །སེམས་དང་སྣང་སྟོང་དབྱེར་མེད་དེ། །རྨི་ལམ་ཡུལ་དང་ཆུ་ཟླ་ལྟར། །རང་བཞིན་ཟུང་འཇུག་ཆེན་པོ་ཡི། །ཅེས་གསུངས་ཏེ།
དེ་ལྟར་སེམས་དང་ལྷ་སྐུ་སྣང་སྟོང་དབྱར་མེད་པ་དེ་ཀ་མཐའ་བྲལ་ཡེ་ཤེས་ཀྱི་སྐུ་ཡིན་ཏེ། དཔེར་ན་རྨི་ལམ་གྱི་ཡུལ་དུ་བེམ་པོའི་རྗས་མེད་བཞིན་དགྲ་གཉེན་དང་། དེ་ལ་བརྟེན་པའི་བདེ་སྡུག་ཉམས་སུ་མྱོང་བ་ལྟར་ཡོད་མེད་གཉིས་རོ་མཉམ་པར་ཟུང་དུ་ཆུད་པའོ། །དེ་བཞིན་དུ། དཔེར་ན་ཆུ་དྭངས་པའི་ནམ་མཁའི་ཟླ་བའི་གཟུགས་ཤར་བ་ན། ཟླ་བའི་གཟུགས་དང་ཆུ་གཉིས་རང་བཞིན་ཐ་མི་དད་ཅིང་ཟུར་དུ་ཆུད་པ་ཡིན་ཏེ།
ནཻ་གུ་མས། འདི་ལྟར་རྨི་ལམ་སྣ་ཚོགས་དཔེས། །སྣང་བ་སེམས་སུ་གཏན་ལ་དབབ། །སེམས་ནི་སྒྱུ་མ་རྨི་ལམ་སྟེ། །ཅེས་དང་། ཡང་། སྒྱུ་མ་འདི་ནི་ཡོད་མེད་ལས་འདས་ཤིང་། །ཞེས་གསུངས་ལ། བརྟག་གཉིས་ལས། བརྫུན་མིན་བདེན་མིན་དེ་བཞིན་དུ། །ཐམས་ཅད་ཆུ་ཡི་ཟླ་བ་ལྟར། །འདོད་པས་རྣལ་འབྱོར་མས་ཤེས་གྱིས། །ཅེས་གསུངས་པས། ཟུང་འཇུག་གི་གནས་ཁུགས་ལ་བརྩོན་པས་བསྒོམ་པར་བྱའོ།
༣༢༢༤༣ །གསུམ་པ་དེ་ཀ་བློའི་ཡུལ་ལས་འདས་པར་བསྟན་པ་ནི། ངོ་བོ་བརྗོད་བྲལ་བློ་འདས་ཏེ། །དེ་ནི་དུས་གསུམ་སངས་རྒྱས་ཀྱིས། །མ་གཟིགས་མི་གཟིགས་གཟིགས་མི་འགྱུར། ཅེས་གསུངས་ཏེ།
ཡེ་ཤེས་དེའི་གནས་ཁུགས་ངག་གིས་བརྗོད་མི་ནུས་ཤིང་། རྟོག་པས་བསམ་པར་མི་ནུས་ཏེ།
མདོ་ལས། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགག་ནམ་མཁའི་ངོ་བོ་ཉིད། །ཞེས་གསུངས་ཤིང་། ཡུམ་ལས། གང་དྲན་པ་མེད་ཅིང་ཡིད་ལ་བྱར་མེད་པ་དེ་ནི་སངས་རྒྱས་རྗེས་སུ་དྲན་པའོ། །ཞེས་སོགས་གསུངས་སོ།
།དེ་ལྟ་བུའི་ཟག་པ་མེད་པའི་ཡེ་ཤེས་ཀྱི་སྐུ་དེ། དུས་གསུམ་སངས་རྒྱས་ཀྱི་འདུས་བྱས་མ། བེམ་པོའི་ཁམས་སུ་རྟོག་པའི་བློས་མ་གཟིགས་མི་གཟིགས་གཟིགས་པར་མི་འགྱུར་ཞེས་པའོ། །འོ་ན་གོང་དུ། སྣང་སྟོང་འཇའ་ཚོན་འོད་ཀྱི་སྐུ། །རང་བཞིན་མེད་བཞིན་སྐུ་མདོག་དང་། །ཞལ་ཕྱག་རྒྱན་དང་མེ་དཔུང་བཅས། །གསལ་ལ་རྟོག་པ་མེད་པ་ཡི། །ཟག་མེད་ཡེ་ཤེས་ཆེན་པོར་ལྟོས། ཞེས་གསུངས་པ་དང་འགལ་ལོ།
།ཞེ་ན་མི་འགལ་ཏེ། ཡེ་ཤེས་ཀྱི་སྐུ་སྟེ་འདིར་ནི་བེམ་པོའི་ཁམས་སུ་རྟོག་པའི་བློས་མི་གཟིགས་ཞེས་སྨོས་ལ། གོང་དུ། གསལ་ལ་རྟོག་པ་མེད་པ་ཡིས། ཞེས་སྨོས་པས། རྣམ་པར་མི་རྟོག་པའི་ཡེ་ཤེས་ཀྱིས་གཟིགས་པ་ཡིན་ཏེ།
མདོ་ལས། སོ་སོ་རང་རིག་ཡེ་ཤེས་སྤྱོད་ཡུལ་བ། ཞེས་དང་། རྒྱུད་བླ་མར། ནང་གི་དམ་པ་ཆོས་སྐུ་ནི། །ཡེ་ཤེས་མིག་གིས་མཐོང་བར་འགྱུར། །ཅེས་དང་། བརྒྱུད་སྟོང་པ་ལས། སེམས་ནི་སེམས་མ་མཆིས་ཏེ། སེམས་ཀྱི་རང་བཞིན་འོད་གསལ་བའོ། །ཞེས་དང་། རྒྱུད་བླ་མར། འདི་ལ་གསལ་ཆ་ཅི་ཡང་མེད། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །ཅེས་གསུངས་པས།
ཡེ་ཤེས་རྒྱ་མཚོའི་རྒྱུད་ལས། ལྷ་སྐུ་སྣང་སྟོང་སྒྱུ་མ་ཡི། །ངོ་བོ་བརྗོད་བྲལ་བློ་ལས་འདས། །རང་བཞིན་དབྱེར་མེད་མཐའ་དང་བྲལ། །མཚན་ཉིད་མ་འདྲེས་ཡོངས་སུ་རྫོགས། །དེ་ལྟར་ཆོས་རྣམས་ཐམས་ཅད་ཀུན། །མཁས་པས་ཡོངས་སུ་ཤེས་པར་བྱ། ཅེས་དང་། མཚན་བརྗོད་ལས། གཟུགས་མེད་གཟུགས་བཟང་དམ་པ་སྟེ། །སྣ་ཚོགས་གཟུགས་ཅན་ཡིད་ལས་སྐྱེས། །གཟུགས་རྣམས་ཐམས་ཅད་སྣང་བའི་དཔལ། །གཟུགས་བརྙན་མ་ལུས་འཆང་བ་པོ། །ཅེས་དང་། སོར་མོའི་ཕྲེང་བ་ལ་ཕན་པའི་མདོར། །སོར་མོའི་ཕྲེང་བས། བྱམས་མའི་བུ་ལ་འདི་སྐད་ཅེས་སྨྲས་སོ། །སངས་རྒྱས་དང་ནི་ཉན་ཐོས་ཀྱིས། །གང་དེ་ཀུན་ཏུ་མ་མཉེས་པ། །ཆོས་དེས་མངོན་པར་སངས་རྒྱས་ནས། །སྲོག་ཆགས་རྣམས་ལ་བསྟན་པར་བྱ། །ཞེས་པའི་དོན་དྲིས་པ་ལས། བདག་མེད་ཅིང་ཅི་ཡང་མི་དམིགས་པ་ནི་སངས་རྒྱས་ཀྱི་དགོངས་པ་ཡིན་པར་ལན་བཏབ་པའི་མཐར། །སོར་མོའི་ཕྲེང་བས། དེ་ལྟར་ཡང་མ་ཡིན་ཞིང་། སངས་རྒྱས་རྣམས་ཀྱིས་མ་བརྙེས་བྱ་བ་དེ་ནི། འདས་པའི་སངས་རྒྱས་བཅོམ་ལྡན་འདས་རྣམས་ཀྱིས་ཀྱང་དེ་བཞིན་གཤེགས་པའི་སྙིང་པོ་བྱས་པ་མ་བརྙེས་ནས་འདས་ཏེ། མ་བྱས་པའི་སངས་རྒྱས་ཀྱི་ཁམས་མཚན་དང་དཔེ་བྱད་བཟང་པོ་མཐའ་ཡས་པས་བརྒྱན་པ་སེམས་ཅན་ཐམས་ཅད་ལ་ཡོད། །ད་ལྟར་གྱི་སངས་རྒྱས་བཅོམ་ལྡན་འདས་རྣམས་ཀྱིས་ཀྱང་། དེ་བཞིན་གཤེགས་པའི་སྙིང་པོ་བྱས་པ་ནི་ནན་ཏན་དུ་བཙལ་ཀྱང་མ་བརྙེས་ཏེ། སེམས་ཅན་ཐམས་ཅད་ལ་མ་བྱས་པའི་སངས་རྒྱས་ཀྱི་དབྱིངས། སེམས་ཅན་ཐམས་ཅད་ལ་མཐའ་ཡས་པའི་མཚན་ཉིད་དང་དཔེ་བྱད་ཀྱིས་བརྒྱན་པ་ཡོད་དོ། །ཞེས་སོགས་གསུངས་པས་སོ།
༣༢༢༤༤ །བཞི་པ་དེ་ལ་ན་རྒྱུ་འཆི་རྒྱུ་མེད་པར་བསྟན་པ་ནི། །དེ་ལ་ན་རྒྱུ་འཆི་རྒྱུ་དང་། །ཞེས་གསུངས་ཏེ། ན་བ་ནི་རླུང་མཁྲིས་བད་ཀན་འདུས་པའི་ལུས་འབྱུང་བཞི་ཆ་མ་སྙོམས་པས་ཟུག་རྔུ་འབྱུང་བ་ལ་ན་བ་ཞེས་བརྗོད་པ་ཡིན་ནོ། །འདིར་ནི་གསལ་དངས་འོད་ཀྱི་སྐུ་ཡིན་པས། །འབྱུང་བའི་ཁམས་ལས་འདས་པས་ན་བ་མེད་ལ། འཆི་བ་ཞེས་བྱ་བ་ནི། དབང་པོ་སྐད་ཅིག་མ་སྔ་མ་རྣམས་འགག་པ་ཡིན་ལ། སྐྱེ་བ་ནི་གསར་པ་རྣམས་ཐོབ་པའི་སྐད་ཅིག་ཡིན་ན། འདིར་ནི་འདུས་བྱས་ཀྱི་སྐད་ཅིག་ཐམས་ཅད་འགག་ཤིང་། འདུས་མ་བྱས་པའི་སྐུ་ཡིན་པས། སྐྱེ་བ་དང་འཆི་བ་མེད་པ་ཡིན་ཏེ། སོར་མོའི་ཕྲེང་བ་ལ་ཕན་པའི་མདོར། བཅོམ་ལྡན་འདས་ཀྱིས་བཀའ་བསྩལ་པ། །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་བྱིན་པར་བྱ། །ང་ནི་ཞི་བའི་མཐའ་ལ་གནས་པ་སྟེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ །ཞེས་དང་། རྐང་པ་གཞན་རྣམས་འདྲ་བ་ལ། །འཆི་བ་མེད་པའི་མཐའ་ལ་ང་གནས་ཏེ། ཞེས་གསུངས་སོ།
༣༢༢༤༥ །ལྔ་པ་འཁོར་འདས་གཉིས་སུ་མེད་པར་བསྟན་པ་ནི། །འཁོར་བ་མྱང་འདས་མ་གྲུབ་ཅིང་། །ཞེས་བྱ་བ་གསུངས་ཏེ།
འཁོར་བ་ནི་ཆོས་ཐམས་ཅད་ཀྱི་འཁྲུལ་ལུགས་ཡིན་ལ། མྱ་ངན་ལས་འདས་པ་ནི་གནས་ལུགས་ཡིན་པས།
དང་པོ་ཀུན་རྫོབ་དང་། ཕྱི་མ་དོན་དམ་པ་ཡིན་ལ། འདིར་ཡེ་ཤེས་ཀྱི་སྐུ་ནི་དོན་དམ་གྱི་སྐུ་ཡི་པས། བདེན་གཉིས་ཟུང་དུ་ཆུད་པ་ཡིན་ཏེ།
ཀྱཻ་རྡོ་རྗེ་ལས། འདི་ནི་འཁོར་བ་ཞེས་བྱ་སྟེ། །དེ་ཉིད་མྱ་ངན་འདས་པ་ཉིད། །འཁོར་བ་སྤངས་ནས་གཞན་དུ་ནི། །མྱ་ངན་འདས་པ་རྙེད་མི་འགྱུར། །ཞེས་གསུངས་པས། རྣམ་པ་འཁོར་བ་དང་། །མྱ་ངན་ལས་འདས་པ་གཉིས་དབྱེར་མེད་པའོ།
༣༢༢༤༦ །དྲུག་པ་དེ་ལ་འཕོ་བྱ་འཕོ་བྱེད་མེད་པར་བསྟན་པ་ནི། འཕོ་བྱ་འཕོ་བྱེད་བྲལ་བས་ན། །དེ་ཕྱིར་འཆི་མེད་རང་གྲོལ་ལོ། །ཅེས་གསུངས་ཏེ།
དེ་ལྟ་བུའི་ཡེ་ཤེས་ཀྱི་སྐུ་དེ་ལ། འཕོ་བྱ་དང་འཕོ་བྱད་དང་། འཕོ་ཡུལ་ལ་སོགས་པ་ཐ་དད་མེད་པས། དེའི་ཕྱིར་འཆི་མེད་རང་གྲོལ་དུ་བསྟན་པ་ཡིན་ནོ། །དེས་ན་འཆི་བའི་ཚེའང་གོང་གི་ཉམས་ལེན་ལས་གཞན་པ་འཕོ་བའི་གདམས་པ་ཟབ་མོ་བསྟན་རྒྱུ་མེད་དོ།
༣༢༣ །གསུམ་པ་འབྲས་བུ་བསྟན་པ་ལ་གཉིས། དེ་ལ་ཟུང་འཇུག་ཡེ་ཤེས་ཀྱི་གནས་ལུགས་མ་རྟོགས་ན་འབྲས་བུ་ཉམས་པའི་ཚུལ་དང་། ཟུང་འཇུག་རྟོགས་ན་གྲུབ་པའི་ཚུལ་ལོ།
༣༢༣༡ །དང་པོ་ནི། །དེ་ལྟར་མ་རྟོགས་རྣལ་འབྱོར་པས། །བསྐལ་པར་བསྒྲུབས་ཀྱང་དོན་མེད་འགྱུར། །ལོག་པའི་ལམ་ཞུགས་ཁོ་ནར་ཟད། །ཅེས་གསུངས་ཏེ།
དེ་ལྟར་ཟུང་འཇུག་ཡེ་ཤེས་ཀྱི་སྐུ་མ་གཏོགས་པར་བེམ་པོ་རྣམ་པར་དཔྱད་པའི་སྟོ་ཉིད་དང་། ཆད་པའི་སྟོང་ཉིད་ལ་མཆོག་ཏུ་འཛིན་པའི། བཏགས་པའི་བསྐྱེད་རིམ་ལ་ཞེན་པ་རྣལ་འབྱོར་པ་ལྟར་སྣང་བས་བསྐལ་པ་མང་པོ་བསྒྲུབས་ཀྱང་དོན་མེད་པར་འགྱུར་ཞིང་། ལོག་པའི་ལམ་དུ་ཞུགས་པས་ངལ་བ་ཁོ་ནར་ཟད་དེ། འཇམ་དཔལ་གྱིས་རང་གི་ལྟ་བའི་འདོད་པ་མདོར་བསྟན་པ་ལས། བེམ་པོ་རྣམ་དཔྱད་སྟོང་པ་ཉིད། །ཆུ་ཤིང་བཞིན་དུ་སྙིང་པོ་མེད། །རྣམ་པ་ཀུན་གྱི་མཆོག་ལྡན་པའི། །སྟོང་ཉིད་དེ་ལྟར་འགྱུར་མ་ཡིན། །ཅེས་དང་། སྟོང་པ་ཉིད་ལ་བལྟ་ཉེས་ན། །ཤེས་རབ་ཆུང་རྣམས་འཕུང་བར་འགྱུར། །ཅེས་དང་། སྤྱན་རས་གཟིགས་ཀྱིས་ཀྱང་། །རྣམ་པར་རྟོག་པ་བསྒོམ་པ་གོམས་པ་ནི། །གྲུབ་པ་འཇིག་རྟེན་པ་དག་འགྲུབ་འགྱུར་གྱིས། །འདོད་པའི་དངོས་གྲུབ་ཆེན་པོ་ག་ལ་ཞིག །ཅེས་གསུངས་པས་སོ།
༣༢༣༢ །གཉིས་པ་ཟུང་འཇུག་རྟོགས་ན་འགྲུབ་པའི་ཚུལ་ལ་གཉིས། འགྲུབ་པའི་ཚུལ་དང་། འབྲས་བུ་དེ་གཏན་ལ་དབབ་པའོ།
༣༢༣༢༡༡ །དང་པོ་ལ་བཞིའི་དང་པོ། མཚམས་མེད་ལྔ་རྫོགས་པས་ཀྱང་འགྲུབ་ཚུལ་ནི། གང་གིས་མཚམས་མེད་ལྔ་རྫོགས་ཀྱང་། །འཆི་ཁའི་ཚེའམ་དུས་གཞན་དུ། །འཆི་མེད་རྡོ་རྗེའི་ཚིག་རྐང་བཞི། །སྐད་ཅིག་ཡུད་ཙམ་རྟོགས་པའམ། །དྲན་ཐོས་རེག་པར་གྱུར་པས་ཀྱང་། །གནོད་གཅོད་སྡུག་བསྔལ་རང་དག་ནས། །བར་དོར་ལོངས་སྐུར་མངོན་སངས་རྒྱ། །སྒྲིབ་པ་ཆུང་ལ་སྨོས་ཅི་དགོས། །འདི་ནི་འཆུག་མེད་གནད་ཡིན་ནོ། །ཞེས་གསུངས་ཏེ།
སྐྱེ་བོ་གང་གིས་མཚམས་མེད་པ་ལྔ་གང་རུང་གི་ལས་རྫོགས་པས་ཀྱང་། །འཆི་ཀའི་ཚེའྨ་དེའི་གོང་དུས་གཞན་དག་ཏུའང་རུང་སྟེ། དབང་བསྐུར་བ་ཐོབ་དམ་ཚིག་དང་ལྡན་པས། འཆི་མེད་རྡོ་རྗེའི་ཚིག་རྐང་པ་བཞི་པ་འདི་དུས་སྐད་ཆིག་ཡུད་ཙམ་རྟོགས་པའམ། སྔར་ཐོས་པ་དྲན་པའམ། རྣ་བར་ཐོས་པའམ། ཐ་ན་རེག་པར་གྱུར་པས་ཀྱང་། སྐྱེ་བོ་དེའི་གནད་གཅོད་ཀྱི་སྡུག་བསྔལ་རང་སར་དག་ནས་བར་དོར་ལོངས་སྤྱོད་རྫོགས་པའི་སྐུར་མངོན་པར་སངས་རྒྱ་བར་འགྱུར་ན། སྒྲིབ་པ་ཆུང་བ་ལ་སྨོས་མི་དགོས་ཏེ།
འཕགས་པ་སྤྱན་རས་གཟིགས་དབང་ཕྱུག་གི་ཞལ་སྔ་ནས། །མཚམས་མེད་ལྔ་པོ་དག་ནི་བྱེད་པ་རྣམས། །དབང་དོན་བདེ་བ་ཉིད་ནི་གང་ཞིག་གིས། །ཐབས་དང་ཤེས་རབ་བདག་ཉིད་རྒྱུད་དག་ལ། །རྒྱལ་བའི་བདག་པོས་རྗེས་སུ་བཟུང་བར་འགྱུར། །ཅེས་གསུངས་ཤིང་། རྒྱུད་བླ་མར་ཡང་། གང་ཞིག་ཡང་ཡང་སྡིག་གྲོགས་བརྟེན་པས་སངས་རྒྱས་ངན་སེམས་ལྡན་གྱུར་དང་། །ཕ་མ་དགྲ་བཅོམ་གསོད་པར་བྱ་བ་མིན་བྱེད་མཆོག་ཚོགས་འཇེད་པའི་མི། །དེ་ཡང་ཆོས་ཉིད་ཉེ་བར་བསམས་པས་མྱུར་དུ་དེ་ལས་ཐར་འགྱུར་གྱི། །གང་ཞིག་ཡིད་ནི་ཆོས་ལ་སྡང་བ་དེ་ལ་ཐར་པ་ག་ལ་ཡོད། ཅེས་གསུངས་ལ། འདིར་བཤད་པའི་འཆི་མེད་ཡེ་ཤེས་ཀྱི་སྐྱ་ནི། དབང་བཞི་པའི་དོན་ཡིན་ཞིང་། ཆོས་ཉིད་ཟབ་མོ་ཡང་ཡིན་པས། དེའི་ཕྱིར་སྒྲིབ་པ་ཆུང་བ་ལ་སྨོས་དགོས། དེས་ན་ལམ་འདི་ནི་གོལ་འཆུགས་མེད་པའི་གནད་ཡིན་ནོ། །ཞེས་ཤེས་པར་བྱའོ།
༣༢༣༢༡༢ །གཉིས་པ་འཆི་ཁར་མན་ངག་མི་གསལ་ན་ཡང་འགྲུབ་ཚུལ་ནི། གལ་ཏེ་ལུས་སེམས་རྐྱེན་དབང་གིས། །འཆི་ཁར་གསལ་བར་མ་གྱུར་ཀྱང་། །དཔེར་ན་སྒྱོགས་ཀྱི་འཁྲུལ་འཁོར་བཞིན། །སྔར་གྱི་གནད་ཀྱི་བར་མ་དོར། །རྒྱལ་བ་ལོངས་སྐུར་རང་ཤར་འབྱུང་། ཅེས་གསུངས་ཏེ།
དེ་ཡང་འཆི་མེད་ཀྱི་རྣལ་འབྱོར་སྔོན་དུ་གོམས་ཀྱང་། གལ་ཏེ་ལུས་སེམས་རྐྱེན་དབང་གིས་མྱོས་ཤིང་བརྒྱལ་བས། འཆི་ཁར་གདམས་པ་གསལ་བར་མ་གྱུར་ཀྱང་། བར་དོར་བག་ཆགས་སད་ནས་རང་གྲོལ་ཏེ། དཔེར་ན་སྒྱོགས་ཀྱི་འཁྲུལ་འཁོར་སྔོན་དུ་ལེགས་པར་གཏན་ལ་ཕབ་ནས། ཕྱིས་ནམ་དགོས་དུས་ན་འབྱུང་བ་བཞིན། སྔར་གྱི་ཉམས་ལེན་གྱི་གནད་ཀྱིས་ཟིན་ནས། བར་དོར་རྒྱལ་བ་ལོངས་སྐུར་རང་ཤར་འབྱུང་ངོ་།
༣༢༣༢༡༣ གསུམ་པ་མཚམས་སྦྱོར་ངན་པ་བྱུང་ཡང་འགྲུབ་ཚུལ་ནི། །མཚམས་སྦྱོར་ངན་པས་རྒྱུད་དཀྲུགས་ཀྱང་། །གསལ་དྭངས་རྫིང་བུར་རྡོ་རྒྱབ་བཞིན། །སྔར་གྱི་གནད་ཀྱིས་བར་མ་དོར། །ལོངས་སྐུ་བདེ་ཆེན་རང་ཤར་འབྱུང་། ཅེས་གསུངས་ཏེ།
དེ་ཡང་རྣལ་འབྱོར་པ་གང་ཞིག་འཆི་བའི་ཚེ། ཕྱི་ནང་གི་མཚམས་སྦྱོར་ངན་པས་རྒྱུད་དཀྲུགས་ཀྱང་བར་དོར་གྲོལ། དཔེར་ན་རྙོགས་མ་དང་། ཆུ་རླབས་སོགས་དང་བྲལ་བའི་གསལ་ཞིང་དྭངས་པའི་ཆུས་གར་བའི་རྫིང་བུར་རྡོ་རྒྱབ་པའི་རྐྱེན་གྱིས་དར་གཅིག་ཆུ་འཁྲུགས་ཅིང་རྙོག་མར་གྱུར་ཀྱང་། སླར་ཡང་དྭངས་ནས་གསལ་བ་བཞིན་དུ། སྔར་གྱི་མན་ངག་གི་གནད་ཉམས་སུ་མྱོང་བའི་སྟོབས་ཀྱིས་བར་མ་དོར་ཡང་ཉམས་ལེན་གྱི་བག་ཆགས་སད་དེ། ལོངས་སྐུ་བདེ་ཆེན་རང་ཤར་འབྱུང་བར་འགྱུར་རོ།
༣༢༣༢༡༤ །བཞི་པ་ཐོས་ནས་ཉམས་ལེན་མ་བྱུང་ཀྱང་འགྲུབ་ཚུལ་ནི། བརྟན་པར་མ་གྱུར་ལོང་མེད་ཀྱང་། །བཅོ་ལྔའི་ཉི་རྒས་ཟླ་ཤར་བཞིན། །འདིིའམ་འཆི་ཁར་དྲན་ཐོས་ཀྱིས། །བར་དོར་ལོངས་སྐུར་ཐེ་ཚོམ་མེད། ཅེས་གསུངས་ཏེ།
གང་ཞིག་མན་ངག་ཐོས་ཀྱང་ཡུན་དུ་བརྟེན་པར་མ་གྱུར་ཏེ། བསྒོས་ལོང་མེད་པས་ཀྱང་འགྲུབ་སྟེ། དཔེར་ན་ཚེས་བཅོ་ལྔའི་ཉི་མ་རྒས་པ་དང་། ཟླ་བ་ཤར་ནས་སྣང་བ་མུ་འབྱོར་ནས་མུན་པ་སངས་པ་ལྟར། ཚེ་འདིའམ་འཆི་ཁར་ཡིད་ལ་དྲན་པ་དང་། །རྣ་བར་ཐོས་པའི་སྟོབས་ཀྱིས་སྒྲིབ་པ་དག་སྟེ། །འཆི་ཁའི་འོད་གསལ་ངོས་ཟིན་ནས་བར་དོར་ལོངས་སྐུ་ཐོབ་པར་ཐེ་ཚོམ་མེད་དོ། །འདི་རྣམས་ལ་སྔགས་ཀྱི་དམ་ཚིག་གཙང་བ་གལ་ཆེའོ།
༣༢༣༢༢ །གཉིས་པ་འབྲས་བུ་དེ་བརྟན་ལ་དབབ་པ་ནི། རང་སེམས་སྐྱེ་མེད་ཆོས་སྐུ་ལས། །འགག་མེད་གཟུགས་སྐུ་རང་ཤར་གྱིས། །འཁོར་བའི་རྒྱ་མཚོ་མ་སྟོངས་བར། །གང་འདུལ་གཞན་དོན་ལྷུན་གྱིས་གྲུབ། །ངོ་བོ་རྣམ་པ་ཕྲིན་ལས་རྣམས། །ཟུང་འཇུག་ཆེན་པོར་རྟོགས་པར་གྱིས། །ཅེས་གསུངས་ཏེ།
འབྲས་བུ་ཇི་ལྟར་འགྲུབ་པ་ཡང་། །སྔར་བསྟན་པའི་ཡེ་ཤེས་ཀྱི་སྐུ་དེ་ཉིད། སྒྲིབ་གཉིས་ཀྱི་བག་ཆགས་ཐམས་ཅད་བྲལ་བས་རང་གི་ངོ་བོ་ལྷུན་གྱིས་གྲུབ་པའི་ཡོན་ཏན་ཚང་མེད་པ་དང་ལྡན་ཞིང་ཟག་པ་མེད་པའི་བདེ་བ་ཆེན་པོ་དང་གཉིས་སུ་མ་མཆིས་པའི་འོད་གསལ་བ། སོ་སོ་རང་གིས་རིག་པའི་ཡེ་ཤེས་ཀྱི་སྤྱོད་ཡུལ་དུ་གསལ་བར་རྟག་ཏུ་སྣང་བའི། རང་སེམས་དག་པ་ཆོས་ཀྱི་སྐུ་རང་དོན་དུ་ཐོབ་ནས། དེ་ལས་སྐད་ཅིག་ཀྱང་མ་གཡོས་བཞིན་དུ་སྔོན་གྱི་བསོད་ནམས་ཀྱི་ཚོགས་ཀྱི་འབྲས་བུ་འབད་ཙོལ་མེད་བཞིན་དུ། འགག་པ་མེད་པའི་གཟུགས་སྐུ། ལོངས་སྤྱོད་རྫོགས་པའི་སྐུ་རང་ཤར་གྱི་གདུལ་བྱ་དག་པ་རྣམས་དང་། སྣ་ཚོགས་པ་སྤྲུལ་པའི་སྐུ་དུ་མས་མ་དག་པའི་སེམས་ཅན་རྣམས་ལ། རང་རང་གི་མོས་པ་དང་མཐུན་པར་ཆོས་སྟོན་པ་ལ་སོགས་པའི་ཕྲིན་ལས་འཁོར་བའི་རྒྱ་མཚོ་མ་སྟོངས་བར་དུ། གང་ལ་གང་འདུལ་གྱིས་གཞན་དོན་རྒྱ་ཆེན་པོ་ལྷུན་གྱིས་གྲུབ་ཅིང་རྒྱུན་མི་འཆད་པ་འབྱུང་སྟེ། དེ་ཡང་ཆོས་སྐུའི་ངོ་བོ། ལོངས་སྐུའི་རྣམ་པ། སྤྲུལ་སྐུའི་ཕྲིལ་ལས་རྣམས་དབྱེར་མེད་ཟུང་འཇུག་བདེ་བ་ཆེན་པོར་རྟོགས་པར་བྱ་སྟེ།
རྒྱུད་བླ་མར། བདག་ཉིད་ཀྱིས་ནི་འབྱོར་པའི་གནས། །དམ་པའི་དོན་གྱི་སྐུ་ཡིན་ཏེ། །དྲང་སྲོང་རྣམས་ཀྱི་བརྡའ་ཡི་སྐུ། །ཕ་རོལ་ཕུན་སུམ་ཚོགས་པའི་གནས། །ཞེས་གསུངས་པ་དང་། འཕགས་པ་ཀླུ་སྒྲུབ་ཀྱིས། སངས་རྒྱས་རྣམས་ཀྱི་གཟུགས་སྐུ་འདིར། །བསོད་ནམས་ཚོགས་ལས་འཁྲུངས་པ་སྟེ། །ཆོས་ཀྱི་སྐུ་དེ་མདོར་བསྡུ་ན། །རྒྱལ་པོ་ཡེ་ཤེས་ཚོགས་ལས་འཁྲུངས། །ཞེས་གསུངས་ཤིང་།
ཕྲིན་ལས་མཛད་ཚུལ་ཀྱང་། །གསང་བ་བསམ་གྱིས་མི་ཁྱབ་པའི་མདོར་ཡང་། འཁྲུལ་འཁོར་ལས་བྱུང་སིལ་སྙན་ནི། །རླུང་གིས་བསྐྱོད་ན་སྒྲ་འབྱུང་བ། །དེ་ལ་ཁྲོལ་བྱེད་མེད་མེད་ཀྱི། །འོན་ཀྱང་སྒྲ་དག་འབྱུང་གྱུར་པ། །འདི་ལ་རྟོག་པ་ཡོངས་མི་མངའ། །ཞེས་དང་། རྒྱུད་བླ་མར་ཡང་། དེ་བཞིན་ཁྱབ་བདག་འབད་སོགས་དང་། །བྲལ་ཡང་འགྲོ་བ་མ་ལུས་པ། །སངས་རྒྱས་གསུང་གིས་ཁྱབ་མཛད་དེ། །སྐལ་ལྡན་རྣམས་ལ་ཆོས་སྟོན་ཏོ། །ཞེས་དང་། ཕྲིན་ལས་གཉིས་སུ་འདུ་བ་ཡང་། །རྒྱུད་བླ་མར། གདུལ་བྱའི་ཁམས་དང་འདུལ་བའི་ཐབས་དང་ནི། །གདུལ་བྱའི་ཁམས་ཀྱིས་འདུལ་བའི་བྱ་བ་དང་། །དེའི་ཡུལ་དང་དུས་སུ་གཤེགས་པ་ལ། །ཁྱབ་བདག་རྟག་ཏུ་ལྷུན་གྱིས་གྲུབ་པར་འཇུག །ཅེས་དང་། གཞན་གྱི་དབང་གིས་ངེས་འབྱུང་དང་། །བདག་དང་སེམས་ཅན་མཚུངས་གཟིགས་དང་། །མཛད་པ་ཡོངས་སུ་མ་རྫོགས་ཕྱིར། །འཁོར་བ་སྲིད་དུ་མཛད་མི་འཆད། །ཅེས་གསུངས་པས་སོ།
༣༣ །གསུམ་པ་རྗེས་ཀྱི་ཆོས་ལ་ལྔ་ལས།
༣༣༡ དང་པོ་འཆི་མེད་རྟོགས་ན་ཐ་མལ་ཀྱང་མཁའ་སྤྱོད་ཐོབ་ཚུལ་ནི། །འཆི་བ་ཞེས་བྱ་རྣམ་རྟོག་སྟེ། །འཆི་རྒྱུ་མེད་པ་དབང་པོ་རབ། །དེ་དོན་སྐད་ཅིག་རྟོགས་གྱུར་པས། །དག་པ་བདེ་སྟོང་མཁའ་སྤྱོད་འགྲོ། །ཞེས་གསུངས་ཏེ།
དེ་ཡང་འཆི་བ་ཞེས་བྱ་བ་ནི། རྣམ་པར་རྟོག་པ་ཙམ་ཡིན་ཏེ།
བདེ་མཆོག་ལས། འཆི་བ་ཞེས་བྱ་རྣམ་རྟོག་སྟེ། །ཞེས་གསུངས་སོ། །དེས་ན། སློབ་དཔོན་རྡོ་རྗེ་དྲིལ་བུ་པས། གལ་ཏེ་འཕོ་འགྱུར་རྣལ་འབྱོར་པ། །མཁའ་ལ་སྤྱོད་པའི་གནས་སུ་ཁྲིད། །ཅེས་གསུངས་ལ། ཁྲི་ཚུལ་ཡང་། སློབ་དཔོན་པུ་རི་པས། འཆི་ཚེ་མགོན་དང་དཔའ་བོ་མ་ཚོགས་ཀྱིས། །མེ་ཏོག་རྒྱལ་མཚན་གདུགས་སོགས་ཐོགས་ནས་ཀྱང་། །རོལ་མོའི་གླུ་དང་སྒྲ་སྙན་ཚོགས་མཆོད་ནས། །མཁའ་ལ་སྤྱོད་པའི་གནས་སུ་ཁྲིད་པར་ཤོག །ཅེས་གསུངས་པ་ལྟར་ཤེས་པར་བྱའོ།
༣༣༢ །གཉིས་པ་དེ་དུས་གསུམ་རྒྱལ་བ་ཀུན་གྱི་ལམ་དུ་བསྟན་པ་ནི། །དུས་གསུམ་རྒྱལ་བས་འདི་རྟོགས་པས། །བདུད་བརྟུལ་སངས་རྒྱས་འཁོར་ལོ་བསྐོར། །དེ་ཕྱིར་རྒྱལ་བའི་ཐུགས་བཅུད་འདི། །མདོ་རྒྱུད་དུ་མར་བསྟན་གྱུར་ཀྱང་། །ཅེས་གསུངས་ཏེ།
དུས་གསུམ་གྱི་རྒྱལ་བས་ཀྱང་འཆི་མེད་ཀྱི་གནད་འདི་རྟོགས་པས་བདུད་བཞི་བཏུལ་ནས་མངོན་པར་སངས་རྒྱས་ནས་གཞན་དོན་དུ་ཆོས་ཀྱི་འཁོར་ལོ་བསྐོར་བ་ཡིན་ཏེ།
ཇི་སྐད་དུ། དུས་གསུམ་འབྱུང་བའི་སངས་རྒྱས་རྣམས། །རྡོ་རྗེ་སྔགས་ཀྱི་མཐུ་ཡིན་ཏེ། །ཡེ་ཤེས་མཉམ་མེད་ཡང་དག་མཉེས། །གང་གི་ཤཱཀྱ་སེང་གེ་སོགས། །སྐྱབ་པ་རྣམས་ཀྱིས་བདུད་ཀྱི་སྡེ། །མི་བཟད་ཆེན་པོའི་དཔུང་ཆེན་བཅོམ། །འཇིག་རྟེན་རྗེས་འཇུག་བཏགས་ནས་ནི། །འཁོར་ལོ་བསྐོར་ཏེ་མྱ་ངན་འདས། །ཅེས་གསུངས་སོ།
།དེའི་ཕྱིར་རྒྱལ་བའི་ཐུགས་བཅུད་དམ་པ་འདི། །མདོ་རྒྱུད་དུ་མར་བསྟན་པར་གྱུར་ཀྱང་ནི། རྟོག་གེའི་སྤྱོད་ཡུལ་གྱིས་རྟོགས་པ་མ་ཡིན་ཏེ།
།རྒྱུད་བླ་མར། ཕྲ་ཕྱིར་ཐོས་པའི་ཡུལ་མིན་ཕྱིར། །དོན་དམ་ཡིན་ཕྱིར་བསམ་པས་མིན། །ཆོས་ཉིད་ཟབ་ཕྱིར་འཇིག་རྟེན་པའི། །བསྒོམ་པ་ལ་སོགས་ཡུལ་མ་ཡིན། །ཞེས་གསུངས་པས་སོ།
༣༣༣ གསུམ་པ་དེ་བླ་མ་དམ་པ་མཉེས་པར་བྱས་པ་ལས་རྟོགས་ཚུལ་ནི། དམ་པའི་དྲིན་གྱིས་མ་གཏོགས་པ། །ཐབས་གཞན་གང་གིས་རྙེད་མི་འགྱུར། །དེ་ཕྱིར་བླ་མ་མཆོག་བསྟེན་པ། །གུས་ཤིང་མཉེས་པ་མཆོག་ཡིན་ནོ། །ཞེས་གསུངས་ཏེ།
རྒྱལ་བའི་ཐུགས་བཅུད་དེ་ཁོ་ན་ཉིད་གང་གིས་རྟོགས་ན། བླ་མ་དམ་པའི་བཀྲིན་ཐོབ་པ་མ་གཏོགས་པ། གོང་དུ་བཤད་པའི་ཐོས་པ་ལ་སོགས་པ་ཐམས་གཞན་གང་གིས་ཀྱང་རྙེད་པར་མི་འགྱུར་ཏེ།
སློབ་དཔོན་ཨཱརྱ་དེ་བས། བསྐལ་པ་བྱེ་བ་དུ་མ་རུ། །ཐོས་པའི་ཕ་རོལ་སོན་གྱུར་ཀྱང་། །བླ་མའི་ལུང་དང་བྲལ་བ་ཡི། །བདག་བྱིན་རླབ་པ་རྙེད་མི་འགྱུར། །དེས་ན་ཡང་དག་དོན་བཙལ་རིགས། །ཞེས་གསུངས་པས། དེའི་ཕྱིར་བླ་མ་མཆོག་སྟེ། མཚན་ཉིད་དང་ལྡན་པ་བསྟེན་ནས། སྒོ་གསུམ་གུས་ཤིང་ཐུགས་མཉེས་པར་བྱས་པ་ལས་བྱིན་རླབས་འཇུག་ཅིང་། ཟབ་དོན་རྙེད་པ་མན་ངག་གི་གནད་ཡིན་ཏེ།
།ཀྱེ་རྡོ་རྗེ་ལས། གཞན་གྱིས་བརྗེད་མིན་ལྷན་ཅིག་སྐྱེས། །གང་དུ་ཡང་ནི་མ་རྙེད་པ། །བླ་མའི་དུས་ཐབས་བསྟེན་པ་དང་། །བདག་གི་བསོད་ནམས་ལས་ཤེས་བྱ། །ཞེས་པ་དང་།
གསང་བ་འདུས་པ་རིམ་ལྔ་ལས། རི་དབང་རྩེ་ནས་འགའ་ཞིག་ལྷུང་གྱུར་ཀྱང་། །ལྷུང་བར་མི་བྱ་སྙམ་ཡང་ལྷུང་བར་འགྱུར། །བླ་མའི་དྲིན་གྱིས་ཕན་པའི་ལུང་ཐོབ་ནས། །གྲོལ་བར་མི་བྱ་སྙམ་ཡང་གྲོལ་བར་འགྱུར། །ཞེས་པ་དང་། དཔལ་དོན་པའི་བསྙེན་པ་ལས་ཀྱང་། །འདོད་པའི་དངོས་གྲུབ་སློབ་དཔོན་ཞལ་གྱི་རྗེས་འབྲེང་བར། །མ་ལུས་རྡོ་རྗེ་ཐེག་པར་ཐམས་ཅད་མཁྱེན་པས་གསུངས། །ཞེས་གསུངས་པས། གསང་སྔགས་རྡོ་རྗེ་ཐེག་པ་ཟབ་མོ་སྟོན་པའི་བླ་མ་ལ། སངས་རྒྱས་དངོས་ཡིན་པའི་མོས་པ་བྱ་དགོས་ཏེ།
བླ་མ་ལྔ་བཅུ་པ་ལས། འདིར་མ་སྨྲས་པས་ཅི་ཞིག་དགོས། །བླ་མ་དགྱེས་བྱེད་གང་ཡིན་བྱ། །མི་མཉེས་བྱེད་ཀུན་སྤང་པ་ཡིན། །དེ་དང་དེ་ལ་འབད་དེ་སྤྱད། །དངོས་གྲུབ་སློབ་དཔོན་རྗེས་འབྲེང་ཞེས། །རྡོ་རྗེ་འཛིན་པ་ཉིད་གསུང་པར། །ཤེས་ནས་དངོས་པོ་ཐམས་ཅད་ཀྱིས། །བླ་མ་ཡོངས་སུ་མཉེས་པར་བྱ། །ཞེས་གསུངས་པའི་ཕྱིར་རོ།
༣༣༤ །བཞི་པ་ཡིད་ཆེས་ལུང་གིས་བརྒྱན་ཏེ་ཆིག་བརྒྱུད་ལ་བསྟན་པ་ནི། སྙིགས་མ་ལོག་ལྟས་རྒྱུད་དཀྲུགས་ཚེ། །ཡིད་ཆེས་ལུང་གིས་བརྒྱན་པར་བྱའོ། །འཆི་མེད་ཡེ་ཤེས་ཆེན་པོ་འདི། །ཆིག་རྒྱུད་རྡོ་རྗེའི་རྒྱ་ཡིས་བཏབ། །མི་རབས་བདུན་ན་གསུམ་པའོ། །ཞེས་གསུངས་ཏེ།
དུས་དང་ སེམས་ཅན་དང་། ཚེ་དང་། ལོངས་སྤྱོད། ལྟ་བའི་སྙིགས་མ་ལྔ་བརྡོ་བས། །སྐྱེ་བོ་རྣམས་ལོག་ལྟས་རྒྱུད་དཀྲུགས་པའི་ཚེ། མན་ངག་ལ་ལོག་བལྟ་དང་ཐེ་ཙོམ་འབྱུང་བས་ཡིད་ཆེས་བསྐྱེད་པའི་ཕྱིར་དུ། ལུང་རྣམ་པར་དག་པས་བརྒྱན་ཏེ། འཆི་མེད་ཡེ་ཤེས་ཆེན་པོ་འདི། །མི་རབས་བདུན་དུ་ཆིག་བརྒྱུད་དུ་བཤད་ཅིང་། དེ་ལས་མི་འདའ་བར་རྡོ་རྗེའི་རྒྱ་ཡིས་བཏབ་སོ། །མི་རབས་བདུན་པོ་ནས་བརྒྱུད་པ་གསུམ་པ་ཡིན་ནོ་ཞེས་པ་ནི། གྲུབ་ཐོབ་ཁྱུང་པོ་ཉིད་དང་སངས་རྒྱས་སྟོན་པ་གཅིག་པར་བསྟན་པའོ།
།རང་སེམས་འཆི་མེད་རང་གྲིལ་རྫོགས་སོ། །ཞེས་པ་ནི་གཞུང་རྫོགས་པའི་ཐ་ཚིག་གོ
༣༣༥ །ལྔ་པ་འགྱུར་བྱང་སྨོས་ཤིང་བཤད་ཚུལ་ནི། ཡེ་ཤེས་ཀྱི་ཌཱ་ཀི་མས་སེང་ལྡེང་གི་ནགས་བསེབ་དུ་གསུངས་ནས། ལོ་ཙཱ་བ་གླན་དར་མ་བློ་གྲོས་ཀྱིས་བསྒྱུར་བའོ། །ལོ་ཙཱ་བ་རིན་ཆེན་བཟང་པོས་ཀྱང་གཏན་ལ་ཕབ་པའོ། །ཌཱ་ཀི་མ་དེ་ཉིད་ལ། བདག་ཁྱུང་པོ་རྣལ་འབྱོར་པས། གསེར་སྲང་ལྔ་བརྒྱ་ཕུལ་ནས་ཞུས་ཏེ། ཉམས་སུ་མྱོང་བར་བྱས་པའོ། །ཞེས་པ་ནི་བསྒྱུར་ཚུལ་དང་། དཀའ་བ་སྤྱད་དེ་ཉམས་སུ་མྱོང་ཚུལ་ལོ། །འཆི་མེད་ཡེ་ཤེས་ཆེན་པོའི་རྡོ་རྗེ་ཡི། །ཚིག་གི་འགྲེལ་པ་ཟུང་འཇུག་གསལ་བ་འདི། །འཕགས་ནོར་བདུན་ལྡན་བཤེས་གཉེན་དམ་པ་ནི། །དཔལ་ལྡན་གྲགས་པས་ཡང་ཡང་གསོལ་བཏབ་ངོར། །རྣམ་དག་ལུང་དང་བླ་མའི་མན་ངག་ལྟར། །སངས་རྒྱས་དཔལ་གྱིས་ལྐུགས་ལུང་དགོན་པར་བཀོད། །དག་པར་བསམས་མོད་གལ་ཏེ་ནོངས་སྲིད་ན། །བླ་མ་མཁའ་འགྲོའི་ཚོགས་ཀྱིས་བཟོད་པར་གསོལ། །འདི་བྲིས་དགེ་བ་གང་ཞིག་ཐོབ་པ་དེས། །འགྲོ་ཀུན་འདིར་བཞུགས་སངས་རྒྱས་ཐོབ་པར་ཤོག། ཤུབྷམསྟུསརྦཛགཏཱཾ།། ཤུབྷཾ།། །།