Smon lam don kun lhun grub lha yi rnga gsang

Resource ID	DK1
Title	dpal ldan shangs pa bka' brgyud kyi bstan pa rgyas pa'i smon lam don kun lhun grub lha yi rnga gsang
Topics	Lineage prayer
Author	Dilgo Khyentsé Trashi Peljor

༄༅། །དཔལ་ལྡན་ཤངས་པ་བཀའ་བརྒྱུད་ཀྱི་བསྟན་པ་རྒྱས་པའི་སྨོན་ལམ་དོན་ཀུན་ལྷུན་གྲུབ་ལྷ་ཡི་རྔ་གསང་ཞེས་བྱ་བ་བཞུགས་སོ།།

།སངས་རྒྱས་ཀུན་འདུས་བླ་མའི་ཡེ་ཤེས་གར། །རབ་འབྱམས་རྒྱལ་བ་སྲས་བཅས་ཡི་དམ་ལྷ། །དཔའ་བོ་ཌཱ་ཀི་རྡོ་རྗེའི་ཆོས་སྲུང་ཚོགས། །རྨད་བྱུང་མཁྱེན་བརྩེ་ནུས་པས་དགོངས་སུ་གསོལ།
།སྲིད་ཞིའི་ཕན་བདེའི་འབྱུང་གནས་ཐུབ་པའི་བསྟན། །ལུང་རྟོགས་སྙིང་པོ་སྒྲུབ་བརྒྱུད་ཤིང་རྟ་བརྒྱད། །ཀུན་ལས་རྨད་བྱུང་ཁྱད་ཆོས་དུ་མས་འཕགས། །དཔལ་ལྡན་ཤང་པའི་བསྟན་པ་རྒྱས་གྱུར་ཅིག
།རྡོ་རྗེ་འཆང་དང་ཡེ་ཤེས་མཁའ་འགྲོ་སོགས། །ས་བཅུའི་དབང་ཕྱུག་འཕགས་པའི་སྤང་རྟོགས་ཅན། །རིན་ཆེན་བདུན་བརྒྱུད་ཕྲེང་བ་སྔ་ཕྱིའི་སྲོལ། །དཔལ་ལྡན་ཤང་པའི༴
།ཁྱད་པར་རྒྱལ་བས་ལུང་བསྟན་རྫུ་འཕྲུལ་ཆེ། །མཐར་ཐུག་ལྔ་ལྡན་མཁས་གྲུབ་ཁྱུང་པོ་རྗེའི། །པན་གྲུབ་བརྒྱ་དང་ལྔ་བཅུའི་ཐུགས་བཅུད་སྙིང་། །དཔལ་ལྡན་ཤང་པའི༴
།མཚན་ཉིད་ཀུན་ལྡན་རྡོ་རྗེའི་སློབ་དཔོན་ལས། །གསང་རྒྱུད་ཉིང་ཁུ་རྒྱུད་སྡེ་ཆེན་པོ་ལྔ། །བྱིན་རླབས་དབང་གི་བཀའ་ཡིས་སྨིན་བྱེད་པ། །དཔལ་ལྡན༴
།རིན་ཆེན་རྒྱ་མཚོའི་རྒྱུད་ཀྱི་དགོངས་པའི་བཅུད། །དགྱེས་མཛད་སྒྱུ་མ་འདུས་པ་འཁོར་ལོ་སྡོམ། །འཇིགས་མཛད་རྒྱུད་སྡེའི་དཀྱིལ་འཁོར་གཅིག་འདུས་ལམ། །དཔལ་ལྡན༴
།གཏུམ་མོ་སྒྱུ་ལུས་རྨི་ལམ་འོད་གསལ་དང་། །ཕྱག་རྒྱ་མངོན་སྤྱོད་སྟོན་པའི་མཐར་ཐུག་ལྔ། །རྡོ་རྗེ་གདན་པའི་ཐུན་མིན་ཐུགས་དམ་མཆོག །དཔལ་ལྡན༴
།རྒྱལ་བའི་ཡུམ་ཆེན་ཡེ་ཤེས་མཁའ་འགྲོ་གཉིས། །རྡོ་རྗེ་གདན་པ་མེ་ཏྲི་རཱ་ཧཱུ་ལའི། །དགོངས་བཅུད་ཐུན་མིན་གསེར་ཆོས་རྣམ་ལྔའི་ཚུལ། །དཔལ་ལྡན༴
།ཆིག་བརྒྱུད་བཀའ་བབ་རིན་ཆེན་བདུན་བརྒྱུད་གཉིས། །ཐང་སྟོང་རྒྱལ་དང་རྗེ་བཙུན་གྲོལ་མཆོག་ཞབས། །འཇམ་མགོན་རྣམ་གཉིས་ཉེ་བརྒྱུད་བྱིན་རླབ་འབར། །དཔལ་ལྡན༴
།ཟབ་དོན་རྒྱ་མཚོའི་མཛོད་ལ་དབང་ཐོབ་པའི། །མཁྱེན་སྤྱོད་ཟླ་བྲལ་གྲུབ་བརྙེས་ཧེ་རུ་ཀཿ །སྒྲོལ་བའི་མགོན་པོའི་ཤིང་རྟའི་ལམ་སྲོལ་འཛིན། །དཔལ་ལྡན༴
།མཁས་གྲུབ་ཁྱུང་པོའི་ཐུགས་སྲས་དགེ་བའི་བཤེས། །ཁྲི་ཕྲག་བཅོ་བརྒྱད་ཀྱིས་མཚོན་གངས་ཅན་གྱི། །འཕགས་ཚོགས་རྒྱ་མཚོའི་བཤད་རྩོད་སྒྲུབ་པའི་ལམ། །དཔལ་ལྡན༴
།ཚིག་ཙམ་མ་ཡིན་དོན་གྱི་བྱིན་རླབས་གཟིས། །རྩོད་པའི་དུས་ཀྱང་གྲུབ་པའི་རྟགས་མཚན་གྱིས། །ཡིད་ཆེས་ངེས་པ་སྟེར་བའི་ངོ་མཚར་ཅན། །དཔལ་ལྡན༴
།སྦྱང་བྱ་གནས་སྐབས་རྣམ་བཞིའི་འཁྲུལ་རྟོག་ཀུན། །སྦྱང་བྱེད་ཐབས་ལམ་རྡོ་རྗེའི་ཆོས་དྲུག་གིས། །སྦྱང་འབྲས་བར་དོ་གསུམ་དུ་དབུགས་འབྱིན་ལམ། །དཔལ་ལྡན༴
།རང་བབ་གསུམ་གྱིས་ཞི་ལྷག་ཏིང་འཛིན་བརྟན། །ཡེ་ཤེས་འབེབས་པས་སེམས་ཀྱི་གདར་ཤ་བཅད། །ཐུན་མིན་ལམ་གྱིས་སྐུ་བཞིའི་སར་སྦྱོར་བའི། །དཔལ་ལྡན༴
།མདོ་རྒྱུད་རྒྱ་མཚོའི་བསྟན་བྱའི་མན་ངག་སྙིང་། །རྡོ་རྗེ་འཆང་དབང་ཞལ་ལུང་འབའ་ཞིག་པས། །ལོ་ཟླ་ཙམ་གྱིས་ཟུང་འཇུག་སར་སྦྱོར་བྱེད། །དཔལ་ལྡན༴
།ཉི་ཟླའི་མདངས་འཛིན་རྡོ་རྗེ་བཙུན་མོ་ཡིས། །ཆགས་གྲོལ་བདེ་སྟོང་ཙཎྜ་ལཱིས་ཞུ་བདེས། །མཁའ་སྤྱོད་དགའ་མའི་དྲུང་དུ་ཁྲིད་ནུས་པ། །དཔལ་ལྡན༴
།ལུས་སེམས་གཉིས་མེད་ལྷན་སྐྱེས་རང་གྲོལ་དབྱིངས། །སྐྱེ་འཆི་རྣམ་སྨིན་ཕུང་པོའི་གདངས་བཞིས་སྟོང་། །འཆི་མེད་འཆུགས་མེད་ཕྱག་རྒྱ་ཆེར་གྲོལ་བྱེད། །དཔལ་ལྡན༴
།གཅིག་བརྒྱུད་རྡོ་རྗེའི་རྒྱ་ཡིས་རྒྱས་བཏབ་པས། །བློས་བཏགས་རང་བཟོའི་བསྲེ་བསླད་མེད་པའི་ལམ། །གསེར་ཞུན་ལྟ་བུའི་རྡོ་རྗེ་གསུང་གི་ཚོགས། །དཔལ་ལྡན༴
།རྒྱལ་ཀུན་ཐུགས་རྗེའི་རང་གཟུགས་སྤྱན་རས་གཟིགས། །མྱུར་མཛད་ཡེ་ཤེས་མགོན་པོའི་སྐུར་བསྟན་པས། །དོན་གཉིས་ལྷུན་གྲུབ་ཕྲིན་ལས་རྨད་བྱུང་ཅན། །དཔལ་ལྡན༴
།གཅིག་ཏུ་འགྲོ་ལ་ཕན་དགོངས་ཐུགས་རྗེས་མཐུ། །རྒྱལ་བའི་ཕྲིན་ལས་གཙོ་བོ་ལུང་རྟོགས་ཆོས། །ཀུན་གྱི་སྙིང་པོ་ངོ་མཚར་རྨད་བྱུང་བ། །དཔལ་ལྡན༴
།རྒྱལ་བས་ལུང་བསྟན་མཁས་གྲུབ་ཁྱུང་པོ་སོགས། །རིན་ཆེན་བདུན་བརྒྱུད་རྣམ་གཉིས་ཐང་སྟོང་རྒྱལ། །མཚུངས་མེད་བླ་མ་རྣམས་ཀྱི་ཐུགས་བསྐྱེད་མཐུས། །དཔལ་ལྡན༴
།གསང་ཆེན་རྒྱུད་སྡེའི་མཐར་ཐུག་རྣམ་ལྔ་སོགས། །ཡི་དམ་ལྷ་དང་མཁའ་འགྲོ་ཆོས་སྐྱོང་སོགས། །ཡེ་ཤེས་མགོན་པོ་འཁོར་བཅས་ཕྲིན་ལས་མཐུས། །དཔལ་ལྡན༴
།ཐུབ་བསྟན་བཤད་རྩོད་སྒྲུབ་པའི་བྱ་བས་སྤེལ། །དེར་འཛིན་སྐྱེས་ཀུན་ཞབས་བརྟན་བཞེད་དོན་འགྲུབ། །ས་སྟེང་རྒྱན་གྱུར་འདུས་པས་ཡོངས་ཁེངས་ནས། །དཔལ་ལྡན༴
།དབེན་པའི་རི་ཀུན་རྣལ་འབྱོར་སྒྲུབ་པའི་ཁེངས། །ངེས་འབྱུང་བརྩོན་འགྲུས་མོས་གུས་ཆེས་ཆེར་འཕེལ། །ཉམས་རྟོགས་ཏིང་འཛིན་བརྙེས་པས་མཛེས་པ་ཡི། །དཔལ་ལྡན༴
།རྩོད་དུས་ནད་མུག་མཚོན་སྐལ་རྒུད་པ་ཀུན། །རིན་ཆེན་གསུམ་གྱི་ཐུགས་རྗེའི་མཐུས་སེལ་སྟེ། །འགྲོ་ཀུན་སེམས་རྒྱུད་ཆོས་ལ་སྤྱོད་པ་ཡིས། །དང་ལ་ལྡན༴
།བདག་ཀྱང་མཁས་གྲུབ་རྒྱ་མཚོའི་ཞབས་པད་བསྙེན། །མདོ་རྒྱུད་ཆོས་ཀྱི་ཉིང་ཁུ་མ་ནོར་འཛིན། །ཁྱུང་པོ་རྣལ་འབྱོར་རྣམ་ཐར་བཞིན་སྤྱོད་པས། །དཔལ་ལྡན༴
།མཉམ་ཉིད་བྱང་ཆུབ་སེམས་ཀྱི་གཞན་སྣང་བསྒྱུར། །འབྲེལ་ཚད་དོན་ལྡན་འགྲོ་ཀུན་ཐར་པ་འདྲེན། །ཟབ་དོན་ཉིན་བྱེད་ཐང་མལ་བརྡལ་བ་ཡིས། །དཔལ་ལྡན༴
།ནང་གི་རྡོ་རྗེའི་རྣལ་འབྱོར་མཐར་སོན་པས། །ངོ་མཚར་རྫུ་འཕྲུལ་དུ་མའི་རོལ་པ་ཡིས། །བསྟན་འགྲོའི་ཕན་བདེ་སྤེལ་ཞིང་རྒྱས་བྱེད་པས། །དཔལ་ལྡན༴
།ལམ་འདིར་འབྲེལ་ཚད་རྟེན་དེར་དངོས་གྲུབ་བརྙེས། །མངོན་དགའ་བདེ་བ་ཅན་སོགས་བླ་མ་རྣམས། །བཞུགས་པའི་ཞིང་སྐྱེ་རྒྱལ་སྲས་སྤྱོད་པ་སྐྱོངས། །དཔལ་ལྡན༴
།མདོར་ན་རང་གཞན་བསྟན་འགྲོའི་དོན་མཐའ་དག །ཟབ་ཆོས་ཡིད་བཞིན་ནོར་བུ་འདིས་སྒྲུབ་ནས། །སྲས་བཅས་རྒྱལ་བའི་ཕྲིན་ལས་རྗེས་སྒྲུབ་པས། །དཔལ་ལྡན་ཤང་པའི་བསྟན་པ་རྒྱས་གྱུར་ཅིག།
ཅེས་པའང་ཚབ་ཚྭའི་སྒྲུབ་བླ་ཀརྨ་ཚུལ་ཁྲིམས་བློ་ལྡན་ནས་ལྷ་རྫས་ཀྱི་རྟེན་བཅས་གསུངས་བསྐུལ་བཞིན་རྫོགས་པའི་སངས་རྒྱས་ཞེ་ཆེན་པ་ཆེན་པོ་འགྱུར་མེད་པདྨ་རྣམ་རྒྱལ་གྱིས་བཀའ་དྲིན་ལས། སྒྲུབ་བརྒྱུད་ཤིང་རྟ་བརྒྱད་ཀྱི་ཟབ་ཆོས་ཀྱི་ཉིང་ཁུ་མཐའ་དག་གི་སྣོད་རུང་དུ་གྱུར་ཅིང་། དཔལ་ལྡན་ཤངས་པའི་གསེར་ཆོས་ལ་ལྷག་པར་དད་པའི་ཀུ་སཱ་ལའི། འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་འཕགས་ཡུལ་རྡོ་རྗེ་གླིང་གི་ཆར་གསང་སྔགས་བཤད་སྒྲུབ་གླིང་གི་གཙུག་ལག་ཁང་དུ་རྗེ་བཙུན་ཐམས་ཅད་མཁྱེན་པའི་དུས་ཀྱི་མཆོད་པའི་སྐབས་བྲིས་ཤིང་སྙིང་ནས་སྨོན་པ་དོན་དང་ལྡན་པར་གྱུར་ཅིག། དགེའོ།།