Dpal dgyes pa rdo rje'i dkyil 'khor gyi cho ga

Resource ID	Ten1
Title	dpal dgyes pa rdo rje'i dkyil 'khor gyi cho ga
Alt. title	śrī hevajra maṇḍala vidhi
Topics	Initiation
Sub-Topics	Hevajra
Author	Niguma, Lendarma Lodrö
Link	BDRC W1PD95844
Notes	Translated in english in the book Lady of illusion

༄༅། །དཔལ་དགྱེས་པ་རྡོ་རྗེའི་དཀྱིལ་འཁོར་གྱི་ཆོ་ག་ཞེས་བྱ་བ།

རྒྱ་གར་སྐད་དུ། ཤྲཱི་ཧེ་བཛྲ་མཎྜལ་བི་དྷི་ནཱ་མ།
བོད་སྐད་དུ། དཔལ་དགྱེས་པ་རྡོ་རྗེའི་དཀྱིལ་འཁོར་གྱི་ཆོ་ག་ཞེས་བྱ་བ།
དཔལ་དགྱེས་པའི་རྡོ་རྗེ་ལ་ཕྱག་འཚལ་ལོ།
།བཅོམ་ལྡན་འདས་དགྱེས་མཛད་རྡོ་རྗེའི་བསྙེན་པ་འབུམ་དང་ཁྲི་སོང་བས། གནས་དབེན་པར་རིགས་ཅན་སྨིན་པར་བྱས་ཏེ། དེར་མཎྜལ་འདབ་བརྒྱད་དམར་པོ་རྡོ་རྗེས་བསྐོར་བ། ཁྱམས་དང་བཅས་པ་བྱས་ནས་མེ་ཏོག་གི་ཚོམ་བུ་དགུ་དགོད་དོ། །བུམ་པ་གཉིས་ལ་རྫས་དང་། རྒྱན་ཆ་དང་ལྡན་པའི་དབུས་དང་བྱང་ཤར་དུ་བཀོད་ནས། དེ་ལ་བླ་རེ་དང་ཡོལ་བ་ལ་སོགས་པས་བརྒྱན་ནོ། །དཀྱིལ་འཁོར་གྱི་ཕྱོགས་བཞིར་མཆོད་པ་ལྔ་ཚན་བཞི་དང་། གཏོར་མ་ལྔ་དང་། ཚོགས་ཀྱི་ཡོ་བྱད་ཀྱིས་བསྐོར་བར་བྱའོ།
།དེ་ནས་རྡོ་རྗེ་སློབ་དཔོན་ཁྲུས་བྱས། སྟན་བདེ་བ་ལ་བསྐྱེད་རྫོགས་བསྒོམས་ནས། སྐད་ཅིག་གིས་བུམ་པ་སྟོང་པའི་ངང་ལས་བྷྲཱུཾ་ལས་གཞལ་ཡས་ཁང་གི་དབུས་སུ། པཾ་ལས་བྱེད་པདྨའི་སྡོང་པོའི་སྟེང་དུ། པདྨ་དམར་པོ་འདབ་བརྒྱད། དེའི་ལྟེ་བ་ལ་ཉི་མ་དང་བདུད་བཞིའི་རོའི་སྟེང་དུ་ཆོ་ག་ལྔའམ། གསུམ་མམ། སྐད་ཅིག་གིས་ཧེ་རུ་ཀ་ཞལ་བརྒྱད་ཕྱག་བཅུ་དྲུག་པའམ། ཞལ་གཅིག་ཕྱག་གཉིས་པ་ཡུམ་དང་བཅས་པ་བསྐྱེད། པད་འདབ་བརྒྱད་ལ་ཨ་ལས་བདག་མེད་མ་ཞལ་གཅིག་ཕྱག་གཉིས་པ་བརྒྱད་བསྐྱེད་དོ།
།དེ་ནས་རང་གི་ཧཱུཾ་གི་འོད་ཀྱིས་ཡེ་ཤེས་པ་སྤྱན་དྲངས་ལ། མཆོད་བསྟོད་དང་ཡབ་ཡུམ་གྱི་སྔགས་བཞི་ལ་བསྙེན་པ་ཅི་འགྲུབ་བྱས་ནས་ཡང་མཆོད་དེ། ལྷ་རྣམས་བདུད་རྩིར་བཞུའོ། །ལས་བུམ་དུ་བདུད་རྩི་འཁྱིལ་པ་བསྐྱེད་ནས། བསྙེན་པ་བྱས་ལ་དེས་སློབ་མ་ལ་ཁྲུས་བྱའོ།
།དེ་ནས་སློབ་མ་གྲལ་ལ་འཁོད་པ་ལ་སྐྱབས་འགྲོ་སེམས་བསྐྱེད། གསོལ་བ་གདབ་པ། གནང་བ་སྦྱིན་པ་རྟོག་པ་བསྡུ་བ། ཡན་ལག་ལྔ་བྱ་བ། སྡོམ་པ་གཟུང་བ་དང་། དམ་པ་བསྒྲག་པ་རྣམས་གཞུང་བཞིན་བྱས་ལ་ཡེ་ཤེས་དབབ་པར་བྱའོ།
།དེ་ནས་བླ་མ་ལ་དབང་བསྐུར་ཞུ་བའི་གསོལ་བ་གདབ་པ་ནི། ཧེ་རུ་ཀ་དཔལ་དབང་བསྐུར་བ། །འགྲོ་སྐྱོབ་ཕྱིར་ན་གཟི་བརྗིད་ཅན། །དེ་ལྟར་ཡོན་ཏན་འབྱུང་གནས་རྫོགས། །དེ་བཞིན་བདག་ལ་དེང་གསོལ་ཅིག །བྱང་ཆུབ་རྡོ་རྗེ་སངས་རྒྱས་ལ། །མཆོད་ཆེན་ཇི་ལྟར་སྩལ་བ་ལྟར། །བདག་ཀྱང་སྐྱོབ་པའི་དོན་གྱི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །ཅེས་གསོལ་བ་བཏབ་པ་དང་། དཀྱིལ་འཁོར་དང་ནམ་མཁའི་ལྷ་ཚོགས་ཀྱི་ཐུགས་ཀ་ནས་ལྷ་མོ་བདུད་རྩིའི་བུམ་ཆུ་ཐོགས་པ་དང་། གསང་བའི་ཆུ་རྒྱུན་གྱིས་དབང་བསྐུར་བས། ལུས་ཀྱི་སྡིག་སྒྲིབ་དག་པར་བསམས་ནས། དབང་བསྐུར་རྡོ་རྗེ་ཆེན་པོ་ལ། །ཁམས་གསུམ་ཀུན་གྱིས་ཕྱག་བྱས་པའི། །སངས་རྒྱས་ཀུན་གྱི་གསང་གསུམ་ལས། །རབ་ཏུ་བྱུང་བས་སྦྱིན་པར་བྱ། །ཞེས་བརྗོད་པས་བུམ་དབང་ཐོབ་པར་བསམ། །དེ་བཞིན་མགྲིན་པར་གསང་དབང་། སྙིང་གར་ཤེས་རབ་ཡེ་ཤེས། ལྟེ་བར་དབང་བཞི་པའོ། །གཞན་དོན་འབའ་ཞིག་གི་དབང་ངོ་།
།དེ་ནས་རང་གཞན་རྣམས་ལ་རྒྱུན་དུ་དབང་བཞི་བསྐུར་བ་བཤད་པར་བྱ་སྟེ། རང་གི་སྤྱི་བོར་པཾ་ལས་གྱུར་པའི་པདྨའི་སྡོང་པོའི་སྟེང་དུ། པདྨ་དམར་པོ་འདབ་བརྒྱད་ཀྱི་ལྟེ་བར་ཉི་མ་དང་། རོའི་སྟེང་དུ་ཆོ་ག་གསུམ་མམ། སྐད་ཅིག་ལ་ཧེ་བཛྲ་ཡུམ་མེད་ཅིག་བསམ། པདྨ་འདབ་བརྒྱད་ལ་ཉི་མ་དང་རོའི་སྟེང་དུ། ཨ་ལས་བདག་མེད་མ་བདེ་བ་རྒྱས་པ་བརྒྱད་བསམ་མོ།
།དེ་ནས་གོང་བཞིན་གསོལ་བ་བཏབ་ལ། སྤྱི་བོའི་ལྷ་ཚོགས་རྣམས་ལས་འོད་ཟེར་དཔག་ཏུ་མེད་པ་བྱུང་ནས། རང་གི་ལུས་ཕྱི་ནང་ཐམས་ཅད་འོད་ཀྱིས་ཁྱབ་པ་ལས། ལས་དང་ཉོན་མོངས་པའི་སྒྲིབ་པ་ཐམས་ཅད་སངས་དག་ནས། ལུས་འོད་ཀྱི་རང་བཞིན་དུ་བསམ། དེས་བདག་ཉིད་ཧེ་བཛྲ་ཡུམ་མེད་པ་ཅིག་ཏུ་གྱུར་པ་ནི་བུམ་པའི་དབང་ངོ་།
།དེ་ནས་ཡང་གསོལ་བ་བཏབ་པས། སྤྱི་བོའི་ལྷ་མོ་བདེ་བ་རྒྱས་ནས་འོད་དུ་འདུས་ཏེ། ཡབ་ལ་འཁྱུད་ནས་ཡབ་ཡུམ་གཉིས་སྦྱོར་བ་བྱས་པས། སྦྱོར་མཚམས་ནས་བྱང་སེམས་དཀར་དམར་གཉིས་བདེ་ཕྲི་ལི་ལི་བྱུང་ནས་ལྕེ་ཐོག་ཏུ་བབས་པས། བདེ་བ་སྐྱེས་པ་ནི་གསང་བའི་དབང་ངོ་། །ལྷ་ཚོགས་ལ་ཡང་གསོལ་བ་བཏབ་པས། གཙོ་བོའི་ཡུམ་ལས་བདག་མེད་མ་ཅིག་ཆད་ནས་བྱུང་སྟེ། རང་ཧེ་བཛྲ་ལ་འཁྱུད་ནས་བསྲུབ་པའི་སྦྱོར་བ་བྱས་པས། ལུས་ལ་ཟག་མེད་ཀྱི་བདེ་བ་ཆེན་པོ་སྐྱེས་པ་ནི། ཤེས་རབ་ཡེ་ཤེས་ཀྱི་དབང་ངོ་།
།དེ་ནས་སྤྱི་བོའི་ལྷ་ཚོགས་ལ་མཆོད་པས་ལྷ་གདན་དང་བཅས་པ་སྤྱི་བོར་ཐིམ་ནས། ལྷ་སྐུ་མངའ་བས་གསལ་བའི་གསལ་སྟོང་འཛིན་མེད་བདེ་བ་ཆེན་པོ་ལ་མཉམ་པར་གཞག་གོ། །མདོར་ན་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་ཀྱི་ངོ་བོ་རྣམ་པར་དག་པ། སྤྲོས་པ་ཐམས་ཅད་དང་བྲལ་བ། རང་བཞིན་གྱིས་འོད་གསལ་བའི་ཕྱག་རྒྱ་ཆེན་པོ་འབའ་ཞིག་ལ་གཞག་པར་བྱའོ། །དེ་ནི་དབང་བཞི་པའོ།
།དེ་ནས་ཡཾ་རཾ་ཀཾ །ཨ་ལས་བྱུང་བའི་ནང་དུ་སྣ་ཚོགས་རྫས་རྣམས་ཤ་ལྔ་བདུད་རྩི་ལྔར་ལེགས་པར་སྦྱངས་ནས། ལྷ་ཚོགས་རྣམས་མཆོད་ཅིང་། རྣལ་འབྱོར་པ་རྣམས་རོལ་པར་བྱའོ། །གཏོར་མ་ལྔ་ནི་གོང་བཞིན་སྦྱངས་ལ་འབྱུང་པོ་ཐམས་ཅད་པའི་སྔགས་ཀྱིས་བླ་མ་དང་། དགྱེས་མཛད་དང་། ཆོས་སྐྱོང་དང་། གཞི་བདག་དང་། གནོད་བྱེད་རྣམས་ཚིམ་པར་བྱས་ནས། རྡོ་རྗེའི་གླུ་བླང་། ལྷ་ཚོགས་ལ་མཆོད་བསྟོད་དང་བཤགས་པ་བྱས་ནས། བདག་གིས་སྦྱིན་སོགས་བགྱིས་པའི་བསོད་ནམས་ཀྱིས། །བཅོམ་ལྡན་དགྱེས་མཛད་རྡོ་རྗེ་མཉེས་བྱས་ཏེ། །ཕ་རོལ་ཕྱིན་དྲུག་ཡོངས་སུ་རྫོགས་བྱས་ནས། །འགྲོ་ཀུན་རྡོ་རྗེ་རྒྱལ་པོ་ཐོབ་པར་ཤོག །ཅེས་པ་བསྔོ་བ་བྱའོ།
།དེ་ནས་སློབ་དཔོན་དང་ཐམས་ཅད་མགྲིན་གཅིག་ཏུ་སྨོན་ལམ་གདབ་པ་ནི། རིགས་སུ་སྐྱེ་དང་དམ་ཚིག་ཅན། །མཉམ་མེད་ཀྱེ་ཡི་རྡོ་རྗེ་སྟོན། །བླ་མ་ལ་གུས་སྙིང་རྗེར་ལྡན། །སྐྱེ་ཞིང་སྐྱེ་བར་འགྱུར་བར་ཤོག །ལག་པ་རྡོ་རྗེ་དྲིལ་བུ་འཁྲོལ། །ཟབ་མོའི་ཆོས་ནི་ཀློག་པ་དང་། །བཙུན་མོའི་ཞུ་བ་མཉམ་ཟ་ཞིང་། །སྐྱེ་ཞིང་སྐྱེ་བར་འགྱུར་བར་ཤོག །ཅེས་བརྗོད་དོ།
།དེ་ནས་དཀྱིལ་འཁོར་ལ་བསྐོར་བ་བྱ་ཞིང་བཟོད་གསོལ་བྱ། བཀྲ་ཤིས་བརྗོད། ཡེ་ཤེས་པ་གཤེགས། དམ་ཚིག་པ་སྤྱི་བོར་བསྡུ། རྡོ་རྗེ་སློབ་དཔོན་ཡོན་གྱིས་མཉེས་པར་བྱའོ།
།དཔལ་དགྱེས་མཛད་རྡོ་རྗེས་དབང་བསྐུར་བའི་ཆོ་ག་མདོར་བསྡུས་པ། ཡེ་ཤེས་ཀྱི་མཁའ་འགྲོ་མ་ནི་གུ་མས་མཛད་པ་རྫོགས་སོ།། །།
རྡོ་རྗེ་ཡེ་ཤེས་མཁའ་འགྲོ་མ་དེ་ཉིད་དང་། ལོ་ཙཱ་བ་རླན་དར་མ་བློ་གྲོས་ཀྱིས་བསྒྱུར་བའོ།། །།