Rtsa gsum gyi gdams pa

Resource ID	SCv8p735
Title	rtsa gsum gyi gdams pa
Alt. title	bar do med par sangs rgya ba'i gdams ngag 'ja lus sgrub pa
Topics	Various
Sub-Topics	Various by Niguma
Author	Niguma
Link	BDRC W23922 BDRC W3CN18508 (v2p.472) BUDA MW2PD20238 (p.428)

༈ རྩ་གསུམ་གྱི་གདམས་པ་ནི།
ན་མོ་གུ་རུ།
བྱང་ཆུབ་ཀྱི་སེམས་སྔོན་དུ་སོང་པས་ལུས་ཡི་དམ་ལྷར་བསྒོམ། རང་གི་རྡོ་རྗེ་ནོར་བུའི་བུམ་པར་ཐིག་ལེ་དཀར་པོ་འོད་ཟེར་ཁ་དོག་ལྔ་འཕྲོ་བ་དང་བཅས་པ་གཅིག་བསམ། དེ་ལས་འོད་ཟེར་ཁ་དོག་ལྔ་ལུས་ཀྱི་ནང་ན་ཡར་འཕྲོས་པས། ལུས་ཐམས་ཅད་ཐིག་ལེ་ཁ་དོག་ལྔས་ཁེངས་ཏེ། ལུས་ཐམས་ཅད་འོད་ཟེར་ཁ་དོག་ལྔའི་རང་བཞིན་དུ་ལྟེམ་མེ་འདུག་པས་ཕྱིའི་ཤ་ཁྲག་དག་ནང་གི་རུས་པ་ཆུ་རྒྱུས་དག་པས། ཉོན་མོངས་ཆགས་སྡང་རྨོངས་གསུམ་དག་སྟེ་འོད་ཟེར་ཁ་དོག་ལྔའི་ལུས་ཡེ་ཤེས་ལྔའི་རང་བཞིན་དུ་གསལ་སིང་ངེ་བ་ལ་སེམས་གཏད། དེ་ཡི་དམ་ཐུན་ཞབས་ལམ་ཆག་པར་བསྒོམ། ལུས་ལ་ཚ་གྲང་གི་ན་ཚ་བྱུང་ན། རྡོ་རྗེ་ནོར་བུའི་བུམ་པའི་ཐིག་ལེ་ནག་པོར་བསྒོམས་ལ། དེ་ལས་འོད་ཟེར་ཁ་དོག་ལྔ་འཕྲོས་པས་ལུས་ཀྱི་ཚ་གྲང་གི་ནད་ཐམས་ཅད་བསྡུས་ཏེ། བཤང་སྒོ་ཆེ་ཆུང་ན་མར་སངས་སྦྱངས་པར་བསམ་མོ། དེ་ལྟར་དེ་བཞིན་དུ་བསྒོམས་ནས། ལན་གཅིག་འཆི་བའི་དུས་སུ། འཆི་རྟགས་པ་ཆུ་ལ་ཐིམ་པས་དུས་སུ་ལུས་ལྗི་ཐིབས་ཀྱིས་འགྲོ། དེའི་དུས་སུ་ཐིགལེ་འོད་ཟེར་ཁ་དོག་ལྔ་འཕྲོས་པ་དེ། རང་གི་རྐང་པ་གཡས་པའི་སྒྱུ་མ་ཁུང་ན་རྩ་འདུས་པའི་རྩ་མདུད་ཡོད་པས། དེའི་ནང་དུ་རང་གི་རྣམ་པར་ཤེས་པ་དང་གཉིས་སུ་མེད་པར་བསམ་ལ། དེ་རྩ་ནང་ན་ཡར་རིམ་གྱིས་དྲངས་ཏེ་བོལ་དང་། བྱིན་པ་དང་། པུས་མོ་དང་། བརླའི་རྩ་བོ་ཆེ་ན་ཡར་དྲངས་ཏེ། སྐུ་སྨད་ནས་རྩ་གསུམ་འདོམས་པར་སླེབ་པ་དང་རྩ་དབུ་མའི་ཁར་ཚུད་དེ། ལྟེ་བ་སྤྲུལ་པའི་འཁོར་ལོ་མེར་གྱིས་བྱུང་བར་བསམས་ལ་དེ་ལ་སེམས་གཏད། ཡང་། ཆུ་མེ་ལ་ཐིམ་པའི་དུས་སུ། ཁ་སྣ་གཤེར་གཏིང་འགྲོ། དེའི་དུས་སུ་ཐིག་ལེ་མགྲིན་པར་དྲངས་ལ་སེམས་གཏད། རླུང་རྣམ་པར་ཤེས་པ་ལ་ཐིམ་པའི་དུས་སུ། ཤད་པ་ཆད་ཆད་འགྲོ་དེའི་དུས་སུ་ཐིག་ལེ་རྣམ་ཤེས་དང་བཅས་པ་དེ་སྤྱི་བོར་དྲངས་ལ། སྤྱི་བོ་ཚང་བུག་ནས་རྒྱངས་ཀྱི་དོན་པ་དང་། ཐིག་ལེ་རྣམ་པར་ཤེས་པ་དང་བཅས་པ་དེ་ལྷན་སྐྱེས་ཡབ་ཡུམ་དུ་ལམ་གྱིས་གྱུར་པརབསྒོམ་མོ། དེ་ཡང་ཤ་ཁྲག་གདོས་པ་ཅན་མ་ཡིན་ཏེ། སྣང་ལ་རང་བཞིན་མེད་པ་མེ་ལོང་གི་གཟུགས་བརྙན་ནམ། བར་སྣང་གི་འཇའ་ཚོན་ནམ། འོད་ཀྱི་ཕུང་པོ་ལྟ་བུ་ལ་འོད་ཟེར་ཁ་དོག་ལྔ་འཕྲོ་བའི་རང་བཞིན་ཅན་དུ་བསམ་མོ། དེའི་ངང་ལ་མ་ཡེངས་པར་ཤིན་བར་དོ་མེད་པར་ཟུང་འཇུག་ལོངས་སྤྱོད་རྫོགས་པའི་སྐུར་འགྲོའོ།
ནི་གུ་མའི་ཞལ་གདམས་སོ།།