Khyung pos mdzad pa'i bsngo ba bka' rgya ma

Resource ID	SCv4p801
Title	bsngo ba khyung pos mdzad pa'i bka' rgya mar grags pa
Topics	Various
Author	Khyungpo Neljor
Link	BDRC W23922

བསྔོ་བ་ཁྱུང་པོས་མཛད་པའི་བཀའ་རྒྱ་མར་གྲགས་པ་ནི།

སྐུ་གསུམ་མཁྱེན་བཅུ་ཆོས་ཀྱི་རྗེ། །བླ་མ་རྣམས་དང་ཡི་དམ་ལྷ། །མཁའ་འགྲོ་ཆོས་སྐྱོང་ལ་སོགས་ཀུན། །བརྩེ་བས་བསྔོ་བའི་དཔང་དུ་བཞུགས།
།སྐྱེ་བ་འདི་དང་སྐྱེ་བ་གཞན། །བདག་གི་ལུས་ངག་ཡིད་གསུམ་གྱིས། །དཀར་པོའི་དགེ་བ་ཅི་བགྱིས་པ། །སེམས་ཅན་ཀུན་གྱི་དོན་གྱི་ཕྱིར།
།ཉོན་མོངས་ལམ་དུ་སློང་གྱུར་ཅིག །སྣང་བ་དབང་དུ་བསྡུས་གྱུར་ཅིག །སྐུ་གསུམ་རང་ལ་རྙེད་གྱུར་ཅིག །རང་དོན་ཆོས་སྐུ་འགྲུབ་གྱུར་ཅིག །གཞན་དོན་གཟུགས་སྐུ་རྣམ་གཉིས་ཀྱིས།
།ཇི་སྲིད་འཁོར་བ་མ་སྟོངས་བར། །འགྲོ་དོན་ཕྲིན་ལས་རབ་རྒྱས་པའི། །གང་ལ་གང་འདུལ་དེར་སྟོན་ནས། །གཞན་དོན་རླབས་ཆེན་འགྲུབ་གྱུར་ཅིག
།འདུལ་བྱ་དུས་ལ་ཐེབས་གྱུར་ཅིག །རྟེན་འབྲེལ་ཐབས་ལ་མཁས་གྱུར་ཅིག །འབྲེལ་ཚད་དོན་དང་ལྡན་གྱུར་ཅིག །འཁོར་བའི་རྒྱ་མཚོ་སྟོང་གྱུར་ཅིག །འོད་གསལ་ཆོས་སྐུ་ཐོབ་གྱུར་ཅིག
།དུས་གསུམ་སངས་རྒྱས་ཐམས་ཅད་ཀྱིས། །བསྔོ་བར་མཛད་པ་ཇི་བཞིན་དུ། །བདག་གིས་བསྔོ་བ་འགྲུབ་གྱུར་ཅིག
།ཇི་སྲིད་སངས་རྒྱས་མ་ཐོབ་བར། །རིགས་བཟང་ནད་མེད་དབང་པོ་གསལ། །ཁྲིམས་ལྡན་ཤེས་བཞིན་ཆོས་སྤྱོད་ཅིང་། །ཀུན་གྱིས་བཀུར་བར་བདག་གྱུར་ཅིག །རེ་འདོད་ཐམས་ཅད་བསྐང་བར་ཤོག
།བྱང་ཆུབ་མངོན་དུ་མ་གྱུར་ཚེ། །ནད་དང་གདོན་དང་བགེགས་རྣམས་དང་། །མི་དང་གཅན་གཟན་སྲིན་པོ་དང་། །འབྱུང་བ་བཞི་ཡི་གནོད་པ་སོགས། །ཐམས་ཅད་ཞི་བ་ཉིད་གྱུར་ཅིག
།ཚེ་དང་བསོད་ནམས་དར་བ་དང་། །དཔལ་དང་འབྱོར་པ་རྒྱས་གྱུར་ནས། །སྙན་གྲགས་ནམ་མཁའ་མཉམ་གྱུར་ཅིག
།ལུས་ངག་ཡིད་ཀྱི་མཛད་སྤྱོད་ཀུན། །ཅི་བྱས་སེམས་ཅན་དོན་གྱུར་ནས། །འཁོར་བའི་རྒྱ་མཚོ་སྟོངས་པ་དང་། །རྫོགས་པའི་སངས་རྒྱས་ཐོབ་པར་ཤོག། །།