Gtum mo skom du 'thung ba bde drod zhal sbyor

Resource ID	SCv9p15
Title	gtum mo skom du 'thung ba bde drod kyis zhal sbyor
Topics	Chandali
Sub-Topics	Instructions
Link	BDRC W23922

༄༅། །གཏུམ་མོ་སྐོམ་དུ་འཐུང་བ་བདེ་དྲོད་ཞལ་སྦྱོར་བཞུགས་སོ།།

ན་མོ་གུ་རུ།
དངོས་གཞི་ལ་གཏུམ་མོ་སྐོམ་དུ་འཐུང་བ་བདེ་དྲོད་ཀྱིས་ཞལ་སྦྱོར་ལ། དེ་ལ་བཞི་སྟེ།
གསོལ་བ་གདབ་པ། རླུང་བཟུང་བ། འཁྲུལ་འཁོར་བྱ་བ། དམིགས་པ་བསྒོམ་པའོ།
དང་པོ་གསོལ་བ་གདབ་པ་ནི། རང་གི་སྤྱི་བོར་བླ་མ་རི་རྣལ་འབྱོར་བསྒོམ་ལ། བླ་མ་རིན་པོ་ཆེ་བདག་ལ་བདེ་དྲོད་ཀྱི་ཏིང་ངེ་འཛིན་ཁྱད་པར་ཅན་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། །བདེ་སྟོང་གི་ཏིང་ངེ་འཛིན་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། །ཞེས་གསོལ་བ་བཏབ་ལ་མོས་གུས་བྱའོ།
།གཉིས་པ་ནི། ངག་གི་ལས་སུ་རླུང་བཟུང་། ཞེས་གསུངས་པས་རླུང་རོ་ལན་གསུམ་མམ་དགུ་ཕྲུགས་སུ་གསལ་ལ། ་་སྟེ་རླུང་འཇམ་པོས་མནན་ལ། རྔུབས་ནས་སྟེང་རླུང་འོག་ཏུ་བསྐྱུར། དེ་དང་དུས་མཉམ་དུ་འོག་རླུང་ཡང་ཅུང་ཟད་འཐེན་ལ་རླུང་ཁ་སྦྱར་ཏེ་བསྒོམ།
གསུམ་པ་ལུས་ཀྱི་ལས་སུ་འཁྲུལ་འཁོར་བྱ། ཞེས་གསུངས་པས། རྩུབ་ཤིང་མ་དད་འཕོ་བ་སྐོར་བ་ལ་སོགས་པ་བྱའོ།
།བཞི་པ་ཡི་ཀྱི་ལས་སུ་དམིགས་པ་བསྒོམ། ཞེས་གསུངས་པ། རང་ཉིད་ཕྱི་རྗེ་བཙུན་མའི་རྣམ་པ་ལ། ནང་སྟོང་ར་ཕྲུ་མ་ཕུས་བཏབ་པ་ལྟ་བུ་སྲབ་སིང་ངེ་བ། ཁ་དོག་དམར་བ་རེག་བྱ་ཚ་བ། ཟངས་གཞོང་མེས་ཚིག་པ་ལྟ་བུ་བསྒོམ།
དེའི་དཀྱིལ་ནས་ཡར་ལ་རྩ་དབུ་མ་ཡར་རྩེ་ཚངས་བུག་ཏུ་ཟུག་པ། མར་སྣེ་ལྟེ་འོག་སོར་བཞི་སླེབ་པ། ཆོས་བཞི་དང་ལྡན་པ་ཅིག་བསམ་མོ། །དེའི་ཁྲིས་ན་ཡར་ལ་གཡས་རོ་མ་དང་གཡོན་རྐྱང་མ་གཉིས་ཡར་རྩེ་སྣ་བུག་གཉིས་དང་། མས་སྣ་ལྟེ་འོག་སོར་བཞི་ནས་དབུ་མའི་ཁར་ཚུད་ཙམ་ཅིག་བསྒོམ། དབུ་མའི་ནང་རྩ་གསུམ་གྱི་འདོམ་པ་རུ། ཨ་ཐུང་ཤད་ཀྱིས་རྣམ་པ་སྐྱེ་ཚེར་བཅད་པ་ལྟ་བུ་གདེངས་ཁ་ཆེ་བ་གྱེན་དུ་བསྟན་པ། ཕྲ་བ་ཐུར་དུ་ཟུག་པ་ཁ་དོག་དམར་བ་རེག་བྱ་ཚ་བ་འབར་བར་བསམ། ལྟེ་བ་སྤྲུལ་པའི་འཁོར་ལོ་རྩ་འདབ་དྲུག་ཅུ་རྩ་གཉིས་གདུགས་ཀྱི་རྩིབ་མ་ལྟ་བུ་ཁ་གྱེན་དུ་ཕྱོགས་པ། དེའི་དབུས་སུ་དབུ་མའི་ནང་དུ་ཨ་དམར་པོ་ཅིག་བསྒོམ། །དེ་བཞིན་དུ་སྙིང་ཁ་ཆོས་ཀྱི་འཁོར་ལོ་རྩ་འདབ་བརྒྱད་ཁ་ཅུང་ཟད་མཐུར་དུ་ཕྱོགས་པ། དེའི་དབུས་སུ་ཧཱུྃ་སྔོན་པོ་ཅིག་བསྒོམ། མགྲིན་པ་ལོངས་སྤྱོད་ཀྱི་འཁོར་ལོ་རྩ་འདབ་བཅུ་དྲུག་ཁ་ཅུང་ཟད་གྱེན་དུ་ཕྱོགས་པ། དེའི་དབུས་སུ་ཨོཾ་ཡིག་སེར་པོ། སྤྱི་བོར་བདེ་ཆེན་གྱི་འཁོར་ལོ་རྩ་འདབ་སུམ་ཅུ་སོ་གཉིས་པ་ཁ་ཅུང་ཟད་མཐུར་དུ་ཕྱོགས་པ། དེའི་དབུས་སུ་ཧཾ་ཡིག་དཀར་པོ་མགོ་མཐུར་དུ་བལྟ་བ་གཅིག་གིས་ཚངས་བུག་བཀག་པར་བསམ་མོ། །སུམ་མདོ་རི་དང་། གཤང་ལམ་དུ་ཡཾ་ཡིག་བསམ་མོ།
དེ་ནས་རླུང་རོ་ལེགས་པར་བསལ་ལ། རླུང་གི་ཤུགས་རྫོགས་པ་དང་། སྣ་བུག་གཉིས་ནས་དལ་བུས་རྔུབས་ནས། །རོ་རྐྱང་གཉིས་ན་མར་ལུག་གི་རྒྱུ་མ་བུས་པ་བཞིན་དུ་སོང་ནས། དབུ་མའི་ནང་ནས་ཡར་བྱུང་། ཨ་ཐུང་ལ་རྩུབ་པས་ཨ་ཐུང་མེའི་རང་བཞིན་དུ་དམར་ལྷང་ངེ་མེ་འབར་ལ་ཁད་པ་ལ་སེམས་གཏད་དོ། །དེ་ལ་དམིགས་བསྐོར་གཅིག་བྱའོ།
།དེ་ནས་སྲིན་ཞལ་བསྡམ་ནས་འོག་རླུང་འཐེན་པས་ཡཾ་ཡིག་ལས་རླུང་གཡོས། རླུང་དེ་སུམ་མདོའི་རཾ་ཡིག་ལ་རྩུབ་པས། རཾ་ཡིག་ལས་མེ་འབར། ཨ་ཐུང་ལ་ཕོག་པས་ཨ་ཐུང་ལ་མེ་འབར་བ་རྩེ་མོ་དང་རྩ་བ་ཕྲ་བ། རྐེད་པ་ལྡིར་བ་བཟུང་མོ་བྱི་ཐུར་གྱི་རྣམ་པ་དམར་ན་རེ་བྱུང་བ་ལ་རིག་པ་གཏད་དོ། །དེ་ལ་དམིགས་བསྐོར་གཅིག །དེ་ནས་མེ་ལྕེ་ཡར་བྱུང་། ལྟེ་བར་སླེབ་པ་ལ་དམིགས་བསྐོར་གཅིག །དེ་ནས་ལྟེ་བའི་ཨ་ཡིག་དེ་བསྲེགས། ལྟེ་བའི་རྩ་འདབ་ཐམས་ཅད་མེས་དམར་ཤིག་ཤིག་ཁེངས། རྩ་ནང་གི་བག་ཆགས་ངན་པ་ཐམས་ཅད་སྦྱངས་པར་བསམ་མོ། །དེ་ལ་དམིགས་བསྐོར་གཅིག །དེས་རིགས་འགྲེའོ།
དེ་ནས་སྙིང་གར་སླེབས་པ་ལ་གཅིག །སྙིང་གའི་ཧཱུྃ་ཡིག་བསྲེགས། རྩ་ནང་མེས་ཁེངས་བག་ཆགས་སྦྱངས་པར་བསམ། དེ་ལ་གཅིག །ཡང་མགྲིན་པར་སླེབ་པ་ལ་གཅིག །ཨོཾ་ཡིག་སེར་པོ་བསྲེགས། རྩ་ནང་མེས་ཁེངས་བག་ཆགས་སྦྱངས་པར་བསམ། དེ་ལ་གཅིག །ཡང་སྤྱི་བོར་སླེབས་པས་རྩ་ནང་ཐམས་ཅད་མེས་ཁེངས་བག་ཆགས་སྦྱངས། དེ་ལ་གཅིག །དེ་ནས་མེ་ལྕེ་སྤྱི་གཙུག་གི་ཧཾ་ཡིག་ལ་རེག་ནས་ཧཾ་ཡིག་སྣུམ་ཆེམ་མེ་ཞུ་ལ་ཁད་པ་ལ་གཅིག །དེ་ནས་ཧཾ་ལས་བྱང་ཆུབ་ཀྱི་སེམས་དཀར་པོ་སྐྱ་ནར་རེ་བྱུང་། སྤྱི་བོར་སླེབས་པ་ལ་གཅིག །དེ་ནས་སྤྱི་བོ་བདེ་ཆེན་གྱི་འཁོར་ལོའི་རྩ་འདབ་ཐམས་ཅད་བདུད་རྩི་དཀར་པོས་ཁྲིགས་མེར་ཁེངས། སེམས་བདེ་སྟོང་གི་ངོ་བོར་སྐྱེས་པར་བསམ། དེ་ལ་གཅིག །དེ་བཞིན་དུ་མགྲིན་པར་སླེབ་པ་ལ་གཅིག །མགྲིན་པའི་རྩ་ནང་ཁེངས་ཨ་ཡིག་སོས་པ་ལ་གཅིག །དམིགས་བསྐོར་དེ་རྣམས་ལ་དམིགས་རྟེན་མ་རྙེད་བར་ལ་དམིགས་པ་མི་སྤོ་བར་བསྒོམ་པའི་ལུགས་སོ། །དེ་ལྟར་བསྒོམ་པས་བདེ་བ་ཆེ་ཞིང་འཛག་པ་ལ་སོགས་པའི་གེགས་བྱུང་ན། ཡང་མེ་ལྕེ་ཡར་སྲིངས་ནས་ལྟེ་བར་སླེབས། རྩ་ནང་ཐམས་ཅད་གང་ཨ་སྲེགས། བྱང་ཆུབ་ཀྱི་སེམས་དཀར་པོ་ཡར་ཐུང་ཧྲིལ་སོང་། དེ་བཞིན་དུ་སྤྱི་བོར་གོང་བཞིན་བསྒོམ་བདེ་བ་ཆུང་ན་མེ་བཏུད་ལ། དྲོད་ཆུང་ན་མེ་ལྕེ་སྲིང་བ་ལ་ཡས་བབས་ཀྱི་དགའ་བ་བཞི་དང་། མས་བརྟེན་གྱི་དགའ་བཞི་ཡང་ངོས་བཟུང་པར་བྱའོ། །དེ་ནི་སྐོམ་དུ་འཐུང་བ་བདེ་དྲོད་ཀྱི་ཞལ་སྦྱོར་རོ།།
Amplifications
༈ བོགས་འདོན་གྱི་སྐབས་སུ་ཡང་།
རྗེ་བཙུན་མུ་ཏིག་གི་ཕྲེང་བ་ལ་བརྟེན་ནས་བོགས་འདོན་པ་དང་། བླ་མ་ལ་རྟེན་ནས་བོགས་འདོན་པ་དང་། ལྷ་སྐུ་ལ་བརྟེན་ནས་བོགས་འདོན་པ་རྣམས་ཡོད་པ་ལས།
དང་པོ་ནི་རང་ཉིད་འཁོར་ལོ་བདེ་མཆོག་གམ། རྗེ་བཙུན་མར་གསལ་བའི་ངང་ནས་རྩ་གསུམ་གསལ་བཏབ། ལྟེ་བ་སྤྲུལ་པའི་འཁོར་ལོའི་དབུ་མའི་ནང་དུ། ཆོས་འབྱུང་ཕྱི་དཀར་ལ། ནང་དམར་བ། བདེ་བར་འཆར་ཞིང་བདེ་བར་རྒྱུ་བ་གཅིག་བསྒོམ། དེ་ནས་རླུང་རྔུབས་པ་དང་དུས་མཉམ་དུ། ཨ་ལི་བཅུ་དྲུག་གི་ངོ་བོ་བྱང་ཆུབ་ཀྱི་སེམས་ཡིན་པ་ལ། རྣམ་པ་ཡིག་འབྲུའི་རྣམ་པ། དུང་གི་འཕྲེང་བ་བཞིན་དུ། སྐྱ་ནར་གྱི་རྩ་གཡས་རོ་མའི་ནང་དུ་སོང་། ཀ་ལི་སོ་བཞི་པོའི་ངོ་བོ་བྱང་ཆུབ་ཀྱི་སེམས་དམར་པོ་ཡིན་པ། རྣམ་པ་ཡིག་འབྲུའི་རྣམ་པ་ཁ་དོག་དམར་པོ་བྱེ་རུའི་ཕྲེང་བ་བཞིན་དུ། གཡོན་རྐྱང་མའི་ནང་ནས་མར་ནར་ཏེ་སོང་། དབུ་མ་ནས་མར་བྱུང་། ཆོས་འབྱུང་གི་ནང་དུ་འབྲོས་འདེད་ཀྱི་ཚུལ་དུ་སྐོར་རོ་རོ་འཁོར་བ་ལ་རིག་པ་གཏད། སེམས་བདེ་བའི་ངོ་བོར་རྩེན་གྱིས་བཞག །དེ་ནི་བདེ་བའི་བོགས་འདོན་ཡིན་ནོ།།
༈ གཉིས་པ་བླ་མ་ལ་རྟེན་ནས་བོགས་འདོན་པ་ནི། རང་ཡི་དམ་དུ་གསལ་བའི་སྙིང་ཁར་ཟླ་བའི་གདན་ལ་བླ་མ་བསྒོམ། བླ་མའི་ཐུགས་ཀར་ཧཱུྃ་དཀར་པོ་འོད་ཀྱི་རང་བཞིན་ཅན་གཅིག་བསྒོམ། ཧཱུྃ་དེ་ལས་འོད་ཟེར་འཕྲོས་བླ་མ་གསལ་བར་བྱས། བླ་མ་ལས་འོད་ཟེར་འཕྲོས་རང་ཉིད་གསལ་བ་བྱས། དེ་ཐམས་ཅད་འོད་དང་འོད་ཟེར་གྱི་རང་བཞིན། འཇའ་འོད་ལས་གྲུབ་པའི་གསལ་སྟོང་གི་ངོ་བོར་བཞག་པར་བྱའོ།།
༈ གསུམ་པ་ལྷ་སྐུ་ལ་བརྟེན་ནས་བོགས་འདོན་པ་ནི། རང་ཉིད་འཁོར་ལོ་བདེ་མཆོག་ཏུ་བསྒོམ། གསང་གནས་རྡོ་རྗེ་ནོར་བུའི་ནང་དུ་ཐིག་ལེ་སྔོན་པོ་འོད་ཟེར་འཕྲོ་བ་གཅིག་བསྒོམ། གསང་གནས་རྡོ་རྗེ་ནོར་བུའི་ནང་དུ་ཐིག་ལེ་སྔོན་པོ་འོད་ཟེར་འཕྲོ་བ་གཅིག་བསྒོམ། དེ་ལས་འོད་ཟེར་འཕྲོས་པས་ལུས་ཀྱི་ནང་ཐམས་ཅད་འོད་ཟེར་གྱིས་གང་བས། རང་ཉིད་བཅོམ་ལྡན་འདས་འཁོར་ལོ་སྡོམ་པ་འོད་དང་འོད་ཟེར་གྱི་རང་བཞིན་ཅན། འཇའ་འོད་ལས་གྲུབ་པ་ཆུ་ནང་གི་ཟླ་བ་འམ། མེ་ལོང་ནང་གི་གཟུགས་བརྙན་ལྟ་བུ་སྣང་ལ་རང་བཞིན་མེད་པ། གསལ་སྟོང་གི་ངང་ལ་བཞག་པ་བྱའོ། ཡང་རང་ཉིད་འཁོར་ལོ་བདེ་མཆོག་ཏུ་གསལ་བའི་གསང་གནས་རྡོ་རྗེ་ནོར་བུའི་བུ་གར་ཐིག་ལེ་ནག་པོ་གཅིག་བསྒོམས་ལ། ཐིག་ལེ་དེ་ལས་འོད་ཟེར་འཕྲོས་པས། རང་གི་ནད་གདོན་སྡིག་སྒྲིབ་ཐམས་ཅད་ཐིག་ལེ་ནག་པོ་དེ་ལ་འུབ་རིལ་གྱིས་འདུས་ནས་ཐིག་ལེ་དང་བཅས་པ་དབང་ཆེན་གསེར་གྱིས་གཞི་ལ་ལྷན་གྱིས་སོང་ནས། མཐར་མི་དམིགས་པའི་ངང་དུ་བཞག་པར་བྱའོ། །དེ་ནི་གེགས་སེལ་ཡིན་ནོ། །མངྒ་ལཾ།།