Ni gu chos drug gi zhal shes kyi lhan thabs

Resource ID	SCv8p311
Title	ni gu chos drug gi zhal shes dgos rnams kyis lhan thabs
Alt. title	ni gu chos drug gi zhal shes dang gtam rgyud kyis zhal shes dang gtam rgyu kyis lhan thabs dgos rnams lhan thabs
Topics	Six doctrines of Niguma
Sub-Topics	Instructions
Author	Gyeltsen Bum
Associated Person	Shönu Drup Tsangma Shangtön Sangyé Tönpa Atisha Rinchen Zangpo Kharak Gomchung Neljor Chöjung Dampa Marpo Shang Rinpoché
Link	BDRC W23922 BDRC W1KG4284

༄༅། །ནི་གུ་ཆོས་དྲུག་གི་ཞལ་ཤེས་དགོས་རྣམས་ཀྱིས་ལྷན་ཐབས་བཞུགས་སོ།།

བླ་མ་དམ་པའི་ཞབས་ལ་གུས་པས་ཕྱག་འཚལ་ལོ།
།ཆོས་དྲུག་འདི་ན་རོ་པའི་བཞེད་ཀྱིས། །མ་རྒྱུད་ཐམས་ཅད་ཀྱི་སྙིང་པོ་བསྡུས་པ། །དེ་ལས་ཀྱཻ་རྡོ་རྗེའི་མན་ངག་ཏུ་བཞེད། །ནི་གུ་མའི་བཞེད་ཀྱིས་ཕ་བརྒྱུད་༼མ་བརྒྱུད་༽ཐམས་ཅད་ཀྱི་སྙིང་པོ་ཕྱོགས་གཅིག་ཏུ་བསྡུས་པ་ཁྱད་པར་དུ་རིན་ཆེན་རྒྱ་མཚོའི་རྒྱུད་ལ་བརྟེན་པར་བཞེད་དོ།
།རིན་པོ་ཆེའི་གསུང་གིས་གསང་འདུས་ལེའུ་བཅོ་ལྔ་པ་ལས་རྨི་ལམ་གྱིས་འོད་གསལ་གྱིས་ཆོས་མང་དུ་བྱས་པས་ཟིན་པོ་གསང་འདུས་ཆེ་བར་འདུག་གསུངས། ཨའི་སྟོང་རའི་སྐབས་སུ། གོས་དྲི་མ་ཅན་ལ་ཚོས་མི་ཆགས་པ་བཞིན། དེ་ལ་དགེ་སྦྱོར་མི་སྐྱེ་ཞིང་ཐར་པ་མི་ཐོབ། ཐར་པ་བས་མི་ལུས་ཀྱང་མི་ཐོབ་སྟེ།
བློ་གྲོས་མི་ཟད་པས། བདག་གི་སྤྱོད་པ་འདི་འདྲས་ནི། །མིའི་ལུས་ཀྱང་ཐོབ་མི་འགྱུར། །ཞེས་གསུངས།
སྤྱོད་པ་འདི་འདྲ་ནི་སྒོ་གསུམ་འཁྲུལ་པར་སྤྱོད་པ་ལ་ཟེར་རོ།
།སྡིག་པ་སྦྱོངས་བ་ལ་ན་རོ་ཆོས་དྲུག་ནས་མཎྜལ་ཡི་གེ་བརྒྱ་པ་ལ་སོགས་པ་ཡོད་པ་ལ། འདིར་ཨའི་སྟོང་ར་གཅིག་པུ་ལ་དྲིལ་བས་སྤྲོས་པ་ཆུང་ཞིང་སྡིག་སྒྲིབ་བདག་པའི་རྟགས་མྱུར་དུ་ཏིང་ངེ་འཛིན་སྐྱེ་སླ་བས་ཟབ་པའི་གནད་ཡིན་གསུངས། སྡིག་སྒྲིབ་ལ། ཆོས་འབྱུང་ཕྱི་ནང་གཉིས་ཀ་དཀར་བ། ནད་ལ་ཕྱི་དཀར་ལ་ནང་དམར་བ། རླུང་ལ་རང་གི་འོག་ཏུ་མར་ནག་གི་མཚོ་ཁ་ཆུང་ལ་གཏིང་རིང་བ་རེག་བྱ་ཚ་བ། རླངས་པ་དང་བཅས་པའི་ནང་མིག་མན་ཆད་ནུབ་པ་ལ། ཨའི་བདུད་རྩི་ཞུན་མར་གྱིས་རྣམ་པར་བྱུང་ནས་རླུང་གི་ནད་ཐམས་ཅད་ཞི་བར་བསམ། ཚད་པ་ལ་བདུད་རྩི་དཀར་ལ་རེག་བྱ་བསིལ་བ། གྲང་བ་ལ་བདུད་རྩི་དཀར་ལ་རེག་བྱ་ཚ་བ། གདོན་ལ་བདུད་རྩི་ཁྲོ་བོའི་རྣམ་པ་ལ་ཁྲོ་ཆུང་མང་པོ་བྱུང་སྟེ། གདོན་ཐམས་ཅད་སྲོག་ཆགས་ཀྱི་རྣམ་པ་སྡིག་པ་དང་སྦལ་པ་འབུ་སྲོག་ལ་སོགས་པ་ལུང་པར་མི་ཤོང་པ་ཙམ་མཐོན་པས་ལུས་ཕྲུ་མ་ཕུས་བཏབ་པ་བཞིན་སོང་བར་བསམ་མོ།
།རྟགས་ནི་རི་རྩེ་གངས་རྩེར་འཛེགས་པ། ཉི་ཟླ་ཤར་བ། གོས་མེད་མཐོན་པ་ཁྲུས་བྱས་པ་བུ་མོ་གཞོན་ནུ་མས་མགོ་ལ་མེ་ཏོག་ཕྲེང་བ་འདོགས་པ་ལ་སོགས་པ་རྨི་བས་ཏེ། ཕྱི་མ་ནི་མཁའ་འགྲོ་མའི་བྱིན་རླབས་འཇུག་པའི་རྟགས་ཀྱང་ཡིན། དངོས་སུ་ཡང་ལུས་བཟོ་མདོག་བདེ་བ་དང་། ལྡང་པ་ཡང་པ་ལ་སོགས་པ་འབྱུང་ངོ་།
།དངོས་གཞི་རྒྱུད་ལ་སྐྱེ་བ་ལ་སྔོན་འགྲོ་ཚད་ལ་ཕེབས་དགོས་པ་སྔོན་འགྲོ་ལ་འཇུར་བ་གལ་ཆེ། མཁས་གྲུབ་ཆོས་རྗེས་ངས་ཞག་བཞི་བཅུ་སྔོན་འགྲོ་ལ་འབུངས་གསུངས།།
༈ །གཏུམ་མོའི་སྐབས་སུ། གནས་ལུགས་ཀྱི་དོན་ཟབ་མོ་བཞི་ལ་གཞུགས་པ་ལ་སྔར་མི་མཛད་དོ། གཉིས་མཐུན་ཡང་སྔོན་དུ་བྱེད་པའི་ཐབས་ཟབ་མི་ཟབ་ཡོད་དེ། སྤྲོས་བྲལ་ནམ་མཁའ་ལྟ་བུར་འཇོག་པ་ཕ་རོལ་ཏུ་ཕྱིན་པ་ལ་ཡང་ཡོད་པས་ཁྱད་ཆོས་མིན། རྟེན་ལུས་ལ་གནད་དུ་བསྣུན་པས་རྟེན་པ་སེམས་ལ་རྟོགས་པ་འཆར་བ་འདི་ཁྱད་ཆོས་ཡིན་པས། སྔགས་པས་རྣམས་ཀྱི་རླུང་བསྒོམ་དགོས། རླུང་ལ་ཡང་དྲོད་དང་ཐུན་མོང་གི་དངོས་གྲུབ་ཐོབ་པ་མུ་སྟེགས་པ་ལ་ཡང་ཡོད་པས། རླུང་གིས་སྟོབས་ཀྱིས་ཀུན་གཞིའི་རྣམ་ཤེས་བྱིན་གྱིས་རླབས་ཏེ། མཆོག་གི་གནས་སུ་བཞུགས་ཏེ། ཡེ་ཤེས་སྐྱེ་བ་གཅིག་དགོས། རླུང་ཞི་དྲག་གང་རུང་བསྟན་ཏེ་མ་བསྒོམ་ན་དབང་གཉིས་པའི་དམ་ཚིག་དང་ཡང་འགལ། དེས་ན་འབིར་ཝ་པས་འབྲིང་དམ་ཚིག་དང་སྡོམ་པའི་ལམ། ཅེས་པ་དང་། གནད་གཅིག་སྟེ། དབང་བཞིའི་ལམ་བཞི་མ་བསྒོམ་ན། དམ་ཚིག་འཆོར་མེད་དུ་མི་འབྱུང་བའོ། །མེའི་ལྷ་ཡིན་པས་རྗེ་བཙུན་མ་ངེས་པར་བསྒོམས། ཞལ་གཅིག་མ་དང་ཕྱག་གཉིས་མ་རང་གང་མོས་སུ་བསྒོམས། དམིགས་པ་ཀུན་བཏྔ་བསྒོམ་པ་མིན། དངོས་ལ་གནས་པ་གསལ་འདེབས་པ་ཡིན་ཏེ། རྐང་པ་བསྒྲད་པ་རླུང་གི་དཀྱིལ་འཁོར་ཆང་ཟུང་ཡར་བསྟན་པ་གཡོ་བྱེད་བ་དན་གྱིས་མཚན་པ། སུམ་མདོའི་མེ་རི་བོང་གི་རིལ་མ་ཙམ། དམིགས་པ་གང་བདེའོ། དམིགས་པ་མི་གསལ་བར་རླུང་ཤོར་ན་ཡོན་ཏན་མི་སྐྱེ་བས། གསལ་བཏབ་ལ་རླུང་བཟུང་བསྒོམ་བྱ། དོན་གྱི་གནད་འཆུགས་ན་ཡོན་ཏན་མི་སྐྱེ་ཞིང་གེགས་སུ་འགྱུར་བས་ལུས་ངག་ཡིད་གསུམ་གནད་མ་འཆུགས་པར་བྱ། རླུང་དང་ཤེས་པ་ལྟེ་འོག་ཏུ་འཛིན་པ་གནད་ཆེ། སྟོད་དུ་ལས་ན་གེགས་འབྱུང་། མེ་རླུང་བསྒོམ་པ་དང་རྗེ་མི་རྟོག་པར་འཇོག་པ་གཉིས་སྤེལ་མར་བྱས་པས་རྟོག་མེད་ལ་བརྟེན་ནས་དྲོད་དང་བདེ་བ་ལ་བོགས་འབྱུང་། དྲོད་ལ་བརྟེན་པ་མི་རྟོག་ཡེ་ཤེས་སྐྱེའོ། །དེའང་མི་རྒོད་གཏུམ་མོ་ནི་མི་རྒོད་ལྟར་གཏུམ་པའམ་སྟོབས་ཆེ་མྱུར་བས་མི་རྒོད་དང་མཚུངས་པའོ།།
༈ དབང་པོ་རབ་ཀྱིས་སྐབས་སུ། ས་བཅུ་ལམ་ལྔ་ཐམས་ཅད་བླ་མའི་མན་ངག་གཅིག་པུས་བསྒྲོད་པར་བྱེད་དེ།
ཡེ་ཤེས་མངོན་འབྱུང་ལས། ས་དང་ལམ་གྱི་རིམས་པ་རྣམས། །བླ་མའི་མོས་གུས་ལོ་ཟླས་བསྒྲོད། །བླ་མའི་སྣང་བ་མི་འབྲལ་ན། །སངས་རྒྱས་རྣམས་དང་འབྲལ་མེད་གནས། ཅེས་དང་།
ཡེ་ཤེས་མཁའ་འགྲོ་ནི་གུ་མས། ས་བཅུ་ལམ་ལྔའི་རིམས་པ་རྣམས། །མོས་གུས་སྟོབས་ཀྱིས་བསྒྲོད་པར་བྱེད། །བླ་མའི་སྣང་བ་མི་འབྲལ་ན། །རྒྱུད་སྡེའི་དགོངས་པ་གནད་ཀྱི་མཆོག །ཅེས་སོ།
།ལྷ་སྐུ་སྐལ་པ་སྟོང་དུ་བསྒོམ་པ་བས། བླ་མ་དྲན་པ་བསོད་ནམས་ཆེ་སྟེ།
ཡེ་ཤེས་གསལ་བ་སྒྲོན་མེའི་རྒྱུད་ལས། མཚན་དང་དཔེ་བྱད་ལྡན་པའི་ལྷ། །བསྐལ་པ་སྟོང་དུ་བསྒོམས་པ་བས། །བླ་མ་དྲན་པ་བསོད་ནམས་ཆེ། །ཅེས་སོ།
།སངས་རྒྱས་སྟོང་གི་ཡོན་ཏན་འཛིན་ཏེ། ཨ་ཏི་བཀོད་པའི་རྒྱུད་ལས། གསང་བ་སྔགས་ལས་བྱུང་བ་ཡིན། །བླ་མའི་དྲིན་དང་ལྡན་པ་ཉིད། །སྙིང་གི་དཀྱིལ་ལམ་རྐང་པའི་མཐིལ། །སྤྱི་བོའི་གཙུག་ཏུ་སུས་བསྒོམས་པ། །སངས་རྒྱས་སྟོང་གི་ཡོན་ཏན་ཡང་། །གང་ཟག་དེ་ཡིས་འཛིན་པར་འགྱུར། ཅེས་དང་། དམ་ཚིག་བཀོད་པ་ལས། གཡོ་མེད་མོས་གུས་ཟླ་དྲུག་གིས། །རྡོ་རྗེ་འཆང་གི་ས་ཐོབ་འགྱུར། །ཅེས་དང་། བརྟག་གཉིས་ལས། གཞན་གྱིས་བརྗོད་མིན་ལྷན་ཅིག་སྐྱེས། །གང་དུ་ཡང་ནི་མི་རྙེད་དེ། །བླ་མའི་དུས་ཐབས་བརྟེན་པ་དང་། །བདག་གི་བསོད་ནམས་ལས་ཤེས་བྱ། ཅེས་དང་། མགུར་ལས། སློབ་དཔོན་སྟོན་པར་གྱུར་པ་ནི། །སངས་རྒྱས་རྣམས་ཀྱི་ཕྱག་མཛད་པ། །བདག་ཅག་རྣམས་ཀྱི་ཕ་དང་མ། །འདི་ཉིད་ཡིད་ལ་བསམ་པར་བྱ། །དེ་ནི་ཅི་ཡིས་ཕྱིར་ཞེ་ན། །རྡོ་རྗེ་སེམས་དང་སངས་རྒྱས་སྤྱན། །དེ་ནི་རྡོ་རྗེ་གཟི་བརྗིད་དང་། །པདྨ་གར་གྱིས་དབང་ཕྱུག་དང་། །རྟ་ཡི་རྒྱལ་པོའི་དངོས་གྲུབ་ནི། །གང་ཕྱིར་དེ་ལ་དཀའ་བ་མེད། ཅེས་དང་། གསང་འདུས་ལས། ཕྱོགས་བཅུར་བཞུགས་པའི་སངས་རྒྱས་པའི། །བླ་མའི་བ་སྤུ་ཉག་གཅིག་ལྷག །ཅེས་དང་། རྡོ་རྗེ་སློབ་དཔོན་ནི་བདག་ཅག་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་ཕའོ། མའོ། བསྐྱེད་པའོ། ཅེས་དང་། སྡོམ་པ་འབྱུང་བ་ལས། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །དཔལ་ལྡན་བླ་མ་རྡོ་རྗེ་འཆང་། །ཀུན་གྱིས་བྱེད་པ་བླ་མ་ཡིན། ཅེས་སོ།
།རྣལ་འབྱོར་མ་ཀུན་སྤྱོད་ལས། གང་གི་དྲིན་གྱི་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང་། །བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པད་ལ་འདུད། ཅེས་སོ།
།མཆོད་རྟེན་བརྩེགས་པའི་རྒྱུད་ལས། སངས་རྒྱས་ཐམས་ཅད་འདུས་པའི་སྐུ། །རྡོ་རྗེ་འཛིན་པའི་ངོ་བོ་ཉིད། །དཀོན་མཆོག་གསུམ་གྱིས་རྩ་བ་སྟེ། །བླ་མ་རྣམས་ལ་ཕྱག་འཚལ་ལོ། ཅེས་སོ།
།མཚན་བརྗོད་ལས། མཆོད་འོས་བསྟོད་འོས་ཕྱག་གི་གནས། །རྟག་ཏུ་རི་མོར་བྱ་བའི་འོས། །བསྐུར་འོས་མཆོད་པ་བྱ་བའི་མཆོག །ཕྱག་བྱར་འོས་པ་བླ་མའི་རབ། ཅེས་སོ།
།མཁའ་འགྲོ་མ་ཐམས་ཅད་ཟིལ་གྱི་གནོན་པའི་རྒྱུད་ལས། སངས་རྒྱས་དང་བྱང་ཆུབ་སེམས་དཔའ་གང་གའི་ཀླུང་གི་བྱེད་མ་སྙེད་ལ་སྐལ་པ་གངྒཱའི་ཀླུང་གི་བྱེད་མ་སྙེད་དུ་བསྙེན་བསྐུར་བྱས་པ་བས་ནི། རྡོ་རྗེ་སློབ་དཔོན་གྱིས་བ་སྤུའི་བུ་ག་གཅིག་ལ་ཏིལ་མར་གྱིས་བྱུགས་པ་བསོད་ནམས་ཆེས་ཁྱད་པར་དུ་འཕགས་སོ། ཅེས་སོ།
།རྡོ་རྗེ་འཕྲེང་བ་ལས། རྡོ་རྗེ་སློབ་དཔོན་ལུས་འདི་ལ། །རྒྱལ་བའི་སྐུ་ནི་རིམ་བཞིན་གནས། །དེའི་གཟུགས་ཀྱི་ཕུང་པོ་ནི། །སངས་རྒྱས་རྣམ་པར་སྣང་མཛད་དོ།
།ཅེས་སོགས་ལྷ་སུམ་ཅུ་རྩ་གཉིས་ཀྱི་ངོ་བོར་བཤད་དོ།
སམ་བུ་ཊི་ལས། གང་ཕྱིར་ཕྱོགས་བཅུའི་སངས་རྒྱས་རྣམས། །བྱང་ཆུབ་སེམས་དཔའི་བསོད་ནམས་པས། །སློབ་དཔོན་བ་སྤུའི་ཁུང་གཅིག་མཆོག །ཅེས་སོ།
༼།བསྡུས་པ་ལས།༽ སངས་རྒྱས་ཆོས་རྣམས་དགེ་བའི་བཤེས་ལ་བརྟེན་ཏོ་ཞེས། །ཡོན་ཏན་ཀུན་གྱི་མཆོག་མངའ་རྒྱལ་བས་དེ་སྐད་གསུངས། ཅེས་སོ།
།བ་ཚྭ་ཅན་ཆུ་ཀླུང་གི་མདོ་ལས། ལྔ་བརྒྱ་ཐ་མར་གྱུར་པ་ན། །ང་ཉིད་སློབ་དཔོན་གཟུགས་ཀྱིས་གནས། །ང་ཡིན་སྙམ་དུ་ཡིད་བྱོས་ལ། །དེ་ཚེ་དེ་ལ་གུས་པ་བསྐྱེད། ཅེས་སོ།
།ས་ར་ཧས། འཁོར་བའི་སྡུག་བསྔལ་ཟབ་ཅིང་རྒྱ་ཆེ་ལས། །བསྒྲོལ་བར་བྱེད་པའི་གྲུབ་མཆོག་དེ་ནི་གཞན་མིན་ཏེ། ཅེས་སོ།
།ཆོས་རྗེ་ས་སྐྱ་པས། ཉི་མའི་འོད་ཟེར་རབ་ཚ་ཡང་། །མེ་ཤེལ་མེ་ན་མེ་མི་འབྱུང་། །དེ་བཞིན་སངས་རྒྱས་བྱིན་རླབས་ཀྱང་། །བླ་མ་མེད་པར་འབྱུང་མི་ནུས། ཅེས་སོ།
།བླ་མ་རྨོག་ལྕོག་པའི་གསུང་ལས། ཚེ་གཅིག་ལུས་གཅིག་ལ་སངས་རྒྱ་བ་ལ་བླ་མའི་མོས་གུས་དགོས། མོས་གུས་ལ་བླ་མའི་སྣང་བ་དང་མི་འབྲལ་བ་གཅིག་དགོས་གསུང་སྟེ།
ཁོང་གི་ཐག་ཆོད་ཀྱིས་གསུངས་ལས། ཐུགས་རྗེ་ཆེན་པོ་རང་ཤེས་དཀར་ན་ཡང་དཀར། །དགྱེས་རྡོར་བདེ་མཆོག་རང་སྔོ་ནའང་སྔོ། །རྡོ་རྗེ་ཕག་མོ་རང་དམར་ནའང་དམར། །ང་ལ་ནི་རེ་ས་བླ་མ་ལས་མེད། །ཇི་ལྟར་འདུག་ཀྱང་བླ་མའི་སྣང་བ་དང་འབྲལ་མ་མྱོང་བས། ཚེ་གཅིག་ལ་ལུས་གཅིག་གིས་སངས་རྒྱས་སམ་དེ་ཡོང་ཡོངས་འདྲ་གསུང་ངོ་།
།བླ་མ་སྐྱེར་སྒང་པའི་ཞལ་ནས། ཚེ་གཅིག་གིས་སངས་རྒྱ་བ་ལ་བླ་མའི་མོས་གུས་དགོས། མོས་གུས་ལ་བླ་མ་ཡང་ཡང་དུ་དྲན་པ་བུ་གཅིག་པོ་ཤི་བའི་མ་ལྟ་བུ་གཅིག་དགོས།
སངས་རྒྱས་གཉན་སྟོན་གྱིས་ཞལ་ནས། བླ་མའི་མོས་གུས་ལ་ཞེ་ཐག་པ་ནས་སྙིང་ཁོང་རུས་པའི་གཏིང་ནས་མཆི་མ་རང་དབང་མེད་པར་གསོལ་བ་འདེབས་པ་གཅིག་དགོས་གསུང་ངོ་།
།སངས་རྒྱས་སྟོན་པའི་ཞལ་ནས། བླ་མའི་མོས་གུས་ལ་བརྗེད་ངེས་ལོག་ལྟར་མ་སོང་བ་དགོས་གསུངས་སོ།
།གཞན་ཡང་བླ་མ་གཉན་སྟོན་གྱིས་ཞལ་ནས། བླ་མ་རྗེ་བཙུན་ཆེན་པོ། རིན་ཆེན་འབྲི་གུང་པ། ཞང་རིན་པོ་ཆེ། དུས་གསུམ་མཁྱེན་པ།
གཙང་པ་རྒྱ་རས། རྒྱལ་བ་རྒོད་ཚང་པ་ལ་སོགས་ཀྱི་དྲུང་དུ་ཕྱིན་པས་བླ་མའི་མོས་གུས་གཅིག་པུས་ས་ལམ་བསྒྲོད་པ་ལ་ཐམས་ཅད་མཐུན་པར་གདའ་གསུང་ངོ་།
།བླ་མའི་གསུང་གིས། བླ་མའི་བྱིན་རླབས་ལ་བརྟེན་ནས། རྒྱུད་རང་གྲོལ་དང་སྣང་བ་བདེན་མེད་དུ་ཕྱམ་མ་སོང་ན། དམིགས་པ་ལ་སོགས་པའི་གནད་ཀྱིས་དགེ་སྦྱོར་དམ་དུམ་སྐྱེ་ཡང་མཐར་ཐུག་མི་སྐྱེ་བས། བླ་མ་ལ་ཆོས་སྐུའི་འདུ་ཤེས་སྐྱེས་ན་བདེ་དྲོད་རང་འབར། སྒྱུ་མ་རང་ཤར། རྨི་ལམ་རང་ཟིན། འོད་གསལ་རང་ཤར། བར་དོ་རང་འབྱོངས་སུ་འབྱུང་གསུང་།།
༈ དབང་པོ་འབྲིང་གིས་སྐབས་སུ། སྒྱུ་མ་ལྟ་བུ་ཞེས་བྱ་བའི་ཏིང་ངེ་འཛིན་ཡོད་དོ། ཏིང་ངེ་འཛིན་དེས་རྣམ་པར་སྤྱོད་པའི་བྱང་ཆུབ་སེམས་དཔའ་མྱུར་དུ་མངོན་པར་སངས་རྒྱས་པར་འགྱུར་རོ། ཅེས་སོ།
།སྒྱུ་མ་ལྟ་བུའི་ཆོས་རྣམས་ལ། །སྒྱུ་མ་ལྟ་བུར་བསྒོམ་བྱས་ནས། །སྒྱུ་མ་ལྟ་བུར་མངོན་སངས་རྒྱས། །རྨི་ལམ་ལྟ་བུ་ཞེས་སྔར་བཞིན་གསུངས་སོ།
།ཁྱེའུ་རབ་སྣང་སྐབས་སུ། ནོར་བུ་ཚེ་གཅིག་ལ་བུ་གཅིག་ལས་མེད་པས་བུ་རབ་ཏུ་འབྱུང་ན། ནོར་རྒྱལ་པོས་འཁྱེར་བས་རབ་ཏུ་བྱུང་དུ་མི་གཏེར་ཏེ། དེས་སངས་རྒྱས་ལ་བདག་རབ་ཏུ་བྱུང་དུ་ཕ་མས་མ་གནང་བས། འདོད་པའི་ཡོན་ཏན་དང་བཅས་ཏེ་ཁྱིམ་ན་གནས་བཞིན་དུ་སངས་རྒྱ་བའི་གདམས་ངག་གཅིག་ཞུ་འཚལ། ཅེས་གསོལ་པ་དང་། ཆོས་རྣམས་སྒྱུ་མ་རྨི་ལམ་ལ་སོགས་པར་གསུངས་སོ།
།གང་གི་ཚིག་བརྗོད་དྲན་གྱུར་ན། །སྲིད་པའི་འཆིང་བ་ལས་གྲོལ་ནས། །ཚེ་འདི་ཉིད་ལ་སངས་རྒྱས་ངེས། ཅེས་སོ།
།ཏིང་ངེ་འཛིན་རྒྱལ་པོ་ལས། ཇི་ལྟར་ལམ་ན་མང་འདོད་པ་རྟེན། །སྐྱེས་བུ་སད་པར་གྱུར་ན་མི་མཐོང་ལྟར། །བྱིས་པ་དེ་ནི་འདོད་ལ་ཆགས་ཤིང་ཞེན། །ཆོས་རྣམས་ཐམས་ཅད་དེ་ལྟར་ཤེས་པར་གྱིས། ཅེས་དང་།
ལས་རྒྱ་མཚོའི་རྒྱུད་ལས། འགྲོ་ཀུན་སྐྱེས་པ་བུ་མེད་སྣ་ཚོགས་པ། །དེ་དག་རང་གི་སེམས་དང་ཐ་དད་མེད། །དེ་ཀུན་སྒྱུ་མའི་སྣང་བར་རབ་ཤེས་ན། །དེ་ཚེ་སངས་རྒྱས་ལག་པའི་མཐིལ་བསྟོད་འགྱུར།
།ཡེ་ཤེས་རྒྱ་མཚོའི་རྒྱུད་ལས། རང་ལུས་སྒྱུ་མའི་རྣམ་པར་ཤེས་པ། །འགྲོ་ཀུན་སྐྱེས་པ་བུད་མེད་སྣ་ཚོགས་པར། །ཐམས་ཅད་གཟུགས་ནི་སྒྱུ་མའི་རྣམ་པ་ལས། །མཁས་པ་སུ་དག་དེ་ལས་གཞན་དུ་བརྗོད། ཅེས་སོ།
།གཉིས་མེད་རྣམ་རྒྱལ་ལས། སྒྱུ་མ་འདི་ནི་ཡོད་མེད་ལས་འདས་ཤིང་། །དབུ་མ་ཙམ་དུའང་མི་གནས་ཀུན་རྫོབ་སྟེ། །ཆོས་རྣམས་ཐམས་ཅད་སྒྱུ་མའི་སྣང་བ་ལས། །འགགས་པ་མེད་པའི་རོལ་པ་རང་ཤར་འབྱུང་། ཅེས་སོ།
།ལྷའི་བུས་ཞུས་པའི་མདོ་ལས། སྣང་བ་མ་ངེས་པ་ནི་ཇི་ལྟར་བལྟ་བར་བགྱི། བཀའ་སྩལ་པ། ས་ལ་སར་སྣང་བ་ཡོད། ས་ལ་ཆུར། ས་ལ་མེར། ས་ལ་རླུང་། ས་ལ་ནམ་མཁར་སྣང་བ་ཡོད་དེ། དེའི་ཕྱིར་མ་ངེས་སོ། ཅེས་སོ།
།དེ་ཡང་སྲོག་ཆགས་སྦལ་པས་ས་ལ་ནམ་མཁའི་འདུ་ཤེས་ཡོད་པས། ཁོ་ས་འོག་ནས་རྒྱུགས་པས་སྟེང་ནས་རྟ་རྒྱུགས་པས་མི་ཟིན། རྒྱ་ཡུལ་ན་མེ་བྱི་ཡོད་པས་མེ་ལ་ཟས་གོས་ཀྱིས་སྣང་བ་ཤར་བས། མེ་བྱི་སྟོབས་དང་ལྡན་པ་ལུག་ཙམ་ཡོད། མེ་ཆུང་ན་མདངས་མེད་པ་བྱི་ལ་ཙམ་དུ་འགྲོ། ནམ་མཁའ་ལ་སར་འདུ་ཤེས་པ་ནི། མུ་སྟེག་རྟགས་པ་བས། ནམ་མཁའ་ལ་ལག་པ་རྒྱབ་པས་རྟོག་སྒྲ་ཡོངས་བས། སློབ་དཔོན་སངས་རྒྱས་ཡེ་ཤེས་ཞབས་ཀྱིས། ལྷོ་ཕྱོགས་ཀོང་ཀ་ནར་བྱོན་པ་ན། ལོ་ཐོག་དང་རྩི་ཤིང་ཐམས་ཅད་ནམ་མཁའ་ལ་སྐྱེས་འདུག་ནས། ངེད་ཀྱི་ཡུལ་ན་ས་ལ་སྐྱེས་བྱས་པས་བློར་མ་ཆུད་གསུང་། གཞན་ཡང་བྱ་རོག་དང་མིའི་ཉིན་མོ་ལ། སྲིན་བྱ་དང་འུག་པས་མཚན་མོ་དང་། ཁོང་གཉིས་ཀྱིས་ཉིན་མོ་ལ་མི་དང་བྱ་རོག་གི་མཚན་མོར་འདུ་ཤེས་པས། དེ་ཡང་སྣང་བ་མ་ངེས་པའོ།
གསུང་གསོལ་པ་སྒྱུ་མ་ལྟ་བུ་ཇི་ལྟར་བལྟ་བར་བགྱི། བཀའ་སྩལ་པ། རྒྱ་གར་གྱི་ཡུལ་དབུས་ན་རྒྱལ་པོ་དཔའ་བ་སྡུག་ཅིང་ལེགས་པ་གཅིག་འདུག་པས། རྟ་སྲེད་བྱུང་ནས་བཙུན་མོས་སྒྱུ་མ་མཁན་པ་བོས་ནས་རྟ་ལ་སྐྱེ་བའི་ཐབས་གྱིས་ཤིག་བྱས་པས། སྒྱུ་མ་མཁན་གྱིས་རྟ་ཚོ་བ། ལེགས་པ། གཟུགས་བཟང་མགྱོགས་པ་གཅིག་སྤྲུལ་ནས་སྒོ་དྲུང་ན་འདུག །བཙུན་མོས་རྒྱལ་པོ་གསེར་ཁྲི་ལ་ཞུགས་པ་ལ་རྟ་མི་ཉོ་འམ་བྱས་པས། རྟ་ཇི་འདྲ་གཅིག་འདུག་བྱས་པས། སྔར་གྱིས་དེ་རྣམས་ལས་ཆེས་ལྷག་པ་གཅིག་འདུག་བྱས་པས། རིངས་པའི་ཚུལ་གྱིས་སྒྱུ་མ་མཁན་གྱིས་རྩར་སོང་ནས་རིན་ཇི་ཙམ་འདོད་ཟེར། རྒྱལ་སྲིད་ཕྱེད་འདོད་བྱས་པས། ཆགས་ཐོགས་མེད་པར་འཇལ་ནུས་པ་བྱུང་། ཡང་རྩ་ན་མི་གཅིག་བྱུང་ནས། ཁོང་གཅིག་པོ་བདག་པོ་མིན་ཚོང་གཤའ་མ་གཅིག་བྱེད་ན་བཙུན་མོའི་ཕྱེད་འཇལ་ནུས་སམ། ནུས་པར་བྱུང་། ཡང་ཙ་ན་མི་གཅིག་བྱུང་ནས་ཁོང་ཚོ་ཀྱང་བདག་པོ་ནི་མིན། ཚོང་གཤའ་མ་གཅིག་བྱེད་ན་སྲས་དམ་པ་རྣམས་ཀྱིས་ཕྱེད་འདོད་བྱས་པས་ཅུང་ཟད་ཐེ་ཚོམ་བྱས་ནས་བང་འགྲོས་ཇི་འདྲ་ཡོད་ཟེར། རྒྱལ་པོ་རང་གཟིགས་ཤིག་བྱས་ནས། དེར་ཞོན་པས་རྒྱལ་པོ་རྟས་ཁྱེར་ཏེ། བསྐལ་པར་ཕྱིན་ཀྱང་མི་བསྒྲོད་པའི་རྩི་ཤིང་ལ་སོགས་པ་གང་ཡང་མེད་པར། གཅན་གཟན་གདུག་པ་ཅན་རྒྱུ་བའི་ཐང་ཆེན་པོ་གཅིག་གི་འགྲམས་ན་མཚོ་གཅིག་འདུག་པའི་རྩར་རྒྱལ་པོ་སྒྱུར་ནས་རྟ་དེ་མཚོ་ལ་འཕྱོངས་སོང་། རྒྱལ་པོ་མྱ་ངན་བྱེད་ཅིང་ཕྱོགས་གཅིག་ན་ཕར་ཕྱིན་པས་དུད་དྲི་གཅིག་བྱུང་། མི་དང་འཕྲད་པར་འགྱུར་སྙམ་ནས་རྩལ་བས་གྲོགས་པོ་གཅིག་གི་ནང་ན་ཁང་ཆུང་གཅིག་གི་ནང་ན་རྒན་རྒོན་གཉིས་ལ་བུ་མོ་མདོག་ཤིན་ཏུ་ལེགས་པ་གཅིག་དང་། བུ་དིག་པ་གཅིག་འདུག །སྔར་གྱིས་ལོ་རྒྱུས་བརྗོད་པས། རྒན་རྒོན་གཉིས་ན་རེ། དེ་ཁྱེད་རང་གི་ཁབ་ཏུ་ཕྱིན་པས། བཙུན་མོ་དང་འཕྲད་པ་མི་འོང་བས། ངེད་ཀྱིས་བུ་མོ་དང་ལྷན་གཅིག་སྡོད་ཟེར། བསྡད་པས་ལོ་བདུན་སོང་བུ་ཚ་ལྔ་བྱུང་། དེ་ནས་རྒན་པོ་ན་རེ། རྒྱལ་པོ་ཁྱོད་བསོད་ནམས་དང་ལྡན་པ་ཡིན་པས། བུ་དིག་པ་འདི་ལ་བྱམས་སུ་བགྱིས་ཤིག་ཟེར་ནས་མཚོ་དེ་ལ་འཕྱོངས་སོང་། དེ་བཞིན་དུ་རྒན་མོ་དང་བུ་མོ་རྣམས་ཀྱང་རིམས་ཀྱི་དེ་སྐད་ཟེར་ཞིང་འཕྱོངས་སོང་། མཐར་ལྐུག་པ་ཡང་ཁ་བྱེ་ནས། རྒྱལ་པོ་ཁྱོད་བསོད་ནམས་ཆེ་བས་སྐྱིད་པ་གྱིས་ཟེར་ནས་འཕྱོངས་སོང་། དེར་རྒྱལ་པོ་མྱ་ངན་སྐྱེས་ནས། ཉི་གྲིབ་འཚམས་ལ་རྔམས་རིང་ན་ར་ར་འདུག །དེར་བཙུན་མོ་ན་རེ། ད་སེར་མ་ཡོངས་པས་སྒྱུ་མ་ཤིག་ཟེར་བཤིག་པས། ལོ་བདུན་ལ་གྲིབ་མ་སོར་བདུན་ལས་མ་འདས་པར་འདུག །དེས་ན་སྐད་ཅིག་མ་ཡུན་དུ་འཁྲུལ་བ་ཡིན། དེར་རྒྱལ་པོས་རྒྱལ་སྲིད་བཙུན་མོ་དང་བཅས་པ་ཐམས་ཅད་སྔར་གྱིས་སྒྱུ་མ་དང་ཁྱད་མི་འདུག་སྙམ་ནས། སངས་རྒྱས་ཀྱི་དྲུང་དུ་རབ་ཏུ་བྱུང་ནས་བསྒྲུབ་པས། དགྲ་བཅོམ་པའི་འབྲས་བུ་ཐོབ་སྟེ། ལྷའི་བུ་སྒྱུ་མ་ནི་དེ་ལྟ་བུ་ཞེས་གསུངས་སོ།
།ཡང་གསོལ་པ་འཕགས་པ་རྨི་ལམ་ཇི་ལྟར་བལྟ་བར་བགྱི། བཀའ་སྩལ་པ། རྒྱ་གར་ལྷོ་ཕྱོགས་ན། རྒྱལ་པོ་ཟླ་བ་བཟང་པོ་ཞེས་བྱ་བ་ལ་བུ་མོ་གཟུགས་མཛེས་པོ། ལྟ་ན་སྡུག་པ་རིན་པོ་ཆེའི་རྒྱན་དང་ཆས་སུ་ཡོད་པ་གཅིག་ལ། རེ་ཞིག་ན་དེ་མྱ་ངན་གྱི་ཁང་པར་བཞུགས་པར་གྱུར་ཏེ། གཡོག་མོ་སུམ་ཅུ་རྩ་གཉིས་ཀྱི་ནང་ནས་དྲག་པ་གཅིག་གིས། ལྷ་གཅིག་འདི་ལྟ་བུའི་ཕུན་སུམ་ཚོགས་པའི་དུས་སུ་ཅིའི་ཕྱིར་མྱ་ངན་བྱེད་དྲིས་པས་འབྱོར་པ་ཀས་བདག་གི་ཁྱིམས་ཟླར་གྱུར་པའི་འོས་མི་རྙེད་པས་སོ། ཅེས་དང་། འོ་སྐོལ་རང་གི་དགྲ་ཟླར་གྱུར་པ་ལ། བུ་མཛེས་ཤིང་ལྟ་ན་སྡུག་པ་གཅིག་ཡོད་པས་དེ་དང་གཉེན་བྱའོ་བྱས་པ་དང་། རུང་ཟེར་ནས་རིན་པོ་ཆེའི་བརྒྱན་སྲང་བྱེ་བ་རི་བ་གཅིག་བསྐུར། རྒྱལ་པོས་ཀྱང་དེ་ལྟ་བུ་གཅིག་བསྐུར་སྐད། དེར་དགྱེས་ནས་ཡོད་པས། རྨི་ལམ་དུ་རྒྱལ་བུ་མཛེས་པ་དང་འགྲོགས་ནས་བུ་ཡིད་དུ་འོང་བ་གཅིག་བརྩས་པས་དགའ། དེ་ནས་བུ་ཤི་ནས་མྱ་ངན་དུ་གྱུར་པ་དང་གཉིད་སད་ཁར་སངས་རྒྱས་ཡེ་ཤེས་བླ་མས་ཛ་ཡ་སིདྡྷི་བསོད་སྙོམས་བླངས་གསུངས་པས། མོས་ཇི་ལྟར་བུ་མོ་གཞོན་ནུས་རྨི་ལམ་ན། །བུ་ཕོ་སྐྱེས་ཤིང་ཤི་བ་དེ་མཐོང་ནས། །བྱུང་ན་དགའ་ཞིང་ཤི་ན་མི་འགལ་ལྟར། །ཆོས་རྣམས་ཐམས་ཅད་དེ་ལྟར་ཤེས་པར་གྱིས། ཞེས་ཐོས་ཤིང་རྨི་ལམ་དྲན་པས། སྐྱེ་བ་སྐྱེས་ཏེ་ཁྱིམ་སྤངས་ནས་བསྒྲུབ་པས་འབྲས་བུ་ཐོབ་སྟེ་རྨི་ལམ་ལྟ་བུའོ། །ཡང་ལྷའི་བུའི་གསོལ་པ་སྣང་བ་མི་བདེན་པ་བརྫུན་པ་ཡིན་ན། ཅིའི་ཕྱིར་ས་རྡོ་བྲག་ལ་སོགས་པ་སྲ་ཤིང་ཐས་སར་སྣང་། །ཅེས་གསོལ་པ་དང་། བཀའ་སྩལ་པ། ལྷའི་བུ་དག་དྲང་སྲོང་མེས་བྱིན་གྱིས་རྟག་ཏུ་བསྒོམ་ནས་དེས་མི་མང་པོ་ཟོས་པ་དང་། ཡང་དགེ་སློང་གཅིག་ཀླུ་སྲིན་མོ་གཅིག་གནོད་པ་ལ་ཀེང་རུས་སུ་བསྒོམ་པས། དེའི་བག་ཆགས་བལྟས་ནས་ང་ལ་མ་གཅིག་འཇིགས་པར་འགྱུར་རོ་ཞེས། བག་ཆགས་ཡུན་ཐུང་པས་ཀྱང་དེ་ལྟར་ལས་མཐས་སུ་གྱུར་ན། ཐོག་མ་མེད་པ་ནས་བསགས་པའི་བག་ཆགས་ངན་པ་ལ་ཡུན་དུ་གོམས་པས་ཅིའི་ཕྱིར་བདེན་པར་མི་འཛིན་ཏེ། ལས་མཐས་སུ་ཞེན་པའོ། །ལྷའི་བུ་དེའི་ཕྱིར་མི་བདེན་པར་རྟོགས་པར་བྱའོ། །ཞེས་གསུངས་སོ།
།འདི་ནི་བདེན་པར་སྣང་ཡང་ཆོས་ཐམས་ཅད་རྫུན་པའི་སྐབས་སུ་སྦྱོར་བར་གནང་ངོ་། །དེ་ཡང་སྒྱུ་མ་ནི་སྣང་ལ་བདེན་མེད་གཅིག་ལ་ཟེར་ཏེ།
ནི་གུ་མའི་གསུང་གིས། སྣང་ཡང་བདེན་པར་མ་གྲུབ་ཅིང་། །སྟོང་ཡང་འཛིན་པས་མ་སླད་པ། ཅེས་སོ།
།དེ་ཡང་སྒྱུ་མའི་སྣང་བ་དེ་རྒྱུ་རྐྱེན་ཚོགས་ན་འབྱུང་གི་མ་ཚོགས་ན་མི་འབྱུང་སྟེ། ཟླ་བའི་དཀྱིལ་འཁོར་དྭངས་ཤིང་ནམ་མཁའ་ལ་སྒྲིབ་བྱེད་མེད་ན། འཛམ་བུའི་གླིང་གི་ཆུ་སྐྱོགས་ཐམས་ཅད་ཟླ་བའི་གཟུགས་བརྙན་དུ་འཆར་ཞིང་། ཆུ་སྐྱོགས་འགྱེལ་ན་ཟླ་བ་ཆུ་ཁྱེར་བ་འམ། སྣོད་ལ་ཐིམ་པ་མིན་ཏེ། རྒྱུ་རྐྱེན་ཚོགས་པ་ཞིག་པས་མི་སྣང་བའོ།
།སངས་རྒྱས་སྟོན་པས་སྐྱེས་པ་སྟག་གདོང་དང་བཅས་ནས་སངས་རྒྱས། བུད་མེད་བལ་བསྐུར་དང་བཅས་ནས་སངས་རྒྱས། གཙོ་བོ་མདུན་མ་དང་བཅས་ནས་སངས་རྒྱ་བའི་ཆོས་ཡིན་གསུང་ངོ་།།
Story of Atisha and Rinchen Zangpo
༈ །ཇོ་བོ་རྗེ་དང་ལོ་ཙྪ་བ་རིན་ཆེན་བཟང་གིས་གཏམ་རྒྱུས་ལ་བརྟེན་ནས་ངེས་ཤེས་བསྐྱེད་པ་ནི།
ཇོ་བོ་རྗེ་རྒྱ་གར་ནས་བྱོན་དུས་ལོ་ཙྪ་བ་རིན་ཆེན་བཟང་པོའི་ཐུགས་དགོངས་ལ། ངས་མཁས་ལྡིང་གི་གཙུག་ལག་ཁང་དུ་གདན་དྲངས་ནས། འོག་གི་བྱ་སྤྱོད་ཀྱིས་ལྷ་ཚོགས་ལ་ཕྱག་མཛུག་གཙུགས་ནས་བསྟོད་པ་རེ་མཛད་པས། བྱ་སྤྱོད་ཀྱིས་རྒྱུས་ཆེ་བར་འདུག་སྙམ། བར་ཡོ་གའི་ལྷ་ལ་བསྟོད་པས་ཡོངས་སུ་རྫོགས་པའི་པཎྜི་ཏ་ཡིན་ནམ་སྙམ། སྟེང་བླ་མེད་ཀྱི་ལྷ་ལ་བསྟོད་པས་ཡོངས་སུ་རྫོགས་པའི་པཎྜི་ཏར་ཤེས་ནས་མོས་སོ། །དེར་ཇོ་བོའི་ཞལ་ནས་ལྷའི་བཀོད་པ་འདི་རྣམས་ལེགས། །ཉམས་སུ་ཇི་ལྟར་ལེན་གསུང་། ཐུན་གསུམ་དུ་རིམ་པ་བཞིན་བསྒོམ་ཞུས་པས། སྙིང་པོ་བསྡུ་མི་ཤེས་འདུག་གསུངས་ནས་མ་མཉེས་པས་ང་རྒྱལ་འཆག་ནས། གདམས་པ་ཚིག་ཉུང་ལ་དོན་འདྲིལ་བ་ཉམས་སུ་བླངས་བདེ་བ་གཅིག་ཞུ་བྱས་དེའང་ཡིན་ཏེ། ཆོས་བྱས་ན་འཐད་གསུངས། བསྒོམ་པ་ལ་མི་མཉེས་པར་འདུག་སྙམ་ནས། བཤད་དམ་བྱས་པས་སྔར་བཞིན་གསུང་། དེའི་དོན་ལ་གོ་ནས་ཞུས་པས། ཚེ་བློས་ཐོང་ཚེ་བློས་ཐོང་གསུང་། དེར་སྔར་གྱི་མཐར་ཐུག་བཅུ་གསུམ་ལ་སོགས་པའང་ཚེ་འདིའི་རྒྱན་དུ་སོང་འདུག་པས། ད་ཚེ་བློས་བཏང་གི་བསྒྲུབ་པ་གཅིག་བྱེད་པར་ཞུས་པས། ཇོ་བོའི་གསུང་གི་རྒྱ་ལོ་ཙྪ་བ་ཤི་བས་ངའི་ལྕེ་ཆད་ད་ཁྱེད་འགྲོ་དགོས་གསུངས་པས། དབུ་སེ་སོང་པ་བསྟན་ནས། ད་བདག་ཚེ་བློས་བཏང་གིས་བསྒྲུབ་པ་གཅིག་ཅིས་ཀྱང་བྱེད་པར་ཞུ་ཞུས་ནས། ཕྱི་སྒོ་ལ་རྣལ་འབྱོར་གྱིས་དབང་ཕྱུག་རིན་ཆེན་བཟང་པོ་ཁྱེད་དུས་ད་ནས་སངས་མ་རྒྱས་ཀྱི་བར་དུ་སྒོ་འདི་ནས་འཐོན་ན། དུས་གསུམ་གྱིས་སངས་རྒྱས་ཀྱི་མགོ་བོ་ཚལ་པ་སྟོང་དུ་ཁོས་ཅིག །ཅེས་སྣག་ཚས་བྲིས། །གཙུག་ལག་ཁང་གི་སུམ་རིམ་གྱིས་བར་སྒོ་ལ་ཆོས་མིན་གྱིས་རྣམ་པར་རྟོག་པ་སྐད་ཅིག་མ་ཅིག་རྒྱུ་ན་ཅེས་པ་ཟངས་ལས་བྲིས། སྒོ་ནང་མ་ལ་ལུས་ངག་ཡིད་གསུམ་ཐ་མལ་དུ་ཅུང་ཟད་གཅིག་ལུས་ན་ཅེས་དངུལ་གྱི་བྲིས། གཟིམས་མལ་ལོགས་ལ་མལ་འདི་ལས་གཡོས་ན་དུས་གསུམ་གྱིས་མགོ་བོ་ཚལ་པ་སྟོང་དུ་ཁོས་ཅིག་ཅེས་པ་གསེར་གྱིས་བྲིས་ནས་བསྒྲུབ་པས་མཁའ་སྤྱོད་དུ་བྱོན་ནོ། ཇོ་བོས་ཀྱང་ཚེ་བློས་གཏང་མཐུན་འཇུག་སྤངས་པའི་ཕྱག་ལེན་ཁོ་ན་མཛད། །སྐུ་གཤེགས་པའི་རྗེས་སུ་ཡང་ཟབ་ཆོས་ཡོད་ཟེར་བའི་བསེའི་གའུ་གཅིག་ཆོས་སྐྱོང་ལ་གཏད། ཁ་འབྱེད་མི་ནུས་པར་ཡོད་པ་ལ། ཧོར་གྱི་བཤང་ནས་ཤོག་རིལ་མང་པོ་བྱུང་། སུས་ཐོབ་བྱས་པས་འཆི་བ་ཡིན། འཆི་བ་ཡིན། བརྒྱ་རྩ་རེ་ཙམ་དང་། ནམ་འཆི་ཆ་མེད། ནམ་འཆི་ཆ་མེད། ཅེས་པ་དང་། ཚེ་རིངས་ཡོངས་ན་ཚེ་རིང་ཤོག །ཚེ་ཐུང་ཡོང་ན་ཚེ་ཐུང་ཤོག །ཚེ་རིངས་ཚེ་ཐུང་གཉིས་ཀ་ཡང་། འཆི་བའི་ཚེ་ན་དེ་འདྲར་ཟད། ཅེས་པ་དང་། ཅིས་ཀྱང་དགོས་པ་མེད་དགོས་པ་མེད་ལ་སོགས་པ་མང་དུ་བྲིས་འདུག །དེ་ལ་འགའ་ཞིག་ཟབ་ཆོས་ཀྱི་ཚུག་གམ་ཟེར་བསགས་པ་ཅན་གཅིག་གིས་གོ་དེ། ཚེ་བློས་བཏང་སྟེ་སྒྲུབ་པ་མཛད་དོ།།
Story of Kharak Gomchung
༈ །ཁ་རག་བསྒོམ་ཆུང་གི་གཏམ་རྒྱུད་ལ་བརྟེན་ནས་ངེས་ཤེས་བསྐྱེད་པ་ནི།།
༈ ཁ་རག་བསྒོམ་ཆུང་འཕན་ཡུལ། མདེའུ་ཀ་རུའི་བྲག་ལ་བསྒྲུབ་པ་མཛད་པའི་ཚེ། སྤོ་ཏོ་བས་བྲག་ཕ་གི་ན་གཙང་ཁ་རག་བསྒོམ་ཆུང་བསྒོམ་བྱེད་དེ། ཐོས་ཆུང་བསྒོམས་པ་བྱེད་པ་ནི། ལག་ལྡུམ་བྲག་ལ་འཛེགས་པ་འདྲ། བྱེས་ཀྱིན་ཞལ་བག་རེ་བཏང་བས། གྲྭ་པ་རྣམས་ཀྱིས་ཀྱང་བསྐུར་པ་བཏབ་པ་དང་། འཐབ་ཏུ་བསྟུབ་ཉེན་ཡང་མེད་ལྟར་འདེངས་གསུངས་ནས་བྱོན་པས། ཁོང་ལ་རི་དྭགས་ཚོ་བྲོས་སོང་། བཞུགས་པའི་ཕྱོགས་བཞི་ལ་མཐོ་རེ་ལ་ཡི་གེ་བཏབ་པ་བལྟས་པས། ཤར་ན། ཉམ་ཆུང་བདག་ལ་རྐྱེན་ངན་གནོད་པ་མང་། བརྟན་པ་ཐོབ་ན་རྐྱེན་ངན་གྲོགས་སུ་འཆར་ནགས་ཀྱི་མེ་དང་མེ་སྟག་ཇི་བཞིན་དུ། །གཅིག་པུར་གནས་པ་ཁོ་བོའི་གབྱར་དམ་ལགས། ལྷོ་ན། འཆི་བདག་བདུད་ནི་མི་སྡོད་ཚུར་ཚུར་ཡོང་། །དེ་ལས་ཐར་བའི་ཐབས་ནི་ཅི་ཡང་མེད། ད་ལྟ་གཉིད་དང་ལེ་ལོའི་དབང་སོང་སྟེ། །ཇི་འདྲའི་དུས་གཅིག་བདག་ལ་ནམ་ཡོང་ཨཾ། ནུབ་ན། ཚེ་འདིའི་ལྟོ་རྒྱབ་ཇི་ལྟར་བྱས་ཀྱང་ཕྱེད། །ཤི་ནས་བྱང་ཆུབ་འབྲས་བུ་བཙལ་ཐབས་མེད། །དགྲ་ཟིན་སྡེ་རིགས་ཀུན་ལ་མ་ཆགས་པར། །བསོད་ནམས་ཆེན་པོ་མྱུར་དུ་བསགས་པ་གཅེས། བྱང་ན། ཚེ་ལ་ལོང་མེད་ཐ་སྙད་ཐུག་པ་མེད། །དེ་བས་དམ་པའི་དགོངས་པ་ལོངས་མཛོད་ལ། །འདུ་འཛི་སྤངས་པའི་དགོན་པར་ཞི་གནས་བསྟེན། །བསེ་རུ་ལྟ་བུ་གཅིག་པོར་གནས་པར་བྱ་དང་། ཅེས་པ་མཐོང་བས་རང་དཔའ་ཞུམ་ཞིང་ཁོང་ལ་ངེས་ཤེས་སྐྱེས། །ནང་དུ་ཕྱིན་ཙ་ན་རི་དྭགས་ཕྲུ་གུ་རྣམས་ཁོང་གི་སྐྱིལ་ཀྲུང་ལ་བོག་མ་བཀལ་ནས་ཉལ། རི་དྭགས་བཞེས་པའི་ཞོ་རང་རང་ཕྲུ་གུ་ལ་འདུད་པའི་ཆས་སུ་འདུག །ཁོང་ནང་དུ་བྱོན་པ་དང་རི་དྭགས་ཕྲུ་གུ་རྣམས་བྲོས་བཏབ་མའི་ཤུལ་ལ་བྲོས་སོང་། །ང་ལ་རི་དྭགས་འབྲོས་ཁྱོད་ལ་མི་འབྲོས་པ་འཇུག་ཡིན་བྱས་པས། སྐྱེ་བ་ལྔ་བརྒྱར་ཤ་མ་ཟོས་པ་ཡིན་གསུང་། ཁོང་སྔར་ཟན་ཆང་པ་རེ་ལོ་མ་ཆགས་པར་རེ་ལ་གསོལ་རྒྱུ་མཛད་པ་ལ། ད་ན་ལྟོ་སྐྱིད་བྱེད་པ་ཡིན་གསུང་ནས། སྤོ་ཏོ་བ་ལ་ཟན་ཆང་པ་གཉིས་དང་ལོ་ཆང་པ་གཉིས་དྲངས། ཁྱེད་ཀྱིས་ཉམས་ལེན་ཇི་ལྟར་བྱས། ཉམས་སུ་ཇི་ལྟར་མྱོང་བྱས་པས། ཁ་རག་པས། བདག་གི་དལ་འབྱོར་རྙེད་དཀའ་དང་། འཆི་བ་མི་རྟག་པ་བསྒོམ་པས་ཚེ་འདིའི་བློ་ལྡོག་པར་གོ །ལས་རྒྱུ་འབྲས་དང་འཁོར་བའི་ཉེས་དམིགས་བསྒོམ་པས་མི་བདེ་བ་ལས་བློ་ལྡོག་པར་གོ །བྱམས་སྙིང་རྗེ་བྱང་ཆུབ་ཀྱི་སེམས་བསྒོམ་པས། རང་གཅིག་པུ་ཞི་བདེ་ལས་བློ་ལྡོག་པར་གོ །ཆོས་ཐམས་ཅད་རང་བཞིན་མེད་པར་བསྒོམ་པས། བཟུང་འཛིན་ལས་བློ་ལྡོག་པར་གོ །ཅེས་གསུངས་པས།
སྤོ་ཏོ་བ་མོས་ནས། ཁྱེད་བསྒོམ་ཆུང་གཅིག་མི་འདུག་བསྒོམ་ཆེན་གཅིག་གདའོ། སྨྲ་བའི་སེངྒེ་གཅིག་གདའོ། མིའི་སྐྱེས་མཆོག་གཅིག་གདའོ། ཞེས་བསྟོད་པ་མང་པོ་མཛད་དོ། དེར་ཁོང་དཔོན་གཡོག་གི་སྒྲགས་པ་ནས་སྙན་པ་ཆེན་པོ་བྱུང་སྟེ། འཕན་ཡུལ་བས་གདན་དྲངས་ནས་འབུལ་བ་ཆེན་པོ་བྱས། ཁྱེད་ལ་ཡུལ་དང་གཞན་ལ་ཁྱད་མེད་པས་བཞུགས་པར་ཞུ་བྱས་པས། ངའི་ཡུལ་ན་དད་པ་ལྷ་ཁང་ནས་ཆད་པ་ཡོད་པས་དགེ་སྦྱོར་ལ་གཡེངས་བ་མི་འོང་། དེའི་ཕྱིར་ཡང་གཡེང་བ་མི་འོང་བས་བྲོད་དོ་བསྐོར་སྐུ་བསླུད་མེད་པས་རིག་པ་རང་བཞིན་གྱིས་དྭངས། དེའི་ཕྱིར་ཡང་བྲོད་གསུང་ནས་མ་གསན། མཆེད་ཟླ་དབང་རྡོར་ལ་རྟ་དང་གོས་བྱིན་ནས། ཞུ་རོག་བཙལ་བས་ཀྱང་སྤུན་ཟླ་རྟ་དང་གོས་དར་དུ་མི་འཚོང་། ངེད་རང་ལ་ཡང་དངོས་གྲུབ་ཀྱི་ནོར་བུ་ཡར་གདན་དྲངས་ནས་བསྒྲུབ་པ་བྱེད་དུ་འཇུག་གསུངས་ནས་མ་གསན། དོན་ངེད་རྣམས་ལ་གདམས་པ་གཅིག་ཞུ་བྱས་པས། སོ་ཐུབ་པར་གྱིས། སོ་ཐུབ་པར་གྱིས་གསུངས་དེའི་དོན་མ་གོ་ཞུས་པས། ད་ལྟར་བཙུན་ཆུང་རྣམས་ལའང་ཆོས་བསྒོམས་ཐོན་པ་མཁས་པ་བཟང་པོ་རེ་བྱ་སྙམ་འདུག །སྒྲོས་པ་དང་གཉེར་པ་རྣམས་ལའང་རང་ཆོས་མགོ་ཐོན་པ་མི་ཆེད་དུ་འགྲོ་བ་རེ་བྱ་སྙམ་འདུག་པས་དེ་རྣམས་མནོས་པ་བཞིན་གྱིས་གསུངས་ནས། ཁ་རག་ཕུག་ནག་ཏུ་གཤེགས་ནས་བསྒྲུབ་པ་མཛད། ཁོང་བཞུགས་པའི་བྲག་ཕུག་ན་ལངས་ན་བྲག་ཟུར་ན་དབུ་ཐུག་ནས་ཁྲག་འོང་། སྒོ་རྩར་ཕྱིན་ན། སྒོ་འཕྲང་ལ་བསེ་ཕུང་གཅིག་ཡོད་པས་ཚེར་མས་བྲད་ནས་ཁྲག་འོང་པ་གཅིག་ཡོད། འདི་གཉིས་གཅད་དགོས་པ་འདུག་སྙམ་པ་བྱུང་ཡང་། ད་ལྟ་ཀ་འཆི་ཉན་ཡོད་སྙམ་ནས་དེ་ཡང་གཅོད་མ་ཁོམ་པར་ཐུགས་དམ་རྩེ་གཅིག་མཛད་གསུང་། ཨྀཐི།།
༈ འདིར་བླ་མ་ཁ་ཅིག་གིས་ལྕེ་བསྒོམ་མཁའ་སྐྱོངས་གྲག་པ་ཡིན་གསུངས་ཡང་། བདག་གིས་བླ་མའི་གསུང་གི་ལྕེ་བསྒོམས་ནག་པོ་ཡིན། དགའ་རབ་རྡོ་རྗེའི་ཚིག་གསུམ་གནད། བརྟེན་གི་སྒོ་བསྐྱེལ་མཛད་གསུང་ངོ་།།
༈ ལྕེ་བསྒོམ་གྱིས་རྫོགས་ཆེན་གྱིས་ཆོས་སྒོ་སྐྱེལ་མཛད་པས། སྔར་དང་མི་འདྲ་བའི་ལམ་སྤྱོད་ཆེན་པོ་ཡོད་གསུང་། དེའི་དུས་སུ་བྱང་སེམས་འབྱོངས་ནས་གཅན་གཟན་དང་རི་དྭགས་རྣམས་རྒྱང་ཁྱུ་འདྲེས་ནས་སྡོད་པ་ཡོད་དོ། དེའི་སྙན་པ་ལྷོ་པ་རྟ་བསྒོམ་གྱིས་ཐོས་ནས་ཆོས་ལ་འགྲོ་བྱས་པས། ཆུང་མ་ན་རེ་དད་པ་ཐལ་ཐོལ་མི་ཆོས་ཀྱིས་སད་ཡིན། ད་ལྟ་མི་སྨོན། རང་སྐྱིད་ནི་ཡོད་སྡོད་ཟེར། མ་ཉན་པས་འོ་ན་བཙུན་པ་གཅིག་གྱིས། བཙུན་ཡུན་རིང་པ་གཅིག་གྱིས། བཙུན་ཁྱེར་མཁས་པ་གཅིག་གིས། བཙུན་མི་ལ་མི་གནོད་པ་གཅིག་གིས་གསུང་ཟེར་ནས་མ་ཤི་བར་མོ་རང་གིས་རྒྱགས་བསྲིངས། འཆི་ཁར་རྒྱགས་བསྲིངས་པའི་ཐ་མ་ཡིན་ནོ་ཟེར་གསུང་། ཁོང་གིས་བྱོན་པས་མཇལ་ཁ་མ་བྱུང་བར་བགུགས་པས་ལོ་གསུམ་སོང་བ་དང་། སྟེང་ན་མར་གཟིགས་པས་དབང་ཧོར་གྱི་ཞིང་ཁ་ན་ལས་རོག་བྱེད་པ་གཅིག་འདུག་པ་སུ་ཡིན་གསུང་སྔར་གྱི་ལྷོ་པ་དེ་ཡིན་ཟེར་བས། ད་འཕྲད་ཀྱིས་ཤོག་གིས་གསུང་། ཕྱིན་པས་འགྱུར་ནས་མཇལ་ཁ་མ་བྱུང་། འོ་ན་མར་འདི་རྣམས་དཀོན་མཆོག་ལ་འབུལ་བར་ཞུ་བྱས་ནས་དེ་བཤགས་མེད་གསུང་ནས་བསྣམས་པས། མར་ལ་འཕྲད་ནས་མི་ལ་མ་འཕྲད་པ་འདུག་གསུང་ནས། འཇལ་ཁ་བཏང་གདམས་པ་གནང་སྟེ། ད་ལྟ་ཆོས་འབྲེལ་གཅིག་ཞུ་བྱས་པས་སྡོད་རིས་མནའ་སྐྱེལ་གསུང་། དགེ་སློང་ཡིན་པས་མནའ་མི་འདོར་ཞུས། སློབ་མ་གཅིག་པོ་དེ་ལས་མ་སྐྱངས་གསུང་། ཁོང་གི་ཁ་རག་བསྐོར་གསུམ་ལ་བཤད་པ་མཛད་པས། གྲྭ་པ་སྟོང་ཕྲག་གཉིས་ཙམ་འདུས། བབྲས་སྤུངས་ནས་མི་རྒན་གཅིག་གིས་རྗེས་སྙགས་དགོས་ཡོད་པས་གྲྭ་པ་རྣམས་གྱེད་ཅིག་གསུངས་ཀྱང་འགྱེས་སུ་མ་འདོད་པས། ཉིན་གཅིག་རྟེན་འབྲེལ་གཅིག་ཡོད་དཔེ་ཆ་ལྷ་རྟེན་དང་རྫས་རྣམས་ཕྱིར་ཐོན་གསུང་ནས་སྟོན་པས། དགོན་པའི་མཐའ་གཉིས་ནས་མེ་བཅུག་བསྲེགས་ནས་ཕུག་ནག་ཏུ་བསྒྲུབ་པ་མཛད། ལོ་གསུམ་མཛད་ནས་ཉེ་གནས་ལ་ཤོག་གསུངས། ཕྱིན་པས་གཞན་གཅིག་ཏུ་འགྲོ་སྐྱེལ་ཐུང་ལ་ཤོག་གསུངས། བཞུགས་པར་ཞུས་པས་མ་གསན་ནས། བདག་ཀྱང་འཁྲིད་པར་ཞུ་ཞུས་པས་སང་ལྷའི་ཉི་མ་རི་རྩེ་ལ་ཤར་བ་ལ་ཤོག་གསུང་། དེར་ཁོ་མི་འདྲས་འགོར་ནས་སང་ཉི་མ་ཕྱེད་ཡོལ་ལས་མ་ཐོན་ནས་ཕྱིས་པས་ཕུག་ནག་གི་བྲག་དེ་འཇའ་ཡི་དྲིལ་ནས་འདུག །ནང་དུ་ཕྱིན་པས་ནམ་བཟའ་སྦུ་གུ་ཧ་རེ་མཁའ་སྤྱོད་དུ་གཤེགས་འདུག །དེར་སློབ་མ་གཅིག་དེ་ལ་གཞན་ཕན་ཆེན་པོ་བྱུང་ཞིང་ད་ལྟར་ཁ་རག་ྦསྒོམ་པ་ཞེས་མཚན་ཐོས་པ་ཙམ་གྱིས་དོན་ཆེན་པོར་འགྱུར་གྱིས་ཡོད་པ་ཡིན་གསུང་།། ཨྀཐི།།
Story of Neljor Chojung
རྣལ་འབྱོར་ཆོས་འབྱུང་གིས་གཏམ་རྒྱུད་ལ་བརྟེན་ནས་ངེས་ཤེས་བསྐྱེད་པ་ནི།
༈ རྣལ་འབྱོར་ཆོས་བྱུང་གི །དྭགས་པོ་རིན་པོ་ཆེའི་སློབ་མ་མཉེས་ཤེས་ཡིན་གསུངས། ཐག་རིང་གིས་གྲྭ་པ་འམ་མི་ཆེན་རྣམས་ཀྱིས་ཆོས་རྗེའི་སློབ་མ་དྲག་ཤོས་སུ་ལགས་ཞུས་པས། ཆོས་ཀྱི་གཡུང་དྲུང་གསུང་། གཏུམ་མོ་འབྱོངས་པ་སུ་ལགས། རྟོགས་པ་ཐོབ་པ་སུ་ལགས་ཞུས་པས། ཐམས་ཅད་ལ་ཆོས་ཀྱི་གཡུང་དྲུང་གསུངས། དེའི་སྤྱོད་ཚུལ་ནི་ནམ་བཟའ་སྐྱ་མན་སེར་མན་གཅིག་གསོལ། ཕྲུ་གོག་གཅིག་དང་ཁྱི་ལྤགས་ཀྱི་སྦུད་པ་གཅིག་ཁྱེར་ཏེ་བསོད་སྙོམས་ལ་བྱོན་ནས་སྣངས་མ་དང་ཟན་སྐམ་དང་རྩམ་པ་སིང་པོ་གང་བྱུང་ཐམས་ཅད་ཕྲུ་གོག་ཏུ་བླུག །རྟ་སྦང་བོང་སྦང་། མི་ལུད་ཁྱི་ལུད་གདོང་དུ་གང་བྱུང་བསྡུས་ཏེ་སྦུད་པའི་ཁུད་དུ་བཏུམས། བྲག་ཕུག་ཏུ་བསྐོལ་ཏེ་ཟླ་ཕྱེད་ཙམ་རེ་གཟིམས་ཀྱིན་བཞུགས་ཡང་བླངས་ཀྱིན་དེ་བཞིན་མཛད་པ་གཅིག་ཡོད་དེ། ཁོང་ལ་བླ་མ་མཉེས་ས་སློབ་མ་འགའ་ཞིག་གི་མ་ཐེག་པར་རྩིང་པོ་ཞབས་འདྲེན་བྱེད་པ་འདི་ལ་བསྙེས་ཟེར་ཞིང་། དུས་ཚོད་གཅིག་ལ་སློབ་མ་འམ་མི་ཆེན་རྣམས་ཀྱིས་བསྙེན་བསྐུར་བྱེད་༼རེས་བྱས་ནས། འགའ་ཞིག་གིས་ཁྱེད་ཀྱིས་ཀྱང་བསྙེན་བཀུར་བྱེད་༽དགོས་ཟེར། མི་གྲུབ་བྱས་པས་སློབ་མ་རྣམས་ཀྱི་ནང་ནས་བཟང་ཤོས་བླ་མ་མཉེས་ཤེས་ཡིན་པས་ཟེར་ནས་ཞག་གསུམ་གྱི་ཉིན་པར་ཁས་བླངས་ཞག་གསུམ་ཀ་འགྲོ་བའི་ནུ་མོ་ནམ་ཕྱེད་ཐུག་པ་གསོལ་བ་བཏབ། ནམ་ཕྱེད་ནས་རྣལ་ལམ་བཟུང་ནས་ལྷའི་ཡུལ་དུ་ཕྱིན་སང་སྔ་དྲོ་ཆོས་རྗེ་རིན་པོ་ཆེའི་དྲུང་དུ་བསྙེན་བསྐུར་བྱེད་པ་ལ་ཤོག་ཅིག་མི་ཡོངས་ན་ཕོ་བྲང་རྣམས་བཤིག་ནས་བཏད་དོ་བྱས། དྲི་ཟའི་རྒྱལ་པོ་ཟུར་ཕུད་ལྔ་པ་ཕྱིན་སྔར་བཞིན་སྒྲ་དབྱངས་འབུལ་དུ་ཤོག་བྱས། ཀླུའི་ཡུལ་དུ་ཕྱིན་སྔར་བཞིན་བྱས། ལྷ་བྲན་དང་ལྟོ་ཕྱེ་ཐུག་ལ་བྱས། སང་ཛ་སཛ་འཛུག་པ་ལ་སོགས་པ་ལ་ཤོག་གསུངས། གྲབས་བྱས་ཁོ་ལ་གྲོ་ཡོལ་འགྲོ་བས་མོ་ལ་ཤོག་བྱས་པས། ཕྲུ་གོག་ནང་དུ་མ་འདྲེས་དགུ་བསྲེས་ཏེ་བསྐོལ་བ་སྦུད་གོག་གི་སྟེང་དུ་བཞག་ནས་རིན་པོ་ཆེའི་པང་དུ་བཞག་པས། དགྱེས་བཞིན་པས་ཁམ་ཁམ་གསོལ་ཏེ། དེར་གཞན་རྣམས་ཁྲེལ་བའི་སྣང་བ་ལ་ནམ་མཁའ་ལ་སྔར་ཐོས་མ་མྱོང་པའི་སྒྲ་དབྱངས། སྣས་མ་མྱོང་བའི་དྲི། མེ་ཏོག་གི་ཆར། ས་འོག་ནས་དྲི་དང་མཆོད་པ། བར་སྣང་ནས་ལྷའི་བུ་དང་བུ་མོས་མཆོད་པ་འབུལ་བ་སོགས་ནམ་མཁའ་བར་སྣང་ས་གཞི་ཁེངས་པ་བྱུང་ནས་ཐམས་ཅད་ཀྱི་རོང་རོང་བྱས་པས། རིན་པོ་ཆེའི་གསུང་ནས་ཐམས་ཅད་ཁད་དེ་སྡོད་རྣལ་འབྱོར་ཆོས་དབྱིང་གི་ཟ་ཟི་རུ་འདུག་པ་གསུང་སྟེ། ཐམས་ཅད་ལོག་ལྟ་སེལ་ནས་རྩོད་མེད་དུ་གྱུར། དེར་ཁམ་པ་རོང་པོའི་གྲྭ་པ་གཅིག་ན་རེ། ཆོས་དྲུག་ཡོད་པར་འདུག་པས་ཞུས་ཟེར། མེད་བྱས་པས་མ་ཉན། གཏད་ས་མེད་བྱས་ཀྱང་མ་ཉན། དེར་ཕྱག་གཉིས་ཀྱི་ཁོང་གི་ལག་པ་ནས་བཟུང་ནས་ལའུ་ངའང་འཆི་ཁྱེད་ཀྱང་འཆིའོ། ངའི་ཡོན་ཏན་རྣམས་དོ་ནུབ་འཆི་འམ་སང་འཆི་འམ་སྙམ་པའི་མི་རྟག་པ། བླ་མའི་མོས་གུས། བདེན་མེད་སྒྱུ་མའི་འདུན་པ་གསུམ་ལས་བྱུང་སྟེ་དེ་ལས་ལྷག་པ་ཡོད་རི་གསུངས་ནས་དབུ་སྙུང་བཞེས་སུ།།
Story of Dampa Marpo
༈ དམ་པ་དམར་པོའི་གསུང་ལ་བརྟེན་ནས་ངེས་ཤེས་བསྐྱེད་པ་ནི།
དམ་པ་དམར་པོ་ལ། ཡོན་བདག་ཡུན་རིང་པོ་བྱས་པ་གཅིག་གིས་ད་ང་རྒས་འདུག་པས་ཆོས་ཚིག་ཉུང་ལ་དོན་འདྲིལ་བ་ཉམས་སུ་བླངས་བདེ་བ་གཅིག་ཞུ་བྱས་པས། ཚོགས་བརྒྱ་རྩ་དང་བརྒྱ་འབུལ་གྱིས་གཅིག་གསུང་། དེ་ལྟར་བྱས་ཀྱང་ཡུན་རིང་པོ་མ་བྱུང་། ད་ཞུ་ལགས་པས། གཞན་གྱིས་ཐོས་སུ་མི་སྟུབ་པ་ཡོད་པས་ཚོགས་ཀྱི་ཆས་གཅིག་གིས་མི་མེད་པ་གཅིག་ཏུ་འདེངས་གསུང་ནས། གྲོག་ཕུག་གཅིག་ཏུ་ཕྱིན་པས་མི་ཨེ་འདུག་ལྟོས་ཤིག་གསུངས། མི་མི་གདའ་བྱས་པས་ད་ངའི་ལག་པ་ལ་འཇུས་ལ་ཁ་ལ་ལྟོས་གསུངས། དེ་ལྟར་བྱས་པས། འོ་ན་ང་ཡང་འཆི། ཁྱོད་ཀྱང་འཆི་ཇུག་བྱེད་དེ་ལྟ་བུའི་ཆོས་ཟབ་མོ་ཅིག་ཁྱེད་ལ་བྱིན་པ་ཡིན་གསུང་། ཡོན་བདག་གི་བསམ་པ་ལ་ཆོས་དེ་ལ་ཚོགས་བརྒྱ་རྩ་དང་བརྒྱ་འབུལ་ཅི་དགོས་མེད། །ང་ཟོག་རྒན་གཅིག་དང་འཕྲད་འདུག་སྙམ་པ་བྱུང་། དེའི་ནུབ་མོ་གཉིད་ཙམ་ཡང་མ་བྱུང་། ཐོ་རངས་གཉིད་རི་བ་གཅིག་བྱུང་ཙ་ན། འཆི་བ་མི་རྟག་པ་རྒྱུད་ལ་ལྷང་པ་སྐྱེས་ནས་བྱུང་། དེར་ཚེ་འདི་བློས་བཏང་གི་བཟང་པོ་གཅིག་བྱུང་། གསུངས།།
Story of Shang Rinpoché
༈ ཞང་རིན་པོ་ཆེའི་གསུང་ལ་བརྟེན་ནས་ངེས་ཤེས་བསྐྱེད་པ་ནི།།
ཞང་རིན་པོ་ཆེའི་གསུངས་ནས་འཁོར་བ་ལས་མ་གྲོལ་བ་དེ་གནས་ལུགས་ཀྱིས། དོན་དམ་རྟོགས་པས་ལེན། དེ་དད་པ་མ་སྐྱེས་པས་ལེན་ནོ། དེ་འཆི་བ་མ་དྲན་པས་ལན། དེ་ལ་འཆི་བ་མི་རྟག་པ་གཤའ་མ་གཅིག་རྒྱུད་ལ་སྐྱེས་ན། ངེས་འབྱུང་གི་དད་པ་ལྐོག་ལངས་སུ་སྐྱེ་སྟེ། ཚོགས་བསག་གོ །དེས་སྒྲིབས་པ་འཛད། དེས་གནས་ལུགས་ཀྱིས་དོན་རྟོགས་ནས་འཁོར་བ་ལས་གྲོལ་བར་འགྱུར་རོ་གསུངས།།

༈ དབང་པོ་རབ་འབྲིང་གཉིས་ལ། ཆོས་ཐུན་གསུམ་གསུམ་དྲུག་ཙམ་བཤད་ནས་ལུང་གི་རྒྱབ་སྐྱོར་དེ་ངེས་ཤེས་སྐྱེས་ནས་འཇུར་དུ་འཇུག །སྤྱིར་ཡང་དྭགས་པོའི་ལུགས་ཀྱིས་བློ་སྤུན་གྱིས་དག་ནས་དམིགས་པའི་ངོ་གདོང་རེ་སྟོན་པ་ལས་བཤད་པ་རྒྱས་པ་མི་མཛད། འདི་པའི་ལུགས་ཀྱི་མདོ་རྒྱུད་ཀྱིས་ལུང་གི་རྒྱབ་སྐྱོར་ནས་ངེས་ཤེས་བསྐྱེད་ནས་འཇུར་དུ་ཁྲིད་ཀྱི་ངོ་བོ་ལ་བཅུག་པས་མདོ་རྒྱུད་ནས་བཤད་པ་དེ་བསྒོམ་དོན་དུ་གོ་ཞིང་། བསྒོམ་ཆེན་པའི་དེ་མདོ་རྒྱུད་ནས་བཤད་པ་དེ་གོ་བའི་དགོས་པ་ཡོད་དོ། མདོ་དང་རྒྱུད་དང་མི་མཐུན་པའི་བསྒོམས་དེས་གོ་མི་ཆོད་དེ། བྷི་མ་ལས་སྐྱོན་བཞི་བཤད་དོ། རྒྱབ་རྟེན་ལུང་དང་བྲལ་བ། བཅོས་མ་སེལ་དང་བཅས་པ། ཉམས་པ་བདུད་ཀྱི་བཟུང་བ། བར་ཆད་རྐྱེན་དུ་གྱུར་པའོ། སྣང་བ་སེམས་ལ་གསུམ་སྟེ།
གྲུབ་མཐའ་མཁས་ལེན་པ་ནི། མྱོང་བ་གཉིས་མེད་ཀྱི་ཤེས་པ་རང་རིག་རང་གསལ་ལ་བདེན་འཛིན་ཡོད་པ། བཀའ་ཐ་མ་དོན་དམ་རྣམ་པར་ངེས་པ་ནས་བཤད་པ་ནི་སྣང་བ་སེམས། སེམས་ངོས་བཟུང་དང་བྲལ་བའི་བཟུང་འཇུག་ཡིན་ཏེ། ཡང་དག་དོན་ལ་གནས་ནས་ནི། །སེམས་ཙམ་ལས་ཞི་འདའ་བར་བྱ། །སྣང་མེད་གནས་པའི་རྣལ་འབྱོར་པ། །དེ་ཡི་ཐེག་པ་ཆེན་པོ་མཐོང་། །ཅེས་གསུངས་སོ།
སྔགས་ཀྱི་ཀྱི་ནི་སྣང་བ་སེམས། །སེམས་ལྷའི་སྐུ་ངོས་བཟུང་ཐམས་ཅད་དང་བྲལ་བའོ། མཚན་ཉིད་ཐེག་པའི་ལུགས་ཀྱིས་ཉམས་བཞག་སྣང་སྟོང་ནམ་མཁའ་ལྟ་བུ་དང་། །རྗེས་ཤེས་བདེ་སྟོང་སྒྱུ་མ་ལྟ་བུ་ཞེས་ཉམས་ལེན་ཐ་དད་དུ་འདོད་ལ། འདིར་སྣང་གྲགས་ཆོས་ཐམས་ཅད་རང་གི་སེམས་སུ་ཤར་བ་ཡིན་ཏེ།
བརྟག་གཉིས་ལས། སེམས་ཉིད་ཆེན་པོ་གཅིག་ཉིད་ལ། །ལྔའི་གཟུགས་ཀྱིས་རྣམ་པར་མཚོན། །ཅེས་ཕུང་པོ་ལྔ། འབྱུང་བ་ལྔ། ཉོན་མོངས་པ་ལྔ། དབང་པོ་དྲུག །སྐྱེ་མཆེད་དྲུག །ཁ་དོག་དྲུག །རིགས་དྲུག་ལ་སོགས་པ་རང་གི་སེམས་ཤར་བ་ཡིན་ཏེ། གཟུགས་ཕུང་རྡོ་རྗེ་མ་ཡིན་ཏེ། ཅེས་སོགས་གསུངས་སོ།
།ལང་ཀར་གཤེགས་པ་ལས། བག་ཆགས་ཀྱིས་ནི་དཀྲུགས་པའི་སེམས། །དོན་དུ་སྣང་བ་རབ་ཏུ་འབྱུང་། །དོན་ཡོད་མ་ཡིན་སེམས་ཉིད་དེ། །ཕྱི་རོལ་དོན་མཐོང་ལོག་པ་ཡིན། །ཅེས་གསུངས་སོ།
མགུར་ལས། རིན་ཆེན་སེམས་ལས་ཕྱིར་གྱུར་པའི། །སངས་རྒྱས་མེད་ཅིང་སེམས་ཅན་མེད། །རྣམ་པར་ཤེས་པའི་གནས་དོན་རྣམས། །ཕྱི་རོལ་གྱུར་པ་ཅུང་ཟད་མེད། ཅེས་སོ།
ཆུ་འགྲམ་གཅིག་ཏུ་འགྲོ་བ་རིགས་དྲུག་གྲལ་ལ་བསྒྲིགས་ན། དམྱལ་བས་ཁྲོ་ཆུ་ཁོལ་མ། ཡི་དྭགས་ལ་རྣག་ཁྲག །ལྷ་མིན་ལ་གོ་མཚོན། མི་དང་དུད་འགྲོ་ལ་ཆུ། ཉ་ལ་སོགས་པ་ལ་ཁང་ཁྱིམ། ལྷ་ལ་བདུད་རྩིར་སྣང་སྟེ།
མདོ་ལས་དམྱལ་བ་ཡི་དྭགས་དུད་འགྲོ་དང་། ལྷ་རྣམས་ཇི་ལྟར་རིགས་དྲུག་ལ། དངོས་གཅིག་ཡིད་ནི་ཐ་དད་ཕྱིར། དོན་མ་གྲུབ་པར་འདོད་པ་ཡིན། ཅེས་སོ།
ཐིག་ལེ་དཀར་དམར་གྱིས་སྐབས་སུ། ཐིག་ལེ་དཀར་དམར་གྱིས་དམིགས་པ། ཐབས་ཁྱད་པར་ཅན་ལ་བརྟེན་ནས་ཟིན་པས། ཐབས་ལམ་གྱིས་ཟིན་པར་འགྱུར། ཐོ་རངས་རྨི་ལམ་དུ་འོད་གསལ་གྱིས་དུས་ཡོང་བ་ནི། ཉིན་ཞག་ཕྲུག་གཅིག་གིས་ཟས་ཟོས་པ་རྣམས་མཉམ་གནས་ཀྱི་མེས་ཞུ་ནས་སྙིགས་མ་རྣམས་ལོང་དུ་སྐྱུར་དྭངས་མ་རྣམས་ལུས་ལ་ཁྲེལ་ནས་རྩ་མིག་རྣམས་སྟོང་པར་ཡོད་པའོ། །རྟོག་མེད་ལ་འཛིན་པ་སྔ་མ་ལ་བདེ་མཆོག་མཚོན་གང་ཙམ་མོ། །དམིགས་པ་གང་བདེའོ།
གཉིས་པ་ལ་བདེ་མཆོག་སྐུ་མདོག་དཀར་པོ་འོད་ཀྱི་རང་བཞིན་དུ་བསྒོམས། རྟོག་བཅས་ལམ་དུ་བྱེད་པའི་སྐབས་སུ། གཉིད་ཀྱི་སྣང་མཆེད་ཐོབ་གསུམ་གྱིས་མཚམས་སྦྱོར་ནས། གཉིད་འཐུག་པོའི་སྐབས་སུ། རིག་པ་སྙིང་ཁ་ན་གནས་ཤིང་། བྷ་པན་ཏ་ལ་རླུང་རྒྱུ། དེ་ནས་མགྲིན་པའི་འཁོར་ལོ་ལ་རླུང་རྒྱུས་པས་རྨི་ལམ་གྱིས་སྣང་བ་འཆར་བའོ།
ཨརྱ་དྡྷེ་བས། ཕུང་པོ་ཁམས་དང་བ་མཆེད་ཐ་དད་ཀུན། །ཤེས་པ་གཉིས་པོ་དེང་འདིར་རབ་འདུས་ཏེ། །ས་འཐུག་གྱུར་པས་འགྲོ་བ་རང་གཉིད་ལོག །རླུང་གི་སྟོབས་ཀྱིས་རྨི་ལམ་འབྱུང་བར་འགྱུར། ཅེས་སོ།།
༈ དབང་པོ་ཐ་མའི་སྐབས་སུ། མཁའ་འགྲོ་སྡེ་ལྔའི་ལུང་པར་འགྲོ་བ་ལ་ཆུ་དང་ཚེར་མ་དང་། མུན་ཕྲང་རྣམས་ལ་ཐར་ན་རིན་ཆེན་མཁའ་འགྲོ་ཡོད་པ་བཞིན། འདོད་ཆགས་ཞེ་སྡང་གཏི་མུག་གསུམ་ལ་གཉེན་པོ་བརྟེན། །བསྒོམ་པས་བདེ་གསལ་མི་རྟོག་པ་འབྱུང་ངོ་། །དབང་པོ་བརྒྱ་བྱིན་གྱིས་ཚིག་ནི། ལྷ་མ་ཡིན་གྱིས་དམག་ལྷག་བྱུང་བ་དང་། དེ་ནི་སྲ་བའི་གོ་གྱོན། རྣོ་བའི་མཚོན་ཐོགས་ལ་རྒྱོབ་ཅིག །ཅེས་པས། མ་ཡིན་གྱི་ཡུལ་འཇོམས་ཏེ། འཁོར་ལོ་བསྒྱུར་བ་ཚིག་གིས་འགྲུབ། །ལྷ་རྣམས་ཀྱིས་ནི་བསམ་པ་འགྲུབ། །རྣལ་འབྱོར་ཏིང་ངེ་འཛིན་གྱིས་འགྲུབ། །ཅེས་སོ། སྦྱངས་པ་ལ་བདག་མེད་མ་ཡོད་པ་ནི་རྩ་རླུང་ཐིག་ལེ་བདག་མེད་མའོ། །སྤེལ་བ་སྔོན་ལ་ཡོད་ཀྱང་ཕྱག་ལེན་ལ་སྤྲུལ་པ་སྔོན་ལ་མཛད་དོ། །དེ་ཡང་གང་འཕྲད་འཕྲལ་ལ་སྤྲུལ་ཏེ།
རྨོག་ལྕོག་པའི་ཞལ་ནས། འབྱུང་བ་ས་དང་འཕྲད་པའི་ཚེ། །ས་རུ་སྤྲུལ་ཞིང་ས་རུ་བསྒྱུར། །འབྱུང་བ་ཆུ་དང་འཕྲད་པའི་ཚེ། ཅེས་སོགས་འགྲེའོ།
།ཡང་རྨོག་ལྕོག་པས། །མེ་དང་ཆུ་རུ་སྤྲུལ་པ་དང་། །འོག་མིན་ལ་སོགས་མཐོང་ན་དགའ་སྟེ། འོན་ཀྱང་གཉིད་ཐུམ་གཅིག་གི་གྲ་ཡིན་གསུངས། །འཕུར་བ་རྩལ་ཆུང་ན། སྐྱིལ་ཀྲུང་བཅས་པའི་མཐེ་བོང་གཉིས་ནས་འདེགས་པའོ། །རླུང་བཟུང་ན་ཕན་ཏེ། །བོགས་འདོན་རླུང་གི་རྟ་ཕོ་ཡིན། །ཡེ་ཤེས་ཕྱོགས་མེད་བལྟད་མོ་ལྟ། ཅེས་དང་། མར་པའི་ཞལ་ནས། རྨི་ལམ་དུས་སུ་སྒྱུ་ལུས་བསྒོམ། །སྣང་བ་སྤྲོས་ཀྱིན་སྒྱུ་ལུས་བསྒོམ། །དེ་རྟོག་པར་སོང་ཡང་ཡ་མི་ང་། །རྣམ་རྟོག་ཆོས་སྐུར་ཤེས་པའི་གདེངས་ཅིག་འདོག །ཅེས་སོ།།

༈ འོད་གསལ་གྱི་སྐབས་སུ། ལུས་རིལ་པོ་དབུ་མ་བསྒོམ་པ་ལ། དང་པོ་སྦ་ལྕག་ཙམ། དེ་ནས་ཞོ་དོང་ཙམ། དེ་ནས་ཇེ་ཆེ་ལ་ལུས་རིལ་པོ་དབུ་མར་བསྒོམ་གསུང་ངོ་། །ཨ་སྐྱེ་བ་མེད་པས་གཏི་མུག་གིས་གཉེན་པོ་བྱེད་ལ། །རྩ་རླུང་བདག་མེད་མ་དུག་གསུམ་ཆར་གྱིས་གཉེན་པོའོ། །ནི་གུ་ཆོས་དྲུག་གི་ཞལ་ཤེས་དང་། གཏམ་རྒྱུད་ཀྱིས་ཞལ་ཤེས་དང་གཏམ་རྒྱུད་ཀྱི་ལྷན་ཐབས་མཁས་གྲུབ་ཆོས་རྗེ་དང་། །ཤངས་སྟོན་ལ་སངས་རྒྱས་སྟོན་པས་གསུངས་པ་རྣམས། མཁས་གྲུབ་པ་དང་མཁས་བཙུན་རྒྱལ་མཚན་འབུམ་གྱིས་མཛད་པ་ཕྱོགས་གཅིག་ཏུ་བསྡེབས་པའི་ལྷན་ཐབས་རྫོགས་སོ།།

༈ རྒྱ་གར་ཤར་ཕྱོགས་ཤྲཱི་ན་ག་རའི་གྲོང་ཁྱེར་འཛམ་བུ་བྱ་བ་ན། རྒྱལ་པོ་ཞི་བའི་གོ་ཆ་ལ་བཙུན་མོ་དཔལ་གྱི་བློ་གྲོས། སྲས་མོ་དཔལ་གྱི་ཡོན་ཏན་ནི་ཡེ་ཤེས་ཀྱིས་མཁའ་འགྲོ་ནི་གུ་མ་ཡིན་གསུང་ངོ་།། ཨྀཐི།། མངྒ་ལཾ། བྷ་ཝན་ཏུ།། །།