Sgyu lus dbang po rab kyi lung 'dren zhal shes

Resource ID	---
Title	sgyu lus dbang po rab kyi lung 'dren zhal shes
Topics	Illusory body
Sub-Topics	Various

༄༅། །སྒྱུ་ལུས་དབང་པོ་རབ་ཀྱི་ལུང་འདྲེན་ཞལ་ཤེས།།

བླ་མ་དམ་པ་རྣམས་ལ་ཕྱག་འཚལ་ལོ།
ཡེ་ཤེས་མངོན་འབྱུང་ལས། ས་དང་ལམ་གྱི་རིམ་པ་རྣམས། །བླ་མའི་མོས་གུས་ལོ་ཟླས་བགྲོད། །བླ་མའི་སྣང་བ་མ་བྲལ་ན། །སངས་རྒྱས་རྣམས་དང་འབྲལ་མེད་གནས། །ཞེས་དང་།
ཡེ་ཤེས་མཁའ་འགྲོ་ནཻ་གུ་མའི་ཞལ་ནས། ལམ་ལྔ་ས་བཅུའི་རིམ་པ་རྣམས། །མོས་གུས་སྟོབས་ཀྱིས་བགྲོད་པར་བྱེད། །བླ་མའི་སྣང་པ་མི་འབྲལ་བ། །རྒྱུད་སྡེའི་དགོངས་པ་གནད་ཀྱི་མཆོག །ཅེས་དང་།
སློབ་དཔོན་བིརྺ་པའི་ཞལ་ནས་ཀྱང་། ལམ་ཟབ་བླ་མ་ཞེས་གསུངས་པས། དབང་པོ་རབ་ལམ་གཞན་ལ་ལྟོས་མི་དགོས་པར། བླ་མའི་མོས་གུས་ཉིད་ཀྱིས་གྲོལ་བར་གསུངས་སོ། །གཞན་ཡང་། ལྷ་སྐུ་བསྐལ་པ་སྟོང་དུ་བསྒོམས་པ་བས། བླ་མ་དྲན་པ་བསོད་ནམས་ཆེ་ཞིང་། སངས་རྒྱས་སྟོང་གི་ཡོན་ཏན་འཛིན་པར་འགྱུར་བ་ལ་སོགས་ཡིད་ཆེས་སུ་མདོ་རྒྱུད་ཐམས་ཅད་མཐུན་ཏེ།
ཡེ་ཤེས་གསལ་བ་སྒྲོན་མའི་རྒྱུད་ལས། མཚན་དང་དཔེ་བྱད་ལྡན་པའི་ལྷ། །བསྐལ་པ་སྟོང་དུ་བསྒོམས་པ་བས། །བླ་མ་དྲན་པ་བསོད་ནམས་ཆེ། །ཅེས་སོ།
ཨ་ཏི་བཀོད་པའི་རྒྱུད་ལས། དྲིན་དང་ལྡན་པའི་བླ་མ་དེ། །སྙིང་གི་དཀྱེལ་ལམ་སྤྱི་བོའི་གཙུག །ལག་པའི་མཐིལ་དུ་གང་བསྒོམས་པ། །སངས་རྒྱས་སྟོང་གི་བྱིན་རླབས་ནི། །གང་ཟག་དེ་ཡིས་འཛིན་པར་འགྱུར། །ཞེས་སོ།
བརྟག་གཉིས་ལས། གཞན་གྱིས་བརྗོད་མིན་ལྷན་ཅིག་སྐྱེས། །གང་དུ་ཡང་ནི་མི་རྙེད་པ། །བླ་མའི་དུས་ཐབས་བརྟེན་པ་དང་། །བདག་གི་བསོད་ནམས་ལས་ཤེས་བྱ། །ཞེས་སོ།
ལེགས་པ་གྲུབ་པ་ལས། སྐྱ་བ་འཛིན་པ་མེད་པར་ནི། །གྲུ་ཡིས་ཕ་རོལ་ཕྱིན་མི་ནུས། །ཡོན་ཏན་ཐམས་ཅད་རབ་རྫོགས་ཀྱང༌། །བླ་མ་མེད་པར་སྲིད་མཐར་མིན། །ཅེས་སོ།
ཕལ་པོ་ཆེ་ལས། ནོར་བཟང་གི་དགེ་སློང་རྒྱ་མཚོའི་བྱངས་ལ་གསོལ་པ། ཁྱོད་ཀྱི་བྱང་ཆུབ་སེམས་དཔའི་རྣམ་པར་ཐར་པ་འདི་ལྟ་བུ་གང་ལས་བྱུང་། བཀའ་སྩལ་པ། ངས་སྔོན་དགེ་བའི་བཤེས་གཉེན་ལ་རིམ་གྲོ་དང་། བཀུར་བསྟི་དང་། ཕུ་དུད་དུ་བྱས་པ་ལས་བྱུང་ངོ་། ཁྱོད་ཀྱང་དགེ་བའི་བཤེས་གཉེན་ལ་བསྟེན་ཞེས་གསུང་ངོ་།
མདོ་ལས། སངས་རྒྱས་ཆོས་ཀུན་དགེ་བའི་བཤེས་ལ་བསྟེན་ཏོ་ཞེས། །ཡོན་ཏན་ཀུན་གྱི་མཆོག་མངའ་རྒྱལ་བ་དེ་སྐད་གསུང་། །ཞེས་སོ།
བླ་མ་རྨོག་ལྕོག་པའི་ཞལ་ནས། ཚེ་གཅིག་གི་སངས་རྒྱ་བ་ལ་བླ་མའི་མོས་གསུང་། ཁོང་གིས་ཐག་ཆོད་ངེས་ཤེས་ལ། ཐུགས་རྗེ་ཆེན་པོ་རང་དཀར་ནའང་དཀར། །དགྱེས་རྡོར་བདེ་མཆོག་རང་ནག་ནའང་ནག །ང་ལ་རེ་ས་བླ་མ་ལས་མེད། ཇི་ལྟར་འདུག་ཀྱང་བླ་མའི་སྣང་པ་དང་འབྲལ་མ་མྱོང་། ཚེ་གཅིག་གི་སངས་རྒྱས་དེ་ཡོང་ཡོང་འདྲ། ཞེས་གསུངས་སོ།
བླ་མ་སྐྱེར་སྒང་པའི་ཞལ་ནས། བླ་མའི་མོས་གུས་ལ་མ་བུ་གཅིག་པོ་ཤི་བ་ལྟ་བུ་དགོས་གསུང་།
བླ་མ་སངས་རྒྱས་གཉན་སྟོན་ཞལ་ནས། བླ་མའི་མོས་གུས་ལ། མཆི་མ་རུས་པའི་གཏིང་ནས་འོང་བའི་གསོལ་བ་འདེབས་དགོས་གསུང་།
བླ་མ་སངས་རྒྱས་སྟོན་པའི་ཞལ་ནས། བླ་མའི་མོས་གུས་ལ་རྗེས་ངས་ལོག་ལྟའི་དབང་དུ་མ་སོང་བའི་གསོལ་བ་འདེབས་པ་དགོས་གསུང་། ཡང་ན་བླ་མ་བརྗེད། ཡང་ན་བླ་མ་ལ་ལོག་ཏ་བྱེད་པ་ལ་བྱིན་རླབས་མི་འབྱུང་། གསུང་ངོ་།
བླ་མ་འགྲོ་མགོན་ཤངས་སྟོན་གྱི་ཞལ་ནས། གསོལ་བ་གང་འདེབས་ནུས་པ་ལ་དགེ་སྦྱོར་འཆར་གྱི་འདུག་གསུང་། སྐྱེ་དམན་གྱི་གསོལ་བ་འདེབས་ནུས་པས་དགེ་སྦྱོར་འཆར་བ་མང་དུ་འོང་གི་འདུག་གསུང་། གསོལ་བ་འདེབས་མ་ནུས་ན་དགེ་བཤེས་དང་། སྟོན་པ་ལའང་དགེ་སྦྱོར་མི་འཆར་བར་འདུག་གསུང་ངོ་།
བླ་མ་སངས་རྒྱས་གཉན་གྱི་ཞལ་ནས། ཆོས་རྗེ་འབྲི་ཁུང་པ། ཞང་རིན་པོ་ཆེ། ཆོས་རྗེ་དུས་གསུམ་མཁྱེན་པ། གཙང་པ་རྒྱ་རས། ཐམས་ཅད་ཀྱི་དྲུང་དུ་ཕྱིན་པས། བླ་མའི་མོས་གུས་གཅིག་པོས་ས་ལམ་བགྲོད་པ་ལ་ཀུན་མཐུན་པར་འདུག་གསུང་ངོ་།
ཆོས་རྗེ་ས་སྐྱ་པཎྜི་ཏ་ཡང་། རྗེ་བཙུན་ཆེན་པོ་ལ་ཁུ་བོའི་འདུ་ཤེས་མི་མཛད་པར། མཚན་ཐོས་པའམ། སྐུ་དྲན་་་། མཐོང་བའི་དུས་སུ་བབམས་པ་དང་། ཞབས་བཀྲུས་ནས་གསོལ་བ་ལ་སོགས་པ་མཛད་གསུང་། སྒྱུ་ལུས་དབང་པོ་རབ་ཀྱི་སྐབས་སུ། བླ་མ་ལ་མོས་གུས་རྩེ་གཅིག་ཏུ་བྱས་ནས། གསོལ་བ་བཏབ་པའི་ཡོན་ཏན་ལ། ཡིད་ཆེས་ཤིང་ངེས་ཤེས་བསྐྱེད་པར་བྱེད་པའི་ མདོ་རྒྱུད་ཀྱི་ལུང་དང་བླ་མ་གོང་མ་རྣམ་ཀྱིས་གསུང་བསྒྲོས་ཐུན་མོང་མ་ཡིན་པ་རྣམས་ཡི་གེར་བཀོད་པའོ།
མཁའ་འགྲོ་མ་ཐམས་ཅད་ཟིལ་གྱིས་གནོན་པའི་རྒྱུད་ལས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་གངྒཱའི་ཀླུང་གི་བྱེ་མ་སྙེད་དུ་བསྙེན་བཀུར་བྱས་པ་ལས། རྡོ་རྗེ་སློབ་དཔོན་གྱི་བ་སྤུའི་བུ་ག་གཅིག་ལ་ཏིལ་མར་གྱིས་བྱུག་པ་བྱས་པ་བསོད་ནམས་ཆེས་ཁྱད་པར་དུ་འཕགས་སོ། །ཞེས་གསུངས་སོ།
གསང་འདུས་ལས། རྡོ་རྗེ་སློབ་དཔོན་ནི། བདག་ཅག་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་ཕའོ། །མའོ། །སྐྱེད་པའོ། །ཞེས་གསུངས་སོ།
སྡོམ་འབྱུང་ལས། བླ་མ་སངས་རྒྱས་བླ་མ་མཆོད། ལ་སོགས་གསུངས་སོ།
ལང་ཀར་གཤེག་པ་ལས། དགེ་བའི་བཤེས་གཉེན་ལ་རིམ་གྲོ་བྱས་པ་ལས། རྣམ་པར་རྟོག་པ་འཁོར་བའི་རྒྱ་མཚོ་ལས་དང་སྲོང་པ་དང་མི་ཤེས་པའི་རྒྱུ་ལས་བྱུང་པ་དག་ལས་རྒལ་བར་ནུས་སོ། །ཞེས་གསུངས་སོ།
བླ་མ་ལྔ་བཅུ་པ་ལས། བླ་མ་དང་ནི་རྡོ་རྗེ་འཛིན། ཐ་དད་པར་ནི་མི་བརྟག་གོ །ཞེས་གསུངས་སོ།
སངས་རྒྱས་མཉམ་སྦྱོར་ལས། རེས་འགའ་ཞི་ལ་རེས་འགའ་ཁྲོ། །རེས་འགའ་བགེགས་ཆེན་གནོན་མཛད་ཅིང་། །སྐྱེ་དང་རི་བོ་ཐམས་ཅད་དོ།
ལྷན་ཅིག་སྐྱེས་གྲུབ་ལས། སློབ་མ་འགའ་ཞིག་གྲུབ་བརྙེས་ནས། །ཁེངས་པས་བླ་མར་ཕྱག་མི་བྱེད། །བླ་མའི་བཀའ་ལས་འདས་པ་ཡི། །སྐད་ཅིག་དེ་ལ་མནར་མེད་ལྟུང་། །ཞེས་དང་།
ཀླུ་སྒྲུབ་ཀྱིས། ཚོགས་ནང་བླ་མ་མཐོང་ན་རྒྱབ་ཀྱིས་ཕྱོགས་པར་བྱེད། དེ་ནི་ལྐོག་ཏུ་སོང་ནས་དེ་ནས་ཕྱག་བྱེད་འགྱུར། །དེ་ནི་རང་བུ་ཡིན་ཡང་གཞན་བུ་བཞིན་ཏུ་སྤང་བར་བྱ། །རྒྱལ་རིག་རྗེ་རིགས་མཆོག་ཏུ་སྐྱེས་གྱུར་ཀྱང་། །བསྙེན་པས་དེ་ནི་ནམ་ཡང་དུང་དུ་བཞག་མི་བྱ། ཅེས་སོ།
ཆོས་རྣམས་ཡང་དག་པར་སྟུད་པའི་མདོ་ལས། ཆོས་རྣམས་མ་ཐོས་མི་ཤེས་ཀྱང་། ཡོན་ཏན་ལྡན་པའི་བླ་མ། དང་བའི་ཡིད་ཀྱིས་མོས་བྱས་ན། བསོད་ནམས་དེ་འདྲ་གཞན་ན་མེད། ཅེས་གསུང་།
དེ་ལྟ་བུའི་མོས་གུས་གཅིག་ཡོད་ན། གདམས་ངག་སྣ་རེ་ལས་མི་ཤེས་ཀྱང་། མི་ལྟོ། ཆོས་ཚིག་གཅིག་ལས་མི་ཤེས་ཀྱང་མི་ལྟོ། བསྒོམ་ཐུན་གཅིག་ལས་མ་བསྒོམས་ཀྱང་། མི་ལྟོ་ཏེ། རང་སེམས་ཆོས་ཀྱི་སྐུ་ཏུ་རྟོག་ནས་འོང་། གྲུབ་ཆེན་ཨོ་རྒྱན་པ་གསུང་ངོ་།