Zhal gdams thor bu ba rnams tshang bar

Resource ID	Sup?
Title	zhal gdams thor bu ba rnams tshang bar
Topics	Various
Associated Person	Sangyé Tönpa
Link	BDRC W3CN18508

this text needs to be re-read
To input
༄༅། །ཞལ་གདམས་ཐོར་བུ་བ་རྣམས་ཚང་བར་བཞུགས།།

བླ་མ་དམ་པའི་ཞལ་ནས། ལྷ་སྐུ་ལ་ཉིན་མཚན་གཉིས་ཀ་སྦྱོང་ན། དགེ་སྦྱོར་དག་མདོ་ཙམ་དུ་འདུག་གི་གསུང་། ཉིན་པར་མདུན་དུ་ལྷ་སྐུ་གསལ་དངས་ཤར་མ་བྱུང་ཙ་ན། ལྷ་དེ་ལ་མིག་ཕུར་ཚུགས་སུ་གཅེར་རེ་བལྟས་པ་ལ་རང་ལུས་གསལ་སྟོང་འཛིན་མེད་དུ་ཕྱལ་མེ་བ། གསལ་ལ་རྟོག་པ་མེད་པའི་ལྷ་སྐུ་དེ་ལ་སེམས་མ་ཡེངས་པར་བཟུང་གིན་བསྒོམས་པས། ལྷ་སྐུའི་གསལ་སྣང་ཕྱག་རྒྱ་ཆེན་པོ་ཟེར་བ་ཡིན། བདེ་བའི་གེགས་བྱུང་ན་འོག་རླུང་བསྐུམ་པ་ཙམ་བྱས་ལ་རྗེ་བཙུན་མ་ལྟ་བུ་ལ་གསང་གནས་སུ་སེམས་གཏད། བདེ་མཆོག་ལའང་དེ་བཞིན་དུ་བྱ། བདེ་སྟོང་གཉིས་སུ་མེད་པའི་ལྷ་བཤའ་མ་ཅིག་འོང་། རྨི་ལམ་ལུས་དང་འོད་གསལ་དང་། ལྷ་སྐུ་འདྲེས་པའི་ལུས་དེ་ལ། ན་རྒྱུ་འཆི་རྒྱུ་མེད་པར་རྟོགས། ཟེར་བའང་དེ་ལ་ཟེར་བ་ཡིན། དེ་ལྟར་ཉིན་པར་སྦྱངས་པའི་གང་ཟག་དེས་ནུབ་མོ་རྨི་ལམ་གྱི་དུས་སུ། བླ་མས་ངོ་སྤྲད་པའི་ལྷ་སྐུ་ཕྱག་རྒྱ་ཆེན་པོ་བསྒོམ་དགོས་སྙམ་པ་བྱས་ལ། ཉིན་པར་བཞིན་བསྒོམས་པས་བདེ་སྟོང་གཉིས་སུ་མེད་པའི་ལྷ་སྐུ་བཤའ་མ་ཅིག་འོང་སྟེ། བདེ་སྟོང་གཉིས་སུ་མེད་པའི་ཡེ་ཤེས་མཆོག་ཟེར་བའང་དེ་ལ་ཟེར་བ་ཡིན། ཕྱག་མཚན་ཇི་ལྟར་བསྟན་ཀྱང་། འདི་ལྟར་མི་འོང་། དེ་ལྟར་ཉམས་སུ་བླངས་པས་ཞལ་མཐོང་པ་ལ་ཚེགས་མེད་གསུང་། གདམ་ངག་འདི། སློབ་མ་རྟོག་པ་ཡོད་པ་མིན་པ་ལ་སྦྱིན་དུ་མི་རུང་གསུང་སྟེ། བཀའ་རྒྱ་ཡོད། སྟེར་བའི་དུས་སུ་ཚོགས་འཁོར་དགོས་གསུང་ངོ་། ཨྀཐི།

ན་མོ་གུ་རུ།
སེམས་བསྐྱེད་ལ་བླ་མ་ལ་གསོལ་བ་དྲག་པོ་བཏབ་པོ། བཏབ་པའི་རྗེས་ལ་རང་བདེ་མཆོག་ཡབ་ཡུམ་དང་གཉིས་སུ་མེད་པར་བསམ། སྟེང་འོག་ཕྱོགས་མཚམས་ཐམས་ཅད་དུ་ནམ་མཁའ་སྔོ་ཕྱམ་ཕྱམ། ་་་ ཨྀཐི།

ན་མོ་གུ་རུ།
སངས་རྒྱས་སྟོན་པའི་ཞལ་ནས། རང་ལ་ཉི་མ་ཕོག་པའི་དུས་སུ་སྡིག་པ་དང་སྒྲིབ་པ་ཐམས་ཅད་བསྲེགས་ཤིང་སྐམས་པ་ཡིན་སྙམ་དུ་བསམ། ཁ་བ་བབས་པའི་དུས་སུ་སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པ་རང་གི་ལུས་ལ་སིབ་སིབ་ཐིམ་པར་བསམ། དེ་བཞིན་དུ་ཆར་པའང་བསྒོམ་གསུང་ལམ་ཁྱེར་གྱི་ཆོས་ཟབ། ཨྀཐི།

ཡང་རབ་ཟིན་པ་དང་རྨི་ལམ་གྱི་སྦྱོང་སྤེལ་དུས་གཅིག་ལ་ཡོད། ཡང་རབ་རྨི་ལམ་འཛིན་པར་འདོད་ན། རང་བདེ་མཆོག་དུ་བསྐྱེད་ ་་་ ཨྀཐི།

ན་མོ་གུ་རུ་ཝེ།
རང་ལུས་ཡི་དམ་དུ་བསྒོམས་པའི་སྨིན་སྤྲག་དུ་ཆོས་འབྱུང་གྲུ་གསུམ་གྱི་ནང་དུ་ཡི་གེ་ཨ་གཅིག་བསམ། ་་་ ཞལ་གྱི་གདམས་པ་ཨྀཐི།

ན་མོ་གུ་རུ།
ཡེ་ཤེས་སྐར་ཁུང་མའི་སྐབས་སུ་ཨ་སྤྱི་བོར་བསམ། ཨ་ལས་ཡེ་ཤེས་ཀྱི་བདུད་རྩི་དཀར་པོ་བབས་པས། ཆོས་འབྱུང་ཁེངས་པས་ཚེ་བསྲིང་ལ། བླ་མའི་ཞལ་གདམས་ཀྱི་རྐང་མཐིལ་ནས་སྤྱི་བོ་མན་ཆད་བདུད་རྩིས་ཁྲག་གིས་ཁེངས་པར་བསྒོམ་གསུང་ངོ་། དེ་ནས་ཨ་ཞུ་བས་ཐོད་པ་སྔར་བས་ཁྲེགས་ཤིང་འཐུག་པར་བསམ་གསུང་། ཨྀཐི།

བར་དོ་དང་པོ་དང་ཐ་མའི་དམིགས་པ་བསྡུས་པ་ཡིན་ནོ།
བར་དོ་དང་པོ་ཐ་མའི་དུས་སུ། ་་་ མངྒ་ལཾ།

ན་མོ་གུ་རུ།
སངས་རྒྱས་སྟོན་པའི་ཞལ་ནས། འཁོར་བ་ལྡོག་པ་དང་། ཡེ་ཤེས་ཀྱིས་སླེབ་པ་ལ་བཞིར་བྱེད་དོ་གསུང་ངོ་།
འཁོར་བ་ལྡོག་པའི་དུས་དང་། འཁོར་བ་ལྡོག་པར་བྱེད་པ་གཉིས་ཡིན་གསུང་།
འཁོར་བ་ལྡོག་པའི་དུས་ནི། དགེ་སྦྱོར་གནད་དུ་སོང་པས། ཉིན་པར་ཉམས་ཀྱི་སྒྱུ་མ། བདེན་མེད་དུ་བུན་བུན་འོང་པ། ནུབ་མོ་རྨི་ལམ་སྐྱམ་སྐྱམ་ཟིན་པའི་དུས་སུ་སྔོན་གྱི་ལས་ངན་ཐམས་ཅད་སློངས་ཏེ། འཁོར་བ་ལྡོག་པའི་དུས་ཡིན།
ལྡོག་པར་བྱེད་པ་ཡང་ཉོན་མོངས་ཆགས་སྡང་ལ་སོགས་པ་བཟོད་ཐབས་མེད་པ་སྐྱེས་ནས། འཁོར་བ་ལྡོག་པར་བྱེད་དོ། ཡེ་ཤེས་ལ་ཡང་གཉིས་སུ་བྱེད་གསུང་།
ཡེ་ཤེས་ཀྱིས་སླེབ་པ་དང་། ཡེ་ཤེས་ཀྱི་སླེབ་པའི་ཚད་གཉིས་ཡིན་གསུང་།
ཡེ་ཤེས་ཀྱིས་སླེབ་པ་ནི། ཉོན་མོངས་པ་དྲན་པ་དང་། རྨི་ལམ་ཡིན་སྒྱུ་མ་ཡིན་སྙམ་པ་བྱས་ནས་མགོ་གནོན་པའོ།
སླེབ་པའི་ཚད་ནི། བླ་མ་ལ་གསོལ་བ་དྲག་པོ་བཏབ་པས། སྣང་པ་འདི་བདེན་མེད་བཤའ་མར་རྟོགས་པའོ།
།སངས་རྒྱས་སྟོན་པསངས་རྒྱས་སྟོན་པའི་ཞལ་ནས། ནམ་དྲོད་ཀྱི་དུས་སུ་བདུད་ཀྱི་དམག་དང་བར་ཆོད་འོང་པས། མགོན་པོ་ལ་གསོལ་བ་དྲག་པོ་འདེབས་པ་དང་། བསྙེན་པ་སྐྱེལ་དགོས་པ་ཡིན། མགོན་པོ་ཡང་འབྱོན་པ་ཡིན་གསུང་། ཐོ་རངས་མགོན་པོ་ལ་གསོལ་བ་བཏབ་པས། ཉིན་ཞག་ཕྲུགས་གཅིག་གི་བར་ཆད་ཐམས་ཅད་སེལ་བ་ཡིན་གསུང་། ལར་ཀྱང་སེམས་བསྐྱེད་པ་དང་། བླ་མ་བསྒོམ་པ་དང་། ཚེ་བསྲིང་བ་ལ་སོགས་པ་ཐོ་རེངས་བྱེད་དགོས་པ་ཡིན། བསྲུང་པའི་འཁོར་ལོ་བསྒོམ་པ་དང་དྲག་སྔགས་ཐམས་ཅད་དགོངས་མོ་བྱེད་དགོས་པ་ཡིན། གྲིབ་ཆེན་པོ་ཕོག་པ་དང་། ཕོག་གྲབས་བྱེད་ན། བླ་མ་རང་ལ་གསོལ་བ་དྲག་པོ་མ་བཏབ་ན། གཞན་ཅིས་ཀྱང་མི་སེལ་བ་འདུག་གསུང་ངོ་།
ཡང་བླ་མ་སངས་རྒྱས་དེའི་ཞལ་ནས། རང་ལུས་ཡི་དམ་དུ་མ་ཡེངས་པར་བསྒོམ་པ་དང་གཅིག །སྤྱི་བོར་བླ་མ་བསམས་ནས། ངའི་བླ་མ་སྙམ་པའི་མོས་གུས་དུངས་དུངས་པ་རྒྱུན་ཆད་མེད་པ་དང་གཉིས། ངག་པའི་སྣང་བ་ཕྱོགས་མེད་དུ་སྦྱངས་ནས་ཐམས་ཅད་གོང་དུ་འཁུར་བ་དང་གསུམ། ཨ་པ་ང་གཉིད་དུ་སོང་ནས་འདུག་པ། སྣང་པ་འདི་རྨི་ལམ་ཡིན་པར་འདུག །ཐམས་ཅད་རྨི་ལམ་ཡིན། སྒྱུ་མ་ཡིན། བདེན་མེད་ཡིན་པ་དང་བཞི། ང་དོ་ནུབ་འཆི་འྨ་སང་འཆི་ཅིས་ཀྱང་ཅི་བྱེད་སྙམ་པའི་མི་རྟག་འཆི་བ་དྲན་པ་དང་ལུས་ངག་ཡིད་གསུམ་གྱིས་སེམས་ཅན་ཐམས་ཅད་ལ་ཕན་ཐོགས་པར་གྱུར་ཅིག །སེམས་ཅན་ཐམས་ཅད་བདེ་བར་གྱུར་ཅིག །སྐྱིད་པར་གྱུར་ཅིག་སྙམ་པ་དང་ལྔ་པོ་དེས་དུས་འདའ་དགོས་པ་ཡིན་གསུང་།
ལར་ཡང་སྦྱོར་བ་སེམས་བསྐྱེད། དངོས་གཞི་མི་དམིགས་པ། རྗེས་བསྔོ་བའོ།
།ཡེ་ཤེས་རྒྱ་མཚོ་ལས། ལྷ་སྐུ་སྣང་སྟོང་སྒྱུ་མ་ཡི། །ངོ་བོ་བརྗོད་བྲལ་བློ་ལས་འདས། །རང་བཞིན་དབྱེར་མེད་མཐའ་དང་བྲལ། །མཚན་ཉིད་མ་འདྲེས་ཡོངས་སུ་རྫོགས། །དེ་ལྟར་ཆོས་རྣམས་ཐམས་ཅད་ལ། །མཁས་པས་ཡོངས་སུ་ཤེས་པར་བྱ།
ཡེ་ཤེས་མངོན་འབྱུང་ལས། སྣང་བའི་ཆ་ལ་བསྐྱེད་རིམ་དང་། །སྟོང་པའི་ཆ་ལ་རྫོགས་རིམ་ཏེ། །བསྐྱེད་རྫོགས་མ་ཡིན་ཆོས་འགའ་མེད། །ཟུང་འཇུག་ཚུལ་འདི་བསྟན་པའོ། ཞེས་སོ།
།ཡེ་ཤེས་གསལ་སྒྲོན་ལས། མཚན་དང་དཔེ་བྱད་ལྡན་པའི་ལྷ། །བསྐལ་པ་སྟོང་དུ་བསྒོམས་པ་བས། །བླ་མ་དྲན་པ་བསོད་ནམས་ཆེ། །ལྷ་སྐུ་མ་བསྒོམ་བླ་མ་བསྒོམས། ཅེས་སོ།
འགྲོ་འདུག །འཕོ་སྐྱས། བློ་སྣ་བལྟ་རྟོག་མང་པོ་དགེ་སྦྱོར་གྱི་སད་ཡིན་པས། སད་བཞིས་མ་ཁྱེར་བ་གལ་ཆེའོ།
མངྒ་ལཾ།། །།</span>