'od gsal 'char sgo ngos 'dzin

Resource ID	SP2
Title	'od gsal 'char sgo ngos 'dzin
Topics	Clear Light
Sub-Topics	Instructions
Author	Sangyé Pelsang
Link	BDRC W3CN18508

This text needs to be re-read
༄༅། །འོད་གསལ་འཆར་སྒོ་ངོས་འཛིན་བཞུགས་སོ།།

ན་མོ་གུ་རུ།
རྟག་ཏུ་སྙིང་ལ་གནས་པའི་འོད་གསལ་ནི། ལྷུན་གྲུབ་བརྗོད་བྲལ་འདུས་མ་བྱས་པ་ཡི། ཡེ་ཤེས་གསལ་བར་སྟོན་པའི་བླ་མ་ལ། བཏུད་ནས་འོད་གསལ་འཆར་སྒོ་ངོས་འཛིན་བྲི།
དེ་ལ་གཞིའི་འོད་གསལ་ནི། ཆོས་ཐམས་ཅད་ཀྱི་གནས་ལུགས་འོད་བ་ཆེན་པོའི་སྐུ། བརྟན་གཡོ་ཀུན་ལ་ཁྱབ་པ་དེ་ཡིན་ལ། དེ་མངོན་དུ་འགྱུར་བར་བྱེད་པའི་ཐབས། ལམ་ཟབ་མོ་སྐྱོན་མེད་པ་བསྒོམས་པས། བློ་བུར་དྲི་མ་རིམ་གྱིས་དག་ནས། ཡེ་ཤེས་ཀྱི་ཡུལ་དུ་འགྱུར་ཚུལ་ཡང་།
རིན་ཆེན་རྒྱ་མཚོའི་རྒྱུད་ཕྱི་མ་ལས། །བླ་མའི་བྱིན་རླབས་འོད་གསལ་ནི། །ཐོ་རངས་ཚེ་འམ་དུས་གཞན་དུ། །གསལ་སྟོང་བདེ་ཆེན་དབྱེར་མེད་པའི། །འཆར་སྒོ་དམ་པའི་ཞལ་ལས་དྲིས། ཞེས་པས།
དེ་ལ་བཞི། གསལ་བའི་འཆར་སྒོ་དང་། མི་རྟོག་པའི་དང་། བདེ་བའི་དང་། ཟུང་དུ་འཇུག་པའི་འཆར་སྒོའོ།
དང་པོ་ནི། གཉིད་ཀྱི་འོད་གསལ་འཛིན་པའི་ཚེ། སྣང་བ་དཀར་ལམ་པ་འབྱུང་སྟེ། སྐུ་རྡོ་རྗེའི་ངོ་བོ་དཀར་ལམ་ཤེས་པ་ཟེར། དེར་རྗེས་དམར་ལམ་པ་འབྱུང་སྟེ། གསུང་རྡོ་རྗེའི་ངོ་བོ་དམར་ལམ་ཤེས་པ་ཟེར། དེར་རྗེས་ནག་ཐིབས་པ་འབྱུང་སྟེ། ཐུགས་རྡོ་རྗེའི་ངོ་བོ་ནག་ལམ་ཤེས་པ་ཟེར། དེ་རྣམས་ཀྱང་འོད་ཀྱི་སྣང་བ་ཡིན་ཞིང་། དེར་རྗེས་ནག་ལམ་གྱི་དུས་དང་རྗེས་ལ་མ་འཁྲུལ་བ་བྱས་པས་གཉིད་ཀྱི་འོད་གསལ།
གཉིད་དུ་སོང་པ་ཡིན་བྱས་པ། རང་གི་མདུན་ན་ཕར་གྱི་དངོས་པོ་ཐམས་ཅད་གསལ་སིང་ངེ་མཐོང་པ། མ་སོང་པ་ཡིན་བྱས་པས། སད་ཙ་ན་ནག་ཐིབས་ཀྱི་འགྲོ་བ་དང་། རྣ་བར་མདོ་འདོན་པ་དང་། སྔགས་འདྲེན་པ་ཐོས་པ་ལ་བརྟེན་ནས། རིག་པ་བདེ་བ། གསལ་བ་དང་། གཉིད་དུ་་་ བསྒོམས་པའི་དུས་སུ། ཟླ་བ་ཤར་འདུག་སྙམ་པ་དཀར་ལམ་མེ་མདངས། ཟླ་བ་ཤར་འདུག་སྙམ་པ་དཀར་ཞིང་དངས་པ་དང་། ཉ་ཟླ་ཤར་འདུག་སྙམ་པ་ལ། འོད་ཟེར་གསལ་སིང་ངེ་བ་མིག་བལྟ་མི་བཟོད་པ་དང་། རང་གི་སྙིང་ཁ་ན་མར་མེ་འབར་བ་ལྟ་བུ་དང་། དམར་སྐྱེམ་སྐྱེམ་འོད་རེས་གསལ་རེས་མི་གསལ་བ་སྲིན་བུ་མེ་ཁྱེར་ལྟ་བུ་དང་། རང་གི་ཁང་པ་ན་མར་མེ་གསལ་པོ་བཏང་འདུག་སྙམ་པ་དང་། མེ་ཆེན་ནེ་ལྷབ་ལྷབ་འབར་ཀྱི་འདུག་སྙམ་པ་དང་། རང་གི་སྔས་ཁ་ན་མར་མེ་གསལ་པོ་བཏང་འདུག་སྙམ་པ་དང་། ཀོང་བུ། སྣུམ་དང་། སྡོང་བུར་བྱས་པ་གསལ་སིང་སིང་མཐོང་བ་དང་། གློག་ལྟ་བུར་དམར་ཁྱུག་ཁྱུག་པ་དང་། དམར་ཕྲ་ཕྲ་བ་དང་། སེར་ཕྲ་ཕྲ་བ་དང་། སྤྲིན་ལྟ་བུ་སྐྱ་ལིང་ལིང་པ་དང་། མཚན་མོའམ། མུན་པ་ནག་པར་བསྒོམ་དུས། དུ་བ་ལྟ་བུར་སྐྱ་ཕྱུར་ཕྱུར། སྔོ་བུན་བུན། ཁམ་ཐུལ་ཐུལ་བ་དང་། སྨིག་སྒྱུ་ལྟ་བུ་སྔོ་རིབ་རིབ། སྔོ་ཟིམ་ཟིམ་ཆར་འབབ་པ་ལྟ་བུ་དང་། སྤྲིན་མེད་པའི་ནམ་མཁའ་ལྟ་བུ་སྔོ་སངས་ཀྱི་རྣམ་པ་དང་། དབྱིབས་དང་རྒྱ་ཅི་རིགས་པར་མཐོང་བ་དང་། འཇའ་འོད་སྣ་ཚོགས་ཀྱི་རྣམ་པ་དང་། འཛིན་མེད་གྱི་ཁམས་རྒྱ་ཆེན་པོ་དང་། ལུང་པ་སྣ་ཚོགས་དང་། ནགས་ཚལ་སྣ་ཚོགས་དང་། མཚོ་དང་འབབ་སྣ་ཚོགས་དང་། དམྱལ་བའི་རྣམ་པ་སྣ་ཚོགས་དང་། ཡི་དགས་ཀྱི་རྣམ་པ་སྣ་ཚོགས་དང་། དུད་འགྲོའི་རྣམ་པ་སྣ་ཚོགས་དང་། མིའི་རྣམ་པ་སྣ་ཚོགས་དང་། ལྷ་མ་ཡིན་གྱི་རྣམ་པ་སྣ་ཚོགས་དང་། ལྷའི་རྣམ་པ་སྣ་ཚོགས་དང་། ཁང་པ་དང་ཡོ་བྱད་ཀྱི་རྣམ་པ་སྣ་ཚོགས་དང་། རྫས་ཀྱི་རྣམ་པ་སྣ་ཚོགས་དང་། གཞན་ཡང་སྒྲ་གཅན་གྱི་རྣམ་པ་ནག་པོ་སླ་ངའི་རྒྱབ་ལྟ་བུ་དང་། དུད་ཁ་ལ་གྲོལ་མའི་མིག་ལྟ་བུ་དང་། མདོར་ན་སྲིད་པ་གསུམ་དུ་སྲིད་པ་དང་མི་སྲིད་པའི་ཁ་དོག་དང་། གཟྱ་ཀྱི་རྣམ་པ་ཅི་ཤར་ཡང་། འོད་གསལ་གྱི་རྣམ་པ་ཁོ་ན་ཡིན་ཏེ། རྣམ་པ་ཐམས་ཅད་པའི་འོད་གསལ་ཞེས་བྱའོ།
དེ་ལྟར་ཡང་། གྲུབ་ཐོབ་ཁྱུང་པོ་ཉིད་ཀྱིད་མཛད་པའི་བདེ་མཆོག་ལྷ་ལྔའི་མངོན་རྟོགས་སུ། །དུ་བ་ལྟ་བུ་ལ་སོགས་པའི་རྟགས་ལྔ་ཤར་ནས། སྤྲིན་མེད་པའི་ནམ་མཁའ་ལྟ་བུའི་ཆོས་ཉིད་མངོན་དུ་བྱེད་དོ། །ཞེས་ཆོས་ཉིད་ཀྱི་གསལ་སྣང་དུ་གསུངས་ཤིང་།
བར་དོའི་བཤད་པའི་སྐབས་སུ། ཐམས་ཅད་འོད་གསལ་གྱི་སྣང་བ་འབའ་ཞིག་ཏུ་གསུངས་ཏེ། དྲི་མ་མེད་པའི་རྒྱུད་སྡེ་དང་། མདོ་སྡེ་དང་། གྲུབ་ཐོབ་རྣམས་ཀྱི་མགུར་མ་དང་། འདིའི་བླ་མ་བརྒྱུད་པ་རྣམས་ཀྱི་རྣམ་ཐར་དུ་གསལ་བའི་ཚུལ་ནི། དཔལ་གསང་བ་འདུས་པའི་རྒྱུད་ཕྱི་མར་ཡང་གསུངས་པ།
།འགོག་པོ་རྡོ་རྗེ་འགྲོད་སེམས་ལ། །མཚན་མ་ཉེར་འཛིན་འབྱུང་འགྱུར་ཏེ། །མཚན་མ་དེ་ནི་རྣམ་པ་ལྔར། །བྱང་ཆུབ་རྡོ་རྗེས་བཤད་པ་ཡིན། །དང་པོ་སྨིག་སྒྱུའི་རྣམ་པ་སྟེ། །གཉིས་པ་དུ་བའི་རྣམ་པ་ཡིན། །གསུམ་པ་མཁའ་སྣང་རྣམ་པ་སྟེ། །བཞི་པ་སྒྲོན་མ་འབར་བའོ། །ལྔ་པ་རྟག་ཏུ་སྣང་བ་ནི། །སྤྲིན་མེད་ནམ་མཁའ་ལྟ་བུ་ཡི། ཞེས་གསུངས་པ་དང་།
མཁའ་འགྲོ་མ་རྡོ་རྗེ་གུར་ལས་ཀྱང་། །ཡན་ལག་དྲུག་བསྒོམས་དེ་ལ་ནི། །སླར་ཡང་རང་བྱིན་བརླབས་པ་སྟེ། །རྗེས་མཐུན་ཆེ་གའི་རིམ་པ་ཡི། །ཕྱི་ནས་མཚན་མ་མཚོན་པར་བྱའོ། །དང་པོ་སྤྲིན་དང་འདྲ་བ་སྟེ། །གཉིས་པ་དུ་བ་ལྟ་བུའོ། །གསུམ་པ་སྲིན་བུ་མེ་ཁྱེར་འདྲ། །བཞི་པ་མར་མེ་འབར་བས་སྟེ། །ལྔ་པ་རྟག་ཏུ་སྣང་བ་ནི། །སྤྲིན་མེད་ནམ་མཁའ་ལྟ་བུ་འོ། །ཕྱི་ནས་སྒྱུ་མའི་རྣམ་པ་སྟེ། །རྨི་ལམ་རྣམ་པ་སྐད་ཅིག་ལས། །དེ་ནི་ཐམས་ཅད་མཁྱེན་པའི་རྒྱུ། །དངོས་གྲུབ་ཉེ་བར་གྱུར་པ་འོ། །ཞེས་གསུངས་པ་དང་།
མཚན་ཡང་དག་པར་བརྗོད་པ་ལས། ནམ་མཁའ་ལས་བྱུང་རང་བྱུང་བ། །ཤེས་རབ་ཡེ་ཤེས་མེ་བོ་ཆེ། །འོད་ཆེན་རྣམ་པར་སྣང་བར་བྱེད། །ཡེ་ཤེས་སྣང་བ་ལམ་མེ་བ། །འགྲོ་བའི་མར་མེ་ཡེ་ཤེས་སྒྲོན། །གཟི་བརྗིད་ཆེན་པོ་འོད་གསལ་བ། །སྔགས་མཆོག་སྔགས་བདག་རིགས་སྔགས་རྒྱལ། ཅེས་གསུངས་པ་དང་།
དང་པོའི་སངས་རྒྱས་ཀྱི་རྩ་བའི་རྒྱུད་ལས། ཁམས་གསུམ་པོ་ནི་མ་ལུས་པའི། །སངས་རྒྱས་གཟུགས་ནི་བསྒོམ་པར་བྱ། ཞེས་དང་།
ཀྱཻའི་རྡོ་རྗེ་ལས། བརྟན་དང་གཡོ་བའི་དངོས་ཀུན། །རྩ་ལྕུག་འཁྲིལ་ཤིང་ལ་སོགས་པ། །བདག་གི་དངོས་པོའི་རང་བཞིན་ལས། །དམ་པའི་དེ་ཉིད་ངེས་བསྒོམ་བྱ། ཞེས་གསུངས་ཏེ།
ཡང་དེ་ཉིད་དུ། བསྒོམ་པ་པོ་མེད་བསྒོམ་པའང་མེད། །ལྷ་མེད་སྔགས་ཀྱང་ཡོད་མ་ཡིན། །སྤྲོས་པ་མེད་པའི་རང་བཞིན་ལ། །སྔགས་དང་ལྷ་ནི་ཡང་དག་གནས། ཞེས་གསུངས་སོ།
གཉིས་མེད་རྣམ་རྒྱལ་དང་། རོལ་པ་ལས། ཁྱུང་པོས་ལུང་དྲངས་པར། དང་པོ་མིག་སྒྱུ་ལྟ་བུ་སྟེ། །དང་པོའི་མིག་སྒྱུ་དེ་ཉིད་ཀྱང་། །འོད་ཟེར་ལྔ་དང་ལྡན་པར་མཐོང་། །གཉིས་པ་ཟླ་བ་ལྟ་བུ་དང་། །གསུམ་པ་ཉི་མ་ལྟ་བུ་དང་། །བཞི་པ་མུན་པ་ལྟ་བུ་ལ། །ལྔ་པ་སྤྲིན་མེད་ནམ་མཁའ་ལས། །མི་རྟོག་མཐའ་དབུས་མེད་པར་འཆར། ཅེས་གསུངས་པ་དང་།
མཚན་བརྗོད་ལས། གཟུགས་མེད་གཟུགས་བཟང་དམ་པ་སྟེ། །སྣ་ཚོགས་གཟུགས་ཅན་ཡིད་ལས་སྐྱེས། །གཟུགས་རྣམས་ཐམས་ཅད་སྣང་བའི་དཔལ། །གཟུགས་བརྙན་མ་ལུས་འཆང་བ་པོ། །ཞེས་གསུངས་པ་དང་།
ཡུམ་ལས་ཀྱང་། སེམས་ལ་སེམས་མ་མཆིས་ཏེ། སེམས་ཀྱི་རང་བཞིན་འོད་གསལ་བའོ། །ཞེས་གསུངས་སོ།
གཞན་ཡང་གནས་སྐབས་ཇི་ལྟ་བར། རྣ་བས་རོལ་མོ་ལ་སོགས་པའི་སྒྲ་སྙན་མི་སྙན་ཅི་རིགས་ཐོས་པ་དང་། སྣས་དྲི་ཞིལ་མི་ཞིལ་ཅུང་ཟད་ཚོར་བ་དང་། ལྕེས་རོ་མངར་སྐྱུར་ལ་སོགས་པ་མྱོང་བ་དང་། ལུས་ཀྱི་བདེ་བ་དང་། འཁྲིག་པ་ལ་སོགས་པའི་ཚོར་བའང་འབྱུང་སྟེ། མ་དག་པའི་གཟུང་འཛིན་སྤངས་ནས། ལམ་ཟབ་མོ་ལ་མཉམ་པར་བཞག་པས་གནས་གྱུར་གྱི་མགོ་ཟིན་ཅིང་། དག་པ་ཆོས་ཉིད་ཀྱི་སྣང་པ་ལ་གནས་པའོ།
།དེ་ལྟར་ཡང་གུར་ལས། གཟུགས་ནི་མིག་གིས་མི་འཛིན་ཞིང་། །སྒྲ་ནི་རྣ་བས་ཐོས་པ་མིན། །ལྕེ་ཡིས་རོ་ནི་མི་འཛིན་ཞིང་། །རེག་བྱ་ལུས་ཀྱི་གོང་བུས་མིན། །འོན་ཀྱང་བདེ་ཆེན་ཚུལ་ལས་ནི། །བུད་མེད་བཟང་མོས་རེག་པ་བདེ། །རྣ་བ་གླུ་ཡི་བདེ་བ་བཟང་། །སྣོམ་པ་དྲི་ཡི་བདེ་བ་ཆེ། །སྐྱེས་གནས་རེག་པ་བདེ་ཆེན་དང་། །རོའི་བཏུང་བའི་སྦྱོར་བ་ལས། །ཞེས་པ་དང་།
བྱམས་མགོན་གྱིས་ཀྱང་། ཟག་པ་མེད་ཁྱབ་འཇིགས་མེད་ཆོས་ཅན་དེ། །བརྟན་ཞིང་བརྟག་པ་འཕོ་མེད་གནས་པ་ཡི། །དེ་བཞིན་གཤེགས་པ་མཁའ་བཞིན་དམ་པ་ཡིས། །དབང་པོ་དྲུག་དོན་ཉམས་སུ་མྱོང་པའི་རྒྱུ། །གཟུགས་མེད་གཟུགས་དོན་ལྟ་དང་གཏམ་བཟང་ནི། །གཙང་མ་ཉན་ཏམ་བདེ་གཤེགས་ཚུལ་ཁྲིམས་ཀྱིས། །དྲི་གཙང་སྣོམ་དང་འཕགས་ཆེན་དམ་ཆོས་རོ། །མྱོང་དང་ཏིང་འཛིན་རེག་བདེ་ཉམས་མྱོང་དང་། །རང་གི་ངོ་བོ་ཉིད་དང་ཟབ་པའི་ཚུལ། །རྟོགས་པའི་རྒྱུར་འགྱུར་ཞི་བ་བསམས་པ་ན། །དོན་དམ་བདེ་མཛད་དེ་བཞིན་གཤེགས་པ་ནི། །ནམ་མཁའ་བཞིན་དུ་རྒྱུ་མཚན་རྣམས་དང་བྲལ། །ཞེས་པ་དང་།
ཉིན་པར་གྱི་དུས་ཞེ་སྡང་ལ་སོགས་པའི་རྐྱེན་འགའ་ཞིག་གིས། རྨི་ལམ་གྱི་དུས་རྟོག་པ་གསལ་ལ་རགས་པ་དང་། གཉིད་གཅིག་ཀྱང་མེད་པར་ཁམས་དངས་པ། ཤ་རྩི་དཀར་ལ་དངས་པ་འོང་། རླུང་དང་ཁམས་འདུས་འདྲ་མོ་འབྱུང་སྟེ། དེ་ཀའི་ངང་ལ་བསྐྱངས་པས་ཆོག །འོད་གསལ་གྱི་ཆ་ཡིན།
གཉིས་པ་ལ་བཞི་སྟེ། རླུང་སེམས་དབུ་མར་ཆུད་པ་དང་། རྩ་མདུད་གྲོལ་བ་དང་། རྣམ་ཤེས་མཐའ་ཡས་པ་དང་། མི་རྟོག་པར་སོང་པའོ།
།དང་པོ་གཉིད་དུ་འགྲོ་བའམ། སོང་དུས་རྣ་བ་ཟི་རོང་རོང་ཐིབས་ཐིབས་ནག་ཡོར་ཡོར་བྱུང་བ་ལྟ་བུ་ལ། ཇིར་ཇིར་གནོན་པ། རྣ་བར་ཟི་རོང་རོང་། ཐིབས་ཐིབས་འོང་པས། དེ་ལ། ང་འདྲོས་མནན་འདུག་སྙམ་ནས། སྔགས་བཟླས་ལྷ་བསྒོམས་ཀྱང་ཐུར་འགྲོ་བས། དེ་ལ་འོད་གསལ་དུ་ངོས་བཟུང་ལ། མི་རྟོག་པ་ལ་བཞག་པས། རླུང་སེམས་དབུ་མར་ཆུད་ནས་འོད་གསལ་འབའ་ཞིག་དུ་འགྲོ་བ་ཡིན་ནོ།
།གཉིས་པ་ནི། གཉིད་དུ་ལྷན་སོང་པ་དང་། འདར་ཡེད་ཡེད་ལ། ཡན་ལག་ཕྲས་སོང་ན། འདོམ་གང་དོ་འཕར་བ་འབྱུང་། དེ་ལ་དར་ཅིག་བརྒྱལ་སོང་ན་དེ་མི་བསྒུལ་བར་བཞག་པས་རྩ་མདུད་གྲོལ་ནས་དགེ་སྦྱོར་བཟང་པོ་འབྱུང་། གཞན་ཡང་ལུས་འདར་བ་དང་། འཕར་བ་དང་། རྒྱུག་བ་དང་། མཆོང་བ་སོགས་ལུས་ཉམས་སྣ་ཚོགས་དང་། སྨྲ་བ་དང་། རྒོད་པ་དང་། ངུ་བ་དང་། གླུ་དང་། དབྱངས་ལེན་པ་སོགས་ངག་ཉམས་སྣ་ཚོགས་དང་། སེམས་ཁྲོ་བ་དང་། འཚིག་པ་དང་། དགའ་བ་དང་། ཁེངས་པ་དང་། ཞུམ་པ་ལ་སོགས་པ་འབྱུང་བའོ།
།གསུམ་པ་ནི། རང་གི་རྣམ་ཤེས་འདི་ནམ་མཁའ་ལ་སྤྲ་ཡས་གྱེས་པ་དང་། ཤེས་པ་ནང་དུ་བསྟུ་ཡེ་མི་འདུས་པ་འབྱུང་བས། དེ་ལ་ནམ་མཁའ་གར་ཁྱབ་ཤེས་པས་ཁྱབ་པར་བྱས་ལ་བཞག་གོ
།བཞི་པ་ནི། ཐོ་རེངས་སོགས་སྔངས་པ་དང་། འདར་ཡེད་ཡེད་པ་འོང་པས། དེ་ལ་གླང་པོ་ཆེའི་ལྟ་སྟེངས་ཀྱིས་མིག་གཅེས་བལྟས་ནས་བཞག་པས། གསལ་སྟོང་སྤྲོས་པ་ཐམས་ཅད་དང་བྲལ་བར་ལྷག་གི་རྟོགས་པར་འགྱུར་རོ།
།གསུམ་པ་ལ་གཉིས་སྟེ། ཟག་བཅས་དང་། ཟག་མེད་དོ།
།དང་པོ་ནི། ཡས་འབབ་ཀྱི་འཕོ་བའི་བདེ་བ་ཡིན་ནོ།
།གཉིས་པ་ནི། ནོར་བུ་ལས་ཕྱིར་མི་འདའ་ཞིང་། གྱེན་དུ་རྒྱས་པས་བདེ་བ་རྒྱས་ཞིང་། རྟོག་པ་དང་བྲལ་བའོ།
།བཞི་པ་ནི། སྔར་བཤད་པའི་འོད་གསལ་གྱི་སྣང་པ་རྣམ་པ་སོ་སོར་གསལ་བས་གསལ་བ། བེམ་པོའི་ཁམས་ལས་འདས་པས་སྟོང་པ། ཟག་པ་མེད་པའི་བདེ་བ་རྒྱས་པས་བདེ་བ། དེ་རྣམས་ཟུང་དུ་ཆུད་པས་གསལ་སྟོང་བདེ་ཆེན་དབྱེར་མེད་པ་ནི། སྒྱུ་མ་སྒྱུ་འཛིན་དང་བྲལ་བའི་འོད་གསལ་ཕྱག་རྒྱ་ཆེན་པོ་ཡིན་ལ། དེ་ལ་རྟག་ཏུ་གོམས་པས། སྒྲི་གཉིས་བག་ཆགས་དང་བཅས་པའི་དྲི་མ་མ་ལུས་པ་དག་ནས། གཞི་ལ་བཞུགས་པའི་འོད་གསལ་ཡོངས་སུ་རྫོགས་པར་མཐོང་བ་ནི། འབྲས་བུ་ཆོས་ཀྱི་སྐུ་མངོན་དུ་གྱུར་པ་ཞེས་བྱའོ།
།ཟབ་གསལ་ཆོས་ཉིད་རྟོགས་པའི་ཡུལ་མིན་ཡང་། །འོད་གསལ་འཆར་སྒོ་གསལ་བར་སྟོན་པའི་གཞུང་། །སངས་རྒྱས་དཔལ་གྱིས་ལྐུགས་ལུང་དགོན་པར་བྲིས། །དགེ་བས་ཀུན་གྱིས་འདི་དོན་རྟོགས་པར་ཤོག
།འདི་ནི་ཤིན་ཏུ་རྨད་དུ་བྱུང་བའི་དོན་ཡིན་པས། མྱོང་པ་རྒྱུད་ལ་སྐྱེས་དེས་ཀྱི་སློབ་མ་མ་གཏོགས། ཆད་སྟོང་དང་བེམ་སྟོང་ལ་མངོན་པར་ཞེན་པ། ཟབ་མོའི་གནས་ལ་སྐྲག་པ་རྣམས་ལ་སྦ་བར་བྱའོ། ཨྀཐིཿ
མཉམ་མེད་སངས་རྒྱས་དཔལ་བཟང་པོའི་ཞལ་མངའ་ནས་མཛད་པའོ།། །།