Yid bzhin nor bu'i lo rgyus

Resource ID	Gönkar4
Title	yid bzhin nor bu'i lo rgyus
Topics	White protector
Sub-Topics	Story
Author	Khyungpo Neljor
Associated Person	Maitripa Rahula
Link	BDRC W23681 (p. 218)
Notes	Taken from khyung po'i rnam thar

༄༅། །ཡིད་བཞིན་ནོར་བུའི་ལོ་རྒྱུས་བཞུགས་སོ།

།ན་མོ་གུ་རུ།
བླ་མ་མཻ་ཏྲི་པ་ཀོ་ས་བྷི་ཀྵིའི་དུར་ཁྲོད་ན་བཞུགས་པའི་དུས་སུ། གྲུབ་ཆེན་རཱ་ཧུ་ལས་གསེར་སྲང་བདུན་ཕུལ་ནས། བོད་ལ་ལོངས་སྤྱོད་ཆུང་བས། ནོར་སྒྲུབ་མྱུར་བ་རྟགས་མཚན་ཆེ་བའི་གདམས་པ་ཅིག་ཞུ་ཞུས་པས།
མཻ་ཏྲི་པའི་ཞལ་ནས། ཡིད་བཞིན་གྱི་ནོར་བུའི་མགོན་པོ་ཞེས་ཀྱང་བྱ། ཤིང་ཕུང་ཅན་ཞེས་ཀྱང་བྱ། ཙནྡན་གྱི་མགོན་པོ་ཞེས་ཀྱང་བྱ། ཐུགས་རྗེ་ཆེན་པོ་ནག་པོ་ཞེས་ཀྱང་བྱ། ཡེ་ཤེས་ཀྱི་མགོན་པོ་ཕྱག་དྲུག་པ་ཞེས་ཀྱང་བྱ། འདི་ཕྱི་བར་དོའི་འཇིགས་པ་ལས་སྐྱོབ། ལྷ་འདྲེ་མི་གསུམ་དབང་དུ་སྡུད། མི་ནོར་ཟས་གསུམ་ཤུགས་ལས་འབྱུང་བ། དགྲ་བགེགས་ཐམས་ཅད་རྡུལ་དུ་རློག་པར་བྱེད་པ། བཟློག་པར་མི་ནུས་པ། མཆོག་དང་ཐུན་མོང་ཐམས་ཅད་ལོ་ཟླས་འགྲུབ་པ། མཆོག་བསྒྲུབས་པས་ཐུན་མོང་ཞར་ལས་འབྱུང་བ། ཐུན་མོང་བསྒྲུབ་པས་མཆོག་ཞར་ལས་འབྱུང་བ་ཞིག་ཡོད་པ་དེ་ཁྱོད་ལ་སྦྱིན་གསུངས་སོ།
།དེ་བླ་མ་ལ་ཞུ་བྱས་པས། སྔོན་གྱི་དུས་ན་སངས་རྒྱས་སྣང་བ་མཐའ་ཡས་ཀྱི་སྤྱན་སྔར་ཐུགས་རྗེ་ཆེན་པོས་སེམས་བསྐྱེད་འཁོར་བའི་རྒྱ་མཚོ་འདི་སྟོང་པར་མ་གྱུར་བར་དུ་བདག་སངས་རྒྱས་པར་མ་གྱུར་ཅིག །གལ་ཏེ་སེམས་བསྐྱེད་ཉམས་པར་གྱུར་ན་མགོ་བོ་ཚལ་པ་སྟོང་དུ་འགས་པ་གྱུར་ཅིག །ཅེས་བརྗོད་ནས་དམ་བཅས་ཏེ། རི་བོ་པོ་ཏ་ལར་ཉིན་མཚན་དུས་དྲུག་ཏུ་སེམས་ཅན་རྣམས་ལ་ཡེ་ཤེས་ཀྱི་གཟིགས་པ་འཇུག་ཅིང༌། གང་ལ་གང་འདུལ་གྱི་དོན་བྱས་པར་གྱུར་ཏོ། །དེ་ནས་ལོ་དཔག་ཏུ་མེད་པར་སེམས་ཅན་གྱི་དོན་བྱས་ཏེ། སེམས་ཅན་མང་པོ་ཐར་གྲོལ་བྱུང་ལས་ཆེ་སྙམ་ནས་གཟིགས་པས། སེམས་ཅན་གྱི་ཁམས་ལ་འཕེལ་འགྲིབ་མེད་པའི་སྟེང་དུ་སྙིགས་མར་སོང་བས་ཉོན་མོངས་པ་རགས་པ། གདུག་པ་ཆེར་སོང་འདུག་པས། ད་ནི་བདག་གིས་སེམས་ཅན་རེ་འགའ་ཙམ་ཡང་སྒྲོལ་བར་མི་ནུས་པར་འདུག་སྙམ་ནས། སེམས་བསྐྱེད་བཏང་བ་དང༌། དབུ་ཚལ་པ་སྟོང་དུ་གས་པར་གྱུར་ཏོ། །དེ་ན་སྣང་བ་མཐའ་ཡས་བྱོན་ནས། རིགས་ཀྱི་བུ་དེ་ལྟ་བུའི་སེམས་བསྐྱེད་ལས་གཞོལ་བ་ནི་ཤིན་ཏུ་མ་ལེགས་པས། དེའི་བཤགས་པ་ལ་སེམས་བསྐྱེད་སྔར་ལས་རྒྱ་ཆེ་བ་ཞིག་ཟུངས་ཤིག་གསུངས་ནས། དབུ་སྟོང་དུ་གས་པ་ཞལ་བཅུ་གཅིག་ཏུ་བྱིན་གྱིས་བརླབས་སོ། །ད་ནི་སྔར་གྱི་སེམས་བསྐྱེད་ལས་རྒྱ་ཆེ་བ་མེད་ཅིང༌། དེའི་ཆ་གཅིག་ཀྱང་ངས་མ་ནུས་པས། དེ་བས་རྒྱ་ཆེ་བ་ནི་གཅིག་ཀྱང་མེད་དོ་སྙམ་ནས། ཞག་བདུན་བརྒྱལ་བར་གྱུར་ཏོ། །དེ་ནས་བརྒྱལ་བ་དེ་སངས་པ་དང༌། ད་ནི་སྙིགས་མའི་སེམས་ཅན་ཚེ་ཐུང་ལ་བར་ཆད་མང་བ། རྐྱེན་དབང་འབའ་ཞིག་ཏུ་འགྲོ་བ། ལོངས་སྤྱོད་ཆུང་བས་འཚོ་བ་དམན་པ། སྒྲུབ་ལོང་མེད་པར་བར་ཆད་ཀྱི་དབང་དུ་འགྲོ་བ། དམ་ཚིག་མི་བསྲུང་བ། ཟློག་པ་དང་ནང་དམེ་བྱེད་པ། ཆོས་བྱེད་ཕལ་ཆེར་བར་དོའི་འཇིགས་པ་ལས་མི་ཐར་བར་གཟིགས་ནས། ཡུན་རིང་མི་དགོས་པར་ཞལ་མཐོང་བ། གསོལ་བ་བཏབ་པ་ཙམ་གྱིས་འདི་ཕྱི་བར་དོའི་འཇིགས་པ་ཐམས་ཅད་ལས་སྐྱོབ་པ། མི་ནོར་ཟས་གསུམ་ཤུགས་ལས་འབྱུང་བ། བར་དུ་གཅོད་པའི་དགྲ་བགེགས་ཐམས་ཅད་སྐད་ཅིག་གིས་བརླག་པར་མཛད་པ། མཆོག་དང་ཐུན་མོང་ལོ་ཟླས་འགྲུབ་པའི་དབང་གི་རྒྱལ་པོ་ལྟ་བུའི་ཁྲོ་བོར་གྱུར་ནས་སེམས་ཅན་གྱི་དོན་བྱའོ་སྙམ་ནས། ཐུགས་ཀ་ནས་ཧཱུྃ་མཐིང་ནག་གཅིག་བྱུང་བ་ལས། ཡེ་ཤེས་ཀྱི་མགོན་པོ་ཕྱག་དྲུག་པ། སྐྱེ་འགྲོའི་རེ་བ་ཚུལ་བཞིན་དུ་སྐོང་བའི་ཡིད་བཞིན་གྱི་ནོར་བུ་ལྟ་བུར་གྱུར་པ་དང༌། ས་རྣམ་པ་དྲུག་ཏུ་གཡོས་སོ། །དེ་ནས་སངས་རྒྱས་སྣང་བ་མཐའ་ཡས་ལ་སོགས་པའི་སངས་རྒྱས་དཔག་ཏུ་མེད་པས་མགྲིན་གཅིག་ཏུ་བསྡེབས་ཏེ། རིགས་ཀྱི་བུ་སེམས་ཅན་གྱི་རེ་བ་ཚུལ་བཞིན་དུ་སྐོང་བའི་སྤྱོད་པ་འདི་ཤིན་ཏུ་ལེགས་སོ། །སངས་རྒྱས་ཐམས་ཅད་ཀྱི་ཐུགས་ཀྱི་གསང་བ་ལས་བྱུང་བ། བཅོམ་ལྡན་འདས་གཤིན་རྗེ་གཤེད་པོས་ཉིད་ཡི་མཐུ་དང་ལྡན་པར་བྱའོ། །གསང་བའི་ཁྲོ་བོ་དབང་གི་རང་བཞིན་དང་ལྡན་པར་བྱའོ། །དེ་ཉིད་ཀྱི་ཞི་བ་དང་རྒྱས་པར་འགྱུར་རོ། །སངས་རྒྱས་ཐམས་ཅད་ཀྱི་ཕྲིན་ལས་སུ་སྤྲུལ་པ་ལས་བྱུང་བའི་གནོད་སྦྱིན་དང༌། སྲིན་པོ་དང༌། མ་མོ་དང་བཅས་པ་རྣམས་ཀྱིས་ལས་སྣ་ཚོགས་གྲུབ་པར་འགྱུར་རོ། །དེ་ཉིད་ཚུལ་བཞིན་དུ་བསྒྲུབ་པ་དང་མཆོད་པ་དང༌། དྲན་པས་དངོས་གྲུབ་མ་ལུས་སྟེར་བར་འགྱུར་རོ། །སྒྲུབ་པ་ཉིད་ནས་བྱིན་གྱིས་བརླབ་བོ། །དེ་ཉིད་ཀྱིས་དངོས་སུ་ཞལ་སྟོན་པར་འགྱུར་རོ། །ཞེས་གསུངས་སོ།
།དེ་ཉིད་བསྒྲུབ་པའི་དུས་སུ། ནས་རྗེན་འཐགས་ཀྱི་གཏོར་མ་དང༌། སྤོས་སྦྱོར་མ་ཆད་པ་གྱིས། ཁྱི་ནག་པོ་ལ་རྡོ་མི་བརྡེག །ཡིད་ཆེས་པར་གྱིས་ལ་བླ་མ་དང་དབྱེར་མེད་དུ་བསྒོམ། དེ་ལྟར་བྱས་པས་འཚོ་བ་སྦྱོར་ཞིང་ཞལ་དངོས་སུ་སྟོན། འདི་ཆིག་བརྒྱུད་ལགས།།