'byams gcod rnam gsum bsdus pa

Resource ID	A1
Title	'byams bcod rnam gsum bsdus pa
Topics	Dream Yoga
Sub-Topics	'byams gcod
Author	Nenyingpa Aï Sengé
Associated Person	Sangyé Tönpa
Link	BUDA MW2PD20238

༄༅། །འབྱམས་གཅོད་ཀྱི་རྣམ་གསུམ་བསྡུས་པ་བཞུགས་སོ།།

བླ་མ་སངས་རྒྱས་ཞབས་བཏུད་ནས། འབྱམས་གཅོད་རྣམ་གསུམ་བྲི་བར་བྱ།
དང་པོ་སད་འབྱམས། དམིགས་པ་རྟེན་མེད་ཀྱི་སད་འབྱམས། གཉིད་དུ་སོང་ཡང་མ་སོང་སྙམ་པ་རྗེས་ཀྱི་སད་འབྱམས་སོ།
།དང་པོ་ལ་གསུམ་ཏེ། དམིགས་པས་སད་འབྱམས་བཅད་པ། འདུན་པས་སད་འབྱམས་བཅད་པ། བསོད་ནམས་ཀྱི་ཚོགས་བསོག་གིས་སད་འབྱམས་བཅད་པའོ།
།དང་པོ་ནི་རང་བདེ་མཆོད་དུ་བསྒོམས་པའི་སྙིང་ཁར་ཧཱུྃ་གཅིག་བསམ། ཧཱུྃ་དེ་ལས་འོད་ལྔ་ནམ་མཁའ་ལ་འཕྲོས་པས། བདེ་མཆོག་རིགས་བསྡུས་སུ་གྱུར། ༼གཙོ་བོ་དང་བླ་མ་ཐ་མི་དད་དུ་གྱུར་པར་བསམ།༽ དེ་ལ་ཕྱི་ནང་གསང་གསུམ་གྱི་མཆོད་པ་ཕུལ་ལ། རྨི་ལམ་ལ་རྨི་ལམ་དུ་ངོ་ཤེས་པར་མཛད་དུ་གསོལ། ཡང་འབྱམས་མི་འབྱུང་པར་མཛད་དུ་གསོལ་བྱས་ལ་གསོལ་བ་དྲག་པོ་གདབ། སྒྱུ་མ་རྨི་ལམ་གྱི་དྲན་འདུན་དྲག་པོ་བཏང་། གཉིད་དུ་འགྲོ་ཁར་ཕྱོགས་བཞིའི་བདེ་མཆོག་དབུས་ཀྱི་ལ་བསྡུ། དབུས་ཀྱི་དེ་འོད་དུ་གྱུར་ཏེ། རང་གི་སྙིང་ཁར་བསྡུས་ལ་རྨི་ལམ་བཟུང་ངོ་།
།གཉིས་པ་ནི་རྨི་ལམ་ཟིན་འཕྲོ་ལ་གཉིད་ཕྲས་སད་པ་འབྱུང་པས། དེའི་དུས་སུ་མིག་མི་འབྱེད་པ་དང་། གཉིད་མ་སད་པ་བྱ་དགོས་སྙམ་པ་དང་། ༼རྨི་ལམ་སྒྱུ་མའི་༽དྲན་འདུན་གྱིས་མཚམས་སྦྱར་བར་བྱའོ།
།གསུམ་པ་ནི། རབ་ཀྱིས་དབང་བཞི་དང་། ཀུ་སུ་ལུའི་ཚོགས་བསོག་སྦྲེལ་༼རྨི་ལམ་ཟིན་པ་དང་སད་འབྱམས་མི་འབྱུང་པར།༽ལ་གསོལ་བ་གདབ། འབྲིང་གིས་ཚོགས་འཁོར་བཏང་༼ལ་སྔར་ལྟར་གསོལ་བ་གདབ༽། ཐ་མས་བདག་དུ་བཟུང་བ་དང་མ་བཟུང་བའི་༼མཆོད་པའི་༽བྱེ་བྲག་ཐམས་ཅད་ཕུལ་ལ་སྔར་ལྟར་གསོལ་བ་གདབ་པར་བྱའོ།

།དེས་འབྱམས་པ་རྣམ་གསུམ་དང་། ཁྱད་པར་དུ་སད་འབྱམས་ཆོད་པར་འགྱུར་རོ།
།གཉིས་པ་ལ་གཉིས། སྒྱུ་མ་རང་ཤར་གྱི་སད་འབྱམས་དང་། དམིགས་པ་རྟེན་མེད་ཀྱི་སད་འབྱམས་སོ།
།དང་པོ་ནི་འཛིན་མེད་རང་ཤར་དུ་འཆར་ཏེ། འབྲས་བུ་ལ་བསྙེགས་པ་ཡིན་གསུང་།
གཉིས་པ་ནི་རྨི་ལམ་ཟིན་པའམ། སྦྱོན་སྤེལ་བྱེད་འཕྲོ་ལ་སད་འབྱམས་འབྱུང་པས། རང་ཡི་དམ་དུ་བསྐྱེད་པའི་ཐུགས་ཁ་ནས། རྗེ་བཙུན་མ་སྐུ་མདོག་དམར་མོ་གཡས་ཌཱ་མ་རུ་སྒྲ་དང་བཅས་པ། གཡོན་ཐོད་ཁྲག་ཐུགས་ཁར་བཟུང་པ་གཅིག་གར་གྱི་འགྱིང་སྟབས་སུ་ལོག་ལོག་རང་གི་ལྟེ་བ་དང་གསང་གནས་ན་མར་ལ་འགྲོ་བར་བསམ་ཞིང་། ༼རྨི་ལམ་སྒྱུ་མའི་༽དྲན་འདུན་དྲག་པོ་བཏང་། རྗེས་ལ་འོད་དུ་ཡལ་བར་བསམ།
གསུམ་པ་ནི་གངས་ཀྱི་འདབ་བམ་མཐོ་པར་བསྡང་པ་དང་། དགེ་སྦྱོར་ལ་གནད་དུ་བཏང་བའི་སྟོབས་ཀྱིས་ཐོ་རངས་ཀྱི་ཆ་ལ་གཉིད་འོད་གསལ་དུ་འཆར་བས་རང་གི་སོར་མོའི་དགྱེ་དགུ་དང་། མིག་གི་གཟི་མ་འགུལ་བ་ཤེས་པ་འབྱུང་། དེའི་དུས་སུ་གཉིད་དུ་མ་སོང་པར་འདུག་སྙམ་པ་འབྱུང་བས། དེ་ལ་མིག་མི་འབྱེད་པར་གཉིད་དུ་སོང་ཡང་སྦྱོང་སྤེལ། མ་སོང་ཡང་སྦྱོང་སྤེལ་བྱ་སྙམ་པ་བྱས་ནས། ལྷ་སྐུ་ལ་སྦྱོང་སྤེལ་བྱས་པས་ཇི་ལྟར་འདོད་པ་བཞིན་འབྱུང་སྟེ། ཕྲ་རགས་ལ་སོགས་པའི་སྤྲུལ་བསྒྱུར་སྣ་ཚོགས་དང་། ས་ལམ་གྱི་ཡོན་ཏན་ཐམས་ཅད་དེ་ཉིད་དུ་རྫོགས་ནས། རྒྱལ་བ་ལོངས་སྐུར་སངས་རྒྱ་བ་ཡིན་གསུང་།
སངས་རྒྱས་སྟོན་པའི་ཞལ་ནས་གནད་འདི་ལྟ་བུ་ཡོད་ན་གྲུབ་ཐོབ་ལ་ཚེགས་མེད། ཆིག་རྒྱུད་ཡིན་པས་དམ་དུ་བྱ། སྣོད་ལྡན་ལ་གཏེར་དུས་ཚོགས་འཁོར་དང་། གསེར་གྱི་མཎྜལ་འབུལ་དགོས་པ་ཡིན། སངས་རྒྱས་སྟོན་པའི་གསུང་བཞིན་ཨའི་སེང་གེས་བཀོད། དགེའོ།