Bla ma shangs ston gyis rgyal mtshan 'bum la gdams pa'i gsung

Resource ID	SCv8p727
Title	bla ma shangs ston gyis rgyal mtshan 'bum la gdams pa'i gsung
Topics	Chant
Author	Tsangma Shangtön
Associated Person	Gyeltsen Bum
Link	BDRC W23922

༄༅། །བླ་མ་ཤངས་སྟོན་གྱིས་རྒྱལ་མཚན་འབུམ་ལ་གདམས་པའི་གསུང་བཞུགས་སོ།

ཉེས་སྐྱོན་མ་གོས་ཡེ་ཤེས་ལྡན། མཐོང་ཐོས་དྲན་པའི་སྡུག་བསྔལ་སེལ། །རང་སེམས་ཆོས་སྐུར་ངོ་སྤྲོད་པའི། །བླ་མ་རྗེ་ལ་ཕྱག་འཚལ་ལོ།
།སེམས་ཅན་དོན་ཀུན་བསྒྲུབ་པའི་ཕྱིར། །སངས་རྒྱས་ཐོབ་པར་འདོད་པ་ཡིས། །དགེ་བའི་ཚོགས་རྣམས་གསོག་པ་ཡིས། །བྱང་ཆུབ་མཆོག་ཏུ་སེམས་བསྐྱེད་བགྱིས།
།རྟག་འཛིན་འདུ་ཤེས་རྟོག་པ་དང་། །དགེ་ལ་བརྩོན་པས་འཇུག་པ་དང་། །ཆགས་སྡང་བློ་དང་བྲལ་བའི་ཕྱིར། །འཆི་བ་མི་རྟག་ཡང་ཡང་བསྒོམ།
།བཟོད་མེད་འཁོར་བའི་སྡུག་བསྔལ་བསམས། །བདེ་དང་སྡུག་བསྔལ་འབྱུང་བའི་རྒྱུ། །དགེ་སྡིག་གཉིས་ལ་བླང་དོར་བྱ། །འབྲས་བུ་མི་བསླུ་འབྱུང་བར་འགྱུར།
།ཐ་མལ་ལུས་ཞེན་བཟློག་པའི་ཐབས། །སྣང་ལ་རང་བཞིན་མེད་པ་ཡིས། །ལྷ་སྐུ་གསལ་ལ་རྟོག་མེད་བསྒོམ། །རྒྱལ་བ་ལོངས་སྐུ་རང་ཤར་འབྱུང་།
།དངོས་གྲུབ་མ་ལུས་གཏེར་བའི་དཔལ། །འཇིགས་པ་ཀུན་ལས་སྐྱོབ་པའི་མགོན། །དཔལ་མགོན་བླ་མ་དམ་པ་ལ། །འབྲལ་བ་མེང་པར་མོས་གུས་བྱ། །རྒྱུན་ཆད་མེད་པར་གསོལ་བ་གདབ།
།ཅིར་སྣང་རྨི་ལམ་སྒྱུ་མར་བསྒོམ། །དད་འདུན་གཉིས་ཀྱིས་ལམ་ཁྱེར་བྱ། །ཆགས་སྡང་རང་སར་གྲོལ་ནས་མཆིས། །ཞེན་མེད་སྒྱུ་མ་རང་ཤར་འབྱུང་།
།སྒྱུ་འཛིན་བློ་དང་བྲལ་བའ་ཕྱིར། །མ་བཅོས་གཉུག་མའི་ངང་ལ་བཞག །བཟུང་འཛིན་རྟོག་པ་རང་སར་གྲོལ། །གསལ་སྟོང་འཛིན་མེད་རང་ཤར་འབྱུང་།
།ཤེས་བྱ་གཤིས་ཀྱིས་གནས་ལུགས་ལ། །སྐྱོན་དང་ཡོན་ཏན་མེད་པའི་ཕྱིར། །དེ་ཉིད་རྟོགས་པའི་རྣལ་འབྱོར་པས། །བླང་དོར་མེད་པའི་དོན་ལ་སྤྱོད།
།སྣང་བ་རྟེན་ཅིང་འབྲེལ་འབྱུང་འདི། །སྐྱེ་མེད་ཡུལ་གྱི་ངང་དུ་རྫོགས། །གསལ་སྟོང་འཛིན་མེད་བདེ་བར་ཤར། །འབྲས་བུ་སྐུ་བཞི་ལྷུན་གྱིས་གྲུབ།
།དེ་ལས་བྱུང་བའི་དགེ་བ་དེས། །འགྲོ་བཀུན་དང་ཐུན་མོངས་སུ། །དམིགས་མེད་བྱང་ཆུབ་ཆེན་པོར་བསྔོ། །ཐེག་ཆེན་ཆོས་ཀྱིས་ཁྱད་ཆོས་ཡིན།
།བླ་མ་ཤངས་སྟོན་རིན་པོ་ཆེས། །སློབ་དཔོན་རྒྱལ་མཚན་འབུམ་ལ་གསུང་པ་རྫོགས་སོ།། །། ཨྀཐིཿ །།