Chos drug gi tshig gsal

Resource ID	SCv6p180
Title	chos drug gi tshig gsal
Alt. title	chos drug gi thems yig / them yig
Topics	Six doctrines of Niguma
Sub-Topics	Directory
Author	Khyungpo Neljor
Associated Person	Niguma
Link	BDRC W23922 BDRC W23922 BUDA MW2PD20238 (p.456) BDRC W3CN766 BDRC W23605 BDRC W4CZ58783 (p.310) BDRC W3CN18508 (p.240) BDRC W8LS16295 (p.12) BDRC W8LS32723 BDRC W8LS32725 (p.175) BDRC W8LS36545 (p.168+173) BDRC W1KG4284 (p.625 annotated)

༈ ཆོས་དྲུག་གི་ཚིག་གསལ་བཞུགས་སོ།།

།རྡོ་རྗེ་འཆང་གིས་གསུངས་པ་ཡི། །ཆོས་དྲུག་བྱེད་བྲག་ཐེམས་ཡིག་འདི།
།སྔོན་འགྲོ་དག་བྱེད་སྟོང་ར་ལ། །གསོལ་འདེབས་གསུམ་ལ་དམིགས་པ་གསུམ།
།ཐབས་ལམ་བདེ་དྲོད་རང་འབར་ལ། །གསོལ་འདེབས་གཉིས་ལ་དམིགས་པ་ལྔ།
།དབང་པོ་རབ་དང་འབྲིང་པོ་ལ། །གསོལ་འདེབས་ལྔ་ལ་འདུན་པ་གསུམ།
།སྒྱུ་ལུས་དབང་པོ་ཐ་མ་ལ། །གསོལ་འདེབས་གསུམ་ལ་འདུན་པ་གསུམ།
།རྨི་ལམ་འཛིན་པར་བྱེད་པ་ལ། །གསོལ་འདེབས་གསུམ་ལ་འདུན་པ་གསུམ།
།རྨི་ལམ་སྦྱང་བའི་ཆོས་བཞི་ལ། །གསོལ་འདེབས་བཞི་ལ་དམིགས་པ་བཞི།
།རྨི་ལམ་སྤེལ་བའི་ཆོས་དྲུག་ལ། །གསོལ་འདེབས་བཞི་ལ་འདུན་པ་དྲུག
།རྨི་ལམ་སྤྲུལ་པའི་ཆོས་དྲུག་ལ། །གསོལ་འདེབས་འདུན་པ་དེ་བཞིན་ནོ།
།རྨི་ལམ་བསྒྱུར་བའི་ཆོས་བཞི་ལ། །གསོལ་འདེབས་བཞི་ལ་འདུན་པ་བཞི།
།སྒྱུ་ལུས་སྟན་ཐོག་གཅིག་མ་ལ། །གསོལ་འདེབས་བཞི་ལ་འདུན་པ་བརྒྱད།
།ཡུལ་སྣང་དམིགས་པ་རྣམ་གསུམ་ལ། །གསོལ་འདེབས་གསུམ་ལ་དམིགས་པ་གསུམ།
།ཁྱད་འཕགས་འོད་གསལ་ཆོས་བཞི་ལ། །གསོལ་འདེབས་གསུམ་ལ་དམིགས་པ་བཞི།
།འཕོ་བ་མ་བསྒོམ་སངས་རྒྱས་ལ། །གསོལ་འདེབས་གསུམ་ལ་དམིགས་པ་བཞི།
།བར་དོ་ལོངས་སྤྱོད་རྫོགས་སྐུ་ལ། །གསོལ་འདེབས་གསུམ་ལ་དམིགས་པ་བཞི།
།གསོལ་འདེབས་དམིགས་པའི་ཐེམས་ཡིག་འདི། །འཆུགས་མེད་གནད་དུ་ཤེས་པར་བྱ།
།ལོངས་སྐུ་རྡོ་རྗེ་འཆང་ཆེན་གྱིས། །ཌཱ་ཀི་མ་ལ་གསུངས་པ་ཡི།
།སྙན་བརྒྱུད་ཆིག་བརྒྱུད་ཆོས་དྲུག་ལ། །མ་འོངས་དུས་སུ་བསྲེ་སླད་བྱེད།
།དེ་དུས་ཁྲིད་ལུགས་སྣ་ཚོགས་འབྱུང་། །དད་ལྡན་ཐེ་ཚོམ་སྤང་བའི་ཕྱིར།
།འཆུགས་མེད་གནད་ཀྱི་ཐེམས་ཡིག་བཀོད། །གནས་གསུམ་མཁའ་འགྲོས་བཟོད་པར་མཛོད།
།ཆོས་དྲུག་རྡོ་རྗེའི་ཚིག་རྐང་གི་ཐེམས་ཡིག་དང་བཅས་པ་ཌཱ་ཀི་ནི་གུ་མས་ཇི་ལྟར་གསུངས་པ་བཞིན་དུ།
བདག་ཁྱུང་པོ་རྣལ་འབྱོར་པས་ཡི་གེར་བཀོད་པའོ། །རྫོགས་སོ།། །།

Annotated version from BDRC W1KG4284 p. 625
།རྡོ་རྗེ་འཆང་གིས་བདེ་དྲོད་བདེ་སྟོང་གསུངས་པ་ཡི། །ཆོས་དྲུག་བྱེ་བྲག་ཐེམས་ཡིག་འདི།
།༼ཐབས་ལམ་༽སྔོན་འགྲོ་དག་བྱེད་སྟོང་ར་ལ། །གསོལ་༼བདག་གི་ནད་གདོན་སྡིག་སྒྲིབ་ཏིན་ངེ་འཛིན། སྡིག་སྒྲིབ་ནད་གདོན་སེལ་བའོ༽འདེབས་གསུམ་ལ་དམིགས་པ་གསུམ།
།ཐབས་ལམ་བདེ་དྲོད་རང་འབར་ལ། །གསོལ་འདེབས་གཉིས་ལ་དམིགས་པ་ལྔ། ༼མེའི་སྟོང་ར་ཟས་སུ་ཟ་བ་གོས་སུ་གྱོན་པ་གདན་དུ་འདིང་པ་རླུང་རྟར་ཞོན་པ།༽
།དབང་པོ་རབ་དང་འབྲིང་པོ་ལ། །གསོལ་འདེབས་ལྔ་ལ་༼དམིགས་པ་༽འདུན་པ་གསུམ། ༼བདག་འཛིན་དགོས་མེད་སྒྱུ་ལུས་འོད་གསལ་རྨི་ལམ།༽
།སྒྱུ་ལུས་དབང་པོ་ཐ་མ་ལ། །གསོལ་འདེབས་གསུམ་ལ་འདུན་པ་གསུམ། ༼འཆི་ངེས་པ་བླ་མའི་མོས་གུས་སྒྱུ་མ་རྨི་ལམ་ཡིན་སྙམ་པ།༽
།རྨི་ལམ་འཛིན་པར་བྱེད་པ་ལ། །གསོལ་འདེབས་གསུམ་ལ་འདུན་པ་གསུམ། ༼བདག་འཛིན་དགོས་མེད་རྨི་ལམ་ཟིན་པ།༽
།རྨི་ལམ་སྦྱང་བའི་ཆོས་བཞི་ལ། །གསོལ་འདེབས་༼ལུས་དང་སེམས་བདག་མེད་འདུན་༽བཞི་ལ་དམིགས་པ་བཞི། ༼བདག་འཛིན་དགོས་མེད་སྒྱུ་ལུས་རྨི་ལམ་ཟིན་པ།༽
།རྨི་ལམ་སྤེལ་བའི་ཆོས་དྲུག་ལ། །གསོལ་འདེབས་བཞི་ལ་༼འབྱུང་བཞི་ཕྲ་བ་རགས་པ་སེམས་ཅན་ཕྲ་བ་རགས་པ་འཛིན་པ་དང་འདས་པའི་གང་འདུལ་༽འདུན་པ་དྲུག
།རྨི་ལམ་སྤྲུལ་བའི་ཆོས་དྲུག་ལ། །གསོལ་འདེབས་འདུན་པ་དེ་བཞིན་ནོ།
།རྨི་ལམ་བསྒྱུར་བའི་ཆོས་བཞི་ལ། །གསོལ་འདེབས་༼བདག་འཛིན་དགོས་མེད་ཡུལ་སྣང་།༽བཞི་ལ་འདུན་པ་བཞི། ༼འབྱུང་བཞི་ཕྲ་རགས་སེམས་ཅན་ཕྲ་རགས་ལྷ་སྐུ་སྣ་ཚོགས་སྣང་སྟོང་ཞེན་མེད་དུ་སྒྱུར་བའོ།༽
།སྒྱུ་ལུས་གདན་ཐོག་གཅིག་མ་ལ། ༼འཆི་ངེས་པ་མོས་གུས་གཉིད་དུ་སོང་བར་འདུག་རྨི་ལམ་དུ་འདུག །སྦྱང་སྤེལ་སྤྲུལ་བསྒྱུར།༽ །གསོལ་འདེབས་བཞི་ལ་འདུན་པ་བརྒྱད།
།ཡུལ་སྣང་དམིགས་པ་རྣམ་གསུམ་ལ། །གསོལ་འདེབས་གསུམ་༼བདག་འཛིན་དགོས་མེད་ཡུལ་སྣང་༽ལ་དམིགས་པ་གསུམ། ༼བདག་མེད་མ་ལ་ཐིག་ལེ།༽
།ཁྱད་འཕགས་༼འབྲས་བུ་༽འོད་གསལ་ཆོས་བཞི་ལ། །གསོལ་འདེབས་གསུམ་༼བདག་འཛིན་དགོས་མེད་འོད་གསལ་༽ལ་དམིགས་པ་བཞི།
༼འོད་གསལ་བཟུང་བ་ལམ་ཁྱེར་བསྲེ་བ་མཐར་ཐུག༽ །འཕོ་བ་མ་བསྒོམས་སངས་རྒྱས་ལ། །གསོལ་འདེབས་༼བདག་འཛིན་དགོས་མེད་བར་དོ་སངས་རྒྱས་༽གསུམ་ལ་དམིགས་པ་བཞི།
༼ཆོས་སྐུ་གཟུགས་སྐུ་བླ་མ་མཁའ་སྤྱོད།༽ །བར་དོ་ལོངས་སྤྱོད་རྫོགས་སྐུ་ལ། །གསོལ་འདེབས་༼བདག་འཛིན་དགོས་མེད་བར་དོར༽གསུམ་ལ་དམིགས་པ་བཞི། ༼རབ་འབྲིང་ཐ་མ་སྤྱི་གནད།༽
།གསོལ་འདེབས་༼བླ་མ་དང་༽དམིགས་པའི་ཐེམས་ཡིག་༼ཆོད་དྲུག་༽འདི། །འཆུགས་མེད་གནད་དུ་ཤེས་པར་བྱའོ།
།ལོངས་སྐུ་རྡོ་རྗེ་འཆང་ཆེན་གྱིས༼དྲུག་པ༽། །༼ཡེ་ཤེས་ཀྱི་༽ཌཱ་ཀི་མ་ལ་གསུངས་པ་ཡི༼ནི་གུ་མ་ལ༽།
།སྙན་བརྒྱུད་༼འདི་མི་རབས་བདུན་དུ་༽ཆིག་རྒྱུད་ཆོས་དྲུག་༼འདི་༽ལ། །མ་འོངས་༼པའི་༽དུས་སུ་བསྲེ་སླད་བྱས༼ནས་ཚོང་འདུས་གྱི་འོ་མར་སོང་བ༽།
།དེ་དུས་ཁྲིད་ལུགས་སྣ་ཚོགས་༼བས་༽འབྱུང་། །དད་ལྡན་༼རྣམས་༽ཐེ་ཚོམ་༼དང་ཡིད་གཉིས་༽སྤང་བའི་ཕྱིར།
།འཆུགས་མེད་གནད་ཀྱི་ཐེམས་ཡིག་བཀོད། །གནས་གསུམ་མཁའ་འགྲོས་བཟོད་པར་གསོལ༼དེ་ལ་གནས་ནས་ཞིང་ལས་སྔགས་རྣམས་ཀྱི༽།
།ཆོས་དྲུག་རྡོ་རྗེའི་ཚིག་རྐང་། ཐེམས་ཡིག་དང་བཅས་པ་འདི། ཌཱ་ཀི་མས་ཇི་ལྟར་གསུངས་པ་བཞིན་དུ།
བདག་ཁྱུང་པོ་རྣལ་འབྱོར་པས་ཡི་གེར་བཀོད་པའོ། །ཨྀཐི།