Dpal mgon po'i rab gnas bsam 'phel yid bzhin nor bu

Resource ID	SCv11p939
Title	shog dril bcu gsum pa la dpal mgon po'i rab gnas bsam 'phel yid bzhin nor bu
Topics	Chadrupa
Sub-Topics	Consecration
Author	Sangyé Nyentön
Associated Person	Öntön Kyergangpa
Link	BDRC W23922 WA00KG09215 (p.386)

༈ ཤོག་དྲིལ་བཅུ་གསུམ་པ་ལ་དཔལ་མགོན་པོའི་རབ་གནས་བསམ་འཕེལ་ཡིད་བཞིན་ནོར་བུ་བཞུགས་སོ།།
༼ཆོ༽ ༈ བླ་མ་དུས་གསུམ་སངས་རྒྱས་ཀྱི། །འཕྲིན་ལས་རྒྱས་མཛད་རིན་པོ་ཆེ། །བྱིན་བརླབས་ཐུགས་རྗེ་ཚད་མེད་ཀྱིས། །རྒྱུན་ཆད་མེད་པར་བྱིན་གྱིས་བརློབས། །བར་ཆད་ཐམས་ཅད་ཞི་བ་དང་། །དངོས་གྲུབ་རྣམས་གཉིས་ཐོབ་བྱའི་ཕྱིར། །བསམ་འཕེལ་ཡིད་བཞིན་ནོར་བུ་ཡི། །རབ་གནས་བླ་མའི་གསུང་བཞིན་དུ། །མགོན་པོའི་རབ་གནས་འདི་ལ། སྦྱོར་བ་དངོས་གཞི་རྗེས་གསུམ་ལས།
དང་པོ་ནི། མི་སོ་མ་དང་གྲིབ་ཅན་རྩར་མི་བཞག །གྲིབ་སངས་ཤིང་བར་ཆད་མི་འབྱུང་༼བར་བྱ་༽བའི་ཕྱིར་མགོན་པོའི་གཏོར་བསྒྲུབ་ཞག་གསུམ་མམ། ལྔའམ། བདུན་ལ་སོགས་པ་ཅི་རིགས་པར་བྱ་ཞིང་། ཚོགས་དང་གཏོར་མས་ཐུགས་དམ་རྒྱས་པར་བསྐོང་། དེ་ལྟར་གཏོར་བསྒྲུབ་བྱེད་པའི་སྐབས་ཀྱི་ནུབ་དང་པོ་མགོན་པོའི་སྐུ་མདུན་དུ་བཞག་ལ། གུ་གུལ་གྱི་དུད་པས་བདུག སྤོས་སྦྱོར་བསྲེགས། དྲག་པོའི་སྔགས་ཀྱིས་བགེགས་སྐྲད་པར་བྱའོ། །དེ་ནས་སྐུ་དེ་ལ་མེ་ལོང་བསྟན་ལ། ཁྲུས་ལ་སོགས་པ་སྤྱི་འགྲོ་ལྟར་བྱའོ། །གཞན་ཡང་རྣམ་འཇོམས་དང་ཐུགས་རྗེ་ཆེན་པོ་ལ་སོགས་པའི་ཁྲུས་ཆུས་ཡང་ཡང་བྱ། ས་ཕྱོགས་ལ་མགོན་པོའི་བཏའ་གཏོར་གཅིག་བཅས་ལ་གསོལ་བ་གདབ་བོ།
།ནུབ་གཉིས་པ་ལ་མགོན་པོའི་མཎྜལ་ལེགས་པ་གཅིག་བྲིས་ལ། རབ་གནས་བྱ་རྒྱུ་དེ་མཎྜལ་དེའི་དབུས་སུ་༼བཞག་པའམ་༽བཞག་པར་མོས་ཏེ། ༼དེ་ཉིད་ཆོ་ག་གསུམ་གྱི་མགོན་པོར་བསྐྱེད་ལ། ན་མོ་བུདྡྷ་ཡས་གསོལ་བ་དྲག་པོ་གདབ། རྩ་སྔགས་དྲག་ཏུ་མང་པོ་བཟླས་པར་བྱའོ། །ནུབ་གསུམ་པ་ལ་གཉིས་པ་དངོས་གཞི་བྱས་ཏེ།༽ དེ་ཡང་ཚེ་དང་བསོད་ནམས་རྒྱས་པར་བྱེད་ན་ཟླ་བ་ཡར་ངོའི་གཟའ་དང་ཚེས་གྲངས་བཟང་བ་ལ་བབ་པའི་ཐོ་རང་བྱ། མཐུ་དང་དྲག་པོའི་ལས་ལ་ཤེས་པར་འདོད་ན་ཉི་ཤུ་དགུའི་ནམ་ཕྱེད་ལ་བྱའོ། །རང་རྗེ་བཙུན་སྒྲོལ་མ་སྐུ་མདོག་ལྗང་སེར་ཞལ་གཅིག་ཕྱག་གཉིས་མ་གཡས་མཆོད་སྦྱིན། གཡོན་ཨུཏྤལ་བསྣམས་པ་གཅིག་ཏུ་བསྐྱེད། མགོན་པོའི་སྐུ་དེ་ཆོ་ག་གསུམ་གྱིས་བསྐྱེད་ཆོག་ལེགས་པོ་གཅིག་བྱས་ལ། ཡེ་ཤེས་སེམས་དཔའ་བསྟིམ་ནས། མེ་ཏོག་རྣམས་མགོན་པོ་དཔག་ཏུ་མེད་པར་བསམ་ལ་རྟེན་འབྲེལ་སྙིང་པོ་བཟླས་ཤིང་གཏོར་བས་ཐམས་ཅད་མགོན་པོའི་སྐུ་དེ་ལ་སིབ་སིབ་ཐིམ་པར་བསམ་མོ། །ཡེ་ཤེས་པ་དངོས་སུ་གཞུག་པ་ནི་བླ་མའི་ཞལ་༼ལས་༽ཤེས་སོ།
།གསུམ་པ་རྗེས་ནི། རྒྱས་པར་བྱེད་ན། གསེར་གྱི་མཐུར་མས་སྤྱན་དབྱེ། ཤངས་འབྲུ། སྐྲ་ཤད་ལ་སོགས་པ་རབ་གནས་ཆོ་ག་བཞིན་དུ་བྱེད་གསུངས། དེ་ནས་ཚོགས་ཀྱི་འཁོར་ལོ་བསྐོར། བཀྲ་ཤིས་བརྗོད། སློབ་དཔོན་ལ་ཡོན་དབུལ། རབ་གནས་དེ་ལྟར་ལན་གསུམ་བྱས་པ་དེ་མགོན་པོ་དངོས་དང་ཁྱད་མེད་བར་ཆད་ཐམས་ཅད་སེལ། མཆོག་ཐུན་མོང་གི་དངོས་གྲུབ་ཐམས་ཅད་ཡིད་བཞིན་གྱི་ནོར་བུ་རིན་པོ་ཆེ་དངོས་ཡིན་གསུངས་སོ།
།བླ་མ་དུས་གསུམ་སངས་རྒྱས་ཀྱི། །རྒྱུན་ཆད་མེད་པར་ཐུགས་རྗེས་གཟིགས། །དེ་དྲིན་བསམ་ཞིང་ཆེ་བའི་ཕྱིར། །རྒྱུན་ཆད་མེད་པར་གསོལ་བ་འདེབས། །དངོས་གྲུབ་ཐམས་ཅད་འབྱུང་བ་ཡི། །རབ་གནས་ཡིད་བཞིན་ནོར་བུའི་གནས། །ཡི་གེར་བཀོད་པའི་དགེ་བ་ཡིས། །བླ་མ་མགོན་པོ་དབྱེར་མེད་ཀྱིས། །ཐུགས་མཉེས་བསྟན་པ་རྒྱས་བྱེད་ཤོག
།མགོན་པོའི་རབ་གནས་བསམ་འཕེལ་ཡིད་བཞིན་ནོར་བུ་ཞེས་བྱ་བ། བླ་མའི་གསུངས༌བཞིན་སྙན་སྟོན་གྱིས་རི་གོང་དཔལ་གྱི་དགོན་པར་ཡི་གེར་བཀོད་པའོ། །ཨྀཐིཿ

༈ རབ་གནས་སྔོན་དུ་བསྙེན་པ་འདི་གལ་ཆེ་གསུངས། རང་རྗེ་བཙུན་སྒྲོལ་མར་བསྐྱེད། མདུན་གྱི་མེ་ཏོག་རྣམས་ཀྱང་རྟེན་གཞན་ལ་རབ་གནས་བྱེད་ན་སྒྲོལ་མར་བསྐྱེད་ཅིང་། མགོན་པོའི་སྐུ་རབ་གནས་བྱེད་པའི་ཚེ་མེ་ཏོག་ཐམས་ཅད་རེ་རེ་བཞིན་ཆོ་ག་གསུམ་ལས་མགོན་པོར་བསྐྱེད། དེ་ལ་སངས་རྒྱས་བྱང་ཆུབ་སེམས་དཔའ་དཔག་ཏུ་མེད་པ་བསྟིམ་ཞིང་རྟེན་འབྲེལ་སྙིང་པོ་བཟླ་གསུངས། མེ་ཏོག་འཐོར་བའི་ཚེ་རྟེན་རྣམས་ལྷ་གང་ཡིན་པ་དེ་དང་དེར་གསལ་བ་ལ་མེ་ཏོག་ཀྱང་སྔར་ལྟར་གསལ་བའི་ངང་ནས་ལྷ་ལ་ལྷ་ཐིམ་པའི་ཚུལ་གྱི་འཐོར་འདི་གནད་ཆེ་གསུངས། ཚེ་དང་བསོད་ནམས་རྒྱས་པར་བྱ་བའི་ཕྱིར་རབ་གནས་བྱེད་ན། མེ་ཏོག་རྣམས་རིན་ཆེན་འབྱུང་ལྡན་དུ་བསམས་ནས་བསྙེན་པར་བྱེད། འཐོར་བའི་ཚེའང་དེ་བཞིན་བྱ་གསུངས། འགྲོ་བ་དབང་དུ་བསྡུ་བ་སོགས་ཀྱི་རབ་གནས་བྱེད་ན། སངས་རྒྱས་སྣང་བ་མཐའ་ཡས་ལ་ཁྲོ་བོ་འདོད་པའི་རྒྱལ་པོ་སྐུ་མདོག་དམར་པོ་ཕྱག་གཡས་ལྕགས་ཀྱུ། གཡོན་ཞགས་པ་ཐོགས་པ་དཔག་ཏུ་མེད་པས་བསྐོར་བ་སྤྱན་དྲངས། མེ་ཏོག་ལ་བསྟིམ་ཞིང་རྟེན་འབྲེལ་སྙིང་པོ་བཟླས་པའི་བསྙེན་པ་བྱ། ༼ཡང་རྟེན་འབྲེལ་སྙིང་པོ་ལྟ་བུ་འདྲེ་ཅན་ལ་རབ་གནས་བྱེད་ན། བདག་བསྐྱེད་ཀྱང་ཁྲོ་བོ། མེ་ཏོག་རྣམས་ཀྱང་ཁྲོ་བོར་བསྐྱེད། སངས་རྒྱས་བྱང་ཆུབ་སེམས་དཔའ་ཐམས་ཅད་ཀྱང་ཁྲོ་བོའི་རྣམ་པར་བྱོན་ནས་མེ་ཏོག་ལ་ཐིམ་པར་བསམ་ཞིང་བསྙེན་པ་བྱ།༽ འཐོར་བའི་དུས་སུའང་དེ་བཞིན་བྱེད་གསུང་། མེ་ཏོག་གི་ཞལ་གདམས། བླ་མ་དམ་པའི་སྐུ་ལ་རབ་གནས་བྱེད་ན། སྔོན་འགྲོ་གཞན་དང་ཁྱད་མེད། དངོས་གཞི་བླ་མའི་སྐུ་འབགས་དེ། བླ་མ་ཉིད་ཀྱི་ཐུགས་དམ་༼ལྷ་༽གང་ཡིན་དུ་བསྐྱེད་པ་ལ་ཡེ་ཤེས་པ་བསྟིམ། སྐུ་གསུང་ཐུགས་བྱིན་གྱིས་བརླབས། དབང་བསྐུར་རྒྱས་གདབ་སྤྱན་དབྱེ་ལ་སོགས་སྤྱི་དང་ཁྱད་མེད། ལྷ་ལོངས་སྐུའི་རྣམ་པར་བསྐྱེད་པ་ཡིན་ན། སྐྲ་ཤད་གཏད་པ་ལ་སོགས་པ་ཡང་བྱས་ལ། རྗེས་སུ་ལོངས་སྐུ་དེ་ཉིད་གདུལ་བྱའི་འདུལ་སྣང་ལ་བླ་མ་རབ་བྱུང་གི་རྣམ་པ་ཅན་གྱི་སྐུར་བྱོན་པར་བསམས་ལ། དབུ་སྐྲ་བསིལ་བ་དང་འདྲེགས་དཔྱད་གཏད་པ་སོགས་བྱ། བླ་མ་སྔགས་པ་རྟེན་སྐྱ་བོ་ཡིན་ན་དེ་དག་མི་དགོས་ཞལ་གདམས་སོ། །རབ་གནས་ཀྱི་མེ་ཏོག་འཐོར་བའི་དུས་སུ་རང་ཉིད་སྒྲོལ་མ་ལྗང་སེར་གཅིག་ཏུ་བསམ་ལ། ན་མོ་བུདྡྷ་ཡས་གསོལ་བ་འདེབས་ཤིང་གཏོར་རོ། །སྒྲོལ་མ་ལས་ཀྱི་ལྷ་ཡིན། སྐུ་མདོག་ལྗང་སེར་གྱིས་རྒྱས་པའི་ལས་འགྲུབ་པ་ཡིན་གསུངས། འཐོར་བའི་རབ་གནས་སྤྱི་ལ། རི་རྩེ་ལ་ཉི་མ་ཤར་རྗེས་ཙམ་ལ་བཤད་ཀྱང་། ལག་ལེན་དུ་ནམ་ཕྱེད་༼ཐིག་པ་༽ལྷ་འདྲེ་མི་གསུམ་ཉལ་བའི་དུས་སུ་མིས་མ་ཚོར་༼བར་འཐོར་༽བ་མགོན་པོའི་རབ་གནས་ཀྱི་མན་ངག་ཡིན། དེ་ནས་རི་རྩེ་ལ་ཉི་མ་ཤར་བའི་དུས་སུ་ཡང་མི་གཞན་གྱི་བློ་གྲོས་དང་བསྟུན་ནས་འཐོར་བ་ཡིན་གསུངས། དུས་ཀྱི་ཞལ་གདམས་སོ།

༈ རབ་གནས་སྔོན་འགྲོ་གུ་གུལ་གྱི་བསྙེན་པ་ལ། རང་ཡི་དམ་གཤིན་རྗེ་དང་ཕྱག་རྡོར་ལ་སོགས་པའི་དྲག་པོའི་མགོན་པོར་མདུན་དུ་གུ་གུལ་བཞག་ལ། རང་གི་ཐུགས་ཀའི་ས་བོན་འོད་ཟེར་གྱི་ཁྲོ་བོའི་ཚོགས་དཔག་ཏུ་མེད་པ་མདུན་གྱི་ནམ་མཁར་སྤྱན་དྲངས། རང་གི་ཐུགས་ཀ་ནས་སྤྲོས་པའི་མཆོད་པའི་ཚོགས་ཀྱིས་མཆོད། ཁྲོ་བོ་རྣམས་ཀྱི་ཐུགས་ཀ་ནས་རང་གི་མཐུ་སྟོབས་དང་ནུས་པ་ཐམས་ཅད་རང་རང་གི་སྔགས་དང་ཧཱུྃ་ཡིག་དང་མེ་འོད་ཀྱི་རྣམ་པར་བྱུང་སྟེ་གུ་གུལ་ལ་ཐིམ་པར་བསམ་ཞིང་། ཡི་དམ་དང་མགོན་པོའི་སྙིང་པོ་དང་། རྩ་སྔགས་སུམྦྷ་ནི་ལ་སོགས་པ་མང་དུ་བཟླས་ཤིང་གུ་གུལ་ལ་ཧས་གདབ་ཅིང་། དེ་ལྟར་བསྙེན་པ་བྱེད་པའི་གུ་གུལ་དེས་བགེགས་བསྐྲད་དུས་སུ་བསྲེགས་པའི་དུ་བ་ཁྲོ་བོའི་མཐུ་སྟོབས་ཀྱི་རང་བཞིན་དུ་གྱུར་པས་བགེགས་ཐམས་ཅད་མྱོས། འཚིག་བརྒྱལ་བསྐྲད་པར་བསམ་མོ།
།ཡུངས་དཀར་གྱི་བསྙེན་པ་ལ། རང་ཁྲོ་བོར་བསྐྱེད་པ་གོང་ལྟར་བྱ། མདུན་དུ་ཡུངས་དཀར་བཞག་ལ། རང་གི་ཐུགས་ཀའི་ས་བོན་གྱི་འོད་ཟེར་གྱིས་ཁྲོ་བོའི་ཚོགས་དཔག་ཏུ་མེད་པ་མདུན་གྱི་ནམ་མཁར་སྤྱན་དྲངས། ཕྱི་ནང་གསང་བའི་མཆོད། དེ་དག་གི་སྐུ་ལས་རང་རང་དང་འདྲ་བའི་ཁྲོ་བོའི་ཚོགས་དཔག་ཏུ་མེད་པ་ཧཱུྃ་དང་ཕཊ་ཀྱི་སྒྲ་སྒྲོགས་ཤིང་ནམ་མཁའ་ནས་ཆར་འབབ་པ་ལྟར་བྱོན་ཏེ། ཡུངས་དཀར་རྣམས་ཀྱང་སྔོན་དུ་ཁྲོ་བོ་དཔག་ཏུ་མེད་པར་བསྐྱེད་པ་ལ་ཡེ་ཤེས་པ་བསྟིམ་ཤིང་། སྔགས་དྲག་ཏུ་བཟླས། དེ་ནས་བགེགས་བསྐྲོད་ཀྱི་ཚེ་ཡུངས་ཀར་གྱིས་བྲབ་པ་ན། ཁྲོ་བོའི་ཚོགས་དཔག་ཏུ་མེད་པ་འཕྲོས་པས་བགེགས་ཐམས་ཅད་ཚར་བཅད་པར་བསམ་པར་བྱའོ། །གུ་གུལ་དང་ཡུངས་ཀར་གྱིས་བསྙེན་པའི་ཞལ་གདམས་སོ།
།ཡེ་ཤེས་པ་དངོས་སུ་གཞུག་པའི་ཞལ་ཤེས་ནི། ཉི་ཤུ་དགུའི་ནམ་ཕྱེད་ན་སྤོས་སྦྱོར་སྲེགས། ཐོད་པའི་ཅང་ཏེའུ་འཁྲོལ། ནང་རྟེན་གྱི་མདའ་དར་གཡབས། རང་ཡི་དམ་དང་། མདུན་གྱིས་མགོན་པོ་༼དམ་ཚིག་༽པར་གསལ་བ་དེའི་ཐུགས་ཁའི་ཧཱུྃ་ཡིག་གཉིས་ཀ་ལས་འོད་ཟེར་ལྕགས་ཀྱུ་ལྟ་བུ་འཕྲོས་པས། ཤར་ལྷོ་བསིལ་བའི་ཚལ་གྱི་དུར་ཁྲོད་ཤིང་ཙནྡན་ལྗོན་པའི་ཤིང་རྩེ་ན་བཞུགས་པའི་མགོན་པོ་དངོས་ཀྱི་ཐུགས་ཁར་ཕོག །མགོན་པོ་དེ་ལས་རང་དང་འདྲའི་མགོན་པོ་མར་མེ་གཅིག་ལས་གཉིས་ཆད་ཀྱི་ཚུལ་དུ་མདུན་གྱི་ནམ་མཁའ་ན་ཚུར་ཌཱ་མ་རུ་དང་། དྲིལ་བུ་གཡེར་ཁའི་སྒྲ་ཁྲོ་ལོ་ལོ། སིལ་ལི་ལི་བྱོན་པར་བསམ་ལ། ཁྲིཾ་རིང་པོ་ཉེར་གཅིག་བརྗོད་ལ་སྤྱན་དྲངས་ཏེ་མཆོད་ནས། ཛཿཧཱུྃ་བཾ་ཧོཿ ཡེ་ཤེས་པ་མདུན་གྱི་དམ་ཚིག་པ་ལ་བསྟིམ་མོ། །སླར་ཡང་དེ་ལྟར་བྱ་དེ། དེ་འདྲ་བ་རབ་བརྒྱ་རྩ་བརྒྱད། འབྲིང་ལྔ་བཅུ། ཐ་མ་ཐེབས་ཉེར་གཅིག་བྱས་པའི་རྗེས་༼མ་ལ་བསིལ་བའི་ཚལ་གྱིས་མགོན་པོ་དེ་རང་ཉིད་༽སྤྱན་དྲངས་ལ་བསྟིམ་མོ། །དེ་ནས་མདུན་གྱིས་མགོན་པོ་དེའི་སྤྱི་བོར་རྩ་བའི་བླ་མ་བསྒོམ་ལ། བརྒྱུད་པའི་བླ་མ་ཐམས་ཅད་བསྟིམ་ལ། ན་མོ་བུདྡྷ་ཡའི་གསོལ་བ་ལན་བརྒྱ་རྩ་བརྒྱད་དམ། ལྔ་བཅུ་འམ། ཉེར་གཅིག་གདབ་པར་བྱའོ། །དེ་ནས་མདུན་གྱི་མགོན་པོ་ལ་དམིགས་ལ། གཤིན་རྗེ་གཤེད་ཀྱི་སྒོ་ནས་སྐུའི་གཟི་བརྗིད་བསྐྱེད་དོ། །དེ་ནས་མེ་ཏོག་གཏོར་ལ་བརྟན་བཞུགས་བྱ། བཀྲ་ཤིས་བཀའ་རྒྱ་མ་བརྗོད། མཆོད་གཏོར་རྒྱས་པར་ཕུལ་ལ་བཀའ་བསྒོ། །ཨྀཐིཿ

༈ རབ་གནས་ཀྱི་སྔོན་དུ་ལྷའི་ཞབས་༼སྡོམས་གྱི་༽གནད་ལ། གནོད་སྦྱིན་ཕོ་དགུ་མོ་དགུའི་འཁོར་ལོ་པདྨ་འདབ་བརྒྱད་ཚད་མཉམ་པ་གཉིས་ལ། གཅིག་གི་དབུས་དང་། འདབ་མ་བརྒྱད་དེ་དགུ་ལ་ཡབ་དགུའི་གཟུགས་བྲིས་ལ། རང་རིང་ཐུགས་ཀར་རང་གི་ས་བོན་ལ། རང་རང་གི་སྔགས་གཡས་བསྐོར་དུ་བསྐོར་བ་མིང་སྤེལ་དང་བཅས་པ་བྲི། གཟུགས་ཀྱི་ཐ་མར་ཡང་བྲི། ཡང་གཅིག་ལ་གནོད་སྦྱིན་མོ་དགུ་བཀོད་ལ། དེ་དག་གི་ཐུགས་ཀར་ས་བོན་ལ་རང་གི་སྔགས་མིང་སྤེལ་དང་བཅས་པ་གཡོན་བསྐོར་དུ་བསྐོར་བ་བྲི། གཟུགས་ལ་ཡང་ངོ་། །ལྷ་གཉིས་པོ་ཁ་སྦྱར་ལ། དཔྲལ་བ། ཐུགས་ཀ། གསང་གནས་གསུམ་འཆུག་མེད་འབྱར་བ་གཅིག་བྱེད་པ་གལ་ཆེ། གཉིས་ཀའི་གཟུགས་པདྨའི་ནང་དུ་བྲིས་པས། གྲྭ་པ་ནང་མཐུན་པ་ཡིན། ལྷ་འདྲེ་མི་གསུམ་དང་། ཁྱད་པར་ཆོས་དབང་དུ་འདུ། ལོང་སྤྱོད་འཕེལ་བ་ཡིན་གསུང་། རབ་བྱུང་སོགས་ཀྱི་སྡེ་ཡིན་ན། ཡབ་འཁོར་ལོའི་ནང་དུ་བྲིས། ༼ཡུམ་པདྨའི་ནང་དུ་བྲིས་པས་༽སྡོམ་ཁྲིམས་གཙང་བ་ཡིན་གསུངས། དགེ་བའི་བཤེས་གཉེན་གནམ་ཕར་གསང་སྐྱེར་སྒང་པ་ལ་གནང་བའི་ཞལ་གདམས། སངས་རྒྱས་གཉན་སྟོན་གྱིས་མཛད་ཟེར་བ་རྒྱུ་མཚན་དུ་བྱས་ནས་མགོན་པོའི་མན་ངག་གིས་ནང་དུ་བྲིས་པར་སྣང་ངོ་།།