Dug gsum dag byed zhal gyi bdud rtsi'i zhal shes

Resource ID	KN6
Title	dug gsum dag byed zhal gyi bdud rtsi'i zhal shes
Alt. title	dug gsum rang dag 'bras bu rang shar
Topics	Various
Sub-Topics	Three poisons
Associated Person	Khyungpo Neljor
Link	BDRC W3CN18508 (v2p.608)

༄༅། །དུག་གསུམ་དག་བྱེད་ཞལ་གྱི་བདུད་རྩིའི་ཞལ་ཤེས་སོ།།

བླ་མ་དུས་གསུམ་སངས་རྒྱས་ལ། ལུས་ངག་ཡིད་གསུམ་གུས་པས་འདུད།
ཐུན་མོང་མ་ཡིན་པའི་གདམ་པ་འདི་ལ་གསུམ་སྟེ། བདག་འཛིན་བློ་ཡིས་བཏང་བ་དང་། བྱང་ཆུབ་ཀྱི་སེམས་བསྒོམ་པ་དང་། སྟོང་པ་ཉིད་བསྒོམ་པ་དང་།
དང་པོ་ནི། རང་གི་མདུན་དུ་གནོད་བྱེད་བསམ། དེ་ནས་རང་གི་སྤྱི་བོར་པད་ཟླའི་སྟེང་དུ་བླ་མ་བསྒོམས་པའི་ཐུགས་ཀ་ནས་འོད་འཕྲོས། བླ་མ་རྣམས་བསྟིམ་ནས་བདག་འཛིན་བློས་ཐོངས་པ། དགོས་མེད། འཆི་བ་རྒྱུད་ལ་སྐྱེ་བར། བྱམས་སྙིང་རྗེ། འོད་གསལ་རྒྱུད་ལ་འཆར་བའི་གསོལ་བ་བཏབ་པས་བླ་མའི་སྐུའི་ཆ་ཐམས་ཅད་ནས་འོད་ཟེར་བྱུང་ཏེ། རང་གི་སྤྱི་བོར་ཕོག་པས་དེས་རྐྱེན་བྱས་ཏེ། རང་གི་ཤ་དང་། ལྤགས་པ་དང་། གླད་པ་དང་། གླད་རྒྱ་དང་། ནང་གྲོལ་ཐམས་ཅད་ཟུལ་ཕུད་ནས། གནོད་བྱེད་ལ་བྱིན་པ་དང་། རང་གི་ལུས་འདི་ཀེང་རུས་དཀར་པོ་སྣ་དང་མིག་ཁུང་ནག་ཧང་ངེ་བ། སོ་སྐྱ་རྩེག་གེ་བ། རྩིབས་མ་བཀྲ་ཡལ་ལེ་བ། རུས་པ་རྣམས་བྲལ་ལ་ཁད་པ་གཅིག་ཏུ་བསྒོམ་ནས། ཨ་ཙ་མ། འདི་ལྟ་བུའི་ཆོས་ཉིད། འདི་ལྟ་བུའི་རང་བཞིན་དུ་འདུག་པ་ཨང་། སྙམ་དུ་བསྒོམ་པས། འདོད་ཆགས། མོ་གདོན་གྲང་བའི་ནད། ཡི་དྭགས་སུ་སྐྱེ་བ་རྣམ་དག་ནས། བདེ་ཆེན་ལོངས་སྐུ་ཐོབ་པར་བྱེད་དོ།
།གཉིས་པ་ནི། གནོད་བྱེད་འདི་རྣམས་མ་ཡིན་སྙམ་པ་ནི་བྱམས་པ་དང་། ཐུགས་རྗེའི་བདུད་རྩིས་རང་དང་གནོད་བྱེད་ཀྱི་སྡིག་སྒྲིབ་དང་གནོད་སེམས་དག་པ་ནི། སྙིང་རྗེའི་ཆུ་རྒྱུན་ཏེ་བྱམས་པ་དང་འབྲེལ་བ་ཡིན་ནོ། །སྙིང་རྗེ་ནི། མ་འདི་རྣམས་ཁམས་གསུམ་འཁོར་བའི་བརྩོན་རར་འཁྱམས་པ་སྙིང་རྗེ་སྙམ་དུ་བསྒོམ། དགའ་བ་ནི། མ་འདི་རྣམས་བདེ་བ་དང་ལྡན་ཞིང་སངས་རྒྱས་ཐོབ་ན་དགའ་བ་ལ་སྙམ་དུ་བསམ། བཏང་སྙོམས་ནི། ཤུགས་ལ་འབྱུང་ངོ་། །ཞེས་ཞེ་སྡང་དང་། ཕོ་གདོན། གཟེར་བའི་ནད་དང་། དམྱལ་བར་སྐྱེ་བ་དག་ནས་སྤྲུལ་སྐུ་ཐོབ་པོ། །དེ་ནས་སྤྱི་བོའི་བླ་མ་སྙིང་ཀར་བྱོན། སྐུ་སྟོད་ནས་འོད་དཀར་པོ་བྱུང་། གཏི་མུག་དག །སྐུ་སྨད་ནས་འོད་དམར་པོ་བྱུང་། འདོད་ཆགས་དག་པར་བསམ། ཞེ་སྡང་རང་དག་ཡིན་ནོ། །བླ་མ་འོད་ཀྱི་རང་བཞིན་ཐུགས་ཀར་མ་ཡེངས་པར་བསྒོམ་པས་འོད་གསལ་འཆར་རོ། །དེ་གཏི་མུག་དང་། ཀླུ་གདོན། ནད་བྱིངས་ཅན། དུད་འགྲོར་སྐྱེ་བ་རྣམས་དག་ནས་ཆོས་སྐུ་ཐོབ་པར་བྱེད་དོ། །ཡང་ན་ཀེང་རུས་སྙིང་ཀར། བླ་མ་ཡི་དམ་གནོད་བྱེད་བསམ། གནོད་བྱེད་སྙིང་ཀར་མེ་འབར་བས་གནོད་བྱེད་བསྲེགས་པར་བསྒོམས་ལ་སྔགས་བཟླས། དེ་རྩུབ་པས་ཚོད་ཟིན་པ་གལ་ཆེ། གདོན་བགེགས་དབང་དུ་སྡུད་ན། བླ་མ་ལ་མོས་གུས་ཞུང་ཞུང་བྱེད་པར་བསམ་མོ།
།གསུམ་པ་ནི། རང་དང་བླ་མ་གནོད་བྱེད་གསུམ་མི་དམིགས་པར་བསྒོམ་མོ། །དགེ་བ་རྣམས་གནོད་བྱེད་ཀྱི་དོན་དུ་བསྔོ་བར་བྱའོ།
།དུག་གསུམ་རང་དག་འབྲས་བུ་རང་ཤར་ཞེས་བྱ་བ། བླ་མ་ཤངས་པའི་ཞལ་གདམས་རྫོགས་སོ། ཨྀཐི།