Mgon po gzi ldan gyi sgrub thabs

Resource ID	SCv11p254
Title	mgon po gzi ldan gyi sgrub thabs
Alt. title	Mgon po yid bzhin nor bu'i bum gter bca' thabs
Topics	White protector
Sub-Topics	Treasure vase
Link	BDRC W23922 BDRC W1KG4284
Notes	Same text as mgon po yid bzhin nor bu'i bum gter bca' thabs

༈ མགོན་པོ་གཟི་ལྡན་གྱི་སྒྲུབ་ཐབས་བཞུགས་སོ།།

༈ ༼མི༽ མགོན་པོ་གཟི་ལྡན་ཐུགས་རྗེ་ཅན་ལ་ཕྱག་འཚལ་ལོ།
།བུམ་པ་ཡངས་ཤིང་ཆུ་ཡོངས་སུ་གྲགས་པ་དང་ལྡན་པ། མ་ཆག་མ་གས། ལྷན་པ་མེད་པ། དྲི་མ་དང་བྲལ་ཞིང་གཙང་མའི་ནང་ནས་དཀར་མོ་པད་ལ་སོགས་པའི་སྐྱོན་དང་བྲལ་ཞིང་། སྦུར་སོགས་དང་། སྲན་མ་དང་། རྡོ་ལ་སོགས་པ་གཅིག་ཀྱང་མེད་ཅིང་། ས་ལ་སོགས་པ་དང་བྲལ་བ་ཕྱུག་པོའི་བང་མཛོད་ནས་བྱུང་བའམ། ཡང་ན་འབྲས་དཀར་མོ་མ་གྲུས་པ་སྟེ། དེ་གཉིས་གང་ཡང་རུང་བས་ཁེངས་པར་བཀང་། དེའི་ནང་དུ་གསེར། དངུལ། མུ་ཏིག །བྱུ་རུ། མུ་མེན། གཡུ་སྙིང་། ཟངས་དང་པདྨ་རཱ་ག་དུང་ལ་སོགས་པའི་རིན་པོ་ཆེ་རྙེད་ཚད་དང་། གོས་དར་བཟང་པོའི་རས་མ་ཅི་རིགས་པ་རྙེད་ཚད་དང་། ཇ་དཀར་ནག་དང་། ཤ་མར་བུ་རམ། ཀ་ར་རྒུན་འབྲུམ་ལ་སོགས་པའི་ཟས་སྣ་བཟང་པོ་རྙེད་ཚད། ཨ་རུ་ར་རྣམ་རྒྱལ་ལམ། མ་རྙེད་ན་ཡང་གཞན་གསེར་མདོག་བཟང་པོ་དང་། བཟང་དྲུག་དང་། ག་བུར། ཨ་ཀ་རུ། ཙནྡན་དཀར་དམར་དབང་ལག་ལ་སོགས་པའི་སྨན་རྣམས་གཞུག་ཅིང་། དེ་དག་གི་དབུས་སུ་བུམ་པའི་མགྲིན་པ་དང་ལྟེ་བའི་མཚམས་ལས་ཅུང་ཟད་མཐོ་བ་ཙམ་དུ། མགོན་པོ་གཟི་ལྡན་གྱི་སྐུ་ཙཀླི་རབ་གནས་ཚུལ་བཞིན་དུ་བྱས་པ་ཞལ་བུམ་པའི་མཆུ་ལ་བསྟན་ཅིང་བུམ་རྫས་ཀྱི་ནང་དུ་ནུབ་པ་བཞུགས་སུ་བཅུག །བུམ་པའི་མཆུ་རང་ལ་བསྟན། ཞག་རེ་ལ་ཐུན་བཞིར་བུམ་པའི་ནང་དུ་མགོན་པོ་བསྐྱེད་ཡེ་ཤེས་པ་གཞུག །གསོལ་བ་ཤུགས་དྲག་ཏུ་བཏབ། གཏོར་མ་ཆེ་བའི་ནང་དུ་གཏོར་ཆུང་བཏབ། གཏོར་མ་ཆེ་བ་ནི་ནས་དཀར་གཙང་བའི་རྗེན་བཏགས་ལ་དཔལ་བཤོས་ཟུར་གསུམ་ཁྲུ་གང་པ་མར་དང་སྦྲང་རྩི་དང་། བུ་རམ་གྱིས་བརྒྱན་ཅིང་། རྩེ་མོར་མར་གྱི་ནོར་བུ་འབར་བ་དང་། མདུན་ཕྱོགས་ཀྱི་ལོགས་ལ་མར་གྱི་ཧཱུྃ་དཀར་པོ་ཆེན་པོ་བྲིས་ལ། མཐེབ་སྐྱུ་བརྒྱ་རྩ་བརྒྱད་ཀྱི་༼༽བཅད་ཁ་མ་ནང་དུ་བསྟན་ནས་བསྐོར་བ་སྣོད་ཟངས་ཀྱི་ཀ་ཊོ་ར་ལ་སོགས་པ་གས་ཆག་དང་བུག་པ་ལྷན་པ་སོགས་མེད་པའི་ཆེན་པོར་བྱ། སྐུ་ཙཀ་ལི་དང་མེ་ལོང་དང་དར་དཀར་དམར་མཐིང་གསུམ་མདའ་བྱ་རྒོད་མ། སྒྲོ་མེས་མ་རེག་པ་ལ་བརྒྱན་པའི་མདའ་དར་གཙུགས། ཐུན་དང་པོ་ལ་གཏོར་ཆུང་གཅིག་བླ་མ་དང་ཡི་དམ་ལ་ཕུལ། དེ་མ་གཏོགས་པ་ཐུན་བཞི་པོ་རེ་རེ་ལ་གཏོར་ཆུང་ལྔ་ལྔ་མགོན་པོ་ལ་དབུལ། གཏོར་མ་ཆེ་བ་དང་པོ་སྣོད་ཁེངས་པ་ཐེབ་སྐྱུ་སྣོད་ལས་ཕྱིར་མ་ཐལ་བ་བྱ། གཏོར་ཆེན་མགོན་པོར་བསྐྱེད་ཡེ་ཤེས་པ་བཅུག །དེ་དང་བུམ་པའི་ནང་གི་མགོན་པོ་དབྱེར་མེད་དུ་མོས་ནས་གཏོར་ཆུང་འབུལ། གཏོར་ཆུང་གི་གཏོར་མ་ཆེ་བའི་མདུན་དུ་སྣོད་གཞན་བཞག་པའི་ནང་དུ་འབུལ་དུ་རུང་། གཏོར་མ་བྱིན་རླབས་གཞུང་བཞིན་ནོ། །གཏོར་ཆུང་འབུལ་བའི་ཚེ་རེ་རེ་ནས་ལག་པ་གཡས་པས་བཟུང་སྟེ། རྩ་སྔགས་སིདྡྷི་མའི་ཡི་གེ་བཅུ་གསུམ་པའི་མཐར་བ་ལིཾ་ཁ་ཁ་ཁཱ་ཧི་ཁཱ་ཧི་བཏགས་ནས་འབུལ། སྒྲུབ་པ་ཐོན་ཁའི་ཐུན་ཐ་མ་ལ་གཏོར་མ་ཆེ་བའི་མགོན་པོ་ནམ་མཁའ་ལ་བཞུགས་སུ་གསོལ། གཏོར་མ་ཆེ་བ་ལེགས་པར་བྱིན་གྱིས་བརླབས་ཏེ་དབུལ། ཐུན་མཚམས་ཐམས་ཅད་ལ་ཡང་གཏོར་མ་ཆེ་བ་མཐེབ་སྐྱུ་རེ་རེས་གསོ། སྒྲུབ་པའི་བར་ལ་མཚམས་དམ་པར་བཅད་གཞན་ལ་གསང་། ངག་བཅད། སྒྲུབ་རྫས་ཕྱིར་མི་གདོན། སྟན་མི་སྤྲུག །ཕྱག་དར་མི་བྱ། དབང་བསྡུད་ཀྱི་དཀྱིལ་འཁོར་བྲིས་ནས་རབ་གནས་བྱས་པ་སྐུད་པ་དམར་པོས་དཀྲིས་ཏེ། སྒྲུབ་པའི་བར་ལ་བུམ་པའི་མགུལ་པར་བཏགས་ལ། སྒྲུབ་པ་ཐོན་དུ་ཉེ་བའི་ཐུན་ཐ་མའི་ཚེ། གཏོར་མའི་མགོན་པོ་ནམ་མཁར་བཏེགས་པ་དེ་ལ་གཏོར་མ་ཕུལ་ཚར་ནས་འཁོར་ལོ་ལ་བསྟིམ་སྟེ། འཁོར་ལོ་རང་གི་ལུས་ལ་བཅངས་པས། གང་འདོད་པ་དབང་དུ་འགྱུར་རོ། །སྒྲུབ་པ་ཐོན་ནས་ཐོད་པ་དུམ་བུ་གཅིག་པ་མཚན་ལྡན་གྱི་ནང་དུ། སྔར་གྱི་བུམ་རྫས་རྣམས་ནས་དང་བཅས་པས་བསྐོར་བའི་ནང་དུ་བུམ་པའི་ནང་གི་སྐུ་ཙཀ་ལི་ཞལ་ཐོད་པའི་དཔྲལ་བ་ལ་བསྟན་ནས་སྐུ་ལ་ནུབ་པ་བྱས་ཏེ་གཙུག་པ་རང་ཉལ་བའི་ཁང་པའམ། རང་གི་མཆོད་ཁང་དུ་གཞན་གྱིས་མི་མཐོང་བར་བཞུགས་སུ་བཅུག་པའི་མདུན་དུ་འཛིན་གཏོར་བཅས་ཏེ་ནུབ་རེ་གསོ་ཞིང་དབུལ། གཞན་བུམ་པའི་རྫས་ཀྱི་ནས་སམ་འབྲས་ལྷག་མ་རང་ཁོ་ནས་ལོངས་སྤྱོད་ཅིང་སྒྲུབ་པའི་གཏོར་མ་ཡང་རང་ཁོ་ནས་དངོས་གྲུབ་ཏུ་བླངས། སྒྲུབ་རྫས་རྣམས་དང་པོ་འཚོལ་བའི་ཚེ་དམ་ཉམས་དང་གྲིབ་ཅན་གྱི་ལག་ནས་བྱུང་བ་དང་མ་འདྲེས་པར་བྱ་ཞིང་། བསངས་སྦྱངས་ལེགས་པར་བྱ་ཞིང་གུ་གུལ་གྱིས་བདུག་སྟེ། བུམ་པའི་ནང་དུ་བཞུགས་པར་བྱ་ཞིང་། ཆང་ཕུད་དང་གཏོར་མ་ཕྱེ་མ་འབགས་པ་གལ་ཆེའོ།
།ཞལ་ཤེས་ཞིབ་པར་ཡི་གེར་བཀོད་པ་ཡིན་ཆེས་ཤིན་ཏུ་གསང་བར་བྱ་ཞིང་། དེས་སུ་ལ་ཡང་མི་བསྟན་ནོ། །གུ་ཧྱ་སམཡཿ །མགོན་པོ་གཟི་ལྡན་འདི་ནི་ཡིད་བཞིན་གྱི་ནོར་བུ་ཉིད་ལས་སྦྱོར་གྱི་ཕྱག་མཚན་སོགས་ཅུང་ཟད་བསྒྱུར་བ་ཙམ་ཡིན་པས། འདི་ལ་རྗེས་གནང་དང་བཀའ་ལོགས་སུ་བྱེད་པ་ནི་རྗེས་གནང་གི་གྲངས་ལ་གཙོ་བོར་བྱེད་པ་རྣམས་ཀྱིས་རང་བཟོ་ཡིན་གྱི་བདག་གི་བླ་མ་དག་དེ་འདྲ་མི་བཞེད་དོ།། །།