Phyag rgya chen po ga'u ma'i dbang bskur

Resource ID	Sup8
Title	phyag rgya chen po ga'u ma'i dbang bskur
Topics	Initiation
Sub-Topics	Mahamudra Gauma
Author	Tsangma Shangtön
Associated Person	Khyungpo Tsültrim Gönpo
Link	BDRC W8LS32725 (p.11)

ཕྱག་རྒྱ་ཆེན་པོ་གའུ་མའི་དབང་བསྐུར་བཞུགས་སོ།

དང་པོ་མཎྜལ་དཔེའུ་ཆུང་ལྟར་བཞེངས། ཡེ་ཤེས་པ་དགུག་གཞུག་བྱ། སྐུ་གསུང་ཐུགས་བྱིན་གྱིས་རླབས། མཆོད་བསྟོད་སྐབས་དང་མཐུན་པར་ཅི་རིགས་སུ་བྱས་ལ། དལ་འབྱོར་རྙེད་པར་དཀའ་བ། འཆི་བ་མི་རྟགས་པ། ལས་རྒྱུ་འབྲས། འཁོར་བའི་ཉེས་དམིགས་ཅུང་ཟད་བསྒོམ་དུ་བཅུག་ལ། དེ་ནས་སྐྱབས་འགྲོ །སྨོན་འཇུག་ནང་འཇུག །གསོལ་གདབ། གནང་སྦྱིན། སྡིག་བཤགས་རྣམས་སྐབས་དང་བསྟུན་ལ་རྣམ་པ་ཚང་ཙམ་རེ་བྱ།
བྱིན་རླབས་དང་པོ་ནི། མཎྜལ་གྱི་ལྟེ་བ་ལ་པ་སེང་གེ་བརྒྱད་ཀྱིས་བཏེགས་པའི་རིན་པོ་ཆེའི་ཁྲི་པད་ཟླའི་སྟེང་དུ། ངོ་བོ་བླ་མ་ཉམ་པ་བདེ་མཆོག་སྐུ་མདོག་གསེར་གཙོ་མ་ལྟ་བུ། རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། རུས་པའི་བརྒྱན་ཅན་ལྷ་ལྔ་བསྒོམ། ཤར་གྱི་པད་འདབ་ལ་དགྱེས་རྡོར་ལྷ་དགུ །ལྷོར་གསང་འདུས་ལྷ་སུམ་ཅུ་པོ་གཉིས། ནུབ་ཏུ་མ་ཧཱ་མ་ཡ་ལྷ་ལྔ། བྱང་དུ་འཇིགས་བྱེད་ལྷ་སུམ་ཆུ་རྩ་གསུམ་སྟེ།
རྟེན་གསལ་གདབ། དེ་ནས་དེ་ཁོ་ན་འདྲ་བ་གཅིག་སྤྱི་བོར་བསྒོམ་དུ་གཅུག་མདུན་དུ་ཐོད་པ་ཕྱི་དཀར་ལ་ནང་དམར་བ་ཡངས་ཤིང་རྒྱ་ཆེ་བ་གཅིག་གི་ནང་དུ། རང་གི་རྣམ་སྨིན་གྱི་ལུས་འདི་གཟུགས་དྲི་རོ་མི་རྟོགས་པ་ལ་སོགས་པ་བསམས་ལ་ཕུལ་ནས། བླ་མ་རིན་པོ་ཆེ་བདག་ལ་བུམ་པའི་དབང་བསྐུར་དུ་གསོལ། སྐུའི་བྱིན་རླབས་མ་ལུས་པ་གཞུག་ཏུ་གསོལ། ཅེས་གསོལ་བ་བཏབ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་རླབས་ཨོཾ་ལ་བསྡུས། དེ་ལས་འོད་དཀར་པོའི་རྒྱུན་བྱུང་། སྤྱི་བོའི་ཨོཾ་ལ་ཐིམ། མགྲིན་པ་ཡན་ཆད་གང་བས་བུམ་དབང་ཐོབ། ལུས་ཀྱི་དྲི་མ་མ་ལུས་པ་སངས་སངས་དག་པར་བསྒོམ་དུ་བཅུག་ལ། བླ་མས་ཀྱང་ཏིང་ངེ་འཛིན་དེ་དང་ལྡན་པའི་གུ་གུལ་གྱི་དུད་པ་བཏང་། རོལ་མོའི་སྒྲ་དང་བཅས་པས་རྒྱུད་སྡེ་ལྔའི་སྙིང་པོ་བརྗོད་པའི་མཐར། རྩ་བ་དང་བརྒྱུད་པར་བཅས་པའི་བླ་མ་རྣམས་ཀྱིས་བྱིན་གྱིས་རློབས་ཤིག །ཅེས་པས་ལུས་ལ་སྐུའི་བྱིན་རླབས་གཞུག་གོ །ཡང་རང་ལུས་འདི་ནང་མཆོད་ཤ་ལྔ་དང་། བདུད་རྩི་ལྔར་ལྟོས་མེད་དུ་ཕུལ་ལ་གསང་དབང་ཞུ། རང་ལུས་བདེ་སྟོང་གསང་མཆོད་དུ་ཕུལ་ལ་གསུམ་པ་ཞུ། ཡང་ཕྱི་ནང་དེ་ཁོ་ན་ཉིད་ཀྱིས་མཆོད་པ་ཕུལ་ལ། བཞི་པ་བསྐུར་དུ་གསོལ་ཞེས་གསོལ་བ་གཏབ་པས། བླ་མའི་གནས་གསུམ་གྱི་ཡི་གེ་གསུམ་ལས་འོད་ཟེར་འཕྲོས་པས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྐུ་གསུང་ཐུགས་ཀྱི་ཡོན་ཏན་མ་ལུས་བསྡུས། དེ་ལ་བདུད་རྩིའི་རྒྱུན་དཀར་དམར་མཐིང་གསུམ་བབས་པས་ལུས་ཐམས་ཅད་ཁེངས། དབང་བཞི་པ་ཐོབ། ལུས་ངག་ཡིད་གསུམ་གྱི་དྲི་མ་སངས་སངས་དག་པར་བསམས་ལ། སེམས་མ་བཅོས་པའི་་་་ལ་བློ་མ་བཞག་གོ
།ཡང་ལུགས་གཉིས་པ་ནི། ཕྱོགས་བཞིའི་ལྷ་ཚོགས་ཐམས་ཅད་འོད་དུ་ཞུ་ནས། དབུས་ཀྱི་བླ་མ་ལ་ཐིམ། བླ་མ་འོད་ཀྱི་རང་བཞིན་ལྡེམ་ལྡེམ་འདུག་པ་དང་རང་གི་སྤྱི་གཙུག་ཏུ་བྱོན། རང་གི་གསང་གནས་ནོར་བུའི་ནང་དུ་ཕཊ་དམར་པོ་གཅིག་བསམས་ལ། འོད་ཟེར་དམར་པོ་མེའི་རྣམ་པ་དབུ་མའི་ནང་ན་ཡར་ནར་གྱིས་སོང་། ཟླ་བའི་གདན་དང་བཅས་པ་ཕུག་ནས། བླ་མ་འོད་ཀྱི་རང་བཞིན་དུ་ཡོད་པ་སྨིན་མཚམས་སུ་བྱོན་ནས་བུམ་དབང་ཐོབ། མགྲིན་པར་གཉིས་པ། སྙིང་ག་དང་ལྟེ་བ་གསུམ་པ། བཞི་པ་མཐར་འོད་དུ་ཡལ་གྱིས་སོང་བ་ལ་སེམས་མ་བཅོས་པར་བཞག་སྟེ། བླ་མ་ལ་དབང་བཞི་ལན་གཉིས་སུ་བླང་བའི་ལག་ལེན་འོད་གསལ་རང་བབས་ཀྱི་བྱིན་རླབས་བཀའ་ཡིན་ནོ།
།མཎྜལ་ནི། པད་འདབ་བཞིའི་ལྟེ་བ་སེར། ཤར་མཐིང་། ལྷོ་སེར། ནུབ་དམར། བྱང་ལྗང་གུ། ཁྱམས་ཕྱོགས་ཚོན། མེ་ཏོག་གི་ཚོམ་བུ་དགོད། གཏོར་མ་ལྔ་དང་མཆོད་པ་བཤམས། སློབ་མ་ཁྲུས་བྱ། བགེགས་གཏོར་བཏང་། དེ་ལྟར་བླ་མ་ལ་དབང་བཞི་ཐོབ་པས། ས་ལམ་ཐམས་ཅད་བསྒྲོད་པར་བྱེད་པའི་དགོངས་པ་མཆོག་གི་རྒྱུད་ལས་ནི།
བླ་མའི་སྐུ་ཡི་དཀྱིལ་འཁོར་ལས། །དབང་བཞི་ཡོངས་སུ་རྫོགས་པར་ཞུས། །ས་ལམ་རིམ་པ་མ་ལུས་རྣམས། །ཚེ་འདི་ཉིད་དུ་བགྲོད་པར་འགྱུར། །ཅེས་སོ།
འདི་བྲིས་དམ་པ་གང་ཡོད་དེས། ནམ་མཁའི་མཐས་ཁྱབ་སེམས་ཅན་གྱིས། རིགས་དྲུག་སྡུག་བསྔལ་ཀུན་བྲལ་ནས། ཐམས་ཅད་མཁྱེན་པ་ཐོབ་པར་ཤོག །།
ཡང་ལུགས་གཅིག་ལ། བླ་མའི་གནས་གསུམ་གྱི་ཡིག་འབྲུ་མཐིང་གར་ཡོད་པ་ལ་བདེ་མཆོག་སྐུ་ཆུང་ལ་ཡན་ལག་དོད་པ་མཐིང་ག་དཔག་ཏུ་མེད་པ་ཆད་ནས། གནས་གསུམ་དུ་ཐིམ་པས་དབང་གསུམ། ལྟེ་བ་ནས་འོད་མཐིང་ག་དཔག་ཏུ་མེད་པ་ཆད་ནས། ལྟེ་བར་ཐིམ་པས། མཐར་སྟོང་སངས་ཀྱི་འོད་དུ་ཡལ་བའི་ངང་ལ་བཞག་པ་ནི་བཞི་པའོ། །འདི་ཟབ་ལམ་ཡིན་གསུང་ངོ་།
།མཁས་གྲུབ་རིན་པོ་ཆེ་ཤངས་སྟོན་ལ་ཁྱུང་པོ་བདག་གི་ཞུས་སོ།
།གའུ་མའི་དབང་གི་རྗེས་གནང་ཟབ་མོ་གཅིག་བརྒྱུད་མའོ།