Phyag rgya chen po rang babs rnam gsum gyi dogs pa gcod pa'i lan

Resource ID	Tar1
Title	phyag rgya chen po rang babs rnam gsum gyi dogs pa gcod pa'i lan
Topics	Mahamudra Gauma
Sub-Topics	Commentary
Author	Jetsün Taranatha
Link	BDRC W1PD45495 v39 p190

ཕྱག་རྒྱ་ཆེན་པོ་རང་བབས་རྣམ་གསུམ་གྱི་དོགས་པ་གཅོད་པའི་ལན་ཞེས་བྱ་བ་བཞུགས།

ཁྲིད་འཇུག་ཏུ། ཕྱག་རྒྱ་ཆེན་པོ་རང་བབས་རྣམ་གསུམ་འདི་ལ་རྗེས་ཀྱི་སྐབས། སྔགས་ཐུན་མོང་མ་ཡིན་པའི་ཉམས་མྱོང་དང་འདྲེས་ནས་ཉམས་མྱོང་ཚད་དུ་ཕྱིན་པ་ཕན་ཆད་ནས། སྔགས་ཀྱི་ཐུན་མོང་མ་ཡིན་པའི་ཕྱག་ཆེན་དུ་འགྲོ་བ་ཡིན་གྱི་དེ་ཕྱིན་ཆད་མདོ་དང་ཐུན་མོང་མ་ཡིན་པ་ཡིན་ནོ།
།འདི་ལྟ་བུའི་ཕྱག་རྒྱ་ཆེན་པོ་འདི་ལ་འགྲོ་མགོན་ཞང་འཚལ་པས་ཀྱང་ས་ལམ་ཚིག་ཆོད་ཡིན་པར་བཞེད་དེ། ཕྱག་རྒྱ་ཆེན་པོ་ཚིག་ཆོད་ལ། །ས་ལམ་བརྩི་པའི་རྨོངས་པ་འཁྲུལ་ཞེས་སོགས་གསུངས། འདིར་ནི་སྔོན་རང་བབས་རྣམ་གསུམ་ཚད་དུ་ཕྱིན་ན་ཚོགས་ལམ་ཆེར་པོར་འགྱུར། དངོས་གཞི་སྐྱོན་བཞི་རང་གྲོལ་ཚད་དུ་ཕྱིན་ན། སྦྱོར་ལམ་དྲོད་ཀྱི་རྟོགས་པ་སྐྱེ། རྗེས་སྐུ་གསུམ་རང་ཤར་ཚད་དུ་ཕྱིན་ན་སྦྱོར་ལམ་བཟོད་པར་སླེབས། འབྲས་བུ་ཚད་དུ་ཕྱིན་ན་མདོ་ཕྱོགས་ཀྱི་ས་དང་པོ་དང་སྔགས་ཕྱོགས་ཀྱི་ཟུང་འཇུག་འགྲུབ་པ་ཞེས་བྱ་བ་ཡིན་ནོ།
།ཕྱག་ཆེན་རང་ངོས་ཀྱི་ལྟ་སྒོམ་གཉིས་ཀྱི་སོ་སོའི་ཉམས་མྱོང་ཤར་ཡང་སྤྱོད་པ་བསོད་ནམས་ཀྱི་ཚོགས་མ་རྫོགས་ན་ལམ་དེ་རྗེས་མཐུན་པ་ཡིན་གྱི་དངོས་མ་ཡིན། དཔེར་ན་མགྲོན་པོ་སྔ་ཕྱི་འབོད་དུ་མི་རུང་བ་སྟབས་གཅིག་ཁོ་ནར་འགྲོ་དགོས་པ་ཡིན་པ་ལ། གཅིག་གིས་གྲབས་མ་ཟིན་ན་གཅིག་ཕྲེསས་རྒྱ་གྲབ་ཐམས་ཅད་གྲུབ་ཀྱང་། དེ་སྒུག་པའི་ཡུན་རིང་དུ་སྡོད་དགོས་པ་བཞིན་དུ་སྔོན་འགྲོའི་ཚང་མ་བཅོས་ཐ་མལ་གྱི་ཤེས་པ་རང་དང་མཉམ་པའི་བསོད་ནམས་ཀྱི་ཚོགས་མ་རྫོགས་ན་ཚོགས་ལམ་ཆུང་འབྲིང་གི་ཡོན་ཏན་ཙམ་འབྱུང་སྲིད་ཅིང་། ཆེན་པོའི་ཡོན་ཏན་རྫུ་འཕྲུལ་གྱི་རྐང་བཞི་ཐོབ་པ་སོགས་མི་འབྱུང་། དེ་གཉིས་ཟུང་འཇུག་ཏུ་ཡོད་ན་ཡོན་ཏན་དེ་ཡང་འབྱུང་། དེ་ལ་སྔོན་འགྲོ་ནི་ཐེག་པ་ཆེན་པོའི་ཞི་གནས་གཙོ་ཆེ་བ་ཡིན་ལ། དངོས་གཞིའི་སྐབས་སྣང་སེམ་ས་ཡིད་ལ་མི་བྱེད་པ་རང་ནི་གཟུང་བ་རང་བཞིན་མེད་པ་ལ་གསལ་སྣང་ཆུང་ངུ་སྐྱེས་པ་ཡིན་པས་དེ་ལ་བརྟན་པ་ཐོབ་ནས་ཐུན་ཐུན་མཚམས་སྒོམས་འབོར་ཡུག་ཏུ་སོང་བ་ནི་ཆོས་ཀྱི་སྣང་བ་འཕེལ་བའི་ཕྱིར་སྦྱོར་ལམ་རྩེ་མོ་ཡིན་ནོ།
།རྗེས་ཉམས་མྱོང་རང་ཤར་ནི་གཟུང་བ་རང་བཞིན་མེད་པ་མཐོང་ཞིང་དེ་ལྟར་མ་རྟོགས་པའི་སེམས་ཅན་ལ་སྙིང་རྗེ་ཞུགས་པ་ཡིན་པས་སྦྱོར་ལམ་བཟོད་པ་ཡིན་ལ། དེ་ལ་བརྟན་པ་ཐོབ་ཅིང་མི་གཡོ་བ་ནི་འཛིན་པ་སེམས་ཀྱི་རྣམ་རྟོག་མངོན་གྱུར་པ་ཡང་འགགས་པའི་རྒྱུ་མཚན་གྱི་ཡིན་པས་སྦྱོར་ལམ་ཆོས་མཆོག་གོ
།འབྲས་བུའི་རྟོགས་པ་སྐྱེས་པའི་བློ་འདས་ཟུང་འཇུག་རང་ཤར་ཞེས་བྱ་བ་ནི་སྒྲ་དང་རྣམ་རྟོག་གི་ཡུལ་ལས་འདས་ཤིང་གནས་ལུགས་ཟུང་འཇུག་དེ་ཉིད་མངོན་སུམ་དུ་ཤར་བའི་ཚུལ་གྱིས་རྟོགས་པ་དེ་མཐོང་ལམ་ཐོབ་པ་ཕན་ཆད་འཕགས་པའི་ས་ཐམས་ཅད་དུ་ཡོད་ལ་བརྟན་པའི་ཚད་འཕྲིན་ལས་ཕྱོགས་མེད་རང་ཤར་ནི་ས་བརྒྱད་པ་ཡན་ཆད་དག་པའི་ས་གསུམ་ཡིན་པ་ཤེས་པར་བྱའོ།
།དེ་ལྟར་དོགས་པ་གཅོད་པའི་ལན་རྗེ་བཙུན་ཏཱ་ར་ནཱ་ཐས་གསུངས་པ་ཡིན་ནོ།། །།མངྒ་ལཾ།