Rnal 'byor pa'i bar chad bsrung ba

Resource ID	SCv8p754
Title	bar chad bsrung ba
Alt. title	rnal 'byor pa'i bar chad bsrung pa
Topics	Various
Sub-Topics	Various by Khyungpo Neljor
Author	Khyungpo Neljor
Associated Person	Niguma Jampa Rinchen Zangpo
Link	BDRC W23922 BDRC W3CN18508 (v2p.481,v3p.120) BUDA MW2PD20238 (p.311)

༈ བར་ཆད་བསྲུང་བ་ནི།

བླ་མ་དམ་པ་རྣམས་ལ་ཕྱག་འཚལ་ལོ།
རྣལ་འབྱོར་པའི་བར་ཆད་བསྲུང་བ་དང་། རྣམ་ཤེས་ཡི་དམ་གྱི་ལྷ་ལ་འཕོ་བ་ནི། བླ་མ་ཤངས་པ་གདུ་གུ་ཅན་རྒྱ་གར་དུ་བཞུད་པའི་ལམ་ཁར། ནགས་གསེབ་གཅིག་ནས་མཁའ་འགྲོ་མ་གཅིག་བྱོན་ནས། རྣལ་འབྱོར་པའི་ཚེ་ལ་བར་ཆད་འོང་བར་འདུག་པས། ངས་བསྲུང་བ་གཅིག་བསླབས་ཀྱི་གསུང་ནས། མཁའ་འགྲོ་མ་ནཻ་གུ་ཅན་གྱིས་བླ་མ་ཤངས་པ་ལ་བསྲུང་བ་འདི་གནང་ངོ་།
དེ་ལ་དང་པོ་རྣལ་འབྱོར་པས་བྱམས་སྙིང་རྗེ་བྱང་ཆུབ་ཀྱི་སེམས་བསྒོམ། དེ་ནས་རང་གི་ལུས་འདི་ཇོ་མོ་རྣལ་འབྱོར་མར་གསལ་བར་བསྒོམ། ཇོ་མོའི་ཐུགས་ཀར་ཡི་གེ་བྃ་དམར་ནག་གཅིག་བསྒོམ། བཾ་དེ་ལས་འོད་འཕྲོས་པས་རང་བཞིན་གྱི་གནས་ནས་ཇོ་མོ་རྣལ་འབྱོར་མ་སྤྱན་དྲངས་ནས་རང་གི་སྤྱི་གཙུག་ཏུ་ཞབས་གཉིས་བགྲད་དེ་བཞུགས་པར་བསྒོམ། དེ་ལ་གསོལ་བ་གདུང་པ་ལན་གསུམ་གདབ། བདག་གི་ལམ་སྣ་འདྲེན་པའི་དགེ་བའི་བཤེས་གཉེན་འང་འདི་ཡིན་ཨང་སྙམ་དུ་བསམ། བདག་ལ་དངོས་གྲུབ་སྟེར་བའི་ཡི་དམ་ཡང་འདི་ཡིན་ཨང་སྙམ་དུ་བསམ། བདག་གི་བར་ཆད་སེལ་བའང་འདི་ཡིན་ཨང་སྙམ་དུ་བསམས་ཏེ། གསོལ་བ་གདུངས་གདུངས་པ་ལན་གསུམ་གདབ་པ་དང་། ཇོ་མོའི་ཆོས་འབྱུང་བྷ་ག་ནས་བྱང་ཆུབ་ཀྱི་སེམས་དཀར་དམར་བབ་ནས། རང་གི་སྤྱི་གཙུག་ན་མར་བདེ་ཕྲི་ལི་ལི་བྱུང་པར་བསྒོམ། དེ་ནས་རང་གི་ལུས་ཐམས་ཅད་ཞོ་རྐྱལ་འོ་མས་གང་བ་བཞིན་དུ་བྱང་ཆུབ་ཀྱི་སེམས་ཀྱིས་བདེ་ཕྲིལ་ཕྲིལ་གྱིས་གང་བར་བསྒོམ་པ་དང་། རང་གི་ལྟེ་བའི་དཀྱིལ་ནས་ཡི་གེ་ཨ་ཡིག་རྒྱངས་ཀྱིས་ཇོ་མོའི་ཕྱག་མཚན་གྲི་གུག་གིས་ལྟེ་བ་ལ་ཐིམ་པར་བསྒོམ། ཨ་ཕྱག་མཚན་ལ་ཐིམ་པ་དང་། ལུས་ཐ་མལ་དུ་སྐྲོངས་སོང་པར་བསྒོམ། ལུས་ཐ་མལ་དུ་འདུག་པ་དེའི་རྐང་མཐིལ་གཉིས་སུ་ཁ་དང་གསུམ་དུ་རཾ་དམར་ནག་རེ་བསྒོམ། །རཾ་དེ་ལས་མེ་དམར་ཧུར་ཧུར་འབར་བས། རང་གི་ལུས་ནས་ཡར་ཐུ་ལུ་ལུ་ཚིག་ནས་ཁོང་པའི་ནང་ཐམས་ཅད་ཁོལ་བར་བསམ་མོ། དངས་མ་ཁོལ་བ་དེ་རྗེ་བཙུན་མའི་ཕྱག་གཡོན་པའི་ཐོད་པར་སོང་བར་བསམ། དེ་ཐོད་པར་སོང་བ་དེ་རང་གི་ཤེས་པའི་ས་བོན་ཕྱག་མཚན་ལ་ཐིམ་པ་དང་། ཨ་དེས་བླ་མ་དང་། སངས་རྒྱས་དང་། བྱང་ཆུབ་སེམས་དཔའ་དང་། ཡི་དམ་དང་། དཔའ་བོ་དང་། མཁའ་འགྲོ་དང་། རྡོ་རྗེ་རྣལ་འབྱོར་མ་ལ་ཕུལ་བར་བསམ། དེ་ཕུལ་བ་དང་། རྣལ་འབྱོར་མ་དེ་རྣམས་ཀྱིས་གསོལ་བས་བླ་མ་དང་ཡི་དམ་དང་ལྷ་དེ་རྣམས་དགྱེས་པར་བསྒོམ། དེ་ནས་འཕྲོ་གཅོད་ཙན། སྤྱི་བོའི་རྣལ་འབྱོར་མ་རང་བཞིན་གྱི་གནས་སུ་གཤེགས་སུ་གསོལ། རང་ཇོ་མོ་རྣལ་འབྱོར་མར་བསྒོམས་ལ་དགེ་བའི་རྩ་བ་སེམས་ཅན་གྱི་དོན་དུ་བསྔོ། དེས་བར་ཆད་ཐམས་ཅད་སེལ། ཚེ་བསྲེང་། རྣམ་ཤེས་ཕྱིན་ལ་འཕོ་བ་ཞེས་བྱའོ།
ཡེ་ཤེས་མཁའ་འགྲོ་ནཻ་གུ་མས་བླ་མ་ཤངས་པ་ལ་གནང་བའི་བརཆད་བསྲུང་བ་དང་། རྣམ་ཤེས་ཡི་དམ་གྱི་ཕྱག་མཚན་ལ་འཕོ་བ་ཞེས་བྱའོ། ཁྱུང་པོ་རྣལ་འབྱོར་པས་ཡི་གེར་བཀོད་པ་རྫོགས་སོ།།
བརྒྱུད་པ་ནི། རིན་ཆེན་བདུན། གྲུབ་ཐོབ་ཨ། གསེར་གླིང་པ། བཛྲ་ཤྲཱི། ༼MW2PD20238 p.314: དྷརྨ་ཤྲི། དྷརྨ་དྷྭ་ཛ། ཀུ་མཱ་ར་པྲ་བྷཱ། ཨཱརྻ་རཏྣ། བདེ་བདག་གོ །ཡང་ན། དྷརྨ་ཤྲཱི། ཆོས་གྲགས་པ། སངས་རྒྱས་དཔལ། དུས་འཁོར་བ།༽ ཆོས་གྲགས་པ། བུདྡྷ་ཤྲཱི། དེས་གྲུབ་ཆེན་དང་། ཀུན་སྤངས་པ། དེ་གཉིས་ཀ་ལ་སྤྲུལ་སྐུ་ངག་གི་དབང་པོ་དེས་བདག་བྱམས་པ་རིན་ཆེན་བཟང་པོ།