Ye shes mkha' 'gro ni gu ma'i gser chos lnga'i sngon 'gro

Resource ID	kinnaur8
Title	ye shes mkha' 'gro ni gu ma'i gser chos lnga'i sngon 'gro
Topics	Six doctrines of Niguma
Sub-Topics	Preliminary practices
Author	author unknown
Link	BDRC W4CZ58783 (p.67)

ཡེ་ཤེས་མཁའ་འགྲོ་ནི་གུ་མའི་གསེར་ཆོས་ལྔའི་སྔོན་འགྲོ།

དོན་དམ་བློ་འདས་ཆོས་ཀྱི་སྐུ། །ཟག་མེད་བདེ་རྒྱས་ལོངས་སྤྱོད་རྫོགས། །གང་འདུལ་ཐབས་ཀྱི་འགྲོ་བ་འདུལ། །བླ་མ་དམ་པའི་ཞབས་ལ་འདུད།
སྔོན་འགྲོ་རྣམས་ཉམས་སུ་བླང་བ་ལ་གསུམ། ཐུན་མོངས་ཀྱི་སྔོན་འགྲོ་དང་། ཐུན་མོངས་མ་ཡིན་པའི་སྔོན་འགྲོ་དང་། ཁྱད་པར་གྱི་སྔོན་འགྲོའོ།
།དང་པོ་ཐུན་མོངས་ཀྱི་སྔོན་འགྲོ་ལ་བཞི། དལ་འབྱོར་རྙེད་པར་དཀའ་བསམ་པ། འཆི་བ་མི་རྟག་པ་བསམ་པ། ལས་རྒྱུ་འབྲས་བསམ་པ། འཁོར་བའི་ཉེས་དམིགས་བསམ་པའོ།
།བཞི་པ་འཁོར་བའི་ཉེས་དམིགས་བསམ་པ་ལ་དྲུག །དམྱལ་བ་ཚ་གྲང་གི་སྡུག་བསྔལ་བསམ་དང་། ཡིད་བཏགས་སྐྲེས་སྐོམ་གྱི་སྡུག་བསྔལ་བསམ་པ། དུད་འགྲོ་ཀླེན་ལྐུགས་ཀྱི་སྡུག་བསྔལ་བསམ་པ། མི་སྐྱེ་རྒས་ན་འཆིའི་སྡུག་བསྔལ་བསམ་པ། ལྷ་མ་ཡིན་འཐབ་རྩོད་ཀྱི་སྡུག་བསྔལ་བསམ་པ། ལྷ་འཕོ་ལྷུང་གི་སྡུག་བསྔལ་བསམ་པ་རྣམས་ནི་སྤྱི་དང་མཐུན།
གཉིས་པ་ཐུན་མོངས་མ་ཡིན་པའི་སྔོན་འགྲོ་ལ་བཞི། སྐྱབས་སུ་འགྲོ་བ་དང་། སེམས་བསྐྱེད་པ། རྡོ་རྗེ་སེམས་དཔའི་སྒོམ་བཟླས་བྱ་བ། མཎྜལ་འབུལ་བ། བླ་མའི་རྣལ་འབྱོར་སྒོམ་པའོ།
།དང་པོ་སྐྱབས་སུ་འགྲོ་བ་ནི། མདུན་གྱི་ནམ་མཁར། དཔག་བསམ་གྱི་སྡོང་པོ་ཡལ་ག་དང་ལོ་འདབ་ཕྱོགས་བཅུར་རྒྱས་པའི་སྟེང་དུ། སེང་གེ་བཞིའི་བཏེག་པའི་རིན་པོ་ཆེའི་ཁྲི་ཡངས་ཤིང་རྒྱ་ཆེ་བ། དེའི་སྟེང་དུ་པཾ་ལས་པདྨ། རཾ་ལས་ཉི་མ། ཨ་ལས་ཟླ་བའི་བདན་རྒྱ་ཆེ་བའི་དབུས་སུ། རྩ་བའི་བླ་མ། ཆོས་འབྲེལ་ཡོད་ཚད་ཀྱི་བླ་མ་དང་། རྒྱུད་པའི་བླ་མ་རྣམས་ཀྱིས་བསྐོར་བ། མདུན་དུ་རྒྱུད་སྡེ་ལྔའི་ལྷ་ཚོགས་ལ། ཡི་དམ་བཞན་ཡོད་ཚད་ཀྱི་བསྐོར་བ། གཡས་སུ་དུས་གསུམ་གྱི་སངས་རྒྱས་ལ། བརྒྱས་སྟོང་རྩ་གཉིས་ཀྱིས་བསྐོར་བ། རྒྱབ་དུ་ཐེག་པ་ཆེན་པོའི་ཆོས་སྤོ་སྟེ། གསེར་གདོང་རང་ལ་རང་སྟན་པ། གཡོན་དུ་ཐེག་ཆེན་གྱི་དགེ་འདུན་དང་། ཉོད་ཀྱི་དགེ་འདུན་ལ་མཆེད་གྲོགས་ཆོས་འཛད་རྣམས་ཀྱིས་སྐོར་བ། འཚམས་རྣམས་སུ་དམ་པ་ཆོས་སྐྱོང་བའི་བསྲུངས་མ་རྣམས་བསྒྲུབ་པ་པོ། ཆོས་སྒྲུབ་པ་ལ། བར་དུ་བཅོད་པའི་གདོན་བགེགས་བསྲུང་བའི་ཚུལ་དུ། ཞལ་ཕྱིར་བཟིགས་སུ་བཞུགས་པ་རྣམས་ལ། ཨརྒཾ་ལ་སོགས་པས་མཆོད་ཅིང་། བློ་དང་འདྲེ་ངེས་པའི་སྐྱབས་འགྲོ་བྱའོ།
།སེམས་བསྐྱེད་པ་ནི། སེམས་ཅན་ཐམས་ཅད་ཀྱི་དོན་དུ། འགྲོ་རྣམས་སྒྲལ་འདོད་ཚར་གསུམ་དང་། ཚད་མེད་པ་བཞི་སྒོམ།
རྡོ་རྗེ་སེམས་དཔའི་སྒོམ་བཟླས་བྱ་བ་ནི། རང་ཐ་མལ་པའི་སྤྱི་བོར། པད་ཟླའི་སྟེན་དུ། ཧཱུྃ་ལས་རྡོ་རྗེ་དཀར་པོ་རྩེ་ལྔ་པ་ལྟེ་བ་ལ་ཧཱུྃ་གི་མཚན་པ། དེ་ལས་འོད་ཕྲོས་དོན་གཉིས་བྱས་ཚུར་འདུས་ཡོངས་སུ་གྱུར་པ་ལས། རྡོ་རྗེ་སེམས་དཔའ་སྐུ་མདོག་དཀར་པོ་ཞལ་གཅིག་ཕྱག་གཉིས་པ་རྡོ་རྗེ་དང་དྲིལ་བུ་འཛིན་པས་ཡུམ་ལ་མཁྱུད་པ། ཡུམ་རྡོ་རྗེ་སྙེ་མ་དཀར་མོ་གྲི་གུག་དང་ཐོད་པ་འཛིན་པས་ཡབ་ལ་མཁྱུད་པ། གཉིས་ཀའང་མཚན་བཟང་པོ་སུམ་བཅུ་རྩ་གཉིས་དང་། དཔེ་བྱད་བཟང་པོ་བརྒྱ་བཅུས་སྤྲས་ཞིང་། རུས་པ་དང་རིན་པོ་ཆེའི་བརྒྱན་གྱིས་བརྒྱན་པའི་གནས་གསུམ་དུ་ཡིག་འབྲུ་གསུམ་བཀོད་པའི། ཧཱུྃ་ལས་འོད་འཕྲོས། བླ་མ་ཡི་དམ། སངས་རྒྱས་བྱང་ཆུབ་སེམས་དཔའ་དཔའ་བོ་མཁའ་འགྲོ་རྣམས་ཀྱི་ཐུགས་ཁ་ནས་ཡེ་ཤེས་ཀྱི་བདུད་རྩི་སྤྱན་དྲངས། རྡོ་རྗེ་སེམས་དཔའ་ཡབ་ཡུམ་གྱི་ཞལ་དུ་ཞུགས། སྐུའི་དབྱིབས་རྒྱུད་སྦྱོར་འཚམས་ནས་བདུད་རྩིའི་བརྒྱུན་བབས། སྤྱི་བོ་ནས་མར་ཞུགས་པས། ལུས་ངག་ཡིད་གསུམ་གྱི་སྡིག་པ་དང་སྒྲིབ་པ། ནད་དང་གདོན། དམ་ཚིག་ཉམས་ཆག་ཐམས་ཅད་བཤང་ལམ་དང་། ཆུ་ལམ་བ་སྤུའི་བུ་ཁ་སོགས་ནས་ཕྱིར་ཐོན་པར་བསམ་ལ།
ༀ་བཛྲ་ས་ཏྭ་ས་མ་ཡཱ། མ་ནུ་པ་ལ་ཡཱ། བཛྲ་ས་ཏྭ་ཏཱཻ་ནོ་པ། ཏིཥྛ་ཌི་དྷོ་མེ་བྷ་ཝ། སུ་ཏོ་ཥྱ་མེ་བྷ་ཝ། ཨ་ནུ་རག་ཏོ་མེ་བྷ་ཝ། སུ་པོ་ཥྱོ་མེ་བྷ་ཝ། སརྦ་སིདྷི་མེ་སྤྲ་ཡཾ་ཙྪ། སརྦ་ཀརྨ་སུ་ཙ་མེ། ཙིཏྟ་ཤྲི་ཡཾ་ཀུ་རུ་ཧཱུྃ། ཧ་ཧ་ཧ་ཧ་ཧོ། བྷ་ག་ཝན། སརྦ་ཏ་ཐཱ་ག་ཏ་བཛྲ་མ་མེ་མུཉྩ། བཛྲི་བྷ་ཝ་མཧཱ་ས་མ་ཡཱ་སྭ་ཏྭ་ཨཱཿ
ཅེས་པ་རྒྱ་ཙ་ལ་སོགས་པ་བསྒྲང་ཞིང་། ལུས་ངག་ཡིད་གསུམ་གྱི་སྡིག་སྒྲིབ་དག་པར་བསམ་ཞིང་། མཐར་མགོན་པོ་བདག་ནི་མི་ཤེས་རྨོངས་པ་ཏེ། ཞེས་པའི་བཞགས་དེ་བྱས་ལ། རྡོ་རྗེ་སེམས་དཔའ་འོད་དུ་ཞུ་ནས་རང་ལ་ཐིམ་པས་རང་དང་རྡོ་རྗེ་སེམས་དཔའ་གཉིས་དབྱེར་མེད་དུ་གྱུར་པར་བསམ།
།མཎྜལ་འབུལ་བ་ནི། སྒྲུབ་པའི་མཎྜལ་སྐྱབས་འགྲོའི་སྐྱབས་ཡུལ་དང་འདྲ་ལ། མཆོད་པའི་མཎྜལ་ནི། བཀོད་པ་ཤིན་དུ་ལེགས་པའི་མཎྜལ་མཆོག །ཞེས་སོགས་འབུལ།
བླ་མའི་རྣལ་འབྱོར་ནི། རང་ཉིད་ཡིད་དམ་དུ་གསལ་བའི། སྤྱི་བོར་སེང་གེ་བཞིས་བཏེག་པའི་རིན་པོ་ཆེའི་ཁྲི་ཡངས་ཤིང་རྒྱ་ཆེ་བའི་སྟེང་དུ། པཾ་ལས་པདྨ། རཾ་ལས་ཉི་མ། ཨཱ་ལས་ཟླ་བའི་བཏེང་དུ་ངོ་བོ་རྩ་བའི་བླ་མ་ལ། རྣམ་པ་རྡོ་རྗེ་འཆང་སྐུ་མདོག་སྔོན་པོ་ཞལ་གཅིག་ཕྱག་གཉིས་པ། གཡས་རྡོ་རྗེ་དང་གཡོན་དྲིལ་བུ་འཛིན་པས་ཡུམ་ལ་མཁྱུད་པ། ཡུམ་རྡོ་རྗེ་ཕག་མོ་སྐུ་མདོག་དམར་མོ་གྲི་གུག་དང་ཐོད་པ་འཛིན་པས་ཡབ་ལ་མཁྱུད་པ། གཉིས་ཀའང་མཚན་བཟང་པོ་སུམ་བཅུ་རྩ་གཉིས་དང་། དཔེ་བྱད་བཟང་པོ་བརྒྱ་བཅུས་སྤྲས་ཞིང་། ལྟ་བས་མཆོག་མི་ཤེས་པའི་སྐུ་ལ། རུས་པ་དང་རིན་པོ་ཆེའི་བརྒྱན་པར་སྒོམ། དེའི་དཔྲལ་བར་ཨོཾ་དཀར་པོ། མགྲིན་པར་ཨཱ་དམར་པོ། ཐུགས་ཁར་ཧཱུྃ་སྔོན་པོ། ཧཱུྃ་ལས་འོད་འཕྲོས། ཆོས་འབྲེལ་ཡོད་ཚད་ཀྱི་བླ་མ་དང་། རྒྱུད་པའི་བླ་མ། ཡི་དམ་ལྷ་ཚོགས། སངས་རྒྱས་བྱང་སེམས། དཔའ་བོ་མཁའ་འགྲོ། ཆོས་སྐྱོང་བསྲུངས་མའི་ཚོགས་དང་བཅས་པ་སྤྱན་དྲངས་ལ་བླ་མ་ལ་སྟིམ། བླ་མ་ཀུན་འདུས་པའི་བདག་ཉིད་དུ་ལྟས་ལ། ཨརྒཾ་ལ་སོགས་པས་མཆོད་ནས། ཡིད་རྩེ་གཅིག་ཏུ་རྒྱུད་པའི་གསོལ་བ་བཏབ་རྗེས།
དབང་བླང་བ་ནི། བླ་མའི་དཔྲལ་བའི་ཨོཾ་ལས་འོད་ཟེར་དཀར་པོ་བྱུང་། རང་གི་དཔྲལ་བར་ཐིམ། ལུས་ཀྱི་སྡིག་སྒྲིབ་དག སྐུའི་བྱིན་བརླབས་ཞུགས། བུམ་པའི་དབང་ཐོབ། མགྲིན་པའི་ཨཱ་ལས་འོད་ཟེར་དམར་པོ་བྱུང༌། རང་གི་མགྲིན་པར་ཐིམ། ངག་གི་སྡིག་སྒྲིབ་དག གསུང་གི་བྱིན་བརླབས་ཞུགས། བསང་བའི་དབང་ཐོབ། ཐུགས་ཁའི་ཧཱུྃ་ལས་འོད་ཟེར་སྔོན་པོ་བྱུང༌། རང་གི་སྙིང་ཁར་ཐིམ། ཡིད་ཀྱི་སྡིག་སྒྲིབ་དག །ཐུགས་ཀྱི་བྱིན་བརླབས་ཞུགས། ཤེས་རབ་ཡེ་ཤེས་ཀྱི་དབང་ཐོབ། བླ་མའི་གནས་གསུམ་ནས་འོད་ཟེར་དཀར་དམར་མཐིང་གསུམ་བྱུང༌། རང་གི་གནས་གསུམ་དུ་ཐིམ། ལུས་ངག་ཡིད་གསུམ་གྱི་སྡིག་སྒྲིབ་དག །སྐུ་གསུང་ཐུགས་ཀྱི་བྱིན་བརླབས་ཞུགས། ཚིག་དབང་རིན་པོ་ཆེ་བཞི་པ་ཐོབ། མཐར་བླ་མ་ཡབ་ཡུམ་འོད་དུ་ཞུ་ནས་རང་ལ་ཐིམ་པས། རང་གི་ལུས་ངག་ཡིད་གསུམ་དང་། བླ་མའི་སྐུ་གསུང་ཐུགས་དབྱེར་མེད་དུ་གྱུར་པའི་ངང་དུ་མཉམ་པར་བཞག་གོ
།ཁྱད་པར་གྱི་སྔོན་འགྲོ་ནི། དག་བྱེད་ཨའི་སྟོང་ར། སྟོང་ར་ནད་གདོན་སེལ་བྱེད། རྟགས་གསུམ་སྟོང་རའི་ཁྱད་པར་རྣམས། ཆོས་དྲུག་གི་འཁྲིད་ཡིག་ཏུ་ལྟའོ། །དགེའོ།། །།