Yid bzhin nor bu'i gter bum bca' ba'i gdams pa zab mo

Resource ID	Gönkar13
Title	yid bzhin nor bu'i gter bum bca' ba'i gdams pa zab mo
Topics	White protector
Sub-Topics	Treasure vase
Link	BDRC W23681 (p. 244)
Notes	Same text as gsan yig tu gong gi sbyin sreg shog gcig ma dang 'di gnyis tshan pa gcig tu mdzad pa ltar 'dir yang sbyar

༄༅། །ཡིད་བཞིན་ནོར་བུའི་གཏེར་བུམ་བཅའ་བའི་གདམས་པ་ཟབ་མོ་བཞུགས།

ན་མོ་གུ་རུ།
ཆོས་སྐྱོང་གི་བུམ་པ་བཅའ་བའི་ཐབས་ནི།
དང་པོ་བུམ་པ་སོ་བཏང་བ། མ་སྤྱད་པ། ཚད་བྲེ་གང་ཤོང་བ་ཡན་ཆོད། མགྲིན་པར་བཀྲ་ཤིས་རྫས་བརྒྱད་བྲིས་པའི་ནང་དུ། ཆོས་སྐྱོང་གི་སྐུ་གཟུགས་དང༌། རྩ་བའི་སྔགས་སིདྡྷི་མའི་མཇུག །འདོད་པའི་དོན་ཞུ་བའི་ཚིག །རྟེན་འདི་ལ་གནས་པར་མཛད་དུ་གསོལ། གནས་འདིར་སྐྱེ་བོ་ཐམས་ཅད་གུས་པས་འདུ་ཞིང་འབྱོར་པ་ཐམས་ཅད་ཆུ་བོའི་ཚོགས་བཞིན་འདུ་བར་མཛད་དུ་གསོལ།
ཞེས་པ་དང༌། སྲུངས་ཤིག་ལ་སོགས་པ་བཏགས་ལ་དེ་འདྲ་བ་མཐིང་ཤོག་ལ་གསེར་གྱིས་བྲིས་པ་དང༌། ག་བུར་དང༌། བུ་རམ་དང༌། ཙནྡན་དམར་པོ། རང་བྱུང༌། གི་ཧམ་ལ་སོགས་པས་བྲིས་པ་ཕྱོགས་བཞི་ནས་དབུས་ཀྱི་སྐུ་གཟུགས་ལ་ཁ་བསྟན་ཏེ་བཞག །སྐུ་རབ་གནས་ལེགས་པར་བྱས་པའི་ཞལ་བུམ་པའི་མཆུ་ལ་བསྟན། བུམ་རྫས་རིན་པོ་ཆེ་སྣ་ཚོགས་པ་དང༌། སྨན་སྣ་ཚོགས་པ་དང༌། འབྲུ་སྣ་ཚོགས་པ་དང༌། དར་ཟབ་སྣ་ཚོགས་དང༌། མངར་གསུམ་ལ་སོགས་པའི་ཟས་སྣ་ཚོགས་པ་དང༌། མགོན་པོའི་དམ་རྫས་སྣ་ཚོགས་བཅུག་ལ་ཁེངས་པར་དགང༌། ལུག་དར་མའི་སོག་པ་གཡས་པའི་བལ་རྩི་མེད་པས་ཁ་བཅད། དེའི་སྟེང་དུ་མཐིང་ཤོག་ལ་གསེར་གྱི་རྡོ་རྗེ་རྒྱ་གྲམ་བྲིས་པས་ཁ་བཅད། དེ་ནས་ཚོན་སྣ་ལྔའི་སྐུད་པས་མགུལ་པ་བཅིངས་ལ། དེའི་རྗེས་ཁའི་སྟེང་ནས་རྒྱ་གྲམ་དུ་བཅིང་ངོ༌།
།དེ་ནས་རང་གི་གནས་ཁང་གི་མཛོད་དམ། དགེ་འདུན་གྱི་གཙུག་ལག་ཁང་གི་ཁྱམས་ཀྱི་ནང་ལ་སོགས་པའི་གྱང་ལ་སོགས་ལ། ཐོག་མཚམས་ལས་ཅུང་ཟད་དམའ་བར་ཁུང་བུ་གྲུ་བཞི་པ། དཔངས་སུ་ཁྲུ་གང་བ་བྱས་པའི་ནང་ལ་ཞལ་ཞལ་ལེགས་པོ་བྱ། མཚལ་གྱིས་བྱུག །སིནྡྷུ་རེའི་གཡུང་དྲུང་རིས་ཕྱོགས་བཞིར་བྲི། དེའི་ནང་དུ་མཐིང་ཤོག་ལ་གསེར་གྱི་པདྨ་འདབ་བརྒྱད་བྲིས་པ་གདིང༌། དེའི་སྟེང་དུ་བུམ་པ་དར་སྣ་ལྔའི་ཚོན་སྐུད་སྣ་ལྔས་རྒྱ་གྲམ་དུ་བཅིངས་ནས། ཞལ་ཁང་པའི་ཕུགས་སམ་གཙང་ཁང་སོགས་ལ་བསྟན་ལ་བཞག །དེའི་སྟེང་ནས་དར་གྱི་གུར་དབུབ། མདུན་གྱི་མར་གྱི་གཏོར་མ་ནོར་བུས་བརྒྱན་པ་བཞག །རང་ཡི་དམ་དུ་གསལ་བའི་ཐུགས་ཀ་ནས་འོད་འཕྲོས་པས་ལྷོ་ཕྱོགས་བསིལ་བའི་ཚལ་ནས་མགོན་པོ་སྤྱན་དྲངས་ནས་བུམ་པའི་ནང་དུ་ཐིམ་པ་དང༌། གསོལ་བ་བཏབ་ནས་བརྟན་པར་བཞུགས་པ་ལན་བརྒྱ་རྩ་བརྒྱད་དམ། ལྔ་བཅུའམ་ཉེར་གཅིག་བྱ། མཆོད་བསྟོད་གཏོར་མ་དབུལ། རང་དང་བུམ་ནང་གི་མགོན་པོའི་ཐུགས་ཀའི་མཁའ་འགྲོ་མ་ལས་དེ་འདྲ་བ་དཔག་ཏུ་མེད་པ་འཕྲོས་པས་ལྷོ་ཕྱོགས་བསིལ་བའི་ཚལ་ནས་ལྷ་དང་མིའི་རིན་པོ་ཆེ་དང༌། འབྱོར་པའི་ཁྱད་པར་ཅི་ཡོད་པ་བཀུག་སྟེ། བུམ་པའི་ནང་གི་རིན་པོ་ཆེ་ལ་སོགས་པ་རྣམས་ལ་ཐིམ་པ་ཡང་ཡང་བསྒོམས་ནས་བུམ་པའི་མགུལ་པ་ལ་གཟུངས་ཐག་བཏགས་ནས་བཟུང་སྟེ། རྩ་སྔགས་སིདྡྷི་མ་སྟོང་རྩ་བཟླ། བུམ་པའི་ནང་གི་ནོར་ཟས་རྣམས་ལུད། མགོན་པོའི་ཕྱག་གི་བུམ་པ་དང་ཐོད་པ་ནས་ཀྱང་ལུད། ནེའུ་ལེ་དང་ཚོགས་བདག་གི་ཁ་བཤང་ནས་ཀྱང་རིན་པོ་ཆེ་ལྷུག་ལྷུག་ལུད་ནས། གནས་ཁང་དང་གཙུག་ལག་ཁང་ལ་སོགས་པའི་ནང་ཐམས་ཅད་སྤྱད་པས་ཟད་མི་ཤེས་པ་ཙམ་དུ་ཁེངས་པར་བསམས་པ་བཀྲ་ཤིས་བྱ། བུམ་པ་གཏོར་མ་དང་བཅས་པ་མི་བསྒུལ། འདག་པའི་ས་གྲུ་བཞི་ལ་གཡུང་དྲུང་རིས་བྲིས་པས་ཁ་བཅད། ཕྱི་ནས་ཞལ་ཞལ་བྱས་ཏེ་མི་མངོན་པར་བྱ། དེ་ལྟར་བྱས་ན་གནས་དེར་འབྱོར་པ་ཟད་མི་ཤེས་པ་འབྱུང་སྟེ། ཐུན་མོང་མ་ཡིན་པའི་མན་ངག་ཟབ་པ་ཡིན་ཅིང༌། ཞལ་ཤེས་རྣམས་ཀྱང་ཡི་གེར་བཀོད་པ་ཡིན་པས། དཔེ་གཞན་ལ་མི་བསྟན་པར་ཆེས་ཆེར་གདམས་པར་བྱ། ས་མ་ཡ་རྒྱ་རྒྱ།།