Zhus len gegs sel rin chen sgron me

Resource ID	SCv8p691
Title	zhus len gegs sel rin chen sgron me
Topics	Six doctrines of Niguma
Sub-Topics	Instructions
Author	Sangyé Tönpa
Associated Person	Sangyé Nyentön
Link	BDRC W23922 BDRC W23922 BUDA MW2PD20238 (p.558) BDRC W3CN766 BDRC W3CN18508 (v2p.498) BDRC W4CZ58783 (v1p.146 alt. version) BDRC W22103 (p.304 alt. version)

༄༅། །༼ཞུས་ལེན་༽གེགས་སེལ་རིན་ཆེན་སྒྲོན་མེ།།

དུས་གསུམ་ཤེས་བྱའི་དཀྱིལ་འཁོར་མ་ལུས་ཀུན། །སྒྲིབ་པ་མེད་པར་ཐམས་ཅད་མཁྱེན་གྱུར་པའི། །བདེ་སྟོང་དབྱེར་མེད་འོད་གསལ་འདུས་མ་བྱས། །སངས་རྒྱས་གཉན་སྟོན་རིན་ཆེན་ཞབས་ལ་འདུད། །དལ་འབྱོར་རྙེད་དཀའ་དོན་ཡོད་བྱེད་པ་ལ། །བརྩེ་ཆེན་ཁྱོད་མིན་སྐྱབས་མགོན་མ་མཆིས་པས། །དུས་འདིར་བྱང་ཆུབ་ཐོབ་ཕྱིར་ཞུ་བའི་དོན། །འདི་རྣམས་གཞན་ལ་ཕན་ཕྱིར་བཀའ་སྩལ་འཚལ། །ཉིན་པར་དུས་སུ་སྒྱུ་མ་རང་ཤར་༼དུ་བྱུང་བ་༽དེ། །དམིགས་པ་གང་ལ་བརྟེན་ནས་འབྱུང་བ་༼ཞེས་ཞུས་པ་ལ།༽ལགས།
༈ ཆོས་རྗེའི་ཞལ་ནས། ལྟེ་འོག་ཏུ་ཆོས་འབྱུང་༼གི་ནང་འགྲོ་དྲུག་གིས་སེམས་ཅན།༽བསྒོམས་པས་སྒྱུ་མ་རང་ཤར་དུ་འབྱུང་སྟེ། དེ་བས་ཀྱང་བླ་མའི་མོས་གུས་༼ཐུན་མོང་མ་ཡིན་པ་༽གནད་དུ་ཆེ་གསུང་ངོ་། རྨི་ལམ་འཛིན་༼ཧཱུྃ་དང་བླ་མ་དང་ཐིག་ལེར་བཅས་ནས་འཛིན་པ་སོགས།༽ཐབས་མང་པོ་གསུངས་མོད་ཀྱང་། དེ་རྣམས་ཀྱི་ནང་ནས་གང་ལ་ཟབ་པར་བགྱིས། བླ་མ་སངས་རྒྱས་ཀྱི་ཞལ་ནས།༼སྤྱི་བོ་ནས་ཐིག་ལེ་དཀར་བ་ཆད།༽སྙིང་ཁར་༼གསང་གནས་ནས་དམར་བ་ཚད།༽ཐིག་ལེ་འཁོར་བ་དང་དྲན་འདུན་དྲག་ལ་ཡུན་རིང་བར་བྱས་པ་གཉིས་ཀྱིས་ཐེ་ཚོམ་མེད་པར་ཟིན་གསུང་ངོ་།
།རྨི་ལམ་ཟིན་ནས་རླུང་ནི་རོ་སྟོད་འཚངས། སད་༼གཉིད།༽འབྱམས་བྱུང་ན་དེ་ལ་ཇི་ལྟར་བྱ།
བླ་མ་རིན་པོ་ཆེའི་ཞལ་སྔ་ནས། དེའི་དུས་སུ་༼ལྟེ་འོག་ཏུ་རྗེ་བཙུན་མ་བསྒོམ་པའམ།༽འོག་རླུང་ཡར་ལ་དྲག་ཏུ་ཐེན་ནས། མིག་མི་འབྱེད་༼སྒྱུ་མ་ཡིན་རྨི་ལམ་ཡིན་སྙམ་པའི།༽པར་དྲན་འདུན་དྲག་ཏུ་བཏང་བས་རྨི་ལམ་འཁོར་མར་༼ཐེ་མི་ཚོམ་པར།༽ཟིན་གསུང་འཁོར་བར་བཟློག་པར་བྱེད་པའི་དུས་ཚོད་དེ། ༼སྐྱེས་པའི།༽དགེ་སྦྱོར་གང་གི་དུས་སུ་འབྱུང་བ་ལགས།
༈ མཚུངས་མེད་བླ་མའི་ཞལ་སྔ་ནས། སྤྱིར་ལས་དང་པོ་ནས་ཆོས་མཆོག་མན་ཆད་དུ། འཁོར་བར་བཟློག་པའི་དུས་དང་ཡེ་ཤེས་ཀྱིས་སླེབ་པའི་ཚད་གཉིས་ཀ་ཆ་འཐུན་རེ་བཙིར་ཡོད་ལ། ཁྱད་པར་དུ་འཁོར་བར་བཟློག་པའི་དུས་ནི།༼སྒྱུ་མའི་མཐར་ཐུག་མ་རྟོགས་པའི་༽སྣང་བ་མི་བདེན་པར་བུན་ལོང་ལོང་འོར་བ་དེ་ཡིན། འཁོར་བར་བཟློག་པར་བྱེད་པ་ནི། འདོད་ཆགས་ཞེ་སྡང་ལ་སོགས་པའི་ཉོན་མོངས་པ་དྲག་པོ་བཟོད་ཐབས་མེད་པ་སྐྱེད་པ་དེ་ཡིན་པས། །དེའི་དུས་སུ། ཨ་ཙ་མ། འདི་རྣམས་ཐམས་ཅད་རྨི་ལམ་ཡིན། སྒྱུ་མ་ཡིན་སྙམ་པའི་དྲན་འདུན་དྲག་པོ་ལ་བརྟེན་ནས། ཉོན་མོངས་པ་རང་གྲོལ་དུ་སོང་བ་དེ། ཡེ་ཤེས་ཀྱི་སླེབ་པའི་ཚད་ཡིན་ནོ། །དེ་ཡང་སྣང་བ་མི་བདེན་པར་ཤེས་པའི་དུས་དེར། སྔོན་གྱི་ལས་ངན་ཐམས་ཅད་སློངས་ནས། ནད་དྲག་པོ་དང་། གཞི་མེད་ཀྱི་བསྐུར་པ་ལ་སོགས་པའི་གཏམ་ངན་སྣ་ཚོགས་འོང་བས། ༼ལྡིག་སྒྲིབ་དག་པ་ཡིན་པས།༽དེ་ལ་དགའ་བ་བསྒོམ་ཞིང་སྒྱུ་མ་རྨི་ལམ་དུ་ཁྱེར་བས། ནད་གདོན་དང་གཏམ་ངན་༼མྱུར་དུ་༽ཐམས་ཅད་རང་སར་དག་ནས། ༼ལྷ་མི་ཐམས་ཅད་ཀྱི་༽མཆོད་པའི་གནས་སུ་འགྱུར་རོ། །དེ་ཡང་དགེ་སྦྱོར་བ་ཀུན་འདིའི་དུས་སུ་བཟློག་པ་མང་དུ་འབྱུང་བས་རང་སྣང་སྒྱུ་མར་ཆོད་པ་གལ་ཆེ་བར་འདུག་གསུང་ངོ་།
།བསྐྱེད་རིམ་༼དང་།༽མི་རྟོག་༼པ་བསྒོམ་པ་དང་།༽དྲན་འདུན་༼སྒྱུ་མ་རྨི་ལམ་གྱི།༽གསུམ། རྨི་ལམ་མྱུར་དུ་གང་གི་འབྱོངས་པར་བྱེད།།
༈ དཔལ་ལྡན་བླ་མའི་ཞལ་སྔ་ནས། དེ་རྣམས་གང་བས་ཀྱང་སྣང་གྲགས་དང་དྲན་རྟོག་ཐམས་ཅད་སྒྱུ་མ་རྨི་ལམ་དུ་མ་ཡེངས་པར་བྱས་པས། རྨི་ལམ་མྱུར་དུ་འབྱོངས་ཏེ་འདུན་པའི་གནད་ཡིན་པའི་གསུང་ངོ་།
།རྩ་རླུང་༼བསྒོམ་པ།༽བླ་མ་༼ལ་གསོལ་བ་འདེབས་པ།༽ལྟེ་བར་ཐོད་པ་༼འདི་ནང་དུ་བདག་མེད་མ།༽བསྒོམ་པ། ཡུལ་སྣང་མྱུར་དུ་གང་གི་གཏན་ལ་འབེབས།
དཔལ་ལྡན་བླ་མའི་ཞལ་སྔ་ནས། ཡུལ་སྣང་ཨེན་ཙམ་༼རླུང་གི་འབྲེལ་ཐག་མ་ཆད་པར་བསྒོམ་པ་ལ་སོགས་པས།༽ལྟ་གང་གིས་ཀྱང་མཐོང་ སྟེ། སངས་རྒྱས་ཀྱི་ཞིང་ཁམས་བལྟ་བ་༼ཆོས་ཞུ་བ་༽ལ་སོགས་པ་འབྱུང་བ་སྟེ། ལྟེ་འོག་ཏུ་ཨ་གསལ་ལ་ཡུན་རིང་དུ་༼འཇིག་རྟེན་གྱི་ཁམས་དང་ལུས་ཀྱི།༽བསྒོམ་པས། ཕྱི་ནང་ཇེ་གསལ་ཇེ་གསལ་ལ་ཡུལ་སྣང་ཐམས་ཅད་ཇི་ལྟ་བ་བཞིན་གཏན་ལ་ཕེབས་གསུང་ངོ་།
༼སྤྱིར།༽རྨི་ལམ་འབྱོངས་ན་འོད་གསལ་རྟོགས་མོད་ཀྱིས། འོན་ཀྱང་བླ་མ་༼འི་འོད་གསལ་དང་། བདག་མེད་མ་སྤྱི་བོར་བསྒོམ་པས།༽ལ་སོགས་གང་ལ་བགྱི།
མཉམ་མེད་རིན་ཆེན་ཞལ་སྔ་ནས། དམིགས་པ་དེ་རྣམས་གང་གིས་ཀྱང་འོད་གསལ་རྟོག །མོད་ཀྱིས། ༼དེ་རྣམས་ལས་ཀྱང་།༽གསང་གནས་སུ་༼གོང་བཞིན་དུ།༽ཨ་བསྒོམས་པས་ཐེ་ཚོམ་མེད་པར་རྟོགས་པ་ཡིན་ནོ། །མདོར་ན་སྒྱུ་མ་རང་ཤར་དང་། རྨི་ལམ་ཁོར་མར་ཟིན་པ་དང་། ཡུལ་སྣང་གཏན་ལ་ཕེབས་ཤིང་འོད་གསལ་རྟོགས་པ་ལ་སོགས་པ་ཐམས་ཅད་ལ།༼སྤྱོད་ལམ་ཐམས་ཅད་དུ།༽ བླ་མ་ལ་མོས་གུས་གནད་དུ་མ་སོང་ན་དམིགས་པས་མཐར་ཐུག་སྐྱེ་དཀའ་བས། བླ་མ་ལ་སྙིང་ཁོང་རུས་པའི་གཏིང་ནས་མོས་གུས་མ་ཡེངས་པར་བགྱིས་དང་༼ལོ་ཟླ་ཙམ་གྱི་༽ཉམས་རྟོགས་མཐར་ཕྱིན་པར་འདུག་ངེས་ཀྱི་གསུང་ངོ་།
།ཉམས་༼ཀྱི་འོད་གསལ།༽དང་རྟོགས་པའི་འོད་གསལ་ལ་གཉིས་ཀྱི་ཁྱད་པར་གང་༼ལགས་༽། གཉིད་སོང་༼བ་དང་།༽མ་སོང་༼བའི་འོད་གསལ་གྱི་༽ཡོན་ཏན་ཁྱད་པར་ཅི༼ལགས་ཞུས་པས།༽།
འགྲོ་མགོན་བླ་མའི་ཞལ་སྔ་ནས། རྟོགས་པའི་འོད་གསལ་དེ་རྩ་མདུད་གཅིག་གྲོལ་བ་ལ་བརྟེན་ནས་གསལ་སྟོང་གཉིས་སུ་མེད་པར་རྟོགས་ཏེ། དུས་གསུམ་སངས་རྒྱས་བྱོན་ནས་འདི་ཀར་འདུག་སྙམ་ནས། ཁོ་ཐག་ཆོད་ཅིང་ངེས་ཤེས་ལྷག་སྐྱེས་པ་༼རྟོགས་པའི་འོད་གསལ།༽དེ་ཡིན་ལ། ཉམས་ནི་ཐག་མ་ཆོད་ཅིང་གསལ་བ་ཙམ་མམ་ཡང་ན་གཉིད་དུ་སོང་བྱས་པས་མདུན་གྱི་བྱ་བྱེད་ཐམས་ཅད་མཐོང་ལ། མ་སོང་བྱས་པས་གཉིད་སད་རྒྱུ་ཡོད་པ་གཅིག་འོང་སྟེ་ཡལ་ཅིང་ཞིག་ནས་འགྲོ་བས་ན་ཉམས་སོ།
།མདོར་ན་ཉམས་རྟོགས་གང་ཡིན་ཡང་གཉིད་དེ་སྟོབས་ཆེ་གསུང་།
མདུན་དང་རང་ལུས་༼དང་༽བར་སྣང་༼དང་༽སྤྱི་གཙུག་བཞིར། ༼ལྷ་སྐུ།༽གང་དུ་བསྒོམ་པས་ལྷ་༼རྨི་ལམ་དུ།༽སྐུ་རང་ཤར་༼དུ་བ་ལགས་༽འབྱུང་།
།བདེ་སྐྱིད་འབྱུང་བས་བླ་མའི་ཞལ་སྔ་ནས། །སྤྱིར་གང་དུ་གསལ་ཀྱང་མཆོག་སྟེ། ཁྱད་པར་དུ་རང་ལུས་དང་སྣང་བ་ཐམས་ཅད་ལྷར་བསྒོམ་ཞིང་གསལ་བ་ལས་༼བག་ཆགས་དུས་སུ་ལྷ་སྐུ།༽འབྱུང་གསུང་ངོ་།
བསྐྱེད་རིམ་ཐུན་གྲངས་མང་པོར་གསལ་བ་དང་། གཅིག་ལ་གསལ་བ་༼ཡུན་རིང་ཐུང་མཉམ་པའི་སྒོ་ནས།༽ཡོན་ཏན་གང་ཆེ་ལགས།
བདེ་ཆེན་རྒྱལ་པོ་བླ་མའི་ཞལ་སྔ་ནས། དཀྱིལ་འཁོར་ཡོངས་སུ་རྫོགས་པ་དང་ཐུན་གྲངས་མང་པོར་གསལ་བ་ལ་དགའ་བར་འདོད་པ་ཡང་ཡོད་དེ། དེ་བས་ཀྱང་གཅིག་རང་ལ་ཉམས་ལེན་བྱས་པ་དེ་མྱུར་དུ་གྲུབ་ནས་ཐམས་ཅད་ཀྱིས་ཡོན་ཏན་འཆར་ཏེ། གཅིག་ཤེས་ཀུན་ལ་མཁས་པར་འབྱུང་གསུང་ངོ་།
།བསྐྱེད་རིམ་བཟླས་༼པ་དང་བཅས་པ།༽དང་སྦྱིན་བསྲེག་༼བྱེད་པ་དང་།༽མི་རྟོག་༼པ།༽བསྒོམ༼པ།༽། །སྡིག་སྒྲིབ་མྱུར་༼དུ།༽མཛད་༼ཅིང་།༽ཡི་དམ་གང་གིས་མཐོང་༼བ་ལགས༽།
།འཇིགརྟེན་གསུམ་མགོན་བླ་མའི་ཞལ་སྔ་ནས། །དེ་རྣམས་ཀྱི་ཞལ་འཇུག་ཏུ་མཐོང་སྟེ། མྱུར་དུ་མཐོང་བར་བྱེད་ན་མི་རྟག་པ་གསུམ་ལ། ལྷ་སྐུ་སྣང་ལ་རང་བཞིན་མ་གྲུབ་པ་ལ་རྟོག་མེད་དུས་ཡེངས་པར་བཞག །དེས་སྡིག་སྒྲིབ་མྱུར་དུ་ཟད་ནས་ཡི་དམ་ལོ་ཟླ་ཙམ་གྱིས་མཐོང་བར་འགྱུར་གསུང་ངོ་།
ཡི་དམ་ལྷ་ནི་དངོས་ཀྱི་ཞལ་མཐོང་དང་། ཉམས་སྣང་༼དང་༽མཐོང་སྣང་༼གཉིས་ཀྱི།༽ཁྱད་པར་གང་གིས་འབྱེད།
ཀུན་མཁྱེན་བླ་མའི་ཞལ་སྔ་ནས། །ཡི་དམ་དངོས་དེ་སྣང་སྟོང་ཞེས་བྲལ་མཁྱེན་པའི་ཡེ་ཤེས་དང་ལྡན་ཞིང་། རང་གི་རྒྱུད་ལ་ཡོན་ཏན་དང་ངེས་ཤེས་གཤའ་མར་སྐྱེ་བ་གཅིག་ཏུ་འཆར་ལ། དེ་མི་གཉིས་ནི་གོང་དང་མི་འདྲ་བར་ཁོ་ཐག་མཆོདཅིང་། གསལ་བ་དེ་ཡང་འོད་གསལ་ཙམ་དུ་འཆར་དོ། །དེ་ཡང་ཡི་དམ་དངོས་ལ་མཐོང་ལུགས་གསུམ་དུ་འབྱུང་སྟེ། ཐ་མས་ཞལ་མཐོང་ཙམ། འབྲིང་གིས་གཏམ་འདྲེས་པ། རབ་ལ་མཆོག་ཐུན་མོང་གིས་དངོས་གྲུབ་ཐམས་ཅད་ལྟེར་བར་བྱེད་དོ། །དེ་ལ་བླ་མ་དམ་པ་མཚན་ཉིད་དང་ལྡན་པས་མ་ཟིན་ཅིང་། སྒྲོ་འདོགས་མ་ཆོད་པར་ཉམས་ལེན་བྱས་པ་ལ་འདྲེ་དང་ཉམས་སྣང་ལ་སོགས་པ་ཐམས་ཅད་ཡི་དམ་དུ་བྱེད་དོ། ཡི་དམ་དངོས་མཐོང་ནས་འདུག་སྙམ་པ་རང་ཡང་ལེན་བརྒྱར་འཆར་བས་གོང་གི་གནད་དེ་གལ་ཆེ་གསུང་ངོ་།
།ཡི་དམ་ཌཱ་ཀིའི་ལུང་བསྟན་དངོས་གྲུབ་དང་། བདུད་ཀྱི་བར་ཆད་༼གཉིས་ཀྱི་༽ཁྱད་པར་ཇི་ལྟར་འབྱུང་༼བ་ལགས་ཞེས་པ།༽།
རྐང་གཉིས་གཙོ་བོའི་ཞལ་སྔ་ནས། དངོས་གྲུབ་ལུང་བསྟན་དངོས་ནི་གོང་བཞིན་འབྱུང་ལ། བདུད་ནི་དང་པོ་དགའ་བར་འདྲ་བར་འདུག་ཀྱང་། ཕྱི་ནང་དུ་ཡོན་ཏན་མི་འཆར་ཞིང་། རྗེས་ཤེས་སྙིང་མི་དགའ་བ་འགྱུར་གསུང་།
ཉམས་ལེན་བྱེད་པའི་གང་ཟག་དག་ལ་ནི། བདུད་ཀྱི་བར་ཆད་བྱུང་ན་ཇི་ལྟར་བསལ།
བདུད་དཔུང་འཇམས་མཛད་བླ་མའི་ཞལ་སྔ་ནས། བསླུ་༼རློམ་སེམས་བསྐྱེད་པའི་ཕྱིར།༽བྲིད་ལུང་བསྟན་ལ་སོགས་པའི་དགའ་བ་སྣ་ཚོགས་དང་། ༼བར་བྱ་ཞེས་བུས་པས་༽ ༼གཟུགས་༽མི་སྡུག་༼སྒྲ་མི་སྙན་པ་སོགས་༽པའི་མཐོ་འཚམ་ཅི་བྱུང་ཡང་། དེར་འཛིན་པ་མེད་པར་ཐམས་ཅད་བདེན་མེད་དུ་འཁྱེར་བས་བདུད་ཀྱི་བར་ཆད་ཡོན་ཏན་གྱི་ཚོགས་སུ་འཆར་རོ། །བདུད་པས་ཡི་དམ་༼གྱི་ལྟ་༽མཐོང་པ་ལ་ཡང་ཆགས་ན་འཆིང་པས་བཟང་ངན་གྱི་བློ་ཐམས་ཅད་སྤོང་དགོས་གསུང་།
ཉོན་མོངས་དུང་ལྔའི་རྟོག་པ་སྐྱེས་ཚད་ལ། སྨིན་དཀའ་བཙལ་ན་ཐམས་ཅད་མཁྱེན་༼པ་༽མི་འབྱུང་༼བས་༽། ༼འོ་ན་༽ནང་དུ་ཉམས་དང་རྟོགས་པ་གང་སྐྱེས་༼པའི་༽ཚད་དེ། ཕྱི་རོལ་༼དུ་༽སྨིན་དཀའ་འཚོལ་བའི་དུས་གནད་ལགས།
བླ་མ་རིན་པོ་ཆེའི་ཞལ་ནས། སྤྱིར་གོང་བཞིན་དུ་སྒྱུ་མ་མཐར་ཐུག་མ་གཏོགས་པའི་སྣང་བ་བདེན་མེད་དུ་བུན་ནེ་སོང་བའི་དུས་སུ་དེ་ཡིན་ལ། ཁྱད་པར་དུ་བཟང་ངན་གྱི་རྟོག་པ་མ་བསམ་པར་བཟང་ངན་དུ་ཐོལ་ཐོལ་༼ནོར་ལ་སོགས་པ་ལ།༽རང་ཤར་དུ་བྱུང་བ་དེ་དང་གང་ཤར་བ་དེ་ལ་འདུན་པ་དྲག་པོ་སོང་བ་གཉིས་ཀྱི་སྟོབས་ཀྱིས་སྨིན་དཀའ་འཚོལ་བས། དེའི་དུས་སུ་ཐམས་ཅད་མཁྱེན་༼ཡོད་ན་དགའ་བ་སྙམ་པའི་༽པ་མ་གཏོགས་པ་གང་ཡང་ཡིད་ལ་བྱར་མི་གཏུབ་གསུང་།
རྨི་ལམ་དུས་ཀྱི་ལྷ་སྐུ་རང་ཤར་དང་། མཐར་ཐུག་གཉིས་ལ་ཁྱད་པར་ཅི་ཞིག་༼ཅེས་ཞུས་པས།༽བདོག
།དཔལ་ལྡན་བླ་མའི་ཞལ་སྔ་ནས། རྨི་ལམ་དུས་ཀྱི་ལྷ་སྐུ་རང་ཤར་དེ་དང་། མཐར་ཐུག་ལོངས་སྤྱོད་རྫོགས་པའི་སྐུ་གཉིས་ལ་ངོ་བོའི་སྒོ་ནས་ཁྱད་པར་གཅིག་ཀྱང་མི་འདུག་གསུང་ངོ་། ༼གཞན་ལ་༽ཉམས་མྱོང་བརྗོད་དང་གཞན་དོན་བྱེད་པ་ནི། དགེ་སྦྱོར་གང་གི་དུས་སུ་བྱས་པས་ཆོག །ཅེས་ཞུས་པས།
འགྲོ་མགོན་རིན་པོ་ཆེའི་ཞལ་སྔ་ནས། ཉམས་མྱོང་བཤད་ཀྱང་རང་གིས་མི་འགྲུབ་ཅིང་གཞན་ལ་ཕན་པའི་དུས་སུ་ནམ་སོང་བ་དང་གཞན་ལ་བརྗོད་ཀྱི། དེ་མ་གཏོགས་པ་གསང་བ་གལ་ཆེ།
གཞན་དོན་ཀྱང་རང་གི་དགེ་སྦྱོར་ལ་མི་གནོད་ཅིང་། དེ་ཡར་ལྡན་དུ་སོང་ནས། ལུས་ངག་ཡིད་གསུམ་གྱི་ཅི་བྱས་ཐམས་ཅད་ལ་གཞན་དག་ནམས་དག་སྣང་འབའ་ཞིག་ཤར་ཏེ། སེམས་ཅན་སྨིན་ཅིང་གྲོལ་བར་བྱེད་པའི་དུས་སུ་གཞན་དོན་དཔག་མེད་ལྷུན་གྲུབ་དཔག་མེད་བྱ་ཡང་བྱ་ལ། འབྱུང་ཡང་འབྱུང་གསུང་ངོ་། །བདེ་སྐྱིད་འབྱུང་བས་རི་གོང་ཡང་དགོན་དུ། ཆོས་རྗེ་རིན་ཆེན་དྷརྨ་པྲཛྙཱ་༼གཉན་སྟོན་༽ལ། གུས་པ་མཆོག་ཐོབ་བཱིརྱ་སིང་ཧ་༼བརྩོན་འགྲུས་སེངྒེ་༽ཡིས། །ཞུས་ལན་གེགས་སེལ་རིན་ཆེན་སྒྲོན་མེ་ཞུས། །དགེ་བ་འདི་ཡིས་མཁའ་མཉམ་སེམས་ཅན་ཀུན། །བླ་མེད་བྱང་ཆུབ་མཆོག་ལ་འགོད་པར་ཤོག
།ཞུས་པ་དང་ལུས་པའི་ལན་གེགས་སེལ་རིན་ཆེན་སྒྲོན་མེ་ཞེས་བྱ་བ། ༼།ཞུས་ལེན་གེགས་སེལ་སྒྲོན་མེ་ཞེས་བྱ་བ།༽ གཞན་ཕན་གྱི་བློ་ཁོ་ནས་ཡི་གེར་བཀོད་པའོ།། ༼ཨྀཐི༽།།