Catalog of Gyurmé Dechen

Excerpt from Shangs chos dkar chag zab rgyas chos kyi sgo 'byed lde mig by Gyurmé Dechen

དེ་ལྟར་དུ་རྣམ་པར་ཕྱེ་ནས་འཆད་པར་མཛད་ལ། དེ་ལས་དང་པོ་རྟོགས་ན་ལྷག་མ་འབད་མེད་དུ་ཤེས་པར་ནུས་པ།
དང་པོ་བརྗོད་ལ། དེ་ལ་ཡང་གྲུབ་ཆེན་ཁྱུང་པོ་རྣལ་འབྱོར་ཉིད་ནས་བརྒྱུད་པ་དང་དེ་ཕྱིན་འཕེལ་བའི་ཆོས་ཀྱི་རྣམ་གྲངས་སོ།
།དང་པོ་ལ་ཡེ་ཤེས་ཀྱི་མཁའ་འགྲོ་གཉིས་བརྒྱུད་པ་དང་། གྲུབ་བརྙེས་གཞན་ནས་བརྒྱུད་པའོ།
།དེ་ལ་ཡེ་ཤེས་ཀྱི་མཁའ་འགྲོ་ནི་གུའི་ཆོས་སྐོར་ལ་བླ་མ་བརྒྱུད་པའི་རྣམ་ཐར་དང་། གདམས་པ་དངོས་གཉིས་ལས།
The biographies
དང་པོ་ནི། རྡོ་རྗེ་འཆང་ནས་སངས་རྒྱས་སྟོན་པ་ཡན་གྱི་རིན་ཆེན་སྣ་བདུན་གྱི་རྣམ་ཐར་སོ་སོ། དེ་ཡང་རྡོ་རྗེ་འཆང་དང་ནི་གུའི་མའི་རྣམ་ཐར་ནི་གུ་མའི་བསྟོད་པ་བྱང་ཕྱོགས་སོ་བདུན་དང་སྦྱར་བ་གསུམ་ནི་རྨོག་ལྕོག་པ་ཕྱི་མ་ཀུན་དགའ་འོད་ཀྱི་མཛད་པ་ཡིན་ཅིང་། རྡོ་རྗེ་འཆང་དང་ནི་གུ་མའི་བསྟོད་པ་གཉིས་ལ་འཐད་མི་འཐད་ཅི་རིགས་སུ་ཡོད་པས་ཧ་ཅང་ཡི་གི་ཡིད་ཆེས་སུ་མི་འཛིན་ཅིང་། ནི་གུ་མའི་རྣམ་ཐར་ལ་ནི་སྒྲོ་བཀུར་མེད་དོ། །འོན་ཀྱང་ལུང་རྒྱུན་ནི་འདི་མཛད་མོད། རྨོག་ལྕོག་པ་རིན་ཆེན་བརྩོན་འགྲུས་དང་འཁྲུལ་བར་མི་བྱའོ། སྨྱུག་ལ་པཎ་ཆེན་གྱིས་མཛད་པའི་ནི་གུ་མའི་རྣམ་ཐར་བསྟོད་པ་ཡང་ཡོད།
དེ་ཕྱིན་གྱི་རྣམ་ཐར་ལྔ་ནི་བླ་མ་རང་རང་གིས་མཛད་ལ། མྱ་ངན་འདས་བྱུང་སློབ་མས་ལྷན་ཐབས་སྨོས་པ་ཡིན་ཅིང་། བརྒྱུད་པ་འདི་པའི་ལུགས་ལ། གང་ཟག་གཞན་གྱི་ཡོན་ཏན་བརྗོད་པས། རང་གི་ཡོན་ཏན་བརྗོད་པ་ཁྱད་པར་འཕགས། ཞེས་རང་ཉིད་ཀྱི་བརྗོད་པ་སྒྲོ་བཀུར་ལས་གྲོལ་བར་བཞེད་དོ།
།གྲུབ་ཆེན་ཁྱུང་པོ་ལ་རྣམ་ཐར་ཤོག་རིལ་མར་གྲགས་པ་གཅིག་ཡང་ཡོད་གསུང་། རྨོག་ལྕོག་པའི་གུར་འབུམ། སྐྱེར་སྒང་པའི་གསང་བའི་རྣམ་ཐར་ལུགས་ཡོད་དང་། སངས་རྒྱས་སྟོན་པ་དང་ཆོས་རྗེས་སྟོན་པ་གཉིས་ལའང་གསང་བའི་རྣམ་ཐར་རེ་ཡང་སྣང་། དེ་ནས་ཤངས་སྟོན་དང་། ཁྱུང་པོ་ཚུལ་ཁྲིམས་མགོན་པོ། རི་ཁྲོད་རས་ཆེན། ཤངས་དཀར་བ། སངས་རྒྱས་དཔལ་བཟང་། གྲུབ་ཆེན་ནམ་རྒྱལ། རྒྱ་སྒོམ་རི་ཁྲོད་པ་ཆེན་པོ་སྟེ་ཕྱིས་འབྱུང་གི་རིན་ཆེན་སྣ་བདུན་དུ་མཚན་གསོལ་བའི་རྣམ་ཐར་སོ་སོ།
སྤྱིར་ནི་གུའི་རིང་བརྒྱུད་བརྒྱུད་པ་ཉེར་བཞི། ཉེ་བརྒྱུད་ལྕགས་ཟམ་ལུགས་དང་ཉེར་ལྔ། བདག་ཅག་གི་འདྲེན་པ་ཉིད་ཀྱིས་གསན་པ་ལས་བརྒྱུད་ཚུལ་འདི་ལ། ཁྱུང་པོ་རྣལ་འབྱོར་པ་ལན་གསུམ་དང་། རྨོག་ལྕོག་པ་ལན་གཉིས་སུ་བཟླས་པ་བརྒྱུད་པ་འདི་ལ་ཚང་བ་ཡིན་གསུང་། འདི་ལ་ཐུགས་བརྩིས་སུ་མཛད་དོ། །གཞན་ཡང་མགོན་བཀའ་འགའ་ཞིག་ལ་དགོས་པ་ཤེས་སྒོམ་སངས་རྒྱས་དར་གྱི་རྣམ་ཐར་ཀྱང་གསུང་ངོ་།
།འདི་ནི་འཇག་ལུགས་སློབ་བརྒྱུད་གཙོ་བོར་སྨོས་པ་ཡིན་ལ། གདན་བརྒྱུད་ཀྱང་འཇག་པ་རྒྱ་ཆེན་འབུམ་འཇག་ཆེན་བྱམས་པ་དཔལ། ཆོས་རྗེ་བློ་གྲོས་དཔལ་བཟང་རྣམས་གྲགས་ཆེ་ཞིང་རྣམ་ཐར་གྱི་ཡི་གེ་ཡང་ངོ་མཚར་བ་ཡོད།
།རི་གོང་སྟོད་བརྒྱུད་ལ་མུས་ཆེན་རྒྱལ་མཚན་དཔལ་བཟང་། གཉན་ཁྲོད་པ་རྡོ་རྗེ་གཞོན་ནུ། མཚན་ལྡན་ནམ་མཁའི་རྣལ་འབྱོར་པ་རྣམས་ལ་རྣམ་ཐར་རེ་རེ་ཡོད།
ཡང་སངས་རྒྱས་སྟོན་པ་ནས་བསམ་སྡིང་པ་ལ་བརྒྱུད་པ་ལ། མཁས་བཙུན་གཞོན་ནུ་གྲུབ་ཀྱི་རྣམ་ཐར། ཞང་སྟོན་བྱང་ཆུབ་ཤེས་རབ། བླ་ཆེན་ཆོས་དཔལ་བ། འཁྲུལ་ཞིག་ཚུལ་ཁྲིམས་རྒྱལ་མཚན། མཁྱེན་རབ་ཆོས་རྗེ་རྣམས་ཀྱི་རྣམ་ཐར་རེ།
གནས་རྙིང་པ་ཨ་སེང་ནས་བརྒྱུད་པ་ལ་ནི། བརྒྱུད་པའི་ལོ་རྒྱུས་ལེགས་པོ་མི་སྣང་ངོ་།
།འཇག་བསམ་གཉིས་ཀྱི་ནང་ཚན་བརྒྱུད་པ་གཞན་དག་གི་ཡི་གེ་ནི་མང་པར་གྱུར་པས་མ་སྨོས་སོ།
།བརྒྱུད་མ་དེ་རྣམས་ཀྱི་བཀའ་བབས་ཀྱི་ཆུ་བོ་གཅིག་ཏུ་འདུས་པའི་ཆོས་ཀྱི་རྒྱ་མཚོ་འཇམ་མགོན་བླ་མའི་སྔོན་དང་ད་ལྟར་གྱི་ཐུན་མོངས་དང་ཐུན་མོངས་མ་ཡིན་པའི་རྣམ་ཐར་སོ་སོ་རྣམས་ཡོད་དོ།
།བརྒྱུད་པའི་གསོལ་འདེབས་ལ། ཨེ་ཡིག་མ། མཁའ་དབྱིངས་མ། གནས་སྦྱར་མ། གཞི་ལམ་འབྲས་གསུམ་མ་བཞི གཙོ་ཆེ།
The instructions
གཉིས་པ་ལ་སྨིན་གྲོལ་གཉིས་ལས།
Initiations
དང་པོ་སྒྱུ་ལུས་དབང་མོ་ཆེའི་ལོ་རྒྱུས། སྔོན་འགྲོ་དབང་ཆོག །དབང་བཤད། ལྷན་ཐབས། དབང་གི་སྔོན་འགྲོ་སངས་རྒྱས་སྟོན་པས་མཛད་པ།
འཇུག་སྒོ་ཡོན་ཏན་ཀུན་བྱུང་གངས་པས་མཛད་པ།
ཆོས་དྲུག་གི་སྒོས་བཀའ་དྲུག །རྒྱུད་སྡེ་ལྔའི་བྱིན་རླབས། རྒྱུད་སྡེ་ལྔའི་དབང་གི་ཟིན་བྲིས། རྒྱུད་སྡེ་ལྔའི་སྒྲུབ་ཐབས་ཁྱུང་པོས་མཛད་པ།
རྒྱ་གཞུང་རྡོ་རྗེ་གདན་པས་མཛད་པ་མཆན་འབྱར།
རྒྱུད་སྡེ་ལྔའི་སྒྲུབ་ཐབས་རྡོ་རྗེ་དྲིལ་བུ་པས་མཛད་པ།
སྔགས་འཕྲེང་རྡོ་རྗེ་གདན་པས་སྒྲིགས་པ་བསྟོད་པའི་རྒྱ་གཞུང་། རྒྱུད་སྡེ་ལྔའི་མངོན་དཀྱིལ་མཆོད་འཕྲེང་ལྐུགས་ལུང་པས་མཛད་པ།
འོན་ཀྱང་ཆོ་ག་འདི་ལ་བརྩིས་ཆུང་། མཁྱེན་རབ་ཆོས་རྗེ་མཛད་པའི་མངོན་དཀྱིལ་མཆོད་འཕྲེང་།
བྲག་ནག་པས་མཛད་པའི་མངོན་རྟོགས་བདེ་མཆོག་ལྷ་ལྔའི་རྒྱ་གཞུང་།
བདེ་མཆོག་གི་དབང་བཞི་ལུས་སྒྲིགས། བདེ་མཆོག་ལྷ་ལྔའི་མངོན་རྟོགས་དཀྱིལ་ཆོག་མཆོད་འཕྲེང་ཚོགས་འཁོར་བདུན་ཚིགས་དབང་བཞི་ལུས་སྒྲིགས་སུ་སྒོམ་ཚུལ་རྣམས་རྒྱལ་མཚན་འབུམ་གྱི་མཛད་པ།
ཁྱུང་པོས་མཛད་པའི་མངོན་རྟོགས་ཆེན་མོ།
ལྷ་ལྔའི་ཏིང་ངེ་འཛིན་གྱི་དབང་ནི་གུ་མའི་མཛད་པ།
བདེ་མཆོག་ལྷ་ལྔའི་ཆོག་སྒྲིགས་རྗེ་བཙུན་རིན་པོ་ཆེས་མཛད་པ་གའུ་མའི་དབང་དང་དབང་གི་ཟིན་བྲིས། ལམ་ཁྱེར་རྣམ་གསུམ་གྱི་དབང་ཆོག །འཆི་མེད་དབང་གི་རྒྱ་གཞུང་། དབང་བསྐུར་ཚུལ་གྱི་ཡི་གེ །ཡང་འཆི་མེད་ཀྱི་དབང་ཆོག་དང་ཟིན་བྲིས། མཁའ་སྤྱོད་དཀར་དམར་གྱི་དབང་ཆོག་རྣམས་སོ།
འདི་དག་ཀྱང་ཆོས་ཚན་ལྔ་པོ་གཙོ་ཆེ་བའི་དབང་དུ་བྱས་ནས་སྨོས་ཀྱིས། གཞན་དབང་མང་དུ་ཡོད་པ་འོག་ཏུ་སྨིན་གྲོལ་ལྷན་ཅིག་ཏུ་སྨོས་པ་ལས་ཤེས་པར་བྱའོ།
དབང་ཆོག་ལོགས་སུ་མེད་པའི་གཞུང་གི་བཀའ་ཉེར་ལྔ་ཡང་། ཅི་རིགས་པ་འདི་དག་པ་འདུ་ཞིང་། ཟུར་དུ་ཡོད་པའི་མགོན་བཀའ་སོགས་ཐ་དད་ལས་ཤེས་པར་བྱ་དགོས་སོ།

།གཉིས་པ་ལ་རྩ་བ་ཆོས་དྲུག་གི་སྐོར་ལ། རྡོ་རྗེའི་ཚིག་གསལ་ཐེམ་ཡིག་གཞི་ལམ་འབྲས་གསུམ། ལྟ་སྒོམ་སྤྱོད་གསུམ། གནད་དྲུག་བགེགས་དྲུག །ཁྲིད་ཡིག་རྒྱལ་མཚན་འབུམ་གྱིས་མཛད་པའི་འགྲེལ་པ་བདུད་རྩིའི་རྒྱ་མཚོ། དེའི་ལྷན་ཐབས་མུས་ཆེན་རྒྱལ་མཚན་དཔལ་བཟང་གིས་མཛད་པའི་ཐར་ལམ་གསལ་སྒྲོན། བསམ་ལྡིངས་པས་མཛད་པའི་ཁྲིད་ཡིག་དང་། ལྷན་ཐབས་ཞང་བྱང་ཤེས་མཛད་པ། གྲག་ཆེན་པ་རྡོ་རྗེ་དཔལ་གྱིས་མཛད་པའི་ཁྲིད་ཡིག །གནས་རྙིང་པ་ཨ་སེང་གིས་མཛད་པའི་རྡོ་རྗེའི་ཚིག་རྐང་གི་འབྲུ་འབྲེལ་ཆུང་ངུ། ཆོས་དྲུག་གི་ཁྲིད་ཡིག་སྔ་དུས་མཛད་པའི་གསལ་བའི་སྒྲོན་མེ་དང་། ཕྱིས་མཛད་པའི་བསྡུས་པ་དྲན་པའི་གསལ་འདེབས། རྒྱབ་ཆོས་ཀྱི་མགུར་ཁྲིད་ཚིགས་སུ་བཅད་པར་འགྲོ་བ་རྗེ་བཙུན་བླ་མས་མཛད་པ། ཆོས་དྲུག་གི་ཉེར་མཁོ་འཇག་པས་མཛད་པ། ཆོས་དྲུག་གི་ཞལ་བཞེས་གནད་ཀྱི་ལྡེ་མིག་རི་ཁྲོད་པས་མཛད་པ། སྒྱུ་ལུས་གདན་ཐོག་གཅིག་མ། ལུས་སེམས་སྦྱད་བ་རྣམ་གཉིས། སྒྱུ་མ་གསལ་བྱེད་རིན་པོ་ཆེའི་འོད་འཕྲེང་། ལམ་དྲི་མ་མེད་པའི་འོད་འཕྲེང་། ཉམས་མྱོད་ཡོན་ཏན་རྒྱ་མཚོ། ཉམས་མྱོང་མ་རིག་མུན་སེལ་ཉི་མའི་དཀྱིལ་འཁོར། ཞུས་ལན་ཟླ་བའི་དཀྱིལ་འཁོར་ཉོན་མོངས་གདུང་སེལ། ཞུས་ལན་རིན་ཆེན་སྒྲོན་མེ། གཏུམ་མོའི་སྐབས་སུ་བྱིན་རླབས་བླ་མའི་གཏུམ་མོ། རི་བོང་དབབ་བཟུང་བཟློག་དགྲམ་གྱི་ཞལ་བཞེས་འཁྲུལ་འཁོར་བཅུ་གསུམ་རྡོ་རྗེ་གདམ་ཀྱོག་ཧའི་སྦྱོར་བའི་ཞལ་གདམས་ལྔ་པ། འཁོར་ལོ་བཞིའི་གཏུམ་མོ། འཛག་བསྲུང་གི་ཡི་གེ་འདུག་མོད་གཞན་དང་འདྲེས་པར་སྣང་། སྒྱུ་ལུས་ཀྱི་ཞལ་གདམས་སྣང་བ་སེམས་ཀྱི་ཁྲིད། སྒྱུ་ལུས་འཛིན་པ་རང་གྲོལ་དབང་པོ་རབ་ཀྱི་ལུད་འདྲེན། དབང་པོ་འབྲིང་གི་གཏམ་རྒྱུད། རྨི་ལམ་ལ་དམིགས་པ་གསུམ་སྐོར་དང་། ལྔ་སྐོར་འབྱམས་སྤྱོད་ཆེ་ཆུང་གཉིས། འོད་གསལ་འཆར་སྒོ་ངོས་འཛིན་ཆེ་ཆུང་གཉིས། འཕོ་བ་ཡེ་ཤེས་སྐར་ཁུང་མ་ཆེ་ཆུང་གཉིས། འདི་ར་ཧུ་ལ་ནས་བརྒྱུད་པ་ཡིན་ཀྱང་བླ་མ་གོང་མས་ཆོས་དྲུག་གི་ཆ་ལག་ཏུ་སྦྱར་བས་འདིར་སྨོས་པ་ཡིན། འཆུགས་མེད་བར་དོ་གསུམ་གྱི་གདམས་པ། ཁྱད་འཕགས་ཀྱི་གདམས་པ་བཅོ་ལྔ། སྒྱུ་ལུས་དྲུག་ལྡན་དུ་ལུས་གསུམ་གདམས་པ་རྣམས་ལ་རྒྱས་བསྡུས་གསུམ་པའི་མིང་བཏགས་དང་། རྒྱུན་གྱི་ཉམས་ལེན་དྲུག་པ། དུག་གསུམ་དག་བྱེད་ཞལ་གྱི་བདུད་རྩི། དེ་དག་གི་རྒྱབ་ཆོས་མདོ་རྒྱུད་བསྟན་བཅོས་དང་མི་འགལ་བར་སྟོན་པ། སྒྱུ་མ་ལམ་རིམ་རྩ་འགྲེལ་གཉིས་ཁྱུང་པོས་བསྡུས་དོན་མཛད་པ། གའུ་མའི་རྩ་བ་རྡོ་རྗེའི་ཚིག་རྐང་། ཚིག་རྐང་གསལ་བྱེད། རང་གྲོལ་ཕྱག་རྒྱ་ཆེན་པོ་ནི་གུ་མས་མཛད་པ། ཕྱག་རྒྱ་ཆེན་པོའི་ཁྲིད་ཡིག་འཇག་བསམ་གཉིས་ཀྱི་མཛད་པའམ། འབྲི་གུང་པ་འོད་ཟེར་སེང་གེས་མཛད། ཕྱག་ལོའི་གསུང་ལ་ཟིན་བྲིས་བྱས་པ། རྨོག་ལྕོག་པས་མཛད་པའི་དྭགས་ཤངས་ཀྱི་ཕྱག་རྒྱ་ཆེན་པོའི་ཁྱད་པར་ཕྱག་རྒྱ་ཆེན་པོའི་སྐབས་སུ་མཁོ་བའི་གསུང་སྒྲོས་མཁས་གྲུབ་པའི་གསུང་ལ་བཀའ་བཞི་པས་ཟིན་བྲིས་བྱས་པ། སེམས་འཚོལ་ཡིག་ཆུང་ལོ་རྒྱུས་མང་། ངོ་སྤྲོད་ལྷན་ཐབས་ཀྱི་ཡིག་རྙིང་། ལམ་ཁྱེར་ལ་རྡོ་རྗེའི་ཚིག་རྐང་། ཁྱད་འཕགས་ཀྱི་ལམ་ཁྱེར་རྣམ་གསུམ། ལམ་ཁྱེར་གསུམ་གྱི་གནད་དྲིལ་བ། ཁྲིད་ཡིག་རྒྱལ་མཚན་འབུམ་གྱི་མཛད་པ། འཆི་མེད་རྡོ་རྗེའི་ཚེག་རྐང་། ཁྱུང་པོ། རྨོག་ལྕོག་པ། སྐྱེར་སྒང་པ། སངས་རྒྱས་སྟོན་པ། ཆོས་རྗེ་སྟོན་པ་རྣམས་ཀྱིས་མཛད་པའི་འཆི་མེད་ཀྱི་ཡིག་སྣ་རེ། འཆི་མེད་ཀྱི་ཁྲིད་ཡིག་རྒྱལ་མཚན་འབུམ་གྱིས་མཛད་པ། རང་སེམས་འཆི་མེད་རང་གྲོལ་གྱི་ཁྲིད་བླ་མའི་གསུང་བཞིན་བཀོད་པ། འཆི་མེད་ཀྱི་གསུང་སྒྲོས། བླ་མ་ཤངས་པའི་ལྷ་གསལ་བར་བྱེད་པའི་མན་ངག །མཁའ་སྤྱོད་མའི་སྐོར་ལ། དཀར་མོའི་དབང་ཆོག་སྒྲུབ་ཐབས་ཇོ་བོ་རྗེས་མཛད་པ། ཇོ་བོ་ལུགས་ཀྱི་སྒྲུབ་ཐབས་ཉམས་སུ་ལེན་པའི་ཚུལ་འདི་གཉིས་ནི་གུའི་ལུགས་མིན་པས་འདིར་མི་རིགས་སྙམ་ན། བླ་མ་གོང་མས་ལྷན་དུ་སྒྲིགས་པ་ཡ་མི་འབྲལ་བའི་ཆེད་དང་། རྣམ་པ་གཅིག་ཏུ་ན་ནི་གུ་མའི་རྡོ་རྗེའི་ཚིག་རྐང་སོགས་ཇོ་བོ་རྗེའི་དཔེ་དང་། ཁྱུང་པོའི་དཔེ་གཅིག་པར་བཅད་པས་མཐའ་གཅིག་ཏུ་མ་ངེས་སོ།
།མཁའ་སྤྱོད་དཀར་མོའི་སྒྲུབ་ཐབས་ནི་གུ་མའི་ལུགས། བསྟོད་པ་ལུགས་གཉིས། ཚེས་བཅུའི་མཆོད་པ། ལུས་བྱིན་རླབས། དམ་ཚིག་གསོ་བ། གཏོར་ཆོག །མཁའ་སྤྱོད་ཀྱི་རིལ་བུ་སྒྲུབ་པ། འཕོ་བའི་རྣལ་འབྱོར་རྣམས་སོ།
།དམར་མོའི་སྐོར་ལ་དབང་ཆོག་འདི་དང་དཀར་མོའི་དབང་ཆོག་གཉིས་གོང་དུ་སྨིན་བྱེད་ཀྱི་སྐབས་སུ་སྨོས་ཀྱང་འདིར་ཡ་མི་འབྲལ་བའི་སླད་དུ་སྨོས་པས་ཟློས་པར་མི་སེམས་སོ།
།སྒྲུབ་ཐབས་མཁའ་སྤྱོད་དམར་མོའི་འཕོ་བ་བྱིན་རླབས་ཀྱི་ཆོ་ག །ལག་མཆོད་ཐིག་ལེའི་འཕོ་བ་རྣམས་ལས་ཕྱི་མ་ར་ཧུ་ལའི་གདམས་པ་ཡིན་ཀྱང་ཆོས་མཚན་མི་འཐོར་བའི་ཕྱིར་འདིར་སྨོས་པར་གོ་དགོས། གཞན་ཡང་བླ་མ་ལས་དབང་བཞི་ལེན་ཚུལ་གྱི་རྒྱ་གཞུང་། དེའི་ལག་ལེན་བླ་མ་ལས་དབང་བཞི་ལེན་ཚུལ་གྱི་བླ་སྒྲུབ། དུད་ལྔ་ལམ་ཁྱེར་གྱི་ཁྲིད། ཇོ་མོ་མུ་ཏིག་ཕྲེང་བ་སྒོམ་པ་སོགས་ཞལ་གདམས་ཉེར་ལྡ། བདེ་མཚོག་མཁའ་སྤྱོད་རིག་འཛིན། བདེ་མཚོག་སྐུ་གསུང་ཐུགས་ཀྱི་སྒྲུབ་པ་དབུ་མ་ཡིག་བདུན་ཚན་པ་གཉིས། ནི་གུ་མའི་ཕྱག་རྒྱ་ཆེན་པོ་རྟོགས་མི་རྟོགས་ཆང་མཆོད་བཀའ་རྒྱ་མ། སྐུ་གསུམ་ལམ་ཁྱེར་གྱི་རྒྱ་གཞུང་། ད་ལྟའི་དོན་འགྲེལ། ནི་གུ་མས་མཛད་པའི་བར་ཆད་གསལ་ཐབས། གཞན་དོན་མི་འགྲུབ་མི་སྲིད་པའི་གདམས་པ། རྣམ་འཇོམས་ཀྱི་གསང་སྒྲུབ་ཚན་པ་གཉིས། བསྔོ་བ་སྨོན་ལམ་བཀྲ་ཤིས་བཀའ་རྒྱ་མ་རྣམས་སོ།

།གཉིས་པ་མཁའ་འགྲོ་སུ་ཀ་སིདྡྷིའི་ཆོས་སྐོར་ལ། ལོ་རྒྱུས་དབང་ཆོག །ཆོས་དྲུག །བདག་མེད་མའི་ནང་ཁྲིད་དབང་ཆོག །ཕག་མོའི་གསང་སྒྲུབ་ཀྱི་སྐོར་མཁའ་འགྲོ་གནད་ཀྱི་གསང་སྒྲུབ། དེའི་བྱིན་རླབས། ལྟེ་བ་སྤྲུལ་འཁོར་གྱི་མན་ངག །ཡང་མཁའ་འགྲོ་གནད་ཀྱི་གསང་སྒྲུབ། རྫོགས་རིམ་འཁྲུལ་འཁོར་དང་བཅས་པ། གསང་སྒྲུབ་ཞལ་གདམས། གསང་སྒྲུབ་ཉེར་དྲུག །བདེ་བ་བསྡུ་བའི་རིམ་པ། ལྟེ་བ་སྤྲུལ་འཁོར་གྱི་མི་ནོར་ཟས་གསུམ་དབང་དུ་བསྡུ་བས་ན་ཕྱག་རྒྱ་ཆེན་པོར་ངོ་སྤྲོད་པའི་ཆོས་ཚན་བཅུ། ཕྲིན་ལས་བཞིའི་མེ་མཆོད་སོགས་ལས་ཚོགས་ཡིག་སྐོར་དང་བཅས་པ་ཕྱག་རྒྱ་ཆེན་པོ་དག་པ་ཡེ་ཤེས་རྣམས་སོ།

།གཉིས་པ་གྲུབ་བརྙེས་གཞན་ལས་འོངས་པ་ལ། བྱིན་རླབས་ལྷ་བཞིའི་དབང་ཆོག་ཚན་པ་གསུམ། ར་ཧུ་ལའི་རྣམ་ཐར་ཚིགས་བཅད་མ། ལྷ་བཞིའི་སྒྲུབ་ཐབས། ལྷ་བཞིའི་རྒྱ་གཞུང་། གཉིས་པ་ཡང་དབང་ཆོག །ཞལ་གདམས་ཐུན་མོང་མ་ཡིན་པ། རྗེ་བཙུན་མའི་གཏོར་མ། སྒྲོལ་མའི་སྒྲུབ་ཐབས་སོགས་དང་། ཇག་ཆིང་སོགས་ལས་ཚོགས། ལྷ་བཞིའི་བྱིན་རླབས། ལྷ་ལས་དབང་བཞི་བླང་ཐབས། ལྷ་བཞིའི་ཞལ་གདམས། སྒྲོལ་མའི་ལམ་བསྲུང་། འཇིགས་བརྒྱད་སྐྱབས་ཚུལ། ལྷ་བཞིའི་བསྟོད་པ། ཁ་སར་པ་ཎི་མན་ངག །བཅུ་གཅིག་ཞལ་ལ་བརྟེན་ནས་དུག་གསུམ་སྦྱང་ཐབས། ནད་གདོན་རྣལ་འབྱོར་མ་གཙོ་བོར་གྱུར་པའི་ལྷ་བཞིའི་སྒྲུབ་ཐབས། རླུང་འཁོར་བཅིང་གྲོལ་གྱི་ལོ་རྒྱུས། འཁོར་ལོ་བཅིང་གྲོལ། ཕྱག་རྒྱ་བཅིངས་གྲོལ། བུམ་པ་ཅན། ཤིང་རྟ་ཅན། ཡང་བུམ་ཅན། ཤིང་རྟ་ཅན་འཁོར་ལོ་བཅིངས་གྲོལ་གསུམ་ཀ་སྟན་ཐོག་གཅིག་ཏུ་ཉམས་སུ་ལེན་ཚུལ། མཁའ་སྤྱོད་གསུམ་གྱི་དབང་ཆོག་སྒྲུབ་ཐབས། ཕྱག་ན་རྡོ་རྗེ་ཛ་ལི་མའི་སྐོར། མགོན་པོའི་སྐོར་ཀྱང་ཕལ་གཅིག་འདི་པའི་ཆོས་ལུགས་ཡིན་ཀྱང་དཀར་ཆག་འདིར་མ་སྨོས་སོ།
།དེ་རྣམས་ནི་གྲུབ་ཆེན་ར་ཧུ་ལ་ནས་བརྒྱུད་པ་ཡིན་ནོ།
།རྡོ་རྗེ་གདན་པ་ནས་བརྒྱུད་པ་ཡང་རྒྱུད་སྡེ་ལྔ། སྤྱི་དང་སོ་སོ་བདེ་མཆོག་ལྷ་ལྔ། མཁའ་སྤྱོ་ལ་སོགས་མང་དུ་ཡོད་ཀྱང་། གོང་དུ་སྨོས་པ་ལ་བརྒྱུད་པ་སོ་སོར་དོད། ཆོས་རྩིས་ཀྱི་ཡི་གེ་ཟུར་དུ་མ་སྨོས་ཤིང་། རྗེས་སུ་ཡི་རང་གི་གདམས་པ། དམིགས་པ་རིན་ཆེན་སྒྲོམ་བུ། འདི་འཇམ་དཔལ་གྱིས་བླ་མ་ཤངས་པ་ལ་ཉེ་བརྒྱུད་དུ་གནང་བ་གཅིག་ཀྱང་བརྒྱུད་ཚུལ་ཤེས་པར་བྱའོ།
།མཁའ་སྤྱོད་དཀར་དམར་སྦས་པའི་རྣལ་འབྱོར་པ་དང་། ར་ཧུ་ལ་ལ་ཡང་གསན་ཏེ་ཡི་གེ་ལོགས་སུ་མེད། མཻ་ཏྲི་པ་ལ་ཕྱག་ཆེན་དག་པ་ཡེ་ཤེས་དང་། སྐུ་གསུམ་ལམ་ཁྱེར་གསན་ཀྱང་ཡི་གེ་སྔ་མ་ལྟར་ཡིན་ཅིང་། མགོན་པོ་ཡིད་བཞིན་ནོར་བུའི་སྒྲུབ་ཐབས་རྗེས་གནང་། འཁོར་ལོ་བཅའ་ཐབས་བུམ་པའི་བཅའ་ཚུལ་བྲིས་སྐུ་བཞེངས་ཐབས་བསྟོད་པ་རྣམས་སོ།
།བྲམ་ཟེ་རཏྣ་ཕ་ལ་ནས་བརྒྱུད་པའི་བཅོས་ཕྲེང་སྲིད་འཕེལ་གྱི་སྐོར་ལ་མེད་པ་བཙལ་བ་དང་། ཆད་པ་འཐུད་པ་ལྟེ་བ་སྒྱུར་བའི་མན་ངག་ཡིག་སྣ་དཔེ་རིས་དང་བཅས་པ་ཡོད། པཎྜི་ཏ་རོལ་པའི་རྡོ་རྗེ་ལ་གསན་པའི་མགོན་པོའི་རྒྱུད་དང་སྒྲུབ་ཐབས་མི་འདྲ་བ་བརྒྱད་ཅུ་གསན་མོད། དཀར་ཆག་ཏུ་ཐེབས་པ་མེད་དོ།
།གཞན་ཡང་འཚོ་བ་རྩོལ་མེད་དུ་འབྱུང་བ་ནོར་འཛིན་གྱི་རྗེས་གནང་། ཚོགས་འཁོར་བཅུད་ལེན་བྱ་ཐབས། ཡང་ལག་ལེན་གྱི་རིམ་པ་ཡོད་ཅིང་། འདི་ནི་གུ་མནས་ཨ་ར་དྲ་ནག་པོས་མཛད་ནས་བརྒྱུད་པ། ཕྱིས་སངས་རྒྱས་སྟོན་པར་བཀའ་བབས་པ་གཅིག་ཀྱང་ཡོད་དོ།
།ཡི་གེ་འདི་ལས་མཚོན་པའོ།
།གཞན་ཡང་ཁྱུང་པོའི་མགུར་བརྒྱད་ཀྱི་དོན་བརྒྱད་གསུམ་པ་ཕྱིས་འཕེལ་བའི་ཆོས་ཀྱི་རྣམ་གྲངས་ལ། སྐྱེར་སྒང་པ་ནས་བརྒྱུད་པ་རྟ་མགྲིན་གསང་སྒྲུབ་ཀྱི་སྒྲུབ་ཐབས་ཚན་པ་གཉིས་ དབང་ཆོག་ བསྟོད་པ། གཏོར་བཟློག །དགྲ་བགེགས་གནད་ལ་དབབ་ཐབས། རྒྱལ་པོ་ཤི་ས་བསྟན་པ། འཁོར་ལོ་དཔེ་རིས། གཉིས། དམག་ཤད་དམ་དབྱུག་པའི་ལས་སྦྱོར། བསྲུང་བ་བྱ་ཚུལ་རྣམས་དང་། ཐུགས་རྗེ་ཆེན་པོའི་རིག་གཏད་ཀྱི་ཆོ་ག ལོ་རྒྱུས་གཙོ་འཁོར་གསུམ་གྱི་སྒྲུབ་ཐབས། སྤྱོད་ལམ་གྱི་རྣལ་འབྱོར། ཁྲུས་ཆོག་ ཟས་དང་གོས་ཀྱི་རྣལ་འབྱོར། ལུས་འབུལ་བ། བསོད་ནམས་བསོག་པ། གཟུངས་ཆུ་བྱེད་ཚུལ། བསྲུང་སྐུད་བྱ་བ། སྙིང་རྗེའི་བསྲུང་བ། བགེགས་བསྲུང་བ། དྲག་པོའི་བསྲུང་བ། རྒྱལ་པོ་ས་བདག་བསྲུང་བ། ས་གཉན་དུ་སྡོད་ན་བསྲུང་ཚུལ། གཏོར་མ་བརྒྱ་རྩ། གྲུལ་གཏོར་ཚན་པ་གསུམ། སྡིག་སྦྱོང་ཚན་པ་གཉིས། ཚ་ཚ་ཆུ་སྦྱིན་མར་མེའི་སྦྱིན་སྲེག །སྡིག་སྦྱོང་གི་སྦྱིན་སྲེག །སྦྱིན་སྲེག་ཆེན་མོ། བསྙེན་པ་བྱེད་ཚུལ། ཝ་རུ་ཎ་ལ་གཏོར་མ་འབུལ་ཚུལ། ཝ་རུ་ཎའི་ཆར་འབེབས་ནོར་སྒྲུབ། གསང་སྒྲུབ་རྒྱལ་བ་རྒྱ་མཚོའི་རིག་གཏད། སྒྲུབ་ཐབས་གཏོར་མ་སོགས་ལས་ཕྲིན་དང་བཅས་པའོ།
།སངས་རྒྱས་གཉན་སྟོན་པ་འཕེལ་བ་ལ། ལུས་འཆི་མེད་གྲུབ་པའི་རྒྱ་གཞུང་རྩ་འགྲེལ། དབང་ཆོག་རྒྱ་གཞུང་། འཁྲུལ་འཁོར་གསལ་བྱེད་ཉི་མ་རྣམས་ཡོད་དོ།
།དེ་རྣམས་དང་མགོན་པོའི་བཀའ་ཆེན་པོ་གསུམ། རྒྱུད་ལེའུ་བརྒྱད་པ། བཅུ་གསུམ་པ། བཅུ་དྲུག་པ། བཅོ་བརྒྱད་པ། ཉེར་གཅིག་མ་དང་། ཕྱི་ནང་གསང་བའི་སྒྲུབ་ཐབས། ཟབ་པའི་གནད་དུ་མ་དང་། མཐར་ཐུག་གི་མན་ངག་བདུན། རྟེན་བཞི། གནད་གསུམ། ཕྱི་ནང་གསང་བའི་དུར་ཁྲོད་ལམ་ཁྱེར། མགོན་པོ་ཞལ་གཅིག་ཕྱག་དྲུག་པ་ནས་ཕྱག་སྟོང་སྤྱན་སྟོང་གི་བར་སྒྲུབ་ཐབས། ལས་ཚོགས་མཐའ་དག་དང་བཅས་པ། གཞན་ཡང་དེང་དུས་ཀྱི་ཤངས་ཆོས་ཡོངས་སུ་རྫོགས་པ་ཡིན་ཅིང་། ཕྱིས་བླ་མ་སོ་སོས་མཛད་པའི་སྒྲུབ་ཐབས། བསྟོད་པ། དཀྱིལ་ཆོག་ཟིན་བྲིས་སོགས་ཅི་རིགས་སྣང་ཀྱང་མང་པར་གྱུར་པས་སྐབས་དོན་འདི་ཉིད་ཀྱིས་གྲུབ་པའོ།
།དེས་ཆོས་ཀྱི་སྒོ་མ་ཚང་བ་མེད་པའི་རྒྱས་པའི་ཚུལ་བརྗོད་ནས། འབྲིང་བསྡུས་ཤིང་བསྡུས་པ་རྣམས་སྔར་སྨོས་པ་དེ་ཉིད་ཡིན་ཞིང་། དེ་དག་ཀྱང་བརྒྱུད་པ་ཉེར་བཞི་ལས་བྱུང་བ་ཉེ་བརྒྱུད་ཀྱི་རྣམ་གྲངས་ཡིན་ལ། ཉེ་བརྒྱུད་ཆུ་སྒོམ་པས་ནི་གུ་མ་ལ་གསན་པ་ལ་ནི་ཡི་གེ་ཟུར་པ་མེད། འོན་ཀྱང་བླ་མ་རྗེ་བཙུན་གྱིས་མཛད་པའི་བརྒྱུད་པ་ཉེ་རིང་གི་ཁྱད་པར་འབྱེད་པའེ་ཡི་གེ་གཅིག་ཡོད་དོ།
།གྲུབ་ཆེན་ཐང་སྟོང་རྒྱལ་པོ་ནས་བརྒྱུད་པའི་རིང་བརྒྱུད་མུས་ལུགས་དང་། ཉེ་བརྒྱུད་རིམ་པ་གསུམ་བྱུང་བ། ནི་གུ་མ་དང་སྔ་སོར་མཇལ་དུས་གནང་བའི་ཆོས་སྐོར་ལ་ཆོས་དྲུག་ཁྲིད་ཡིག་སྙིང་པོ་ཀུན་འདུས། ཕྱག་ཆེན། ལམ་ཁྱེར། འཆི་མེད། བླ་མ་མགོན་པོ་དབྱེར་མེད་རྣམས་ལ་གྲུབ་ཆེན་གྱིས་མཛད་པའི་ཁྲིད་ཡིག་རེ་རེ་ གྲུབ་ཆེན་གྱི་རྣམ་ཐར། མང་གར་བ་བློ་གྲོས་རྒྱལ་མཚན་གྱི་རྣམ་ཐར། བར་དུ་མཇལ་དུས་ནི་གུའི་དབང་སོ་སོ། ཆོས་དྲུག །ཕྱག་ཆེན། ལམ་ཁྱེར། འཆི་མེད། བླ་མ་མགོན་པོ་དབྱེར་མེད་རྣམས་དང་། རྒྱ་སྒོམ་རིན་པོ་ཆེས་གྲུབ་ཆེན་ལ་ཇི་ལྟར་གསན་པ། རྗེ་བཙུན་རིན་པོ་ཆེས་ཡི་གེར་འཁོད་པ་དང་། ཕྱིས་ནི་གུ་ལ་གསན་པའི་ཡི་གེ་མེད་པའི་བརྡ་ཐབས་སུ་བྱུང་བ་ལ་དཔེ་རིས་གསོལ་འདེབས་དང་བཅས་པ་འཇམ་མགོན་བླ་མ་ཉིད་ཀྱིས་ཡེ་ཤེས་ཀྱི་མཁའ་འགྲོ་ལས་གསན་པའི་ཉེ་བརྒྱུད་ནི་ཡི་གེ་འཁོད་པ་མེད་པས། སྐལ་ལྡན་དག་གིས་སྙན་བརྒྱུད་ཀྱི་མན་ངག་ལས་བཙལ་བར་བྱའོ།
།དེ་ལྟར་ཤངས་པའི་ཟབ་ཆོས་བདུད་རྩིའི་སྙིང་། །སྐལ་ལྡན་ཐར་ལམ་སྟེར་བའི་གསོལ་མཆོག་སྟེ། །ཆ་ཙམ་སྤྱད་ཀྱང་འཕྲལ་ཡུན་ཕན་བདེ་ཡི། །དགེ་ལེགས་མི་ཟད་སྟེར་བྱེད་ཁོ་ན་ཡིན། །གང་གིས་བརྩོན་པས་ཉམས་བླངས་ན། །ཟླ་དྲུག་ལོའམ་ཚེ་འདི་ལ། །རྡོ་རྗེ་འཆང་དབང་འབྲས་སྟེར་བ། །ཆོས་ཚུལ་འདི་ཡིས་བདེན་དོན་ཅན། །ཟབ་རྒྱས་ཆོས་ཀྱི་རྣམ་གྲངས་ནི། །ཉུང་དུ་ཚི་གིས་ལེགས་བཀྲོལ་བ། །བློ་ལྡན་དགའ་བ་བསྐྱེད་པ་འདི། །དཔལ་ལྡན་བདག་གི་དབང་པོས་བསྡེབས། །ཤུ་བྷཾ།།