Phyag chen ga'u ma'i khrid yig

Resource ID	SCv7p573
Title	phyag chen ga'u ma'i khrid yig
Topics	Mahamudra Gauma
Sub-Topics	Manual
Author	Gyeltsen Bum
Link	BDRC W23922 BDRC W3CN18508
Notes	Commentary of ni gu ma'i phyag rgya chen po and lha sku dang sngags kyi spro bsdu bya ba

༄༅། །ཕྱག་ཆེན་གའུ་མའི་ཁྲིད་ཡིག་བཞུགས་སོ།།

བླ་མ་ཡི་དམ་ཌཱ་ཀི་རྣམས་ལ་ན་མོ།
ཡེ་ཤེས་ཀྱི་ཌཱ་ཀི་ནཻ་གུ་མའི་ཕྱག་རྒྱ་ཆེན་པོ་ལ་གསུམ་སྟེ། སྔོན་འགྲོ་རང་བབས་རྣམ་གསུམ། དངོས་གཞི་སྐྱོན་བཞི་རང་གྲོལ། འབྲས་བུ་སྐུ་བཞི་རང་ཤར་རོ།
ཆོས་དྲུག་སྔོན་དུ་མ་སོང་ན། སྟོང་ར་དང་བླ་མའི་རྣལ་འབྱོར་སྟོན་ནོ།
།དང་པོ་ནི། དབེན་པའི་གནས་སུ་ལུས་གནད་ལེགས་པར་བྱ། །ཅེས་པས། བདེ་བའི་སྟན་ལ་རྐང་པ་སྐྱིལ་ཀྲུང་། ལག་པ་ས་གནོན་སྒལ་ཚིགས་དྲང་པོར་བསང་། དཔུང་པ་རྒོད་གཤོག་པ་བཞིན་གདེང་། འཇིང་པ་དྲང་ལ་གུག་པ། ལྕེ་རྐན་ལ་སྦྱར། མིག་སྣ་རྩེར་གཏད་ལ། ལུས་ཡ་ཡོ་དང་དགྱེ་སྒུ་ལ་སོགས་མེད་པར་རྣམ་པར་སྣང་མཛད་ཀྱི་ཆོས་དྲུག་གམ་བདུན་ནོ།
།སེམས་བསྐྱེད། ཅེས་པ་སེམས་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་པར་བྱ། དེའི་ཆེད་དུ་ཐེག་པ་ཆེན་པོའི་ཆོས་ཉམས་སུ་བླང་སྙམ་དུ་བྱའོ།
།ལུས་ཡི་དམ་དུ་བསྒོམ། ཅེས་པ་འཆི་བ་མི་རྟག་པ་བསྒོམས་ནས། རང་བདེ་མཆོག་ཏུའོ།
སྤྱི་བོའི་བླ་མ་ལ། ཅེས་པ་རང་གི་སྤྱི་གཙུག་ཏུ་པདྨ་དང་ཉི་མའི་གདན་གྱི་སྟེང་དུ། རང་གི་རྩ་བའི་བླ་མ་འོད་དང་འོད་ཟེར་གྱི་རང་བཞིན་ཅན་བསམ། དེའི་ཐུགས་ཀ་ནས་འོད་ཟེར་འཕྲོས་པས། བརྒྱུད་པའི་བླ་མ་ཡི་དམ་ལྷ་ཚོགས། སངས་རྒྱས་དང་བྱང་ཆུབ་སེམས་དཔའ་ཆོས་འབྲེལ་ཡོད་ཚད་བསྟིམ་ལ། བླ་མ་དེ་དུས་གསུམ་སངས་རྒྱས་ཐམས་ཅད་ཀྱི་ངོ་བོར་བསྒོམས་ལ། བདག་ལ་གནོད་བྱེད་ཀྱིས་གཙོ་བྱས་པའི་ནམ་མཁའ་དང་མཉམ་པའི་སེམས་ཅན་ཐམས་ཅད། ལུས་གུས་པས་ཐལ་མོ་སྦྱར། ངག་གུས་པས་གསོལ་བ་འདེབས། ཡིད་གུས་པས་མོས་གུས་རྒྱུན་ཆད་མེད་པར་བྱེད་པར་བསམས་ནས།
བླ་མ་རིན་པོ་ཆེ་བདག་འཛིན་བློས་ཐོངས་པར། དགོས་མེད་རྒྱུད་ལ་སྐྱེ་བར། འོད་གསལ་ཕྱག་རྒྱ་ཆེན་པོ་རྟོགས་པར་མཛད་དུ་གསོལ། །ཞེས་སྙིང་ཁོང་རུས་པའི་གཏིང་ནས་གསོལ་བ་དྲག་པོ་བཏབ་པའི་རྗེས་ལ། ཅེས་པ།
འཇིག་རྟེན་གྱི་ཞིང་ལས་དང་། ཚོང་ལས་དང་། འགྲོ་འདུག་ལ་སོགས་བལྟ་ཅི་སྨོས། ཕྱག་དང་བསྐོར་བ་ལ་སོགས་པའང་རེ་ཤིག་ལ་དོར་ལ། ལུས་ཉྭ་བཞི་དང་རྩ་བཞི་གློད་ལ། ཅེས་པ་སོག་མ་ཕོན་ཐག་བཅད་པ་ལྟར། རྩོལ་མེད་ཀྱི་ངང་ལ་བཞག་པ་ནི། ལུས་རང་བབས་སོ།
འཇིག་རྟེན་གྱི་ལོང་གཏམ་དང་བརྫུན་དང་ཕྲ་མ་ལ་སོགས་ལྟ་ཅི་སྨོས། མདོ་དང་སྔགས་བཟླས་པ་ལ་སོགས་པའང་རེ་ཞིག་ལ་དོར་ལ། མཆུ་འཛེད་འཛུམས་ཀྱི་རྩོལ་བ་མེད་ཅིང་། ངག་སྨྲ་བརྗོད་དང་བྲལ་བ། ཅེས་པ་ངག་གི་རྩོལ་སྒྲུབ་གང་ཡང་མི་བྱ་བ་ནི། ངག་རང་བབས་སོ།
།མིག་གི་ལྟ་སྟངས་ཀྱིས། ཅེས་པ་མིག་གླང་པོ་ཆེའི་ལྟ་སྟངས་དང་འབྲེལ་བ་སྟེ། གླང་པོ་ཆེ་མིག་འཛུམས་པ་བུལ་བའམ། འཛུམ་མི་ཤེས་པར་ཧད་དེ་འདུག་པ་ལྟར། མིག་གི་འབྲས་བུ་གཡས་གཡོན་ལ་སོགས་པ་གང་དུ་ཡང་མིག་ཡོ་བར། མདུན་གྱི་དངོས་པོ་ཕྲ་རགས་གང་རུང་ལ་གཅེར་གྱིས་བལྟས་ལ། སྤུ་རིས་ལ་སོགས་པ་བརྟག དཔྱད་མེད་པར་སེམས་མི་ཡེངས་པའི་རྟེན་ཙམ་དུ་ཧད་དེ་བཞག་གོ
།ཡུམ་ལས། གླང་པོ་ཆེའི་ལྟ་སྟངས་ཀྱིས་བལྟ་བར་འདོད་པའི་བྱང་ཆུབ་སེམས་དཔའ་སེམས་དཔའ་ཆེན་པོས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསླབ་པར་བྱའོ། །ཅེས་དང་།
ས་ར་ཧས། མིག་ནི་མི་འཛུམས་ཡིད་ནི་གང་དགར་བཞག །ཅེས་དང་། ལྷན་ཅིག་སྐྱེས་པ་ཚིག་གིས་མི་མཚོན་ཏེ། སློབ་དཔོན་མན་ངག་མིག་གིས་མཐོང་བར་འགྱུར། ཅེས་དང་།
དུས་འཁོར་མན་ངག་གི་རྒྱུད་ལས། ཧར་བསྒོམ་ཆེན་པོའི་མན་ངག་ཡིན། ཅེས་དང་།
དམ་པ་རིན་པོ་ཆེས། ལྟ་སྟངས་ཀྱིས་རིག་པ་བསྟོད་ལ་མནན་ན་ཕྲ་རགས་ཀྱི་རྟོག་པ་འགག །ཅེས་སོ།
།ཡིད་བསྒོམ་འདོད་ཀྱི་རྟོག་པ་དང་བྲལ་ཏེ། ཅེས་པ། འདས་པའི་རྗེས་མི་གཅོད། མ་འོངས་པའི་སྔོན་མི་བསུ། ད་ལྟར་གྱི་བློ་ལ་ལས་མི་གཞོལ།
ཐ་ན་སྔོན་འགྲོ་བསྒོམ་པ་ཡིན་སྙམ་པའི་རྟོག་པ་ཡང་མི་བྱ་བར། ཅེས་པ་རང་བབས་རྣམ་གསུམ་གྱི་སྟེང་དུ་བཟོ་མེད་དུ་ལྷོད་ཀྱིས་གློད། འཛིན་མེད་དུ་ཤིགས་ཀྱི་བཤིག་ལ་བཅས་བཅོས་གང་ཡང་མེད་པའོ།
ཧད་དེ། ཅེས་པ་མིག་མི་འཛུམ་པས་ནའོ། །ཕྱད་དེ། ཅེས་པ་ཡིད་གང་ལའང་འཛིན་པ་མེད་པའོ། །ལྷོག་མེད་ཀྱི་ངང་དུ་ལས་པ་ནི། སེམས་རང་བབས་སོ།
སྡུད་པ་ལས། འདུ་ཤེས་རྣམ་པར་བཤིག་ནས་སྤོང་བ་ཕ་རོལ་འགྲོ། །ཅེས་དང་།
མ་གཅིག་ལབས་ཀྱི་སྒྲོན་མའི་ཞལ་ནས། ལུས་གནད་ཉྭ་བཞི་གློད་པ་བཅེས། །ངག་གནད་ལྐུགས་པར་སྡོད་པ་གཅེས། །སེམས་གནད་འདུ་ཤེས་བཤིག་པ་གཅེས། །ཅེས་སོ། །དམིགས་པ་དང་པོའོ།
།དེ་ལྟ་བུའི་ངང་ལས། ལྷ་འདོད་ཆགས་སྐྱེས་པ་བཞིན་དུ་ཧད་དེ་ལུས་པ་དེ། སྔོན་འགྲོ་དང་པོའི་ཚད་ཡིན་ཏེ། ཐ་མལ་གྱི་ཤེས་པ་ཞེས་ཀྱང་བྱ། །དང་པོའི་སེམས་ཞེས་ཀྱང་བྱ་སྟེ། ཆད་པ་ངལ་བསོ་བ་ལ་སོགས་པའི་དུས་སུ་སེམས་ཅན་ཀུན་ལ་འཆར་ཏེ། ངོས་མི་ཟིན་པས་འཁོར་བར་འཁྱམས་པ་ཡིན་གསུང་ངོ་།
།ད་ནི་དུས་ཐམས་ཅད་དུ་ངོས་ཟིན་པར་བྱས་ཏེ། ཟན་ཟ་བ་ལ་སོགས་པའམ། ཕྲེང་བ་ལྟ་བུ་ལག་ཏུ་ཅི་བྱུང་ལ་གླང་པོ་ཆེའི་ལྟ་སྟངས་ཀྱི། ཅེས་པ་གཅིར་གྱིས་བལྟས་ལ། ཧད་དེ་ལུས་པ་དེ་ལ་བཞག་གོ།
དེ་བཞིན་དུ་གཡས། ཅེས་པ། གཉིས་པ་གཡས་ལ་བསླབ་པ་ནི།
བྲམ་ཟེ་ཆེན་པོ་ས་ར་ཧས། མདུན་དང་རྒྱབ་དང་ཕྱོགས་བཅུ་རུ། །གང་གང་མཐོང་བ་དེ་དེ་ཉིད། །ཅེས་པས་གཡས་ཕྱོགས་སུ་ལྟ་སྟངས་བྱས་ལ། རང་བབས་གསུམ་གྱི་སྟེང་དུ་སྔར་བཞིན་འཇོག་པའོ།
།དེ་ལྟར་གང་ལ་བལྟས་ཀྱང་དང་པོ་མིག་སྦྲིད་ཆིལ་བ་ལྟ་བུ། གསལ་སྟོང་འཛིན་མེད་དུ་ཕྱམ་སོང་བ་ངའི་སྔོན་འགྲོ་རང་ཤར་འདུག་སྙམ་དུ་ངོས་བཟུང་ལ་ཧད་དེ་བཞག་གོ །ལུས་ཁུངས་མ་བྲིས་པ་རྣམས་ས་ར་ཧས་གསུངས་པའོ།
།གཡོན་ནམ། ཅེས་པ་གསུམ་པ་གཡོན་ལ་བསླབ་པ་ནི། གཡོན་ཕྱོགས་སུ་ལྟ་སྟངས་བྱས་ལ་སྔར་བཞིན་འཇོག་པའོ།
ནམ་མཁའ་ལ་སོགས་པ། ཅེས་པ། བཞི་པ་ནམ་མཁའ་ལ་བསླབ་པ་ནི། མདུན་གྱི་སྨིན་མཚམས་ཀྱི་ཐད་ཀའི་བར་སྣང་སྟོང་པའི་དཀྱིལ་དུ་ལྟ་སྟངས་ཀྱིས་ཧད་དེ་བལྟས་ལ། ཡིད་ནི། རང་ཚུ་ཁ་ནག་འདུག་པར་མི་བསམ། ཡུལ་ཕ་ཀ་ན་ཡོད་པར་མི་དཔྱད། རྟེན་ཅི་ལ་ཡང་མི་བཅའ། ངོས་གང་དུ་ཡང་མི་བཟུང་། སེམས་དང་ནམ་མཁའ་བསྲེས་ནས། སྟོང་སང་ངེ་བའི་ངང་ལ་ཧད་དེ་ཕྱད་དེ་བཞག་པས། ཤེས་པ་གསལ་ལ་མི་རྟོག་པ། ནམ་མཁའི་དབྱིངས་ཡོངས་སུ་དག་པ་ལྟ་བུ། རང་རིག་རང་གསལ་དུ་རྗེན་ལྷང་གིས་འབྱུང་ངོ་།
།སེམས་ནི་ནམ་མཁའ་ལྟ་བུར་བཟུང་བྱས་ཏེ། །ནམ་མཁའི་རང་བཞིན་དུ་ནི་སེམས་ཉིད་བཟུང་བར་བྱ། །ཅེས་དང་།
གདོད་ནས་དག་པ་ནམ་མཁའི་རང་བཞིན་ལ། །བལྟས་ཤིང་བལྟས་ཤིང་མཐོང་བ་འགག་པར་འགྱུར། །ཅེས་དང་།
བྱང་ཆུབ་སེམས་འགྲེལ་ལས། དམིགས་པ་མེད་པའི་སེམས་སུ་ནི། །གནས་པ་ནམ་མཁའི་མཚན་ཉིད་ཡིན། །ནམ་མཁའ་བསྒོམ་པ་དེ་ཉིད་ཡིན། །སྟོང་ཉིད་བསྒོམ་པར་བཞེད་པ་ཡིན། །ཅེས་སོ།
།ཐག་ཉེ་རིང་ཅེས། ལྔ་པ་ཐག་ཉེ་བའམ་འཐུར་ལ་བསླབ་པ་ནི། ཅེས་པ་ཅུང་ཟད་འཕྲོ་བའམ། རྒོད་ན་ལྟ་སྟངས་དམའ་བར་བྱས་ཏེ། རང་བབས་གསུམ་གྱི་སྟེང་ནས་སྤྱིལ་བུ་འམ་མཐའ་མའམ། ལུང་པའི་སྲོལ་ལྟ་བུ་དམའ་སར་བལྟ་ཞིང་འཇོག་པའོ།
།དྲུག་པ་ཐག་རིང་པའམ། གྱེན་ལ་བསླབ་པ་ནི། བྱིང་བའམ། རྨུགས་པ་ལྟ་བུ་བྱུང་ན། ལྟ་སྟངས་མཐོ་བར་བྱ་སྟེ། རིག་པ་ལ་ངར་བླུད་ནས་རིའི་རྩེའམ། ནམ་མཁའི་མཐོང་ལྟ་བུ་མཐོ་སར་བལྟ་ཞིང་འཇོག་པའོ།
བྱིང་རྒོད་ཀྱི་དགྲ་མེད་ན་ཐད་ཀ་གཙོ་ཆེར་བལྟ་སྟེ། འདི་གཉིས་གེགས་སེལ་ལྟ་བུ་ཡིན་ནོ།
དེ་ལྟར་གང་ལ་བལྟས་ཀྱང་དང་པོ་མིག་སྦྲིད་ཆིལ་བ་ལྟ་བུ། གསལ་སྟོང་འཛིན་མེད་ལ་ཕྱམ་སོང་བ་དང་། ངའི་སྔོན་འགྲོ་རང་ཤར་ནས་འདུག་སྙམ་དུ་ངོས་བཟུང་ལ་ཧད་དེ་བཞག་གོ
།བདུན་པ་རླུང་ལ་བསླབ་པ་ནི། འཆི་མེད་འགྲེལ་པ་ལས། རླུང་གི་རལ་གྲི་བཟུང་ནས་ནི། །འགྲོ་དང་འོང་བའི་དབུགས་གཅོད་ཅིང་། །ལམ་གཉིས་རྣམ་པར་བཅོམ་ནས་ནི། །ས་སྟེང་དགའ་དང་བདེ་བ་རྒྱས། །ཅེས་དང་།
སེམས་ཉིད་ངལ་གསོ་ལས། རླུང་ནི་གར་འགྲོ་དེར་སེམས་འགྲོ། །དེ་ལུས་ཁྱིམ་ནང་བརྩོན་བཟུང་ནས། །ཡིད་ཀྱི་སྐྱེས་བུ་གསད་བྱས་ན། །དེ་མེད་སེམས་ནི་གང་དུ་འགྲོ། །ཅེས་དང་།
ཕྱག་རྒྱ་ཆེན་པོ་ཐིག་ལེ་ལས། རྣལ་འབྱོར་པས་ནི་རླུང་བསྒོམས་ན། །དངོས་གྲུབ་མྱུར་དུ་ཐོབ་པར་འགྱུར། །ཅེས་སོ།
།དེའང་རླུང་བཞོན་པ་དང་འདྲ། རྟོག་པ་སྐྱེས་བུ་དང་འདྲ་ལ། རྟ་བཟུང་བས་སྐྱེས་བུ་ཟིན་པ་ལྟར། རླུང་བཟུང་བས་ཡིད་ཟིན་པར་འགྱུར་རོ། །དེ་ལ་གསུམ་ལས།
དང་པོ་ནི། ལྷ་སྐུ་གསལ་སྟོང་རླུང་དང་བསྲེ། །རྣམ་རྟོག་མ་རིག་འགག་པར་འགྱུར།
།དེ་ལ་རང་བབས་གསུམ་གྱི་མཉམ་བཞག་གི་སྟེང་ནས། རང་ལུས་ལྷ་སྐུར་གསལ་བའི་ངང་ནས་རླུང་སྣ་སྒོར་རྟེན་ཙམ་བྱས་ཏེ་འཇམ་རླུང་བག་ཙམ་བཟུང་བས། སེམས་གནས་པ་ནི།
བསྐྱེད་རིམ་དང་རླུང་བསྲེ་བ་སྟེ། རྟོག་པ་ཐམས་ཅད་རང་འགག་ལ་འགག་པར་འགྱུར་རོ།
།གཉིས་པ་ནི། ཐ་མལ་ཤེས་པ་རླུང་དང་བསྲེ། །ཉམས་མྱོང་ཡར་ངོ་བཞིན་དུ་འགྱུར།
།དེ་ལ་རང་བབས་གསུམ་གྱི་སྟེང་ནས་སེམས་མ་བཅོས་ཐ་མལ་གྱི་ཤེས་པ་འོད་གསལ་བའི་ངང་ནས། རླུང་སྔར་བཞིན་བཟུང་བས།
སྣང་སེམས་དབྱེར་མེད་གསལ་ལ་རྟོག་མེད་དུ་འཆར་བ་ནི། ཕྱག་རྒྱ་ཆེན་པོ་དང་རླུང་དང་བསྲེ་བ་སྟེ། རྟོགས་པ་ཟླ་བ་ཡར་གྱི་ངོ་བཞིན་དུ་འཕེལ་བར་འགྱུར་རོ།
།གསུམ་པ་ནི། འོད་གསལ་ལྷ་སྐུ་རླུང་དང་བསྲེ། །མཐར་ཐུག་འབྲས་བུ་མྱུར་ཐོབ་འགྱུར།
།དེ་ལ་རང་བབས་གསུམ་གྱི་སྟེང་ནས། ལྷ་སྐུ་དང་ཕྱག་རྒྱ་ཆེན་པོ་གཉིས་ཀའི་ངང་ནས་རླུང་སྔར་བཞིན་བཟུང་བས། ཡུལ་སྣང་སྟོང་ཟུང་འཇུག །ལུས་བདེ་སྟོང་ཟུང་འཇུག །སེམས་གསལ་སྟོང་ཟུང་འཇུག་ཏུ་འཆར་ཏེ། དེ་ལ་མ་ཡེངས་པར་ཉམས་སུ་ལེན་པ་ནི། རབ་ཟུང་འཇུག་རླུང་དང་བསྲེ་བའོ། །དེས་རབ་ཟླ་བ་གཅིག །འབྲིང་ཟླ་བ་གསུམ། ཐ་མ་ཟླ་བ་དྲུག །ཤིན་ཏུ་ཐ་མས་ཟླ་བ་བདུན་གྱིས་སངས་མི་རྒྱ་མི་སྲིད་དོ།
།ཡང་ན།
།ལྷ་སྐུ་ཤེས་པ་རླུང་དང་བསྲེ། །རྟོག་པ་ཐམས་ཅད་འགག་པར་འགྱུར།
།ཐ་མལ་ཤེས་པ་རླུང་དང་བསྲེ། །རྟོགས་པ་ཡར་ངོ་བཞིན་དུ་འཕེལ།
།ཟུང་འཇུག་ཤེས་པ་རླུང་དང་བསྲེ། །ལོ་ཟླས་སངས་རྒྱས་མངོན་དུ་བྱེད།
།ཅེས་བླ་མའི་གསུང་སོ། །འོག་གི་རླུང་ལ་བསླབ་པ་གོང་དུ་བླངས་པའོ།
།བརྒྱད་པ་སྤྱོད་ལམ་ལ་བསླབ་པ་ནི། གཡས་གཡོན་ལ་སོགས་པ་ལ་བལྟ་ཞིང་བསླབ་པ། དེར་མ་ཟད་ཅེས་པ། དྲག་ལས་དང་རྒྱང་མིག་ཕྱོགས་བཞིར་གཏད་པ་ལ་སོགས་པ་སྤང་སྟེ། དལ་བུས་བག་དང་ལྡན་པ། འདོམ་གང་ཙམ་ལ་བལྟ་ཞིང་།
ཧད་དེ་ཆད་དེ་བ་ཅེས་པ། གསལ་སྟོང་འཛིན་མེད་ཉིད་ཀྱི་ངང་ནས་ཕྱམ་ཕྱམ་འགྲོ་བ་དང་། འཆག་པ་ཆེ་ཆུང་དུ་རྩ་ཆུ་འཆག་པའི་ཚེ། ཅེས་པ་གསལ་སྟོང་འཛིན་མེད་ཀྱི་ངང་ནས་འཆག །མ་སྲིང་བརྒྱས་མཐའ་མ་བསྐོར་ཡང་། ཉམས་ང་བག་ཚ་དང་བྲལ་བར་བྱ་སྟེ། ཅེས་པ། ཡ་ང་དང་ཞུམ་བ་ལ་སོགས་མེད་པར་ཧད་དེ་ཕྱད་དེ་བ་ལ་བཞག །དེ་བཞིན་དུ་ཉལ་བ། ལངས་པ། འདུག་པ། སྤྱོད་ལམ་རྣམ་བཞི་གང་གི་དུས་སུ་ཡང་གསལ་སྟོང་འཛིན་མེད་ཀྱི་ངང་ལ་མ་ཡེངས་པར་གནས་པར་བྱ་སྟེ།
སྡུད་པ་ལས། འགྲོ་འཆག་ཉལ་དང་འདུག་པར་ཤེས་བཞིན་རབ་ཏུ་ལྡན། །གཉའ་ཤིང་གང་ཙམ་བལྟ་ཞིང་འགྲོ་ལ་སེམས་འཁྲུལ་མེད། །ཅེས་སོ།
།བརྟག་གཉིས་ལས། བཟའ་དང་བཏུང་དང་བླུགས་པ་དང་། །ཉལ་དང་ལོག་དང་སེམས་པ་ན། །ཕྱག་རྒྱ་ཆེན་པོ་མངོན་འདོད་པས། །དེ་ནས་མངོན་དུ་འགྲོ་བར་འགྱུར། །ཅེས་སོ།
།མདོར་ན་གཏམ་སྨྲ་བ། ཅེས་པ། དགུ་པ་གཏམ་སྣ་ཚོགས་ལ་བསླབ་པ་ནི། སྔར་གྱི་ངང་ནས་མི་མང་པོའི་གསེབ་ཏུ་རང་ཡང་གཏམ་དོ་གལ་ཆུང་ངེ་བ་སྨྲ་བའམ། གཞན་ལོང་གཏམ་ངེས་མེད་སྣ་ཚོགས་གཏོང་བའི་སར་བསྡད་ལ་བསྲེའོ།
།མདོ་འདོན་པ་ཅེས་པ། བཅུ་པ་མདོ་སྣ་ཚོགས་ལ་བསླབ་པ་ནི། སྔར་གྱི་ངང་ནས། ཤེས་རབ་སྙིང་པོའམ། མཚན་བརྗོད་ལ་སོགས་པ་མདོ་རིང་པའམ། ཐུང་པ་བློ་ལ་བྱང་བ་འདོན་ཅིང་བསྲེའོ།
།སྔགས་བཟླས་པ། ཅེས་པ། བཅུ་གཅིག་པ་སྔགས་སྣ་ཚོགས་ལ་བསླབ་པ་ནི། རང་བབས་གསུམ་གྱི་སྟེང་དུ་ཞོགས་ཚད་བཞག །དེ་ནས་མིག་གླང་པོ་ཆེའི་ལྟ་སྟངས་དང་མ་བྲལ་བ། གསལ་སྟོང་འཛིན་མེད་ཀྱི་རྩི་མ་ཤོར་བའི་ངང་ལས། མ་ཎི་པདྨེ་ལ་སོགས་རྐང་ཐུང་པའམ། རིང་བ་བཟླས་ཤིང་བསྲེ་བའོ།
ཉན་བཤད་ལ་སོགས་པ། ཅེས་པ། བཅུ་གཉིས་པ་ཆོས་ཉན་བཤད་རྣམ་རྟོག་དང་བསྲེ་བ་ནི། གསལ་སྟོང་འཛིན་མེད་ཀྱི་ངང་ནས་ཆོས་ཉན་ཅིང་བཤད་དོ།
།ཡང་རང་བབས་གསུམ་གྱི་སྟེང་ནས། རྣམ་རྟོག་འགྱུར་བཅུག་པས། དེ་ཀའི་ངོ་བོ་ལ་གཅེར་བལྟས་པས། རྟོགས་པ་ཟུངས་མ་ཐུབ་པར་རང་སྟོང་དུ་ལྷན་གྱིས་འཆར་རོ། །ཡང་། རང་ལུགས་སུ་བཞག་ཅིང་བསྒོམ་མོ།
།རྟོག་པ་འགྱུས་པ་དེ་ཚུར་བཀུག་ནས་སྤོང་བ་ལྟ་བུ་མ་ཡིན་ལ། དེ་ཉིད་ལམ་དུ་འཁྱེར་བ་སྟེ། རྟོག་པ་ཏོལ་སྐྱེས་པའི་ཚེ། དེའི་རང་བཞིན་ཤེས་པར་བྱས་ནས་དེ་ལ་བཟོ་མི་བྱེད། རྗེས་སུ་མི་འབྲེང་པར་གནས་རུང་འགྱུས་རུང་། དེ་ཉིད་རང་སྟོང་ཆོས་སྐུའི་རྩིས་ཟིན་པར་བྱའོ།
།མཚན་བརྗོད་ལས། སེམས་ཀྱི་སྐད་ཅིག་དོན་ཀུན་རིག །ཅེས་དང་།
སེམས་ཉིད་ངལ་བསོ་ལས། གང་སྐྱེས་གཉུག་མ་ཉིད་ཡིན་ཕྱིར། །གང་ཤར་དྲན་པས་མ་བརྗེད་ན། །དེ་ཤར་སྟོང་པ་ཉིད་བདག་ཏུ། །རྣལ་འབྱོར་རྒྱལ་པོ་གདོན་མི་ཟ། །ཅེས་དང་།
དབུ་མ་ལས། གང་གིས་དངོས་གཅིག་དེ་བཞིན་ཉིད་མཐོང་བ། །དེ་ཡི་དངོས་ཀུན་དེ་བཞིན་ཉིད་དུ་མཐོང་། །ཅེས་དང་།
ཡུམ་ལས། གཟུགས་ཀྱི་དེ་བཞིན་ཉིད་ཤེས་ན། ཆོས་ཐམས་ཅད་ཀྱི་མདོ་དང་རྒྱས་པ་ཤེས་པར་འགྱུར་རོ། །ཅེས་དང་།
ཡུམ་ལས། བྱང་ཆུབ་སེམས་དཔའ་རྣམས་ཀྱི་ཉོན་མོངས་པ་ནི་རྣམ་པར་རྟོག་པའོ། །སྤང་བྱ་ནི་རྣམ་པར་རྟོག་པའོ། །ཅེས་པས།
ཉོན་མོངས་པ་གཉེན་པོས་སྤངས་པའང་མེད། ཉོན་མོངས་པ་རང་བརྒྱུད་པའི་དྲི་མས་ཀྱང་མ་གོས་པའི་འཛིན་མེད་དེ་ལ། ཉོན་མོངས་པའི་ཡེ་ཤེས་སམ་རྣམ་རྟོག་ཆོས་སྐུའི་ལམ་ཁྱེར་ཞེས་བྱའོ། །རྣམ་རྟོག་དང་ཆོས་སྐུའི་བར་ན་ངོ་ཤེས་མ་ཤེས་སམ། རིག་མ་རིག །རྟོགས་མ་རྟོགས་ཀྱི་ཁྱད་ཙམ་ལས་མེད་དོ།
གང་སྤངས་ཤིང་གོས་མེད་ཡེ་ཤེས་ལྡན། ཅེས་དང་།
རྡོ་རྗེའི་ཚིག་རྐང་ལས། ཆོས་སྐུའི་ནམ་མཁར་རྟོགས་པའི་སྤྲིན་ཚོགས་ལས། །དུག་ལྔའི་གློག་འགྱུ་ཡེ་ཤེས་ཆེན་པོར་བལྟོས། ཅེས་སོ།
ཏོལ་སྐྱེས་ཀྱི་ཤེས་པ་ངོས་བཟུང་ནས། །འབྲལ་མེད་དུ་སྐྱོང་ཞིང་གོམས་འདྲིས་བྱེད་པ་ཡིན་ནོ་གསུང་ངོ་།
།མདོར་ན་ཉིན་མཚན་མཉམ་རྗེས་ཐམས་ཅད་ཀྱི་དུས་སུ། གསལ་སྟོང་འཛིན་མེད་ཀྱི་ངང་ལས། ཧད་དེ་ཆད་དེ་བ་དེ་ལ་མ་ཡེངས་པར་བྱའོ།
དེ་ནས་ངོ་སྤྲད་པ་ནི། དེ་ལྟ་བུའི་སྔོན་འགྲོ་རྣམས་ཐེམས་པའི་དུས་སུ། གཏོར་ཚོགས་བཟང་པོ་དང་། ཅེས་པ། དཀོན་མཆོག་གི་རྟེན་གྱི་དྲུང་དུ་ཆུ་གསུམ་སྔོན་དུ་འགྲོ་བའི་མཆོད་པ་ལྔ་དང་། རྒྱན་བཟང་པོ་མདའ་དར་དང་བཅས་པའི་གཏོར་མ་ལྔ་དང་། ཚོགས་ཀྱི་ཡོ་བྱད་བཟང་པོ་དང་བཅས་པ་བཤམ་མོ། དེ་ནས་སློབ་དཔོན་ལྷའི་རྣལ་འབྱོར་ལ་ཞུགས་ཤིང་། བཟླས་པ། མདུན་བསྐྱེད་ཀྱི་མཆོད་པ་དང་། གཏོར་མ་བཏང་ངོ་།
དེ་ནས་མདུན་གྱི་ནམ་མཁའི་གནས་སུ་རིན་པོ་ཆེའི་ཁྲི་སེང་གེ་བརྒྱད་ཀྱིས་བཏེགས་པའི་སྟེང་དུ་པདྨ་དང་ཉི་ཟླའི་གདན་ལ་རྩ་བའི་བླ་མ་སྐུ་ལྟ་བས་ཆོག་མི་ཤེས་པ་ཅིག་བསམ་མོ། དེ་ལ་བརྒྱུད་པའི་བླ་མ་རྣམས་དང་། སངས་རྒྱས་དང་བྱང་ཆུབ་སེམས་དཔའ་ལ་སོགས་དཔག་ཏུ་མེད་པས་བསྐོར་བ། སྤྲིན་ཕུང་གཏིབས་པ་ལྟར་བཞུགས་པར་བསམ་མོ། དེ་དག་ལ་བློས་དངོས་སུ་བཤམས་པའི་མཆོད་པ་ལྔ་དང་།
གསེར་གྱི་མཎྜལ་ཕུལ་ལ་ཅེས་པ། དད་གུས་བྱ་ཞིང་། སྙིམ་པ་མེ་ཏོག་དང་བཅས་པས་ཐལ་མོ་སྦྱར་ཏེ།
ངག་ཏུ་རྩ་བ་དང་བརྒྱུད་པའི་བླ་མ་རྣམས་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། ཡི་དམ་ལྷ་ཚོགས་རྣམས་ཀྱིས། བདག་ལ་ཕྱག་རྒྱ་ཆེན་པོའི་དོན་ངོ་འཕྲོད་ཅིང་། རྟོགས་པ་ཁྱད་པར་ཅན་རྒྱུད་ལ་སྐྱེ་བར་བྱིན་གྱིས་བརླབས་ཏུ་གསོལ།
ཡེ་ཤེས་པའི་ཆོས་སྐྱོང་བའི་སྲུང་མ་རྣམས་ཀྱིས་བདག་ཕྱག་རྒྱ་ཆེན་པོ་ཞུ་བ་དང་། ཉམས་སུ་ལེན་པ་ལ་བར་དུ་གཅོད་པ་ཐམས་ཅད་མི་འབྱུང་བར་མཛད་དུ་གསོལ།
ཞེས་གསོལ་བ་ལན་གསུམ་འདེབས་པ་དང་། ལུས་རྣམ་པར་སྣང་མཛད་ཀྱི་ཆོས་དྲུག་བཅས་ནས། རང་བབས་གསུམ་གྱི་སྟེང་དུ་འཇོག་ཏུ་བཞུག་གོ
།རྐུན་བུའི་ངོ་སྤྲོད་ཞེས་པ། སྔོན་འགྲོ་རང་བབས་རྣམ་གསུམ་ཟེར་ཡང་། དངོས་གཞི་རང་ཡིན་ཏེ། རང་སེམས་སྐྱེ་མེད་འདི་ཀ་ཕྱག་རྒྱ་ཆེན་པོ་ཡིན་ནོ།
།ཞེས་དང་པོ་རང་ནས་བསྟན་ན། གོ་བར་སོང་ནས་ཡིད་ཆེས་མི་ཆུད་པས། འདི་སྔོན་འགྲོ་ཡིན། དངོས་གཞི་ཟབ་མོ་ཅིག་ད་བཟོད་ཡོད་པ་སྐད་དུ་བྱས་ནས་རང་བབས་གསུམ་གྱི་སྟེང་དུ་བཅུག་པས། གོ་ཡུལ་དུ་མ་ལམ་སྔར་རིག་པ་གསལ་སྟོང་འཛིན་མེད་དུ་འཆར་རོ། །དང་པོ་ནས་འདི་ཡིན་མི་ཟེར་བས་གསང་ནས་རྐུ་ཐབས་སུ་ངོ་སྤྲོད་པའོ།
།དེ་ལུང་སྦྱོར་དང་ལྡན་པས་ཡིད་ཆེས་པར་བྱས་ཏེ། དེ་ལྟར་རང་བབས་གསུམ་གྱི་སྟེང་དུ་བཟོ་མེད་དུ་རང་སར་གློད་བཞག་པས། ཕ་ཀར་སྣང་བ་མ་འགགས་ལ། ཚུ་ཀར་འཛིན་པ་མ་ཞུགས་པའི་གསལ་སྟོང་འཛིན་མེད་དུ་རྗེན་ལྷང་གིས་འཆར་རོ།
།ནཻ་གུ་མས། དེ་ཕྱིར་སྣང་བ་སྣ་ཚོགས་ལ། །སྒོ་ལྔའི་རྣམ་ཤེས་གསལ་དྭངས་ལ། །ཡིད་ཀྱི་འཛིན་པ་མ་ཞུགས་པ། །དེ་ནི་གསལ་སྟོང་དབྱེར་མེད་པ། །ཞེན་མེད་སྒྱུ་མ་རང་ཤར་རོ། །ཅེས་སོ།
།དེ་ནས་གཡས་གཡོན་ལ་སོགས་པ་ཐམས་ཅད་ལ་བསླབས་ནས། ཅིར་སྣང་ཐམས་ཅད་གསལ་སྟོང་འཛིན་མེད་དུ་འཆར་དུ་འཇུག་པའོ།
དེ་ལ་ཐ་མལ་གྱི་ཤེས་པ་ཞེས་བྱ་སྟེ། ཐ་མལ་ཤེས་པ་སྙིང་གི་དབུས་སུ་སད། །ད་ནི་སུ་ལའང་དྲི་བར་མི་བྱའོ། །ཅེས་དང་།
ཏོག་རྩེ་པས། ཐ་མལ་ཤེས་པ་སྙིང་གི་དབུས་སུ་སད། །ཚོགས་དྲུག་དག་ན་བདེ་ཆེན་རྒྱུན་ཆད་མེད། །བྱས་པ་ཐམས་ཅད་དོན་མེད་སྡུག་བསྔལ་རྒྱུ། །བསྒོམ་དུ་མེད་དོ་གཉུག་མའི་ངང་ལ་གཞོག
།དེ་ལ་བླུན་སྐད་དུ་ཐ་མལ་ཤེས་པ། ཆོས་སྐད་དུ་རྣམ་པར་མི་རྟོག་པའི་ཏིང་ངེ་འཛིན་ཏེ།
སམ་བུ་ཏྲ་ལས། མི་རྟོག་ཏིང་འཛིན་ལ་གནས་ན། མཁའ་བཞིན་བྱེད་པ་མེད་པར་གནས། ཅེས་སོ།
།དེ་ལ་སྐུ་གསུམ་རང་ཤར་ཏེ། །ཡེ་ཤེས་དགོངས་པའི་རྒྱུད་ལས། སྣ་ཚོགས་གསལ་བ་སྤྲུལ་པའི་སྐུ། །བདེ་བར་ཤར་བ་ལོངས་སྤྱོད་རྫོགས། །དབྱེར་མེད་བདེ་བ་ཆེན་པོའི་སྐུ། །ཅེས་དང་། དམ་ཚིག་བཀོད་པ་ལས། ཆོས་རྣམས་གསལ་བ་སྤྲུལ་པའི་སྐུ། །དེ་ལ་མི་རྟོག་ཆོས་ཀྱི་སྐུ། །རྟོག་བྲལ་བདེ་ཕྱིར་ལོངས་སྤྱོད་རྫོགས། །བྱང་ཆུབ་ཚུལ་འདི་བསྟན་པའོ། །ཅེས་སོ།
།དེ་ལ་ལྷན་ཅིག་སྐྱེས་པ་སྟེ། བླ་མའི་ལུང་ལ་བསྟན་ཏེ་གུས་འབད་ན། །ལྷན་ཅིག་སྐྱེས་པ་འབྱུང་བར་ཐེ་ཚོམ་མེད། །ཁ་དོག་ཡོན་ཏན་ཡི་གེ་དཔེ་དང་བྲལ། །སྨྲ་རུ་མི་བཏུབ་བདག་གིས་གྱི་ན་མཚོན། །གཞོན་ནུ་མའི་བདེ་བ་སྙིང་ལ་ཞེན་པ་བཞིན། །དབང་ཕྱུག་དམ་པ་དེ་ནི་སུ་ལའང་བསྟན་ནུས་སམ།
།དེ་ལ་གསུམ། སྣང་བའམ། སྟོང་པའམ། སྐྱེ་མེད་ཀྱི་ལྷན་སྐྱེས་ཏེ།
ལྷན་ཅིག་སྐྱེས་པ་རྣམ་གསུམ་གྱིས། །གང་ལ་དེ་སྐྱེས་གང་དུ་ནུབ། །གང་དུ་གནས་འགྱུར་གསལ་བར་མི་ཤེས་སོ། །རྩ་བ་བྲལ་བ་དེ་ཉིད་གང་སེམས་པ། །བླ་མའི་མན་ངག་ཐོབ་པ་དེས་ཆོག་གོ །ཅེས་སོ།
།དེ་ལ་དྲན་མེད་དམ། ཡིད་ལ་བྱར་མེད་དེ།
།ཡུམ་ལས། གང་དྲན་པ་མེད་ཅིང་ཡིད་ལ་བྱར་མེད་པ་དེ་ནི་སངས་རྒྱས་རྗེས་སུ་དྲན་པའོ། །ཆོས་དང་། དགེ་འདུན་ལ་ཡང་འདྲེའོ།
།དེ་ལ་སེམས་ཉིད་སྐྱེ་བ་མེད་པ་ཆོས་ཀྱི་སྐུ་སྟེ། བསམ་མི་ཁྱབ་ཀྱི་རྒྱུད་ལས། སེམས་ཉིད་ལྷན་ཅིག་སྐྱེས་པ་ཆོས་ཀྱི་སྐུ། །སྣང་བ་ལྷན་ཅིག་སྐྱེས་པ་ཆོས་སྐུའི་འོད། སྣང་སེམས་དབྱེར་མེད་ལྷན་ཅིག་སྐྱེས་པའོ། །ཅེས་སོ།
།དེ་ལ་འོད་གསལ་ཏེ། བརྒྱད་སྟོང་པ་ལས། སེམས་ནི་སེམས་མ་ཆིས་ཏེ། སེམས་ཀྱི་རང་བཞིན་འོད་གསལ་བའོ། །ཅེས་སོ།
།དེ་ལ་ཕྱག་རྒྱ་ཆེན་པོ་སྟེ། །མ་གཅིག་ལབ་སྒྲོན་གྱིས། རྣམ་རྟོག་རང་གཟུགས་ཤོར་བ་ལ། །ཕྱག་ཆེན་མིང་དུ་བཏགས་པ་ཡིན། །ཅེས་སོ།
།དེ་ལ་བསམ་བཞག་མེད་པ་སྟེ། །ནམ་མཁའ་རིན་པོ་ཆེའི་མདོ་ལས། འདི་ལ་གསལ་བྱ་ཅི་ཡང་མེད། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་བདག་བལྟ། །ཡང་དག་མཐོང་ན་རྣམ་པར་གྲོལ། །ཅེས་སོ།
།དེ་ལ་སྒོམ་མེད་དེ། བརྟག་གཉིས་ལས། གང་ཕྱིར་ཡིད་ཀྱིས་མི་བསྒོམ་པར། །འགྲོ་བ་ཐམས་ཅད་བསྒོམ་པར་བྱ། །ཐམས་ཅད་ཆོས་ནི་ཡོངས་ཤེས་ན། །བསྒོམ་པ་ཉིད་ནི་བསྒོམ་པ་མིན། །ཅེས་སོ།
།དེ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། མདོ་ལས། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགག་ནམ་མཁའི་ངོ་བོ་ཉིད། །སོ་སོ་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུམ་ལ་ཕྱག་འཚལ་ལོ། །ཅེས་དང་།
ཀླུ་སྒྲུབ་ཀྱིས། གང་ཡང་མི་རྟོག་ཅིར་ཡང་མ་སེམས་ཅིག །བཅས་བཅོས་མ་བྱེད་རང་བཞིན་ལྷུག་པར་བཞོག །མ་བཅོས་པ་ནི་རང་བཞིན་སྐྱེ་མེད་མཛོད། །ཤེས་རབ་ཕ་རོལ་ཕྱིན་པ་གཉིས་མེད་ལམ། །དུས་གསུམ་སངས་རྒྱས་ཀུན་གྱི་གཤེགས་ཤུལ་ཡིན། །ཅེས་སོ།
།དེ་ལ་དམིགས་མེད་དེ། གང་ལ་དམིགས་ཀྱང་དམིགས་པ་དེ་ཡིས་ཐར་པ་སྒྲིབ། །བཟང་པོར་བཏགས་ཀྱང་དེ་ཡི་ནད་ཀྱིས་དམན་པར་ལྷུང་། །དམན་པའི་ལམ་ལ་བཏགས་ན་རྣམ་སྨིན་རྒྱུན་མི་འཆད། །བཏགས་མེད་པའི་སེམས་ནི་ནམ་མཁའ་ལྟ་བུར་གནས། །ནམ་མཁའ་གནས་པ་མེད་པ་དེ་ཉིད་ཐ་སྙད་བྲལ། །བྲལ་བའི་སེམས་ལ་བཏགས་དང་དཔྱད་པ་མི་དགོས་ཀྱི། །རང་བཞིན་བཞག་པ་ཇི་ལྟ་བུ་ཉིད་དེ་བཞིན་ཉིད། །འབྲས་བུས་ཐོགས་པ་མེད་པ་གདོད་ནས་རང་ལ་གནས། །དེ་ཕྱིར་རེ་དང་དོགས་པའི་གཉེན་པོས་འཆིང་མི་དགོས། །ཅེས་སོ།
།དེ་ལ་རྟེན་མེད་དམ། རྩ་བྲལ་ཏེ། ཨཱཪྻ་དེ་ཝས། དེ་དག་རིག་པ་བློ་བརྟེན་དང་། །བྲལ་བའི་ཉམས་ནི་སྐྱེ་བར་འགྱུར།
སུ་ཀ་སིདྡྷིས། རིག་པ་རྟེན་མེད་དུ་ཞོག་དང་རྣལ་འབྱོར་པ། །ཅེས་དང་།
གང་ཚེ་འདི་ལ་རྩ་བ་མེད་པར་རྟོགས་པ་ནི། །ད་ལྟ་ཉིད་དུ་གཉིས་མེད་ངེས་པར་འགྱུར་བ་ཡིན། །ཅེས་སོ།
།སམ་བྷུ་ཏྲ་ལས། འདི་ནི་གཉིས་སུ་མེད་པར་བརྗོད། །འདི་ནི་བྱང་ཆུབ་སེམས་མཆོག་ཉིད། །རྡོ་རྗེ་རྡོ་རྗེ་སེམས་དཔའ་དཔལ། །རྫོགས་པའི་སངས་རྒྱས་བྱང་ཆུབ་ཉིད། །འདི་ནི་ཤེས་རབ་ཕ་རོལ་ཕྱིན། །ཕ་རོལ་ཕྱིན་པ་ཀུན་གྱི་དངོས། །མཉམ་ཉིད་བསམ་བྱ་ཉིད་གསུངས་པ། །སངས་རྒྱས་ཀུན་མཆོག་བསྒོམ་པའོ།
།ཞེས་པ་ལ་སོགས་པ་མིང་གི་རྣམ་གྲངས་མཐའ་ཡས་པར་ཤེས་པར་བྱའོ།
།དེ་ལ་ཕྱི་ཡུལ་གྱི་ཉེས་པས་མི་དགོས་པ་ནི། ཡུལ་རྣམས་བརྟེན་པས་ཡུལ་གྱིས་མི་དགོས་ཏེ། ཨུཏྤལ་འདབ་མ་ཆུ་ཡིས་མི་དགོས་ཤིང་། །ཅེས་སོ།
།ནང་དུ་རྟོགས་པས་མི་གནོད་པ་ནི། གང་ལྟར་རྩ་བ་རྣལ་འབྱོར་སྐྱབས་སུ་འགྲོ། །དུག་གི་སྔགས་ཅན་དུག་གིས་ག་ལ་ཚུགས། །ཅེས་སོ།
།མཚན་མ་མེད་པའི་དཔེ། གཟིངས་ཐོག་ནས་བྱ་འཕུར་བ་ལྟ་བུར་བསྟན་པ་ནི། ཡུལ་ཉིད་རྣམ་པར་དག་སྟེ་བསྟེན་བྱ་མིན། །སྟོང་པ་འབའ་ཞིག་གིས་ནི་དཔྱད་པར་བྱ། །ཇི་ལྟར་གཟིངས་ལ་འཕུར་བའི་བྱ་རོག་བཞིན། །སྐོར་ཞིང་སྐོར་ཞིང་སླར་ཡང་དེ་རུ་འབབས། །ཅེས་སོ།
།དེ་ཉིད་རྟོགས་པའི་དཔེ། ཆུ་དང་རླབས་ལྟ་བུ་ནི། གང་ཞིག་སེམས་ལ་རྣམ་འཕྲོས་པ། །དེ་སྲིད་མགོན་པོའི་རང་བཞིན་ཏེ། །ཆུ་དང་རླབས་དག་གཞན་ཡིན་ནམ། །སྲིད་དང་མཉམ་ཉིད་ནམ་མཁའི་རང་བཞིན་ནོ། །ཅེས་སོ།
།ཆོས་སྐུ་ལ་ཆོས་སྐུ་ཐིམ་པའི་དཔེ། ཉི་ཟེར་གྱི་རྡུལ་ལྟ་བུ་ནི། གང་ཞིག་རྟེན་དེ་གང་ཐོབ་པ། །དགོངས་པ་གང་ཡིན་དམ་པར་སྐྱོལ་བ་ན། །ཉི་ཟེར་ལྐུགས་པ་རྡུལ་བཞིན་བརླག །སྙིང་ག་ཉིད་དུ་ནུབ་པར་འགྱུར་བ་ཡིན། །ཅེས་སོ།
།རོ་གཅིག་པའི་དཔེ། ཆུ་ལ་ཆུ་བཞག་པ་ལྟ་བུ་ནི། ཇི་ལྟར་ཆུ་ལ་བཞག་ན། །དེ་སྙེད་ཆུ་རུ་རོ་མཉམ་འགྱུར།
།སྐྱོན་དང་ཡོན་ཏན་རྣམ་ལྡན་སེམས། །མགོ་བོས་གང་ཡང་མཚོན་མི་འགྱུར། །ཅེས་སོ།
ཐུག་ཕྲད་ཀྱི་དཔེ། ནགས་ལ་མེ་མཆོད་པ་ལྟ་བུ་ནི། །རྨོངས་པ་དག་ལ་གཉེན་པོ་གང་ཡང་མེད། །ནགས་ལ་མཆེད་པའི་མེ་ལྕེ་བཞིན། །གདོབ་ཏུ་བབ་པའི་འདི་ལྟར་སྣང་བ་ཀུན། །ཁྱོད་ཀྱི་རྩ་བ་སྟོང་པ་ཉིད་དུ་ལྷན་ཅིག་བྱོས། །ཅེས་སོ།
།ཐིམ་པའི་དཔེ། ལན་ཚྭ་ཆུ་རུ་ཞུ་བ་ལྟ་བུ་ནི། ཇི་ལྟར་ལན་ཚྭ་ཆུ་ལ་ཐིམ་པ་བཞིན། །དེ་ལྟར་སེམས་ནི་རང་བཞིན་ལ་ཐིམ་འགྱུར། །དེ་ཚེ་བདག་དང་གཞན་ནི་མཉམ་པར་མཐོང་། །འབད་དེ་བསམ་གཏན་བྱས་པ་ཅི་བྱར་ཡོད། །ཅེས་སོ།
།སྣང་སྟོང་རོ་གཅིག་པའི་དཔེ། ཆུ་དང་མར་མེ་ལྟ་བུར་བསྟན་པ་ནི། །རྦ་རླབས་མེད་པའི་དབང་ཕྱག་མཆོག །རྙོག་པ་མེད་པའི་བསམ་གཏན་འགྱུར། །ཆུ་དང་མར་མེ་རང་གསལ་གཅིག་ཏུ་ཞོག །འགྲོ་འོང་ང་ཡི་ལེན་མི་འདོར་རོ། །ཅེས་སོ།
།ཕྱག་རྒྱ་ཆེན་པོའི་རྩིས་ཟིན་ན། །དྲན་རྟོག་ཐམས་ཅད་དྲན་མེད་ཀྱི་ལོངས་སྤྱོད་དང་གསོལ་འདེབས་ཡིན་ཏེ། ཁོ་ན་ཉིད་ལ་གཉེན་པོ་མེད་ཀྱི་རང་སར་ཞོག །རྣམ་རྟོག་ཇི་སྙེད་ཤར་ཀྱང་གཉུག་མ་ཉིད་ལ་ཤར། །དྲན་པ་རང་སར་གྲོལ་ན་དྲན་མེད་ལྷུག་པ་ཉིད། །གང་ཡང་ལོངས་སྤྱོད་སྣང་བར་ཤེས་ཤིང་དྲན་མེད་གསོལ། །ཅེས་དང་།
སམ་བྷུ་ཏྲ་ལས། གཟུགས་རྣམས་སྣ་ཚོགས་བལྟ་བ་དང་། །སྒྲ་ནི་རྒྱས་པར་ཉན་པ་དང་། །སྨྲ་བ་དང་ནི་རྒོད་པ་དང་། །ལས་དེ་རྣམས་ནི་བྱེད་པ་ན། །སེམས་ནི་གཞན་དུ་མི་འགྲོ་བས། །དེ་ཉིད་རིག་པའི་རྣལ་འབྱོར་ལ། །རྣལ་འབྱོར་རྒྱུན་དུ་སྐྱེ་བར་འགྱུར། །ཅེས་དང་།
དབང་པོ་གང་དང་གང་ལམ་ཉིད། །དེ་དང་དེའི་ངོ་བོར་འགྱུར། །མཉམ་པར་མ་བཞག་རྣལ་འབྱོར་པ། །རྟག་པར་ཤིན་ཏུ་མཉམ་བཞག་ཉིད། །ཅེས་དང་།
ལྕེ་སྒོམ་གྱིས། ཇི་ལྟར་རྩྭ་ཤིང་ཕུང་པོ་མེ་འབར་བ། །རླུང་གིས་བསྐྱོད་ན་རབ་ཏུ་ཆེར་འབར་ལྟར། །རྟོགས་པའི་ཡེ་ཤེས་དངོས་རྣམས་འཇོམས་པ་ལ། །ཉོན་མོངས་རྣམ་རྟོག་ཡེ་ཤེས་འཕེལ་བའི་གྲོགས། །ཅེས་སོ།
།ལུང་དེ་རྣམས་གང་ཟག་གི་དབང་པོ་དང་བསྟུན་ནས་རྒྱས་བསྡུས་སྐབས་དང་སྦྱར་ནས་བཤད་པར་བྱའོ།
།ཡང་ན་སྔོན་འགྲོའི་སྐབས་སུ་དོན་རྒྱུད་ལ་བསྐྱེད་དུ་འཇུག་པ་ནི། །རྐུན་བུའི་ངོ་སྤྲོད་དོ།
།དངོས་གཞི་སྐབས་སུ་མདོ་རྒྱུད་ཀྱི་ལུང་ལ་བརྟེན་ནས་ཐག་ཆོད་དེས་ཤེས་བསྐྱེད་པ་ནི། ལུང་སྦྱོར་དང་ལྡན་པས་ཡིད་ཆེས་བསྐྱེད་པར་བྱའོ།
།ནཻ་གུ་མ་སྔོན་འགྲོ་ལ་གཙོ་བོར་བྱེད་ཅེས་པ། འདིའི་ལུགས་ཀྱི་སྔོན་འགྲོ་རང་ལ་སྐྱེ་དགོས། མ་སྐྱེས་ན་ངོ་མི་འཕྲོད་སྤྲད་ཀྱང་གོ་བ་ལས་མི་འོང་། དེས་ན་གནས་པ་ལ་གཙོ་ཆེར་ངོ་སྤྲད་པ་ནི། །གནས་པ་བྱུང་ན་འོད་གསལ་ངོས་ཟིན། དེ་ཟིན་པས་སྣང་ཐོག་ཏུ་རྐྱེན་དང་བསྲེ་ཤེས། དེ་ལ་བརྟེན་ནས་ཉམས་རྟོགས་ཐམས་ཅད་འཆར་རོ།
སློབ་དཔོན་ཞི་བ་ལྷས། ཞི་གནས་རབ་ཏུ་ལྡན་པའི་ལྷག་མཐོང་གིས། །ཉོན་མོངས་རྣམ་པར་སྤོང་བ་ཤེས་བྱ་སྟེ། །ཐོག་མར་ཞི་གནས་བཙལ་བྱ་དེ་ཡང་ནི། །འཇིག་རྟེན་ཆགས་པ་མེད་ལ་མངོན་དགས་འགྲུབ། །ཅེས་སོ།
།བླ་མ་སངས་རྒྱས་སྟོན་པའི་གསུང་ནས། སྤྲོས་བཅས་བསྐལ་པར་བསྒོམས་པ་བས། གནས་པ་ཡུད་ཙམ་ཅིག་དགའ། དེ་བྱུང་ན་ཡོན་ཏན་ཐམས་ཅད་འཆར། སྤྲོས་བཅས་ལོ་ཟླ་བས། སྟོང་ཉིད་གོ་བའང་དགའ་གསུང་ངོ་།
དེ་ནས་ཇི་ལྟར་གཅིག་ནས་གནས་པ་ཞིག་ནས་ཡོན་ཏན་འཆར་རོ།
།དམ་པ་རྒྱ་གར་གྱིས། རྣལ་འབྱོར་གྱིས་བསྒོམ་པ་བཤིག་ན་བཟང་། གནས་པ་བཤིག་ན་རྟོགས་པ་འཆར། །ཅེས་སོ།
།དེའི་དུས་སུ་བློ་ཆོད་ཆེར་བཏགས་ཐག་བཅད་ངེས་ཤེས་བསྐྱེད་ཅིང་། ཡིད་ཆེས་པ་དེ་སྐྱོང་བ་ཡིན་ནོ། །གསུང་ངོ་།
།དེའི་ངང་ནས་ལས་རྒྱུ་འབྲས་ཁྱད་དུ་མི་གསོད་དེ། ཀླུ་སྒྲུབ་ཀྱིས། ཆོས་རྣམས་སྟོང་པ་འདི་ཤེས་ནས། །ལས་དང་རྒྱུ་འབྲས་བརྟེན་པ་ནི། །ངོ་མཚར་བས་ཀྱང་འདི་ངོ་མཚར། །རྨད་བྱུང་བས་ཀྱང་འདི་རྨད་བྱུང་། །ཅེས་སོ།
།མཻ་ཏྲི་པ་དངོས་གཞི་ལ་གཙོ་བོར་བྱེད། ཅེས་པ་སྐྱོན་བཞི་རང་གྲོལ་ལོ།
།སུ་ཀ་སི་དྡྷི་རྗེས་ལ་གཙོ་བོར་ཅེས་པ། སྐུ་བཞི་རང་ཤར་རོ། །དེ་གསུམ་ཀ་དོན་ལ་འདྲའོ།
།གཉིས་པ་དངོས་གཞི་སྐྱོན་བཞི་དང་བྲལ་བར་བྱ་སྟེ། ཅེས་པ།
དང་པོ་ཉེ་དྲགས་པ་མ་མཐོང་བའི་སྐྱོན་ནི། སེམས་སྟོང་པ་ཆོས་སྐུ་དང་འདུ་འབྲལ་མེད་ཀྱང་། ཅེས་པ། དུས་གསུམ་རྒྱུན་ཆད་མེད་པར་རང་ལ་གནས། གཏན་དུ་འགྲོགས་ཀྱང་ཞལ་མ་མཇལ། ཧ་རེ་ལོང་དང་། ཅེ་རེ་ལོང་དུ་སོང་ནས་མ་མཐོང་ངོ་། གང་མ་མཐོང་ན། རང་ངོ་མ་མཐོང་ངོ་། གང་གིས་མ་མཐོང་ན། རང་གིས་མ་མཐོང་། ཇི་ལྟར་མ་མཐོང་ན། གཉིས་འཛིན་གྱི་དྲི་མ་དང་བཅས་པའི་ཚུལ་གྱིས་མ་མཐོང་ངོ་། དེས་ཅི་དང་འདྲ་བར་མ་མཐོང་ན། མིག་གིས་མིག་མ་མཐོང་པའམ། རྨུས་ལོང་ལ་གཟུགས་བསྟན་པ་བཞིན་ནོ།
།རྒྱུད་བླ་མ་ལས། ཕྲ་ཕྱིར་ཐོས་པའི་ཡུལ་མིན་ཕྱིར། །དོན་དམ་ཡིན་ཕྱིར་བསམ་པའི་མིན། །ཆོས་ཉིད་ཟབ་ཕྱིར་འཇིག་རྟེན་པའི། །བསྒོམ་པ་ལ་སོགས་ཡུལ་མ་ཡིན། །གང་ཕྱིར་གཟུགས་ལ་རྨུས་ལོང་བཞིན། །བྱིས་པས་དེ་མངོན་མཐོང་མ་གྱུར། །ཅེས་སོ།
།དེས་ན་ཐག་ཉི་དྲགས་པས་མ་མཐོང་བའི་སྐྱོན་གྱིས་འཁོར་བར་འཁྱམས། ཅེས་པ། ད་ནི་བླ་མའི་བྱིན་རླབས་དང་། ཐབས་ཁྱད་པར་ཅན་རང་བབས་རྣམ་གསུམ་ལ་བརྟེན་ནས། ཐ་མལ་གྱི་ཤེས་པ་གསལ་སྟོང་འཛིན་མེད་དེ་ཉིད། དགེ་སྡིག་ལུང་མ་བསྟན་གྱི་དྲི་མས་མ་གོས་ཤིང་། ཡུལ་དང་ཡུལ་ཅན་གཉིས་སུ་མེད་པའི་ཚུལ་དུ། རང་སྟོང་དུ་མཐོང་ཞིང་ངོ་ཤེས་པས། མ་མཐོང་བའི་སྐྱོན་ལས་གྲོལ་ལོ།
།རྒྱན་སྟུག་པོ་བཀོད་པ་ལས། རིག་པ་གསལ་སྟོང་ཀུན་གཞི་སྟེ། །ལུང་མ་བསྟན་དུ་གྲགས་པའོ། །ཅེས་དང་།
ཏིལློ་པས། ཀྱཻ་ཧོ་འདི་ནི་རང་རིག་ཡེ་ཤེས་ཏེ། །ངག་གི་ལམ་འདས་བློ་ཡི་སྤྱོད་ཡུལ་མིན། །ཏིལླི་ངས་ནི་ཅི་ཡང་བསྟན་དུ་མེད། །རང་གིས་རང་ཉིད་མཚོན་ཏེ་ཤེས་པར་བྱོས། །ཅེས་སོ།
།གཉིས་པ་ཟབ་དྲགས་པས་ངོས་མ་ཟིན་པའི་སྐྱོན་ནི། ཕྱག་རྒྱ་ཆེན་པོ་རང་ལ་ཤར་ཀྱང་། ཕྱོགས་གང་ན་ཡང་དཔེས་མཚོན་པར་མི་ནུས་ཤིང་། ཅེས་པ་དཔེ་དང་བྲལ་ཞིང་།
ཁ་དོག་ཡོན་ཏན་ཡི་གེ་དཔེ་དང་བྲལ། །ཅེས་དང་།
སྡུད་པ་ལས། ནམ་མཁའ་མཐོང་ཞེས་སེམས་ཅན་ཚིག་ཏུ་རབ་བརྗོད་པ། །ནམ་མཁའ་ཇི་ལྟར་མཐོང་སྟེ་དོན་དེ་བརྟག་པར་གྱིས། །དེ་ལྟར་ཆོས་མཐོང་པ་ཡང་དེ་བཞིན་གཤེགས་པས་བསྟན། །མཐོང་བ་དཔེ་གཞན་གྱིས་ནི་སྙད་པར་ནུས་མ་ཡིན། །ཅེས་སོ།
།བློའི་ཡུལ་ལས་འདས་ཏེ། ཟབ་དྲགས་པས་ཅེས་པས། ཐ་མལ་གྱི་ཤེས་པ་ཡིད་ལ་མི་བྱེད་པ་སྟེ། རླུང་སེམས་དབུ་མར་འཇུག་པ་དང་། ཆད་པ་ངལ་བསོ་བ་ལ་སོགས་པའི་དུས་སུ་སེམས་ཅན་ཐམས་ཅད་ལ་འཆར་ཏེ། ཐབས་ཁྱད་པར་ཅན་རང་བབས་རྣམ་གསུམ་དང་མ་འབྲེལ་བས། རྣམ་རྟོག་རྐུན་བུས་ཁྱེར་ཏེ། ཡེངས་མེད་ཀྱི་བྱ་ར་བ་དང་བྲལ། ངོས་མ་ཟིན་པའི་སྐྱོན་གྱིས་འཁོར་བར་འཁྱམས་སོང་། །ད་ནི་ཅིར་སྣང་ཐམས་ཅད་ལ་ལྟ་སྟངས་ཀྱིས་གཅེར་གྱིས་བལྟས་ལ། ངའི་སྔོན་འགྲོ་རང་ཤར་ནས་འདུག་སྙམ་དུ་ལམ་གྱིས་ངོས་བཟུང་ཞིང་། ངོ་ཤེས་ཀྱི་དྲན་པ་རྒྱུན་དང་བཅས་པས། ངོས་མ་ཟིན་པའི་སྐྱོན་ལས་གྲོལ་ཏེ། རང་ཤར་ངོས་བཟུང་བྱ་ཅེས་སོ།
།གསུམ་པ་སླ་དྲགས་ཡིད་མ་ཆེས་པའི་སྐྱོན་ནི། རང་བབས་སུ་ནམ་བཞག་ཀྱང་འཆར་ཏེ། སླ་དྲགས་པས་ཅེས་པ་དེ་ལས་མེད་ན་བལྟ་སླ་སྟེ་སྙམ་དུ་ཡིད་མ་ཆེས་པར། ཅེས་པ་ཡིད་ལ་བྱར་མེད་འདིས་བསྒོམ་གྱི་གོ་རང་ཆོད་དམ་སྙམ་དུ་ཐེ་ཚོམ་བྱེད་ཅིང་། ཅེས་པ་ངོ་སྤྲད་ཀྱང་མ་བསྒོམས་ན། གོ་བར་སོང་ནས་ཡིད་མ་ཆེས་པས། ཡེངས་མེད་དུ་བསྒོམ་པ་དང་བྲལ་བའི་སྐྱོན་གྱིས་འཁོར་བར་འཁྱམས་སོ།
།ད་ནི་བླ་མ་དང་གདམས་ངག་ལ་ཚད་མར་བྱས་ནས་གསོལ་བ་གདབ་ཅིང་། སྣང་བ་གང་ཤར་ལ་རང་ཐོག་ཏུ་གློད་ནས་འཛིན་མེད་དུ་བཞག་ཅིང་། ཡེངས་མེད་དུ་བསྒོམས་པས། ཐ་མལ་ངེས་པ་རང་རོ་ཤེས་ཤིང་། ངེས་ཤེས་ནང་ནས་སྐྱེས་ཏེ་ཡིད་ཆེས་པས། ཡིད་མ་ཆེས་པའི་སྐྱོན་ལས་གྲོལ་ཏེ་ཡེངས་མེད་ཆུ་བོ་བརྟེན་ཅེས་སོ།
བཞི་པ་བཟང་དྲགས་པས་བློར་མ་ཤོང་བའི་སྐྱོན་ནི། གསལ་སྟོང་བདེ་སྐུ་གསུམ་རང་ལ་ཤར་ཀྱང་བཟང་དྲགས་པས། ཅེས་པ་ད་ལྟ་འབྲས་བུའི་དུས་མ་ཡིན་སྙམ་དུ་བློར་མ་ཤོང་ངེས་ཤེས་མ་སྐྱེས་པས། རྟོགས་པ་ཐག་ཆོད་དང་བྲལ་བའི་སྐྱོན་གྱིས་འཁོར་བར་འཁྱམས་སོ།
།ད་ནི་བཀའ་མདོ་རྒྱུད་དང་། བསྟན་བཅོས་ཀྱི་ལུང་ལ་བསྟེན་ནས། ཐ་མལ་གྱི་ཤེས་པ་འདི་ཉིད་རང་སེམས་སྐྱེ་མེད་ཆོས་སྐུ་བཅིངས་གྲོལ་མེད་པར་ཐག་བཅད་ཅིང་ངེས་ཤེས་བསྐྱེད་པས། བློར་མ་ཤོང་བའི་སྐྱོན་ལས་གྲོལ་ཏེ། ཐག་བཅད་ངེས་ཤེས་བསྐྱེད་ཅེས་སོ།
།ཡང་ཉེ་དྲགས་པས་ངོ་མ་ཤེས། ཟབ་དྲགས་པས་ངོས་མ་ཟིན། སླ་དྲགས་པས་ཡིད་མ་ཆེས། བཟང་དྲགས་པས་བློར་མ་ཤོང་བའི་སྐྱོན་བཞི་ལས། ད་ནི་མོས་གུས་དང་། རང་བབས་གསུམ་ལ་བརྟེན་ནས། རང་སེམས་ཆོས་སྐུར་ངོ་ཤེས། ངའི་སྔོན་འགྲོ་རང་ཤར་ནས་འདུག་སྙམ་དུ་ལམ་གྱིས་ངོས་བཟུང་། ཡེངས་མེད་བསྒོམས་པས་ཡིད་ཆེས། མདོ་རྒྱུད་ཀྱི་ལུང་ལ་བརྟེན་ནས་ཐག་བཅད་ངེས་ཤེས་བསྐྱེད་པས། བློར་མ་ཤོང་པའི་སྐྱོན་བཞི་ལས་གྲོལ་ལོ།
།གསུམ་པ་རང་ཤར་དུ་བཞག་པའི་དུས་སུ་ཁ་དོག་དང་དབྱིབས་ལ་སོགས་པ་གང་དུ་ཡང་མ་གྲུབ་པས།
ཆོས་སྐུ་རང་ཤར་མཐར་ཐུག་གོ །ཡེ་ཤེས་ནི་ཆོས་ཀྱི་དབྱིངས་ཀྱི་ཡེ་ཤེས་སོ།
།སྟོང་པ་སྣ་ཚོགས་སུ་ཤར་བས་སྤྲུལ་སྐུ་རང་ཤར་རོ། །ཡེ་ཤེས་ནི་མེ་ལོང་ལྟ་བུའོ།
བར་གྱི་བདེ་བས་ལོངས་སྐུ་རང་ཤར་མཐར་ཐུག་གོ །ཡེ་ཤེས་ནི་སོ་སོར་རྟོག་པའོ།
།དེ་གསུམ་རང་བཞིན་གྱིས་དབྱེར་མི་ཕྱེད་པས་བདེ་བ་ཆེན་པོའི་འབྲས་བུ་སྐུ་བཞི་རང་ཤར་མཐར་ཐུག་གོ །ཡེ་ཤེས་ནི་མཉམ་པ་ཉིད་དོ།
།སྐུ་བཞིས་ཕྲིན་ལས་ལྷུན་གྲུབ་ཏུ་འབྱང་བས། བྱ་བ་གྲུབ་པའི་ཡེ་ཤེས་སོ།
།དེ་ཉིད་ལ་རྟོག་མེད་ཀྱི་ཆ་དེ་ཇི་ལྟ་བའི་ཡེ་ཤེས། མི་རྟོག་པ་སྣ་ཚོགས་སུ་སྣང་བ་དེ་ཇི་སྙེད་པ་མཁྱེན་པའི་ཡེ་ཤེས་སོ།
།དབྱེར་མི་ཕྱེད་པས་དབྱིངས་དང་ཡེ་ཤེས་གཉིས་སུ་མེད་པ་ཞེས་བྱའོ།
།ཅེས་པ་གསལ་སྟོང་འཛིན་མེད་ལ་སྐུ་བཞི་ཡེ་ཤེས་ལྔ་མཁྱེན་པ་གཉིས་ཚང་བ་ཡིན་ནོ།
།བོགས་འདོན་པ་ནི། །ཅེས་པ་ལ་གསུམ་ལས།
དང་པོ་ཐག་གཅོད་ངེས་ཤེས་བསྐྱེད་པ་ནི། སྡུད་པ་ལས། དེ་དག་དགེ་བའི་རྩ་བ་ཇི་སྲིད་མ་རྫོགས་པར། དེ་སྲིད་སྟོང་ཉིད་དམ་པ་དེ་ནི་ཐོབ་མི་བྱེད། ཅེས་སོ།
ཚོགས་བསག་ཅིང་དེ་རྣམས་ལ་ཅེས་པ། དུས་གསུམ་སངས་རྒྱས་བྱོན་ཀྱང་དེ་ལས་ལྷག་པར་བསྟན་དུ་མེད་པར་ཐག་བཅད་ངེས་ཤེས་བསྐྱེད་ཅིང་གསལ་སྟོང་འཛིན་མེད་ཀྱི་ངང་ལ་ཧད་དེ་བཞག་གོ
གཉིས་པ་མོས་གུས་ཚད་མེད་ནི། གསོལ་བ་དྲག་པོ་བཏབ་ཀྱི་ན། ཡང་སེམས་གསལ་སྟོང་འཛིན་མེད་ཀྱི་ངང་ལ་ཧད་དེ་བཞག་གོ །མི་གསེབ་དང་འགྲོ་འདུག་གི་དུས་སུ་མོས་གུས་གདུངས་གདུངས་པ་བྱས་ལ་ཧད་དེ་བཞག
།གསུམ་པ་སྙིང་རྗེ་ཚད་མེད་པ་ནི། སྙིང་རྗེ་ལ་ཡང་དེ་ཉིད་ཀྱི་ངང་ལས་འཁོར་འདས་ཐམས་ཅད་སྟོང་ཞིང་བདག་མེད་པ་ཅིག་ཡིན་པ་ལ། ང་བདག་ཏུ་བཟུང་ནས་འཁོར་བར་འཁྱམས་པ་སྙིང་རེ་རྗེ་སྙམ་དུ་བསྒོམ་ཞིང་ཧད་དེ་བཞག་གོ
།དེ་ནས་སྔོན་འགྲོའི་དམ་ཚིག་གི་གསང་བའི་རྡོ་རྗེ། ཅེས་པ་ནས་ཐ་མལ་ཤེས་པ་ཁྱོད་ལ་ཕྱག་འཚལ་ལོ། རང་ཤར་ཕྱག་རྒྱ་ཆེན་པོ་རྫོགས་སོ། །ཅེས་པའི་བར་དུ་རྡོ་རྗེའི་ཚིག་རྐང་བཤད་པར་བྱའོ།
།ཆོས་ཀྱི་ཆོས་ཉིད་ལ་རང་ཤར་ངོས་བཟུང་བྱ། ཐག་ཆོད་ངེས་ཤེས་བསྐྱེད། ཡེངས་མེད་ཆུ་བོ་བརྟེན། ཚད་མེད་གཉིས་ལ་འབད། ཡར་ངོ་བཞིན་དུ་འགྱུར། ལོ་ཟླས་མཐར་ཕྱིན་ནོ། དམ་ཚིག་ལ་ཡིད་གཉིས་སྤང་བར་བྱའོ།
ལྷ་སྐུ་གསལ་སྟོང་རླུང་དང་བསྲེ། རྣམ་རྟོག་མ་རིག་འགག་པར་འགྱུར།
།ཐ་མལ་ཤེས་པ་རླུང་དང་བསྲེ། ཉམས་མྱོང་ཡར་ངོ་བཞིན་དུ་འགྱུར།
།འོད་གསལ་ལྷ་སྐུ་རླུང་དང་བསྲེ། མཐར་ཐུག་འབྲས་བུ་མྱུར་ཐོབ་འགྱུར།
།སྔོན་འགྲོ་དངོས་གཞི་རྗེས་དག་ལ། །དང་པོའི་ཚད་དང་དེ་ཉིད་བརྟན་ཚད་དང་། །དངོས་གཞིའི་ཚད་དང་དེ་ཉིད་བརྟན་ཚད་དང་། །རྗེས་ཀྱི་ཚད་དང་དེ་ཉིད་བརྟན་ཚད་དམ་པའི་ཞལ་ལས་དྲིས། ཅེས་པ།
སྔོན་འགྲོའི་ཚད། མབཅོས་ཐ་མལ་གྱི་ཤེས་པ་རང་ཤར། དེ་བརྟན་པའི་ཚད་ལུས་ངག་གི་བྱ་བས་མི་འཕྲོག་པའོ།
།དངོས་གཞིའི་ཚད། སྣང་སེམས་དབྱེར་མེད་ཡིད་ལ་མི་བྱེད་པ་རང་ཤར། དེ་བརྟེན་པའི་ཚད་མཉམ་རྗེས་དང་བྲལ་བའི་ཁོར་མའོ།
།རྗེས་ཀྱི་ཚད། སྐྱེ་མེད་ལས་སྙིང་རྗེ་རང་ཤར། དེ་བརྟེན་པའི་ཚད་སྟོང་ཉིད་སྙིང་རྗེ་དབྱེར་མེད་ལས་མི་གཡོ་བའོ།
།འབྲས་བུའི་ཚད། བློ་འདས་ཟུང་འཇུག་རང་ཤར། དེ་མཐར་ཕྱིན་པའི་ཚེ། ཕྲིན་ལས་ཕྱོགས་མེད་ལྷུན་གྲུབ་རང་ཤར་རོ།
ཉིན་མཚན་བར་དོའི་འོད་གསལ་མ་བུར་བཅས། སྐུ་གསུམ་དབྱེར་མེད་རང་ཤར་ཆེན་པོར་ལྟོས། །མདོ་རྒྱུད་ཀུན་ཏུ་བསྟན་ཡང་རང་བཞིན་གང་། །དེ་ཕྱིར་བླ་མའི་དྲིན་ལས་རྟོགས་པར་གྱིས། །ཡིད་ལ་མི་བྱེད་རེ་དོགས་ཀུན་བྲལ་བའི། །ཐ་མལ་ཤེས་པ་ཁྱོད་ལ་ཕྱག་འཚལ་ལོ། །མི་རབས་བདུན་དུ་རྒྱལ་བརྒྱུད་པིར་གྱི་ཁ། །རྡོ་རྗེ་རྒྱ་ཡིས་བཏབ་བོ་ས་མ་ཡ། །མ་ཧཱ་མུ་དྲ་རྫོགས་སོ།

།ཕྱག་རྒྱ་ཆེན་པོ་ཐིག་ལེ་ལས། །ཕྱག་ནི་སྟོང་པའི་ཡེ་ཤེས་ཏེ། །རྒྱ་ནི་འཁོར་བའི་ཆོས་ལས་གྲོལ། །ཆེན་པོ་ཟུང་དུ་འཇུག་པ་སྟེ། །ཕྱག་རྒྱ་ཆེན་པོ་ཞེས་བརྗོད་དོ། །ཅེས་སོ།
།ཡེ་ཤེས་ཀྱི་ཌཱ་ཀི་མ་དེ་ཉིད་ལ། གསེར་སྲང་ལྔ་བརྒྱ་ཕུལ་ནས་ཞུས་ཏེ། ལོ་ཙཱ་བ་གླན་དར་མ་བློ་གྲོས་ཀྱི་བསྒྱུར་ནས། བདག་ཁྱུང་པོ་རྣལ་འབྱོར་པས་ཉམས་སུ་མྱོང་བར་བྱས་སོ།
།རྡོ་རྗེ་ནཻ་གུའི་ཞལ་གསུངས་ལ། ཚིག་ལྷད་མ་ཞུགས་མཁའ་འགྲོ་འདུ། །ངེས་ཤེས་སྐྱེ་ཞིང་བྱིན་རླབས་འཇུག །བརྒྱུད་པའི་བྱིན་རླབས་ལུང་སྦྱོར་གྱིས། །ཡིད་ཆེས་བསྐྱེད་པའི་མཆན་ཆུང་འདི། །མཁས་གྲུབ་ཆོས་རྗེའི་གསུང་བཞིན་དུ། །སྔགས་འཆང་དྷྭ་ཛ་ལཀྵས་བཀོད། །མཆན་དཀྱུས་མ་འཇུག་དེ་ལྟར་མཛད། །དགེ་བས་ལུང་ཅན་བླ་མ་ཡི། །བྱིན་རླབས་རབ་ཞུགས་གནས་ལུགས་ཀྱི། །དོན་རྟོགས་སྐུ་བཞིའི་དཔལ་སྤྱོད་ཅིང་། །འགྲོ་དོན་རྩོལ་མེད་ལྷུན་གྲུབ་ཤོག
།རང་གི་སློབ་མས་འདིའི་ཁྲིད་ཐོབ་པ་མ་གཏོགས་པ་ལ། དཔེ་མ་སྟོན་ཅིག །ཆོས་བདག་མཁའ་འགྲོའི་བཀའ་རྒྱ་ཡོད་པ་ཡིན་ནོ།
།འགྲོ་དོན་དཔག་མེད་འགྲུབ་པར་གྱུར་ཅིག །མངྒ་ལཾ།། །།