Mgon po yid bzhin nor bu'i bum gter bca' thabs

Resource ID	Gönkar10
Title	mgon po yid bzhin nor bu'i bum gter bca' thabs
Alt. title	mgon po gzi ldan gyi sgrub thabs
Topics	White protector
Sub-Topics	Treasure vase
Link	BDRC W23681 (p. 239)
Notes	Same text as mgon po gzi ldan gyi sgrub thabs

༄༅། །མགོན་པོ་ཡིད་བཞིན་ནོར་བུའི་བུམ་གཏེར་བཅའ་ཐབས་བཞུགས།

མགོན་པོ་གཟི་ལྡན་ཐུགས་རྗེ་ཅན་ལ་ཕྱག་འཚལ་ལོ།
།བུམ་པ་ཁ་ཡངས་ཤིང་མཆུ་ཡོངས་སུ་གྲགས་པ་དང་ལྡན་པ། མ་ཆག་པ། མ་གས་པ། ལྷན་པ་མེད་པ། དྲི་མ་དང་བྲལ་ཞིང་གཙང་བའི་ནང་དུ། ནས་དཀར་མོ་སད་ལ་སོགས་པའི་སྐྱོན་དང་བྲལ་ཞིང༌། སྦུན་སོག་དང་སྲན་མ་དང༌། རྡོ་ལ་སོགས་པ་གཅིག་ཀྱང་མེད་ཅིང་ཕྱུག་པོའི་བང་མཛོད་ནས་བྱུང་བའམ། ཡང་ན་འབྲས་དཀར་མོ་མ་གྲུས་པ་སྟེ། དེ་གཉིས་གང་ཡང་རུང་བས་ཁེངས་པར་བཀང༌། དེའི་སྟེང་དུ་གསེར། དངུལ། བྱེ་རུ། མུ་མེན། གཡུ་རྙིང༌། ཟངས། པདྨ་རཱ་ག །དུང་ལ་སོགས་པ་རིན་པོ་ཆེ་རྙེད་ཚད། གོས་དར་བཟང་པོའི་རས་མ་རིགས་མི་གཅིག་པ་རྙེད་ཚད། ཇ་དཀར་ནག་དང༌། ཤ། མར། བུ་རམ། རྒུན་འབྲུམ་ལ་སོགས་པའི་ཟས་སྣ། ཨ་རུ་ར་རྣམ་རྒྱལ་ལམ། མ་རྙེད་ནའང་གཞན་གསེར་མདོག་བཟང་པོ་དང༌། བཟང་དྲུག་དང༌། ག་བུར། ཨ་ག་རུ། ཙནྡན་དཀར་དམར། དབང་ལག་ལ་སོགས་གཞུག་ཅིང༌། དེ་དག་ནི་དབུས་སུ་བུམ་པའི་མགྲིན་པ་དང༌། ལྟོ་བའི་མཚམས་ལས་ཅུང་ཟད་མཐོ་བ་ཙམ་དུ། མགོན་པོ་གཟི་ལྡན་གྱི་སྐུ་ཙཀླི་རབ་གནས་ཚུལ་བཞིན་དུ་བྱས་པ་བུམ་པའི་མཆུ་ལ་བརྟེན་ཅིང༌། བུམ་རྫས་ཀྱི་ནང་དུ་ནུབ་པར་བཞུགས་སུ་བཅུག །བུམ་པའི་མཆུ་རང་ལ་བསྟན། ཞག་རེ་ལ་ཐུན་བཞིར་བུམ་པའི་ནང་དུ་མགོན་པོ་བསྐྱེད། ཡེ་ཤེས་པ་གཞུག །གསོལ་བ་དྲག་ཏུ་གདབ། གཏོར་མ་ཆེ་བའི་ནང་དུ་གཏོར་ཆུང་བསྟབ། གཏོར་མ་ཆེ་བ་ནི་ནས་དཀར་སོ་གཙང་མའི་རྗེན་ཕྱེ་བཏགས་ལ། དཔལ་བཤོས་ཟུར་གསུམ་ཁྲུ་གང་བ། མར་དང༌། སྦྲང་རྩི་དང༌། བུ་རམ་གྱིས་བརྒྱན་ཅིང་རྩེ་མོར་མར་གྱི་ནོར་བུ་འབར་བ་དང༌། མདུན་ཕྱོགས་ཀྱི་ལོགས་ལ་མར་དཀར་པོ་ཆེན་པོ་བྲིས་པ། མཐེབ་ཀྱུ་བརྒྱ་རྩ་བརྒྱད་ཀྱི་བཅད་ཁ་ནང་དུ་བསྟན་ནས་བསྐོར་བ། སྣོད་ཟངས་ཀྱི་ཀ་ཊོ་ར་ལ་སོགས་པ། གས་ཆག་དང༌། བུག་པ་དང༌། ལྷན་པ་ལ་སོགས་མེད་པ་ཆེན་པོ་བྱ། ཙཀླི་དང༌། མེ་ལོང་དང༌། དར་དཀར་དམར་མཐིང་གསུམ་གྱིས་མདའ་རྒོད་སྒྲོ་མ་མེས་མ་རེག་པ་ལ་བརྒྱན་པའི་མདའ་དར་གཟུག །ཐུན་དང་པོ་ལ་གཏོར་ཆུང་ཅིག་བླ་མ་ཡི་དམ་ལ་འབུལ། དེ་མ་གཏོགས་ཐུན་བཞི་པོ་རེ་རེ་ལ་གཏོར་ཆུང་ལྔ་ལྔ་མགོན་པོ་རང་ལ་དབུལ། གཏོར་མ་ཆེ་བ་དང་པོ་ནས་སྣོད་ཁེངས་པ། མཐེབ་ཀྱུ་སྣོད་ཕྱིར་མ་ཐལ་བ་བྱ། གཏོར་ཆེན་མགོན་པོར་བསྐྱེད། ཡེ་ཤེས་པ་གཞུག །དེ་དང་བུམ་པའི་ནང་གི་མགོན་པོ་དབྱེར་མེད་དུ་མོས་ནས། གཏོར་ཆུང་དབུལ། གཏོར་ཆུང་ནི་གཏོར་མ་ཆེ་བའི་མདུན་དུ་སྣོད་གཞན་བཞག་པའི་ནང་དུ་འབུལ་དུ་རུང༌། གཏོར་མ་བྱིན་རླབས་གཞུང་བཞིན་ནོ། །གཏོར་ཆུང་འབུལ་བའི་ཚེ་རེ་རེ་ལག་པ་གཡས་པས་བཟུང་སྟེ། རྩ་སྔགས་སིདྡྷི་མ་ཡི་གེ་བཅུ་གསུམ་གྱི་མཐར། བ་ལིཾ་ཏ་ཁ་ཁ་ཁཱ་ཧི་ཁཱ་ཧི་བཏགས་ནས་དབུལ། སྒྲུབ་པ་ཐོན་ཁའི་ཐུན་ཐ་མ་ལ། གཏོར་མ་ཆེ་བའི་མགོན་པོ་ནམ་མཁའ་ལ་བཞུགས་སུ་གསོལ་ནས། གཏོར་མ་ཆེ་བ་ལེགས་པར་བྱིན་གྱིས་བརླབས་ཏེ་དབུལ། ཐུན་ཐམས་ཅད་ལའང་གཏོར་མ་ཆེ་བ་མཐེབ་ཀྱུ་རེ་རེས་གསོ། སྒྲུབ་པའི་བར་ལ་མཚམས་དམ་པར་བཅད། གཞན་ལ་གསང༌། ངག་བཅད། སྒྲུབ་རྫས་ཕྱིར་མི་འདོན། སྟན་མི་སྤྲུག །ཕྱག་དར་མི་བྱ། དབང་སྡུད་ཀྱི་འཁོར་ལོ་བྲིས་ནས་རབ་གནས་བྱས་པ་སྐུད་པ་དམར་པོས་དཀྲིས་ཏེ། སྒྲུབ་པའི་བར་བུམ་པའི་མགུལ་པར་བཏགས་ལ། སྒྲུབ་པ་ཐོན་དུ་ཉེ་བའི་ཐུན་ཐ་མའི་ཚེ། གཏོར་མའི་མགོན་པོ་ནམ་མཁར་བཏེག་པ་དེ་ལ་གཏོར་མ་ཕུལ་ཚར་ནས་འཁོར་ལོ་ལ་བསྟིམས་ཏེ་འཁོར་ལོ་རང་གི་ལུགས་ལ་བཅངས་པས། གང་འདོད་པ་དབང་དུ་འགྱུར་རོ། །སྒྲུབ་པ་ཐོན་ནས་ཐོད་པ་དུམ་བུ་གཅིག་ལ་མཚན་ལྡན་གྱི་ནང་དུ་སྔར་གྱི་བུམ་རྫས་རྣམས་ནས་དང་བཅས་པས་བཀང་བའི་ནང་དུ་བུམ་པའི་ནང་གི་སྐུ་ཙཀླིའི་ཞལ་ཐོད་པའི་དཔྲལ་བར་བསྟན་ནས། སྐུ་ནས་ལ་ནུབ་པར་བྱས་ཏེ་བཅུག་པ་རང་གི་ཉེ་བའི་ཁང་པའམ། རང་གི་མཆོད་ཁང་དུ་གཞན་གྱིས་མི་མཐོང་བར་བཞུགས་སུ་བཅུག་པའི་མདུན་དུ་འཛིན་གཏོར་བཅས་ཏེ་ནུབ་རེ་བཞིན་གསོ་ཞིང་དབུལ། གཞན་བུམ་པའི་རྫས་ཀྱི་ནས་སམ་འབྲས་ལྷག་མ་རང་ཁོ་ནས་ལོངས་སྤྱད་ཅིང༌། སྒྲུབ་པའི་གཏོར་མའང་རང་ཁོ་ནས་དངོས་གྲུབ་དུ་བླང༌། སྒྲུབ་རྫས་རྣམས་དང་པོ་འཚོལ་བའི་ཚེ་དམ་ཉམས་དང་གྲིབ་ཅན་གྱི་ལག་ནས་བྱུང་བ་དང་མ་འདྲེས་པར་བྱ་ཞིང་བསང་སྦྱངས་ལེགས་པར་བྱས་ནས། གུ་གུལ་གྱིས་བདུགས་ཏེ་བུམ་པའི་ནང་དུ་གཞུག་པར་བྱ་ཞིང༌། ཆང་ཕུད་དང༌། གཏོར་ཕྱེ་མ་འབགས་པ་གལ་ཆེའོ།
།ཞལ་ཤེས་ཞིབ་པར་ཡི་གེར་བཀོད་པ་ཡིན་པས། ཆེས་ཤིན་ཏུ་གསང་བར་བྱའོ། །དཔེ་སུ་ལའང་མི་བསྟན་ནོ། །ས་མ་ཡ་རཀྵནྟུ།།