Bla ma zhang zhong pa'i rlung shing rta can

Resource ID	SCv7p655
Title	bla ma zhang zhong pa'i rlung shing rta can
Topics	Prana
Author	Khyungpo Neljor
Associated Person	Atayavajra Rahula
Link	BDRC W23922 BDRC W3CN18508 (v2p.522)
Notes	According to the biography of Khyungpo Neljor, Rahula transmitted him rlung shing rta can. Linked to bla ma zhong zhong pa'i rlung shing rta can.

༄༅། །བླ་མ་ཞང་ཞོང་པའི་རླུང་ཤིང་རྟ་ཅན་ནི།

བླ་མ་དམ་པའི་ཞབས་ལ་གུས་བཏུད་ནས། །མན་ངག་རིམ་པ་བྲི་བར་བྱ། །རླུང་ཤིང་རྟ་ཅན་ཞེས་བྱ་བ། བླ་མ་དམ་པ་ཨ་དྭ་ཡ་བཛྲ་ནས་བརྒྱུད་པའི་གདམས་ངག་འདི་ལ་གདོན་གཉིས་ཏེ། ལས་དང་པོ་པ་ཆོ་གས་རྒྱུད་སྨིན་པར་བྱ་ཞིང་། །སྣོད་དུ་རུང་བའི་ཕྱིར་རླུང་སེམས་བཙན་ཐབས་སུ་བཟུང་བའི་གདམས་ངག་དང་། །དངོས་གཞི་གཉིས་སོ།

དང་པོ་རྟེན་གྱི་གང་ཟག་དབང་བཞི་ལེགས་པར་ཐོབ་ཅིང་། །དམ་ཚིག་མ་ཉམས་པས། བླ་མ་མཉེས་པར་བྱས་ནས། ལན་མང་དུ་གསོལ་བ་བཏབ་ལ་ཞུ་བར་བྱའོ།
།དེ་ལྟ་བུའི་སློབ་མ་དེ། བླ་མ་དམ་པ་མཚན་ཉིད་བཞི་དང་ལྡན་པས་རྗེས་སུ་འཛིན་པར་འདོད་ནས་འདི་ལྟར་བྱ་སྟེ།
དང་པོ་ཟླ་བ་ཡར་གྱི་ངོ་ཚེས་གྲངས་དང་། །སྐར་མ་དང་། །དུས་ཚོད་བཟང་པོའི་ཚེས། དཀོན་མཆོག་ལ་མཆོད་པ་རྒྱ་ཆེན་པོ་དང་། །ཚོགས་ཀྱི་འཁོར་ལོ་དང་། །གཏོར་མ་ལ་སོགས་པ་བཟང་པོ་བཤམས་ལ། ཤིང་ཁྲུ་དོ་སོར་བཞི་བཞི་ཙམ་པ་གཅིག་ལ་ཁྲི་གཉིས་བྱས་ལ། དིའི་སྟེང་ན་ཕར་ཤིང་ཁྲུ་དོ་ལྟག་པ་གཅིག་བཏང་ལ། ཤིང་རྐང་གཉིས་ཀྱི་འོག་ནས་ཡར་ལ་གཞུ་སྲད་བུ་དང་བཅས་པ་གཉིས་བཅིངས་ལ། དེ་ལ་སློབ་མ་བསྐྱོན་ལ་གདམས་ངག་བསྟན་པར་བྱ་སྟེ། སློབ་མའི་སྟེང་རླུང་འོག་རླུང་སྡོམ་དུ་བཅུག་ལ་རྐང་པའི་མཐེ་བོང་གཉིས་ཀྱི་བར་དུ་གཞུའི་ཆངས་ཟུངས་རེག་ཙམ་དུ་བྱས་ལ། ལག་པ་གཉིས་བསྣོལ་ལ་རང་གི་ལུས་ཀྱི་ནང་ཁོང་སྟོང་དུ་ཡོད་པའི་དཀྱིལ་དྲང་པོ་ན་ཡར་ལ། རྩ་ཨ་ཝ་དྷུ་ཏཱི་ཡོད་པའི་ནང་ན་ཡར་ལ། རང་གི་ཤེས་པ་གཞུའི་སྦྲེང་སྒྲས་རྐྱེན་བྱས་ནས། ཕྱུ་རུ་རུ་སོང་ནས་མདའ་ལྟར་འཕང་བ་དང་། །འདར་བ་ལ་སོགས་པ་འབྱུང་སྟེ། དུས་དེ་ཙ་ན། རང་གིས་གམ་དུ་བསྡད་དེ་ཚོད་བཟུང་། རོལ་མོ་རྣམ་པ་སྣ་ཚོགས་པའི་སྒྲ་བརྡུང་། །གུ་གུལ་གྱི་དུད་པས་བགེགས་བསྐྲད། བླ་མ་ལ་ཡང་གསོལ་བ་གདབ་སོ། །དེ་ལྟར་བྱས་པས་ཤེས་པ་ཡར་ལ་འཕྱོན་གཅོད་པ་ལ་སོགས་པ་བྱའོ།
།དེ་ནས་མ་བྱུང་ན་ཤེས་པ་སྒྲིམ་དུ་བཅུག་ལ་དད་གུས་བསྐྱེད་ལ། ལག་པ་གཉིས་སྤྱི་བོའི་སྟེང་དུ་རྙོགས་ཚད་དུ་ཐལ་མོ་སྦྱོར་དུ་བཅུག་ལ། འོག་ཏུ་རླུང་གི་དཀྱིལ་འཁོར་གཞུའི་དབྱིབས་ཅན་བསམས་ལ། རང་གི་གསང་བའི་རྡོ་རྗེ་མདའ་རུ་བསམ་ལ། གཞུའི་སྦྲེང་སྒྲས་རང་གི་ཤེས་པ་ཨ་ཝ་དྷུ་ཏཱི་ནས་ཡར་ལ་བཏོན་ལ། ཉི་ཟླའི་བར་དུ་འཕང་ངོ་། །དེས་ངེས་པར་འབྱུང་ངོ་།

།ད་ནི་བསྒོམས་པའི་དངོས་གཞི་ལ་བཞི་སྟེ། སྦྱོར་བ་དོན་གྱི་གདམས་ངག །ཡི་གི་དོན་གྱི་གདམས་ངག །དེ་ཁོ་ན་ཉིད་ཀྱི་གདམས་ངག །ཕྱག་རྒྱ་ཆེན་པོའི་གདམས་ངག་གོ
།དེ་ལ་དང་པོ་སྦྱོར་བ་དོན་གྱི་གདམས་ངག་ནི། ངོན་ལ་བསྐྱེད་རིམས་ཡིན་གསུང་སྟེ། རང་ཉིད་དང་པོ་དབང་བསྐུར་བའི་དུས་ཉིད་ནས། སེམས་དཔའ་གསུམ་བརྩེགས་སུ་ཡོད་པའི་རང་གི་འོག་སྒོའི་ཐད་ཀའི། ལྟེ་བའི་ཐད་ཀ་ནས་ཡེ་ཤེས་སེམས་དཔའ་སྔ་མ་ལྟར། རྩ་ཨ་ཝ་དྷུ་ཏཱིའི་ནང་ན་ཡར་ལ་ཕྱུ་རུ་རུ་བསྟོན་ལ། སྟེང་ན་ཡར་ཉི་ཟླ་ཐུག་པར་མདའ་ལྟར་འཕངས་ལ་བཏང་། །ནམ་མཁའ་ལྟར་རྒྱ་བསྐྱེད་དེ། དེ་ཐམས་ཅད་ལྷ་ཡེ་ཤེས་སེམས་དཔར་བྱས་ལ་དེ་ལ་ཤེས་པ་གཏད། དབུགས་ཀྱི་མི་ཐུབ་པ་འདྲ་ན་ཡར་མར་ལ་ཞུགས་པར་བསམ་མོ།
།གཉིས་པ་ཡི་གེ་དོན་གྱི་གདམས་ངག་ནི། ཡང་རང་གི་ལྟེ་བ་ན་ཡར་ལ། ཨོཾ་ཨཱཿཧཱུྃ་གསུམ་གྱི་བར་དུ་རང་གི་ཡི་དམ་གྱི་སྔགས་སྔ་མ་ལྟར་ཕྱུ་རུ་རུ་སོང་བར་བསམས་ལ། མདའ་ལྟར་འཕངས་ཏེ་གྱེན་ལ་ཉི་ཟླ་ལ་ཐུག་པར་འཕངས་པར་བསམ། ནམ་མཁའ་ལྟར་རྒྱ་བསྐྱེད་པ་སྟེ། ཐམས་ཅད་སྔགས་སུ་བསམ་མོ། ཡང་སྔ་མ་ལྟར་ཐམས་ཅད་རང་ལ་ཐིམ་པར་བསམ་མོ།
།གསུམ་དེ་ཁོ་ན་ཉིད་ཀྱི་གདམས་ངག་ནི། ཡང་རང་གི་ལྟེ་བ་ནས་སྟོང་པར་སོང་བར་བསམ་སྟེ། ཡང་ཤེས་པ་མདའ་ལྟར་འཕང་། །ནམ་མཁའ་ལྟར་རྒྱ་བསྐྱེད་དེ་ཐམས་ཅད་སྟོང་པར་བསམ་མོ།
།བཞི་པ་ནི། དེ་ཐམས་ཅད་ཟུང་འཇུག་སྟེ། ལྷ་ཡང་ཡིན། སྔགས་ཡང་ཡིན། སྟོང་པ་ཡང་ཡིན་ཏེ། གཉུག་མ་རང་བཞིན་མེད་པའི་གནས་ལུགས་དེ་ལ་ཤེས་པ་མ་བཅོས་པར་འཇོག་པའོ།
།དེ་ལྟར་དུ་བཞི་ཅར་བསྒོམས་པས། འཇོག་ཁར་སེམས་དཔའ་གསུམ་རྩེགས་སུ་ཡོད་པའི་ཏིང་ངེ་འཛིན་སེམས་དཔའ་ཀླུ་སྒྲུབ་ལྟར། ཧཱུྃ་དུ་ཡོད་པ་ལ་སྔགས་པ་ཀྱིས་བསྐོར་ནས་ཡོད་པར་བསམ་མོ།
།བྱིང་རྒོད་བྱུང་ན་མདའ་ལྟར་འཕང་བ་དང་། །ནམ་མཁའ་ལྟར་རྒྱ་བསྐྱེད་པ་སྟེང་འོག་ཏུ་བྱའོ།
།མ་ལེགས་རན་ཙམ་ན། མཁའ་འགྲོས་བཟོད་པར་མཛོད། །དེའི་དགེ་བ་བྱང་ཆུབ་ཏུ་བསྔོ། །བླ་མ་དམ་པ་ཁྱུང་པོ་རྣལ་འབྱོར་པའི་གསུང་བཞིན་དུ་ལེགས་པར་བྲིས་པའོ། །རྫོགས་སོ། །ལྟ་བ་མ་བཅོས། བསྒོམ་པ་མི་རྟོག །གྲོགས་སྟོང་གསལ། ཐབས་མ་ཡེང་པའོ།།